LONG wanpela moning long Brookings, Saut Dakota, long Amerika, ples i kol nogut tru. Mi luksave olsem bikpela kol bai kamap. Mipela sampela i stap insait long wanpela haus long fam, na ples i kol tru na i mekim skin bilong mipela i guria. Mipela i sanap klostu long ol samting i luk olsem ol longpela dis ol animal i save dring wara long en. Wara long ol dispela dis i kol tru! Orait, nau mi laik kamapim laip stori bilong mi.

Mi bon long Mas 7, 1936. Famili bilong mipela i gat 4-pela pikinini, na mi las bon. Mipela i stap long liklik fam long hap is bilong Saut Dakota. Mipela i laikim tru wok bilong fam, tasol mipela i no larim dispela wok i stap nambawan bikpela samting long laip bilong mipela. Long 1934, papamama i kisim baptais na kamap ol Witnes Bilong Jehova. Ol i dediketim laip bilong ol long Jehova, em Papa bilong yumi long heven. Olsem na ol i putim laik bilong God i stap nambawan bikpela samting long laip bilong ol. Papa bilong mi, Clarence, na bihain ankol bilong mi, Alfred, i mekim wok olsem kampani sevan (nau ol i kolim olsem kodineta bilong lain elda) long liklik kongrigesen bilong mipela long Conde, Saut Dakota.

Oltaim famili bilong mipela i save go long ol miting, na go long haus bilong ol man na tokim ol long ol gutpela blesing em Baibel i tok promis long en. Eksampel bilong papamama na trening ol i givim i helpim tru mipela ol pikinini. Mi na susa bilong mi Dorothy i kamap pablisa taim mipela i gat 6 krismas. Long 1943, mi insait long Skul Tiokratik Bilong Autim Tok—em nupela program bilong miting long dispela taim bipo.

Mipela i save go long olgeta kibung. Brata Grant Suiter i mekim spesel tok long kibung long Sioux Falls long Saut Dakota long 1949. Mi tingim yet het tok bilong en, “It Is Later Than You Think!” Em i kamapim klia olsem olgeta Kristen i dediket long  God, ol i mas yusim laip olgeta bilong ol long autim gutnius bilong Kingdom Bilong God. Dispela tok i kirapim mi long dediket long Jehova. Long narapela kibung sekit long Brookings, mi stap insait long wanpela haus long fam na ples i kol tru olsem mi stori pinis long en, na mi wet long kisim baptais. Long Novemba 12, 1949, mipela 4-pela i kisim baptais long wara ol i pulapim insait long kapa dis.

Mi putim mak long kamap painia. Long Janueri 1, 1952, mi mekim wok painia taim mi gat 15 krismas. Baibel i tok: “Sapos man i wokabaut wantaim man i gat gutpela tingting, orait em tu bai i kisim gutpela tingting.” Planti wanfamili i gat gutpela tingting, olsem na ol i sapotim disisen bilong mi long mekim wok painia. (Snd. 13:20) Ankol Julius i gat 60 krismas, na em i poromanim mi long wok painia. Maski krismas bilong mitupela i narapela narapela, mitupela i amamas tru long autim tok. Mi kisim planti skul long ekspiriens bilong em. I no longtaim, Dorothy tu i kamap painia.

Taim mi stap tineja, papamama i askim planti wasman sekit na meri bilong ol long kam stap wantaim mipela. Mi kisim bikpela helpim long wanpela wasman sekit, Jesse Cantwell, na meri bilong em, Lynn. Tupela i strongim mi long mekim wok painia. Tupela i kirapim mi long putim ol mak bilong winim insait long wok tiokratik. Taim ol i visitim ol kongrigesen i stap klostu, sampela taim ol i invaitim mi long i go autim tok wantaim ol. Mi save kisim bikpela amamas na dispela i strongim mi!

Bihain, Bud Miller i mekim wok olsem wasman raun, na em na meri bilong em Joan, i kam visitim mipela. Long dispela taim, mi gat 18 krismas na ol i singautim mi long joinim ami. Gavman i putim nem bilong mi long grup i sapotim wok politik, tasol mi pilim olsem dispela i no stret bikos Jisas i tokim ol disaipel long sakim wok politik. Mi laik autim gutnius bilong Kingdom. (Jon 15:19) Mi apil long gavman i ken putim nem bilong mi long grup bilong ol wokman bilong God.

Mi pilim tru pasin bilong Brata Miller. Long laik bilong em yet, em i go wantaim mi long stretim tok wantaim gavman. Em man bilong amamas na toktok long olgeta kain man, na em i no save pret. Em i laikim tru God, na dispela pasin bilong em i strongim mi! Long 1954, gavman i putim nem bilong mi long grup bilong ol wokman bilong God.  Dispela i opim rot long mi inap winim narapela mak long wok tiokratik.

Mi kisim invatesen long i go mekim wok long Betel long Staten Ailan, New York—long dispela taim ol i kolim olsem Wastaua Fam. Mi mekim wok long Betel inap 3-pela yia. Mi kisim planti gutpela ekspiriens bikos mi wok wantaim planti bratasista i gat savetingting.

Fam long Staten Ailan i gat redio stesin, em WBBR. Ol Witnes Bilong Jehova i yusim dispela redio stesin kirap long 1924 i go inap long 1957. Inap olsem 15 i go 20 memba bilong famili Betel i save wok long fam. Planti bilong mipela i yangpela na mipela i no gat bikpela save long wok. Tasol Eldon Woodworth i wok wantaim mipela, na em wanpela bilong ol Kristen em God i anointim. Em i pulap tru long savetingting. Em i olsem wanpela papa i save tingim mipela, na dispela i strongim bilip bilong mipela. Taim popaia bilong ol narapela i mekim mipela i bel hevi, Brata Woodworth i save tok: “Bikpela i yusim ol sinman long mekim gutpela wok tru.”

Mipela i amamas tru olsem Brata Frederick W. Franz i stap wantaim mipela. Savetingting bilong em na save bilong em long ol tok bilong Baibel i helpim mipela olgeta, na em i tingim tru mipela olgeta wan wan. Kuk bilong mipela em Harry Peterson; em isi long mipela i kolim laspela nem bilong em Peterson, tasol nem tru em Papargyropoulos. Em tu i wanpela brata em God i anointim, na em i save givim bel tru long autim tok. Brata Peterson i save mekim gut ol wok long Betel, na em i no save lusim wok autim tok. Em i save tilim planti handret magasin long olgeta mun. Na tu, em i gat bikpela save long ol tok bilong Baibel, na em i save bekim planti askim bilong mipela.

Ol narapela i save bringim ol kaikai bilong fam i go long faktori i stap long fam. Long olgeta wan wan yia, mipela ol lain i wok long faktori i save pulimapim 42 tausen 6 handret lita bilong ol prut na ol kumu sayor long tin, na redim bilong Betel famili i ken kaikai. Mi mekim dispela wok wantaim Etta Huth, em wanpela sista i gat savetingting. Em i stiaim mipela long hau mipela inap redim na pulimapim ol kaikai long ol tin. Long taim bilong pulimapim ol kaikai long tin, ol asples sista i save kam  na helpim mipela, na Etta i oganaisim wok bilong ol. Maski Etta i go pas long wok bilong pulimapim ol kaikai long tin, em i save soim rispek long ol brata i stap olsem ol ovasia long fam. Mi tingim em olsem gutpela eksampel long pasin bilong i stap daun long ol brata i mekim wok bos insait long oganaisesen.

Angela Romano em wanpela bilong ol sista i kam helpim mipela long pulimapim kaikai long ol tin. Etta i bin helpim em taim em i kam insait long tok i tru. Olsem na taim mi wok long Betel, mi bungim narapela sista i gat savetingting, na nau mitupela wantaim i mekim wok bilong God inap 58 yia. Mitupela Angie i marit long Epril 1958, na mitupela i amamas long kain kain asainmen mipela i bin kisim long mekim wok bilong God. Inap planti yia, Angie i stap gut long Jehova na dispela i strongim tru marit bilong mipela. Oltaim em i stap redi long sambai long mi maski wanem wanem hevi i bungim mipela.

Long 1957, ol i salim redio stesin bilong WBBR long Staten Ailan, na mi go wok long Brooklyn Betel inap liklik haptaim. Mitupela Angie i marit, olsem na mi lusim Betel na mitupela i mekim wok painia long Staten Ailan inap 3-pela yia. Inap liklik haptaim, mi wok long nupela kampani i baim redio stesin, ol i kolim WPOW.

Mitupela Angie i tingting strong long stap redi long i go helpim wok bilong Kingdom long ol hap i sot long ol pablisa. Long kirap bilong 1961, mipela i kamap spesel painia long Falls City, Nebraska. I no longtaim mipela i kisim invatesen bilong i go long Skul Bilong Wok Kingdom. Long dispela taim ol i save mekim dispela skul inap 1-pela mun long Saut Lansing, New York. Mipela i amamas long save mipela i kisim, na mipela i redi long yusim dispela trening long mekim gut asainmen bilong mipela long Nebraska. Tasol mipela i kirap nogut long kisim nupela asainmen—mipela bai mekim wok misineri long Kambodia! Dispela kantri long saut-is Esia i narapela kain tru na em i pulap long planti naispela ples, kain kain saun bilong ol samting, na naispela smel bilong ol samting—em ol samting mipela i no save long en. Mipela i amamas tru long autim gutnius long dispela hap.

Hevi bilong wok politik i mekim na mipela i senisim ples na i go long Saut Vietnam. Tasol insait long 2-pela yia, mi kisim bikpela sik, olsem na mipela i mas go bek long ples. Mi nidim sampela haptaim bilong kamap orait gen, na taim mi kamap orait, mipela i kirap gen long mekim wok autim tok fultaim.

Long Mas 1965, mipela i kirap long mekim wok sekit na go visitim ol kongrigesen. Inap 33 yia, mi amamas long mekim wok olsem wasman sekit na wasman distrik, na Angie tu i amamas long dispela wok. Na tu, mipela i amamas long redim ol samting paslain long kibung na long taim bilong kibung. Mi laikim tru ol kibung, olsem na mi save amamas tru long helpim wok bilong oganaisim ol kibung. Inap sampela yia, mipela i mekim wok long biktaun New York, na planti kibung i kamap long Yankee Stediam.

Wankain olsem planti bratasista long fultaim sevis, mitupela Angie tu i kisim ol asainmen we mipela  i amamas long en na i gat ol hatwok bilong en. Long 1995, mi kisim asainmen bilong mekim wok tisa long Ministerial Trening Skul. Tripela yia bihain, ol i invaitim mipela long i go long Betel. Mi amamas tru long i go bek long hap i stap olsem fes asainmen bilong mi taim mi insait long fultaim sevis winim 40 yia i go pinis. Inap planti yia, mi mekim wok long Sevis Dipatmen, na tu, mi mekim wok tisa long planti skul tiokratik. Long 2007, Gavening Bodi i makim Dipatmen Bilong Skul Tiokratik long bosim ol skul i kamap long Betel, na mi stap ovasia bilong dispela Dipatmen inap sampela yia.

Mipela i amamas long lukim planti bikpela senis i kamap long ol skul tiokratik. Long 2008, Gavening Bodi i kamapim Skul Bilong Ol Elda Bilong Kongrigesen. Insait long 2-pela yia, winim 12,000 elda i kisim skul long Patterson na long Brooklyn Betel. Dispela skul i kamap long narapela narapela hap, na ol tisa em ol brata i bin kisim trening. Long 2010, ol i senisim nem bilong Ministerial Trening Skul na kolim olsem Baibel Skul Bilong Ol Singel Brata. Long seim yia, narapela nupela skul i kamap—Baibel Skul Bilong Ol Marit Kristen.

Kirap long sevis yia bilong 2015, ol i bungim dispela 2-pela skul na kolim olsem Skul Bilong Ol Kingdom Evanselis. Ol lain bilong i go long dispela skul em ol marit, singel brata, o singel sista. Planti bratasista long olgeta hap i amamas tru long harim olsem dispela skul bai kamap long planti brens. Planti moa bratasista i kisim skul tiokratik, na mi amamas tru long bungim planti bratasista i kam long ol dispela skul.

Mi tingim bek taim mi kisim baptais na i kam inap long nau, na mi tenkyu tru long Jehova olsem ol bratasista i gat savetingting i stiaim mi long bihainim rot bilong tok i tru. Ol i gat kain kain krismas, kalsa, na sindaun. Tasol pasin na tingting tru bilong ol i soim olsem ol i laikim tru Jehova. Long oganaisesen bilong God, planti bratasista i gat gutpela tingting, na yumi inap stap pren bilong ol. Mi mekim olsem, na dispela i helpim mi.