NA FAALOGOINA le mālūlū o le ‘ea i se tasi taeao i Brookings i South Dakota, i le Iunaite Setete. Na faamanatu mai ai iā te a‘u ua toeitiiti oo mai le tau mālūlū. Ae atonu e faate‘ia oe i le iloaina, i lenā aso na matou faapotopoto ai ma se vaega to‘aitiiti i se fale e teu ai mea o le faato‘aga, o loo tetete i le maalilili. Na matou tutū i luma o se faatanoa vai e feinu ai manu, o loo tumu i vai mālūlū. Se‘i o‘u faamatala atu lo‘u talaaga ina ia e iloa ai le māfuaaga na matou faapotopoto ai i inā.

Na ou fanau iā Mati 7, 1936, o a‘u o le uii o le fanau e to‘afā. Sa matou nonofo i se tama‘i faato‘aga i le itu i sasa‘e o South Dakota. O le galulue i le faato‘aga sa avea ma vala tāua i le olaga o lo matou aiga, peita‘i e lē o le mea lenā na sili ona tāua. Na papatiso o‘u mātua o ni Molimau a Ieova i le 1934. Na la faia se tuuina atu i lo tatou Tamā i le lagi o Ieova. O lea, sa o la faamuamua le faia o le finagalo o le Atua. Na avea lo‘u tamā o Clarence ma mulimuli ane avea fo‘i lona uso o Alfred, ma auauna o le faapotopotoga (lea ua ta‘ua nei o le sooupu o le ‘autoeaina) i si a matou tama‘i faapotopotoga i Conde, i South Dakota.

O le auai i sauniga faa-Kerisiano ma le tala‘iga mai i lea fale i lea fale, e faailoa atu i isi le faamoemoe matagofie mo le lumana‘i o loo i le Tusi Paia, o se vala masani o le faasologa a lo matou aiga. O faaa‘oa‘oga lelei a o‘u mātua ma toleniga na la faia, na telē se aafiaga lelei iā i matou le fanau. Na avea i ma‘ua ma lo‘u tuafafine o Dorothy ma tagata tala‘i o le Malo ina ua ta‘i ono o ma tausaga. I le 1943, na ou auai ai i le A‘oga o le Faiva Faatiokarate ina ua faato‘ā avea ma vaega o le sauniga i lenā taimi.

Sa avea fo‘i tauaofiaga ma fonotaga ma vala tāua o o matou olaga. I se tauaofiaga i Sioux Falls i South Dakota i le 1949, na avea ai le uso o Grant  Suiter ma failauga asiasi. O loo o‘u manatua pea lana lauga, “Ua Latalata Mai Nai lo o le Mea o Loo E Manatu i Ai!” Na ia faamamafa e tatau i Kerisiano uma ua tuuina atu ona faaaogā atoatoa o latou olaga, e faalauiloa atu ai le tala lelei o le Malo o le Atua ua faavaeina. O lenā lauga na uuna‘ia ai a‘u e faia se tuuina atu iā Ieova. O lea, i le fonotaga matagaluega na sosoo ai i Brookings, na ou iai i le fale e teu ai mea mo le faato‘aga lea na ta‘ua i le amataga, e sauni mo lo‘u papatisoga. E to‘afā i matou na papatiso ai iā Novema 12, 1949, i totonu o se faatanoa u‘amea na faaaogā e feinu ai manu.

Sa avea loa le auaunaga paeonia ma o‘u sini. Na amata ona ou paeonia iā Ianuari 1, 1952, ina ua 15 o‘u tausaga. O loo faapea mai le Tusi Paia: “O lē e savali ma tagata atamamai, e atamai ai o ia,” ma e to‘atele ē atamamai i lo matou aiga na lagolagoina la‘u filifiliga e paeonia. (Faata. 13:20) O la‘u paga paeonia i lenā taimi o Julius, o le uso o lo‘u tamā e 60 ona tausaga. E ui na eseese o ma tausaga, ae sa ma matuā olioli i la ma faiva. Na o‘u a‘oa‘oina mai iā te ia le tele o le atamai aogā ona o lona poto masani i le olaga. E le‘i umi ae avea fo‘i Dorothy ma paeonia.

I le taimi a o o‘u talavou, na valaaulia ai e o‘u mātua le to‘atele o ovasia o le matagaluega ma a latou avā e nonofo i lo matou fale. O se tasi o ulugalii na fesoasoani tele iā te a‘u, o Jesse ma Lynn Cantwell. O a la faalaeiauga o se tasi lea o māfuaaga na ou filifili ai e paeonia. O lo la‘ua naunau moni mai iā te a‘u, na ou atia‘e ai se faanaunauga ia faatutū ni sini faaleagaga. Pe a la asiasi i ni faapotopotoga e lata mai, e la te valaaulia a‘u i nisi taimi e matou te tala‘i faatasi. O ni taimi na ou matuā olioli ma faalaeiauina ai!

Sa sosoo ai ma le asia o i matou e Bud Miller ma lana avā o Joan, i le galuega femalagaa‘i. O le taimi lenā ua 18 o‘u tausaga ma na ou feagai ai ma le mataupu e faatatau i le auai i le vaega‘au. E le‘i sa‘o le auala na lesitala ai a‘u e le Komiti o le vaega‘au i lo matou vaipanoa, ma na ou manatu ua lē ōgatusa ma le poloa‘iga a Iesu i ona soo ia solitū i faiga faapolotiki. Na ou mana‘o e tala‘i atu le tala lelei o le Malo. (Ioa. 15:19) O lea na ou toe talosaga ai i le Komiti o le vaega‘au ina ia lesitala a‘u o se faife‘au.

Na faagaeetia a‘u ina ua ofo mai le uso o Miller e ma te ō atu i le iloiloga o la‘u talosaga na ave i le Komiti o le vaega‘au. O uiga o lenei uso e lē mā e  tautala i luma o tagata ma e lē fefe gofie. Na faalototeleina a‘u i le iai faatasi ma se uso faaleagaga e iai ni uiga faapea. O le i‘uga, ina ua lata ina i‘u le tau māfanafana i le 1954, na amana‘ia ai loa e le Komiti o le vaega‘au lo‘u tulaga o se faife‘au. O i inā na tatala ai le avanoa mo a‘u ina ia ausia se isi sini faaleagaga.

Sa sosoo ai ma le valaaulia o a‘u e auauna i Peteli, i le Faato‘aga a le Olomatamata (Watchtower Farm) i Staten Island i Niu Ioka. Na ou maua se faaeaga e auauna ai i inā mo le pe ā ma le tolu tausaga. E to‘atele ē atamamai na ou feiloa‘i i ai ma matou galulue faatasi, ma e tele mea matagofie na ou tofo i ai.

O le faato‘aga i Staten Island na iai ma le alāleo faasalalau o le WBBR. Na faagaoioia lenei alāleo e Molimau a Ieova mai i le 1924-1957. E na o le 15 i le 20 sui o le aiga Peteli na tofia e galulue i le faato‘aga. O le to‘atele o i matou e talavou ma e le‘i lava le poto masani. Peita‘i, na matou iai ma Eldon Woodworth o se uso faauuina e matua atu. O ia moni lava o se uso e atamai. O lona naunau mai faatamā iā i matou na faamalosia ai i matou faaleagaga. Pe a tula‘i mai ni lu‘i ona o le tulaga lē lelei atoatoa o isi, e faapea mai le uso o Woodworth, “E ma‘eu le matagofie o mea ua faataunuuina e le Alii, e ui i le tulaga lē lelei atoatoa o tagata o loo ia faaaogāina.”

O se faaeaga faapitoa fo‘i lo matou iai faatasi ma le uso o Frederick W. Franz. O lona atamai ma le tele o lona poto i le Tusi Paia, na iai se aafiaga lelei iā i matou uma, ma na naunau moni mai o ia iā i matou ta‘ito‘atasi. O le uso o Harry Peterson sa fai ma kuka. Sa faigofie ona matou faaaogā lenā faai‘u nai lo o lona faai‘u sa‘o, o Papargyropoulos. O ia fo‘i o se uso faauuina ma na matuā maelega i le faiva. Na galue mamafa le uso o Peterson i ona tiute i le Peteli, ae e na te le‘i tuulafoa‘ia ai le faiva i le fanua. E faitau selau mekasini na ia tufaina i masina ta‘itasi. O se uso fo‘i e tele lona poto i mau o le Tusi Paia, ma na ia taliina le tele o a matou fesili.

I le faato‘aga, na matou saunia ai fualaau ‘aina ma fualaau faisua na tuu i fagu mo le tau mālūlū. Pe tusa ma le 45,000 fagu o fualaau ‘aina ma fualaau faisua, na saunia i tausaga ta‘itasi mo le aiga Peteli atoa. Na ou maua se faaeaga e galulue faatasi ai ma Etta Huth, o se tuafafine e atamai. E tele tomai o lenei tuafafine i le auala e saunia ai fualaau ‘aina  ma fualaau faisua ina ia tuu i fagu. I le taimi e fai ai lenei galuega, sa ō mai tuafāfine i lea vaipanoa ina ia fesoasoani mai, ma sa fesoasoani Etta ina ia faamaopoopo a latou galuega. E ui na faatino e Etta se matafaioi tāua, ae sa ia faataatia se faaa‘oa‘oga lelei o le faaaloalo i uso na vaaia le faato‘aga. Na ou vaai iā te ia o se faaa‘oa‘oga lelei o le gaua‘i i le ta‘ita‘iga a uso.

O se tasi o tuafafine talavou na sau ina ia fesoasoani i lenei galuega, o Angela Romano. Sa fesoasoani Etta iā te ia ina ua sau i le upu moni. O lea, a o o‘u auauna i le Peteli, na ou feiloa‘i ai iā Angela, o se tuafafine atamai ma ua 58 nei tausaga o ma auauna faatasi. Na ma faaipoipo ma Angie iā Aperila 1958, ma e tele faaeaga i le auaunaga ua ma galulue faatasi ai. A o faagasolo tausaga, o le maumaua‘i o Angie e faamaoni iā Ieova, ua avea o se puna e faamalosia ai la ma faaipoipoga. E mafai ona ou matuā faalagolago atu iā te ia e tusa lava po o ā lu‘i e ma te fesaga‘ia.

Ina ua faatau ese i le 1957 fale o le alāleo o le WBBR lea sa i le Staten Island, na ou auauna mo sina taimi i le Peteli i Brooklyn. Na ma faaipoipo loa ma Angie, ma tuua le Peteli ma paeonia i Staten Island mo le pe ā ma le tolu tausaga. Sa iai se taimi na ou galue ai fo‘i mo pule fou o le alāleo faasalalau, lea na ta‘ua i le taimi lenā o le WPOW.

Na ma taumafai malosi ma Angie e faafaigofie o ma olaga ina ia mafai ai ona ma auauna i so o se mea e mana‘omia ai i ma‘ua. E oo ane i le amataga o le 1961, ua ma nofosauni e talia se tofiga e galulue o ni paeonia faapito i Falls City i Nebraska. E le‘i leva ona ma faia lenā suiga ae valaaulia i ma‘ua i le A‘oga o le Faiva o le Malo, o se a‘oga na faia i lenā taimi mo le tasi le masina i South Lansing, i Niu Ioka. Na ma olioli i le a‘oga ma manatu e toe fo‘i i Nebraska ina ia faaaogā ai toleniga na ma maua. Na faate‘ia i ma‘ua ina ua ma maua se tofiga fou e avea o ni misionare i Cambodia. O lenei atunuu matagofie i le itu i saute i sasa‘e o Asia, na ma masani ai i ni vaaiga, leo, ma manogi e fou iā i ma‘ua. Na ma matuā naunau ia faailoa atu le tala lelei i inā.

Peita‘i, na suia faiga faaupufai a le atunuu ma na mana‘omia ai ona ma siitia atu i le itu i sisifo o Vietiname. E faanoanoa ona e le‘i atoa se lua tausaga, ae ou aafia i se ma‘i tigāina ma na fautuaina i ma‘ua e toe fo‘i i lo ma atunuu. Na mana‘omia se taimi ina ia toe faafo‘isia ai lo‘u malosi. Ina ua ou toe malosi, na toe faaauau loa la ma auaunaga faataimi atoa.

Iā Mati 1965, na ma maua ai le faaeaga e asiasi i faapotopotoga i le galuega femalagaa‘i. E 33 tausaga na ma olioli ai ma Angie i asiasiga mo matagaluega ma itumalo, e aofia ai le tele o galuega e fesoota‘i atu i tauaofiaga. Sa avea tauaofiaga ma taimi fiafia iā te a‘u. O lea na ou naunau ai e fesoasoani i le faamaopoopoina o nei faatasiga. O nisi tausaga na ma iai i le aai o Niu Ioka, ma o le tele o tauaofiaga sa faia i le Yankee Stadium.

I le pei fo‘i o isi o loo iai i le auaunaga faataimi atoa, na iai ni faaeaga fiafia ma faigatā na ma mauaina. O se faata‘ita‘iga, na tofia a‘u i le 1995 e avea ma faia‘oga i le A‘oga mo Toleniga i le Faiva. I le tolu  tausaga mulimuli ane ai na valaaulia i ma‘ua e auauna i Peteli. Na ou matuā fiafia ina ua ou toe fo‘i i le mea na amata ai la‘u auaunaga faapitoa faataimi atoa, i le silia i le 40 tausaga muamua atu. Na ou galue i se taimi i le Matagaluega o le Auaunaga ma avea ma faia‘oga i le tele o a‘oga. I le 2007, na faatulaga ai e le Vaega Pule a‘oga na faia i Peteli, i lalo o se matagaluega fou e ta‘ua o le Matagaluega o A‘oga Faatiokarate. Na ou maua se faaeaga e avea ai ma ovasia i lenā matagaluega mo ni tausaga.

Na mātauina talu ai nei le tele o suiga mata‘ina i a‘oga faale-Tusi Paia. I le 2008, na amata ai le A‘oga mo Toeaina o le Faapotopotoga. E silia i le lua tausaga o a‘oa‘oina ai i Patterson ma le Peteli i Brooklyn le silia i le 12,000 toeaina. O lenā a‘oga o loo faaauau ona faia i isi vaipanoa ma o loo faaaogā ai uso o loo galulue i le fanua e fai ma faia‘oga. I le 2010, na suia ai le igoa o le A‘oga mo Toleniga i le Faiva, i le A‘oga Faale-Tusi Paia mo Uso Nofofua, ma na amata ai le a‘oga fou o le A‘oga Faale-Tusi Paia mo Ulugalii Kerisiano.

I le tausaga faaleauaunaga 2015, na tuufaatasi ai na a‘oga e lua ma faia a‘e ai le A‘oga mo Tagata Tala‘i o le Malo. O i latou e mafai ona a‘oa‘oina ai, e aofia ai ulugalii po o uso ma tuafāfine nofofua. Na faafiafiaina le to‘atele i le lalolagi aoao ina ua faalogo o le a faia nei a‘oga i le tele o lālā. O se fiafiaga le mātauina ua faateleina a‘oga faale-Tusi Paia, ma ou te talisapaia le avanoa na ou feiloa‘i ai i le to‘atele o i latou na toleniina i nei a‘oga.

Pe a toe tepa i lo‘u olaga mai i le taimi a o o‘u le‘i papatiso i le faatanoa vai se‘ia oo mai i le taimi nei, ou te faafetai iā Ieova mo ē e atamamai na fesoasoani iā te a‘u i le upu moni. E lē o i latou uma e tutusa lo matou matutua, ma e eseese o matou atunuu. Peita‘i, o i latou uma o ni tagata e malolosi faaleagaga. Na mātaulia le malosi o lo latou alolofa mo Ieova e ala i a latou gaoioiga ma uiga. E to‘atele ē atamamai o loo i le faalapotopotoga a Ieova e mafai ona tatou savavali faatasi. Ua ou faia faapea ma e tele aogā ua ou tofo i ai.