MBI dabe ti mbi na mbeni ndapre so dê asara mingi, a sara angu mingi awe, na Brookings, Dakota du Sud, U.S.A. Mbi bâ lani so ngoi ti dê aga nduru awe. Mbi na mbeni kete groupe ti azo, e yeke lani na yâ ti mbeni gogoro so dê ayeke sara na yâ ni mingi na e yeke dö na dê. E yeke lani na terê ti mbeni kota ye so ngu asi yâ ni na ngu ni adë mingi. Zia mbi sara na ala tënë kete na ndö ti gigi ti mbi tongaso si ala lingbi ti hinga ndani so e yeke lani na ndo ni so.

A dü mbi na lango 7 ti mars, ngu 1936, a dü e osio na mbi yeke tanga ti molenge ni. E lango na yâ ti mbeni kete ferme na est ti Dakota du Sud. Kua ti yaka ayeke lani kota ye mingi na yâ ti fini ti azo ti sewa ti mbi, me a yeke kota mingi ahon tanga ti aye kue ape. Babâ na mama ti mbi awara batême tongana aTémoin ti Jéhovah na ngu 1934. Ala mû lani terê ti ala na Jéhovah, Babâ ti e so ayeke na yayu, tongaso sarango ye so bê ti Nzapa aye ayeke kozo ye so ayeke kota mingi na lê ti ala. Babâ ti mbi, Clarence nga na pekoni Alfred ita ti babâ ti mbi asara lani kua ti serviteur ti groupe (so a iri ni fadeso coordinateur ti bungbi ti a-ancien) na yâ ti kete congrégation ti e na Conde, Dakota du Sud.

Guengo na abungbi nga fango tënë da na da ti fa na azo pendere beku so ayeke na yâ ti Bible ayeke ye so sewa ti e ayeke sara lakue. Tapande ti babâ na mama ti mbi nga na aye so ala fa na e asara ye ti nzoni mingi na ndö ti e amolenge ni. Mbi na ita ti mbi ti wali, Dorothy, e ga awafango tënë ti Royaume na ngoi so e yeke na ngu omene. Na ngu 1943, mbi zia iri ti mbi na Ekole ti Kusala ti aChrétien, so a komanse ti sara ni na abungbi ti e ade ti ninga lani ape.

 Akota bungbi ayeke lani kota mingi na yâ ti fini ti e. Mbi dabe ti mbi na mbeni kota bungbi so a sara na ngu 1949 na Sioux Falls, na Dakota du Sud. Ita Grant Suiter amû lani mbeni diskur na Anglais so li ni ayeke: “Ngoi ahon mingi awe ahon ti so ala pensé so!” Lo tene so aChrétien kue so amû terê ti ala na Jéhovah awe adoit ti mû fini ti ala kue ti fa nzoni tënë ti Royaume ti Nzapa. Tënë so apusu mbi ti mû terê ti mbi na Jéhovah. Na kota bungbi ti circonscription ti peko, mbi wara batême na Brookings, na lango 12 ti novembre, ngu 1949. Ndani so mbi yeke lani na yâ ti gogoro so dê asara dä mingi so mbi sara fade tënë ni so la. E osio e yeke ku lani ti wara batême na yâ ti mbeni kota ye so a sara na wen.

Na pekoni, mbi leke na bê ti mbi ti sara kua ti pionnier. Mbi komanse lani ti sara kua ti pionnier na lango 1 ti janvier, ngu 1952, na ngoi so mbi yeke na ngu 15. Bible atene: “Zo so atambela na azo ti ndara, lo yeke ga zo ti ndara,” na gbâ ti azo ti ndara ayeke lani na yâ ti sewa ti mbi so ayeda na desizion ti mbi ti sara kua ti pionnier (aProv. 13:20). Julius, ita ti babâ ti mbi so ayeke na ngu 60, aga lani zo so mbi na lo e sara kua ti pionnier. Atâa so ngu ti e ayeke oko ape, a nzere na e mingi ti fa tënë legeoko. Mbi manda ye mingi na lege ti ndara ti lo nga na ye so asi na lo na yâ ti fini ti lo. Kete na pekoni, Dorothy nga kue aga pionnier.

Na ngoi so mbi de maseka, babâ na mama ti mbi ayeke tisa lani mingi asurveillant ti circonscription na awali ti ala na ndo ti e. Jesse Cantwell na wali ti lo Lynn amû lani maboko na mbi mingi. Mbeni ye so akpengba mbi lani ti mû desizion ti sara kua ti pionnier ayeke awango so ala mû na mbi. So ala wani apensé na mbi amaï nzara ti mbi ti sara kua na yâ ti bungbi ti Jéhovah. Na ngoi so ala sara kua na yâ ti acongrégation so ayeke nduru na e, ala yeke iri ka mbi ti tene mbi na ala e fa tënë legeoko. A nzere na mbi lani mingi nga a kpengba mbi mingi.

Na pekoni, Bud Miller na wali ti lo, Joan, aga surveillant ti circonscription ti e. Na ngoi ni so mbi yeke lani na ngu 18 nga a hunda na mbi ti sara kua ti turugu. Ndokua so ayeke mû azo na kua ti turugu ahunda na mbi ti sara mbeni kua so mbi bâ so ague nde na wango so Jésus amû lani na adisciple ti lo ti yôro terê ti ala pëpe na yâ ti poroso.  Nga mbi ye lani ti fa nzoni tënë ti Royaume (Jean 15:19). Mbi hunda na ndokua ni ti bâ mbi tongana mbeni wakua ti Nzapa.

A nzere na mbi mingi so Ita Miller atene na mbi so mbi na lo la e yeke gue ti tene lo mä tënë so azo ti ndokua ni ayeke tene na mbi. Lo yeke mbeni zo so ayeke ka kamene ape nga a yeke ngangu ti tene azo azia mbeto na yâ ti lo. Lo hinga nga Bible nzoni mingi. So lo yeke na terê ti mbi asara si mbi sara mbeto ape. Na hunzingo ti ngoi ti ndowa na ngu 1954, na peko ti so azo ti ndokua ni amä mbi, ala yeda ti bâ mbi tongana mbeni wakua ti Nzapa. A zi lege na mbi ti sara aye mingi ndali ti Jéhovah.

Kete na pekoni, a tisa mbi ti sara kua na Béthel, na ndo so a iri ni lani ferme ti Watchtower, na Staten Island, na New York. Mbi sara kua kâ ngu ota tongaso. A zi lege na mbi ti wara apendere ye ndali ti so mbi wara terê na azo ti ndara nga mbi na ala e sara kua legeoko.

Da ti radio WBBR ayeke nga lani na yâ ti ferme so ayeke na Staten Island. A-Témoin ti Jéhovah asara lani kua na yâ ni ti londo na ngu 1924 ti si na ngu 1957. Gï amembre 15 ti si na 20 ti sewa ti Béthel la ayeke sara lani kua na yâ ti ferme ni. Mingi ti e ayeke lani amaseka nga e hinga ye mingi ape. Me ita-koli Eldon Woodworth, so a soro lo ti gue na yayu nga so ayeke lani mbakoro, ayeke na terê ti e. Lo yeke lani zo ti ndara. Lo yeke sara ye lani na e tongana mbeni babâ nga lo fa na e aye mingi. Na ambeni ngoi tongana kpale alondo na popo ti e, Ita Woodworth ayeke tene: “Ye so Jéhovah asara ayeke tâ pendere mingi atâa wokongo ti azo so lo yeke sara kua na ala.”

Ita Frederick Franz ayeke nga lani na terê ti e na lo mû maboko na e mingi. Lo yeke lani na ndara nga lo hinga Bible nzoni mingi. Lo yeke pensé lani na e oko oko kue. Zo ti tongo kobe ti e ayeke lani Harry Peterson, a yeke lani ngangu na e ape ti iri lo Peterson ahon ti iri lo na tâ iri ti lo Papargyropoulos. Lo kue lani a soro lo ti gue na yayu nga lo yapu mingi na kua ti fango tënë. Ita Peterson ayeke sara lani kua ti lo na Béthel nzoni me lo bâ kua ti fango tënë lâ oko pëpe tongana kete ye. Lo yeke zia apériodique ti e ngbangbo mingi nze oko oko. Lo hinga nga lani Bible nzoni mingi nga lo yeke kiri tënë na ahunda ti e mingi.

Na yâ ti ferme ni, e yeke leke alê ti keke nga na ambeni ye tongana nzö wala haricot nga e zia ni na yâ ti aboîte. E yeke leke ni na yâ ti aboîte 42 600 tongaso ndali ti sewa ti Béthel. Mbi na ita-wali Etta Huth, so ayeke na ndara mingi, la e yeke sara kua lani. Lo la lo yeke fa lani akode so e yeke sara na kua ni. Na angoi ti ziango ni na yâ ti aboîte, aita-wali ti ndo ni ayeke ga ti mû maboko na e nga Etta ayeke leke yâ ti kua ti ala ni. Atâa so Etta ahinga ye mingi na ndö ti lekengo alê ti keke nga na tanga ti aye ni so na yâ ti aboîte ni, lo yeke ne lakue aita-koli so ayeke bâ ndo na ndö ti akua na yâ ti ferme ni. Mbi bâ lani lo tongana mbeni nzoni tapande ti zo so awoko terê na gbe ti azo so amû li ni na yâ ti bungbi.

Angela Romano ayeke lani oko ti aita-wali maseka so aga ti mû maboko na kua ni. Etta amû lani maboko na lo na ngoi so lo ga na yâ ti tâ tënë. Mbi na Angie (Angela) e sara mariage na avril, ngu 1958, nga a nzere na e ti sara na Jéhovah a sara ngu 58 awe. Teti angu mingi, dutingo be-ta-zo ti Angie na Jéhovah asara si mariage ti e akpengba. Mbi lingbi ti zia bê ti mbi kue na lo atâa kpale wa la e tingbi na ni.

Na ngoi so a kä ndokua ti WBBR so ayeke na Staten Island na ngu 1957, mbi sara kua na Béthel ti Brooklyn teti mbeni kete ngoi. Na pekoni, mbi na Angie e sara mariage, tongaso e sigi na Béthel, nga e sara kua ti pionnier ngu ota tongaso na Staten Island. Mbi sara même kua teti kete ngoi na afini zo so avo radio ni, so a iri ni WPOW.

Mbi na Angie e leke na bê ti e ti ngbâ ti duti na ye mingi ape na yâ ti gigi ti e tongaso si e duti nduru ti sara kua na ndo so a bezoin e dä. Ye ti pekoni ayeke so, na tongo nda ti ngu 1961 e yeda ti sara kua ti pionnier spécial na Falls City, na Nebraska. Kete na peko ti so e si kâ, a tisa e ti gue na Ekole ti kusala ti Royaume na South Lansing, na New York. Ekole ni anzere lani na e mingi na e yeke ku kungo ti sara kua na aye so e manda tongana e kiri na Nebraska. Li ti e akpe kue na ngoi so a tokua e na mbeni fini ndo. A tokua e lani ti sara kua ti missionnaire na Cambodge. Na yâ ti pendere kodro so, so ayeke na sud-est ti Asie, e bâ, e mä nga e tara aye so e hinga ni kozo ape. E ye lani mingi ti fa nzoni tënë ti Royaume na azo ti kâ.

Ye oko, na ngoi so aye ti poroso achangé na Cambodge, atokua e na Vietnam du Sud. Mawa ni ayeke so, na yâ ti ngu use mbi wara mbeni kota kpale ti kobela, tongaso a wa e ti kiri na kodro ti e. Mbi bezoin lani ngoi ti kiri ti wara ngangu, me na peko ti so mbi wara ngangu, e kiri e mû kua ti ngoi kue.

Na mars, ngu 1965, e wara pasa ti gue na yâ ti acongrégation ti sara kua ti surveillant so ague na ando nde nde. Ngu 33 so mbi na Angie e sara na yâ ti kua ti circonscription nga na ti district nga ti mû maboko na lekengo akota bungbi, a nzere na e mingi. Mbi ye kua ni mingi ndali ti so ngoi ti akota bungbi anzere ka na mbi mingi. E yeke lani na New York City, na a sara gbâ ti akota bungbi na Yankee Stadium.

Mbi na Angie e sara apendere kua nga e tingbi na akpale, tongana ti mingi ti azo so ayeke sara gï  kua ti ngoi kue. Na tapande, na ngu 1995, a hunda na mbi ti fa ye na Ekole ti formation ministérielle. Ngu ota na pekoni, a tisa e na Béthel. A nzere tâ lani na mbi mingi ti kiri na ndo so mbi komanse lani ti sara gï kua ti ngoi kue dä asara ngu 40 awe. Teti mbeni ngoi, mbi sara lani kua na bureau ti service nga mbi fa ye na yâ ti gbâ ti a-ekole ti bungbi. Na ngu 2007 Bebungbi asigi na mbeni ndokua so ayeke bâ lege ti a-ekole kue so ayeke na Béthel, na mbi bâ ndo na ndö ni teti ambeni ngu.

Na yâ ti angu so ahon ade ti ninga ape, a changé aye na yâ ti a-ekole so ayeke na Béthel. A sigi na ekole ti a-ancien na ngu 2008. Na yâ ti ngu use, a fa ye na a-ancien ahon 12 000 na Patterson nga na Béthel ti Brooklyn. A ngbâ ti sara a-ekole so na ando mingi. Na ngu 2010 a changé iri ti Ekole ti formation ministérielle aga Ekole ti aita-koli so ayeke akumbamba nga a sigi na mbeni fini ekole so a iri ni Ekole ti aita-koli na awali ti ala.

A to nda ni na ngu ti kusala 2015, a bungbi a-ekole so use kue aga Ekole ti awafango nzoni tënë ti Royaume. Azo so ayeke gue na ekole so ayeke akoli na awali ti ala wala aita-koli nga na aita-wali kumbamba. A nzere lani na azo mingi na yâ ti dunia ti mä so a yeke sara ekole so na yâ ti afiliale mingi. A nzere na e mingi ti bâ so azo mingi ayeke wara pasa ti gue na a-ekole so. A nzere na mbi mingi ti wara terê na azo mingi so asara achangement ti mû lege na ala ti wara fango ye so.

Tongana mbi pensé na fini ti mbi na ngoi so mbi wara batême na yâ ti ngu so adë mingi so juska laso, mbi kiri singila na Jéhovah ndali ti azo ti ndara so amû maboko na mbi na yâ ti tâ tënë. Ngu ti mbi na ala ayeke oko ape nga sarango ye ti mbi na ala ayeke oko ape. A yeke azo so ayeke na kpengba songo na Jéhovah. Na yâ ti sarango ye ti ala nga na bango ndo ti ala, ala ye Jéhovah mingi. Na yâ ti bungbi ti Jéhovah azo ti ndara ayeke mingi so e lingbi ti tambela na ala. Mbi sara ni na mbi wara nzoni ye na pekoni.