1. а) Йәфтаһ у Һанна чьда мина һәв бун? (Бьньһерʹә шькле әʹԝльн.) б) Әме ве готареда кʹижан пьрса шеԝьр кьн?

ЙӘФТАҺЕ һʹакьм у Һанна жьна Әлкана, һьнә тьштада мина һәв бун. Һәрдӧ жи мәрьвнә баш бун. Йәфтаһ сәроке ԛәԝи у әскәре мерхас бу. Һанна кʹӧлфәтәкә гӧһдар, мьлук у кәваникә баш бу. Әԝана һәрдӧ жи Хԝәдекирʹа хьзмәт дькьрьн. Ле диса һәбу тьштәк, чьда жи әԝана мина һәв бун. Ԝана һәрда жи бәр Хԝәде сонд хԝарьбун у бь амьни сонда хԝә анинә сери. Рʹасти жи ԝана мәсәләкә баш һишт бона ԝан, йед кӧ сафи дькьн бәр Йаһоԝа сонд бьхԝьн. Ле дәрһәԛа ве йәке пьрс пешда тен: Гәло чь те һʹәсабе сонд? Чьԛас фәрз ә кӧ әм бәр Хԝәде сонд дьхԝьн? У чь дәрсе әм жь Йәфтаһ у Һаннайе һин дьбьн?

2, 3. а) Чь те һʹәсабе сонд? б) Кʹьтеба Пироз чь дьбежә дәрһәԛа сонде кӧ бәр Хԝәде дьхԝьн?

² Хәбәра сонд кӧ Кʹьтеба Пирозда те хәбьтандьне, те һʹәсабе созе фәрз кӧ мәрьв дьдә Хԝәде. Мәсәлә, әв мәрьв соз дьдә Хԝәде, ԝәки ԝе фьлан тьшти бькә, ԛӧрбане йан жи пʹешкʹеше бинә, щурʹе хьзмәткьрьне дәстпекә, йан жи соз дьдә ԝәки һьнә тьшта ԝе тʹәрк бьдә. Мәрьв бь рʹәзәдьли у бь хԝәстьна хԝә сонде дьхԝә. Ле йәкә әԝ сонд бәр чʹәʹве Хԝәде пироз ә у ча пәйман ә. Әԝ мина ад-ԛьраре йә, демәк мәрьв Хԝәдерʹа соз дьдә, ԝәки әԝ ԝе фьлан тьшти бькә йан жи фьлан тьшти нәкә (Дәстп. 14:22, 23; Ибрн. 6:16, 17). Кʹьтеба Пироз дьдә кʹьфше, ԝәки сонда бәр Хԝәде тьштәки гәләк фәрз ә.

 ³ Ԛануна Мусада дьһатә готьне: «Гава мерәк ль бәр Хӧдан ад-ԛьрар бькә йан сонд бьхԝә . . . әԝ гәрә иди хәбәра хԝә нәтʹәрʹьбинә, ле һәр тьшт чь кӧ жь дәве ԝи дәркʹәтийә, гәрәке бинә сери» (Жьмар 30:2). Паше, Сьлеман жи бь рʹебәрийа Хԝәде әԝ гьли ньвиси: «Гава тӧ сонде бәр Хԝәде дьхԝи, паш нәхә ԝәки әве сонде бини сери, чьмки әԝ беаԛьла һʹьз накә. Тә чь сонд хԝарийә, бинә сери» (Ԝаиз 5:4, ДТʹ). Иса жи избат кьр кӧ гәләк фәрз ә сонда хԝә биньн сери. Әԝи гот: «Пешийарʹа һатийә готьне: ‹Дәрәԝ сонд нәхԝә у сонде хԝә ль бәр Хӧдан бинә сери›» (Мәт. 5:33).

4. а) Сонда бәр Хԝәде чьԛас фәрз ә? б) Әме чь шеԝьр кьн дәрһәԛа Йәфтаһ у Һаннайе?

⁴ Әшкәрә йә, кӧ чахе әм Хԝәдерʹа тьштәки соз дьдьн, әԝ йәк тьштәки бьчʹук нинә. Әԝ йәк кӧ әм ча сонда хԝә тиньн сери, һʹӧкӧм дькә сәр достийа мә тʹәви Йаһоԝа. Даԝьд ньвиси: «Кʹи дькарә һьлкʹьшә чʹийайе Йаһоԝа, кʹи дькарә һьлкʹьшә щийе ԝийи пироз? Йе . . . кӧ бь наве Мьн [Йаһоԝа] дәрәԝ сонд нәхԝарийә у сонда дәрәԝ нәдайә» (Зәб. 24:3, 4, ДТʹ). Ԝәрә әм шеԝьр кьн кӧ Йәфтаһ у Һаннайе чь сонд хԝарьн. Гәло ԝанрʹа һеса бу сонда хԝә биньн сери?

5. Йәфтаһ чь сонд хԝар, у ахьрийа сонде ԝи чь бу?

⁵ Аммонйа щьмәʹта Хԝәде дьзерʹандьн у чахе Йәфтаһ чу сәр ԝан шәрʹ, һьнге әԝи сонд хԝар бәр Йаһоԝа у сонда хԝә ани сери (Һʹакьм. 10:7-9). Йәфтаһ гәләк дьхԝәст ԝи шәрʹида сәркʹәта, у ләма әԝи бәр Хԝәде аһа сонд хԝар: «Һәгәр тӧйе . . . лаԝед Аммон, бьди дәсте мьн, де ԝе гаве ӧса бьбә кӧ, дәма әз бь сьламәтийе жь лаԝед Аммонва вәгәрʹьм, йе бона пергинийа мьн бькьн, жь дәрийед мала мьнва дәркʹәвә, ԝе бьбә йе Хӧдан». Паше чь ԛәԝьми? Йәфтаһ Аммонйа алт кьр, у чахе әԝ вәгәрʹийа мала хԝә, ԛиза ԝи дәркʹәтә пешийа ԝи. Демәк, һәма ԛиза ԝи, гәрәке бьбуйа йа «Хӧдан» (Һʹакьм. 11:30-34). Гәло бона ԛиза Йәфтаһ әԝ чь дьһатә һʹәсабе?

6. а) Чьрʹа нәһеса бу бона Йәфтаһ у ԛиза ԝи, сонда хԝә биньн сери? б) Жь рʹезед Ԛануна Дӧщари 23:21, 23 у Зәбур 15:4, чь дьле ԝә дьгьрә?

⁶ Ԛиза Йәфтаһ сәва сонда баве хԝә бинә сери, гәрәке һәртʹьм пирозгәһа Йаһоԝада хьзмәт кьра. Ле гәло Йәфтаһ беһʹәмде хԝә сонд хԝар? На, чьмки әԝи заньбу ԝәки дьԛәԝьмә йа пешийе ԛиза ԝи бә кӧ жь мал дәркʹәвә у бе пешийа ԝи. Йәкә Йәфтаһрʹа у ԛиза ԝирʹа гәләк чәтьн бу, чьмки әԝ йәк бона һәрда жи ԛӧрбанәкә мәзьн бу. Гава кӧ Йәфтаһ ԛиза хԝә дит, «кʹьнще хԝә чьрʹанд» у гот ԝәки дьле ԝи шкәст. Ԛиза ԝи жи «ԛизтийа хԝәрʹа» гьрийа. Гәло чьрʹа? Чьмки кӧрʹе Йәфтаһ тʹӧнә бу, ле ԛиза ԝи гәрәке тʹӧ щар мер нәкьра у нә жи зарʹ жерʹа бьбуна. Ләма жи наве Йәфтаһ ԝе жь малбәта ԝи бьһата һьлдане у мьлкʹе ԝи жи нәгьһишта тʹӧ кәси. Ле Йәфтаһ бона ԝан тьшта гәләк бинтәнг нәбу. Бона ԝи йа лапә фәрз әԝ бу, кӧ сонда хԝә бәр Хԝәде бинә сери. Әԝи гот: «Мьн жь Хӧданрʹа гот, иди әз нькарьм вәгәрʹьм». Ԛиза ԝи готә баве хԝә: «Чаԝа жь дәве тә дәркʹәтьбә, ӧса бькә» (Һʹакьм. 11:35-39). Бәле, Йәфтаһ у ԛиза ԝи мәрьвнә амьн бун. Чьԛас гьран жи сәр ԝан рʹуньшта, йәкә ԛә һʹьше ԝанрʹа жи дәрбаз нәдьбу, ԝәки созе хԝә кӧ ԝана Хԝәдейе Һәри Жорьнрʹа бьда, нәйньн сери. (Бьхунә Ԛануна Дӧщари 23:21, 23; Зәбур 15:4.)

7. а) Һаннайе чь сонд хԝар у чьрʹа, у әԝ сонд бона ԝе чь дьһатә һʹәсабе? б) Сонда Һаннайе бона Самуйел чь дьһатә һʹәсабе? (Бьньһерʹә спартьн.)

⁷ Һаннайе жи бь амьни сонда хԝә кӧ бәр Йаһоԝа хԝар, ани сери. Һанна безӧрʹәт бу у әԝ йәк бона ԝе дәрдәки гьран бу, чьмки  һәла һе сәрда жи әԝ беһӧрмәт дькьрьн кӧ нькарә зарʹа бинә (1 Сам. 1:4-7, 10, 16). Һанна дӧада дәрде хԝә Хԝәдерʹа гьли кьр, у бәр ԝи сонд хԝар: «Йа Хӧдане Артешан! Һәгәр бь рʹасти тӧ зәбунийа [кӧла] щарийа хԝә бьньһерʹә у мьн дь бира хԝәда бинә у һәгәр тӧ щарийа хԝә жь бир нәкә у лаԝәки бьдә щарийа хԝә, әзе дь тʹәмамийа рʹожед жийана хԝәда ԝи бьдьм Хӧдан у ԝе гузан сәре ԝива нәкʹәвә» * (1 Сам. 1:11). Хԝәде щаба дӧа-дьрозге ԝе да, у кӧрʹ жерʹа бу. Бьдьнә бәр чʹәʹве хԝә, дьле ԝе чьԛас ша дьбу! Ле Һаннайе сонда хԝә кӧ бәр Хԝәде дабу бир нәкьр. Гава кӧрʹ жерʹа бу, әԝе гот: «Ԝи жь Хӧданва хԝәстьм» (1 Сам. 1:20).

8. а) Чьрʹа Һаннайерʹа нә һеса бу сонда хԝә бинә сери? б) Ча гьлийед жь Зәбур 61, тиньн бира ԝә ньһерʹандьна Һаннайе?

⁸ Гава Самуйел бу ԝәкә се сали у һатә ширәвәкьрьне, Һаннайе чь кӧ сонд хԝарьбу бәр Хԝәде, һәма әԝ йәк жи кьр. Ԛә һʹьше ԝерʹа жи дәрбаз нәбу, ԝәки сонда хԝә нәйнә сери. Әԝе Самуйел бьрә кон, щәм Әли сәрәккʹаһин у жерʹа гот: «Бона ԝи лаԝьки дӧа кьрьм у хԝәстәка кӧ жь Хӧданва хԝәстьбум да мьн; мьн жи ԝи бь дийари да Хӧдан; дь тʹәмамийа рʹожед кӧ ԝе бьжи ԝе жь Хԝәдерʹа һатийә бь дийари кьрьн» (1 Сам. 1:24-28). Жь ԝи ԝәʹдәйи, «Самуйеле зарʹок ль бәр Хӧдан мәзьн бу» (1 Сам. 2:21). Ле бона Һаннайе әԝ чь дьһатә һʹәсабе? Һаннайе кӧрʹе хԝә ԛайим һʹьз дькьр у жерʹа һеса нибу жь ԝи бьԛәтә. Әԝе ида нькарьбу һәр рʹож кӧрʹе хԝә бьдита у бьчʹуктайа ԝида перʹа шабуйа. Бьдьн бәр чʹәʹве хԝә, кӧ әԝе ча дьхԝәст кӧрʹе хԝә ԛайим һʹәмез кьра у бьда бәр дьле хԝә, тʹәви ԝи бьлиста, ԝи һин кьра у ширәт кьра. Һәр дайикәкә ԛәнщ зарʹа хԝәрʹа ша дьбә, чахе дьвинә кӧ зарʹа ԝе ча мәзьн дьбә. Ле бьдьнә һʹәсабе хԝә ԝәки Һанна ԛә жь сонда хԝә пʹошман нәдьбу, чьмки дьле ԝе Йаһоԝарʹа ша дьбу (1 Сам. 2:1, 2; бьхунә Зәбур 61:1, 5, 8.)

9. Кʹижан пьрса әме шеԝьр кьн?

⁹ Бәле, фәʹмдари йә кӧ гәләк фәрз ә сонда хԝә бәр Хԝәде биньн сери. Ле ньһа ԝәрә әм шеԝьр кьн ԝан пьрса: Әм чаԝа Мәсиһи чь сонд, демәк чь соз дькарьн бьдьнә Хԝәде? У чьрʹа әм гәрәке әʹсә сондед хԝә биньн сери?

10. Кʹижан сонда лапә фәрз Мәсиһи дькарә бьдә, у әԝ сонд чь те һʹәсабе?

¹⁰ Сонда лапә фәрз кӧ Мәсиһи дькарә бьдә, әԝ һәйә сонда тʹәсмилбуйине. Ле чьрʹа әв сонд лапә фәрз ә? Чьмки Мәсиһи дӧайе хԝәда соз дьдә Йаһоԝа ԝәки чь жи бьԛәԝьмә, йәкә әԝ ԝе һʹәта-һʹәтайе Хԝәдерʹа хьзмәт бькә. Чаԝа кӧ Иса гот, әԝ мәрьв «хԝә инкʹар» дькә, демәк әԝ ида бона хԝә нажи, у сонд дьхԝә бәр Хԝәде ԝәки әʹмьре хԝәда ԛьрара ԝи сәр һʹәму тьштирʹа бьгьрә (Мәт. 16:24). Жь ԝи ԝәʹдәйи, әԝ Мәсиһи дьбә «пʹара» Йаһоԝа (Рʹом. 14:8). Һәр кәсе кӧ сонд дьхԝә ԝәки хԝә тʹәсмили Хԝәде дькә, гәрәке сьвьк нәньһерʹә сәр ве йәке. Ве йәкеда зәбурбеж мәсәләкә гәләк баш ә. Әԝи гот: «Әз чь бьдьмә Хӧдан, бона тʹәмамийа ԛәнщийа Ԝийә сәр мьн? Ад-ԛьраред мьн бәр Хӧдан кьри, әзе ль бәр щьмәʹта Ԝи биньм сери» (Зәб. 116:12, 14).

11. Тә рʹожа ньхӧмандьна хԝә чь зәлал да кʹьфше?

¹¹ Һәрге тә ида әʹмьре хԝә тʹәсмили Йаһоԝа кьрийә у һати ньхӧмандьне, әԝ йәк гәләк баш ә. Бинә бира хԝә рʹожа ньхӧмандьна хԝә. Бьра бәр гәләк шәʹда пьрс да, һәла тә хԝә тʹәсмили Йаһоԝа кьрийә у тӧ фәʹм дьки кӧ «тʹәсмилбуйин у ньхӧмандьна тә, дьдьнә кʹьфше кӧ тӧ ида Шәʹде Йаһоԝа йи у тейи гьредане тʹәви  тʹәшкиләта Йаһоԝа, йе кӧ бь рʹӧһʹе пироз те рʹебәрикьрьне». Щабед тә сәр ԝан пьрса, зәлал избат кьрьн ԝәки тә хԝә бь тʹәмами тʹәсмили Хԝәде кьрийә у нишан кьрийә кӧ тӧ һазьр и бейи ньхӧмандьне у бьби хьзмәткʹаре Йаһоԝа. Бәле, ве рʹоже тә гәләк дьле Йаһоԝа ша кьр!

12. а) Әм гәрәке кʹижан пьрса бьдьнә хԝә? б) Ль гора гьлийед Пәтрус, әм гәрәке нав хԝәда кʹижан һʹӧнӧра пешда биньн?

¹² Ньхӧмандьн дәстпека әʹмьре Мәсиһи йә. Паши ньхӧмандьне, әм дьжин ль гора тʹәсмилбуйина хԝә, демәк бь амьни Хԝәдерʹа хьзмәт дькьн. Ле ԝе баш бә щара әм пьрсед ӧса бьдьнә хԝә: «Гәло паши ньхӧмандьне әз рʹӧһʹанида пешда чумә йан на? Гәло әз бәрдәԝам дькьм бь дьл у щан Йаһоԝарʹа хьзмәт кьм? (Колс. 3:23) Гәло әз тʹьме дӧа дькьм, Хәбәра Хԝәде дьхуньм, дьчьмә щьвате у хьзмәтийе? Йан дьԛәԝьмә әз ида ча бәре хирәт ниньм?» Пәтрусе шанди шьровәкьр кӧ сәва әм хирәта хԝә хьзмәтийеда ӧнда нәкьн, лазьм ә тʹьме баԝәри, занәбун, сәбьр у амьнийа хԝә зедә кьн. (Бьхунә 2 Пәтрус 1:5-8.)

13. Мәсиһийе кӧ хԝә тʹәсмили Хԝәде кьрийә у һатийә ньхӧмандьне, гәрәке чь фәʹм бькә?

¹³ Әм нькарьн сонда хԝәйә тʹәсмилбуйине, демәк созе хԝә кӧ мә дабу Хԝәде,  пашда һьлдьн. Һәрге кәсәк ида нахԝазә Йаһоԝарʹа хьзмәт кә у пе ԛанунед ԝи бьжи, әԝ нькарә бежә кӧ әԝи тʹӧ щар бь рʹастийе хԝә тʹәсмили Хԝәде нәкьрийә, йан жи ԝәки ньхӧмандьна ԝи нәһатийә һʹәсабе, демәк бәтал бу. * Чьмки әԝи мәрьви һʹәмде хԝә у хԝәстьна хԝә, бәр шәʹда әʹйан кьр, кӧ әԝи бь тʹәмами хԝә тʹәсмили Хԝәде кьрийә. У һәрге әԝ мәрьв гӧнед мәзьн бькә, әԝ бәр Йаһоԝа у бәр щьвате ԝе щаба хԝә бьдә (Рʹом. 14:12). Ԝәрә алийе хԝәда һʹәму тьшти бькьн, сәва Иса мәрʹа нәбежә кӧ мә һʹьзкьрьна хԝәйә пешийе ӧнда кьрийә. Бәле әм дьхԝазьн ԝәки Иса әван гьлийа мәрʹа бежә: «Әз һаш жь кьред тә, һʹьзкьрьна тә, баԝәрийа тә, хьзмәткʹари у сәбьра тә һәмә. Әз заньм кӧ кьред тәйә пашԝәхтийе жь йед пешийе зедәтьр ьн» (Әʹйан. 2:4, 19). Ԝәрә әм һәртʹьм бь хирәт ль гора тʹәсмилбуйина хԝә бьжин у дьле Йаһоԝа ша кьн.

14. Кʹижан сонда дӧда йа фәрз мәрьв дькарә бьдә, у чьрʹа әв сонд жи гәләк фәрз ә?

¹⁴ Сонда фәрз йа дӧда, әԝ һәйә сонда зәԝаще. Гәло чьрʹа әԝ сонд жи гәләк фәрз ә? Чьмки бәр чʹәʹве Хԝәде зәԝащ пироз ә. Бук у зәʹԝа һьн бәр Хԝәде у һьн бәр шәʹда сонда зәԝаще дьхԝьн. Әԝана соз дьдьнә һәв ԝәки һәвдӧ һʹьз бькьн, хәм бькьн у ԛәдьре һәв бьгьрьн. Әԝана сонд дьхԝьн кӧ әԝе йәке бькьн «һʹәта кӧ бьжин сәр әʹрде, ль гора ԛануна Хԝәде кӧ әԝи бона зәԝаще дани». Мәрьвед дьн йед кӧ зәԝьщи нә, дьбәкә һәма әв гьли нәготьнә, ле йәкә ԝана жи бәр Хԝәде сонд хԝарьнә. Паши ве сонде, әԝана бунә мер у жьне һәв у зәԝаща ԝан һʹәта-һʹәтайе ԝана һәвва гьредьдә (Дәстп. 2:24; 1 Корн. 7:39). Чаԝа Иса гот, «әԝед кӧ Хԝәде әԝ кьрьнә йәк, бьра мәрьв ԝан жь һәвдӧ нәԛәтинә», нә мер, нә жьн, нә жи кәсәки дьн. Бона ве йәке, әԝед кӧ дьзәԝьщьн гәрәке ԛә нә жи бьфькьрьн ԝәки һәвԛәтандьн чʹарәке дькә (Марԛ. 10:9).

15. Чьрʹа Мәсиһи гәрәке мина ве дьнйайе сьвьк сәр зәԝаще нәньһерʹьн?

¹⁵ Зәԝаща бекемаси тʹӧнә йә, чьмки әԝ жь һәрдӧ мәрьвед гӧнәкʹар саз дьбә. Ләма Кʹьтеба Пирозда те готьне ԝәки мер у жьн зәԝащеда ԝе «рʹасти охьрмед гьран бен» (1 Корн. 7:28). Йазьх, ле ве дьнйайеда сәр зәԝаще гәләк сьвьк дьньһерʹьн. Чахе һәләԛәти ортʹа мер у жьнда сар дьбә, әԝана тьштәки накьн сәва зәԝаще хԝәй кьн, у ләма жь һәв дьԛәтьн. Ле Мәсиһи гәрәке сәр зәԝаще ӧса нәньһерʹьн. Әԝана фәʹм дькьн кӧ һәрге әԝана сонда зәԝаще нәйньн сери, әԝ бәр чʹәʹве Хԝәде ԝәкә дәрәԝийе йә, ле Хԝәде мәрьвед дәрәԝ нәфрʹәт дькә! (Ԛан. Кʹаһ. 19:12; Мәтʹлк. 6:16-19) Паԝлосе шанди ньвиси: «Жьнева гьредайи йи? Нәкә кӧ же бьԛәти» (1 Корн. 7:27). Паԝлос әԝ йәк гот, чьмки заньбу ԝәки Йаһоԝа ӧса жи нәфрʹәт дькә чахе мәрьв һʹәмде хԝә ԛәлпийе дькә, сәва жьн йан мере хԝә бьԛәтә (Малх. 2:13-16).

16. Кʹьтеба Пироз чь дьбежә дәрһәԛа һәвԛәтандьне у башԛәжитьне?

¹⁶ Иса гот ԝәки сәр һʹиме Ньвисара тʹәне мәʹник һәйә, кʹижан кӧ изьне дьдә мәрьв сонда зәԝаще бьтʹәрʹьбинә. Мәʹни әԝ ә, чахе мәрьв ԛавийа жьн йан мере хԝә набахшинә (Мәт. 19:9; Ибрн. 13:4). Ле дәрһәԛа башԛәжитьне жи Кʹьтеба Пироз зәлал әʹйан дькә. (Бьхунә 1 Корьнтʹи 7:10, 11). Бь рʹастийе Кʹьтеба Пирозда найе готьне чь мәʹни һәнә ԝәки мер у жьн башԛә бьжин. Йәкә, һьнә Мәсиһи чәнд дәрәща һʹәсаб дькьн ча мәʹни бона башԛәжитьне. Мәсәлә, һәрге йәк алийе  физикида ԛайим зийане дьдә жьн йан мере хԝә, йан жи наһелә ԝәки әԝ Хԝәдерʹа хьзмәт кә. *

17. Жьн у мер кӧ Мәсиһи нә, ча дькарьн зәԝаща хԝә ԛәԝи кьн?

¹⁷ Щара хушк-бьра незики рʹуспийа дьбьн сәва ширәте жь ԝан һьлдьн, чьмки зәԝаща ԝанда чәтьнайи һәнә. Ԝе баш бә һәрге рʹуспи ԝана һелан кьн кӧ бьньһерʹьн филм бь наве «Гәло Һʹьзкьрьна Рʹаст Чь йә?», у ӧса жи шеԝьр кьн брошура «Малбәта Ԝә Дькарә Бәхтәԝар бә». Ве филмеда у брошуреда, принсипед Хԝәде әʹйан тенә кʹьфше, кʹижана кӧ али гәләка кьрьнә зәԝаща хԝә ԛәԝи кьн. Мер у жьнәке гьли кьрьн: «Гава мә дәстпекьр әве брошуре леколин бькьн, һьнгеда әм зәԝаща хԝәда ӧса бәхтәԝар ьн, кӧ тʹӧ щар ӧса нибунә». Кʹӧлфәтәк жи кʹижан ида 22 сал ә меркьри йә, гьли кьр ԝәки һьнәк мабу әԝ у мере хԝә жь һәв бьԛәтийана. Әԝе гот: «Әм һәрдӧ жи ньхӧманди нә, ле алийе емосйалида әм жь һәв гәләк щӧдә дьбун. Әв видео-филм һәма ԝәʹдәда дәркʹәт! Ньһа әм ида ча мер у жьн чьԛас дьчә һәврʹа незик дьбьн». Һәрге тӧ зәԝьщи йи йан меркьри йи, зәԝаща хԝәда тʹьме принсипед Йаһоԝа бьдә хәбате. Әԝ йәк ԝе али тә бькә ԝәки бь шабуне сонда хԝәйә зәԝаще бини сери!

18, 19. а) Гәләк де-бав кӧ Мәсиһи нә, чь һелане дьдьнә зарʹед хԝә? б) Әԝед кӧ хьзмәт дькьн ча ԛӧльхкʹаред мәхсусә һәртʹьм, чь сонд дьхԝьн?

¹⁸ Ԝә тʹәхмин кьр кӧ Йәфтаһ у Һанна диса чьда мина һәв бун? Әԝ сонда ԝан мәщал да ԛиза Йәфтаһ у кӧрʹе Һаннайе, ԝәки конда бь тʹәмами тʹәсмили хьзмәтийа мәхсус у пироз бьн. Әԝ те һʹәсабе ԝәки ԝана әʹмьре хԝә шабунеда у бәхтәԝар дәрбаз кьрьн. Иро гәләк де-бав кӧ Мәсиһи нә, һелане дьдьнә зарʹед хԝә ԝәки дәстпекьн хьзмәтийа һәртʹьм у әʹмьре хԝәда хьзмәтийа Хԝәдерʹа дайньн щийе әʹԝльн. Зарʹед кӧ ве йәкеда гӧһ данә де-бавед хԝә у дәстпекьрьнә хьзмәтийа һәртʹьм, рʹасти жи һежайи пʹайа нә (Һʹакьм. 11:40; Зәб. 110:3).

¹⁹ Ньһа бь офисйал ԝәкә 67 000 хьзмәткʹар, әндәмед Ордена Һʹәмдьнйайе йа Ԛӧльхкʹаред Мәхсусә Һәртʹьм йа Шәʹдед Йаһоԝа нә. Һьнәк Бәйтʹәледа хьзмәт дькьн, һьнәк авакьрьнеда аликʹарийе дьдьн йан жи ча бәрпьрсийар хьзмәт дькьн, һьнәк жи дәрсдаред мәкʹтәбед тʹәшкиләте нә. Ӧса жи һәнә пешәнгед мәхсус, мисйонер, у хьзмәткʹаред кӧ мьԛати Одед Щьвата йан жи ԝан авайа дьбьн кʹидәре кӧ мәкʹтәбед мә дәрбаз дьбьн. Әԝана һʹәмушк жи «Сонда Гӧһдарибуне у Кʹәсиббуне» хԝарьнә. Әԝ сонд те һʹәсабе ԝәки әԝана бона пешдачуйина шьхӧле Пʹадшатийе һазьр ьн бькьн һәр шьхӧли кӧ ԝанрʹа бьдьн. Һьн жи бь ԝе сонде ԝана да кʹьфше ԝәки ԛайил ьн бь әʹмьре нәдәԝләти бьжин, у бей изьн хԝәрʹа башԛә нәхәбьтьн. Әԝ хьзмәткʹар мәхсус ниньн, ле шьхӧлед кӧ әԝана дькьн мәхсус ьн. Әԝана фәʹм дькьн ԝәки һʹәта кӧ әԝана ча ԛӧльхкʹаред мәхсусә һәртʹьм хьзмәт бькьн, гәләк фәрз ә хԝәйе сонда хԝә бьн.

20. Әм гәрәке һәр рʹож чь бькьн у чьрʹа?

²⁰ Жь ԝан се сонда кӧ мә шеԝьр кьр, ԝә кʹижан соз дайә Хԝәде? Бәле, әм заньн ԝәки сәр сондед хԝә гәрәке сьвьк нәньһерʹьн (Мәтʹлк. 20:25). Һәрге әм бәр Йаһоԝа хԝәйе гьлийед хԝә у сонде хԝә нибьн, әԝ йәк дькарә ахьрийа хьраб мәрʹа бинә (Ԝаиз 5:6). Ләма жи ԝәрә әм һʹәта-һʹәтайе бь әшԛи наве Йаһоԝа бьстьрен у һәр рʹож сондед хԝә биньн сери (Зәб. 61:8).