1, 2. (a) Kasano a mayarig daytoy a sistema ti bambanag iti maysa a nasentensiaan a kriminal? (Kitaen ti ladawan iti rugi ti artikulo.) (b) Anianto ti reaksion dagiti anghel ken tattao iti pannakadadael daytoy dakes a sistema?

“NATAYEN, NATAYEN!” Maipukpukkaw dayta ken mangngeg ti uni ti pananggunggon kadagiti ridaw ti selda bayat a mairuruar ti maysa a mapagbutbutngan a kriminal. Apay nga ipukpukkaw dayta dagiti guardia a nangiruar iti kriminal? Kasla nasalun-at met ken awan ti saksakitenna. Ngem ip-ipanen dagiti guardia iti pakabitayanna. Maibilangen a natay dayta a kriminal. *

² Arigna kasta ti kasasaad daytoy agdama a sistema ti bambanag. Nabayagen a nasentensiaan daytoy dakes a lubong, ken nakaas-asidegen ti arig pannakabitayna. Kuna ti Biblia: “Ti lubong aglabas.” (1 Juan 2:17) Sigurado a mapasamak dayta. Ngem adda dakkel a nagdumaan daytoy a lubong ken ti nadakamat a balud. Iti aldaw ti pannakabitay ti balud, mabalin nga adda dagiti agprotesta a mangkuestion iti sentensiana wenno mangnamnama a maitantan dayta. Ngem no maipapan iti daytoy a lubong, naibasar ti pannakasentensiana iti perpekto a hustisia ti  Soberano iti uniberso. (Deut. 32:4) Saan a maitantan dayta, ken saan a mapagduaduaan ti hustisia a naipakat. Kalpasan a maitungpal dayta, sigurado a maragsakan ti amin a tao ken anghel ta naipakat ti pudno a hustisia. Talaga a makapabang-arto dayta!

3. Ania ti uppat a pagsasaritaantayo a mapukaw inton umay ti Pagarian ti Dios?

³ Ngem ania ti karaman iti “lubong” nga “aglabas”? Aglabasto ti adu kadagiti ibilbilang dagiti tattao ita a permanente a paset ti biag. Makapaladingit kadi dayta a damag? Saan a pulos! Kinapudnona, nagpateg dayta a paset ti “naimbag a damag ti pagarian.” (Mat. 24:14) Pagsasaritaantayo ngarud ita no ania ti mapukaw inton umay ti Pagarian ti Dios. Usigentayo ti uppat a banag: dakes a tattao, organisasion, ar-aramid, ken kasasaad. Iti kada topiko, kitaentayo no (1) kasano nga ap-apektaran dagitoy ti biagtayo ita, (2) anianto ti aramiden ni Jehova kadagita, ken (3) kasano a sukatanna dagita iti nasaysayaat.

4. Kasano nga ap-apektarannatayo ita dagiti dakes a tattao?

⁴ Kasano nga ap-apektarannatayo ita dagiti dakes a tattao? Kalpasan nga impakpakauna ni apostol Pablo a ti panawentayo ket “napeggad a tiempo a narigat a pakilangenan,” kinunana: “Dagiti nadangkes a tattao ken dagiti agpampammarang rumang-aydanto manipud dakes nga agturong iti dakdakes pay.” (2 Tim. 3:1-5, 13) Makitkitam kadi a matungtungpalen dagita? Adu kadatayo ti nagbalin a biktima dagiti dakes a tattao, kas kadagiti naranggas ken manangidumduma a tattao, ken nauyong a kriminal. Dadduma kadakuada ti nakaro ti kinadakesna; adda met dagiti agpampammarang a nasingpet babaen ti panangaramidda iti nasayaat. Uray no saan a datayo a mismo ti biktima, apektadotayo latta. Malidayantayo no madamagtayo dagiti nagdakes nga aramidda. Mabutengtayo gapu kadagiti panangranggasda kadagiti ubbing, babbaket ken lallakay, ken dadduma pay nga awan gawgawayna a tattao. Ipakpakita dagiti dakes a tattao ti inaanimal, sinasairo, ken dinedemonio pay ketdi a kababalin. (Sant. 3:15) Imbag laengen ta adda naimbag a damag iti Sao ni Jehova.

5. (a) Ania a gundaway ti silulukat pay laeng kadagiti managdakdakes? (b) Ania ti mapasamak kadagiti dakes a tattao a di agbalbaliw?

⁵ Ania ti aramidento ni Jehova? Ik-ikkan ni Jehova ita dagiti dakes a tattao iti gundaway nga agbalbaliw. (Isa. 55:7) Kas indibidual, saanda pay a naawat ti maudi a sentensiada. Nupay kasta, nasentensiaanen daytoy a sistema. Ngem ania ti mapasamak kadagiti saan nga agbalbaliw ken agtultuloy a mangsuporta iti daytoy a sistema agingga iti dakkel a rigat? Inkari ni Jehova a naan-anay a pukawenna dagiti dakes a tattao. (Basaen ti Salmo 37:10.) Mabalin nga ipagarup dagiti managdakdakes a malisianda dayta a panangukom. Adu ti nakasursuro a mangilimed kadagiti ar-aramidenda, ken masansan a maitarayanda ti hustisia ken dagiti dakes a resulta ti aramidda. (Job 21:7, 9) Ngem ipalagip kadatayo ti Biblia: “Dagiti mata [ti Dios] addada kadagiti dalan ti tao, ket amin dagiti addangna makitana. Awan ti kinalidem wenno uray aniaman a napuskol a kinasipnget maipaay kadagidiay agar-aramid iti makapasakit tapno aglemmengda sadiay.” (Job 34:21, 22) Awan ti mailemmengtayo ken Apo Jehova. Awan ti makaallilaw iti Dios; makitana ti amin a banag kasanoman ti kasipnget wenno kauneg dayta. Kalpasan ti Armagedon, uray no birokentayto dagiti  managdakdakes, awandan. Napukawdan iti agnanayon!—Sal. 37:12-15.

6. Siasinonto ti mangsukat kadagiti dakes a tattao, ken apay a naimbag a damag dayta?

⁶ Siasinonto ti mangsukat kadagiti dakes a tattao? Makaparagsak ti kari ni Apo Jehova: “Dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.” Mabasatayo pay iti dayta a salmo: “Dagiti nalinteg tagikuaendanto ti daga, ket agtaengdanto nga agnanayon iti dayta.” (Sal. 37:11, 29) Siasino dagiti “naemma” ken “nalinteg”? Dagiti naemma ket dagiti napakumbaba a mangawat iti pannursuro ken panangiwanwan ni Jehova; dagiti nalinteg ket dagiti maragragsakan a mangaramid kadagiti ibilang ni Jehova a Dios nga umiso. Iti lubong ita, adayo nga ad-adu dagiti managdakdakes ngem kadagiti nalinteg. Ngem iti baro a lubong, saanto a makuna a basbassit wenno ad-adu dagiti naemma ken nalinteg; isudanto laeng ti tattao ditoy daga. Isudanto ti mamagbalin a paraiso iti daga!

7. Kasano nga ap-apektarannatayo ita dagiti dakes nga organisasion?

⁷ Kasano nga ap-apektarannatayo ita dagiti dakes nga organisasion? Adu kadagiti kinadakes a mapaspasamak ita ket saan a gapuanan dagiti indibidual no di ket gapuanan dagiti organisasion. Kas pagarigan, panunotem dagiti relihion a mangal-allilaw kadagiti minilion a tattao maipapan iti Dios, kinamapagtalkan ti Biblia, masakbayan ti daga ken dagiti tattao—ken nakaad-adu pay a bambanag. Panunotem pay dagiti gobierno a mangisungsungsong iti gubat ken panaglalaban dagiti saan nga agkakapuli, mangirurrurumen kadagiti marigrigat ken inosente a tattao, ken mangay-ayat iti pasuksok ken paboritismo. Adda pay dagiti naagum a kompania a mangrugrugit iti aglawlaw, mangib-ibus kadagiti natural a kinabaknang ti daga, ken manggunggundaway kadagiti inosente a tattao tapno bumaknangda idinto ta minilion ti agrigrigat. Nalawag a basol dagiti dakes nga organisasion ti adu a rigat a sagsagabaen ti lubong ita.

8. Sigun iti Biblia, anianto ti mapasamak kadagiti ibilbilang ita ti kaaduan a tattao a nakatibtibker nga organisasion?

⁸ Ania ti aramidento ni Jehova? Mangrugi ti dakkel a rigat inton dagiti gobierno ti tao bueltaendan ti amin a palso a relihion nga irepresentar ti balangkantis a maawagan iti Babilonia a Dakkel. (Apoc. 17:1, 2, 16; 18:1-4) Naan-anay a maikisapto dagita a relihion! Dagiti ngay dadduma a dakes nga organisasion? Nagusar ti Biblia kadagiti bantay ken isla a mangiladawan kadagiti organisasion ken institusion nga ibilbilang ita dagiti tattao a nakatibtibker. (Basaen ti Apocalipsis 6:14.) Impakpakauna ti Sao ti Dios a marbanto ti pundasion dagiti gobierno ken amin nga organisasion nga agpampannuray kadagita. Agpatingganto ti dakkel a rigat inton nadadaelen ti amin a gobierno iti daytoy daan a lubong ken amin nga adda iti dasigna a kumonkontra iti Pagarian ti Dios. (Jer. 25:31-33) Kalpasan dayta, awanton a pulos dagiti dakes nga organisasion!

9. Apay a masiguradotayo nga organisadonto ti baro a daga?

⁹ Anianto ti mangsukat kadagiti dakes nga organisasion? Addanto pay ngata organisasion iti lubong kalpasan ti Armagedon? Kuna ti Biblia: “Adda baro a langlangit ken baro a daga nga ur-urayentayo sigun iti karina, ket kadagitoy agtaeng ti kinalinteg.” (2 Ped. 3:13) Awanton ti daan a langlangit ken daga, wenno dagiti dakes a gobierno ken tattao nga iturturayanda. Anianto ti  mangsukat kadagita? Ti sasao a “baro a langlangit ken baro a daga” kaipapananna nga addanto baro a gobierno ken baro nga iturayan dayta ditoy daga. Ti Pagarian nga iturayan ni Jesu-Kristo ti kasayaatan a mangipakitanto iti personalidad ni Apo Jehova, ti Dios ti urnos. (1 Cor. 14:33) Isu nga organisadonto ti “baro a daga.” Addanto dagiti nasayaat a lallaki a mangidaulo. (Sal. 45:16) Idauluanto ida ni Kristo ken ti 144,000 a kakaduana nga agturay. Panunotem ti biag inton masuktanen ti amin a dakes nga organisasion iti maymaysa, nagkaykaysa, ken nalinteg nga organisasion!

10. Ania dagiti dakes nga aramid a nasaknap iti lugaryo, ken ania ti epekto dagita kenka ken iti pamiliam?

¹⁰ Kasano nga ap-apektarannatayo ita dagiti dakes nga ar-aramid? Napno kadagiti dakes nga aramid ti lubong a pagbibiagantayo. Nakasaksaknap ti immoralidad, kinaulbod, ken kinaranggas iti daytoy a sistema ti bambanag. Masansan a dagiti nagannak ti nangnangruna a marigatan a mangprotektar kadagiti annakda kadagita a kinadakes. Pagparparangen ti lubong ti showbiz a nasayaat ti amin a kita ti dakes nga aramid idinto ta nalawag a tagtagibassitenda dagiti pagaladan ni Jehova iti naimbag ken dakes. (Isa. 5:20) Ikagkagumaan dagiti pudno a Kristiano ti saan nga agpaimpluensia kadagita. Salsalaknibanda ti kinatarnawda iti lubong a saan a mangraraem kadagiti pagalagadan ni Jehova.

11. Ania ti maadaltayo iti panangukom ni Jehova iti Sodoma ken Gomorra?

¹¹ Anianto ti aramiden ni Jehova kadagiti dakes nga ar-aramid? Panunotem ti inaramidna kadagiti dakes nga aramid a nasaknap idi iti Sodoma ken Gomorra. (Basaen ti 2 Pedro 2:6-8.) Naapektaran ti nalinteg a tao a ni Lot ken ti pamiliana gapu kadagiti dakes nga aramid. Idi dinadael ni Jehova ti intero a rehion, saanna la a basta pinagpatingga dagiti dakes nga aramid sadiay no di ket “nangipasdek iti pagtuladan maipaay kadagiti di nadiosan a tattao maipapan iti bambanag nga umay.” No pinagpatingga ni Jehova dagiti immoral nga aramid idi, pagpatinggaennanto met ti kinadakes ita inton ukomenna ti agdama a sistema ti bambanag.

12. Ania ti pampanunotem nga aramiden inton awanen daytoy daan a sistema ti bambanag?

¹² Anianto ti mangsukat kadagiti dakes nga ar-aramid? Mapnonto ti Paraiso a daga kadagiti makaparagsak nga aramid. Panunotem ti makapagagar a trabaho a panamagbalin a paraiso iti planetatayo wenno ti panagipatakder kadagiti balay para kadatayo ken kadagiti ay-ayatentayo. Panunotem ti nagsayaat a mapasamak inton sabtentayo dagiti minilion a mapagungar ken suruantayo ida maipapan iti pagayatan ni Jehova ken iti pakasaritaan ti pannakilangenna kadagiti tattao. (Isa. 65:21, 22; Ara. 24:15) Nakaad-adunto ti aramidentayo a mangparagsak kadatayo ken mangidaydayaw ken Apo Jehova!

13. Ania ti resulta ti panagrebelde da Satanas, Adan, ken Eva?

¹³ Kasano nga ap-apektarannatayo ita dagiti dakes a kasasaad? Ti dakes a kasasaad ita ket gapu kadagiti dakes a tattao, organisasion, ken ar-aramid. Adda kadi kadatayo ti saan nga apektado kadagiti gubat, kinarigat ti panagbiag, wenno panangidumduma? Ti ngay panagsakit ken ipapatay? Awan kadatayo ti makalisi kadagita. Dagita ti resulta ti panagrebelde dagiti dakes nga indibidual a da Satanas, Adan, ken Eva maibusor  ken Jehova. Ditay pulos malisian ti nasaem nga epekto ti panagrebeldeda.

14. Anianto ti aramiden ni Jehova kadagiti dakes a kasasaad? Mangted iti pagarigan.

¹⁴ Anianto ti aramiden ni Jehova kadagiti dakes a kasasaad? Alaentayo a pagarigan ti gubat. Ikarkari ni Jehova a naan-anay a pukawenna dayta. (Basaen ti Salmo 46:8, 9.) Ti ngay sakit? Punasennanto. (Isa. 33:24) Ket ti ipapatay? Alun-onento ni Jehova! (Isa. 25:8) Pagpatinggaennanto ti kinarigat. (Sal. 72:12-16) Kastanto met ti aramidenna iti amin a dakes a kasasaad a mangparparigat kadatayo ita. Pukawennanto uray ti dakes nga “angin” iti daytoy a sistema ti lubong, ket awanton ti nasaknap a dakes nga impluensia ni Satanas ken dagiti demoniona.—Efe. 2:2.

15. Ania dagiti agnanayon a mapukaw kalpasan ti Armagedon?

¹⁵ Mailadawam kadi ti lubong nga awan ti gubat, sakit, wenno ipapatay? Panunotem—awan a pulos soldado! Awan armas wenno monumento a pakalaglagipan kadagiti soldado. Awan ospital, doktor, nars, wenno insurance; awan morge, puneraria, embalsamador, wenno sementerio! Ken inton awanen ti krimen, awanto metten ti guardia, alarm system, polis, ken mabalin nga awanto payen ti kandado wenno tulbek! Panunotem dagiti problema a saanton a mangriribuk iti panunot ken pusotayo.

16, 17. (a) Anianto ti marikna dagiti makalasat iti Armagedon? Iyilustrarmo. (b) Kasanotayo a masigurado nga agtalinaedtayo inton aglabas daytoy daan a lubong?

¹⁶ Kasanonto ngata ti biag inton awanen dagiti dakes a kasasaad? Saan a nalaka nga iladawan. Nabayagen nga agbibiagtayo iti daytoy daan a lubong nga uray la ditayon madmadlaw ti kakaro ti rigat a sagsagabaentayo. Kas pagarigan, mabalin a saanen a madmadlaw dagiti tattao nga aggigian iti asideg ti riles ti kinatagari dagiti aglabas a tren, ken mabalin a nairuamen dagiti tattao nga aggigian iti asideg ti pagbasuraan iti bangsit a maang-angotda. Ngem nagsayaat ketdin ta awanto aminen dagita!

¹⁷ Anianto ti mangsukat kadagiti pakarigatantayo ita? Kuna ti Salmo 37:11: “Maragsakandanto iti napalalo iti kinaruay ti talna.” Saan kadi a makapabang-ar dayta? Dayta ti kayat ni Jehova para kenka. Ikagumaam ngarud ti agtalinaed a nadekket ken Apo Jehova ken iti organisasionna bayat ti maudi nga al-aldaw a napno iti rigat! Ipategmo ti namnamam, utobem, ken pagbalinem a pudpudno dayta iti panunotmo ken iti pusom—ken ikagumaam nga iranud dayta iti dadduma! (1 Tim. 4:15, 16; 1 Ped. 3:15) Iti kasta, masiguradom a saanka a mairaman inton aglabas daytoy nasentensiaanen a daan a lubong. Imbes ketdi, agtalinaedka a sibibiag ken naragsak—iti agnanayon!