1. a) Bõe la a Zɛfte ne a Ana maan-yã, tɩ wõnd taaba? (Ges-y fot-rãmbã sẽn be yĩngrã.) b) Sogs-bʋs la d na n leoke?

A ZƐFTE ra yaa taoor soab sẽn tar raoodo, la zabr gãndaoogo. A Ana ra yaa pag sẽn yaa sik-m-meng soaba, la sẽn da get a zakã rãmb yell neere. B yiibã fãa ra tũuda a Zeova. Bũmb me la b maan-yã, tɩ wõnd taaba. B pʋlma a Zeova bũmbu, n modg n pidsi. B sẽn maanã yaa mak-sõngo, tɩ rap la pagb nins sẽn pʋlemd Wẽnnaam bũmb kẽer rũndã-rũndã wã tõe n dɩk b togs-n-taare. La pʋleng yaa bõe? Bõe yĩng tɩ ned sã n pʋlem Wẽnnaam bũmb bɩ pa reem yelle? Yam-bʋg la d tõe n dɩk a Zɛfte ne a Ana kibayã pʋgẽ? D na n leoka sogs-kãensã.

2, 3. a) B sã n yeel tɩ ned pʋlma Wẽnnaam bũmbu, rat n yeelame tɩ bõe? b) Pʋlemsã wɛɛngẽ, bõe la Biiblã yeta?

² Biiblã pʋgẽ, b sã n yeel tɩ ned pʋlma Wẽnnaam bũmbu, yaa sẽn dat n togs t’a yeela Wẽnnaam t’a maana bõn-kãnga. Wala makre, ned tõe n yeela Wẽnnaam t’a na n kõo kũuni, t’a na n kẽesa a meng Wẽnnaam tʋʋmdã neng ning pʋgẽ, pa rẽ bɩ t’a na n yõka a meng n da maan bũmb kẽer ye. B pa modgd ned t’a pʋlem Wẽnnaam bũmb ye. Yaa a soabã yam-yãkre. La ned sã n pʋlem Wẽnnaam bũmbu, yaa wa a sẽn wẽen t’a na n maana bõn-kãnga, tɩ yaa tɩlɛ t’a pidsi. Rẽnd Wẽnnaam nifẽ, pʋleng ne wẽeneg fãa zema taaba. (Sɩng. 14:22, 23; Ebre. 6:16, 17) Bõe la Biiblã yeta, tɩ wilgdẽ tɩ f sã n pʋlem Wẽnnaam bũmbu, pa reem yelle?

 ³ Tõog ning Wẽnnaam sẽn kõ Israyɛll nebã pʋgẽ, a ra yeelame: ‘Ned sã n pʋlem t’a na n kõo Sẽn-Ka-Saab kũuni, bɩ a wẽename t’a na n maana bũmbu, bɩ a ra bas n ka pids ye. Yẽnda tog n modg n pidsa bũmb ning sẽn yi a noorẽ wã.’ (Sõd. 30:3) Kaoosg zugẽ, Wẽnnaam kɩtame t’a Salomo yeele: “Fo sã n pʋlem Wẽnnaam bũmbu, bɩ f pids-a n da bas tɩ kaoos ye. Bala, nin-yaalg ka tat Wẽnnaam yam ye. Bɩ f pids pʋleng ning fo sẽn pʋlmã.” (Koɛ. 5:3) A Zeezi me togsa gomd sẽn wilgd tɩ f sã n pʋlem Wẽnnaam bũmbu, pa reem ye. Ad a sẽn yeele: “Fo sẽn pʋlem Zu-soabã ne bũmb ninsã, pids-ba.”—Mat. 5:33.

4. a) Bõe n wilgd tɩ f sã n pʋlem Wẽnnaam bũmbu, pa reem yelle? b) Bõe la d na n bao n bãng a Zɛfte ne a Ana zugu?

⁴ Yaa vẽeneg tɩ d sã n pʋlem Wẽnnaam bũmbu, pa segd n yɩ reem yell ye. Ned sã n pʋlem Wẽnnaam bũmbu, a manesem sẽn na n yɩ to-to ne rẽ wã tõe n paasa b zoodã, wall sãam zoodã. A Davɩɩd goam n wilgd rẽ vẽenega. A yeelame: “Ãnda n na n dʋ Sẽn-Ka-Saab tãngẽ wã? Ãnda n tõe n yals bãmb zĩ-sõngẽ wã? . . . Yaa ned ning sẽn ka yagd zĩrẽ, la a ka wẽend zãmb wẽeneg ye.” (Yɩɩn. 24:3, 4) Bõe la a Zɛfte ne a Ana pʋlem a Zeova? Yɩɩ nana ne b ned kam fãa t’a pids a pʋlengã bɩ?

5. Bõe la a Zɛfte pʋlem a Zeova, la bõe n maane?

⁵ A Zɛfte sẽn wa n na n tɩ zab ne Amo nebã, a pʋlma a Zeova bũmbu. Amo nebã ra yaa Wẽnnaam nin-buiidã bɛɛba. A Zɛfte bõosa a Zeova t’a sõng-a t’a tõog-ba. (Bʋ. 10:7-9) Rẽ poore, ad a sẽn pʋlme: “Sẽn-Ka-Saabo, yãmb sã n sõng maam tɩ m tõog Amo nebã, mam sã n lebg n watẽ, ned ning sẽn na n yɩ-a pipi n yi mam zakẽ wã n seg maamã, mam na n dɩka yenda soab n maan maoong sẽn yõogd bugum yãmb yĩnga.” Wẽnnaam deega a Zɛfte pʋʋsgã, n sõng-a t’a tõog a bɛɛbã. A Zɛfte sẽn wa n lebg n wat yirã, yɩ a bi-pugl-yendã n yi n seg-a. Yẽ la a ra segd n dɩk n “maan maoong” a Zeova yĩnga. (Bʋ. 11:30-34) Woto rat n yeelame tɩ bõe?

6. a) Yɩɩ nana ne a Zɛfte la a bi-puglã tɩ b pids a sẽn pʋlem bũmb ningã bɩ? b) Bõe la Tõod 23:22, 24 ne Yɩɩn-sõamyã 15:4 goamã wilgd tõnd pʋlemsã wɛɛngẽ?

⁶ A Zɛfte bi-puglã ra segd n tɩ tʋma sɛk-roogẽ wã, sẽn na yɩl tɩ bũmb ning a ba wã sẽn pʋlem a Zeova wã pidsi. A Zɛfte pʋlma a Zeova n pa reng n tags neer bɩ? Ayo. Sɩd me, a Zɛfte ra miime tɩ ned ning sẽn na n yɩ pipi n seg-a wã tõe n yɩɩ a bi-puglã. La a ra mi t’a pa mi me, bũmb ning a sẽn pʋlmã pidsg ra pa na n yɩ nana ne yẽ la a bi-puglã ye. A Zɛfte sẽn yã a bi-puglã, a “pãrsa a futu,” la a yeel t’a sũur sãamame. A bi-puglã tɩ yãbame, a sẽn pa na n paam n kul sɩdã yĩnga. A bee bʋʋm. Bala, a ba wã pa tar bi-ribla, tɩ yẽ me pa na n tol n kẽ kãadem n dog kamb ye. Rẽnd a Zɛfte yʋʋrã ra na n menemame. La rẽ yõod pa ta pʋlengã pidsg ye. Sɩd me, a Zɛfte yeelame: “Mam goma wʋsg Sẽn-Ka-Saab taoore, la mam ka tõe n lebs m noorã poorẽ ye.” A bi-puglã me yeel-a lame yaa: “Bɩ y maan maam wa sẽn zems yãmb sẽn pʋlem bũmb ningã.” (Bʋ. 11:35-39) A Zɛfte ne a bi-puglã fãa yɩɩ neb sẽn da maand sɩd ne Wẽnnaam. Baa b sã n pʋlem Wẽnnaam bũmb tɩ wa lebg toogo, b kõn bas n pa pids b pʋlengã a bada!—Karm-y Tõod 23:22, 24; Yɩɩn-sõamyã 15:4.

7. a) Bõe la a Ana pʋlem a Zeova, la bõe yĩnga? b) A Ana pʋlengã ra na n kɩtame t’a Sãmwɛll maan bõe? (Ges-y vẽnegrã sẽn be tẽngrã.)

⁷ A Ana me pʋlma a Zeova bũmbu, n  modg n pidsi. A ra pa tar dogem, tɩ b ra namsd-a la b yaand-a rẽ yĩnga. Woto fãa ra sãamda a sũur wʋsgo. Yaa a sũ-sãangã pʋgẽ la a maan a pʋlengã. (1 Sãm. 1:4-7, 10, 16) A pelga a pʋg n pʋʋs Wẽnnaam n yeel-a yaa: “Saasẽ-Pãng-Soaba, yãmb sã n zoe mam sẽn yaa y tʋmtʋmd-poakã nimbãanega, n tẽeg m yelle, n ka yĩm m yelle, la y sã n kõ-m bi-ribla, mam na n dɩk-a lame n kõ yãmb a Sẽn-Ka-Saab a yõor tɛka, la barg kõn tol n tik a zug ye.” * (1 Sãm. 1:11) Wẽnnaam reega a kosgã, n kɩt t’a paam bi-ribla. A Ana sũur yɩɩ noog wʋsgo! La a pa yĩm a sẽn pʋlem Wẽnnaam bũmb ningã ye. A bi-riblã rogem poore, a yeelame tɩ yẽnda kos-a-la a Zeova.—1 Sãm. 1:20.

8. a) Yɩɩ nana ne a Ana t’a pids a pʋlengã bɩ? b) A Davɩɩd goamã sẽn be Yɩɩn-sõamyã 61 wã tẽegda yãmb bõe a Ana mak-sõngã wɛɛngẽ?

⁸ A Sãmwɛll sẽn wa n ta yʋʋm a tã bɩ sẽn yɩɩd rẽ bilfu, a Ana maana a sẽn da pʋlem Wẽnnaam bũmb ningã kɛpɩ. A pa tol n bao n na n viig a pʋlengã ye. A talla a Sãmwɛll n kẽng sɛk-roogẽ wã Silo, n tɩ kɩs-a maan-kʋʋdb kãsem a Eli, n yeel-a yaa: “Yaa bi-kãngã raab yĩng la mam sẽn dag n pʋʋsdã, la Sẽn-Ka-Saab kõo maam bũmb ning mam sẽn kosã. Woto, mam me rat n dɩk-a lame n kõ Sẽn-Ka-Saabo, tɩ b soog-a a vɩɩmã tɛka.” (1 Sãm. 1:24-28) Rẽ tɛka, a Sãmwɛll paa sɛk-roogẽ wã. Biiblã yeelame tɩ “biig a Sãmwɛll dag n bɩta Sẽn-Ka-Saab belmã pʋgẽ.” (1 Sãm. 2:21) A Ana pʋlengã pidsg pa yɩ nana ne-a ye. Bala, a ra nonga a biigã wʋsgo, la pa daar fãa la a na n paam n be ne-a ye. Mams-y n ges-y-yã a Ana sẽn da mi n dat ne a sũur fãa n paam a biigã n mobge, n deem ne-a, n ges a yelle, la a paam n yã a bɩʋʋngã, wa pag fãa sẽn nong a biig sẽn datã! Baa ne rẽ, a Ana sakame n na n pids a sẽn pʋlem Wẽnnaam bũmb ningã, n pa maan a bãngẽ ye. A ra kɩdemda sũ-noog a Zeova yĩnga.—1 Sãm. 2:1, 2; karm-y Yɩɩn-sõamyã 61:2, 6, 9.

9. Sogs-bʋs la d na n leoke?

⁹ D bãngame masã tɩ d sã n pʋlem Wẽnnaam bũmbu, pa reem yell ye. La rũndã-rũndã, bõe la d tõe n pʋlem Wẽnnaam? Bõe yĩng tɩ yaa tɩlɛ tɩ d modg n pids d sẽn pʋlm-a bũmb ninsã? D na n leoka sogs-kãensã.

10. Pʋleng bʋg n tar yõod n tɩ yɩɩd ne kiris-neda? Kɩtame t’a segd n maan bõe?

¹⁰ Ned sã n dɩk a meng n kõ a Zeova, a pʋʋs-a lame n pʋlem t’a na n maana a raabã a vɩɩmã tõre, baa sẽn wa n yaa a soab fãa. Pʋlen-kãngã yõod yɩɩda pʋleng buud fãa. A Zeezi yeelame tɩ ned sẽn maan woto ‘kɩɩsa a meng raabo,’ n pʋlem tɩ yaa a Zeova raabã maaneg n na n pak-a n tɩ yɩɩda. (Mat. 16:24) Rẽ tɛka, a soabã lebga a Zeova rẽnda. (Rom. 14:8) Ned sã n dɩk a meng n kõ a Zeova, a pa segd n maan wa yaa reem yell ye. A segd n talla yɩɩn-gʋlsdã yamã buudu. A yeelame: “Maan-neer ning fãa Sẽn-Ka-Saab sẽn maan n kõ maamã, mam na n maana bõe n lebs bãmba? Mam na n pidsa m sẽn pʋlem Sẽn-Ka-Saab bũmb ningã, b nebã fãa nifẽ.”—Yɩɩn. 116:12, 14.

11. Yãmb lisgã daare, bõe la y wilg nebã taoore?

¹¹ Yãmb dɩka y meng n kõ a Zeova, n deeg lisg bɩ? Sã n yaa woto, y maana neere. Tẽeg-y tɩ y lisgã daare, saam-biig ning sẽn wɛgs lisgã sõsgã soka yãmb y sã n dɩka y meng n kõ a Zeova. Rẽ poore,  a sokame: “Rẽ yĩnga yãmb miime tɩ y sẽn dɩk y meng n kõ a Zeova n na n deeg lisgã, y na n lebga a Zeova Kaset soaba, n lebg Wẽnnaam siglgã a vʋʋsem sõngã sẽn wilgd sorã ned bɩ?” Yãmb sẽn leok tɩ “n-ye” neb nins sẽn da be be wã taoorã wilgame tɩ y rɩka y meng n kõ a Zeova, la tɩ zemsame tɩ y reeg lisg n lebg a Zeova tʋm-tʋmda. Sãmbg sẽn kae, y nooga a Zeova sũuri.

12. a) Sogs-bʋs la d segd n sok d menga? b) A Pɩyɛɛr sagla tõnd tɩ d maan bõe?

¹² D sẽn deeg lisgã, d pʋlma a Zeova tɩ d na n maana a raabã d vɩɩmã tõre, la tɩ d na n maana d sẽn tõe fãa n tũ a noyã. La nan yaa sɩngr bala. Rẽ n so tɩ d ned kam fãa segd n mi n fees a menga. D tõe n soka d meng yaa: ‘Mam sẽn deeg lisgã tɛka, mam ne a Zeova zoodã pãng paasame bɩ? Mam ket n tũuda a Zeova ne m sũur fãa bɩ? (Kol. 3:23) Mam wae n pʋʋsdame bɩ? Mam karemda Biiblã daar fãa, la m kẽnd tigissã n pa vaandẽ bɩ? Mam wae n yita koɛɛgã mooneg bɩ? Bɩ m pa le tar yẽesem bõn-kãensã pʋgẽ wa pĩndã?’ Tʋm-tʋmd a Pɩyɛɛr yeelame tɩ d sã n modg n paas d tẽebã, d bãngrã, d sũ-marã, la d wẽn-sakrã, na n sõng-d lame tɩ d ra wa bas Wẽnnaam tʋʋmdã n pa le tʋmdẽ ye.—Karm-y 2 Pɩyɛɛr 1:5-8.

13. Bõe la ned sẽn dɩk a meng n kõ a Zeova n deeg lisg segd n bãnge?

 ¹³ Ned sã n dɩk a meng n kõ a Zeova, n pʋlem t’a na n maana a raabã, a pa tõe n lebs a noorã poorẽ ye. A sã n pa le tar sũ-noog a Zeova tũudmã pʋgẽ, wall a pa le rat n vɩɩmd wa Kiristã sẽn datã, pa tog t’a yeel tɩ yẽ ra pa tolg n dɩk a meng n kõ a Zeova, la tɩ ra pa zems t’a reeg lisg ye. * Ned sẽn dɩk a meng n kõ a Zeova sã n maan yel-wẽn-kãsenga, yaa tɩlɛ t’a togs a yellã a Zeova ne tigingã taoore. (Rom. 14:12) D pa tol n dat n yɩ wa neb nins a Zeezi sẽn yeel tɩ b ‘basa b pipi nonglmã’ ye. D ratame t’a wa yeel-d yaa: “Mam bãnga yãmb tʋʋmã la y nonglmã, la y tẽebã, la y tʋʋm-sõamyã, la y sũ-marã ne y yaoolem tʋʋmã sẽn yaa wʋsg n yɩɩd y pipi tʋʋmã.” (Vẽn. 2:4, 19) D modg n maan wa d sẽn pʋlem a Zeova bũmb ningã, tɩ noog a sũuri.

14. Pʋleng bʋg me n tar yõod wʋsgo, la bõe yĩnga?

¹⁴ Ned sẽn pʋlem bũmb ning a yi-kãadmã daarã me yaa pʋleng sẽn tar yõod wʋsgo. Bõe yĩnga? Bala, kãadem tara yõod wʋsg Wẽnnaam nifẽ. Yaa Wẽnnaam ne neb taoor la pʋg-paalã ne a sɩdã pʋlem tɩ b na n nonga taab ne b sũur fãa la b waoogd taaba, wala Gʋlsg Sõamyã sẽn baood tɩ b maanã, la tɩ ‘na n kell n yɩɩ woto b sẽn na n zĩnd ne taab tẽng zug ka wã sasa, wa Wẽnnaam sẽn dat tɩ yɩ to-to wã.’ Tõe tɩ pa gom-kãensã takɩ la kẽer togs ye. Baasgo, b maana pʋleng Wẽnnaam taoore. Rẽ poore, b lebga pag ne a sɩda, tɩ b kãadmã segd n kaoos b vɩɩmã tõre. (Sɩng. 2:24; 1 Kor. 7:39) A Zeezi ra yeelame: “Bɩ ninsaal da welg bũmb nins Wẽnnaam sẽn lagem ne taab ye.” Rat n yeelame tɩ pagã wall raoã bɩ ned a to pa segd n sãam kãadmã ye. Rẽnd pag ne rao sẽn dat n kẽ kãadem ne taab pa segd n tags tɩ b kãadmã sã n wa pa noomẽ, b tõe n kaoo kãadmã ye.—Mark 10:9.

15. Bõe yĩng tɩ kiris-nebã tagsg kãadmã wɛɛngẽ segd n yɩ toor ne dũniyã nebã?

¹⁵ D sẽn yaa pãn-komsem dãmbã, kãadem sẽn zems zãng ka be ye. Rẽ n so tɩ Biiblã yeel tɩ sẽn kẽ-b kãadmã “na n paama yel-pakre.” (1 Kor. 7:28) Rũndã-rũndã, neb wʋsg tara tagsg sẽn pa zems kãadmã wɛɛngẽ. B tagsdame tɩ b kãadem sã n wa pa noomẽ, b tõe n kaoome. La pa woto la kiris-nebã tagsd ye. B pa yĩmd tɩ yaa Wẽnnaam taoor la b pʋlem tɩ b na n zĩnda ne taab ye. B sã n kao b kãadem, yaa wa b sẽn yag ziri. Wẽnnaam yaool n kisa ziri. (Maan. 19:12; Yel. 6:16-19) Kiris-neb nins sẽn kẽ kãadmã segd n tẽegda gomd tʋm-tʋmd a Poll sẽn da togse. A ra yeelame: “Fo tara pag bɩ? Da bao tɩ welg ne-a ye.” (1 Kor. 7:27) Tʋm-tʋmd a Poll yeela woto, bala a ra miime tɩ Wẽnnaam kisa ned sẽn na n maan zãmb n kao a kãadem.—Mal. 2:13-16.

16. Bõe la Biiblã yet kãadem kaoob la welg-taabã wɛɛngẽ?

¹⁶ A Zeezi wilgame tɩ sã n yaa ne Gʋlsg Sõamyã, ned pag bɩ a sɩd sã n yo, a tara sor n tõe n kao kãadmã, sã n mikame t’a pa rat n kõ sẽn yo-a wã sugri. (Mat. 19:9; Ebre. 13:4) La ned sã n dat n welg ne a pag wall a sɩda? Biiblã sẽn yet rẽ wɛɛngẽ wã me yaa vẽenega. (Karm-y 1 Korẽnt-rãmb 7:10, 11.) Biiblã pa wilg bũmb takɩ sẽn tõe n kɩt tɩ pag ne a sɩd welg taab ye. Baasgo, yɛl kẽer tõe n kɩtame tɩ kiris-ned  getẽ t’a sẽn welgd ne a pag wall a sɩd n são. Wala makre, nina pag wall a sɩd sã n wa lebg sɩdã kɩɩsda, wall a namsd-a tɩ loog noore, a tõe n getame tɩ sẽn na yɩl tɩ ra sãam yẽ ne a Zeova zoodã, wall tũ ne a yõore, b sẽn welgd taab n são. *

17. Bõe la pag ne a sɩd tõe n maan tɩ b kãadmã tall pãnga?

¹⁷ Pag ne a sɩd sã n tɩ yã tigingã kãsem-dãmb n dat sagls sẽn na yɩl tɩ b zak pʋgẽ vɩɩmã maneg n yɩ noogo, yɩta sõma tɩ kãsem-dãmbã reng n bao n bãng b sã n naaga taab n ges video ning gom-zug sẽn yaa Nonglem hakɩɩkã sẽn yaa a soaba, la b zãms borsiir ning gom-zug sẽn yaa Yãmb zakã rãmb vɩɩm tõe n yɩɩ noogo. Bõe yĩnga? Bala, video-kãngã ne borsiirã wilgda Biiblã sagls sẽn tõe n sõng sẽn kẽ-b kãadmã tɩ b zĩid-n-taarã maneg n yɩ noogo. Ad pag ne a sɩd sẽn yeele: “Tõnd sẽn sɩng borsiir-kãngã zãmsgã tɛka, tõnd kãadmã lebga noog n yɩɩd pĩndã.” Pag sẽn kẽ kãadem na maan yʋʋm 22, t’a kãadmã ra rat n sãam yeelame: “D yiibã fãa ra reega lisgu, la d ned kam fãa sẽn da rat t’a to wã wilg-a a nonglem to-to wã wɛɛngẽ, d ra pa wʋmd taab ye. Video wã yiibã sɩd zemsame! Masã tõnd kãadmã yaa sõma n yɩɩd pĩndã.” Hakɩɩka, pag ne a sɩd sã n tũ sagls nins a Zeova sẽn kõ kãadmã wɛɛngẽ wã, b zĩid-n-taarã na n maneg n yɩɩ noogo.

18, 19. a) Bõe la kiris-neb sẽn tar kamb maan-yã? b) Bõe la d tõe n yeel kiris-neb nins sẽn kẽes-b b meng zãng fasɩ Wẽnnaam tʋʋmdã pʋgẽ wã wɛɛngẽ?

¹⁸ Sɩngrẽ wã, tõnd goma a Zɛfte ne a Ana yelle. D yãa b ned kam fãa sẽn pʋlem bũmb ningã. B sẽn pʋlem bũmb ninsã kɩtame tɩ b kambã kẽes b meng zãng Wẽnnaam tʋʋmdã pʋgẽ, n da tɩ tʋmd sɛk-roogẽ wã. Woto kɩtame tɩ b kambã vɩɩm sɩd tall barka. Rũndã-rũndã, kiris-neb wʋsg sagla b kamb tɩ b kẽes b meng zãng Wẽnnaam tʋʋmdã pʋgẽ, la b modg n lʋɩɩs a raabã maaneg taoore. Sẽn maand-b woto wã segda ne pẽgre.—Bʋ. 11:40; Yɩɩn. 110:3.

¹⁹ Rũndã-rũndã, a Zeova Kaset rãmb nins sẽn kẽes-b b meng zãng fasɩ a tʋʋmdã pʋgẽ wã sõor taa tus 67. Wʋsg yaa Betɛllẽ tʋm-tʋmdba, tɩ kẽer sõngd n met siglgã roto, tɩ sãnda yaa tigims sull yel-gɛtba, wall siglgã lekoll-dãmb karen-saam-dãmba. Kẽer me yaa zall so-pakdba, misioneer-dãmba, wall b get tigs-kãsemsã rot wall siglgã lekoll-dãmb rot yelle. B fãa pʋlmame tɩ b na n yɩɩ sakdba, la tɩ b pa na n tʋm ligd yĩng ye. B pʋlmame me tɩ b pa na n gĩd b vɩɩmã ne teed wʋsgo, tɩ b pa na n bao tʋʋmd dũniyã pʋgẽ tɩ sã n pa b kõ-b-la sore, la tɩ sẽn wa n yaa tʋʋmd ning fãa la b kõ-b a Zeova siglgã pʋgẽ, b na n tʋma ne b sũur fãa. Yaa tʋʋm nins b sẽn tʋmdã n yaa tʋʋm sẽn welg toore, la bãmb mensã yaa wa b taabã bala. B miime tɩ b sẽn pʋlem bũmb ningã pa reem yelle, n dat ne b sũur fãa n pids-a.

20. Bõe la d segd n maan “daar fãa,” la bõe yĩnga?

²⁰ Sõs-kãngã pʋgẽ, d yãa bũmb a tãab d sẽn tõe n pʋlem Wẽnnaam. Tõe tɩ kẽer la y zoe n pʋlme. D miime tɩ d sẽn pʋlem Wẽnnaam bũmb ninsã pa reem yelle, la tɩ d segd n maana d sẽn tõe fãa n pids-ba. (Yel. 20:25) Sã n pa rẽ, yaa yelle. (Koɛ. 5:5) Woto wã, bɩ d maan wa yɩɩn-gʋlsdã. A yeelame: “Mam na n yɩɩl n pẽga yãmb yʋʋrã wakat fãa, la m na n pidsa m pʋlengã daar fãa.”—Yɩɩn. 61:9.