1. Bõe n tõe n kɩt tɩ ned segd ne waoogre, la bõe la d na n bãng sõs-kãngã pʋgẽ?

WAOOG ned rat n yeelame tɩ f wilg tɩ f nanda a soaba, la tɩ f pẽgd-a lame. Naoor wʋsgo, d waoogda ned a sẽn maan bũmb tɩ sek pẽgr yĩnga, pa rẽ bɩ tʋʋmd a sẽn tare, wall a zu-sobend yĩnga. Sõs-kãngã pʋgẽ, d na n bãnga b rãmb nins d sẽn segd n waooge, la d sẽn segd n waoog-bã võore.

2, 3. a) Bõe yĩng tɩ yaa a Zeova n segd ne waoogr n yɩɩda? (Ges-y fotã sẽn be yĩngrã.) b) Pe-bil ning yell b sẽn gomd Vẽnegr 5:13 wã yaa ãnda, la bõe yĩng t’a segd ne waoogre?

² Vẽnegr 5:13 yeelame tɩ “sẽn zao-a geerã zugã la pe-bilã” toga ne waoogre. “Sẽn zao-a geerã zugã” yaa a Zeova. Sak a 4 pʋgẽ, b togsa bũmb ning sẽn kɩt t’a tog ne waoogrã. “Bõn-vɩɩs” sẽn be saasẽ zẽkda b koees n pẽgd a Zeova, a soab ning sẽn “vɩ zamaan woo zamaana,” n yetẽ yaa: “Tõnd Zu-soab la d Wẽnnaam, yãmb n zems tɩ reeg ziiri, la waoogre, la pãnga. Bala, yãmb n naan bũmb fãa,  la yaa yãmb daab yĩng la y naan-b tɩ b beẽ.”—Vẽn. 4:9, 11.

³ ‘Pe-bil’ ning yell b sẽn gomd Vẽnegr 5:13 wã yaa a Zeezi Kirist. Bõe n wilgd rẽ? A sẽn wa n be tẽng zugã, b bool-a lame tɩ “Wẽnnaam pe-bilã, sẽn yiisd-a dũni yel-wẽnã.” (Zã 1:29) Woto yaa bʋʋm sẽn sek d na waoog a Zeezi. Sɩd me, rĩm-bʋg n zoe n sak kũum a nin-buiidã neer yĩnga? A Zeezi leb n segda ne waoogre, bala, a yaa ‘rĩm-dãmb Dĩma la zu-soben-dãmb Zu-soaba.’ (1 Tɩm. 6:14-16) Tõe tɩ woto kɩtame tɩ y rat n naag malɛgs tusa wã sẽn be saasẽ wã n yeele: “Pe-bil ning b sẽn dag n kʋ wã zemsame tɩ reeg pãn-tõogo, arzegse, yam, pãnga, waoogre, ziiri, la pẽgre.”—Vẽn. 5:12.

4. Bõe yĩng tɩ yaa tɩlɛ tɩ d waoog a Zeova ne a Zeezi?

⁴ A Zeezi goam nins sẽn be Zã 5:22, 23 wã wilgdame tɩ d segd n waooga a Zeova la d waoog yẽ me. D sã n dat n wa paam vɩɩm sẽn ka sɛtã, yaa tɩlɛ. A yeelame: “Ba wã ka kaood ned baa a yembr bʋʋd ye, b basa bʋʋdã fãa ne Bi-riblã, tɩ nebã fãa na waoog-a wa b sẽn waoogd ba wã. Ned ning sẽn ka waoogd Bi-riblã ka waoogd ned ning sẽn tʋm-a wã me ye.”—Karm-y Yɩɩn-sõamyã 2:11, 12.

5. Bõe yĩng tɩ d segd n waoog ned buud fãa?

⁵ Wẽnnaam naana ninsaal n ‘wẽneg a menga.’ (Gen. 1:27) Woto kɩtame tɩ d fãa la bal tõe n dɩk a togs-n-taare. Wala makre, ninsaal tõe n wilga a to a nonglem, n maan-a neere, pa rẽ bɩ n zoe a nimbãanega. Wẽnnaam naana ninsaal me t’a tar sũur-kaseto, n tõe n bãng sẽn yaa sõma la sẽn yaa wẽnga, pʋ-lik la pʋ-peelem, pa rẽ bɩ sẽn segd la sẽn pa segde. (Rom. 2:14, 15) Nebã fãa la bal nonga yɩlemde, sẽn yaa neere, la b rat tɩ laafɩ zĩnd bãmb ne b taabã sʋka. Woto pa lingri, bala a Zeova nonga laafɩ, a leb n pa zũnd-zãnd soab ye. Vẽenega, a Zeova naana ninsaalbã tɩ b tõe n dɩk a togs-n-taare. Woto yĩnga, d segd n waoogda d taabã me.—Yɩɩn. 8:6.

6, 7. Neb a taabã waoogr wɛɛngẽ, bõe n wilgd t’a Zeova Kaset rãmbã yaa toore?

⁶ D miime tɩ d taabã segda ne waoogre, la yɩl n bãng n waoog-b tɩ zems tõe n yɩɩ toogo. Dũniyã yamã kẽe neb wʋsgo, hal tɩ b waoogd rap bɩ pagb wa b wẽnnaam-dãmba. Wall tɩ b waoog-b wa a Zeova sẽn dat to-to wã, b waoogd-b lame hal tɩ loog noore. B geta politikã taoor dãmba, tũudmã taoor dãmba, ɛspoorã rãmba, sẽn maand-b filim-dãmbã, la neb a taab yʋy sẽn yi wa mak-sõngo, n dɩkd b togs-n-taar fu-yerdɩ wã la yel-manesmã wɛɛngẽ.

⁷ Kiris-neb hakɩɩkã miime tɩ pa segd tɩ b waoog ninsaal tɩ loog noor ye. Ninsaalbã fãa sʋka, yaa a Zeezi bal n kõ mak-sõng sẽn ka to tɩ d segd n dɩk a togs-n-taare. (1 Pɩy. 2:21) D sã n waoogd nebã tɩ loog noore, Wẽnnaam sũur pa na n yɩ noog ye. D segd n tẽegdame tɩ “nebã fãa maana yel-wẽna, n kong Wẽnnaam ziirã.” (Rom. 3:23) Dẽnd d pa segd n waoog ninsaal baa a ye wa Wẽnnaam ye.

8, 9. a) A Zeova Kaset rãmbã manesem yaa wãn ne goosneema wã neba? b) Wakat-bʋg la d zãgsd b noore?

⁸ Neb n be d sẽn segd n waooge, b  tʋʋmd bɩ b zu-sobend yĩnga. Makre, tẽeg-y goosneema wã tʋm-tʋmdbã sẽn maand nin-buiidã yĩngã. B geta b yelle, la b sõngdẽ tɩ bãan beẽ. B tʋʋmã nafda nebã fãa. Tʋm-tʋmd a Poll boola goosneema wã tʋm-tʋmdb tɩ ‘pãn-soaadba,’ la a sagl kiris-nebã tɩ b sak-ba. A paasame: “Kɩs-y ned fãa bũmb ning y sẽn tog n kɩs-a: Kɩs-y sẽn tog n deeg-a yaoodã yaoodo, . . . la y waoog ned ning y sẽn tog n waooge.”—Rom. 13:1, 7.

⁹ D sẽn yaa a Zeova Kaset rãmbã, d maanda d sẽn tõe fãa n wilgdẽ tɩ d waoogda goosneema wã tʋm-tʋmdba. Yaa sɩd tɩ tẽng fãa tara a noy la a minundu. Dẽnd tẽngã taoor dãmb sẽn dat tɩ d maanã tõe n yɩɩ toor ne tẽng a to. Baa ne rẽ, d sakd n tũuda b noyã. La b sã n wa rat tɩ d maan bũmb sẽn na n kɩt tɩ d kɩɩs a Zeova, d zãgsdame. A Zeova la d waoogd n yɩɩd ninsaala.—Karm-y 1 Pɩyɛɛr 2:13-17.

10. Bõe la a Zeova nin-buiidã maan pĩnd wẽndẽ tɩ yaa mak-sõngo?

¹⁰ Pĩnd wẽndẽ, a Zeova nin-buiidã saka nanambse, tɩ yaa mak-sõngo. Rom tẽngã naab sẽn wa n dat tɩ b sõd a nin-buiidã, a Zozɛf ne a Maari sakame n kẽng tɩ b sõd-ba. B toga sor n kẽng Betlehɛm, baa ne a Maari sẽn da kolg rogmã. (Luk 2:1-5) A Poll me kõo mak-sõng nanambsã waoogr wɛɛngẽ. B sẽn wa n dõd-a t’a na n gom n fãag a meng rĩm a Erood Agripa ne a Fɛstus sẽn da yaa Zide guvɛrneerã taoorã, a wilga a goamã pʋgẽ t’a waoogd-b lame.—Tʋʋ. 25:1-12; 26:1-3.

11, 12. a) Bõe yĩng tɩ d sẽn segd n waoog tũudmã taoor dãmb to-to wã pa tog n yɩ toore? b) Otris saam-biigã sẽn waoog politik taoor soabã, bõe n maane?

¹¹ La tũudmã taoor dãmb yẽ? D sẽn segd n waoog-b to-to wã tog n yɩɩ toor bɩ? Ayo. D waoogd-b-la wa d sẽn waoogd neb a taabã. D pa waoogd-b tɩ loog nugu, baa b sẽn dat rẽ wã. Bõe yĩnga? Bala, b sẽn zãmsd nebã bũmb ning Wẽnnaam zugã yaa ziri, la b golemd Biiblã goamã. D tẽeg t’a Zeezi ninga a wakatẽ tũudmã taoor-dãmb taale, n yeel tɩ b yaa zãmb dãmba, la tɛtb sẽn yaa zoense. (Mat. 23:23, 24) La d sã n waoogd tẽngã taoor dãmb wa sẽn segde, pa wẽng ye. Rẽ mi n kɩtame meng tɩ b sõng-do.

¹² Wala makre, a Leopold Engleitner yɩɩ a Zeova Kaset soab sẽn tar yẽesem, n da be Otris soolmẽ wã. Dũni gill zabr a yiib-n-soabã sasa, nazi-rãmbã yõk-a lame n kẽes tẽr n na n tɩ pag Bukɛnvald kã de kõnsãntrasiõ wã pʋgẽ. Tẽrã pʋgẽ, a yãa a Heinrich Gleissner sẽn da yaa politik taoor soaba, la a mi laloa wã sõma wã. Nazi-rãmbã ra yõka yẽ me. Saam-biig a Leopold maaga a yĩng n wilg raoã a sẽn tẽed bũmb ninsã, t’a sak n kelg neere. Zabrã sẽn wa n sa wã, raoã tũnuga ne a zu-sobendã n sõng a Zeova Kaset rãmbã sẽn be Otrisã naoor wʋsgo. Tõe tɩ y tẽra kibay sẽn wilgd a Zeova Kaset rãmb sẽn waoog b tẽngã taoor dãmb tɩ wom biisi.

13. Ãnd dãmb la d segd n waoog n tɩ yɩɩda, la bõe yĩnga?

¹³ D segd n waooga d tẽed-n-taasã, sẽn yɩɩd fãa, d taoor lʋɩtbã. Wala  makre, kãsem-dãmbã, tigims sull yet-gɛtbã, filiyall-dãmbã taoor lʋɩtbã la siglgã taoor lʋɩtb sullã neba. (Karm-y 1 Tɩmote 5:17.) B fãa geta Wẽnnaam nin-buiidã yelle, tɩ b boond-b Biiblã pʋgẽ tɩ “kũun sẽn yaa neba.” (Efɛ. 4:8, MN) D waoogda saam-bi-kãensã, n pa get b sẽn yit tẽng ninga, b bãngre, b tʋʋmde, wall b tarem ye. Pipi kiris-nebã kõo mak-sõng rẽ wɛɛngẽ. B ra waoogda b taoor dãmbã. Tõnd me maanda woto. D sã n wa be ne d taoor dãmbã, d pa get-b wa malɛgs ye. La d waoogd-b lame, b sẽn tʋmd wʋsg la b yaa sik-m-mens rãmbã yĩnga.—Karm-y 2 Korẽnt-rãmb 1:24; Vẽnegr 19:10.

14, 15. Bõe n kɩt tɩ kãsem-dãmbã yaa toor ne tũudum a taabã taoor dãmba?

¹⁴ Kãsem-dãmbã yaa pe-kɩɩmb sẽn yaa sik-m-mens rãmba. B sẽn pa rat tɩ b taabã waoog-b wa neb yʋy sẽn yi wã wilgda rẽ. Kɩtame tɩ b yaa toor ne a Zeezi wakatẽ tũudmã taoor dãmba la sẽn be-b rũndã-rũndã wã. A Zeezi goma b yell n yeele: “Bãmb nonga naam zĩndg zĩis rɩɩb zĩisẽ la karen-dotẽ. Bãmb nonga nebã pʋʋsem raasẽ.”—Mat. 23:6, 7.

¹⁵ Kãsem-dãmbã tũuda goam a Zeezi sẽn da togse. A ra yeelame: “Ra kɩt-y tɩ nebã boond yãmb tɩ karen-saamb ye. Bala, yãmb karen-saamb yaa a yembr tãa, la yãmb fãa yaa ba-biisi. Da bool-y ned baa a yembr tãa dũni ka tɩ ba ye. Bala, ned a yembr tãa n yaa yãmb ba, soab ning sẽn be-a saasẽ wã. Da kɩt-y tɩ nebã bool yãmb tɩ taoor dãmb ye, bala, ned a yembr tãa n yaa taoor soaba, yaa Kirisi. Sẽn yaa-a kãseng n yɩɩd yãmb sʋkã, bɩ a yɩ yãmb tʋmtʋmda. Ned sã n zẽk a menga, b na n sik-a lame, la ned sã n sik a menga, b na n zẽk-a lame.” (Mat. 23:8-12) Tigimsã sẽn be dũniyã gill zugã kãsem-dãmbã sã n sikd b mense, la b sakd a Zeezi goamã, b tẽed-n-taasã na n nong-b lame, n pẽgd-ba, la b waoogd-ba.

16. Bõe yĩng tɩ d segd n mao n waoogd d taabã?

¹⁶ Yaa sɩd tɩ tõe n kaoosame tɩ d yaool n bãng d sẽn tog n waoog d taabã to-to. Yɩɩ woto me ne pipi kiris-nebã. (Tʋʋ. 10:22-26; 3 Zã 9, 10) La tara yõod tɩ d modg n tũ Biiblã sẽn yet bũmb ning d taabã waoogr wɛɛngẽ  wã. D sã n maan dẽ, na n naf-d-la wʋsgo.

17. D sã n waoogd goosneema wã tʋm-tʋmdba, nafa nins d sẽn paamdã kẽer la bʋse?

¹⁷ D sã n waoogd goosneema wã tʋm-tʋmdba, tõe n wa yɩɩ sabab tɩ d paam sor n ket n moond koɛɛgã. Pʋd n tõe n kɩtame tɩ b nand koɛɛgã tõnd sẽn moondã. A Birzit sẽn yaa so-pakd sẽn yit Alemayn wã kibarã wilgda rẽ. Sẽn zems yʋʋm a wãna, a bi-pugl n da karemd lekoll a ye pʋgẽ, tɩ b wa na n kõ-b b dipolom-dãmbã, t’a kẽnge. Karen-saam-dãmbã yeela a Birzit tɩ hal n tãag masã, bãmb sũur yaa noogo, a Zeova Kaset rãmb kamb sẽn be bãmb lekollẽ wã. B yeelame tɩ kom-kãensã kɩtame tɩ bãmb lekollã yaa zĩ-noogo. Ad a Birzit sẽn leoke: “Tõnd wilgda d kambã Wẽnnaam noyã la a saglsã tɩ b tũudẽ. Rẽ kɩtame tɩ b miẽ tɩ b segd n waooga b karen-saam-dãmbã.” Karen-saamb a yembr yeelame tɩ karen-biisã fãa sã n da yaa wa a Zeova Kaset rãmbã kamba, b kareng ra na n yɩɩ nana. Semen a wãn poore, karen-saamb a ye n sak n kẽng tigis-kãsenga.

18, 19. Kãsem-dãmbã waoogrã wɛɛngẽ, bõe yĩng tɩ d segd n maan gũusgu?

¹⁸ Wẽnnaam Gomdã sagls tõe n sõng-d lame tɩ d bãng d sẽn tog n waoog kãsem-dãmbã to-to. (Karm-y Ebre-rãmb 13:7, 17.) Segdame tɩ d pẽg-ba, b sẽn tʋmd wʋsgã yĩnga. D sã n tũud b saglsã, na n sõng-b lame tɩ b tõog n tʋm b tʋʋmdã ne sũ-noogo. Biiblã sagend-d lame me tɩ d tall b tẽebã buudu. La pa rat n yeel tɩ d rɩk kãsem-soab ning togs-n-taar kɛpɩ ye. Wala makre, a sẽn manegd a meng to-to, a sẽn gomd to-to wã, wall a sẽn zãmsd nebã to-to wã. D sã n maand woto, lebgda wa d basa Kiristã tũubu, n tũud ninsaala. D tẽeg tɩ kãsem-dãmbã me yaa pãn-komsem dãmba.

¹⁹ D sã n waoogd kãsem-dãmbã la d pẽgd-ba, n pa get-b wa neb yʋy sẽn yi, sõngd-b lame. Bõe yĩnga? Bala, na n kɩtame tɩ b kell n tall sik-m-menga, la b ra tags tɩ b sãoo b taabã, bɩ tɩ b sẽn maand fãa yaa tɩrg ye.

20. D sã n waoogd d taabã, wãn to la nafd tõnd mengã?

²⁰ D sã n pẽgd d taabã, sõngd-d lame tɩ d ra wa lebg rat-m-ye soab ye. Leb n na n sõng-d lame tɩ b sã n wa pẽgd tõnd bɩ d kell n sik d menga. Na n kɩtame me tɩ ned d sẽn nand sã n wa maan bũmb tɩ sãam d sũuri, bɩ ra koms d tẽebã ye. Na n sõng-d lame me tɩ d kell n tall yam a ye ne a Zeova siglgã nebã. Bala, b pa waoogd ned baa a ye tɩ loog noore, a soab tũud a Zeova, t’a pa tũud-a.

21. D sã n waoogd d taabã, a nafa ning sẽn tɩ yɩɩd yaa bʋgo?

²¹ D sã n waoogd d taabã, a nafa ning sẽn tɩ yɩɩdã yaa tɩ d noogda Wẽnnaam sũuri. D maanda bũmb a sẽn dat tɩ d maane, tɩ wilgdẽ tɩ d sakd a raabã. Rẽ, a Zeova tõogd n leoka a Sʋɩtãan sẽn yeel tɩ ned kae n tõe n sak Wẽnnaam wakat fãa wã. (Yel. 27:11) Dũniyã neb wʋsg pa mi b sẽn segd n waoog b taabã to-to tɩ zems ye. Tõnd yẽ sũur yaa noogo, d sẽn mi d sẽn segd n waoogd d taabã to-to tɩ zems ne a Zeova sẽn datã!