1. (a) Yumanyi yadifwana yelili Nsompeshi Yefwata naHana? (Talenu nyevulu yidi hefu datachi.) (b) Malwihwinyi itukuhanjekahu muchinu chibaaba?

WADIÑA nlomboli wahamuka; wadiña mumbanda watiyililaña. Wadiña mushidika wabula woma; wadiña mumbanda wovwahila. Kubombela hakudifukula kudi Nzambi yowumu, chumanyi chikwawu chadifwana cheliliyi Nsompeshi Yefwata niHana ñoda Elikana? Wejima wawu amukanini Nzambi, nawa wejima wawu elili mwakaniniwu. Elili yuma yayiwahi yatela kwimbujolawu amayala nawambanda makonu anakufuukulahu kumukana Yehova. Hela chochu, tunateli kutoñojoka netu: Kukana kwatalisha mudihi? Muloñadi chitwatelela kushikija mutunamukani Nzambi? Yumanyi yitunateli kudizila kudi Yefwata niHana?

2, 3. (a) Kukana kwatalisha mudihi? (b) Nsona yashimuna nawudi kutalisha hakwila mutunamukani Nzambi?

² Izu dachikaninu hikumushiika chikupu Nzambi neyi chadizatishawu muBayibolu. Muntu nateli kukana kwila chuma, kuhana chawana, kuzataku mudimu wumu hela kubula kwila yuma yimu. Muntu wakanaña chakudikeñela kuzatisha wuswa windi wakufuukula. Hela chochu, kwekala kwajila sweje-e neyi muntu nakumukana Nzambi muloña kwekalaña kusanyika nawu wakelamu hela nehi. (Kutach. 14:22, 23; Heb. 6:16, 17) Nsona yashimuna nawudi kutalisha hakwila mutunamukani Nzambi?

 ³ Nshimbi yaMosi yahosheli nawu: ‘Neyi iyala wukumukana Yehova hela neyi wukusanyika . . . , bayi akamotoka izu danahoshiyuku, chiña akela mumazu ejima anafumi mukanwa kindi.’ (Kuch. 30:2) Chimwahitili mpinji, Solomoni amoneneni kusoneka nawu: ‘Neyi wunakukana kumesu aNzambi bayi wulaba kwilamuku; muloña yena hatiyaña kuwaha nawayisupiku. Ilaku muwakanini kwila.’ (Mukwa. 5:4) Yesu wamwekesheli nindi twatela kwila mutwakanini chahosheliyi nindi: “Mwatiyili dehi mwayilejeliwu antu akushankulu nawu ‘Bayi musanyika chakadi kwilamuku, ilaña chiña mwila mumwamukanini Yehova.’”—Mat. 5:33.

4. (a) Muloñadi chitwatela kwila mutunamukani Nzambi? (b) Yumanyi yitunakukeña kudizila kudi Yefwata naHana?

⁴ Tunamoni chalala netu neyi tunamukani Nzambi twatela kwila mutunakani. Neyi tubula kushikija mutunamukani Yehova, wubwambu wetu nayena wukumana. Davidi wasonekeli nindi: “Wukukandama hampidi yaYehova hinyi? Wukwimana mwindi mwajila hinyi? Yowu . . . Nabuli kusanyika chakutwamba [kudi Yehova].” (Mas. 24:3, 4) Yefwata naHana akaninidi nawa atwesheli ñahi kushikija mwakaniniwu?

5. Yefwata wakanini nindidi, nawa welili ñahi mwakaniniyi?

⁵ Yefwata wahembeli chikaninu chindi naYehova hampinji yayileñayi nakwasa njita naweni Amoni, achinishileña antu jaNzambi. (Ansomp. 10:7-9) Iku nakukeña kushinda njita, Yefwata wakanini nindi: “Neyi chalala wukunyinka anyana kaAmoni, ninami, chinakenza cheñi kudi anyana kaAmoni kunukuya, kwamwena dehi, chochuma chakedika muyisu yami nakunkinkilila chakela chambala chaYehova.” Welili mwakaniniyi? Eni Amoni ayishindili nawa mwana kaYefwata wamumbanda diyi wedikili nakumukinkilila kufuma kunjita kwayiliyi. Diyi wateleleli kwikala ‘wambala waYehova.’ (Ansomp. 11:30-34) Chumichi chatalishili mudihi?

6. (a) Yefwata nimwanindi wamumbanda elili ñahi mwamukaniniwu Nzambi? (b) Kuhituluka 23:21, 23 niMasamu 15:4 yinateli kuyikwasha ñahi neyi munakumukana Nzambi?

⁶ Hakwila nawu yashikiji mwakaniniyi tata yindi, mwana kaYefwata wateleleli kumuzitila Yehova mpinji yejima. Komana Yefwata wanyakeli kukana? Inehi, muloña hadaha welukili nindi mwanindi diyi wadi kwidika nakumukinkilila. Hela chakwila welukili, chumichi chayikalili wejima wawu tata yawantu namwanindi muloña ateleli kudihana. Yefwata chamumweniyi mwanindi, “watabwili mahinindi” nawa wahosheli nindi namukatishi kumuchima. Mwanindi wadilili ‘wujiki windi.’ Muloñadi? Yefwata wadiña namwana weyala wanyi nawa mwanindi wamumbanda wadi kusumbuka wanyi hela kumuvwalila ejikulu. Ijina dachisemwa dadikujiya. Hela chochu, ichi chuma chadiña chalema nankashi wanyi. Yefwata wahosheli nindi: “Namwasamina dehi mukanwa kami, hinukutwesha kubalumuna mwokuku.” Nawa mwanindi wakwili nindi: ‘Ñili mwejima muwunahoshi.’ (Ansomp. 11:35-39) Awa diwu antu elili mwamukaniniwu Nzambi Mukwakubadika Chikupu hela chakwila chadiña chapela wanyi.—Tañenu Kuhituluka 23:21, 23; Masamu 15:4.

7. (a) Hana wakanini nindidi, muloñadi, nawa chadiña ñahi chakala? (b) Chikaninu chaHana chadi kuletesha mwanindi Samweli kwiladi? (Talenu tumazu twaheshina.)

⁷ Hana niyena welili mwamukaniniyi Yehova. Wakanini hampinji yadiñayi mukukala  kwakubula kuvwala anyana nihampinji yamuhosholeleñawu kudi muhadika nindi. (1 Sam. 1:4-7, 10, 16) Hana wamudilili Nzambi nakumukana nindi: “Eyi Yehova wamazaza, neyi wukuntoñahu ami kambuñeyi nehuñu dami idi, neyi wukuñanukahu, neyi wukubula kunvulamena ami kambuñeyi, wunyinka ami kambuñeyi mwana weyala, chalala nakamwinkayi Yehova akekali windi hohu mafuku indi ejima amba kahandayi, hosi muntu wakahitisha mpoku yachayi kumutu winduku.” * (1 Sam. 1:11) Kulomba kwaHana akwakwili nawa wavwalili mwana weyala wawedi. Watiyili muzañalu chikupu! Hela chochu, wajimbeliku wanyi chamukaniniyi Nzambi. Chavwaliliyi mwanindi weyala wawedi, wahosheli nindi: “Namulombeli wakulomba kudi Yehova.”—1 Sam. 1:20.

8. (a) Hana welili ñahi mwakaniniyi? (b) Mazu aDavidi asonekawu Mwisamu 61, ayanukishañadi hayilwilu yadiña naHana?

⁸ Samweli chasumukiliyi, iku wudi nayaaka yisatu, Hana welili mwamukaniniyi Nzambi. Watoñojokelihu wanyi kwila chuma chacheñi. Wamutwalili Samweli kudi Kapristu Muneni Eli kutabanaka muShilo nawa wahosheli nindi: “Mwana nalombeli diyeniwu, Yehova nanyinki dehi chinamulombi, ninami namwinkiyi Yehova. Nyaka yakahandayi yejima wambala waYehova hohu.” (1 Sam. 1:24-28) Kuna kwayiliyi, “mwana Samweli wakulilili kumesu aYehova.” (1 Sam. 2:21) Ilaña chumichi chamutiyishili ñahi Hana? Wamukeñeli nankashi mwanindi, ilaña wukuleka kuhanjeka nindi mafuku ejima awukwenzi windi. Toñojokenu chafwilileñayi kumuleleja, kuhema nindi, kumwakamena nikumona chinakukulayi. Hela chochu, Hana waditoñesheli wanyi kwila mwamukaniniyi Nzambi. Muchima windi wazañaleli mudi Yehova.—1 Sam. 2:1, 2; tañenu Masamu 61:1, 5, 8.

9. Malwihwinyi itukuhanjekahu?

⁹ Chineli tuneluki netu twatela kwila mutunakani Nzambi, twayenu tuhanjeki hanawa malwihu: Yikaninu yamuchidinyi yitwakanaña etu akwaKristu? Nawa, yumanyi yitwatela kwila kulonda tushikiji mutunakani?

10. Chikaninwinyi chasweja kulema chakanañayi mukwaKristu, nawa watela kwiladi?

¹⁰ Chikaninu chasweja kulema chakanañayi mukwaKristu hikuhana wumi windi kudi Yehova. Muloñadi? Muloña mukulomba kwindi, wamukanaña Yehova nindi wukukalakelaña Nzambi muchihandilu chindi chejima hela chikukala ñahi. Kwesekeja nachahosheli Yesu, muntu ‘wunadibondi’ walekaña kwila yuma yejima yafwilañayi nikukana nindi wukwilaña nkeñelu yaNzambi muyuma yejima yikwilañayi. (Mat. 16:24) Kufuma hanodu ifuku, ‘wekalaña waYehova.’ (Rom. 14:8) Muntu wejima wakanaña kudihana watela kwilamu, neyi chocheliliyi ñimbi yamasamu wahosheli hayikaninu yamukaniniyi Nzambi nindi: “Yehova nukumwinkadi nayuma yayiwahi yejima yanañiliyi? Nukwila yuma yejima yinamukanini Yehova hamesu awantu indi ejima.”—Mas. 116:12, 14

11. Chumanyi chimwamwekesheli hefuku dimwapapatisheweli?

¹¹ Komana mwadihana dehi kudi Yehova kuhitila muchipapatishu chamumenji? Neyi mwadihana dehi, chinawahi! Anukenu nenu ifuku dimwapapatisheweleña ayihwili hamesu awayinsahu neyi chakwila  mwadihanini kudi Yehova nawa muneluki nenu “kudihana kwenu nichipapatishu kunayimwekeshi nawu munekali dehi aYinsahu jaYehova kwendela hamu nakuloñesha kwalombolewaña naspiritu yaNzambi.” Ñakwilu yenu yatiyakana yamwekesheli hatooka nawu mwadihanini nawa mwashikilihu kwikala mukwakukalakala waYehova. Mwamutiyishili Yehova kuwaha!

12. (a) Malwihwinyi itwatela kudihula? (b) Yilwilwinyi yahosheliyi Petulu yitwatela kushinshikahu?

¹² Hela chochu, chipapatishu hintachikilu hohu. Ilaña, twatela kutwalekahu kwila yuma kwesekeja nachitwadikanini netu tukumukalakelaña Nzambi. Dichi, twatela kudihula netu: ‘Wuspiritu wami wunakuyilaku hambidi kufuma hampinji yinapapatisheweli? Inakutwalekahu kumukalakela Yehova namuchima wejima? (Kol. 3:23) Komana nalombaña, natañaña Izu daNzambi, nayaña kukupompa kwachipompelu nikushimwina mpinji yejima? Tahindi nafunti hanyima hakuzata iyi nyidimu yakuspiritu?’ Kapostolu Petulu walumbulwili nindi tunateli kubula kufunta hanyima neyi tutwalekahu kukoleshaña chikuhwelelu chetu, kuumika nikumwakama Nzambi.—Tañenu 2 Petulu 1:5-8.

13. MukwaKristu wadihana nawa wapapatishewa welukadi?

 ¹³ Kwosi chuma chikuletesha tubuli kwila mutwamukanini Nzambi. Neyi muntu yazeya kumukalakela Yehova hela yaleka kuhanda neyi mukwaKristu, bayi yahosha nindi hinadihanini chacheniku nawa chipapatishu chami chadiña chamukunkulwayi. * Wadihanini yomwenindi nindi wukumukalakelaña Nzambi. Neyi yakoña nshidi yahamesu bwi-i akamusompesha kudi Yehova nikuchipompelu. (Rom. 14:12) Bayi tuhosha netu ‘tunaleki kukeña kutwadiña naku hakusambila.’ Ilaña tunakukeña Yesu yakahoshi nindi: ‘Neluka nyidimu yenu, kukeña kwenu, chikuhwelelu chenu, nimudimu wenu imwakalakalaña nikuumika kwenu, nawa neluka nami nyidimu yimunakukalakala chayinu mpinji, yinabadiki chikupu yimwadiña nakukalakala hakusambila.’ (Chim. 2:4, 19) Dichi tutwalekenuhu kwila kwesekaja nachikaninu chetu chakudihana kulonda tumutiyisheña Yehova kuwaha.

14. Chikaninwinyi chamuchiyedi chalema chakanañayi muntu, nawa muloñadi?

¹⁴ Chikaninu chamuchiyedi chalema chakanañayi muntu hichikaninu chawulu. Muloñadi chichekalila chalema? Muloña wulu wajila. Kalemba nakankaña adikanaña kumesu aNzambi nihamesu awayinsahu. Adikanaña chikupu nawu akadikeña, akadakamenaña nikudilemesha wumu namukwawu nawa akela mwenimu “mukuhanda [kwawu] kwejima hanu hamaseki kwesekeja nantanjikilu yaNzambi yawulu.” Amakwawu hiyahoshaña awa mazuku, ilaña chochimu adikanaña kumesu aNzambi. Ayibidikaña nawu ichi dinu anadisumbuli nawa wulu wawu wahaya nyaaka. (Kutach. 2:24; 1 Kor. 7:39) “Dichi,” Yesu wahosheli nindi, “anabombuwu kudi Nzambi, bayi ayambula kudi muntuku,” chili iyala hela mumbanda hela muntu wudi wejima. Dikwila nawu, anakudisumbula atela kwiluka nawu atela kudiseña wanyi.—Maku 10:9.

15. Muloñadi akwaKristu chatela kubulilawu kulondela antu amukaayi abulaña kulemesha wulu?

¹⁵ Hela chochu, kwekala wanyi wulu wawanina. Muwulu wejima mwekala antu ayedi abula kuwanina. Dichaletesha Bayibolu kuhosha nawu mpinji yikwawu antu adisumbula “akumonaña yihuñu.” (1 Kor. 7:28) Chawushona, antu amavulu mukanu kaayi alemesha wanyi wulu. Neyi amona kukala muwulu wawu, ambukaña nakushiya mwinikwawu. AkwaKristu atela wanyi kwila mwenimu. Kukojeja mukwenu kubula kushikija chikaninu chindi chawulu, hikutwamba kudi Nzambi nawa Nzambi wahela antu atwambaña! (Lev. 19:12; Yish. 6:16-19) Kapostolu Pawulu wasonekeli nindi: “Komana eyi wakasika kudi ñodeyi tahindi? Lekaku kukeñakeña njila yakukasunukilamu.” (1 Kor. 7:27) Pawulu wahosheli mwenimu muloña welukili nindi Yehova wahela kudiseña.—Mal. 2:13-16.

16. Bayibolu yahosha nawudi kutalisha hakudiseña nikudaambula?

¹⁶ Yesu wahosheli nindi Nsona yeteja antu kudiseña neyi wumu hakachi kawu neli wuvumbi nawa mukwawu nakaani kumwanakena. (Mat. 19:9; Heb. 13:4) Indi neyi muntu yafuukulahu kwaambuka namwinikwindi? Bayibolu yashimuna cheñi hatooka haniyi nsañu. (Tañenu 1 Akorinda 7:10, 11.) Bayibolu yashimuna wanyi  nawu antu atela kudaambula. Hela chochu, akwaKristu amakwawu adaambulaña neyi mwinikwawu nakwila yuma yinateli kujimbesha wumi windi hela nakumukañesha kwila yuma yakuspiritu. *

17. AkwaKristu adisumbula anateli kwila ñahi hakwila nawu wulu wawu watwalekihu?

¹⁷ Neyi adisumbula aya nakukejamu aeluda muchipompelu hakukala kunakumonawu muwulu, aeluda atela kuyihula adisumbula neyi anatambihu katataka vidiyo yaMunateli Kwiluka Ñahi Kukeña Kwalala? nawa neyi anadizihu hamu buloshuwa yaChisaka Chenu Chinateli Kwikala naMuzañalu! hela nehi. Muloñadi? Muloña iyi yitwa yashimuna yishina yinakwashi antu kukolesha wulu wawu. Adisumbula amu ahosheli nawu: “Kufuma tuhu hampinji yitwatachikili kudiza iyi buloshuwa, twekalaña namuzañalu.” Muhela wunashakami muwulu yaaka 22 wahosheli kutalisha hawulu wawu wakeñeleña kumana nindi: “Wejima wetu twapapatishewa, ilaña twatobokeleña. Vidiyo yedikili hampinji yatelela! Chayinu mpinji tunakutiyañana muwulu.” Komana mwasumbula hela mwasumbuka? Zatenu nañovu kulonda muzatisheña yishina yaYehova muwulu wenu. Kwila mwenimu kukuyikwasha kushikija chikaninu chenu chawulu nawa namuzañalu!

18, 19. (a) Chumanyi chineliwu anvwali akwaKristu amavulu? (b) Antu adi mumudimu wadimena wampinji yejima alondelaña chikaninwinyi?

¹⁸ Muneluki chuma chikwawu chadifwana cheliliwu aYefwata naHana? Kukana kwawu kwaletesheli mwana kaYefwata wamumbanda nimwana kaHana kudihana mumudimu wadimena, wajila wakukalakela hatabanaka. Adi kwikala namuzañalu chikupu. Makonu, anvwali amakwawu akwaKristu anakwashi anyanawu kwiñila mumudimu wadimena wampinji yejima nikuzatisha wumi wawu kumukalakela Nzambi. Tunayisakilili chikupu enu muneli mwenimu.—Ansomp. 11:40; Mas. 110:3.

¹⁹ Chayinu mpinji, mukaayi kejima mudi aYinsahu jaYehova akushika ku 67,000 adi Mumudimu Wadimena waMpinji Yejima. Amakwawu azatilaña haBeteli, amakwawu azataña mudimu wakutuña, amakwawu hiyankoñi añinza, amakwawu hiyantañishi amashikola, apayiniya adimena, amishonali, akwakuwahisha Matala akupompela Kupompa Kweneni hela mashikola mwakudizila atudizi aBayibolu. Wejima wawu alondelaña chikaninu chakwila nawu “Kusanyika kwaKwovwahila niWuzweñi,” muyadikana kwiteja mudimu wudi wejima wuyanayinkiwu kuzata kulonda akwashi Wanta kuyilaku hambidi, kupelesha chihandilu nikubula kuzata nyidimu yacheñi yahanji chakubula lusesa. Bayi neyi antu aweni diwu adimenaku, ilaña nyidimu yazatañawu diyadimena. Eluka nawu atela kwila mwakaniniwu hampinji yejima yikuzatañawu mumudimu wadimena wampinji yejima.

20. Chumanyi chitwatela kwila “hefuku-hefuku,” nawa muloñadi?

²⁰ Hayikaninu yitunahanjekihu, yikaninu yiñahi yimwamukana dehi Nzambi, chimu, yiyedi tahindi yejima? Munadizi chikupu nenu mwatela kwila mwejima mumwakanini. (Yish. 20:25) Neyi mukañanya kuhemba mazu imwahosheli hela kwila mumwamukanini Yehova, munateli kufuma yuma yakala. (Mukwa. 5:6) Dichi twayenu ‘tumushimeki Yehova haya nyaaka hampinji yitunakwila mutwakanini hefuku-hefuku.’—Mas. 61:8.