OTE dhimbulukwa ongula onene yimwe sho moshilando Dakota shokuumbugantu, moAmerika, mwa li mwa talala. Shono osha dhimbulukitha ndje kutya uutalala wamemememe owu li pokuya. Otwa li owala okangundu okashona tu li mondunda moka hamu pungulwa iikulya yiimuna noombuto, ihe omwa li mwa talala. Otwa li twa kalela etemba lyokunwina iimuna moka mwa li mu na omeya. Andiya ndi mu kuthile ko kondjokonona yandje, opo mu uve ko kutya petemba mpoka otwa li tatu ningi po shike.

Onda valwa mo 7 Maalitsa 1936. Otwa valwa tu li yane, ngame onkelo. Otwa putukila mofaalama onshona yi li kuuzilo waDakota shokuumbugantu. Otwa kala hatu longo mofaalama, ihe iilonga mbyoka hayo naanaa ya li ya simana maandjetu. Aavali yandje oya ninginithwa mo 1934. Okulonga ehalo lyaTate yetu gwomegulu, Jehova, okwo ya kala ya pititha komeho monkalamwenyo yawo. Edhina lyatate oClarence, natatekulu oAlfred. Tatekulu oye a li omupiya gwehangano (ngoka hi ithanwa omuunganeki gwolutu lwaakuluntugongalo kunena) megongalo lyetu eshona ndjoka li li moConde, Dakota shokuumbugantu.

Okuya kokugongala nokuuvitha egumbo negumbo tatu popi naantu kombinga yetegameno ndyoka li li mOmbiimbeli oyo ya kala iilonga mbyoka hatu longo pandjigilile maandjetu. Oshiholelwa shaavali yetu nedheulo ndyoka ye tu pa oya li ya dhana onkandangala onene sho tu li aanona. Ngame nomumwamemekadhona Dorothy otwa ningi aauvithi sho tu na omimvo hamano. Ondi inyolitha mOsikola yOkudheula Aauvithi mo 1943, ndjoka yi li oshitopolwa sha simana shokugongala kwetu.

Iigongi iishona niinene oya kala ya simana monkalamwenyo yetu. Omumwatate Grant Suiter oye a li omupopi omutalelipo poshigongi shomo 1949, mehala hali ithanwa Sioux Falls,  moDakota shokuumbugantu. Otandi dhimbulukwa oshipopiwa she shi na oshipalanyolo: “Ethimbo ndyoka lya hupa ko eshona!” Okwa li a tsu omuthindo kutya aaninginithwa ayehe oye na okukala hayu uvitha lela onkundana ombwanawa yUukwaniilwa waKalunga. Oshipopiwa shoka osha li sha kwathele ndje ndi iyapulile Jehova. Onda li nda ninginithwa poshigongi shoshikandjo sha ka landula ko, sha ningilwa moBrookings, mehala lya talala ndyoka nda popi metetekelo. Etemba ndyoka nda tumbula metetekelo lya ningwa moshitenda olya li “okandama” kokuninginithilwa moka aanona yaandjetu atuhe yane twa li twa ninginithilwa, mo 12 Novomba 1949.

Elalakano lyandje olya kala okukokola ondjila, nonda tameke me 1 Januali 1952, sho ndi na omimvo 15. Ombiimbeli otayi ti: “Enda pamwe naanawino, u likole owino.” Maandjetu omwa li aanawino oyendji mboka ya li ya kwathele ndje ndi kokole ondjila. (Omayel. 13:20) Otwa kala tatu kokola ondjila pamwe natekulu Julius, ngoka a li e na omimvo 60 pethimbo ndyoka. Okwa li e vule ndje nomimvo odhindji, ihe otwa kala tatu longo pamwe nombili. Ondi ilonga oshindji kuye. Omumwamemekadhona, Dorothy naye okwa tameke okukokola ondjila.

Sho nda li omunona, aavali yandje oya li haya langeke olundji aatonatelishikandjo naakulukadhi yawo maandjetu. Omumwatate Jesse Cantwell nomukadhi Lynn oyo unene ya li ya kwathele ndje. Omolwetsomukumo lyawo, onda tokola okukokola ondjila. Okunakonasha kwawo okwa pendutha mungame ehalo lyiilonga yethimbo lyu udha. Uuna taya talele po omagongalo gopopepi, oya li haya pula ndje tu ka longe pamwe nayo omathimbo gamwe. Oshinima shono osha tsu ndje omukumo noshe etele ndje uuwanawa.

Omumwatate Bud Miller nomukadhi, Joan oya li aatonateli aayendi. Pethimbo ndono onda li ndi na omimvo 18, nonda pulwa ndi ye miita. Sho okangundu hoka taka hogolola aantu ya ye miita ka ti nandi ye miita, onda li ndi wete kutya kashi li metsokumwe naashoka Jesus a lombwele aalongwa kutya inaya kutha ombinga mopolotika. Shimwe ishewe, ngame onda li nda hala okuuvitha onkundana ombwanawa yUukwaniilwa. (Joh. 15:19) Onkee ondi indile okangundu hoka ka tale ndje ko ndi li omuuvithi.

Onda li nda kumwa sho omumwatate Miller i iyamba tu ye pamwe naye kokangundu hoka. Oku shi okupopya naantu paunshitwe, yo aantu ihaye mu  tila. Osha kumike ndje sho ndi li nomulumentu ngoka e na uupambepo wa kola. Konima yaashono, okangundu hono oka pitike ndi kale omuuvithi lwopothinge mo 1954. Shono oshe egululile ndje ondjila ndi ye koBetel.

Omathimbo hamale, onda pulwa ndi ka longe koBetel, moNew York, moStaten Island pethimbo mpono oya li hayi ithanwa Watchtower Farm. Onda longo mo uule womimvo ndatu lwaampo. Shono oshe etele ndje uuwanawa owundji, molwaashoka onda kala te longo pamwe naanawino oyendji.

Pofaalama ndjoka ya li moStaten Island opwa li pu na ositaasi yoradio WBBR ndjoka ya kala hayi longithwa kOonzapo dhaJehova okuza mo 1924 sigo 1957. Aantu owala 15 sigo 20 ya li ya tumwa ya ka longe kofaalama ndjoka. Oyendji yomutse otwa li aagundjuka nokatu na naanaa ontseyo. Mokati ketu omwa li omumwatate omukokele, ye omugwayekwa edhina lye Eldon Woodworth. Okwa li shili e na owino. Okwa li a fa tate gwetu nokwe tu longa iinima oyindji. Omathimbo gamwe uuna tatu pumathana omolwokwaagwanenena, omumwatate Woodworth oha ti: “Osho opala okumona sho Omuwa ta vulu okutompola po naantu mboka e na.”

Otwa li wo tu na elago sho omumwatate Frederick W. Franz a li mokati ketu. Omayele ge nontseyo ye yopamanyolo oyindji oya li ye tu kwathele. Okwa li natango e na ko nasha nakehe gumwe gwomutse pauhandimwe. Omumwatate Harry Peterson oye a li he tu telekele. Otwa li hatu mu ithana Papargyropoulos. Omumwatate Peterson naye omugwayekwa nokwa li e hole noonkondo okuuvitha. Iilonga ye moBetel ohe yi longo ya longekeka, nokwa li e hole uukalele. Okwa li ha gandja iifo omathele momwedhi kehe. Oku shi Ombiimbeli nawa, noha yamukula omapulo getu ogendji ngoka tu na.

Konyala iiyimati niikwamboga oyindji mbyoka twa li hatu longo mofaalama ohayi falwa kofabulika yi ka tulwe moondooha, opo yi liwe kAabetel ayehe. Omolwiilonga mbyono, onde ki iyadha te longo pamwe nomumwameme ngoka e na owino, edhina lye Etta Huth. Oye a li he tu ulukile nkene iikulya yomoondooha yi na okutelekwa. Ethimbo lyokutula iikulya moondooha shampa lya thiki, aamwameme yomoshitopolwa oya li haye ya okukwathela. Omumwameme Etta oye a li hu unganeke iilonga mbyoka ye na okulonga, ihe okwa li a simaneka mboka taya wilike mofaalama. Nonando okwa li ta dhana  onkandangala onene, opo iikulya yi tulwe moondoha, oshiholelwa oshiwanawa shokuvulika kwaamboka taya kwatele komeho mehangano oshi shi okulandulwa.

Omumwameme Angela Romano okwa li he ya okutula iikulya moondoha sho omugundjuka. Angela okwa konakona nomumwameme Etta. Kungeyi, ndi itsu po ishewe okakadhona kamwe ke na owino sho te longo moBetel. Otwa hokana naAngela muApilili 1958. Ngashingeyi otwa kala pamwe uule womimvo 58. Otwa kala tatu tyapula iilonga yi ili noyi ili pamwe. Angela omudhiginini thiluthilu kuJehova, oshinima shono sha li sha koleka ondjokana yetu. Onda li nde mu inekela lela kutya nduno otu kale muudhigu wu thike peni.

Sho ositaasi yoradio WBBR ya landithwa po moStaten Island mo 1957, onda ka longa moBetel yaBrooklyn okathimbo okafupi. Sho nda hokana naAngela, onda zi mo moBetel notwa kala tatu kokola ondjila omimvo ndatu lwaampono moStaten Island. Uule wokathimbo onda ka longela omuhona gumwe, ngoka a li e na ositaasi yoradio hayi ithanwa WPOW.

Otwa tokola kaatu indumbile iinima oyindji yopamaliko, opo tu vule okuya kehe pamwe mpoka twa pumbiwa. Oshizemo, lwopetameko lyo 1961 otwa li twa langekwa po tu li aakokolindjila yi ikalekelwa moFalls City, Nebraska. Opo tu li po, otwa hiywa kuumbugantu waLansing, New York tu ye kOsikola yUukalele wUukwaniilwa ndjoka ya li hayi kala uule womwedhi gumwe. Onkee ano, otwa li tu na okuninga omalunduluko. Osikola otwe yi tyapula notwa li twa halelela oku ka longitha edheulo ndyoka twa pewa moNebraska. Sho twa pewa oonzapo, otwa li twa kumwa sho twa tumwa tu ka kokole ondjila moCambodia. Oshilongo shono oshi na uunshitwe uuwanawa, noshi li muumbugantuzilo waAsia. Otwa mona mo notu uva mo iinima iiwanawa notwa lya mo iikulya inaatu yi lya nale. Sho twa thiki mo otwa kala twa halelela okutaandelitha onkundana ombwanawa.

Manga tu li moCambodia, omwa tukuluka omakuyunguto gopapolotika, notwa li tu na okuya ontuku koSouth Vietnam. Okuza mpono, muule owala womimvo mbali lwaampono, onda kwatwa komukithi omudhigu. Katwa li we tu na nkene, shila okushuna owala koshilongo shetu. Onda li nda pumbwa oku ka pangwa, ihe sho nda aluka, otwa yi ishewe miilonga yethimbo lyu udha.

Otwa tameke niilonga yokutalela po omagongalo muMaalitsa 1965. Uule womimvo 33, otwa kala tatu tyapula iilonga yuutonatelishikandjo, yokutonatela oshitopolwa mwa kwatelwa iigongi mbyoka hayi tetekele oshigongi shoshitopolwa. Ondi hole iigongi yoshitopolwa, onkene osha kala enyanyu kungame okukwathela moku yi unganeka. Otwa kala ishewe moNew York City uule womimvo dhontumba moka iigongi yoshitopolwa oyindji ya kala hayi ningilwa mokapale kaYankee.

Otwa kala hatu pewa iinakugwanithwa yi ikalekelwa, yimwe otwe yi hokwa, ihe yilwe oya kala eshongo kutse, ngaashi hashi kala naamwatate oyendji mboka ye li miilonga yethimbo lyu udha. Pashiholelwa, onda li nda pulwa ndi ka longe Osikola yOkudheula mUukalele mo 1995. Konima yomimvo ndatu, otwa pulwa ishewe tu shune koBetel. Onda li ndu  uvite nawa sho te shuna kehala hoka nda tamekela niilonga yethimbo lyu udha konima yomimvo 40. Onda kala te longo mOshikondo shIilonga uule wokathimbo nosho wo okulonga oosikola odhindji. Olutuwiliki olwa li lwa tokola mo 2007, opo oosikola ndhoka hadhi longelwa moBetel dhi kale kohi yOshikondo shOosikola dhopakalunga. Onda pewa uuthembahenda ndi kale omutonateli gwadho uule womimvo dhontumba.

Otwa mona omalunduluko ogendji ngoka ga ningwa muukalele ge na ko nasha nelongo lyopakalunga. Mo 2008 opwa totwa Osikola yokudheula aakuluntugongalo. Konima owala yomimvo mbali dha landula ko, aakuluntugongalo ye vulithe 12 000 oya li ya nongekwa mosikola ndjoka moPatterson nomoBetel yaBrooklyn. Sho tatu popi ngeyi osikola ndjono oyi li metifa miitopolwa yi ili noyi ili, tayi longwa kaayendinongeki mboka ya dheulwa. Mo 2010 Osikola yOkudheula mUukalele oya lukululwa, e tayi ningi Osikola yOmbiimbeli yOkudheula Aamwatate Inaaya Hokana, opwa totwa wo osikola yilwe ompe hayi ithwanwa Osikola yOmbiimbeli yOkudheula Aaihokani Aakriste.

Okutameka momumvo gwiilonga 2015, oosikola ndhoka mbali odha li dha hengumukile mumwe, e tapu totwa Osikola yAauvithi yUukwaniilwa. Ohayi taamba aaihokani nosho wo aamwatate naamwameme mboka kaaye li mondjokana. Osha li sha kumitha oyendji sho yu uvu kutya osikola ndjoka otayi ka ningilwa miitayimbelewa oyindji. Otashi hokitha okumona oosikola dhelongo lyopakalunga tadhi tamunuka mo. Onda nyanyukwa sho nda mona aantu oyendji mboka yi iyamba ye ye koosikola ndhoka.

Okutala konakuziwa yandje, manga inaandi ninginithwa metemba lyokunwina iimuna, otandi pandula Jehova omolwaantu aanawino mboka ya kala nokukwathela ndje ndi kale moshili. Ayehe kaya li yepipi lyandje, yo kaye shi yomuhoko gwandje. Ihe oya li ye shi ulike momitima dhawo kutya oye na ekwatathano ewanawa naKalunga. Iilonga nosho wo iikala yawo oye shi ulika lela kutya oye hole Jehova shili. Mehangano lyaJehova omu na aanawino oyendji mboka tatu vulu okweenda pamwe nayo. Ngame mukweni onde shi ninga, nonda mona uuwanawalela.