1, 2. Tanbasá mak ita hakarak koʼalia kona-ba liurai Judá naʼin-haat nia moris?

SE ITA haree ema ida namdoras no monu iha dalan, Ita mós sei kuidadu tebes atu laʼo iha fatin neʼe, loos ka lae? Hanesan neʼe mós bainhira ita haree ema ida halo buat neʼebé sala, ita mós sei kuidadu atu la halo sala neʼebé ema neʼe halo. Porezemplu, ita bele aprende husi ema nia sala neʼebé temi iha Bíblia.

² Iha lisaun uluk nian, ita aprende katak liurai Judá naʼin-haat serbí Jeová ho laran tomak. Maski nuneʼe, sira mós halo sala neʼebé sériu. Bíblia hakerek buat neʼebé sira halo atu ajuda ita hanoin didiʼak no aprende. Sira halo sala saida deʼit, no oinsá mak ita bele hasees an atu la halo sala neʼebé hanesan?—Lee Roma 15:4.

3-5. (a) Maski Asa fó laran tomak ba Jeová, maibé nia halo sala saida? (b) Karik tanba razaun saida mak halo Asa sadere ba ema bainhira funu hasoru Baasa?

³ Ulukliu, mai ita koʼalia kona-ba Asa. Bainhira tropa Etiópia naʼin–1.000.000 mai ataka Judá, Asa sadere ba Jeová. Maibé iha tempu neʼebé nia funu hasoru Liurai Baasa husi Izraél, nia la halo tan nuneʼe. Ramá mak sidade importante ida iha Izraél neʼebé besik rai-Judá nia fronteira, no Asa hakarak hapara Baasa hodi Baasa la bele aumenta forsa iha sidade neʼe. (2 Crônicas  [Tawarikh] 16:1-3) Asa selu liurai Síria hodi ajuda nia. Bainhira ema Síria bá ataka sidade sira iha rai-Izraél, Baasa “para kedas harii Ramá no husik serbisu neʼe”. (2 Crônicas [Tawarikh] 16:5) Foufoun, Asa hanoin katak nia halo ona desizaun neʼebé loos.

⁴ Maibé Jeová sente oinsá kona-ba nia? Jeová la kontente tanba Asa la sadere ba nia, tan neʼe nia haruka profeta Hanani bá korrije Asa. (Lee 2 Crônicas [Tawarikh] 16:7. *) Hanani dehan ba Asa: “Husi ohin ba oin sei iha funu hasoru ó.” Asa okupa duni sidade Ramá, maibé komesa husi tempu neʼebá toʼo nia mate, nia ho ninia povu tenke luta iha funu oioin.

⁵ Husi lisaun uluk nian, ita aprende katak Jeová kontente tebes ho Asa, no maski nia la perfeitu, Maromak haree katak Asa fó ninia laran tomak ba nia. (1 Reis [Raja-Raja] 15:14) Maibé bainhira Asa halo desizaun neʼebé sala, nia tenke simu konsekuénsia kona-ba neʼe. Tanbasá mak Asa la sadere ba Jeová, maibé sadere fali ba nia an rasik no ema seluk? Karik Asa hanoin katak nia bele uza nia rasik nia matenek kona-ba funu atu manán inimigu, ka karik tanba nia rona ba sujestaun aat husi ema seluk.

6. Ita aprende saida husi sala neʼebé Asa halo? Fó toʼok ezemplu ida.

⁶ Ita aprende saida husi sala neʼebé Asa halo? Ita tenke sadere ba Jeová iha situasaun hotu, laʼós ba ita rasik nia hanoin. Maski problema boot ka kiʼik, ita tenke buka ajuda husi Jeová. Diʼak atu husu ba ita-nia an: ‘Dala ruma haʼu sadere ba haʼu-nia an hodi koko atu rezolve problema tuir dalan neʼebé haʼu hanoin mak diʼak liu hotu ka lae? Ka haʼu sempre buka uluk matadalan husi Bíblia, depois mak uza informasaun sira-neʼe atu rezolve haʼu-nia problema sira?’ Porezemplu, karik Ita-nia família halo susar ba Ita atu bele tuir reuniaun ka reuniaun boot sira. Ita sei buka ajuda husi Jeová atu hatene saida mak Ita bele halo iha situasaun neʼe ka lae? Ka oinsá se Ita buka serbisu kleur ona, no ikusmai hetan duni serbisu ida. Ita sei fó-hatene uluk ba patraun neʼe katak Ita tenke tuir reuniaun semana-semana ka lae? Maski problema naran deʼit neʼebé ita hasoru, importante atu hanoin-hetan sujestaun husi salmu neʼe: “Husik Jeová dirije ó-nia dalan; sadere ba nia, no nia sei ajuda ó.”—Salmo (Mazmur) 37:5.

7, 8. Sala saida deʼit mak Jeosafát halo, no neʼe lori rezultadu saida? (Haree dezeñu iha pájina 23.)

⁷ Oinsá ho Asa nia oan Jeosafát? Jeová hadomi nia tanba nia iha hahalok barak neʼebé furak, no bainhira nia sadere ba Jeová, neʼe ajuda nia halo buat barak neʼebé diʼak. Maibé nia mós halo desizaun balu neʼebé la matenek. Porezemplu, nia arranja ninia oan ida hodi kaben ho liurai aat Akabe nia oan-feto. Tuirmai, nia hamutuk ho Akabe funu hasoru ema Síria maski profeta Mikaias fó ona avizu ba nia katak la bele halo hanesan neʼe. Iha funu neʼe, ema Síria ataka nia no mós koko atu oho nia. (2 Crônicas [Tawarikh] 18:1-32) Bainhira nia fila fali ba Jeruzalein, profeta Jeú husu nia: “Ema neʼebé aat merese simu ó-nia ajuda ka, ema neʼebé odi Jeová merese hetan ó-nia domin ka?”—Lee 2 Crônicas (Tawarikh) 19:2, 3. *

 ⁸ Jeosafát aprende husi ninia sala no rona ba profeta nia avizu ka lae? Lae. Maski nia sei hadomi Jeová no hakarak halo Jeová kontente, maibé nia habelun nafatin ho ema neʼebé la adora Jeová. Nia sai belun ho Liurai Akazias, Akabe nia oan. Jeosafát ho Akazias halo ró hamutuk, maibé ró sira-neʼe la konsege atu uza, tanba antes uza, ró hotu sai aat ona.—2 Crônicas (Tawarikh) 20:35-37.

9. Saida mak bele akontese se ita hili kolega neʼebé sala?

⁹ Saida mak ita bele aprende husi buat neʼebé akontese ba Jeosafát? Tuir loloos Jeosafát mak liurai neʼebé diʼak. Nia halo buat neʼebé loos no “buka Jeová ho ninia laran tomak”. (2 Crônicas [Tawarikh] 22:9) Maibé nia hili atu gasta tempu ho ema neʼebé la hadomi Jeová, no neʼe lori problema boot ba ninia moris. Besik uitoan ema atu oho nia. Tan neʼe, diʼak atu hanoin-hetan Bíblia nia lia-dadolin neʼe: “Ema neʼebé laʼo hamutuk ho ema matenek sei sai matenek, maibé ema neʼebé ransu ho ema beik sei hetan problema boot.” (Provérbios [Amsal] 13:20) Ita hakarak duni atu fó-hatene ba ema seluk kona-ba Jeová, maibé perigu tebes atu sai belun ho ema neʼebé la serbí nia.

10. (a) Oinsá mak Jeosafát nia ezemplu bele ajuda ema neʼebé hakarak kaben? (b) Ita tenkesér hanoin-hetan kona-ba saida?

¹⁰ Oinsá mak Jeosafát nia ezemplu bele ajuda ema neʼebé hakarak kaben? Porezemplu, karik ita-nia laran monu ba ema neʼebé la hadomi Jeová. Karik ita hanoin, husi Maromak nia povu, ita sei la hetan ema neʼebé ita hakarak atu kaben. Ka karik ita-nia família hatete beibeik ba ita katak ita tenke kaben ona antes ita-nia idade aumenta liután. Ita hatene katak Jeová kria duni ita ho presiza domin nian. Maibé se ita la hetan ema neʼebé ita hakarak kaben, saida mak ita tenke halo? Buat neʼebé bele ajuda ita mak hanoin kleʼan kona-ba saida mak akontese ba Jeosafát. Baibain nia sempre buka matadalan husi Jeová. (2 Crônicas [Tawarikh] 18:4-6) Maibé bainhira nia sai belun ho Akabe neʼebé la hadomi Jeová, nia la rona tan ba Jeová nia avizu sira. Tuir loloos Jeosafát tenkesér hanoin-hetan katak “Jeová nia matan hateke bá-mai iha rai hotu atu hatudu ninia forsa hodi ajuda sira neʼebé fó  sira-nia laran tomak ba nia”. (2 Crônicas [Tawarikh] 16:9) Ita mós presiza hanoin-hetan katak Jeová hakarak ajuda ita. Nia komprende ita-nia situasaun no nia hadomi tebes ita. Se Ita hakarak kaben, Ita fiar ka lae katak Jeová sei tau matan ba ita-nia presiza atu hetan domin? Fiar bá katak, iha loron ida nia sei halo nuneʼe duni!

11, 12. (a) Saida mak Ezekias halo neʼebé hatudu sai ninia laran? (b) Tanbasá mak Jeová fó perdua ba Ezekias?

¹¹ Saida mak ita bele aprende husi Ezekias? Jeová hatudu sai buat hotu neʼebé iha ninia laran. (Lee 2 Crônicas [Tawarikh] 32:31. *) Bainhira nia moras todan, Jeová fó-hatene ba nia katak nia sei sai diʼak fali no Jeová fó sinál ida ba nia hodi nia bele fiar. Jeová halo lalatak iha eskada leten hakiduk fali ba hakat sanulu. Karik atu buka-hatene kona-ba sinál neʼe mak ulun-naʼin husi Babilónia haruka sira-nia manu-ain ba Ezekias. (2 Reis [Raja-Raja] 20:8-13; 2 Crônicas [Tawarikh] 32:24) Jeová la hatete ba Ezekias saida mak nia presiza halo. Bíblia dehan katak Jeová “husik nia mesak” atu haree toʼok nia sei halo saida. Ezekias lori ema Babilónia sira-neʼe haree rikusoin hotu neʼebé nia iha. Ida-neʼe hatudu sai duni Ezekias nia laran.

¹² Triste duni tanba Ezekias nia laran sai foti-an tebes. Nia “la hafolin buat diʼak neʼebé nia simu ona”. Bíblia la esplika tanbasá mak ninia hahalok troka, maibé karik tanba nia manán funu hasoru ema Asíria ka tanba Jeová kura nia husi moras. Ka tanba nia sai riku no iha naran-boot. Maski nia serbí Jeová ho laran tomak, maibé ba tempu uitoan nia sai foti-an no Jeová la kontente tebes ho nia. Diʼak tanba ikusmai Ezekias sai haraik-an fali no Maromak fó perdua ba nia.—2 Crônicas (Tawarikh) 32:25-27; Salmo (Mazmur) 138:6.

13, 14. (a) Situasaun saida mak bele hatudu sai ita-nia laran? (b) Diʼak atu halo saida bainhira ema gaba ita?

¹³ Saida mak ita bele aprende husi Ezekias no kona-ba sala neʼebé nia halo? Bainhira Jeová ajuda nia manán funu hasoru ema Asíria no kura nia husi moras, Ezekias komesa kedas sai foti-an. Oinsá ho ita? Se ema gaba ita kona-ba knaar importante neʼebé ita kumpre, ita sei halo saida? Buat neʼebé ita halo iha tempu neʼebá bele hatudu sai ita-nia laran. Porezemplu, karik irmaun ida hakaʼas an hodi prepara ninia diskursu no ema barak gaba ninia diskursu neʼe. Irmaun neʼe sei halo saida?

¹⁴ Ita tenkesér hanoin-hetan Jesus nia liafuan neʼe: “Kuandu imi halo tiha ona imi-nia knaar hotu, dehan nuneʼe bá: ‘Ami atan folin-laek. Serbisu neʼebé ami halo mak ami-nia knaar deʼit.’” (Lucas 17:10) Hanoin-hetan katak bainhira Ezekias sai foti-an, nia haluha kedas oinsá Jeová fó ajuda ba nia. Tan neʼe, se ema ruma gaba ita kona-ba diskursu neʼebé ita hatoʼo, saida mak bele ajuda ita atu bele haraik-an nafatin? Ita tenke hanoin nafatin saida mak Jeová halo ona hodi ajuda ita. Diʼak atu koʼalia kona-ba Jeová no oinsá mak nia ajuda ona ita. Hanoin-hetan mós katak liuhusi Bíblia no espíritu santu mak Jeová ajuda ita hodi hatoʼo ita-nia diskursu.

15, 16. Saida mak Josias halo neʼebé ikusmai lori nia ba mate?

¹⁵ Ikusliu, saida mak ita bele aprende husi Josias? Maski Josias mak liurai neʼebé diʼak, maibé ikusmai nia halo sala ida neʼebé lori  nia ba mate. (Lee 2 Crônicas [Tawarikh] 35:20. *) Saida mak akontese? Josias halo funu hasoru Neko, liurai husi Ejitu, la ho razaun. Tuir loloos Neko rasik fó-hatene nanis ba Josias katak nia lakohi halo funu hasoru Josias, no Bíblia hatete katak Neko nia liafuan “mai husi Maromak nia ibun”. Maski nuneʼe, Josias halo nafatin funu no ikusmai mate iha funu neʼe. Maibé tanbasá mak Josias hakarak funu hasoru Neko? Bíblia la esplika kona-ba neʼe.

¹⁶ Tuir loloos Josias bele buka-hatene katak Neko nia liafuan mai duni husi Jeová ka lae. Oinsá? Nia bele husu Jeová nia profeta Jeremias. (2 Crônicas [Tawarikh] 35:23, 25) No Josias mós tenkesér hanoin-hetan katak Neko atu bá Karkemis hodi halo funu hasoru nasaun seluk, laʼós atu ataka Jeruzalein. Neko mós la koʼalia hatún Jeová ka Jeová nia povu. Antes foti desizaun, Josias la hanoin didiʼak uluk kona-ba buat sira-neʼe. Ida neʼe hanorin lisaun saida mai ita? Bainhira ita hasoru problema ruma ka atu halo desizaun ruma, ita tenkesér buka-hatene uluk saida mak Jeová hakarak ita atu halo.

17. Bainhira hasoru problema ruma, oinsá mak ita bele hasees an hodi la halo desizaun sala hanesan Josias?

¹⁷ Bainhira ita atu halo desizaun, diʼak atu hanoin uluk kona-ba Bíblia nia prinsípiu no oinsá mak ita bele uza prinsípiu sira-neʼe. Dala ruma, ita mós presiza halo riset liután husi ita-nia livru sira ka husu sujestaun husi katuas kongregasaun ida. Karik katuas neʼe bele ajuda ita atu uza tan prinsípiu seluk husi Bíblia. Porezemplu, hanoin toʼok kona-ba situasaun neʼe. Iha irmán ida, ninia laʼen laʼós Testemuña. Irmán neʼe halo planu atu bá haklaken iha loron neʼebé nia hili tiha ona. (Apóstolu 4:20) Maibé iha loron neʼe ninia laʼen lakohi nia bá haklaken maibé dehan katak, ikus-ikus neʼe sira ladún gasta tempu hamutuk, tan neʼe nia hakarak lori nia ba pasiar iha fatin ruma. Irmán neʼe hanoin kedas kona-ba eskritura balu hodi ajuda nia halo desizaun neʼebé matenek. Nia hatene katak nia tenkesér halo tuir Maromak no halo tuir Jesus nia mandamentu kona-ba ajuda ema seluk sai ninia dixípulu. (Mateus 28:19, 20; Apóstolu 5:29) Maibé nia mós hanoin-hetan katak, nuʼudar feen, nia tenke hakruʼuk ba ninia laʼen, no nuʼudar Maromak nia atan, nia la bele ulun-toos. (Éfeso 5:22-24; Filipe 4:5) Diʼak ba nia atu hanoin, ninia laʼen bandu nia labele bá haklaken, ka tanba nia hakarak gasta tempu hamutuk mak nia lakohi ninia feen bá haklaken iha loron neʼe? Nuʼudar Jeová nia atan, ita lakohi ulun-toos bainhira atu foti desizaun ruma, ita hakarak foti desizaun neʼebé halo Jeová kontente.

18. Saida mak ita bele aprende husi liurai Judá naʼin-haat nia ezemplu?

¹⁸ Nuʼudar ema sala-naʼin, ita mós bele halo sala balu neʼebé liurai Judá naʼin-haat neʼe halo. Hanesan (1) sadere ba ita-nia hanoin rasik, (2) hili belun neʼebé sala, (3) foti an, ka (4) la hanoin uluk saida mak Maromak hakarak antes foti desizaun. Se nuneʼe, labele hanoin kedas katak Jeová la simu tan ita. Tanba nia haree ba ita-nia hahalok diʼak hanesan nia haree liurai naʼin-haat husi Judá. Jeová mós hatene katak ita hadomi tebes nia no hakarak serbí nia ho laran tomak. Tan neʼe mak nia uza ezemplu husi ema sira iha Bíblia atu ajuda ita hasees an hodi la halo sala neʼebé sériu. Neʼe duni, mai ita hafolin ezemplu sira husi Bíblia no hatudu agradese ba Jeová tanba nia uza ezemplu sira-neʼe atu ajuda ita!