1. (a) Anni i naggittan da Jefte anna Hana? (Innan i letratu ira ta gafu na artikulo.) (b) Anni ira nga pakkiavu i matabbag taw nga artikulo?

MAGUTU yaya nga lider; minakkimoray yaya nga atawa nga babay. Masikan i nonona nga suddalu; minappakalinno yaya nga mamalay. Anni paga i naggittan da Ukum Jefte anna na atawa ni Elkana nga si Hana fuera paga ta paddayoda ta tadday nga Dios? Parehu nga nangitabba ira ta Dios, anna matalo nga sinuppalda yatun. Makakkasta ira nga ehemplo para ta lallaki anna babbay ta maddaggun nga nappili nga mangitabba kani Jehova. Ngem, egga ira i luttuag tu importante nga pakkiavu: Anni i tabba? Kunnasi kaserioso i mangitabba ta Dios? Anni nga leksion i magigiammu tam kada Jefte anna Hana?

2, 3. (a) Anni i tabba? (b) Anni i kagian na Katurakan meyannung ta pangitabba ta Dios?

² Kagitta na nikeyusana ta Biblia, i tabba ay napafutuan nga promesa ta Dios. Ipromesa na tadday nga tolay nga mangngua tu ganna-gannug, mangiyawa tu regalu, tullung ta tadday nga klase na serbisio, onu arianna kuan i karuan nga gannug. Boluntario i tabba, segun ta lallagurena. Ngem maski kunnatun, sagrado anna egga i bisana yatun ta mata na Dios megafu ta netabba yatun—nekagi onu netura—nga promesa nga kuan onu ari kuan na tolay i tadday nga gannug. (Gen. 14:22, 23; Heb. 6:16, 17) Anni i kagian na Katurakan meyannung ta kinaserioso na pangitabba ta Dios?

 ³ Kagian na Mosaiko nga Dob: “Nu nappromesa i tadday nga tolay kani Jehova onu nangitabba ta baggina tu tabba . . . , arianna nakuan ibabawi i kinagina. Kuanna nakuan i ngamin nga nipromesana.” (Num. 30:2) Tapus nainspiran si Solomon nga itura: “Ta kada pangitabbam ta Dios, ariammu italattan nga tuppalan yatun, megafu ta manaki na Dios danuri ulapa. Nu anni i nitabbam, tuppalammu.” (Ecl. 5:4) Pinakurug ni Jesus i kaserioso na pangitabba turi ta kinagina: “Netuddu gari ta totolay ta ollu nga aggaw, ‘Ariam-mu nga pallikuran i meyassingam-mu, ngem kuam-mu i nitabbam ta Yafu.’”—Mat. 5:33.

4. (a) Kunnasi kaserioso i mangitabba ta Dios? (b) Anni i kayà tam nga gigiammuan meyannung kada Jefte anna Hana?

⁴ Mananawag nga serioso nga gannug i mangitabba ta Dios. Makafekto ta relasiottam kani Jehova i pagimamma tam ta tabba tam ira. Nitura ni David: “Sinni i mekunnay nga umune ta vukig na YAFU? Sinni i mekunnay nga tullung ta Templo na nga masanto? Yuri i . . . ari nga masiri-siri nu mangitabba yaya.” (Sal. 24:3, 4) Anni i nitabba da Jefte anna Hana, anna mabi kari para nira nga tuppalan i nitabbada?

5. Anni i nitabba ni Jefte, anna anni i nesimmu?

⁵ Matalo nga sinuppal ni Jefte i promesana kani Jehova turi ta nakiggerra kontra ta Amonita ira, nga mangananassing ta totolay na Dios. (Uk. 10:7-9) Kuruga karagatan ni Jefte i mangaffu, yari tu nitabbana: “Nu iyawamu ta limà i Amonita ira, nu sinni laman i mallawan ta puerta na balemi tapenu dafunannà sonu memammo i panolì nga maggafu ta Amonita ira ay mabbalin tu kukua ni Jehova.” Anni i nesimmu? Naffu i Amonita ira, tapus i meddu nga ana nga babay ni Jefte i nanafun sa ta panolina kabalin nga mavviktoria kontra ta Amonita. Yaya i mabbalin tu “kukua ni Jehova.” (Uk. 11:30-34) Anni i kebalinan natun sa?

6. (a) Ngatta mariga para kada Jefte anna ta anana nga tuppalan i tabbada ta Dios? (b) Anni i ituddu na Deuteronomio 23:21, 23 anna Salmo 15:4 meyannung ta pangitabba ta Dios?

⁶ Tapenu matuppal na ana i tabba na yamana, mawag nga ngamin-tiempo yaya nga masserbi kani Jehova anna ta tabernakulona. Gaggavva kari laman yatun nga nitabba ni Jefte? Ari, megafu ta ammuna nga egga i posibilidad nga i anana nga babay i mallawan ta balena tapenu dafungan yaya. Maski kunnatun, madammo ta panageno para ta yama anna ana nga babay yatun—kurug nga sakrifisio para ta nira dua. Turi ta nasingan yaya ni Jefte, “pinisilna i sinnunna” anna kinagina nga pinarraddamna i futuna. Sinangitan na anana nga babay i kinabirhenna. Ngatta? Awan tu lalaki nga ana ni Jefte, anna ari ngana nga maki-atawa anna magana i tattadday nga anana nga babay. Magappo ngana i linia na familiada. Ngem, ari tu yatun i pinaka-importante nga mekonsidera. Kinagi ni Jefte: “Nevuka ku ngana i simu ku kani Jehova, anna ariakku ngana mawayya nga ibabawi.” Kunna gapa na anana: “Kuammu niakan i kagitta na nipromesam.” (Uk. 11:35-39) Matalo yatun ira nga indibidual nga ari vuluvuga nannono nga ari tuppalan i nitabbada ta Katannangan nga Dios—maski paga dakal i isakrifisioda.—Bibbigan i Deuteronomio 23:21, 23; Salmo 15:4.

7. (a) Anni i nitabba ni Hana, anna ngatta, anna anni i resultana? (b) Anni i kebalinan na tabba ni Hana kani Samuel? (Innan i footnote.)

⁷ Si Hana paga i tadday nga matalo nga nanuppal ta tabbana kani Jehova. Nappromesa yaya turi problemadu anna sobra i paddaddamna megafu ta kinabaug anna ta  awan tu immanna nga panguyaw sa. (1 Sam. 1:4-7, 10, 16) Nivuvvu ni Hana i futuna ta Dios anna nitabbana: “O Jehova na armada ira, nu innammu i pazziga-riga na aripammu anna daddammannà anna ariammu kattamman i aripammu anna iyawa i tadday nga ana nga lalaki ta aripammu, iyawa ku yaya kani Jehova ta ngamin nga aggaw na pattolena, anna awan vuluvuga tu labaha nga mattun ta uluna.” * (1 Sam. 1:11) Natabbag i pakimallo ni Hana, anna niyanana i ollu nga anana—tadday nga lalaki. Talaga makapagayaya yatun sa! Ngem, arianna lagapa kinattamman i tabbana ta Dios. Turi ta neyanana i anana nga lalaki, kinagina: “Kiniddò yaya kani Jehova.”—1 Sam. 1:20.

8. (a) Kunnasi kariga para kani Hana nga tuppalan i tabbana? (b) Kunnasi niperaddam na kinagi ni David ta Salmo 61 i makakkasta nga ehemplo ni Hana?

⁸ Turi ta nafuta i tallu dagun nga si Samuel, kingngua ni Hana nu anni i nitabbana ta Dios. Arianna vuluvuga ninono nga likuran yatun. Niyangena si Samuel ta Katannangan nga Pari nga si Eli ta tabernakulo ta Shilo anna kinagina: “Megafu taw nga abbing yari tu nakimallo ngà, anna sinabbag ni Jehova i pakimallo nga nikiddò sa. Niakan gapa ay ipekkò yaya kani Jehova. Ta ngamin nga aggona, mepekkaw yaya kani Jehova.” (1 Sam. 1:24-28) Tatun, “i abbing nga si Samuel ay tulu-tuloy nga ziminakal ta arubang ni Jehova.” (1 Sam. 2:21) Ngem anni gapa i mesimmu kani Hana? Talaga iddukanna i anana nga lalaki, ngem arianna ngana mawayya makavvulu yaya ta paddakalna. Nonopan nu kunnasi nga kakayàna nga magakko, makagayang, anna matangngaw i anana—nga maekspiriensana i makasta ira nga pakikkavulu na minaggiddu nga yena durante nga masinganna i paddakal na anana. Maski kunnatun, awan tu pinabbabawyan ni Hana meyannung ta pattuppalna ta tabbana ta Dios. Nagayaya i futuna kani Jehova.—1 Sam. 2:1, 2; bibbigan i Salmo 61:1, 5, 8.

9. Anni paga ira nga pakkiavu i kawagan nga matabbag?

⁹ Megafu ta nalippawa tam ngana nu kunnasi kaserioso i mangitabba ta Dios, ikonsidera tam yaw ira nga pakkiavu: Anni nga klase na tabba i awayya tam kuan bilang Cristiano? Kunnasi ittam kadeterminadu nga tuppalan i tabba tam ira?

10. Anni i pinaka-importante nga tabba nga kuan na tadday nga Cristiano, anna anni i nelagum tatun?

¹⁰ I pangidedika tu baggi kani Jehova i pinaka-importante nga tabba nga kuan na tadday nga Cristiano. Ngatta? Megafu ta pribadu nga pakimallo, napafutuan nga ipromesana kani Jehova nga usanna i inangona nga mannanayun nga masserbi sa, maski anni i mesimmu. Segun ta kinagi ni Jesus, mawag na tadday nga ‘kattamman i baggina,’ pagurayanna ngamin nga kepangngattanna, anna itabbana nga pagolluan i uray na Dios anne ta maski anni nga gannug ta pattolena. (Mat. 16:24) Mamegafu tatun, “para ta Yafu” ngana yaya. (Roma 14:8) Ari nakuan tagilappawan na maski sinni i tabbana nga dedikasion, gittana salmista nga nakkagi ta tabbana ta Dios: “Anni i awayyà nga pabbala-balo ta YAFU ta ngamin nga allo na nga inalawa ku? Ta paggarammammungan na ngamin nga totolay na, iyawa ku ta YAFU i nitabbà sa.”—Sal. 116:12, 14.

11. Anni i nesimmu turi ta aggaw na bawtismom?

¹¹ Nidedikam ngana kari i baggim kani Jehova anna nappabawtiso ka bilang simbolo  na dedikasiommu? Makasta nu kunnatun! Daddamman nga turi ta aggaw na bawtismom, ta arubang na testigu ira, neyavu nikaw nu nidedikam ngana i baggim kani Jehova anna nalippawamu nga i “dedikasion anna bawtismom i mangiyammammu nga tadday ka ngana nga Saksi ni Jehova nga netadday ta organisasion nga igiggiya na espiritu na Dios.” I positibo nga tabbagmu ay nasserbi nga pangilammuyag ta publiko nga kani Jehova ka laman nga nededika anna nipasingammu nga kualipikadu ka ngana ta bawtismo bilang ordinado nga ministro ni Jehova. Talaga nga napagayayamu si Jehova!

12. (a) Anni nakuan ira i iyavu tam ta baggi tam? (b) Anni ira nga kualidad i mawag nga egga nittam?

¹² Ngem, pamegafuanan laman i bawtismo. Kayà tam gapa nga itulu-tuloy nga matalo nga tuppalan i dedikasiottam ta Dios. Ngem, baka iyavu tam ta baggi tam: ‘Anni ngana i napprogresowakku ta espiritual namegafu ta bawtismò? Interu futu paga kari nga passerbiakku si Jehova? (Col. 3:23) Kanayunnà kari makimallo, mabbibbig tu Biblia, magatende tu study ira, anna mallayyagayya adde ta posible? Onu baka egga ngana i napakarianan tatun ira nga espiritual nga aktibidad?’ Niyesplika  ni apostol Pedro nga malillitattam i mabbalin tu inaktibo nu kanayuttam nga ilanno ta pangurug i pakannammu, pagattam, anna makadios nga debosion.—Bibbigan i 2 Pedro 1:5-8.

13. Anni nakuan i malippawa na dedikadu anna bawtisadu nga Cristiano?

¹³ Ari posible nga babawyan i tabba, nga likurattam i nipromesa tam ta Dios. Nu nattagibannag i tadday ta passerbi kani Jehova onu ta Cristiano nga pattolay, arianna makagi nga arianna talaga naddedika anna i bawtismona ay ari balido. * Ginakkagna nga ipresenta i baggina nga tadday nga interu futu nga nededika ta Dios. Egga i tabbaganna kani Jehova anna ta kongregasion ta anni laman nga serioso nga liwa nga makuana. (Roma 14:12) Ari nakuan vuluvuga nga makagi nittam nga ‘i pangaya tam sangoye ay ari ngana tu kagitta na gari ta gafu na.’ Kaya tam lallagu nga kagian ni Jesus nittam: “Ammù i kukukuan nu. Ammù i aya anna angngurug nu, i asserbi anna appasa-pasensia nu. Ammù tu mas matalikarag kamu ta trabahu nu sangoye anne turi ta gafu na.” (Nep. 2:4, 19) Matalikarag tam nakuan kanayun nga tuppalan i tabba na dedikasiottam tapenu mapagayaya si Jehova.

14. Anni i mekadua nga pinaka-importante nga tabba nga makua na tolay, anna ngatta?

¹⁴ I mekadua ta pinaka-importante nga tabba nga kuan na tolay ay i tabba ta pagatawa. Ngatta? Megafu ta sagrado i pagatawa. Ta arubang na Dios anna testigu ira, ikagi na nobio anna nobia i tabba na pagatawada. Maruddu nga ipromesada nga ayatan, tagibaloran, anna irespeto i kataggi-tadday anna kuadda yatun “durante nga siggamatolay [ira] dua ta davvun segun ta unnug na Dios ta pagatawa.” Ari nga kinagi na karuan i kunnatun ira nga uvovug, ngem nangitabba lagapa ira ta arubang na Dios. Tapus neyammammu ira nga magatawa ngana adde ta pateda. (Gen. 2:24; 1 Cor. 7:39) Kinagi ni Jesus, “Arian na gafu nga awayya tu paggungayan na tolay i pinattadday na Dios,” nelagum ngana i atawa nga lalaki onu babay onu maski sinni. Yatutta, sigga-nono nakuan na mangatawa onu maki-atawa nga ariadda makigungay.—Mar. 10:9.

15. Ngatta ari nakuan tuttulan na Cristiano ira i ari tu serioso nga pagimamma na aru nga totolay ta pagatawa?

¹⁵ Siempre, awan vuluvuga tu perfekto nga pagatawa. Pattadday na dua nga imperfekto nga tolay i kada pagatawa. Yatutta kagian na Biblia nga egga i “kavuru-vurungan” ira nga tiempo na magatawa. (1 Cor. 7:28) Kaddaraddam nga ari tu serioso i pagimamma na aru nga totolay na mundo meyannung ta pagatawa. Nu makkaproblema i pagatawa, basta ngana laman nga mammanaki anna panawadda i atawada. Ngem, ari nga maka-Cristiano i kunnatun. Kagitta na palladdug ta Dios i pallikug ta nitabba ta pagatawa, anna kalussaw na Dios i palladdug! (Lev. 19:12; Prov. 6:16-19) Nitura ni apostol Pablo: “Nu nangatawa ka ngana ay ariam-mu nga igungay i atawam.” (1 Cor. 7:27) Makagi yatun ni Pablo megafu ta ammuna nga kalussaw gapa ni Jehova i minangngilogo nga pakidiborsio.—Mal. 2:13-16.

16. Anni i kagian na Biblia meyannung ta diborsio anna paggungay?

¹⁶ Nituddu ni Jesus nga i rason laman tapenu likuran i tabba na pagatawa ay nu ari pakoman na inosente nga atawa i nakidallaw nga atawana. (Mat. 19:9; Heb. 13:4) Kunnasi gafu i meyannung ta pakigungay ta  atawa? Manawag gapa i Biblia meyannung taw. (Bibbigan i 1 Corinto 7:10, 11.) Awan tu kagian na Biblia meyannung ta rason na paggungay ta pagatawa. Ngem, egga ira i situasion nga imammatan na sigga-atawan ira nga Cristiano nga rason ta pakigungay, gittana grabe nga pappeligro na inango onu espiritualidad na tadday megafu ta minangngabuso onu apostata nga atawa. *

17. Kunnasi mabbalin tu mannanayun i pagatawa na Cristiano?

¹⁷ Nu umaranni i indibidual ta elder ira ta kongregasion tapenu makitabarang meyannung ta problema na magatawa, iyavu nakuan na elder ira nu nagiroda ngana i video nga Ano ang Tunay na Pag-ibig? anna nu napaguvovugadda ngana i brosiur nga Posible nga Magayayya i Familiam. Ngatta? Megafu ta ipagaram natun ira nga material i makadios ira nga prinsipio nga nakoffun ngana ta aru nga mapaladda i pagatawada. Kinagi na tadday nga magatawa: “Namegafu turi ta gigiammuammi yaw nga brosiur, mas nagayaya i pagatawami.” Kinagi na atawa nga babay meyannung ta 22-ragun nga paki-atawana nga maggi ngana mangultimo: “Parehu kami bawtisadu, ngem madduma kami ta emosion. Eksakto i lawanna yaw nga video! Mas makasta ngana i pagatawami.” Egga ngana kari atawam? Siguraduammu nga iyaplika i prinsipio ira ni Jehova ta pagatawa. Nu kuammu yatun, uffunannaka nga magayaya nga tuppalan i tabbam nga pagatawa!

18, 19. (a) Anni i kingngua na aru ta Cristiano ira nga magana? (b) Anni i makagi turi ta egga ira ta espesial nga ngamin-tiempo nga serbisio?

¹⁸ Ammum kari nu anni paga i naggittan da Jefte anna Hana? I tabbada dua ay narresulta ta pabbalin na ana nga babay ni Jefte anna ana nga lalaki ni Hana tu nededika ta sagrado nga serbisio ta tabernakulo. Kebalinanna yatun i pinakamagayaya nga klase na pattolay. Ta maddaggun, aru nga Cristiano nga magana i namagaram ta ánada nga masserbi bilang ngamin-tiempo anna isentro i pattoleda ta passerbi ta Dios. Danuri nangngua tatun ay mepangngo ta sinsero nga komendasion.—Uk. 11:40; Sal. 110:3.

¹⁹ Ta maddaggun, egga i ma-67,000 nga miembro na Worldwide Order of Special Full-Time Servants na Saksi ira ni Jehova. Masserbi i karuan nira ta Bethel, i karuan ta konstruksion onu ta panangngal tu sirkito, masserbi nga field instructor onu espesial nga payunir onu misionero onu servant ta Assembly Hall onu ta pasilidad na Bible school. Nakafirma ira tu “Vow of Obedience and Poverty,” nga umanugu ira nga kuan i maski anni nga meyasayn nira para ta papprogreso na interes na Pappatulan, mattolay tu simple, anna lillitan i sekular nga pattrabahu nga awan tu permisona. Ari tu i totolay i mebilang nga espesial, nu ari, i asaymentda. Nalippawada i kinaserioso na pattuppal segun ta napafutuan nga tabbada durante nga mattalupaddian ira ta ngamin-tiempo nga serbisio.

20. Anni nakuan i kuattam “kaggaggaw,” anna ngatta?

²⁰ Piga nga tabba ta ginigiammu tam i nitabbam ngana ta Dios—tadday, dua, onu ngamin i tallu? Siguradu nga nalippawamu nga ari tagilappawan danatun nga tabba. (Prov. 20:25) Madammo ira i resulta na ari pattuppal ta promesa anna tabba kani Jehova. (Ecl. 5:6) Yatutta magayaya ittam nga ‘ikansion i paddaya-rayaw ta Dios nga mangitavvung ta kaggaggaw ta netabbami nikaw.’—Sal. 61:8.