ITI maysa nga agsapa, naglamiis ti pul-oy ti angin iti Brookings, South Dakota, U.S.A. Napanunotko a dandani manen tiempo ti lam-ek iti lugarmi. Ngem mabalin a masdaawka nga iti dayta nga aldaw, addakami iti maysa a pagaponan ti animal a kumkumter iti lammin. Nakatakderkami iti abay ti paginuman ti animal nga adda kargana a nakalamlamiis a danum! Palubosandak a mangestoria no apay nga addakami dita.

Nayanakak idi Marso 7, 1936. Siak ti buridek iti uppat nga agkakabsat. Aggigiankami iti bassit a rantso iti makindaya a paset ti South Dakota. Napateg iti pamiliami ti panagtaraken iti animal, ngem saan a dayta ti kapatgan. Idi 1934, nabautisaran kas Saksi ni Jehova dagiti nagannakko. Nagdedikarda iti nailangitan nga Amatayo a ni Jehova, isu a ti panangaramid iti pagayatan ti Dios ti kapatgan iti biagda. Nagserbi ni tatangko a Clarence, ken idi agangay, ni angkelko nga Alfred, kas company servant (maawagan itan iti koordineytor ti bagi dagiti panglakayen) iti bassit a kongregasionmi idiay Conde, South Dakota.

Kanayon a makigimongkami ken ikasabami ti ibagbaga ti Biblia a nagsayaat a namnama iti masanguanan. Dakkel ken nagsayaat ti epektona kadakami ti ulidan ken panangsanay dagiti nagannakmi. Nakiramankamin a mangasaba ken manangko a Dorothy idi agtawenkami iti innem. Idi 1943, nagenrolak iti Teokratiko nga Eskuelaan ti Panagministro, a kabarbaro idi a paset ti gimongtayo.

Nagpateg kadakami dagiti kombension ken asamblea. Iti kombension idi 1949 idiay Sioux Falls, South Dakota, ni Brother Grant Suiter ti ispikermi. Malagipko pay ti tema ti palawagna, “Naladladaw Ngem iti Ipagarupyo.”  Impaganetgetna a masapul a naan-anay nga usaren ti amin a dedikado a Kristiano ti biagda a mangipakaammo iti naimbag a damag maipapan iti naipasdeken a Pagarian ti Dios. Dayta ti nangtignay kaniak nga agdedikar ken Jehova. Iti simmaruno nga asamblea sirkito idiay Brookings, maysaak kadagiti uppat a kumkumter nga agpabautisar iti pagaponan ti animal, a nadakamat iti rugi. Naitanebkami iti bimmarantiddog a metal a paginuman ti animal idi Nobiembre 12, 1949.

Kalpasanna, nagbalin a kalatko ti agpayunir. Nagpayunirak idi Enero 1, 1952. Agtawenak idi iti 15. Kuna ti Biblia: “Daydiay makipagna kadagiti masirib a tattao agbalinto a masirib,” ket adu a masirib a kapamiliak ti nangsuportar iti panagpayunirko. (Prov. 13:20) Ni Angkel Julius, nga agtawen idin iti 60 ti nagbalin a partnerko. Uray adu a tawen ti baetmi, naragsakkami a mangasaba. Adu ti nasursurok kenkuana gapu kadagiti kapadasanna. Nagpayunir met ni manangko a Dorothy.

Idi ubbingkami, padagusen da Tatang ken Nanang dagiti manangaywan iti sirkito ken dagiti assawada iti balaymi. Dakkel ti naitulong kaniak da Jesse ken Lynn Cantwell. Naparegtadak nga agpayunir. Ti personal a pannakaseknanda ti nangrubrob iti tarigagayko a maaddaan kadagiti naespirituan a kalat. No agbisitada iti kabangibangmi a kongregasion, sagpaminsan nga awisendak a mangasaba a kaduada. Talaga a nagragsak ken makaparegta dagidi a panagkakaduami!

Idi agangay, ni Bud Miller ken ti asawana a ni Joan ti nagserbi iti sirkitomi. Agtawenak idin iti 18, ket maysaak kadagiti naayaban nga agsoldado iti lugarmi. Idi damo, inikkandak iti trabaho a ti panagkunak ket maikontra iti bilin ni Jesus kadagiti pasurotna nga agbalinda a neutral iti politika. Ngem ti talaga a kayatko ket ti panangikasaba iti naimbag a damag ti Pagarian. (Juan 15:19) Nakisaritaak ngarud nga ibilangdak koma kas maysa a ministro.

Naragsakanak ta nagboluntario ni Brother Miller a mangkuyog kaniak a mangilawlawag iti patpatiek. Nalaing a makisarita, mannakigayyem, ken natured ni Manong Bud. Talaga a timmuredak gapu ta adda naespirituan a tao a kaduak a kas kenkuana! Idi 1954, kas resulta ti pannakisaritami,  naibilangakon kas maysa a ministro. Gapuna, mabalinkon a ragpaten ti sabali pay a naespirituan a kalat.

Iti daydi a tiempo, naawisak nga agserbi iti Bethel, iti Watchtower Farm, idiay Staten Island, New York. Agarup tallo a tawen a nagserbiak sadiay. Adu ti nagpipintas a kapadasak ta adu a masirib a kakabsat ti naam-ammok ken nakatrabahuak.

Adda estasion ti radio a WBBR iti farm idiay Staten Island. Inusar idi dayta dagiti Saksi ni Jehova manipud 1924 agingga idi 1957. Adda idi 15 agingga iti 20 a Bethelite nga adda iti farm. Ubbing ken bassit pay ti kapadasan ti kaaduan kadakami. Ngem kaduami ti napulotan a kabsat a ni Eldon Woodworth. Talaga a masirib a kabsat ni Manong Eldon. Bimmileg ti espiritualidadmi gapu iti pannakaseknanna kadakami a kas iti maysa nga ama. No marigatankamin a mangpalabas iti pagkapuyan ti dadduma, ibaga ni Brother Woodworth, “Talaga a nakaskasdaaw dagiti ar-aramiden ti Apo uray imperpekto dagiti us-usarenna a katrabahuanna.”

Nagsayaat met a pribilehio a nakaduami ni Brother Frederick W. Franz. Dakkel ti epektona kadakami ti sirib ken nalawa a pannakaammona iti Kasuratan, ken maseknan iti tunggal maysa kadakami. Ni Harry Peterson ti paralutomi; Peterson ti usarenmi nga apeliedona ta nalaklaka a baliksen ngem iti pudpudno nga apeliedona a Papargyropoulos. Maysa met a napulotan ken nakaregregta iti ministerio. Nagaget ni Brother Peterson iti trabahona iti Bethel ngem saanna a pulos liniwayan ti mangasaba. Ginasut a magasin ti maipaimana iti binulan. Adu met ti pannakaammona iti Kasuratan ken masungbatanna ti adu a saludsodmi.

Maiproseso idi dagiti maburas a nateng ken prutas iti paktoria nga adda iti farm. Agarup 42,600 a litro ti mailata wenno maigarapon iti kada tawen para iti intero a pamilia ti Bethel. Nakatrabahuak iti paktoria ti maysa a masirib a sister a ni Etta Huth. Isu ti paraisagana kadagiti recipe nga iprosesomi. Adu a kakabsat iti dayta a lugar ti umay tumulong no agilatakami, ket ni  Manang Etta ti mangibaga iti aramidenda. Nupay dakkel ti responsabilidad ni Manang Etta iti trabahomi, nagsayaat ti ulidanna iti panangrespeto kadagiti kakabsat a mangidadaulo iti farm. Imbilangko a nagsayaat a pagtuladan iti panagpasakup iti kinaulo.

Maysa ni Angela Romano kadagiti agtutubo a babbai a timmulong kadakami. Ni Manang Etta ti timmulong kenkuana tapno maammuanna ti kinapudno. Gapuna, adda manen naam-ammok a masirib a babai, a kaduak itan iti 58 a tawen, bayat ti panagserbik iti Bethel. Nagkasarkami ken Angie idi Abril 1958, ket adu a nagsayaat a pribilehio ti naawatmi. Iti adu a tawen a panagkaduami, timmibker ti panagasawami gapu iti kinasungdo ni Angie ken Apo Jehova. Masiguradok a matulongannak aniaman ti maipasango kadakami.

Nailako ti WBBR nga adda idiay Staten Island idi 1957, isu a nagserbiak idiay Brooklyn Bethel iti apagbiit. Kalpasanna, nagkasarkami ken Angie isu a rimmuarak iti Bethel ket nagpayunirkami idiay Staten Island iti agarup tallo a tawen. Nagtrabahoak iti apagbiit iti baro a makinkukua iti estasion ti radio a naawaganen iti WPOW.

Inkagumaanmi ken Angie a pasimplien ti biagmi tapno nakasaganakami nga agserbi iti sadinoman. Gapuna, idi 1961, nawayakami nga umawat iti pribilehio nga agserbi kas special pioneer idiay Falls City, Nebraska. Di nagbayag, naawiskami nga agadal iti Kingdom Ministry School. Makabulan idi dayta a panageskuela idiay South Lansing, New York. Nakaragragsak ti panageskuelami ket namnamaenmi a mausarmi ti pannakasanaymi idiay Nebraska. Nasorpresakami ngarud idi naibaonkami nga agmisionero idiay Cambodia! Naidumduma ti buya, uni, ken banglo iti daytoy nagpintas a pagilian iti Southeast Asia no ikompara iti naggapuanmi. Magagarankami idin a mangikasaba iti naimbag a damag sadiay.

Ngem nagbaliw ti kasasaad ti politika, isu a masapul nga umakarkami idiay South Vietnam. Makapaladingit ta iti uneg ti dua a tawen, naaddaanak iti nakaro a sakit isu a naiparegta nga agawidkamin iti pagilianmi. Masapul idi nga agpapigsaak, ket idi napigsaakon, nagpayunirkami manen.

Idi Marso 1965, nagserbikami manen kadagiti kongregasion kas agdaldaliasat a manangaywan. Iti 33 a tawen, naragsakkami ken Angie a nagserbi kadagiti sirkito ken distrito, a pakairamanan ti panagtrabaho sakbay ken bayat ti kombension. Magusgustuak ti panawen ti kombension, isu a naragsakak a tumulong a mangorganisar kadagitoy nga okasion. Adu a tawen a nagserbikami iti New York City, ket namin-adu a naangay dagiti kombension iti Yankee Stadium.

Kas iti dadduma nga agserserbi iti special full-time, narigat no dadduma ngem makaparagsak dagiti pribilehio a naawatmi ken Angie. Kas pagarigan, idi 1995, naawisak nga agisuro iti Ministerial Training School. Kalpasan ti tallo a tawen, naawiskami  nga agserbi iti Bethel. Maragragsakanak ta nakasubliak iti nangrugiak a nagserbi kas maysa nga special full-time a ministro, nasurok nga 40 a tawen ti napalabasen. Nagtrabahoak iti apagbiit iti Service Department ken namin-adu a nagisuroak iti nagduduma nga eskuelaan. Idi 2007, ti Bagi a Manarawidwid intalekna iti baro a Theocratic Schools Department dagiti eskuelaan a maang-angay iti Bethel, ket siak ti nangidaulo iti dayta a departamento iti sumagmamano a tawen.

Iti nabiit pay, adu a panagbalbaliw ti nakitami kadagiti teokratiko nga eskuelaan. Idi 2008, nairugi ti School for Congregation Elders. Kalpasan ti dua a tawen, nasurok a 12,000 a panglakayen ti nageskuela idiay Patterson ken Brooklyn Bethel. Agtultuloy dayta nga eskuelaan iti nagduduma a lugar, ket dagiti nasanay nga instruktor ti mangisuro. Idi 2010, nasukatan ti Ministerial Training School iti Bible School for Single Brothers, ken nabukel ti baro nga eskuelaan a Bible School for Christian Couples.

Manipud idi 2015 a tawen serbisio, napagtipon dagitoy nga eskuelaan ket naawagan iti School for Kingdom Evangelizers. Mabalin nga agadal iti dayta dagiti agassawa ken dagiti di naasawaan a lallaki ken babbai. Adu a kakabsat iti intero a lubong ti naragsakan idi naammuanda a maangay daytoy nga eskuelaan iti adu a sangay. Makaparagsak a makita ti panagrang-ay dagiti teokratiko nga eskuelaan, ket agyamanak ta adu ti naam-ammok a nangikagumaan a manggun-od iti daytoy a pannakasanay.

Manipud idi sakbay a nagbautisarak iti paginuman ti animal, agyamanak ken Apo Jehova gapu kadagiti masirib a kakabsat a timmulong kaniak iti panagserbik iti Dios. Nagduduma ti edad ken pulida. Ngem iti pusok, naespirituanda a tattao. Makita iti aramid ken ugalida a talaga nga ay-ayatenda ni Jehova. Iti organisasionna, adu a masirib wenno nasayaat ti impluensiada a kakabsat ti mabalintayo a pakikaduaan. Kasta ti inaramidko ket talaga a nagunggonaanak.