1, 2. (a) Olsem wanem haptaim nogut bilong nau i wankain long hevi i laik painim raskolman? (Lukim piksa long kirap bilong stadi.) (b) Olgeta lain long heven na graun bai pilim olsem wanem taim God i pinisim ol manmeri nogut?

“DAIMAN I WOKABAUT!” Ol gad bilong banis kalabus i save singaut olsem taim ol i kisim wanpela raskol long sel na opim ol ain dua na bringim em i go, na ol dua i save pas gen na pairap. Wai na ol gad i save singaut olsem? Dispela raskolman i gat gutpela helt; em i no sik na stap long mak bilong dai. Tasol ol gad i bringim em i go long ples bilong kilim man. Long tingting bilong ol, i olsem dispela raskol i dai pinis. *

² Haptaim nogut bilong nau i kain olsem dispela raskol ol i laik kilim. Ol manmeri bilong graun i mekim planti pasin nogut, olsem na long bipo yet God i tokaut pinis long kotim ol, na klostu nau ol bai kisim strafe. Baibel i tok: “Ol manmeri i stap longwe long God, ol bai pinis.” (1 Jon 2:17) God bai pinisim dispela haptaim nogut bilong nau. Tasol samting i laik painim ol manmeri nogut i narapela kain liklik long samting i laik painim dispela raskol. Taim ol i laik kilim dispela raskol, sampela lain inap protes, o sutim tok long  disisen bilong kot, na holim tingting olsem kot bai stopim o senisim disisen bilong kilim dispela man. Tasol long sait bilong ol manmeri nogut, King bilong heven na graun i mekim pinis disisen long kilim ol i dai, na dispela em stretpela disisen. (Lo 32:4) Ol manmeri nogut i no gat rot bilong abrusim bagarap, na i no gat man bai holim 2-pela tingting long disisen bilong God long kilim ol i dai. Taim ol manmeri nogut i no stap moa, olgeta lain long heven na graun bai wanbel tru olsem God i bin mekim stretpela disisen. Olgeta bai amamas tru olsem pasin nogut i pinis olgeta!

3. Wanem 4-pela samting bai pinis taim Kingdom Bilong God i kam?

³ “Ol manmeri i stap longwe long God, ol bai pinis.” Wanem ol samting moa bai pinis? Ol manmeri i ting sampela samting long dispela graun bai stap olsem tasol na i no inap senis, tasol tru tru i no olsem. Planti bilong ol dispela samting bai pinis olgeta. Yu ting i stret long dispela tok i mekim yumi bel hevi? Nogat tru! Dispela em bikpela tok long “gutnius bilong Kingdom.” (Mat. 24:14) Orait wanem ol samting bai pinis taim Kingdom Bilong God i kam? I gat 4-pela samting: ol manmeri nogut, ol oganaisesen i gat pasin korapsen, ol pasin nogut, na ol hevi. Yumi bai bekim ol dispela askim: (1) Ol i mekim wanem long yumi? (2) Jehova bai mekim wanem long ol? (3) God bai kamapim wanem samting taim em i pinisim ol?

4. Long nau, olsem wanem ol man nogut i putim hevi long yumi?

⁴ Ol manmeri nogut i mekim wanem long yumi? Aposel Pol i bin tok profet long haptaim bilong yumi na em i tok “taim nogut bai kamap na dispela bai givim hatwok long ol man.” Em i tok tu olsem, “ol man nogut na ol man bilong giaman bai i go nogut moa.” (2 Tim. 3:1-5, 13) Yu ting dispela tok profet i kamap tru? Planti bilong yumi i bin karim hevi long han bilong ol man i gat pasin bilong buli, pasin bikhet, na pasin raskol. Pasin nogut bilong sampela i stap ples klia, na pasin nogut bilong sampela i stap hait—ol i giaman long mekim stretpela pasin bilong haitim pasin nogut bilong ol. Ating ol i no mekim nogut long yumi, tasol pasin nogut bilong ol i save putim hevi long yumi. Yumi save bel hevi tru taim yumi harim ol stori nogut long pasin ol i mekim. Yumi save pret taim yumi harim olsem ol man nogut i mekim hatpela pasin tru long ol pikinini, ol lapun, na ol narapela we i no gat wanpela bilong sambai long ol. Pasin bilong ol dispela man nogut i olsem ol animal na ol spirit nogut. (Jems 3:15) Tasol yumi ken amamas olsem Baibel i tokim yumi long gutpela samting bai kamap.

5. (a) Rot i op yet long ol man nogut i ken mekim wanem? (b) Wanem samting bai painim ol man nogut husat i no laik senisim pasin bilong ol?

⁵ Jehova bai mekim wanem? Long nau, Jehova i opim rot long ol man nogut i ken senisim pasin nogut bilong ol. (Ais. 55:7) Taim i no kamap yet long God bai skelim olgeta wan wan bilong ol. God i skelim pinis pasin nogut bilong dispela haptaim yumi stap long en. Tasol olsem wanem long ol man husat i no laik senisim pasin bilong ol na ol i wok yet long sapotim ol pasin nogut bilong dispela graun i go inap long taim bilong traipela hevi tru? Jehova i tok promis olsem em bai pinisim olgeta manmeri i save mekim pasin nogut. (Ritim Song 37:10.) Ating ol man nogut i ting olsem ol bai abrusim bagarap. Planti bilong ol i save haitim ol pasin nogut ol i mekim, na ol i no kisim panismen long han bilong lo. (Jop 21:7, 9) Tasol Baibel i tok: “God i save lukim olgeta pasin bilong yumi manmeri na olgeta hap yumi go long en. Na i no gat wanpela ples i tudak olgeta long ai bilong en, em ol man bilong mekim pasin nogut i ken i go hait long en na God i no inap lukim ol.” (Jop 34:21, 22) Ol i no inap hait long ai bilong God Jehova. I no gat man inap giamanim em, na  i no gat wanpela ples i tudak olgeta na i pasim God long lukim pasin nogut bilong ol man. Bihain long Armagedon, yumi no inap lukim ol man nogut. Ol bai pinis olgeta!—Sng. 37:12-15.

6. (a) Husat bai stap long graun taim ol man nogut i no stap moa? (b) Bilong wanem yumi amamas long kisim dispela save?

⁶ Husat bai stap taim God i pinisim ol man nogut? Jehova i mekim wanpela tok promis we i mekim gut bel bilong yumi, em i tok: “Ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” Long wankain song, God i tok: “Ol stretpela man bai i kisim graun God i givim ol, na bai ol i stap oltaim long en.” (Sng. 37:11, 29) Bilong wanem Baibel i kolim sampela manmeri olsem “ol manmeri i daunim nem bilong ol yet” na “ol stretpela man”? Taim ol i bihainim ol skultok bilong Jehova na larim em i stiaim ol, i olsem ol i daunim nem bilong ol yet. Taim ol i mekim ol pasin i stret long ai bilong God Jehova, ol i stap olsem ol stretpela man. Long nau, ol man nogut i planti moa winim ol stretpela man. Tasol long nupela taim, ol stretpela man na ol manmeri i daunim nem bilong ol yet, ol tasol bai stap, olsem na yumi no inap tok olsem namba bilong ol i bikpela o liklik. Ol dispela manmeri tasol bai mekim graun i kamap ples paradais!

7. Long nau, olsem wanem ol oganaisesen i gat pasin korapsen i putim hevi long yumi?

⁷ Ol oganaisesen i gat pasin korapsen i mekim wanem long yumi? Ol i mekim ol wok nogut we i putim hevi long yumi. Oganaisesen bilong ol lotu i save giamanim planti milion manmeri. Ol i giamanim ol manmeri long pasin tru bilong God, ol tok i tru bilong Baibel, wanem samting bai painim dispela graun na ol manmeri long bihain, na planti samting moa. Ol gavman i save kirapim ol woa na ol pait insait long kantri, na putim hevi long ol man i stap rabis na ol man i no gat wanpela bilong sambai long ol, na ol i save braibim ol narapela, na feiveretim sampela man tasol. Ol bisnis lain i save bagarapim graun, win, na wara, na ol i save pinisim ol samting long graun, olsem wara na ol diwai, na ol i save giamanim ol manmeri na liklik lain tasol i save kisim planti mani na gutpela sindaun, tasol planti milion manmeri i stap rabis. Ol dispela samting i soim klia olsem ol oganaisesen i gat pasin korapsen, na ol i gat bikpela asua long pen na hevi i painim ol manmeri long nau.

8. Olsem Baibel i stori long en, wanem samting bai kamap long ol oganaisesen we i luk olsem ol i stap strong long nau?

⁸ Jehova bai mekim wanem? Traipela hevi tru bai kirap taim lain politik i bagarapim olgeta lotu giaman, em Baibel i kolim ol olsem pamukmeri na Bikpela Babilon. (Rev. 17:1, 2, 16; 18:1-4) Olgeta lotu giaman bai bagarap olgeta. Olsem wanem long ol narapela oganaisesen em pasin korapsen i pulap long ol? Baibel i kolim maunten na ailan taim em i mekim tok piksa long planti oganaisesen we i luk olsem ol i stap strong long nau. (Ritim Revelesen 6:14.) Tok Bilong God i soim olsem ol gavman na ol oganaisesen ol i sapotim, ol bai pundaun na bagarap. Long pinis bilong traipela hevi tru, olgeta gavman bilong dispela graun wantaim olgeta manmeri husat i birua long Kingdom Bilong God, ol bai bagarap na pinis olgeta. (Jer. 25:31-33) Olgeta oganaisesen i gat pasin korapsen bai i no stap moa!

9. Bilong wanem yumi ken bilip tru olsem stretpela oganaisesen bai bosim nupela graun?

⁹ Wanem kain oganaisesen bai stap taim God i pinisim ol oganaisesen i gat pasin korapsen? Bihain long Armagedon, yu ting bai i gat wanpela oganaisesen i stap long graun? Baibel i tok: “God i promis pinis long wokim nupela skai na nupela graun, na stretpela pasin tasol bai i stap long en. Em dispela samting tasol yumi wetim.” (2 Pita 3:13) Olpela skai na  graun, em ol gavman i pulap long pasin korapsen na ol manmeri ol i bosim, olgeta bai i no stap moa. Wanem samting bai kisim ples bilong ol? Dispela tok “nupela skai na nupela graun” i makim olsem nupela gavman bai bosim nupela lain manmeri. Jisas Krais bai stap King long dispela Kingdom, na em bai bihainim gut pasin bilong God Jehova, em God i save mekim ol samting i wok gut. (1 Kor. 14:33) Dispela Kingdom bai oganaisim gut “nupela graun.” Ol gutpela man bai stap bilong mekim ol wok. (Sng. 45:16) Krais na lain 144,000 bai stiaim ol dispela manmeri. Tingim: God bai pinisim olgeta oganaisesen i gat pasin korapsen, na wanpela oganaisesen tasol bai bosim graun, na olgeta manmeri bai i stap wanbel, na i no gat pasin korapsen!

10. (a) Ol manmeri long hap bilong yu i bihainim wanem ol pasin nogut? (b) Pasin nogut bilong ol manmeri i mekim wanem long yu na famili bilong yu?

¹⁰ Ol pasin nogut i mekim wanem long yumi? Yumi stap long haptaim we pasin nogut i pulap tru. Ol manmeri i mekim pasin pamuk, bihainim pasin giaman, na pait na mekim nogut tru long ol narapela. Ol dispela pasin nogut i putim hevi long wok bilong papamama taim ol i laik stiaim ol pikinini long bihainim stretpela pasin. Lain bilong dispela graun i save bilasim olgeta kain pasin nogut, na i olsem ol i tok bilas long ol lo bilong Jehova long pasin i stret na pasin i no stret. (Ais. 5:20) Ol Kristen tru i save wok hat long sakim pasin bilong dispela graun. Ol i wok strong long stap gut long Jehova long dispela taim we ol manmeri i no bihainim ol lo bilong God.

11. Jehova i bagarapim Sodom na Gomora, na dispela i givim wanem skul long yumi?

¹¹ Jehova bai mekim wanem? Tingim samting em i bin mekim long pasin nogut bilong ol manmeri long Sodom na Gomora. (Ritim 2 Pita 2:6-8.) Pasin nogut bilong ol manmeri i putim bikpela hevi tru long Lot. Taim Jehova i bagarapim Sodom na Gomora, em i pinisim pasin nogut bilong ol manmeri. Samting God i mekim i olsem piksa na “i makim ol samting bai kamap long ol man i sakim tok bilong God.” Long dispela taim bipo, Jehova i pinisim olgeta pasin nogut. Olsem tasol, long nau tu em bai pinisim olgeta pasin nogut taim em i kotim ol manmeri nogut bilong graun.

12. Yu laik tru long mekim wanem ol samting taim dispela haptaim nogut bilong nau i pinis?

¹² Wanem ol samting bai kamap taim God i pinisim ol pasin nogut? Graun bai kamap ples paradais, na ol manmeri bai amamas tru long mekim ol gutpela samting. Tingim gutpela wok yumi bai mekim; yumi bai mekim dispela graun i kamap ples paradais, na yumi bai wokim ol haus bilong yumi yet na bilong ol wanfamili na ol pren. Yumi bai amamas long welkamim ol manmeri i kirap bek long matmat na yumi bai skulim ol long ol lo bilong Jehova, na tu, yumi bai skulim ol long ol samting God i bin mekim bilong helpim ol manmeri. (Ais. 65:21, 22; Apo. 24:15) Yumi bai mekim planti samting bilong litimapim nem bilong Jehova na yumi bai kisim amamas long en!

13. Pasin bikhet bilong Satan, Adam, na Iv, i kamapim wanem ol hevi?

¹³ Ol hevi i mekim wanem long yumi? Sindaun bilong ol manmeri i bagarap bikos ol i karim hevi long rot bilong ol manmeri nogut, ol oganaisesen i gat pasin korapsen, na ol pasin nogut. Yumi olgeta i karim hevi i kamap long ol woa, hevi bilong gavman i sot long mani, na pasin bilong luk daun long ol manmeri bilong narapela skin kala. Hevi bilong sik na dai i save painim yumi olgeta. Ol dispela hevi i kamap long pasin bikhet em Satan, Adam, na Iv i mekim long Jehova. Yumi olgeta i karim ol hevi i kamap long pasin bikhet bilong ol.

14. Jehova bai mekim wanem long ol hevi i painim yumi long nau?

¹⁴ Jehova bai mekim wanem? Tingim ol hevi i  kamap long woa. Jehova i tok promis olsem em bai pinisim ol woa. (Ritim Song 46:8, 9.) Olsem wanem long hevi bilong sik? Em bai pinisim olgeta sik. (Ais. 33:24) Olsem wanem long hevi bilong dai? Jehova bai pinisim tru dai na ol manmeri i no inap dai moa! (Ais. 25:8) Em bai pinisim hevi bilong i stap rabis. (Sng. 72:12-16) Em bai pinisim olgeta narapela hevi we i bagarapim sindaun bilong ol manmeri long nau. Satan na ol spirit nogut bilong em bai i no stap moa, olsem na “win” nogut bilong dispela graun bai pinis.—Efe. 2:2.

15. Bihain long Armagedon, wanem ol hevi bai pinis olgeta?

¹⁵ Olsem wanem? Long tingting, yu inap piksaim wanpela taim bai kamap na hevi bilong woa, sik, na dai, bai pinis olgeta na i no i stap moa? Tingim, bai i no gat ol ami, nevi, na ol balus bilong pait! Bai i no gat ol samting bilong pait na ples bilong planim ol man i dai long pait. Bai i no gat ol haus sik, ol dokta, ol nes, insurens bilong haus sik, mog, ol wokman na ples bilong stretim bodi bilong ol daiman, na ol matmat! Taim pasin raskol i pinis olgeta, i no gat wok moa long ol sekiuriti kampani, alam sistem, polis, na ating bai i no gat nid long yumi yusim ol lok na ol ki! I no gat wanpela samting bai mekim yumi tingting planti na bel hevi.

16, 17. (a) Ol manmeri bai pilim olsem wanem taim ol i abrusim bagarap long Armagedon? Stori long wanpela tok piksa. (b) Yumi mas mekim wanem bambai yumi inap abrusim bagarap taim God i pinisim ol manmeri nogut?

¹⁶ Laip bilong yumi bai olsem wanem taim God i pinisim olgeta hevi? I hatwok long yumi inap piksaim dispela samting long tingting. Yumi stap longpela taim pinis long dispela taim nogut, olsem na yumi no luksave olsem ol pasin nogut bilong nau i putim bikpela presa long yumi. Kain olsem: Ol manmeri i stap klostu long wanpela bikpela bas stop, ol bai lain pinis long nois bilong ol kar, olsem na dispela i no inap putim presa long ol. Na tu, ol manmeri i sindaun klostu long ples bilong tromoi pipia, ol bai lain pinis long smel nogut, olsem na ol i no inap luksave olsem dispela smel i wok long kamap nogut moa. Tasol ol dispela manmeri bai amamas tru taim olgeta nois na smel nogut i pinis olgeta!

¹⁷ Yumi bai stap olsem wanem taim ol hevi bilong nau i pinis olgeta? Song 37:11 i tok: “Bai ol i sindaun gutpela tumas na amamas i stap.” Ating yu amamas long dispela tok, laka? Jehova i laik bai yu stap amamas. Planti hevi i pulap long dispela haptaim bilong las de, olsem na yu mas wok strong long mekim olgeta samting yu inap mekim bilong stap klostu long God Jehova na oganaisesen bilong em! Tingim tingim gutpela blesing yu bai kisim long bihain, tingim oltaim, na pilim tru long bel na tingting, na tokim ol narapela tu long dispela blesing! (1 Tim. 4:15, 16; 1 Pita 3:15) Taim yu mekim ol dispela samting, yu ken bilip tru olsem yu bai abrusim bagarap taim God i pinisim ol manmeri nogut. Yu bai stap laip na stap amamas inap oltaim oltaim!