1. a) Yefeta ne Hana bavua benze bualu kayi bua muomumue? (Tangila tshimfuanyi tshia ntuadijilu tshia tshiena-bualu.) b) Nkonko kayi ituandamuna mu tshiena-bualu etshi?

YEFETA uvua mulombodi ne muluanganyi wa mvita wa dikima. Hana uvua mukaji muena budipuekeshi uvua utabalela bayende ne nzubu wende. Bonso buabu bavua batendelela Yehowa. Kadi bavua kabidi ne bualu bua muomumue buvuabu benze. Yefeta ne Hana bakaditshipa kudi Yehowa, ne buonso buabu bakakumbaja mutshipu wabu ne lulamatu luonso. Mbilejilu bitambe buimpe bua balume ne bakaji ba lelu badi basungula bua kuditshipa kudi Yehowa. Tuandamunayi mpindieu nkonko isatu eyi: Mutshipu ntshinyi? Bua tshinyi kuditshipa kudi Nzambi ki mbualu bua bilele? Tshilejilu tshia Yefeta ne Hana tshidi tshitulongesha tshinyi?

2, 3. a) Mutshipu ntshinyi? b) Ntshinyi tshidi Mifundu minsantu yamba bua mitshipu itudi tuenza kudi Nzambi?

² Mu Bible, mutshipu ndilaya dia mushinga mukole ditudi tuenza kudi Nzambi. Tshilejilu muntu udi mua kulaya Yehowa ne: neenze bualu kampanda, neafile dipa kansanga, neenze mudimu kampanda anyi kulaya bua kubenga kuenza amue malu. Mutshipu batu bawenza ku budisuile ku diambuluisha dia budikadidi bua kudisunguila malu. Kabatu benzeja muntu bua kuditshipa to. Kadi padi muntu usungula bua kuditshipa, Yehowa udi umona mutshipu wende bu dilaya dia mushinga mukole didiye ne bua kunemeka ne kukumbaja. Mu Bible mutshipu mmêyi adi muntu wamba, ulaya bua kuenza bualu kampanda anyi kubenga kubuenza.  (Genese 14:22, 23; Ebelu 6:16, 17) Ntshinyi tshidi Bible wamba bua mushinga udi nawu mitshipu itudi tuenza kudi Nzambi?

³ Badi bamba mu Mikenji ya Mose ne: muntu yeye muenze mutshipu kudi Yehowa ‘kena mua kulekela dîyi diende; yeye neenze mêyi onso akalupuka mukana muende.’ (Nomba 30:2) Panyima pa matuku Solomo wakafunda ne: ‘Dîba dionso diudi wenza mutshipu kudi Nzambi, kujanguluki bua kuwukumbaja to, bualu yeye kena usanka bua bantu batatakane. Mutshipu uudi muditshipe, uwukumbaje.’ (Muambi 5:4, NWT) Yezu wakalongesha ne: mutshipu utudi tuditshipa kudi Nzambi ki mbualu bua bilele pakambaye ne: bavua “bambile bantu ba kale ne: ‘Kuditshipi patupu kuyi ukumbaja, kadi udi ne bua kukumbaja biwakalaya Yehowa.’”​—Matayi 5:33.

4. a) Bua tshinyi kuenza mitshipu kudi Nzambi ki mbualu bua bilele? b) Tshilejilu tshia Yefeta ne Hana tshidi mua kutulongesha tshinyi?

⁴ Mbiumvuike ne: katuena ne bua kuangata mulayi wonso utudi tuenza kudi Yehowa bu bualu bua bilele to. Mushindu utudi tumona mitshipu yetu udi ne buenzeji mu malanda etu ne Nzambi. Davidi wakaleja bualu ebu patoke pakakonkaye ne: ‘Wabanda mukuna wa Yehowa nnganyi? Wimana mu muaba wende wa tshijila nnganyi?’ Pashishe wakandamuna pakambaye ne: Yehowa neitabe muntu yonso ‘udi kayi muditshipe mitshipu bua kudingaye nayi.’ (Misambu 24:3, 4) Yefeta ne Hana bavua baditshipe bua kuenza tshinyi? Bivuaku bipepele bua kukumbajabu mitshipu yabu anyi?

5. Mmutshipu kayi uvua Yefeta muenze? Mbipeta kayi biakamueneka?

⁵ Yefeta wakenza mutshipu kudi Yehowa pakavuaye ukeba kuluangana ne bena Amona. Tshisamba etshi tshivua tshiluisha bantu ba Nzambi. (Balumbuluishi 10:7-9) Yefeta wakalomba Yehowa bua atshimune mvita, ne wakaditshipa wamba ne: ‘Biwafila bena Amona mu tshianza tshianyi, pashishe tshionso tshidi tshilupuka ku biibi bia nzubu wanyi bua kusambakena nanyi, pangapingana kudi bena Amona ne ditalala, netshikale tshia Yehowa.’ Nzambi wakandamuna disambila dia Yefeta ne wakamuambuluisha bua kutshimuna mvita. Pakapingana Yefeta kuende, muanende wa bakaji uvuaye munange bikole ke wakapatuka bua kusambakena nende. Yeye ke uvua ne bua kulua tshintu “tshia Yehowa.” (Balumbuluishi 11:30-34) Mutshipu au uvua umulomba bua kuenza tshinyi?

6. a) Bua tshinyi bivua bipepele bua Yefeta ne muanende wa bakaji kukumbajabu mutshipu wabu kudi Nzambi? b) Ndilongesha kayi ditudi tupeta bua mitshipu idi mu Dutelonome 23:21, 23 ne mu Misambu 15:4?

⁶ Muana wa bakaji wa Yefeta uvua ne bua kuya kuenzela Yehowa mudimu wa ku dîba ne ku dîba ku ntenta wa tshitendelelu bua kukumbaja mutshipu wa tatuende. Yefeta uvua muenze mutshipu eu kayi muele meji anyi? Tòo. Kadi Yefeta uvua pamuapa mumanye ne: muanende wa bakaji ke muntu wa kumpala uvua mua kulua bua kusambakena nende. Kadi nansha yeye mumanye anyi kayi mumanye, kukumbaja mutshipu uvuaye muditshipe kudi Yehowa kakuvua bualu bupepele buende yeye ne bua muanende wa bakaji to. Pakamumona Yefeta, wakamba ne: mutshima wende wakanyingalala bikole. Muanende wakaya bua ‘kujinga matuku ende a bukamama.’ Bua tshinyi? Yefeta kavua mulele muana wa balume to, mpindieu wende wa bakaji umue eu kakusedibua ne kulela to. Dîna dia dîku dia Yefeta divua ne bua kujimina. Kadi Yefeta ne muanende wa bakaji bakajingulula ne: kuvua bualu bua mushinga mukole kupita meji avuabu bela. Yefeta wakamba ne: ‘Meme ngakabulula mukana muanyi kudi Yehowa, tshiena mua kualukila ku nyima.’ Muanende wa bakaji wakamba ne: ‘Ungenzele bu mudi dîyi diakapatuka mukana muebe.’ (Balumbuluishi 11:35-39) Yefeta ne muanende wa bakaji bavua bantu ba lulamatu bavua kabayi mua kuela meji a kunyanga mutshipu wabu kudi Nzambi  musangu nansha umue, nansha muvuabi bibakolele bua kuwukumbaja.​—Bala Dutelonome 23:21, 23; Misambu 15:4.

7. a) Mmutshipu kayi uvua Hana muenze? Bua tshinyi? Mmunyi muakakumbana mutshipu wende au? b) Mutshipu uvua Hana muenze uvua umvuija tshinyi bua Samuele? (Tangila note.)

⁷ Hana pende wakenza mutshipu kudi Yehowa mu tshikondo tshia kanyinganyinga kakole mu nsombelu wende. Uvua ne kanyinganyinga kakole bualu kavua mua kulela to, ne bavua bamutatshisha ne bamupenda bua bualu abu. (1 Samuele 1:4-7, 10, 16) Wakambila Yehowa muvuaye udiumvua, kumulayaye ne: ‘Yehowa, biwatangila kunyingalala kua muntu webe mukaji, biwamvuluka, biwikala kuyi upua muntu webe mukaji muoyo, kadi biwapa muntu webe mukaji muana mulume, meme nemmufile kudi Yehowa matuku ende onso a muoyo wende: kapaya kakena kabeya mutu wende.’ * (Tangila note.) (1 Samuele 1:11) Yehowa wakateleja disambila dia Hana, tshidimu tshiakalonda kulelaye muana wa balume, Samuele. Hana wakasanka bikole! Kadi kavua mupue mutshipu uvuaye muenze kudi Nzambi muoyo to. Pakalelaye muana eu, wakamba ne: ‘Ngakumulomba kudi Yehowa.’​—1 Samuele 1:20.

8. a) Bivuaku bipepele bua Hana kukumbajaye mutshipu wende anyi? b) Mmunyi mudi Musambu wa 61 ukuvuluija tshilejilu tshimpe tshia Hana?

⁸ Pakakumbaja Samuele bidimu bitue ku bisatu, Hana wakenza anu muvuaye mulaye Yehowa. Wakaya ne Samuele kudi Eli, Muakuidi munene uvua ku ntenta wa tshitendelelu mu Shilo, kuambaye ne: ‘Ngakamulomba muana eu, ne Yehowa wakamana kumpa kulomba kuanyi kungakamulomba: nunku ngakamupingaja kudi Yehowa; ngakumufila kudi Yehowa matuku onso adiye ne muoyo. Yeye wakatendelelaku Yehowa.’ (1 Samuele 1:24-28) Kutuadijila dîba adi, Samuele wakasombela ku ntenta wa tshitendelelu. Bible udi wamba ne: ‘Muana eu Samuele wakadiunda ku mêsu kua Yehowa.’ (1 Samuele 2:21) Kabivua mua kuikala bipepele bua Hana kukumbajaye mutshipu wende to. Bualu kavua mua kupeta mushindu wa kusomba dituku dionso ne muanende wa mushinga mukole uvuaye munange eu to. Uvua ne bua kupanga kumona muvua muanende wenda ukola. Kadi Hana kavua muangate mutshipu uvuaye muenze kudi Yehowa bu bualu bua bilele to. Wakitaba bua kudipangisha malu a bungi avua ne mushinga kudiye bua kukumbaja mutshipu wende kudi Nzambi.​—1 Samuele 2:1, 2; bala Misambu 61:1, 5, 8.

9. Nkonko kayi ituandamuna?

⁹ Bu mutudi bumvue mpindieu ne: kuenza mutshipu kudi Yehowa ki mbualu bua bilele, tuandamunayi nkonko eyi: Mmitshipu kayi itudi ne bua kuenza lelu? Mmunyi mutudi mua kudisuika bua kukumbaja mitshipu eyi?

10. Mmutshipu kayi munene udi muena Kristo mua kuenza? Udi umvuija tshinyi?

¹⁰ Mutshipu munene udi muena Kristo mua kuenza ngua kulambula muoyo wende kudi Yehowa. Muntu udi ulaya mu disambila dia pa nkayende bua kuenzela Nzambi mudimu mu nsombelu wende bua kashidi nansha bualu kayi mua kumufikila. Yezu wakamba ne: ‘Tudibenge,’ mbuena kuamba ne: tudi tulaya bua kuteka Yehowa pa muaba wa kumpala kadi ki ntuetu to. (Matayi 16:24) Nunku kubangila anu dituku adi, “tudi bantu ba Yehowa.” (Lomo 14:8) Katuena tuangata didilambula dietu bu bualu bua bilele to. Tudi tudiumvua anu bu mufundi wa misambu wakamba ne: ‘Nempingajile Yehowa tshinyi bua malu ende mimpe onso akungenzelaye? Nemmane mitshipu yanyi kudi Yehowa; bulelela, nenyimane ku mêsu kua bantu bende bonso.’​—Misambu 116:12, 14.

11. Ntshinyi tshiakenzeka dituku diwakatambula?

¹¹ Ukadi mulambule muoyo webe kudi Yehowa ne muleje kuditshipa kuebe patoke pa kutambula mu mâyi anyi? Biobi nanku, mbualu buimpe  be! Udiku uvuluka pavua muanetu uvua wenza muyuki wa batismo muebeje biwikala ukadi mudilambule kudi Yehowa ne mumvue ne: “Didilambula diebe kudi Nzambi ne batismo webe bidi bikuvuija Ntemu wa Yehowa” anyi? Pawakandamuna ne: eyowa, bantu bonso bavua muaba au bakamanya ne: ukavua mudilambule ne mukumbane bua kutambula bua kulua muena mudimu wa Nzambi udi Yehowa muanyishe bua kudisangisha ne bantu bende. Uvua musankishe Yehowa bikole!

12. a) Nkonko kayi utudi ne bua kudiela? b) Nngikadilu kayi idi Petelo mutukankamije bua kupeta?

¹² Pawakatambula wakalaya Yehowa ne: neumuenzele mudimu mu nsombelu webe, ne newenze tshionso tshidi tshikegela kuenza bua kutumikila mikenji yende. Kadi batismo ntuadijilu patupu. Mu kupita kua matuku, tuetu bonso tudi ne bua kutungunuka ne kudikonkonona. Tudi mua kudiebeja ne: ‘Katshia ngatambula, malanda anyi ne Yehowa adi enda akola anyi? Ntshidi anu mmuenzela mudimu ne muoyo wanyi wonso anyi? (Kolosayi 3:23) Ntuku ne tshibidilu tshia kusambila anyi? Ntuku mbala Bible dituku dionso anyi? Ntuku mbuela mu bisangilu lumingu luonso anyi? Ntuku ne tshibidilu tshia kuyisha padiku mushindu anyi? Peshi nkadi mujimije disanka dianyi bua midimu eyi anyi?’ Mupostolo Petelo wakatudimuija ne: kudi njiwu, mmumue  ne: tulekela kuenzela Yehowa mudimu. Tudi mua kuepuka bualu ebu tuetu tudienzeja bikole bua kukolesha ditabuja dietu, kuvudija dimanya, dinanukila ne dilamata Nzambi.​—Bala 2 Petelo 1:5-8.

13. Ntshinyi tshidi muena Kristo udi mudilambule ne mutambule ne bua kumanya?

¹³ Patukadi benze mutshipu wa kuenzela Yehowa mudimu, ki mbimpe kualukila tshianyima to. Muntu udi ulekela kuenzela Yehowa mudimu anyi ulekela nsombelu wa buena Kristo kena ne bua kuamba pashishe ne: kavua muanji kuikala pabuipi bua kudilambula kudi Nzambi, anyi ne: batismo wende kavua mukumbane to. * (Tangila note.) Muntu udi mudilambule kudi Yehowa yeye muenze mpekatu munene, udi udiambuila bujitu buende kumpala kua Yehowa ne kua tshisumbu. (Lomo 14:12) Katuena basue musangu nansha umue kuikala bu bantu bavua Yezu muambe ne: “Udi mulekele dinanga diuvua nadi kumpala” to. Kadi tudi basue bua ambe buetu tuetu ne: “Ndi mumanye bienzedi biebe ne dinanga diebe ne ditabuja diebe ne mudimu webe ne dinanukila diebe; ndi mumanye kabidi ne: bienzedi biebe bia mpindieu mbipite bia kale.” (Buakabuluibua 2:4, 19) Tudi basue kusankisha Yehowa patudi tuenza malu mu diumvuangana ne didilambula dietu.

14. Mmutshipu kayi munene muibidi udi muntu mua kuenza? Bua tshinyi?

¹⁴ Mutshipu munene muibidi udi muntu mua kuenza ngua dibaka. Dibaka ntshintu tshia tshijila. Ku mêsu kua Yehowa mutshipu wa dibaka ki mbualu bua bilele to. Padi mulume ne mukaji benza mitshipu yabu, badi bayenza kumpala kua Yehowa ne kua bantu badi muaba au. Pa tshibidilu batu balayangana bua kunangangana, kutabalelangana ne kunemekangana matuku onso asombabu pa buloba apa mu dibaka mushindu udi Nzambi mudilongolole. Bantu bakuabu badi mua kubenga kuamba mêyi aa anu mudiwu emu, kadi tshibi badi benza anu mutshipu kumpala kua Nzambi. Padibu benza mitshipu eyi, badi balua mulume ne mukaji. Dibaka ndienza bua kusomba pamue bua kashidi. (Genese 2:24; 1 Kolinto 7:39) Yezu wakamba ne: “Muntu kapanduludi tshidi Nzambi mulamakaje kaba kamue.” Bena dibaka badi baselangana kabena ne bua kuela meji ne: bobu bapete bilumbu mu dibaka diabu, badi anu ne bua kudishipa to.​—Mâko 10:9.

15. Bua tshinyi bena Kristo kabena ne bua kumona dibaka bu bantu ba mu buloba ebu?

¹⁵ Bulelela, bu mudiku kakuyi bantu badi bapuangane, kakuena mabaka mapuangane to. Ke bua tshinyi Bible udi utuambila ne: muena dibaka yonso ‘neikale ne makenga’ bimue bikondo. (1 Kolinto 7:28) Pa buloba lelu, bantu badi ne mmuenenu mubi bua dibaka. Buabu bobu, malu wowu kaayi enda bimpe mu dibaka badi anu mua kudishipa. Kadi ki mmudi bena Kristo bamona dibaka to. Mbamanye ne: bavua benze mutshipu wabu kumpala kua Nzambi. Bobu banyange mutshipu au, nebimueneke anu bu ne: bavua bashima Nzambi, pabi Nzambi mmukine bena mashimi. (Lewitiki 19:12; Nsumuinu 6:16-19) Bena Kristo badi baselangane badi ne bua kuvuluka mêyi a mupostolo Paulo aa: “Udi musuikakaja kudi mukaji anyi? Lekela kukeba bua kusuluka kudiye.” (1 Kolinto 7:27) Paulo mmuambe nanku bualu mmumanye ne: Yehowa mmukine kabidi badi bashipa dibaka.​—Malaki 2:13-16.

16. Ntshinyi tshidi Bible wamba bua dishipa dia dibaka ne diabulukangana?

¹⁶ Yezu wakalongesha ne: dibaka didi mua kufua anu bua kabingila kadi Bible ufila ka ne: anu muena dibaka yeye muende masandi, ne muena dibaka mukuabu udibu benzele bibi mubenge kumufuila luse. (Matayi 19:9; Ebelu 13:4) Kadi netuambe tshinyi bua diabulukangana dia mulume ne mukaji? Bible udi uleja kabidi malu patoke bua tshilumbu etshi. (Bala 1 Kolinto 7:10, 11.)  Kakuena kabingila ka mu Bible kadi mua kusaka bena dibaka bua kuabulukangana to. Kadi kudi mua kuikala nsombelu idi muena Kristo mua kudimona muenzejibue bua kuabulukangana ne muena dibaka nende. Tshilejilu, bamue badi mua kumona ne: muoyo wabu anyi malanda abu ne Yehowa adi mu njiwu mikole menemene bobu bashale ne muena dibaka nabu udi ne tshikisu anyi udi mutontolodi. * (Tangila note.)

17. Ntshinyi tshidi bena Kristo badi mu dibaka mua kuenza bua dibaka diabu kushaladi kashidi?

¹⁷ Bena dibaka bobu baya kulomba bakulu mibelu bua kuakaja amue malu mu dibaka diabu, bakulu badi ne bua kuebeja bena dibaka bua kumaya ni bakavua batangile filme wa ne: Qu’est-ce que le véritable amour? ne balonge broshire wa Dîku diebe didi mua kupeta disanka. Bintu ebi bidi bitamba kuakula bua mêyi manene a mu Bible adi mua kuenza bua dibaka kushindama. Bena dibaka kampanda bakamba ne: “Katshia tualonga broshire eu, tudi mpindieu ne disanka mu dibaka dietu.” Muanetu wa bakaji ukavua ne bidimu 22 mu dibaka wakamona ne: dibaka diabu dikavua dikeba kufua. Ke yeye kutangila filme eu. Wakamba ne: “Tuetu bonso tuvua batambule, kadi katuvua tupetangana to. Filme eu wakafika mu tshikondo tshiakanyine. Mpindieu tudi bimpe be mu dibaka dietu.” Bulelela, padi mulume ne mukaji batumikila mêyi manene a Yehowa mu dibaka diabu, malanda abu adi akola ne nebikale ne disanka.

18, 19. a) Ntshinyi tshidi baledi bena Kristo ba bungi benze? b) Ntshinyi tshitudi mua kuamba bua badi mu mudimu wa pa buawu wa ku dîba ne ku dîba?

¹⁸ Ku ntuadijilu tuvua bakule bua mutshipu wa Yefeta ne Hana. Bua mitshipu yabu eyi, muana wa bakaji wa Yefeta ne muana wa balume wa Hana bakadifila bua kuenzela Yehowa mudimu mu mushindu wa pa buawu. Baledi bena Kristo ba bungi mbakankamije bana babu bua kuditua mu mudimu wa ku dîba ne ku dîba ne bua kudifila bikole mu dienzela Nzambi mudimu. Tuetu bonso tudi petu ne tshitudi mua kuenza bua kukankamija bansonga aba bua kutungunukabu ne kuenza mudimu wabu.​—Balumbuluishi 11:40; Misambu 110:3.

¹⁹ Lelu pa buloba bujima, kudi Bantemu ba Yehowa badi mu mudimu wa pa buawu wa ku dîba ne ku dîba batue ku 67 000. Bamue badi benza mudimu ku Betele, mu mudimu wa luibaku anyi mu mudimu wa butangidi bua tshijengu. Bakuabu mbalongeshi mu tulasa tua malu a Nzambi, bampanda-njila ba pa buabu, bamisionere, banga pabu benza mudimu mu nzubu ya mpuilu anyi mu bilongelu bia tulasa tua malu a mu Bible. Yonso wa kudibu mmuenze “mutshipu wa ditumikila ne wa bupele.” Padibu benza mutshipu eu, badi balaya bua kudifila bua kuenza mudimu wonso udibu babapesha mu mudimu wa Yehowa, bua kuikala ne nsombelu mupepeja, ne kabayi mua kuenza midimu mikuabu ya tshianana anu bobu babanyishile bua kuyenza. Midimu idibu benza ke idi ya pa buayi, ki mbobu to. Badi ne budipuekeshi ne mbadisuike bua kukumbaja mutshipu wabu patshidibu mu mudimu wabu wa pa buawu wa ku dîba ne ku dîba.

20. Mmunyi mutudi mua kumona mitshipu itudi tuenza kudi Nzambi? Bua tshinyi?

²⁰ Mu tshiena-bualu etshi tudi bakule bua mitshipu isatu itudi mua kuenza kudi Nzambi. Pamuapa ukadi muenze imue ya kudiyi. Tudi bamanye ne: katuena ne bua kuangata mitshipu yetu bu bualu bua bilele to, tudi bamanye kabidi ne: tudi ne bua kuenza tshionso tshitudi ne bua kuenza bua kuyikumbaja. (Nsumuinu 20:25) Tuetu katuyi tukumbaja mitshipu itudi benze kudi Yehowa, tudi mua kupeta bipeta bibi menemene. (Muambi 5:6) Nunku tuikalayi bu mufundi wa misambu wakambila Yehowa ne: ‘Nengimbe misambu ya kutumbisha nayi dîna diebe tshiendelele, pandi mmana mitshipu yanyi ku dituku ne ku dituku.’​—Misambu 61:8.