MAKAKKASTA i umma ta Brookings, South Dakota, U.S.A., ngem malallammin i pallevu. Neperaddam niakan nga aranni ngana i tiempo na lammin. Ngem baka mattaka ka nu ngatta tatun nga aggaw, egga i baddi nga grupo nga mamippippig ta lammin ta tadday nga affukutan na ayam. Agga-taddag kami ta paginuman na aya-ayam nga egga i malammin nga danumna! Pagurayaddà nga iyistoria i karuan ta istoria na pattolè tapenu malippawanu nu ngatta.

Neyana ngà turi Marso 7, 1936, anna i pinaka-abbing ta appa nga mawwaragi. Maddiakkami ta tana ta zigattu na South Dakota. Importante nga parte na pattolemi i pakkoman, ngem ari tu yatun i pinaka-importante. Nabawtisowan nga Saksi ni Jehova i magana ku turi 1934. Naddedika ira ta nelangitan nga Yama tam, si Jehova, yatutta i pattuppal ta uray na Dios i prayoridadda. Nasserbi i yamà nga si Clarence, tapus i tiyù gapa nga si Alfred, company servant (koordineytor na baggi na elder ira ta maddaggun) ta baddi nga kongregasiommi ta Conde, South Dakota.

Regular nga parte na rutina na familiami i pagatende tu study ira anna mamala-balay tapenu ilayyagayya i meyannung ta makapabbaw nga iddanama ta Biblia ta mappange. Makasta i resulta nikami na ehemplo anna passanay nga neyawa na maganami. Parehu nga annam i dagummi na kakà nga si Dorothy turi nabbalikkami nga mangilayyagayya ta Pappatulan. Turi 1943, nesali ngà ta Theocratic Ministry School, nga nabbalin tu parte na study tam ira.

Importante paga nga parte na pattolemi i kombension anna asembli ira. Si Brother Grant Suiter, i tadday ta nappalappa ta kombension ta Sioux Falls, South Dakota turi 1949.  Meraddammakku paga i palappana nga, “It Is Later Than You Think! (Mas Aranni Ittam Ngana ta Pangultimuan na Sistema Anne ta Manononu!)” Nipagaramna nga kawagan na ngamin nga dedikadu nga Cristiano nga usan ta interu nga pattoleda ta pangilayyagayya ta mapia nga dumug na Pappatulan na Dios. Yatun i namagaram niakan nga maddedika kani Jehova. Yatutta ta tumunug nga asembli sirkito ta Brookings, egga ngà tatun ta malammin nga affukutan na ayam, kagitta na nekagi ta gafu, nga maginnag tapenu mabawtisowan. I pappenuman ta ayam nga napadday ta sim i nasserbi nga baptismal pool ta nikami appa turi Nobiembre 12, 1949.

Kinaragatakku nga mabbalin tu payunir. Namegafu ngà nga mappayunir turi Enero 1, 1952, ta edad nga 15. Kunna Biblia: “I makikavulu ta masirib ay mabbalin tu masirib,” anna aru i masirib ira ta familiami nga nassuporta ta desisiokku nga mappayunir. (Prov. 13:20) Si tiyu Julius nga 60 anios i nabbalin nga partner ku ta pappayunir. Maski dakal i diferensiami ta edad, aru i magayaya ira nga tiempomi ta ministerio. Aru i nalà ku nga makoffun nga sirib ta ekspiriensana ta pattolay. Ari nabbayag, nabbalin gapa nga payunir si Dorothy.

Turi ta kabbikku, kanayun nga imbitan na magana ku nga maddian nikami i manangngal ira ta sirkito anna i atawada. Dakal i neyuffun niakan na magatawa nga da Jesse anna Lynn Cantwell. Megafu ta pamagaramda, naddisidi ngà nga mappayunir. Nepatalatto niakan i fustu nga pakkaraga ta teokratiko ira nga gakkag megafu ta personal nga interesda. Nu masserbi ira ta aranni ira nga kongregasion, imbitaddà nu mittan nga mevulu nira ta ministerio. Talaga kappagayaya anna makapagaram yatun!

Tumunug nga nabbisita ta kongregasiommi da Bud Miller anna i atawana nga si Joan. Tatun nga tiempo, 18 anios ngà ngana anna neparubang ta passerbi ta militar. Ta gafuna, neddannà na lokal nga draft board (ofisina nga manga tu massuddalu) tu trabahu nga ammù nga ari mekunnay ta bilin ni Jesus ta disipulosna nga mabbalin tu neutral ta pulitika. Ngem kayà ku nga ilayyagayya i mapia nga dumug na Pappatulan. (Juan 15:19) Nikiddò ta draft board nga mebilang ngà tu ministro.

Napagaram ngà turi ta nabboluntario si Brother Miller nga mevulu niakan tapenu ginnan i  kaso ta draft board. Ari yaya nga minappasirang onu minagganassing. Talaga nassikan i nono ku megafu ta egga i kavulu ku nga espiritual nga tolay nga kagittana! I resultana yatun, nibilannà na board nga ministro turi 1954. Nangivuka niakan yatun tu oportunidad tapenu gawatan i tanakuan mangana nga teokratiko nga gakkag.

Tatun nga tiempo, nakalawa ngà tu imbitasion nga masserbi ta Bethel, nga magalan dati nga Watchtower Farm, ta Staten Island, New York. Egga i pribilehiò nga nasserbi tatun tu mattallu ragun. Narresulta yatun tu aru nga makakkasta ira nga ekspiriensa megafu ta aru i nakilalà tu masirib ira anna nakatrabahù.

Egga i istasion na radio nga WBBR ta Watchtower Farm. Inusa yatun na Saksi ira ni Jehova turi 1924 adde ta 1957. Ma-15 onu 20 laman nga miembro na familia na Bethel i neyasayn tatun. Aru nikami tatun i abbing paga anna bagu paga laman. Ngem, kavulumi si Eldon Woodworth, manakam nga nazelugan nga brother. Napakurugna nga masirib yaya. Gittana yamami yaya, nga nakoffun ta espiritualidadmi. Nu egga i problema megafu ta kina-imperfekto na tanakuan, kagian ni Brother Woodworth, “Talaga kappabbaw i kingngua na Dios maski imperfekto danuri usanna.”

Egga i espesial nga pribilehiomi nga makavulu si Brother Frederick W. Franz. Positibo i influwensia nikami na sirib anna napakaru nga ammuna ta Katurakan, anna egga i personal nga interesna ta kattagi-tadday nikami. Si Harry Peterson i gumallutumi; mas alistu para nikami nga kagian yatun anne ta kurug nga apilyeduna nga Papargyropoulos. Tadday gapa yaya ta nazelugan anna talaga grabe i talikaragna ta ministerio. Mapia i pattrabahu ni Brother Peterson ta Bethel ngem arianna vuluvuga nga pinagurayan i pallayyagayya. Ginatu i ipalimana nga magazinas kada vulan. Napakaru gapa i ammuna ta Katurakan anna tabbaganna i pakkiavumi ira.

Meproseso i gulay anna frutas nga malà ta farm tapenu mepay ta lata. Kada dagun, 45,000 nga lata (0.9 litro kada lata) na frutas anna gulay i kuan tu delata para ta interu nga familia na Bethel. Egga i pribilehiò nga makatrabahu si Etta Huth, nga masirib nga sister. Yaya i responsable para ta resipi na kuammi tu delata ira. Nu tiempo na paddelata, egga ira nga sister tatun nga lugar  i umay tapenu manguffun, anna si Etta i mangorganisa ta trabahuda. Maski importante i trabahu ni Etta ta paddelata, mangipasingan lagapa yaya tu makakkasta nga ehemplo ta pangirespeto ta manangngal ira nga brother ta farm. Minammatakku yaya nga mapia nga parigan para ta pakimoray ta teokratiko nga pakka-ulu.

Si Angela Romano i tadday ta sister ira nga minay tapenu manguffun ta paddelata. Si Etta i nanguffun sa turi nabbalin yaya tu Saksi. Yatutta, durante nga masserbi ta Bethel, egga mangana nakilalà nga masirib, nga kavulu ku ngana nga liminakag ta unag na 58 dagun. Nagatawa kami ni Angie turi Abril 1958, anna nagenjoy kami ta aru nga pribilehio ta passerbi. Ta pappasa na daga-ragun, napasikan i pagatawami megafu ta matuyag nga pattalo ni Angie kani Jehova. Talaga pattalakkakku yaya maski nu anni i meparubang nikami nga problema.

Nasserbi ngà tu ababba nga tiempo ta Brooklyn Bethel turi nelaku i fasilidad na WBBR ta Staten Island turi 1957. Tapus inatawà si Angie, yatutta nallawannà ta bethel, anna nappayunir kami tu mattallu ragun ta Staten Island. Egga paga lagu i tiempo nga nattrabahu ngà ta bagu nga makakkua ta istasion na radio, nga nagalan ngana nga WPOW.

Determinadu kami ni Angie nga pattalupaddianan nga simple i pattolemi tapenu preparadu kami nga masserbi nu sitaw kami kawagan. Yatutta, turi 1961 egga kami ta situasion tapenu akseptan i asayment bilang espesial payunir ta Falls City, Nebraska. Bagu kami paga laman tatun turi ta nembita kami nga magatende ta tanga-vulan nga klase na Kingdom Ministry School, ta South Lansing, New York. Nagenjoy kami ta eskuela anna ekspektammi nga usan i nagigiammumi ta panolimi ta Nebraska. Ngem nakaddag kami turi nakalawa kami tu bagu nga asayment​—bilang misionero ta Cambodia! Taw nga makakkasta nga lugar ta Southeast Asia, nakasingan, nakaginna, anna nakagug kami tu nadduruma nga ganna-gannug nga bagu para nikami. Kinaragatammi nga ilammuyag i mapia nga dumug tatun nga lugar.

Ngem, nanguli i situasion na pulitika, anna kawagammi nga magali ta South Vietnam. Kaddaddam nga ta unag na dua ragun nakala ngà tu grabe nga taki, yatutta nipagaramda nga manoli kami ta nasiommi. Kawagakku i tiempo tapenu manoli i sikakku, anna turi nammapia ngà, nasserbi kami mangana ta ngamin-tiempo.

Turi ta Marso 1965, namegafu kami ta pribilehiomi nga mabbisita tu kongregasion ira. Ta unag na 33 dagun, magayaya kami ni Angie ta trabahumi ta sirkito anna distrito, nelagum ngana i papprepara para ta kombension anna ta kombension mismu. Kakayà ku i kombension ira, yatutta kappagayaya para niakan nga makoffun ta pangorganisa taw ira nga okasion. Piga dagun kami gapa nga naddian ta New York City, anna aru ngana nga kombension i nakua ta Yankee Stadium.

Kagitta gapa ta napakaru nga ngamin-tiempo nga ministro, makapainteres anna bagu ira nga  asayment i magigginnag nikami ni Angie. Angngariganna, turi 1995, nekiddaw nga manuddu ngà ta Ministerial Training School. Kabalin na tallu dagun, nembita kami ta Bethel. Kabalin na 40 dagun, talaga makapagayaya manoli nu sitaw namegafu i espesial nga ngamin-tiempo nga passerbì. Nattrabahu ngà ta Service Department anna instruktor ta piga ira nga eskuela. Turi 2007, niyunnug na Manangngal nga Baggi nga tangngallan na bagu nga Theocratic Schools Department i eskuela ira ta Bethel, anna egga pribilehiò nga mabbalin tu overseer ta piga ragun.

Aru ngana i nasingan nga importante ira nga panguloli meyannung ta teokratiko nga edukasion. Namegafu i School for Congregation Elders turi 2008. Ta unag na dua ragun, maturu nga 12,000 nga elder ira i natudduan ta Patterson anna ta Brooklyn Bethel. Tulu-tuloy yatun nga eskuela ta nadduruma nga lugar, ta uffun ira na field instructor. Turi 2010, nabbalin ngana tu Bible School for Single Brothers i Ministerial Training School, anna egga i nabuu nga bagu nga eskuela, i Bible School for Christian Couples.

Namegafu turi 2015 dagun serbisio, napattadday ngana yatun nga dua nga eskuela, anna nabbalin tu School for Kingdom Evangelizers. Magatawa anna single brother onu sister i estudiante ira tatun. Aru i nagayaya ta interu mundo turi ta nammuadda nga makua yatun nga eskuela ta aru nga panga nga ofisina. Makapainteres nga masingan nga minalawa i oportunidad ta teokratiko nga edukasion, anna mappabalo ngà ta nakilalà danuri sigga-paran para taw nga passanay.

Nu daddammakku i pattolè nigè nabawtisowan ta pappenuman tu ayam adde ta maddaggun, mappabalo ngà kani Jehova turi ta masirib ira nga nanguffun niakan ta dalan na kinakurug. Ari tu kadagunakku ira onu kaparehù tu kultura, ngem ta futuda, espiritual ira nga totolay. Mananawag ta kondukta anna ugalida ira i monag nga ayada kani Jehova. Ta unag na organisasionna, aru i masirib ira nga makavulu tam ta pallakag. Kunnatun i kingnguà anna talaga nammakapia ngà.