1, 2. Иуди цуппар паддзӕхей хабармӕ цӕмӕн ӕркӕсдзиан?

ДӔ ЦӔСТИТӔБӔЛ рауайун кӕнӕ, цума надбӕл фӕццӕуис ӕма дӕ разӕй, еци адӕймагӕн ӕ къах фӕггурдӕй ӕма рахаудтӕй. Ӕвӕдзи, уобӕлти цӕугӕй лӕмбунӕгдӕр уодзӕнӕ. Уотӕ иннети рӕдудтитӕбӕл ку сагъӕс кӕнӕн, уӕд мах дӕр нӕхе уӕхӕн къахдзӕфтӕй гъӕуай кӕндзиан. Иннети рӕдудтитӕй берӕ цӕбӕлдӕрти ахур кӕнӕн, уӕлдайдӕр ба Библи ке кой кӕнуй, уонӕй.

² Айразиккон статьяй ци цуппар паддзахей кой кодтан, уонӕн сӕ зӕрдитӕ ӕнӕгъӕнӕйдӕр Йегови хӕццӕ адтӕнцӕ. Фал кӕмидӕрти ба хъӕбӕр фӕррӕдуйиуонцӕ. Сӕ рӕдудтитӕй цӕбӕл ахур кӕнӕн, удта нин ци банхус кӕндзӕй уӕхӕн рӕдудтитӕй нӕхе хезун? Сӕ хабӕрттӕ Библий мах туххӕй финст ӕрцудӕнцӕ ӕма си нӕ бон ӕй нӕхецӕн зундӕн берӕ цидӕртӕ райсун. (Бакӕсӕ Ромӕгтӕмӕ 15:4.)

3–5. а) Кӕд Асӕн ӕ зӕрдӕ ӕнӕгъӕнӕйдӕр Йегови хӕццӕ адтӕй, уӕддӕр цӕхуӕн рӕдуд къахдзӕф искодта? б) Цума Асӕ ӕ зӕрдӕ адӕймагбӕл цӕмӕн бадардта, Ваасӕ Иуди нихмӕ ку рацудӕй, уӕд?

³ Ӕркӕсӕн бал Аси хабармӕ. Эфиопӕгтӕ Иуди нихмӕ, еу  миллиуан ӕфсӕддони кӕми адтӕй, уӕхӕн ӕфсади хӕццӕ ку рацудӕнцӕ, уӕд Асӕ ӕнхус Йеговӕй байагурдта. Фал Израили паддзах Ваасӕ ӕ нихмӕ ку рацудӕй, уӕдта уотӕ нӕбал бакодта. Ваасӕ федар кӕнун райдӕдта, Израил ӕма Иуди астӕу ка адтӕй, еци горӕт Рами фӕрстӕ ӕма Асӕн ӕ фӕндӕ адтӕй, еци куст бауорамун (2 Анз. 16:1–3). Асӕ ӕ зӕрдӕ ӕхе зундбӕл бадардта ӕма Сирий паддзах Венададӕн бафиста, цӕмӕй Вааси нихмӕ рацудайдӕ. Цума ӕ фӕндӕй ести рауадӕй? Библи зӕгъуй: «Ваасӕ уой ку фегъуста, уӕд Рамӕ нӕбал федар кодта, куститӕ бауорӕдта» (2 Анз. 16:5). Гъуддаг фӕррӕстмӕ ’й, ӕрмӕст фиццаг бакастӕй.

⁴ Фал еци гъуддагмӕ Йеговӕ цӕхуӕн цӕстӕй ракастӕй? Хуцау Асӕмӕ пахампар Ананий рарвиста, цӕмӕй ин бауайдзӕф кодтайдӕ, ӕ зӕрдӕ Хуцаубӕл ке нӕ бадардта, уой туххӕй. (Бакӕсӕ 2 Анзфинстити 16:7–9.) Анани ин Хуцауи тӕрхон фегъосун кодта: «Уой туххӕй амӕй фӕстӕмӕ дӕ хӕццӕ тохдзӕнцӕ». Кӕд си Ваасӕ райеуварс ӕй, уӕддӕр цалинмӕ Асӕ паддзах адтӕй, уӕдмӕ Иуди адӕн гъезӕмарӕ кодтонцӕ, тухтитӕн фӕууӕн ке нӕбал адтӕй, уой туххӕй.

⁵ Айразӕй еци статьяй куд базудтан, уомӕ гӕсгӕ Асӕ Йегови зӕрдӕ рохс кодта. Кӕд ӕнӕнхӕст адтӕй, уӕддӕр ӕ зӕрдӕ ӕнӕгъӕнӕйдӕр Йегови хӕццӕ адтӕй ӕма ’й Йеговӕ уидта (1 Пад. 15:14). Фал Аси бон н’ адтӕй, ӕ лӕгъуз унаффӕ ’й ци фӕстеугутӕмӕ ӕркодта, уонӕй ӕхе багъӕуай кӕнун. Ваасӕ ӕ нихмӕ ку рацудӕй, уӕд цума ӕ зӕрдӕ ӕхебӕл ӕма Венададбӕл цӕмӕн бадардта, Йеговӕбӕл нӕ, фал? Ӕвӕдзи имӕ уотӕ кастӕй, ӕма ин уотемӕй тугъд рамолун ӕнцондӕр, уодзӕй. Кенӕ ба, ӕвӕдзи, еске ӕнӕзунд унаффӕмӕ байгъуста.

6. Паддзах Аси хабарӕй цӕбӕл ахур кӕнӕн? Ба ’й лӕдӕрун кӕнӕ.

⁶ Аси хабарӕй цӕбӕл ахур кӕнӕн? Нӕ царди ести зиндзийнӕдтӕ ку фӕззиннуй, уӕд уайтагъддӕр Йеговӕмӕ ковун райдайӕн, цӕмӕй нин банхус кӕна. Фал нӕ гъуддаг еугур лӕгъуз ку нӕ фӕууй, уӕдта? Гъуддаг нӕхе къохмӕ райсӕн? Ӕви нӕ зӕрдӕ Хуцауи зундбӕл фӕддарӕн ӕма Библий уагӕвӕрдтӕмӕ гӕсгӕ фӕййархайӕн? Зӕгъӕн, хеуӕнттӕ дӕ нихмӕ цӕунцӕ ӕма сӕ нӕ фӕндуй, цӕмӕй ӕмбурдтӕмӕ кенӕ конгресстӕмӕ цӕуай. Цума уӕхӕн уавӕри Йеговӕй кордзӕнӕ, цӕмӕй дин банхус кӕна, растдӕр куд уодзӕй, уотӕ бакӕнун? Кенӕ, зӕгъӕн, дӕ куст фесафтай ӕма дин нӕуӕг иссерун ба не ’нтӕсуй. Цӕмӕй дӕ кустмӕ райсонцӕ, уобӕл ку дзубанди кӕнай, уӕд хецауӕн зӕгъдзӕнӕ, ӕмбурдтӕ цох кӕнун дӕ ке нӕ фӕндуй? Цийфӕнди зин уавӕри ма бахауӕн, уӕддӕр гъӕуама архайӕн псаломзаргӕнӕги унаффӕмӕ гӕсгӕ: «Дӕ над Йегови барӕ бакӕнӕ, дӕ зӕрдӕ ибӕл дарӕ, ӕма е ӕхуӕдӕг архайдзӕй» (Пс. 37:5).

7, 8. Иосафат цӕхуӕн рӕдуд къахдзӕфтӕ искодта, ӕма ’й е цӕмӕ ӕркодта? (Кӕсӕ хузӕмӕ статьяй райдайӕни.)

⁷ Нур ба ӕркӕсӕн Аси фурт Иосафати цӕветтонмӕ. Берӕ хуарз менеугутӕ имӕ адтӕй, удта ӕ зӕрдӕ Йеговӕбӕл ку дардта, уӕд берӕ хуарз гъуддӕгтӕ искодта. Фал ӕнӕзунд унаффитӕ дӕр рахӕссидӕ. Зӕгъӕн, ӕ фуртӕн фудзӕрдӕ паддзах Ахави кизги ракурдта. Удта исарази ӕй Ахави хӕццӕ сирийӕгти нихмӕ рацӕун, кӕд ӕй пахапар Михей еци гъуддагӕй фӕдзахста, уӕддӕр. Еци тугъди ’й минкъийтӕбӕл нӕ рамардтонцӕ (2 Анз. 18:1–32). Уой фӕсте Йерусалиммӕ ку раздахтӕй, уӕд ӕй пахампар Ииуй бафарста: «Фудгӕнгутӕн ӕнхус кӕнун раст ӕй? Йеговӕй е ’сӕфт ка уинуй, уони гъӕуама уарзгӕ кӕнай?» (Бакӕсӕ 2 Анзфинстити 19:1–3.)

 ⁸ Цума Иосафат естӕбӕл исахур ӕй? Кӕд идарддӕр дӕр Хуцауӕн еузӕрдонӕй лӕггадӕ кодта, уӕддӕр нецӕбӕл исахур ӕй, удта Ииуймӕ дӕр нӕ байгъуста. Е рабӕрӕг ӕй, нӕуӕгӕй бабӕй цӕхуӕн лӕгъуз унаффӕ рахаста, уомӕй. Ахави фурт Охозий хӕццӕ бадзурд искодта. Охози дӕр ӕ фиди хузӕн Хуцауи знаг адтӕй. Иосафат ӕма Охози еумӕ райдӕдтонцӕ наутӕ аразун, фал син ниппурхӕ ’нцӕ ӕма сӕ еумӕйаг гъуддагӕй неци рауадӕй (2 Анз. 20:35–37).

9. «Ӕнӕзундти хӕццӕ» ку лимӕн кӕнӕн, уӕд нӕ е цӕмӕ ӕркӕндзӕй?

⁹ Иосафати хабарӕй цӕбӕл ахур кӕнӕн? Ӕнӕуой Иосафат хуарз паддзах адтӕй. Раст ци ӕй, уой кодта ӕма «Йегови ӕгас зӕрдӕй... агурдта» (2 Анз. 22:9). Фал лӕгъуз адӕни хӕццӕ ке балимӕн ӕй, е ӕй хуарзӕй нецӕмӕ ӕркодта. Ӕмбесӕндти 13:20 куд финст ӕй, уомӕ гӕсгӕ «зундгинти хӕццӕ ка цӕуй, е исуодзӕй зундгин, ӕнӕзундти хӕццӕ ка лимӕн кӕнуй, е ба фидбилизи бахаудзӕй». Еу ӕрдиги гъӕуама адӕнӕн ӕнхус кӕнӕн рӕстдзийнадӕ базонунмӕ, фал Иосафати хабар дӕр гъӕуама ма иронх кӕнӕн. Ахавӕн фенхус кӕнун ке исфӕндӕ кодта, уой туххӕй минкъийтӕбӕл ӕхе нӕ бабун кодта, кӕд Ахави еци ӕнхус ӕппундӕр нӕ гъудӕй, уӕддӕр. Уотӕ мах дӕр гъӕуа нӕ гъӕуа Йегови ка нӕ уарзуй, уони хӕццӕ рӕстӕг ку ӕрветӕн, уӕд нӕхе тӕссаг уавӕри гӕлдзӕн.

10. а) Бийнонтӕ искӕнун ке фӕндуй, етӕ Иосафати хабарӕй цӕбӕл ахур кӕнунцӕ? б) Ци гъӕуама ма иронх кӕнӕн?

¹⁰ Иосафатбӕл ци ӕрцудӕй, уомӕй ма цӕбӕл ахур кӕнӕн? Фӕууй уотӕ, ӕма хуӕртӕ ӕма ӕнсувӕртӕй ескӕмӕн ӕ зӕрдӕмӕ цӕун райдайуй, Йегови ка нӕ уарзуй, уӕхӕн адӕймаг. Ӕвӕдзи имӕ уотӕ фӕккӕсуй, ӕма уой цӕхуӕн адӕймаг гъӕуй, уӕхӕн нӕхеуӕнтти астӕу некӕд иссердзӕй. Кедӕр ба сӕ разӕй искӕнунцӕ, Ӕвдесӕн ка нӕй, еци хеуӕнттӕ, зӕгъгӕ, афонӕ дин ӕй бийнонтӕ искӕнун кенӕ байзайдзӕнӕ. Беретӕ ба исарази уодзӕнцӕ еу хуӕри дзурдти хӕццӕ: «Махӕн нӕ конд уотӕ ӕй, ӕма нӕ фӕндуй уарзун, удта цӕмӕй мах дӕр еске уарза». Мадта уӕд киристон ци гъуама кӕна? Ӕргъуди кӕнӕн Иосафати хабар. Ӕнӕуой Иосафат унаффӕ алкӕддӕр Хуцауӕй агурдта (2 Анз. 18:4–6).  Фал Йегови ка нӕ уарзта, еци паддзах Ахави хӕццӕ лимӕн кӕнун ку райдӕдта, удта ибӕл ци ’рцудӕй? Е гъӕуама ма иронх кодтайдӕ, Йегови цӕститӕ, «ӕ зӕрдӕ ӕнӕгъӕнӕйдӕр ӕ хӕццӕ кӕмӕн ӕй», уонӕмӕ ке кӕсунцӕ. Мах рӕстӕги дӕр «Йегови цӕститӕ кӕсунцӕ ӕнӕгъӕнӕ зӕнхӕмӕ», ӕма Хуцау алкӕддӕр цӕттӕ фӕууй, ӕ хӕццӕ ка ӕй, уони туххӕй «ӕ хъаурӕ бавдесунмӕ» (2 Анз. 16:9). Йеговӕ нӕ уарзуй ӕма нин нӕ уавӕр хуарз лӕдӕруй. Йеговӕ дӕбӕл ке батухсдзӕй, цӕмӕй амондгун уай, уобӕл ду ба ӕууӕндис? Ӕппундӕр ибӕл ма дузӕрдуг кӕнӕ!

11, 12. а) Езекий зӕрди ци адтӕй, е куд исбӕрӕг ӕй? б) Йеговӕ Езекий ӕма ӕ адӕни цӕмӕн нӕбал бафхуардта?

¹¹ Езекий хабарӕй бӕрӕг ӕй, нӕ зӕрдӕ ци уавӕри ӕй, уомӕ кӕсун, куд ӕхсидзгӕ ӕй, е. Еухатт ин Йеговӕ раргом кодта, ӕ зӕрди ӕцӕгӕй ци адтӕй, уой. (Бакӕсӕ 2 Анзфинстити 32:31.) Езеки уӕззау незӕй ку фӕссӕйгӕ ’й, уӕд ин Йеговӕ зӕрдӕ байвардта, ке фӕххуӕздӕр уодзӕй. Ӕ дзурд ке исӕнхӕст кӕндзӕй, уомӕн ба ин бӕрӕггӕнӕн равардта – хори аууон фӕстӕмӕ раздахта. Еци хабари фӕсте Вавилони къниӕзтӕ Езекимӕ адӕни рарвистонцӕ, цӕмӕй еци дессаги хабари туххӕй фулдӕр базудтайуонцӕ (2 Пад. 20:8–13; 2 Анз. 32:24). Хуцау ӕй «ӕхе барӕ ку ниууагъта», уӕд Езеки вавилойнӕгтӕн ӕ «хӕзнадонӕ» бавдиста. Еци ӕнӕзунд миуӕй рабӕрӕг ӕй, «ӕ зӕрди цидӕриддӕр адтӕй, е».

¹² Библий финст не ’рцудӕй, Езекийӕн ӕ зӕрдӕ цӕмӕн исхъал ӕй, е. Ӕвӕдзи, ассирийӕгтӕбӕл ке фӕууӕлахез ӕй, уой туххӕй. Кенӕ ’й Хуцау ке исдзӕбӕх кодта, уой туххӕй. Кенӕ ба, ӕвӕдзи, хъӕбӕр ке исгъӕздуг ӕй ӕма ин устур кадӕ ке адтӕй, уой туххӕй. Цийфӕнди ма уа, уӕддӕр Езеки ӕхемӕ ниццӕй ӕма ин Хуцау «ци хуарздзийнӕдтӕ искодта, уонӕн не ’саргъ кодта». Раздӕр Езеки Йеговӕн лигъстӕ кодта, ӕргъуди кӕнӕ еузӕрдонӕй дин ке лӕггадӕ кодтон, зӕгъгӕ, фал ин нур ба ӕ зӕрдӕ фӕрресун кодта. Фӕстӕдӕр Езеки «ӕ хъал зӕрдӕ ӕрсаста» ӕма Йеговӕ уой дӕр ӕма ӕ адӕни дӕр нӕбал бафхуардта (2 Анз. 32:25–27; Пс. 138:6).

13, 14. а) Йеговӕ нӕ нӕхе барӕ кӕд ниууадзуй, цӕмӕй нӕ зӕрди ци ес, уой фӕууина? б) Иннетӕ нӕ не ’нтӕстдзийнӕдти туххӕй ку ӕстауонцӕ, уӕд нӕхе куд гъӕуама дарӕн?

¹³ Езекий хабарӕй цӕбӕл ахур кӕнӕн? Ӕргъуди кӕнай, Езекийӕн ӕ зӕрдӕ кӕд исхъал ӕй, уой? Йеговӕ Сеннахирими ӕфсад ку ниццагъта ӕма ’й уӕззау незӕй ку исдзӕбӕх кодта, уой фӕсте. Ка ’й зонуй, мах дӕр ести гъуддӕгти ӕнтӕстгун ку уӕн, уӕд нӕ Йеговӕ нӕхе барӕ ниууадздзӕй, Езекий куд ниууагъта, уотӕ, цӕмӕй исбӕрӕг уа, нӕ зӕрди арф къумти ци ес, е. Цума уомӕн ес гӕнӕн? Дӕ цӕститӕбӕл рауайун кӕнӕ, цума ӕнсувӕр, хъӕбӕр кӕбӕл архайдта ӕма берӕ рӕстӕг ке фӕццӕттӕ кодта, уӕхӕн радзубандий хӕццӕ рацудӕй. Уой фӕсте имӕ беретӕ бацудӕнцӕ ӕма ’й ӕ радзубандий туххӕй растудтонцӕ. Цума ӕхе куд бадардзӕй?

¹⁴ Ӕстаугӕ нӕ ку кӕнонцӕ, уӕд зундбӕл дзорӕг уодзӕй, Киристей унаффӕмӕ гӕсгӕ ку архайӕн: «Цидӕриддӕр уин бафӕдзӕхсунцӕ, уой ку бакӕнайтӕ, уӕд зӕгъетӕ: „Мах ан нецӕййаг цагъартӕ. Нӕ ихӕс ци адтӕй, уой бакодтан“» (Лук. 17:10). Нӕуӕгӕй бабӕй Езекий цӕветтон ӕргъуди кӕнӕн. Ӕ зӕрдӕ ке исхъал ӕй, е исбӕрӕг ӕй, Хуцау ин ци хуарздзийнӕдтӕ искодта, уонӕн ке не ’саргъ кодта, уомӕй. Хуцау нин цӕйбӕрцӕ хуарздзийнӕдтӕ искодта, уонӕбӕл ку сагъӕс кӕнӕн, уӕд нӕ зӕрди некӕд фӕззиндзӕй, Йеговӕ е ’сӕфт кӕмӕй уинуй, уӕхӕн менеугутӕ. Нӕ бон ӕй иннетӕн дзорун, Йеговӕй куд боз ан, Библий, удта нӕ ӕ сугъдӕг хъаури фӕрци ке федар кӕнуй, уой туххӕй.

15, 16. Иосий мӕлӕтмӕ ци ӕркодта?

¹⁵ Хуарз паддзах Иосибӕл ци хабар ӕрцудӕй, уомӕй ба цӕбӕл ахур кӕнӕн? Ӕркӕсӕн, мӕлӕтмӕ ’й цӕхуӕн гъуддӕгтӕ ӕркодтонцӕ, уомӕ. (Бакӕсӕ 2 Анзфинстити 35:20–22.) Иоси рацудӕй Египети паддзах Нехой нихмӕ тохунмӕ. Нехо ба ин загъта, дӕу хӕццӕ тохунмӕ нӕ рацудтӕн, зӕгъгӕ. Библи куд зӕгъуй, уомӕ гӕсгӕ Хуцау Иосимӕ «Нехой цъухӕй дзурдта». Мадта Иоси уӕддӕр ӕ нихмӕ цӕмӕн рацудӕй? Библий уой туххӕй финст не ’рцудӕй.

¹⁶ Фал цума Иосий бон куд адтӕй балӕдӕрун, Нехой цъухӕй имӕ Йеговӕ ке дзурдта? Ӕ бон адтӕй Хуцауи еузӕрдон пахампар Йеремий бафӕрсун (2 Анз. 35:23, 25). Фал Библий некӕми финст ес, уотӕ ке бакодта. Нехо Йерусалими нихмӕ нӕ, фал Кархемисмӕ цудӕй «ӕндӕр адӕни хӕццӕ» тохунмӕ. Иосий ӕ нихмӕ цӕун нӕ гъудӕй, уомӕн ӕма Нехо нӕдӕр Йегови номбӕл худтӕй, нӕдӕр ӕ адӕнбӕл. Ӕцӕгӕйдӕр Иоси ӕнӕзунд миуӕ бакодта. Еци хабар махӕн цӕбӕл дзорӕг ӕй? Зин уавӕри ку бахауӕн ӕма нӕ унаффӕ рахӕссун ку гъӕуа, уӕд бал фиццагидӕр гъӕуама расагъӕс кӕнӕн, Йегови ци фӕндуй, уобӕл.

17. Зин уавӕри ку бахауӕн, уӕд нӕ бон ци ӕй кӕнун, цӕмӕй нӕбӕл Иосий хабар ма ӕрцӕуа?

¹⁷ Ести зин уавӕри ку бахауӕн, уӕд гъӕуама расагъӕс кӕнӕн, еци уавӕри нин Библийӕй цӕхуӕн уагӕвӕрдтӕ банхус кӕндзӕнцӕ уобӕл, ӕма уомӕ гӕсгӕ унаффӕ рахӕссӕн. Еуӕй-еухатт ба нӕ багъӕуй хестӕр нӕлгоймӕгти хӕццӕ баунаффӕ кӕнун дӕр. Ӕвӕдзи, гъуддагбӕл нӕхуӕдтӕ аллирдиги дӕр расагъӕс кодтан, удта еци фарстай фӕдбӕл нӕ публикацити ци финст ес, уомӕ дӕр ӕркастан. Фал, ка ’й зонуй, хестӕр нӕлгоймӕгтӕ нин Библийӕй ци уагӕвӕрдтӕ бавдесонцӕ, уонӕмӕ ба нӕ гъос не ’рдардтан. Зӕгъӕн, хуӕрӕн ес, Ӕвдесӕн ка нӕй, уӕхӕн лӕг. Еу бон хуӕрӕ исфӕндӕ кодта игъосун кӕнунмӕ рандӕ ун (Гъуд. 4:20). Фал ин ӕ лӕг ба загъта, зӕгъгӕ, рӕстӕг рагӕй дӕр еумӕ нӕбал ӕрвистан, ӕма байзайӕ. Хуӕрӕн, ӕвӕдзи, ӕ зӕрди ӕрбафтуйдзӕй, Хуцаумӕ игъосун ӕма ахуркӕнуйнӕгтӕ цӕттӕ кӕнун куд ӕхсидзгӕ ӕй, уой туххӕй Библий ци финст ес, е (Матф. 28:19, 20; Гъуд. 5:29). Фал уоститӕн сӕ лӕгтӕмӕ игъосун куд ӕхсидзгӕ ӕй, уобӕл дӕр гъӕуама расагъӕс кӕна, ӕма лӕдӕргӕй архайа (Еф. 5:22–24; Фил. 4:5). Ӕ лӕг ӕй ӕнӕуой дӕр нӕ уадзуй игъосун кӕнун, ӕви ин ӕрмӕстдӕр еци бон загъта, ма цо, зӕгъгӕ? Мах Йегови лӕггадгӕнгутӕ ан ӕма нӕ фӕндуй, цӕмӕй ин ӕ зӕрдӕ рохс кӕнӕн ӕма зундгин унаффитӕ хӕссӕн.

18. Иуди цуппар паддзахей хабӕрттӕбӕл ку сагъӕс кӕнӕн, уӕд нин е ци пайда ӕрхӕсдзӕй?

¹⁸ Ӕнӕнхӕст ке ан, уомӕ гӕсгӕ арӕх искӕнӕн, аци статьяй ци цуппар паддзахей кой кодтан, уони хузӕн рӕдудтитӕ. Гӕнӕн ес ӕма 1) ӕнӕрасагъӕс кӕнгӕй нӕ зӕрдӕ нӕхебӕл кенӕ адӕнбӕл бадарӕн; 2) Йегови ка нӕ уарзуй, уӕхӕн адӕни хӕццӕ балимӕн уӕн; 3) нӕ зӕрдӕ исхъал уа ӕма 4) Хуцауи фӕндон цӕй медӕги, уой ма базонан, уотемӕй унаффӕ рахӕссӕн. Хуарз ӕма Йеговӕ махӕн дӕр нӕ хуарз менеугутӕ уинуй, еци паддзӕхтӕн сӕ куд уидта, уотӕ. Уомӕй уӕлдай ма ’й Йеговӕ уинуй, куд ӕй уарзӕн ӕма нӕ уомӕн лӕггадӕ кӕнун куд хъӕбӕр фӕндуй, уой. Уомӕ гӕсгӕ Йеговӕ батухстӕй, цӕмӕй Библий финст ӕрцудайуонцӕ, рӕдуд къахдзӕфӕй нӕ ка багъӕуай кӕндзӕй, уӕхӕн хабӕрттӕ, ӕма си гъӕуама уой туххӕй боз уӕн. Гъӕйдӕ мадта еци хабӕрттӕ алкӕддӕр нӕ зӕрдӕбӕл дарӕн.