1. (a) Sa ano magkapareho sanday Hukom Jefte kag Hana? (Tan-awa ang mga piktyur sa umpisa sini nga artikulo.) (b) Ano nga mga pamangkot ang sabton sa sini nga artikulo?

SI Hukom Jefte isa ka isganan nga lider; si Hana isa ka mapinasakupon nga asawa sa iya bana nga si Elkana. Si Jefte maisog nga soldado; si Hana mapainubuson nga babayi nga nagaatipan sang iya bana kag puluy-an. Magluwas nga isa lang ang Dios nga ila ginasimba, sa ano pa gid sila magkapareho? Nagpanaad sila sa Dios, kag gintuman gid nila ang ila panaad sa iya. Maayo gid sila nga halimbawa para sa mga lalaki kag babayi subong nga nagdesisyon nga magpanaad kay Jehova. Pero mahimo ini ipamangkot: Ano ang panaad? Daw ano ka serioso ang panaad sa Dios? Ano ang matun-an naton kanday Jefte kag Hana?

2, 3. (a) Ano ang panaad? (b) Ano ang ginasiling sang Kasulatan parte sa panaad sa Dios?

² Sa Biblia, ang panaad isa ka solemne nga promisa sa Dios. Nagapromisa ang isa nga himuon ang pila ka buhat, maghatag sing regalo, himuon ang isa ka sahi sang pag-alagad, ukon maglikaw sa pila ka butang. Kinabubut-on ang pagpanaad, suno sa kahilwayan sang isa sa pagdesisyon. Pero sagrado ini kag ginapaabot sang Dios nga tumanon ini sang isa bangod pareho ini ka serioso sa panumpa sang isa nga himuon ukon indi ang isa ka butang. (Gen. 14:22, 23; Heb. 6:16, 17) Ano ang ginasiling sang Kasulatan parte sa kon daw ano ka serioso ang panaad sa Dios?

 ³ Ang Mosaikong Kasuguan nagsiling: “Kon ang isa ka tawo magpanaad kay Jehova ukon magpanumpa . . . , indi niya dapat paglapason ang iya ginhambal. Himuon niya ang tanan nga ginpanaad niya.” (Num. 30:2) Sang ulihi, nagsulat si Solomon: “Kon magpanaad ka sa Dios, indi pagpadugaya ang pagtuman sini, kay wala sia nahamuot sa mga buangbuang. Kon ano ang ginpanaad mo, tumana ini.” (Man. 5:4) Ginpamatud-an ni Jesus nga serioso ang panaad sang nagsiling sia: “Ginsiling sa ila sang una: ‘Indi kamo magpanumpa sang indi ninyo paghimuon, kundi dapat ninyo tumanon ang inyo mga panaad kay Jehova.’”—Mat. 5:33.

4. (a) Daw ano ka serioso ang panaad sa Dios? (b) Ano ang pagatun-an naton parte kanday Jefte kag Hana?

⁴ Gani maathag nga serioso gid ang magpromisa sa Dios. May epekto sa aton kaangtanan kay Jehova ang pagtamod naton sa aton panaad. Nagsulat si David: “Sin-o ang mahimo magtaklad sa bukid ni Jehova? Sin-o ang mahimo magtindog sa iya balaan nga duog? Ang tawo . . . nga wala nagapanumpa sing binutig paagi sa Akon [kay Jehova] kabuhi, ukon wala nagapangdaya paagi sa sumpa.” (Sal. 24:3, 4; footnote) Ano ang ginpanaad ni Jefte kag ni Hana, kag mahapos lang bala sa ila ang pagtuman sang ila panaad?

5. Ano ang ginpanaad ni Jefte, kag ano ang natabo?

⁵ Gintuman gid ni Jefte ang ginpromisa niya kay Jehova sang makig-away sia sa mga Ammonhon nga nagapigos sadto sa katawhan sang Dios. (Huk. 10:7-9) Gusto gid magdaug ni Jefte, gani nagpanaad sia: “Kon itugyan mo sa akon kamot ang mga Ammonhon, ang una nga maggua sa puertahan sang akon balay kag magsugata sa akon kon magbalik ako nga luwas sa katalagman halin sa pagpakig-away sa mga Ammonhon mangin iya ni Jehova.” Ano ang natabo? Napierde ang mga Ammonhon, kag ang pinalangga nga anak nga babayi ni Jefte ang nagsugata sa iya pagbalik niya. Ang iya anak ang “mangin iya ni Jehova.” (Huk. 11:30-34) Ano ang buot silingon sini para sa iya anak?

6. (a) Mahapos lang bala kay Jefte kag sa iya anak ang pagtuman sa panaad sa Dios? Ipaathag. (b) Ano ang ginatudlo sa imo sang Deuteronomio 23:21, 23 kag Salmo 15:4 parte sa panaad sa Dios?

⁶ Para matuman ni Jefte ang iya panaad, dapat mag-alagad sing bug-os kay Jehova ang iya anak sa santuaryo. Wala bala ginpamensaran sing maayo ni Jefte ang iya panaad? Ginpamensaran niya ini, kay mahimo nahibal-an niya nga posible nga ang iya anak amo ang una nga magagua sa ila balay sa pagsugata sa iya. Pero mabudlay gid ini nga sitwasyon sa ila nga duha kay magasakripisyo sila. Sang makita ni Jefte ang iya anak, “gingisi niya ang iya bayo” kag nagsiling nga nasubuan gid sia. Ang iya anak ‘naghibi tungod sa iya pagkabirhen.’ Ngaa? Wala sing anak nga lalaki si Jefte, kag ang iya bugtong nga anak nga babayi indi na makapamana kag maghatag sa iya sing mga apo. Indi na magpadayon ang iya panimalay kag kaliwatan. Pero indi ini ang pinakaimportante. Nagsiling si Jefte: “Nakapanumpa na ako kay Jehova kag indi ko na ini mabawi.” Nagsiling sa iya ang iya anak: “Himua sa akon ang ginpanumpa mo.” (Huk. 11:35-39) Matutom sila kag wala gid sila maghunahuna nga indi pagtumanon ang isa ka panaad sa Labing Mataas nga Dios bisan pa daku katama ang ila isakripisyo.—Basaha ang Deuteronomio 23:21, 23; Salmo 15:4.

7. (a) Ano ang ginpanaad ni Hana, kag ngaa, kag ano ang nangin resulta? (b) Ano ang buot silingon sang panaad ni Hana para kay Samuel? (Tan-awa ang footnote.)

⁷ Gintuman man ni Hana ang iya panaad  kay Jehova. Nagpromisa sia sa tion sang iya daku nga kalisod kag kasakit kay baw-as sia kag pirme ginainsulto. (1 Sam. 1:4-7, 10, 16) Ginsugid ni Hana sa Dios ang iya ginabatyag kag nagpanaad: “O Jehova sang mga kasuldadusan, kon talupangdon mo ang kalisdanan sang imo alagad kag dumdumon ako kag indi mo pagkalimtan ang imo alagad kag hatagan mo ang imo alagad sing anak nga lalaki, ihatag ko sia kay Jehova sa bug-os niya nga kabuhi, kag indi gid pag-utdan ang iya buhok.” * (1 Sam. 1:11) Ginhatag kay Hana ang iya ginpangabay, kay nagbun-ag sia sang iya panganay, nga isa ka lalaki. Daku gid ang iya kalipay! Pero wala niya nalipatan ang iya panaad sa Dios. Sang ginbun-ag niya ang iya bata, nagsiling sia: “Ginpangayo ko sia kay Jehova.”—1 Sam. 1:20.

8. (a) Mahapos lang bala kay Hana ang pagtuman sa iya panaad? Ipaathag. (b) Ano ang ginapahanumdom sa imo sang ginsiling ni David sa Salmo 61 parte sa maayo nga panimuot ni Hana?

⁸ Sang nalutas na si Samuel sang mga tatlo sia ka tuig, ginhimo gid ni Hana ang ginpanaad niya sa Dios. Wala gid sia maghunahuna nga indi ini pagtumanon. Gindala niya si Samuel sa mataas nga saserdote nga si Eli sa tabernakulo sa Shilo kag nagsiling: “Ginpangamuyo ko sadto ining bata, kag ginhatag ni Jehova ang akon ginpangabay sa iya. Gani, ginahatag ko sia subong kay Jehova. Si Jehova na ang nagapanag-iya sa iya sa bug-os niya nga kabuhi.” (1 Sam. 1:24-28) “Padayon nga nagdaku ang bata nga si Samuel sa atubangan ni Jehova.” (1 Sam. 2:21) Pero ano ang buot silingon sini para kay Hana? Palangga gid niya ang iya bata, pero indi na niya ini makaupod kada adlaw samtang nagadaku ini. Hunahunaa ang kahidlaw niya nga hakson ang iya bata, maghampang upod sa iya, kag atipanon sia, kay amo ini ang ginapakabahandi sang isa ka mapinalanggaon nga iloy samtang nagadaku ang iya bata. Pero gintuman gid ni Hana ang iya panaad sa Dios. Nagkalipay ang iya tagipusuon tungod kay Jehova.—1 Sam. 2:1, 2; basaha ang Salmo 61:1, 5, 8.

9. Ano nga mga pamangkot ang sabton pa naton?

⁹ Bangod nahangpan na naton nga serioso gid ang panaad sa Dios, binagbinagon naton ini nga mga pamangkot: Ano ang mahimo naton ipanaad bilang mga Cristiano? Kag paano naton mapakita nga determinado gid kita nga tumanon ang aton mga panaad?

10. Ano ang pinakaimportante nga panaad sang isa ka Cristiano, kag ano ang nadalahig sa sini?

¹⁰ Ang pinakaimportante nga panaad sang isa ka Cristiano amo ang pagdedikar niya sang iya kabuhi kay Jehova. Ngaa? Bangod nagpangamuyo sia kag nagpromisa kay Jehova nga alagdon niya ang Dios sa bug-os niya nga kabuhi, ano man ang matabo. Ginsiling ni Jesus nga ang naghimo sini ‘nagapanghiwala sang iya kaugalingon,’ wala na nagauna sang iya kaugalingon, kag nagapanaad nga unahon gid niya ang kabubut-on sang Dios sa iya kabuhi. (Mat. 16:24) Sugod sa adlaw nga nagpanaad sia, ‘iya na sia ni Jehova.’ (Roma 14:8) Dapat gid tamdon sing serioso sang isa ang iya panaad sang nagdedikar sia pareho sang pagtamod sang salmista sa iya mga panaad sa Dios: “Ano bala ang ibalos ko kay Jehova sa tanan nga kaayo nga ginhimo niya sa akon? Tumanon ko ang akon mga panaad kay Jehova sa atubangan sang tanan niya nga katawhan.”—Sal. 116:12, 14.

11. Ano ang natabo sang adlaw sang imo bawtismo?

¹¹ Nadedikar mo na bala ang imo kabuhi kay Jehova kag ginsimbuluhan ang imo pagdedikar paagi sa pagpabawtismo sa tubig?  Kon nahimo mo na ini, dalayawon gid ang imo ginhimo! Dumduma nga sang adlaw sang imo bawtismo, sa atubangan sang mga saksi, ginpamangkot ka kon bala gindedikar mo ang imo kaugalingon kay Jehova kag nahangpan mo nga “ang imo dedikasyon kag bawtismo nagapakilala sa imo subong isa sa mga Saksi ni Jehova nga nagapakig-upod sa organisasyon nga ginatuytuyan sang espiritu sang Dios.” Ang imo sabat nga huo isa ka dayag nga pagpahayag nga bug-os mo nga gindedikar ang imo kaugalingon kag kalipikado ka sa bawtismo bilang ordenado nga ministro ni Jehova. Ginpahalipay mo gid si Jehova!

12. (a) Ano ang dapat naton ipamangkot sa aton kaugalingon? (b) Suno kay Pedro, ano nga mga kinaiya ang dapat naton ipakita?

¹² Pero umpisa pa lang ang bawtismo. Pagkatapos sini, gusto naton nga padayon nga tumanon ang aton dedikasyon paagi sa pag-alagad sing matutom sa Dios. Gani mahimo naton pamangkuton ang aton kaugalingon: ‘Nag-uswag bala ako sa espirituwal sugod sang nabawtismuhan ako? Padayon ko bala nga ginaalagad si Jehova sing bug-os tagipusuon? (Col. 3:23) Pirme bala ako nagapangamuyo, nagabasa sang Pulong sang Dios, nagatambong sa mga miting sang kongregasyon, kag nagabantala sa akon masarangan?  Ukon talagsa ko na lang ini ginahimo?’ Ginpaathag ni apostol Pedro nga malikawan naton nga mangin indi aktibo sa pag-alagad kon padayon naton nga idugang sa aton pagtuo ang ihibalo, pagbatas, kag diosnon nga debosyon.—Basaha ang 2 Pedro 1:5-8.

13. Ano ang dapat dumdumon sang dedikado kag bawtismado nga Cristiano?

¹³ Kon nakapanaad na kita sa Dios sang nagdedikar kita sa iya, indi na naton ini mabawi. Ang isa nga natak-an na sa pag-alagad kay Jehova ukon sa pagkabuhi bilang Cristiano indi puede magsiling nga wala sia makadedikar kag indi balido ang iya bawtismo. * Sang nagpabawtismo sia, ginpahibalo niya nga nakadedikar na sia sa Dios. Manabat sia kay Jehova kag sa kongregasyon kon makahimo sia sing serioso nga sala. (Roma 14:12) Kabay pa nga indi kita pagsilingan nga ‘ginbayaan naton ang aton una nga gugma.’ Sa baylo, gusto naton nga silingan kita ni Jesus: “Nahibaluan ko ang imo mga buhat, ang imo gugma kag pagtuo kag ministeryo kag pagbatas. Ang imo mga buhat sining ulihi mas maayo pa sangsa una.” (Bug. 2:4, 19) Kabay nga padayon naton nga tumanon ang aton panaad sang nagdedikar kita para mapahalipay si Jehova.

14. Ano ang ikaduha nga pinakaimportante nga panaad sang isa, kag ngaa?

¹⁴ Ang ikaduha nga pinakaimportante nga panaad sang isa amo ang iya panaad sang ginkasal sia. Ngaa? Bangod sagrado ang pag-asawahay. Sa atubangan sang Dios kag sang mga nakasaksi, nagapanaad ang nobyo kag nobya sa ila kasal. Nalakip sa ila promisa nga higugmaon, palanggaon, kag tahuron nila ang kada isa “tubtob [sila] nagakabuhi sa duta nahisuno sa kahimusan sang Dios sa pag-asawahay.” Mahimo nga indi ini ang eksakto nga ginsiling sang iban, pero nagpanaad sila gihapon sa atubangan sang Dios. Ipakilala sila dayon nga bana na kag asawa, kag magapadayon sila nga mag-asawa tubtob buhi sila. (Gen. 2:24; 1 Cor. 7:39) “Gani,” siling ni Jesus, “ang gintingob sang Dios, indi pagbulagon sang tawo.” Ang “tawo” nagapatuhoy sa bana, asawa, kag iban pa. Indi gid dapat maghunahuna ang mga nagapakasal nga mahimo sila magdiborsio sa ulihi.—Mar. 10:9.

15. Ngaa indi dapat pagsundon sang mga Cristiano ang indi serioso nga pagtamod sang kalibutan sa pag-asawahay?

¹⁵ Siempre, wala gid sing perpekto nga pag-asawahay kay wala sing bana ukon asawa nga perpekto. Amo kon ngaa nagsiling ang Biblia nga ang mga mag-asawa “may kapipit-an” kon kaisa. (1 Cor. 7:28) Makapasubo nga indi serioso ang pagtamod sang kalibutan sa pag-asawahay. Kon may problema sa ila pag-asawahay, nagabulagay na lang sila dayon. Pero indi amo sini sa mga Cristiano. Kon indi pagtumanon sang isa ang iya panaad sang ginkasal sia, pareho lang ini nga nagbinutig sia sa Dios, kag ginadumtan sang Dios ang mga butigon! (Lev. 19:12; Hulu. 6:16-19) Nagsulat si apostol Pablo: “May asawa ka bala? Indi ka magtinguha nga bulagan sia.” (1 Cor. 7:27) Nasiling ini ni Pablo bangod nahibaluan niya nga ginadumtan man ni Jehova ang hungod nga pagluib para makadiborsio.—Mal. 2:13-16.

16. Ano ang ginasiling sang Biblia parte sa diborsio kag pagbulagay?

¹⁶ Gintudlo ni Jesus nga makadiborsio lang ang isa suno sa Kasulatan kon magdesisyon ang inosente nga tiayon nga indi pagpatawaron ang nakighilahi nga tiayon. (Mat. 19:9; Heb. 13:4) Kamusta naman ang pagbulagay? Maathag man ang ginasiling sang Biblia parte sa sini. (Basaha ang 1 Corinto 7:10, 11.) Wala naghatag ang Biblia sing basihan sa pagbulagay. Pero gintamod sang pila  ka minyo nga Cristiano ang pila ka kahimtangan nga mangin rason para magbulag, pareho sang grabe nga katalagman sa kabuhi ukon espirituwalidad sang isa bangod sang mapintas ukon apostata nga tiayon. *

17. Ano ang himuon sang mga Cristiano para magbakod ang ila pag-asawahay?

¹⁷ Kon magpangayo sing bulig sa mga gulang sa kongregasyon ang mag-asawa nga may problema, mahimo sila pamangkuton sang mga gulang kon natan-aw na nila nga duha ang video nga What Is True Love? kag natun-an na nila ang brosyur nga Paano Mangin Malipayon ang Imo Pamilya? Ngaa? Bangod ginatudlo sa sini ang mga prinsipio sang Dios nga nakabulig sa madamo nga magbakod ang ila pag-asawahay. Nagsiling ang isa ka mag-asawa: “Sugod sang gintun-an namon ini nga brosyur, nangin malipayon pa gid kami.” Ang isa ka asawa nga 22 ka tuig na nga minyo nagsiling sang daw maguba na ang ila pag-asawahay: “Pareho kami nga bawtismado sang akon bana, pero wala gid kami nagaintiendihanay sadto. Nakabulig gid ini nga video! Subong, mas maayo na ang amon pag-updanay.” Minyo ka bala? Sunda gid ang mga prinsipio ni Jehova sa inyo pag-asawahay para mangin malipayon ka sa pagtuman sang imo panaad!

18, 19. (a) Ano ang ginhimo sang madamo nga Cristianong mga ginikanan? (b) Ano ang masiling naton parte sa mga yara sa pinasahi nga bug-os tion nga pag-alagad?

¹⁸ Natalupangdan mo bala kon sa ano pa gid magkapareho sanday Jefte kag Hana? Bangod sang ila mga panaad, nag-alagad sa tabernakulo ang ila mga anak sa pinasahi nga paagi. Nangin makalilipay gid ang ila kabuhi. Subong, madamo nga Cristianong mga ginikanan ang nagpalig-on sa ila mga kabataan nga mag-alagad sing bug-os tion kag gamiton ang ila kabuhi sa pag-alagad sa Dios. Ginakomendahan gid sila.—Huk. 11:40; Sal. 110:3.

¹⁹ Subong, may mga 67,000 ka miembro sang Worldwide Order of Special Full-Time Servants of Jehovah’s Witnesses. Ang iban nagaalagad sa Bethel, sa konstruksion ukon sa sirkito, ukon bilang mga field instructor, * espesyal payunir, misyonero, ukon alagad sa mga pasilidad sang Assembly Hall ukon teokratiko nga eskwelahan. Tanan sila nagasunod sa “Vow of Obedience and Poverty,” kay nagpromisa sila nga batunon ano man nga asaynment ang ihatag sa ila para sa intereses sang Ginharian, magkabuhi sing simple, kag indi maghimo sang sekular nga trabaho nga wala sing pahanugot. Indi ang mga tawo ang pinasahi, kundi ang ila mga asaynment. Nahibaluan nila nga importante gid ang mapainubuson nga pagtuman sang ila panaad samtang yara sila sa pinasahi nga bug-os tion nga pag-alagad.

20. Ano ang dapat naton himuon “adlaw-adlaw,” kag ngaa?

²⁰ Sa ginbinagbinag naton, pila sa sini ang ginpanaad mo sa Dios? Isa, duha, ukon tatlo? Mahimo gid nga narealisar mo nga indi dapat pasapayanan ang imo mga panaad. (Hulu. 20:25) Malain gid ang resulta kon indi pagtumanon sang isa ang ginpanaad niya kay Jehova. (Man. 5:6) Gani malipayon kita nga ‘mag-amba sing mga pagdayaw sa ngalan ni Jehova sa wala sing katubtuban samtang ginatuman naton ang aton mga panaad sa adlaw-adlaw.’—Sal. 61:8.