1, 2. მუშენ გუვარჩიენთ იუდაშ ოთხ მეფეშ მაგალითეფს?

მაგალთო ქოძირით, ნამდა მიდგარენს შარას კუჩხიქ გეუზგირტ დო ქუდანთხ; კურცხას ვეჸიდითო, მუჟამსით თე შარა გაჸიდეს მიკაულარ? შხვეფიშ შეცთომეფიშ გათვალისწინება დამცვენა, ვეგიმეობრათ კინ თი შეცთომეფი. სულიერ საქმეს ხოლო თაშ რე. ჩქი შემლებნა ბრელ მუთუნ დიბგურუათ შხვეფიშ შეცთომეფშე, განსაკუთრებულო თინეფშე, მით ბიბლიას რენა მოშინაფილი.

² წოხოლენ სტატიას გარჩიებულ რდუ იუდაშ ოთხ მეფეშ მაგალით, ნამუთ იეჰოვას მთელ გურით ომსახურდეს. მარა თეშ უმკუჯინუო, თინეფ სერიოზულ შეცთომეფს უშვენდეს. მუშ გურაფა შემლებნა თინეფიშ მაგალითეფშე დო მუჭო ეუჩილითუათ დუდ იგივე შეცთომეფს? თე მაგალითეფშე ფიქრი მიმეხვარებნა სარგებელ მიბღათ თიშე, მუდგაქ ჩქინ დაგურაფალო იჭარ (წეკითხით რომაელეფიშ 15:4).

3^—5. ა) მუ პრობლემეფს შეხვად ასაქ, თიშ უმკუჯინუო, ნამდა თინა მთელ გურით იეჰოვაწკუმა რდუ? ბ) მუშენ მიენდ ასაქ კოც, ბააშაქ იუდაშ წინააღმდეგ მოლართუნ თი დროს?

³ მორთ, დიო გუვარჩუათ ასაშ მაგალით დო ქობძირათ, მუჭო  შეულებ ღორონთიშ სიტყვას იმოქმედას ჩქინ ცხოვრებას. ასაქ ქიმიენდ იეჰოვას, მუჟამსით მილიონიან ეთიოპიშ ჯარიშ წოხოლე გერდ, მარა თაშ ვემიქცუ, მუჟამსით ისრაელიშ მეფე ბააშაქ ასაშ სამეფოშ საზღვარწკუმა, ქალაქ რამაშ გამანგარება ქიდიჭყუ (2 მატ. 16:1—3). თე დროს ასაქ მუშ ჭკუათ ქიმიქცუ დო სირიაშ მეფე ბენ-ჰადადის ქრთამ ქიმუჯღონუ, ნამდა თიქ ბააშას ქიგიანთხუკო. ქორდუო თეცალ მერინა წარმატებული? ბიბლია იჩიებ: „მუჭოთ ბააშაქ თე ამბე ქიგეგუნ, ხეთეშე მიოტუ რამას შენება დო გაჩერუ თე საქმე“ (2 მატ. 16:5). ართ მეჯინათ ასაშ გეგმაქ გამართუ!

⁴ მუს ფიქრენდ იეჰოვა ასაშ საქციელშენ? ასაქ იეჰოვას ვემიენდუნ თიშენ, ღორონთიქ საყვედურიშ ორაგადშა მუშ წარმომადგენელ ხანანი ქიმიაშქუ (წეკითხით 2 მატიანეშ 16:7—9). ხანანქ უწუ: „ამდღარშე ირიათო ჩხუპეფ გაღვენუ“. ბააშაქ უკახალე კინიკინ, მარა ასას დო მუშ ხალხის, მთელ მეფობაშ დინახალე ჩხუპეფ უღუდეს.

⁵ მუჭოთ წოხოლენ სტატიაშე გებგითინ, მუჟამსით ღორონთქ ასაშ გური შეამოწმუნ, ქოძირ, ნამდა თინა სრულაშე მუწკუმა რდუ (1 მეფ. 15:14). ღორონთს მიორჩქუდ, ნამდა ასა მუშა რდუ მენდებულ დო აკმაყოფილენდ თიშ მოთხოვნეფს. მარა თის იშენით ვანტინედ მუშ არაგონივრულ საქციელიშ შედეგეფშა. ბააშაწკუმა ურთიერთობაშ დროს, მუშენ მიენდ ასაქ იეჰოვაშ მანგიორო ბენ-ჰადადის დო მუშ დუც? ხომ ვაფიქრენდ, ნამდა დიპლომატიათ დო სამხედრო მოქმედებეფით უმოს უჯგუშ შედეგეფს მიღენდ, ვინემ იეჰოვაშა მოხვარაშ თხუალათ? თიქ შხვეფიშ არაგონივრულ რჩევეფს მურჩქილუნ თიშგურშენ ხომ ვემიქცუ თაშ?

6. მუ შემლებნა დიბგურუათ ასაშ შეცთომეფშე?

⁶ ჩქი ხოლო ვადმაფიქრანიო ოკო ასაშ მაგალითიქ, ნამდა შევამოწმათ ჩქინ საქციელი? მუჟამსით მანგარ რთულ პრობლემეფიშ წოხოლე გივორეთინ, შილებე ეფ რდას თიშ ძირაფა, ნამდა იეჰოვას ოკო მივენდათ. მარა მუს ვორთუთ, მუჟამსით ირდღაშიან, ჭიჭე საკითხეფ მაფუნა გინაჭყვიდირალი? ჩქინობრათ ხო ვეგნმოპჭყვიდუნთ საკითხეფს? პრობლემეფიშ დროს ქობგორუნთო ბიბლიურ პრინციპეფს დო ქუვოცადუთო თინეფიშ გიმორინაფას, სოვრეშეთ იძირე, მუჭო იეჰოვაშა ვორეთ მენდებული? მაგალთო, შილებე თქვან ოჯახიშ წევრეფქ ხე შეიშალან კრებაშ შეხვალამეფიშ ვარდა კონგრესიშ დასწრებას. თქვა თხინთ იეჰოვას, ქოიხემძღვანელან დო ქუგოძირან არძაშ უჯგუშ შარა სიტუაციაშ მოსაგვარებელო. მუშ რაგად შილებე, მუჟამსით სამუშა მეიდინუნა დო გიჭირა ახალ სამუშაშ გორუა? სამუშაშ უნჩაშწკუმა რაგადიქ ქუგაღვენუეს-და, ქუწინდითო თის, ნამდა ირმარაშიან კრებაშ შეხვალამეფშა გაჸინა გილაულარი? მუდგა პრობლემა ვამღუდანი, ჯგირ იჸუაფ ფსალმუნმაბირეშ სიტყვეფიშ გათვალისწინება, ნამუქით თქუ: „მიანდი იეჰოვას სქან შარა, თიშა რდა დაიმენდებულ დო თინა იმოქმედენს“ (ფსალმ. 37:5).

7, 8. მუ შეცთომეფ დუშ იეჰოშაფატიქ დო მუ შედეგეფქ მაჸუნ თეს? (ქოძირით სურათ 23 გვერდის)

⁷ მუ შილებე ფთქუათ ასაშ სქუა, იეჰოშაფატიშ გურშენ? თის ბრელ ჯგირ თვისებეფ უღუდ. იეჰოვაშა მენდებათ იეჰოშაფატიქ ბრელ ჯგირ მუთუნ აკეთუ, მარა ბრელ არაგონივრულ გადაწყვეტილება ხოლო მიღუ. მაგალთო, თიქ ხოლოშიან ურთიერთობა ქიდეკინ ჩრდილოეთიშ სამეფოშ უბადო მეფე ახაბწკუმა. თიშ უმკუჯინუო, ნამდა თის წინასწარმეტყველ მიქაია აფრთხილენდუნ, იეჰოშაფატიქ ახაბწკუმა ართო მიდართ სირიელეფწკუმა ოჩხუპეფშა. თე ჩხუპის იეჰოშაფატიქ სოდგარენ გინასკიდ ღურას დო უკულ თიქ იერუსალიმშა დირთ (2 მატ. 18:1—32). თის წინასწარმეტყველ  იეჰუქ კითხუ: „უბადოს ოკო მეხვარე დო იეჰოვაშ მოჯოგეფი ოკო გიჸორდასო?“ (წეკითხით 2 მატიანეშ 19:1—3).

⁸ ქიდიგურუო იეჰოშაფატიქ მუთუნ მუშ შემთხვევაშე? არგამა რე, თინა ღორონთს მონდომებულო ომსახურუდ, მარა მუჭოთ იძირენ, თის მუთუნქ ვა დაგურუ ვართ ახაბწკუმა მუშ ურთიერთობაშე დო ვართ ხოლო იეჰუშ გუმაფრთხილებერ სიტყვეფშე. იეჰოშაფატიქ ხოლო ართ გონივრულ ვა რდუნ ფერ ნაბიჯ გეგნოდგუ. თიქ ღორონთიშ ნტერ, ახაბიშ სქუა ახაზიაწკუმა ქიდეკინ ურთიერთობა. იეჰოშაფატიქ დო ახაზიაქ ართო აშენეს გემეფ, მარა თინეფქ ეკოტირხ დო მუ მიზანიშ გურშენ რდუ კეთებულინ თიშა ვემიაჭირნეს (2 მატ. 20:35—37).

9. მუჭო შილებე იმოქმედას ჩქინ ცხოვრებას გლახა კათაწკუმა ურთიერთობაქ?

⁹ იეჰოშაფატიშ შემთხვევაქ ოკო დუმაფიქრან, ნამდა თოლ ქიგნულინუათ ჩქინ ცხოვრებას. ზოგადო იეჰოშაფატ ჯგირ მეფე რდუ. თინა ირო სწორას იქციებუდ დო „მთელ გურით გორუნდ იეჰოვას“ (2 მატ. 22:9). მარა თინა თხილერ ვა რდუ გლახა კათაშ გავლენაშე. ქიგიშინით თე იგავ: „ბრძენეფწკუმა მიდგა გილურსინ თინა მუ ხოლო დებრძენებ, სულელეფწკუმა საქმეს დეკინენსინ თინა გლახას ქიმიკინდუანს“ (იგავ. 13:20). ართ მხარეთ ქოფთქუათინ, ჩქი ოკო მივეხვარათ ჭეშმარიტებათ დაინტერესებულეფს. მარა იეჰოშაფატიქ დახე სიცოცხლე მიოდინუ ახაბწკუმა საჭირო ვა რდუნ ფერ ურთიერთობაშ დაკინებათ. ათეშნერო, ჩქინო ხოლო ვეჸი ჯგირ საჭირო ვარენ ფერ ურთიერთობაშ დაკინება თინეფწკუმა, მისით ვაუჸორს იეჰოვა.

10. ა) მუშ გურაფა შემლებნა დაოჯახებაშ გურშენ იეჰოშაფატიშ შემთხვევაშე? ბ) მუ ოკო ფშუდან, მუჟამსით საქმე ოხუ გლახა საზოგადოებაწკუმა ურთიერთობას?

¹⁰ მუ პრაქტიკულ მაგალითის ბგურაფლენთ იეჰოშაფატიშ შემთხვევაშე? ქრისტიანქ შილებე რომანტიკულ გრძნობეფ გენივითარას თიცალ პიროვნებაშენ, ნამუსით ვა უჸორს იეჰოვა, თიშენ ნამდა ფიქრენს მუშ მანგიქ ვაგორ ქრისტიანეფ შკას. ვარდა, ქრისტიანს შილებე ურწმუნო ნათესეფ ურაგადუდან „ონდო გვიან ვა რე, დეოჯახი“. თეს გეძინელ, ნამთინე შილებე ართ დაცალო ფიქრენდას, მიდგაქ თქუ: „ჩქი თეშ ვორეთ გოჭყაფილ, ნამდა მოკონა მიჸორდან დო გვერდით ელმარინჯე პჸუნდან“.  მუჭო ოკო მიქცუას ქრისტიანქ თე დროს? თქვა ხოლო მიგეხვარებნა თიშე ფიქრი, მუდგაქ იეჰოშაფატის მეხვარუნ. თინა ღორონთს თხინდ ხემძღვანელობას (2 მატ. 18:4—6). მარა მუქ მოხვად, მუჟამსით იეჰოშაფატიქ ურთიერთობა ქიდეკინ ახაბწკუმა, ნამუსით ვაუჸორდ იეჰოვა? იეჰოშაფატის ირიათო ოკო შუდუკო, ნამდა იეჰოვა ოკვირ თინეფს, მით მთელ გურით ომსახურ თის. ჩქინ დროს ხოლო ღორონთიშ „თოლეფ ოკვირ მთელ დედამიწას“ დო მზათ რე, მიმეხვარან „მუშ ძალათ“ (2 მატ. 16:9). თის უჸორთ დო ჯგირო არჩქილე ჩქინ მდგომარეობა. თქვა ხოლო ქორჯერანო, ნამდა ღორონთ დაკმაყოფილენს თქვან მოთხოვნილებეფს, ნამუთ ჸოროფას დო გვერდით ელმარინჯეს ოხუ? რჯერდან, ნამდა თინა თეს გაკეთენს!

11, 12. ა) მუჭო იძირ, მუ უღუდ ხიზკიას გურს? ბ) მუშენ ეიოჩირთ ხიზკიას ღორონთიშ რისხვაქ?

¹¹ ხიზკიაშ შემთხვევაშე გურიშ მდგომარეობაშ გურშენ ბრელ მუთუნიშ გურაფა შემლებნა. ართ შემთხვევაშ ჭყოლოფათ გურეფიშ მარკვიებელქ გეგმარჩქინ, მუ უღუდ ხიზკიას გურს (წეკითხით 2 მატიანეშ 32:31). მუჟამსით ხიზკიაქ დელახუნ, ღორონთქ დასკილიდუანდუნ თიშ მიოხვამილაფარო, ნიშან ქიმეჩუ. ბაბილონიშ მეფექ კათა ქიმიაშკუ ხიზკიაშა თიშ გაგებშა, მუს ნიშნენდ ნიშან — ოროშ უკახალე დორთა. (2 მეფ. 20:8—13; 2 მატ. 32:24). მუჟამსით ღორონთქ „ხვალე ქიდიტუნ“, თიქ ბაბილონელეფს „მუშ საგანძურ“ ქაძირ დო თეთ გეგმორჩქინდ, მუ უღუდ ხიზკიას გურს. თე გონივრულ ვა რდუნ ფერ საქციელქ ქაძირუ „თიშ გურიშ მდგომარეობა“.

¹² ბიბლია ვეჩიებ, მუშ გურშენ გეამაყ ხიზკიას გურქ. თიშ გურშენ ხო ვარ, ნამდა ასურელეფს ჩხუპის ორჯგინ, ვარდა ღორონთიქ სასწაულებრივო განკურნუნ? ვარა თიშ გურშენ ხო ვარ, ნამდა „მანგარო გემდიდრუ დო გენედიდუნ“? მუჭოდგა ვაფთქუათინ, ხიზკიაქ გეამაყ დო თეშ გურშენ „მუთუნ ვაუკეთებ [ღორონთიშ] გიმორჩქინელ ჯგირობუაშ მანგიორო“. მუ სანარღო რე! თიშ უმკუჯინუო, ნამდა კანკალეშა ხიზკია იეჰოვას ვამოწონდ თეშ იქციებუდუნ, თინა ღორონთს მთელ გურით ომსახურუდ. უმოს გვიანო, ხიზკიაქ გეგმირჩქინ თანდაბლობა დო მუშ ხალხწკუმა ართო ეიჩილითუ ღორონთიშ რისხვა (2 მატ. 32:25—27; ფსალმ. 138:6).

13, 14. ა) მუჟამ შილებე გიმიცადას ჩქინ გურიშ მდგომარეობაქ? ბ) მუჭო შემლებნა მიფქცუათ, მუჟამსით მუდგარენს მივოჭირნეთინ თიშ გურშენ მოცქვანა?

¹³ მუ სარგებლობა შემლებნა მიბღათ ხიზკიაშ შემთხვევაშ კითხირშე დო ფიქრიშე? ქიგიშინით, ნამდა ხიზკიაშ სიამაყექ თიშ უკულ გეგმორჩქინდ, მუჟამსით იეჰოვაქ სინახერიბის ჩხუპის გიორჯგინ დო ხიზკია ოღურალ ლახალაშე დასკილიდუ. ჩქინ შემთხვევას მუთუნ წარმატებას ქიმვოჭირნეთ-და, მუს ოძირანს ჩქინ გურიშ მდგომარეობა? მაგალთო, ჯიმა შილებე შურ დო გურით ემზადებდას დიდ აუდიტორიაშ წოხოლე საჯარო მოხსენებათ გიშაულარო დო გიშულაშ უკულ ბრელ ოცქვანს თის. მუნერ რეაქცია აღვენუ ჯიმას თე დროს?

¹⁴ მუჟამსით მოცქვანან, ჯგირ რე იესოშ სიტყვეფიშ გიმორინაფა: «თქვა ხოლო, მუჟამსით შეასრულენთ ირფელს, მუთ გოვალუნან, ქოთქვით: „უსარგებლო მონეფ ვორეთ. თინა ვაკეთით მუთ ოკეთებელ მაფდეს“» (ლუკ. 17:10). მორთ, ხოლო ართშა დეფიფქრათ ხიზკიაშ შემთხვევაშე. თიშ სიამაყექ თიმწკუმა გეგმორჩქინდ, მუჟამსით „მუთუნ ვაუკეთებ [ღორონთიშ] გიმორჩქინელ ჯგირობუაშ მანგიორო“. თიშე დაფიქრება, მუსხი მუდგარენ უკეთებ ღორონთს ჩქინდა, მიმეხვარებნა, იეჰოვას ჯოგუნ თეშ დღას ვემიფქცუათ. ჩქი შემლებნა მარდულობა გეგმოფხანტათ, მუჟამსით იეჰოვაშ გურშენ იბჩიებუთ. თინა წმინდა წერილეფიშ დო წმინდა შურიშ საშვალებათ მუშ ხალხის ოხვარ.

15, 16. მუშენ ვედეცვუ ღორონთქ იოშია დო მუშენ ოდინუ თიქ სიცოცხლე?

¹⁵ დო ბოლოს, მუ გუმაფრთხილებერ გაკვეთილიშ გურაფა შემლებნა მეფე იოშიაშ შემთხვევაშე? დეფიქრით, მუ მიზეზით ღურ თიქ ჩხუპის (წეკითხით 2 მატიანეშ 35:20—22). ეგვიპტეშ მეფე ნექოქ იოშიას მეუჩინ, ნამდა თიშა ოჩხუპეფშა ვემიშ, მარა იოშიაქ იშენით მიდართ თიშ „დახვამლაფშა“. ბიბლია იჩიებ, ნამდა ნექოშ სიტყვეფ „ღორონთშე ნარაგად რდუ“. თაშ ქორდუ-და, მუშენ იდუ იოშიაქ ოჩხუპეფშა? ბიბლია თეს ვეჩიებუ.

¹⁶ მარა მუჭო ოკო მეხვადუკო იოშიაქ ნექოშ სიტყვეფ იეჰოვაშე რდუ დო ვარ? თის შეულებუდ ართ-ართ ართგურ წინასწარმეტყველშა, იერემიაშა ქუკითხირუდკო (2 მატ. 35:23, 25). მარა სოთინ ვენოჭარ, ნამდა თიქ თაშ მიქცუ. ნექო ქარხემიშშა მიშ ოჩხუპებშა. თინა შხვეფს ობრძოლუდ დო ვართ ხოლო იერუსალიმს. თეს გეძინელ, ღორონთიშ სახელ თაქ მუთუნ შკას ვა რდუ, მუშენდა ნექო ვართ იეჰოვაშ სახელს მიორინუანდ შეურაცხყოფას დო ვართ თიშ ხალხის. თაშ ნამდა, იოშიაქ გონივრულო ვემიქცუ, მუჟამსით ნექოწკუმა ოჩხუპებშა გიშელუ. მუშ გურაფა შემლებნა თავრეშე? პრობლემას შეფხვადუთინ თი დროს ჯგირ იჸუაფ, გეფთვალისწინათ, მუ რე იეჰოვაშ ნება.

17. მუჭო შემლებნა ვეგიმეობრათ იოშიაშ შეცდომა, მუჟამსით პრობლებას შითმოფხვადუთ?

¹⁷ პრობლემა დუც ქირჩქინანსინ თიმწკუმა, ჩქი ოკო დეფიფქრათ თი ბიბლიურ პრინციპეფშე, ნამუთ ოხუ თე საკითხეფს დო თინეფ გაწონასწორებულო გეგმიბრინუათ. ნამთინეშა შილებე უხუცესეფშა რჩევაშ ელაკითხირქ დემესაჭირან დო ქელამჩან, ნამდა დეფიფქრათ თიშე, მუთ მიჩქუნა თე საკითხიშ გურშენ, ვარდა გეგმიბრკუათ ჩქინ პუბლიკაციეფი. შილებე შხვა ბიბლიურ პრინციპეფ ხოლო გეფთვალისწინათ, ნამუშ გაგებას უხუცესეფ მოხვარუნა. მაგალთო, დას უჩქუ, ნამდა სახიოლო ამბე ოკო იქადაქას (საქ. 4:20). დავუშვათ, მსახურება დაგეგმილ აფუნ თი დღას ქომონჯიქ, ნამუთ ვა რე იეჰოვაშ მოწმე, უწუ, ჸუდეს ქუდოსკიდას. თინა ურაგად, ნამდა მუზმა ხან რე ართო სოთინ ვაჸოფენა დო ოკო სოდგაინ მიდართან. ოსურს შილებე ქუგაშინას ნამთინე ბიბლიურ მუხლიქ, ნამუთ იჩიებ, ნამდა საჭირო რე ღორონთიშ მორჩილება დო მოწაფეეფიშ მომზადება (მათ. 28:19, 20; საქ. 5:29). მარა თიქ ქომონჯიშ მორჩილებაშე ხოლო ოკო დეფიქრას დო თიშე, ნამდა ირო გონივრულო მიქცუას (ეფეს. 5:22—24; ფილ. 4:5). მუშ ქომონჯ მსახურებაშ წინააღმდეგ რენ დო ვარ თის ურაგად, ხვალე ართ დღა დუთმას შხვა საქმეს? ღორონთიშ ნებაშ შესრულებაშ დროს გაწონასწორებულეფ ოკო ვორდათ დო ვეცადათ მიღუდან სუფთა სინდისი.

18. მუ სარგებელიშ მეღება შემლებნა თე სტატიას მოჩამილ ოთხ მეფეშ შემთხვევეფშე დაფიქრებათ?

¹⁸ არასრულყოფილეფ ვორეთინ თიშ გურშენ ჩქი ხოლო შილებე მინშა თიცალ შეცდომეფ დუშვათ, ნამდგას თაქ მოშინაფილ ოთხ მეფე უშვენდუ. ჩქი შილებე: 1) გურ ვაგუჩათ დო მივენდათ კოჩიშ სიბრძნეს, 2) გლახა საზოგადოებაწკუმა მაშუან ურთიერთობაქ, 3) ამაყო გინიფრთათ დო 4) თეშ მიბღათ გადაწყვეტილებეფ, ნამდა ღორონთიშ ნება ვეგეფთვალისწინათ. იეჰოვა მოჸოროფე ღორონთი რე დო მუჭოთ თი ოთხ მეფეწკუმა ორწყედ ჯგირსინ თეშ, ჩქინწკუმა ხოლო ორწყე ჯგირს! თეს გეძინელ, იეჰოვას უჩქუ, მუჭო მიჸორა თინა დო მუჭო მოკონა თის სრულაშე ვემსახურათ. ათეშგურშენ, თიქ ქომჩეს გუმაფრთხილებერ მაგალითეფ, ნამუთ მიმეხვარებნა, ვადუშვათ სერიოზულ შეცთომეფი. მორთ, დუვაფასათ თე ბიბლიურ მაგალითეფ დო მარდულეფ ვორდათ იეჰოვაშ თენეფ მიღუნან თიშ გურშენ!