SHA iyange i Maaci 26, 1937 la, iorov uhar naha mato ugen iv a ihyundu iyol poo va nyôr hen gar u Sydney, veghertar u Australia la. Yange ve er zende ne ve vôr tule tule. Yange ve undu geri ve inyom i môm ken ijime, ve er zende u hemban er ukilomita 19,300 nahan, ve yem ken ajiir a ken toho hiinii, a a hemba vihin hen veghertar la cii yô. Ior mban lu ior mba zenden nengen ajiir shin keren msaanyol ga. Anmgbian Arthur Willis man Anmgbian Bill Newlands yange ve lu môm ken upania mbagenev mba tseen asema, mba ve kange ishima u zan a loho u dedoo u Tartor u Aôndo la ken toho hiinii hen veghertar u Australia, u a lu kpuun la.

Mbahenen Bibilo * mba ve vese iyenge ga la, yange ve hemban pasen kwagh ken Australia ken atô man ken won u ugeri man angarev mba ve lu hen kpemnger la; ve er nahan zan zan kwavanyom u 1920 la lu yemen u za been. Ior lu sha ajiir a ken toho hiinii la kpishi ga, shi ajiir a a uma tseghe tseghe ne, kehe je yô, tar u Nigeria ua za ker a hemba kwa ataratar. Nahan kpa, anmgbianev kav wang ér gba u mbadondon Yesu vea er shiada sha kwagh na “zan zan á ar ken ikighir i tar je,” kua agar a ken toho hiinii a veghertar u Australia la kpaa. (Aer. 1:8) Kpa vea fatyô u eren zegetom ne nena? Er ve na jighjigh a ishima i môm ér Yehova una ver iniôngon ve yô, ve kange ishima u eren kwagh u ve fatyô la cii.

Ken inyom i 1929 la, atôônanongo a ken kpentar u Queensland man vegher u Australia u shin Ityôtar la, var umato kposo kposo mba a fatyô u tsan ker shi yôron iwer ker yô, sha er vea wase u za pasen kwagh ken toho hiinii yô. Lu upania mba tseen asema mba vea fatyô u nahan shi sôron umato mban, shi wan ishima a hanma mtaver sha ajiir la cii, nahan ve ye. Upania mban yange ve za sha ajiir a i lu a vande pasen kwagh her ga yô.

Upania mba ve lu a mato ga yô, ve yem ken ajiir a hiinii ne sha ikyekye. Ikyav i tesen yô, ken inyom i 1932 la, Anmgbian Bennett Brickell u lu anyom 23 la, mough hen gar u Rockhampton, kpentar u Queensland, er zende iwer itian yem u za pasen kwagh sha ajiir a ken toho hiinii, vegher u ken imbusutarimese i kpentar la. Yange tôô ikyav sha ikyekye poo; a tôô akondo a cirin iyol man a huan man kwaghyan kua ityakerada kpishi. Utaya mba ikyekye na za bee sha gbenda, kpa a hide ijime ga, lu a vangertiôr ér Yehova una kura un. Yange mase tuur ikyekye na ne kuma ukilomita 320; a kar sha ajiir a ngise  ior kpe imura her yô. Ken atô u anyom 30 nahan, Anmgbian Brickell zende ukilomita udubu deri imôngo ken Australia cii; lu zenden sha ikyekye man agugu kua mato. Lu un hii pasen ior mba i yer ve ér Aborigines la kwagh ye, shi wase u bughun atôônanongo a he, nahan i fa un wuee sha ajiir a ken toho hiinii la, shi i naan un icivir kpaa.

Sha tar cii, ka veghertar u Australia la ior ve hembe ndahar iyenge her cii ye, hemban je yô, sha ajiir a a lu ken toho hiinii la. Sha nahan yô, ior mba Yehova tese gbashima sha u za keren ior sha ajiir a hiinii, a ken veghertar la.

Upania mbagenev uhar, Anmgbian Stuart Keltie man Anmgbian William Torrington, yange ve tese imba gbashima la. Ken inyom i 1933 la, ve per Deserti u Simpson, u waarawa u lu her kpishi la, ve za pase kwagh hen geri u Alice Springs, u a lu hen atô u veghertar la yô. Shighe u anmato ve za vihi, nahan gba u vea undu un vea yem la, Anmgbian Keltie, u i wa un nguhar ku konough la, za hemen u zenden pasen kwagh her, kpa gema lu zenden sha rakumi! Kwagh u injaa due ken iniôngon i upania mban, shighe u ve zua a manija u hôtel ugen, hen William Creek ken toho hiinii, ape igirgirdogo tilen la. Shighe kar yô, manija u i yilan un ér Charles Bernhardt ne ngohol mimi, maa tee hôtel na la, yem za er pania un tswen anyom 15 sha ajiir a hemban uman tseghe tseghe shi lun ken toho hiinii cii ken Australia.

Mimi yô, yange gba u upania mba sha ayange a tsuaa mban vea lu a ishimataver man gbashima ve vea hemba mbamtaver mba ve tagher a mi la ye. Anmgbian Arthur Willis man Anmgbian Bill Newlands, mba se vande teren kwagh ve sha mhii u ngeren ne, mba ve yem kwaghpasen ken Australia hiinii la, yange ve ya ican sha gbenda tsung kuma kasua uhar kwagen la, shighe u ve za zende u kuman ukilomita 32 tseegh la. Kwagh lu nahan sha ci u ura nôô kpishi, nahan deserti la cii hingir amgbiôr. Ashighe agen ve tuur mato ve la shin waarawa u u lu kpishi la, ken oo igyang, sha tahav vev cii, ve pir iusa iyol; ve yem zan zan ve za kar shin upev mba lun a awen man uifi mba lun a waarawa poo. Ashighe kpishi mato ve una vihi yô, ve zende a ngahar shin ve naha ikyekye ayange imôngo ve yem hen geri u a lu ikyua yô, ve za kegh ukasua imôngo sha u ikyav mbi sôron mato mbi va yô. Er ve tagher a mbamtaver mban nahan cii kpa, ve za hemen u lun a mnenge u vough her. Shighe u Arthur Willis lu va saven mkaanem ma yange i vande ngeren ken magazin u The Golden Age (shin Awake!) la, a kaa ér: “Gbenda môm vihi gande shin lihe gande u Mbashiada mba Yehova vea za ga.”

Anmgbian Charles Harris, u yange er pania shighe gôgônan la, pase ér atsan a yange un tagher a mi ken toho hiinii hen veghertar u Australia la na yô, un hemba lun kôôsôô a Yehova cii. Shi a kaa ér: “Ka wea lu a akaa akuma akuma yô, uma wou a hemba doon cii. Aluer Yesu yange kegh iyol u tsan hanma ijiir cii, shighe u i hingir hange hange yô, se kpa gba u a saan se iyol u eren nahan, aluer tom wase na hingir u se er nahan yô.” Man lu kwagh u upania kpishi er je la. Se sugh ve kpishi sha ci u iniôngon ve la yange i na yô, loho u dedoo la nyôr hanma ijiir cii hen veghertar u Australia la, nahan kwagh ne wase ior kpishi ve hingir u va tan ikyaa a Tartor u Aôndo.