NEN Marso 26, 1937, akasabin siansia ed Sydney, Australia so duaran naknaksawan ya biahero tan maraborabok so trak da. Sakey taon lay apalabas manlapu nen inmalis irad syudad. Nambiahe ray masulok ya 19,300 kilometro diad ararawi tan mairap a sabien iran lugar. Sarayan lalaki et si Arthur Willis tan Bill Newlands. Aliwa ran managdiskobre odino mahilig ya manpasyar noagta maseseg iran payunir ya desididon mangipasabi ed maong a balita na Panarian na Dios diad maaw-awang tan ararawi iran lugar diad Australia.

Diad bandad sampot na 1920’s, apulongan na melag a grupo na saray Estudyante na Biblia * diad Australia iray syudad tan baley ya asingger ed dayat. Say maawang ya parte na dalin da et desierto tan dagdaiset so manaayam, tan say kabaleg to et masulok ya kapaldua na America. Balet, sankanonot na saray agagi ya saray papatumbok nen Jesus et nepeg ya mantasi nipaakar ed sikato “diad sankaarawian a pasen na dalin,” kaiba la ray ararawin lugar diad Australia. (Gawa 1:8) Pero panon dan nasumpal itan ya baleg ya kimey? Nanmatalek ira ya bendisyonan nen Jehova so sagpot da, kanian determinado ran gawaen so anggaay nayarian da.

Nen 1929, nanggawa na matibay iran van iray kongregasyon ed Queensland tan Western Australia ya usaren dad pampulong ed ararawin lugar. Inasikaso iratan na saray mabibiskeg ya payunir ya sarag day manmaneho ed mairap iran dalan tan sarag dan apigerey luluganan no naderal. Asabi na sarayan payunir iray lugar ya agnin balot apulongan.

Saray payunir balet ya anggapoy isaliw day luganan et nambiahe ra panamegley na bisikleta. Singa bilang, nen 1932, si Bennett Brickell ya mantaon na 23 et sinmipot ed Rockhampton, Queensland parad limay bulan ya pampulong tod arawin parte ed norte. Amayamay so awit to, wala ray ules, kawes, naakan, tan dakel ya libro. Anggano maimpis lay dalig na bisikleta to, intuloy to ni, ta matalek ya sikatoy iwanwan nen Jehova. Diad samay sampot lan biahe to, inanosan ton binisikletay 320 ya kilometro pian nasabi iray pasen ya dati et wala ray biaheron inaatey lapud napgaan  ira. Diad sinmublay ya 30 taon, biniahe nen Brother Brickell so nilibu-libon kilometro ed Australia panamegley na bisikleta, motor, tan kotse. Inggapo toy panagpulong a kimey ed saray Aborigine tan tinmulong pian niletneg iray balon kongregasyon, kanian sikatoy akabkabat tan rerespetoen na totoo ed saray ararawin lugar na Australia.

Sakey so Australia ed saray bansan dagdaiset so populasyon, lalo lad saray ararawin probinsya. Kanian nansagpotan na saray totoo nen Jehova ya anapen iray totoo ed ararawin parte na kontinente.

Saray payunir ya si Stuart Keltie tan William Torrington et talagan nansagpot. Nen 1933, bineltang day Simpson Desert, say maaw-awang ya desierton kabueran, pian manpulong ed baley na Alice Springs ya walad pegley na kontinente. Nen aderal so melag ya kotse da tan intilak da la, intuloy da nin siansiay nambiahe ed pampulongan da. Say niluganan da et kamelyo, anggano pukol si Brother Keltie tan sinuldongay kiew so sali to! Nambunga so sagpot na saray payunir nen akatongtong day manager na hotel diad William Creek, diad arawdawin istasyon na tren. Sayan manager et si Charles Bernhardt, tan ag-abayag et inawat toy katuaan, inlako toy hotel to, tan 15 taon ya nampayunir a bukor diad saray kelang tan sankaarawian ya lugar ed Australia.

Talagan kaukolan na saray payunir nensaman so pakpel tan paot pian nasarag da ray subok. Aminsan, sanen nampulong si Arthur Willis tan Bill Newlands, ya abitla ed gapo, ed kadesiertoan na Australia et agaylay kasil na uran, kanian say kadesiertoan et nagmaliw ya singa dayat na pitek tan duay simba dan biniahe so 32 kilometro. No maminsan, manlinglinget tan agaylay kesaw dan mangitutulak ed trak da ya nikutep ed kabueran, no maminsan balet et diad mabaton kapalandeyan tan saray ilog so dadalanen da. No naderal so trak da, tan mabetbet itan ya nagagawa, manakar odino manbisikleta ra paonlad sankaasinggeran ya baley insan ira manalagar na pigaran simba antis ya onsabi so sasaliwen dan piyesa. Anggano agaylay irap da, nansiansia ran positibo. Oniay imbaga nen Arthur Willis ed magasin ya The Golden Age: “Anggapoy mairap odino andukey ya biahe parad saray tasi To.”

Impaliwawa na abayag a payunir ya si Charles Harris ya akatulong so pambukbukor tan irap ya naeksperiensya da pian mas onapit irad si Jehova. Inyarum to: “Mas alemew so bilay no daiset labat so awit mo. No si Jesus et ayos labat ed sikatoy onugip ed paway no nakaukolan, di ontan met so gawaen tayo no kaukolan lapud asainmin tayo.” Tan ontan so ginawa na dakel ya payunir. Talagan pisalsalamatan tayoy impasyan sagpot da lapud akasabi so maong a balita ed amin ya lugar ed satan a bansa, tan dakdakel so atulongan dan ondapag ed Panarian na Dios.