DIA 26 di mart 1937, dos hòmber agotá di un biahe largu a kore pokopoko den nan pikòp tur na tera yega Sydney, Australia. Un aña mas promé nan a sali for di e stat akí pa biaha mas ku 19.300 kilometer i pasa dor di algun di e regionnan di mas remoto i yen di seru, piedra i baranka di e kontinente. No tabata trata akí di eksploradó ni aventurero. Arthur Willis i Bill Newlands tabata djis dos di e pioneronan zeloso ku tabata determiná pa hiba e bon notisia di e Reino di Dios na hende ku tabata biba den e inmenso desierto di Australia.

Te na final di añanan ’20, e kantidat chikitu di Studiante di Beibel * na Australia tabata prediká prinsipalmente den stat- i pueblitonan kantu di kosta i den bisindario. Mas den interior di e pais tin un inmenso desierto kaminda masha poko hende ta biba; un region ku ta mas grandi ku mitar di Merka. Pero e rumannan tabata sa bon ku e siguidónan di Hesus mester a prediká tokante dje “te na e parti mas leu di tera,” inkluso e desierto australiano. (Echo. 1:8) Ma kon nan lo por a kumpli ku un tarea enorme asina? Nan tabatin pleno konfiansa ku Yehova lo a bendishoná nan esfuersonan, i nan tabata determiná pa hasi nan bèst.

Na 1929, un kongregashon na Queensland i un na wèst di Australia a ekipá algun vèn ku tur loke tabata nesesario pa e pioneronan por a bai prediká den e regionnan parti paden di e pais. Den nan tabatin algun pionero kapas ku por a dil ku e kondishonnan difísil di e teritorio i drecha e vènnan ora nan a daña. E pioneronan akí a bai hopi lugá kaminda nunka promé no a haña testimonio.

Pioneronan ku no por a afòrt un vehíkulo tabata bai prediká ku baiskel. Por ehèmpel, na 1932, Bennett Brickell, di 23 aña di edat, a sali di Rockhampton, Queensland, i a pasa sinku luna ta prediká den regionnan aislá den nort di e estado ei. Riba su baiskel mal kargá, e tabatin laken, paña,  kuminda i un kantidat grandi di buki. Ora e tayernan di su baiskel a gasta, el a sigui padilanti ku e konfiansa ku Yehova lo a yud’é. El a pusha su baiskel e último 320 kilometernan di su biahe dor di regionnan kaminda hende a yega di muri di set. Durante e siguiente 30 añanan, Ruman Brickell a biaha sientos di míles di kilometer rònt Australia riba baiskel, bròmfits i den outo. E ta esun ku a kuminsá ku e trabou di prediká na e aborígennan, òf hendenan nativo, i a yuda forma kongregashon nobo i a bira bon konosí i respetá entre e habitantenan.

Australia ta un di e paisnan na mundu ku e densidat di poblashon di mas abou, esta, ku ménos hende ta biba den un área; foral meimei di e pais tin masha poko hende ta biba. Pues, Yehova su sirbidónan di bèrdat a demostrá nan determinashon pa buska hende te na e parti mas leu di e kontinente.

E pioneronan Stuart Keltie i William Torrington a demostrá e determinashon ei. Na 1933, nan a krusa Simpson Desert, un desierto enorme yen di seru di santu, pa prediká den e pueblito di Alice Springs, ku ta keda meimei di e kontinente. Ora nan outo chikitu a daña i mester a keda atras, Ruman Keltie, kende tabatin un pia di palu, a sigui prediká riba kamel. E esfuersonan di e pioneronan a duna bon resultado ora nan a konosé e doño di un hotèl na William Creek, un stashon di trein aislá. Mas despues, e doño di e hotèl, Charles Bernhardt, a aseptá e bèrdat, a bende su hotèl i a traha pionero su so pa 15 aña largu den algun di e regionnan di mas seku i aislá di Australia.

E promé pioneronan ei siguramente mester tabatin kurashi i determinashon pa vense vários reto ku nan a enfrentá. Durante un biahe di prediká den e desierto australiano, Arthur Willis i Bill Newlands, menshoná anteriormente, a yega di dura dos siman pa nan por a biaha 32 kilometer pasobra áwaseru pisá a kombertí e desierto den un laman di lodo. Na otro okashon, nan tabata keda papa sodá debí ku den un higra di solo nan a haña nan ta pusha nan pikòp pa pasa over di serunan di santu i krusa vayenan yen di piedra i riunan seku yen di santu. Ora nan pikòp a daña, lokual tabata pasa hopi biaha, nan tabata kana òf kore baiskel pa dianan largu pa yega na e pueblito mas serka i despues warda pa simannan largu pa piesa di outo yega. Apesar di tur e kontratempunan akí, nan a mantené un aktitut positivo. Arthur Willis a usa palabranan ku a yega di sali den e revista E Époka di Oro i bisa: “No tin kaminda muchu difísil ni muchu largu.”