1. а) Йеффай ӕма Аннӕ ӕмхузӕн цӕмӕй адтӕнцӕ? (Кӕсӕ хузӕмӕ статьяй райдайӕни.) б) Аци статьяй цӕхуӕн фарстатӕмӕ ӕркӕсдзиан?

ЙЕФФАЙ адтӕй бӕгъатӕр ӕфсӕддон ӕма хуарз разамонӕг, Аннӕ ба – сӕрниллӕг бийнойнаг ӕма хӕдзари силгоймаг. Сӕ дууӕ дӕр еци еу Хуцауӕн лӕггадӕ кодтонцӕ, удта сӕ дууӕ дӕр, Хуцауӕн ци дзурд равардтонцӕ, уой исӕнхӕст кодтонцӕ. Йеффай ӕма Аннӕ хуарз цӕветтон ниууагътонцӕ, Хуцауӕн дзурд ка равардта, еци силгоймӕгтӕ ӕма нӕлгоймӕгтӕн. Фал дзурд раттун ци нисан кӕнуй? Хуцауӕн ци дзурд равардтан, уомӕ уӕлӕнгай цӕстӕй кӕсӕн цӕмӕннӕ ес? Йеффай ӕма Анни цӕветтонтӕй цӕбӕл ахур кӕнӕн?

2, 3. а) Дзурд раттун цӕмӕ фӕййамонуй? б) Библий Хуцауӕн дзурд раттуни туххӕй ци финст ес?

² Библий дзурд раттуни кой кӕми цӕуй, уоми фӕййамонуй, адӕймаг Хуцауӕн дзурд ку раттуй, зӕгъӕн, цидӕр гъуддаг ке искӕндзӕй, цӕхуӕндӕр лӕвар ке ӕрхӕсдзӕй, фулдӕр ке лӕггадӕ кӕндзӕй кенӕ ӕхе цӕмӕйдӕр ке фӕццох кӕндзӕй. Уӕхӕн дзурд адӕймаг раттуй, ӕхе ке бафӕндуй, уой туххӕй. Дзурд раттун Хуцауи цӕсти табуйаг гъуддаг ӕй ӕма ин ӕнӕ исӕнхӕст кӕнӕн нӕййес. Е ӕй, цума соми ракодтай, уой хузӕн (Райд. 14:22, 23; Дзиуит. 6:16, 17). Цума Библи ци зӕгъуй, адӕймаг Хуцауӕн ци дзурд равардта, уой исӕнхӕст кӕнун цӕйбӕрцӕбӕл ӕхсидзгӕ ӕй, уой туххӕй?

³ Моисеййи закъони финст адтӕй: «Адӕймаг Йеговӕн дзурд ку  ратта... ӕма ӕхе дзурдӕй ку исбӕтта, уӕд гъӕуама ӕ дзурд ма фӕссайа. Цидӕриддӕр загъта, уой гъӕуама исӕнхӕст кӕна» (Ним. 30:2). Фӕстӕдӕр Соломон Хуцауи сугъдӕг хъаури разамундӕй ниффинста: «Хуцауӕн дзурд ку раттай, уӕд ӕ исӕнхӕст кӕнунбӕл абони-исон ма кӕнӕ, уомӕн ӕма ӕнӕзунд неке зӕрдӕмӕ цӕуй. Ци загътай, уой исӕнхӕст кӕнӕ» (Еккл. 5:4). Аци гъуддагмӕ уӕлӕнгай цӕстӕй кӕсӕн ке нӕййес, уой туххӕй Йесо дӕр загъта: «Рагон адӕнӕн... адтӕй загъд: „Дӕ соми ма фӕссайӕ, фал, Йеговӕн ци дзурд равардтай, уой исӕнхӕст кӕнӕ“» (Матф. 5:33).

4. а) Хуцауӕн ци дзурд равардтан, уой цӕмӕн гъӕуама исӕнхӕст кӕнӕн? б) Йеффай ӕма Анни туххӕй ци базондзиан?

⁴ Мадта бӕрӕг ӕй, Хуцауӕн дзурд раттун хумӕтӕг гъуддаг ке нӕй. Ци дзурд равардтан, уой исӕнхӕст кӕндзиан ӕви нӕ, уомӕй кӕнгӕ ’й, Йегови хӕццӕ ӕмбӕлттӕ уодзиан ӕви нӕ, е. Давид финста: «Ке бон ӕй Йегови хонхмӕ исхезун, ке бон ӕй ӕ сугъдӕг бунатмӕ иссӕун? ...Мӕнгӕ сомитӕ ка нӕ кодта, уомӕн» (Пс. 24:3, 4). Цума Йеффай ӕма Аннӕ Хуцауӕн цӕхуӕн дзурд равардтонцӕ? Ӕнцон син адтӕй сӕ дзурд исӕнхӕст кӕнун?

5. Йеффай Йеговӕн цӕхуӕн дзурд равардта ӕма уой фӕсте ци ’рцудӕй?

⁵ Йеффай Йеговӕн дзурд равардта, аммонӕгти – Хуцауи адӕни знӕгти нихмӕ тохунмӕ ку цудӕй, уӕд (Тӕрх. 10:7–9). Лигъстӕ ин кодта, цӕмӕй ин сӕ ӕ къохмӕ равардтайдӕ ӕма расоми кодта: «Кӕд мин Аммони фуртти мӕ къохмӕ раттай ӕма... фӕстӕмӕ фарни хӕццӕ ӕрӕздӕхон, уӕд, мӕ хӕдзари дуарӕй мӕ размӕ ка рацӕуа, е уодзӕй Йегови». Цума идарддӕр ци ’рцудӕй? Йеффай аммонӕгтӕбӕл фӕууӕлахез ӕй. Хӕдзарӕмӕ ку ӕрӕздахтӕй, уӕд ӕ размӕ ӕ еунӕг кизгӕ рацудӕй. Нур еци кизгӕ гъӕуама Йегови иссайдӕ (Тӕрх. 11:30–34). Цума ин е цӕбӕл дзорӕг адтӕй?

6. а) Йеффай Хуцауӕн ци дзурд равардта, уой исӕнхӕст кӕнун ӕхецӕн дӕр ӕма ӕ кизгӕн дӕр ӕнцон цӕмӕннӕ адтӕй? б) Дуккаг закъон 23:21, 23 ӕма Псалом 15:4 куд зиннуй, Хуцауӕн дзурд раттун хумӕтӕг гъуддаг ке нӕй?

⁶ Цӕмӕй Йеффай ци дзурд равардта, уой исӕнхӕст кодтайдӕ, уой туххӕй ӕ кизгӕ гъӕуама ӕ цард-цӕрӕнбонти Йегови цатури лӕггадӕ кодтайдӕ. Цума уотӕ зӕгъӕн ес, ӕма Йеффай дзурд раттуни разӕй дзӕбӕх нӕ расагъӕс кодта? Нӕ, уомӕн ӕма ’й зудта, уомӕн дӕр гӕнӕн ке ес, ӕма ӕ хӕдзарӕй фиццаг ӕ кизгӕ рацӕуа. Фал ӕцӕгӕйдӕр уотӕ ку рауадӕй, уӕд ӕй фидӕ дӕр ӕма кизгӕ дӕр балӕдӕрдтӕнцӕ, сӕ дууемӕн дӕр ӕнцон ке нӕ уодзӕй. Йеффай ӕ кизги ку рауидта, уӕд «ӕ уӕледарӕс ӕрӕскъудта» ӕма загъта: «Мӕ зӕрдӕ мин барӕхустай!» Уой фӕсте ӕ кизгӕ рандӕ ’й, цӕмӕй, «киндзи ке некӕд ӕрцӕудзӕй, уобӕл фӕккудтайдӕ». Цума цӕмӕн? Йефаййӕн фурт н’ адтӕй. Ӕма нур ӕ еунӕг кизгӕ киндзи дӕр нӕбал ӕрцудайдӕ ӕма ин цӕуӕт дӕр некӕд адтайдӕ. Йеффаййи муггаг гъӕуама уобӕл исӕскъудайдӕ. Фал е сӕйраг н’ адтӕй. Йеффай загъта: «Ӕз Йеговӕн дзурд равардтон, ӕма ’й мӕ бон басайун нӕй». Ӕ кизгӕ ба ин загъта: «Куддӕриддӕр загътай, уотӕ бакӕнӕ» (Тӕрх. 11:35–39). Йеффай ӕма ӕ кизгӕ Йеговӕбӕл еузӕрдон адтӕнцӕ ӕма сагъӕс дӕр нӕ ракодтайуонцӕ, цӕмӕй Алцигъон Хуцауӕн лӕвӕрд ка ӕрцудӕй, еци дзурд мабал исӕнхӕст кодтайуонцӕ, кӕд син е ӕнцон н’ адтӕй, уӕддӕр. (Бакӕсӕ Дуккаг закъон 23:21, 23; Псалом 15:4.)

7. а) Аннӕ Хуцауӕн цӕхуӕн дзурд равардта ӕма цӕмӕн? Уой фӕсте ци ’рцудӕй? б) Аннӕ ци дзурд равардта, е Самуилӕн цӕбӕл дзорӕг адтӕй? (Кӕсӕ феппайуйнаг.)

⁷ Аннӕ дӕр адтӕй, Йеговӕн дзурд ка равардта ӕма ’й ка исӕнхӕст кодта, уӕхӕн адӕймаг. Аннӕ хъӕбӕр тухстӕй, сувӕллӕнттӕ ин ке не ’нтӕстӕй, уобӕл, Феннанӕ ба ма ин уой туххӕй ӕ уодӕй гъазта (1 Сам. 1:4–7, 10, 16). Аннӕ Йеговӕн радзурдта, цидӕриддӕр ӕй тухсун  кодта, уой ӕма ин дзурд равардта: «Ӕфсӕдти хецау Йеговӕ, кӕд дӕ цагъари гъезӕмарӕмӕ ӕркӕсай ӕма мӕ ӕргъуди кӕнай, кӕд нӕ феронх кӕнай дӕ цагъари ӕма ин биццеу раттай, уӕд ӕй ӕз ӕ цард-цӕрӕнбонтӕмӕ ратдзӕн Йеговӕн, ӕма ӕ сӕрбӕл сӕрдасӕн нӕ бамбӕлдзӕй» (1 Сам. 1:11) *. Хуцау Анни кувд фегъуста ӕма ин анзи фӕсте биццеу райгурдӕй. Ӕ цийнӕн кӕрон дӕр н’ адтӕй! Фал Хуцауӕн ци дзурд равардта, е си нӕ феронх ӕй, ӕма ин сувӕллон ку райгурдӕй, уӕд загъта: «Ӕз ӕй Йеговӕй ракурдтон» (1 Сам. 1:20).

8. а) Аннӕн ӕнцон адтайдӕ ӕ дзурд исӕнхӕст кӕнун? б) Давид 61 псаломи ци загъта, е Анни цӕветтони хӕццӕ куд баст ӕй?

⁸ Самуилбӕл еу ӕртӕ анзи ку цудӕй, уӕд Аннӕ, Йеговӕн ци дзурд равардта, уой исӕнхӕст кодта. Ӕ биццеуи Силоммӕ Йегови цатурмӕ ӕрбахудта ӕма хестӕр саугин Илийӕн загъта: «Мӕнӕ аци биццеуи туххӕй кувтон, ӕма мин Йеговӕ равардта, ци си курдтон, уой. Ӕма ’й нур ӕз дӕттун Йеговӕн. Цалинмӕ цӕра, уӕдмӕ уодзӕй Йегови» (1 Сам. 1:24–28). Уӕдӕй фӕстӕмӕ Самуил цардӕй Хуцауи цатури. Уоми «минкъий Самуил... ирӕзтӕй Йегови размӕ» (1 Сам. 2:21). Аннӕн ӕ дзурд исӕнхӕст кӕнун ӕнцон н’ адтайдӕ. Нур ин фадуат нӕбал адтӕй ӕ бӕдолӕбӕл цийнӕ кӕнун, ӕ хӕццӕ рӕстӕг ӕрветун ӕма, куд устур кӕнуй, уой уинун. Расагъӕс кӕнӕ, куд хъӕбӕр ӕй фӕндадтайдӕ ӕ сувӕллони ӕхемӕ ӕрбалхъевун, ӕ хӕццӕ рагъазун кенӕ ин еститӕ амонун. Фал Аннӕ уӕддӕр нӕ рафӕсмон кодта, Хуцауӕн уӕхӕн дзурд ке равардта, уобӕл. Йеговӕ адтӕй ӕ зӕрди цийнӕ (1 Сам. 2:1, 2; бакӕсӕ Псалом 61:1, 5, 8).

9. Аци статьяй цӕхуӕн фарстатӕмӕ ӕркӕсдзиан?

⁹ Куд ӕй фӕууидтан, уотемӕй Хуцауӕн ци дзурд раттӕн, уомӕ уӕлӕнгай цӕстӕй кӕсӕн нӕййес. Уомӕ гӕсгӕ ӕркӕсӕн уӕхӕн фарстатӕмӕ: киристон Хуцауӕн цӕхуӕн гъуддӕгти раттуй дзурд? Цӕмӕй ӕ дзурд исӕнхӕст кӕна, уой туххӕй ӕй куд архайун гъӕуй?

10. Киристон адӕймаг тӕккӕ ӕхсидзгӕдӕр дзурд кӕд раттуй ӕма ин е цӕбӕл дзорӕг фӕууй?

¹⁰ Адӕймаг ӕхе Йеговӕн ку иснивонд кӕнуй, уӕд искӕнуй ӕ царди тӕккӕ ӕхсидзгӕдӕр къахдзӕф. Цӕмӕн ес уотӕ зӕгъӕн? Уомӕн ӕма адӕймаг Йеговӕмӕ исковуй ӕма ин дзурд раттуй, нур ӕ цард уомӕн ке дӕттуй ӕма ин ӕносмӕ ке лӕггадӕ кӕндзӕй, цийфӕнди ма ӕрцӕуа, уӕддӕр. Йесо куд загъта, уомӕ гӕсгӕ уӕхӕн адӕймаг ӕхе туххӕй нӕбал фӕццӕруй, фал Йегови туххӕй, гъома ин ӕ фӕндон ӕнхӕст кӕнун ӕ царди фиццаг бунати исуй (Матф. 16:24). Еци бонӕй фӕстӕмӕ исуй Йегови (Ром. 14:8). Хуцауӕн уӕхӕн дзурд ка равардта, етӕ ’й гъӕуама лӕдӕронцӕ, еци дзурд исӕнхӕст кӕнун куд ӕхсидзгӕ ӕй, уой. Псаломзаргӕнӕг загъта: «Йеговӕн е ’гас хуарздзийнӕдтӕ цӕмӕй бафеддзӕн? Йеговӕн цӕй туххӕй расоми кодтон, уой исӕнхӕст кӕндзӕн, исӕнхӕст сӕ кӕндзӕн ӕ адӕни рази» (Пс. 116:12, 14).

11. Радзорӕ, донаргъуд куд райстай, уой туххӕй.

¹¹ Ду ба дӕ цард Йеговӕн иснивонд кодтай ӕма донаргъуд райстай? Кӕд гъо, уӕд е хъӕбӕр хуарз ӕй! Гъуди ма ’й кӕнис, донаргъуди фӕдбӕл радзубанди кӕмӕн адтӕй, еци ӕнсувӕр уӕхӕн фарста ку равардта, зӕгъгӕ, дӕхе Йеговӕн иснивонд кодтай? Уой фӕсте ба загъта: «Ду Хуцауӕн дзурд равардтай, ӕма нур донаргъуд ку райсай, уӕд исуодзӕнӕ Йегови Ӕвдесӕн ӕма лӕггадӕ кӕндзӕнӕ, Хуцау ӕ сугъдӕг хъаурӕй разамунд кӕмӕн дӕттуй, еци организаций. Лӕдӕрис ӕй, е ци нисан кӕнуй?». Еци фарстабӕл дӕ дзуапп «гъо» ке адтӕй, уомӕй бавдистай, дӕхе Йеговӕн ке иснивонд кодтай ӕма донаргъуд райсунмӕ, удта ин лӕггадӕ кӕнунмӕ цӕттӕ ке дӕ, уой. Расагъӕс кӕнӕ, Йеговӕн куд ӕхцӕуӕн адтӕй!

12. а) Нӕхемӕ цӕхуӕн фарстатӕ нӕ бон ӕй раттун? б) Петур куд балӕдӕрун кодта, уомӕ гӕсгӕ нӕ цӕбӕл гъӕуй архайун?

 ¹² Фал донаргъуд ӕрмӕстдӕр райдайӕн ӕй. Донаргъуди фӕсте мах фӕййархайӕн, Йеговӕн ци дзурд равардтан, уомӕ гӕсгӕ цӕрун ӕма ин идарддӕр дӕр еузӕрдонӕй лӕггадӕ кӕнун. Уомӕ гӕсгӕ хуарз уайдӕ нӕхемӕ уӕхӕн фарстатӕ раттун: «Донаргъуди фӕсте ма мин Хуцауи гъуддаги фулдӕр ци бантӕстӕй? Абони дӕр ин раздӕри хузӕн зӕрдиагӕй лӕггадӕ кӕнун? (Кол. 3:23). Куд арӕх имӕ фӕкковун? Хуцауи Дзурд алли бон дӕр кӕсун? Ӕмбурдтӕ нӕ цох кӕнун? Игъосун кӕнуни гъуддаги мӕ бон цӕйбӕрцӕ ӕй, уойбӕрцӕ архайун? Ӕви кӕцидӕр гъуддӕгти уотӕ зингзӕрдӕ нӕбал дӕн?» Апостол Петур балӕдӕрун кодта, ци кӕнун гъӕуй, цӕмӕй алкӕддӕр зингзӕрдӕй лӕггадӕ кӕнӕн. Уой туххӕй гъӕуама не ’гас хъауритӕй архайӕн, цӕмӕй нӕмӕ уа фулдӕр ӕууӕндундзийнадӕ, зонундзийнӕдтӕ, федардзийнадӕ, удта гъӕуама Хуцаубӕл еузӕрдон уӕн. (Бакӕсӕ 2 Петури 1:5–8.)

13. Йеговӕн ӕ цард ка иснивонд кодта ӕма донаргъуд ка райста, е ци гъӕуама лӕдӕра?

¹³ Хуцауӕн ци дзурд равардтан, уомӕн раййевӕн нӕййес. Кӕд адӕймаг бафӕлладӕй Йеговӕн  лӕггадӕ кӕнун кенӕ киристон цардӕй цӕрун, уӕд ӕ бон уотӕ зӕгъун нӕй, Хуцауӕн ци дзурд равардтон, е ӕцӕгӕй н’ адтӕй ӕма мӕ донаргъуд дӕр нимад нӕй, зӕгъгӕ *. Цӕмӕн? Уомӕн ӕма иннети рази ӕргом загъта, е ’гас цард дӕр Хуцауӕн ке равардта. Мадта уӕззау тӕрегъӕд ку искӕна, уӕд ибӕл дзуапп дӕтдзӕй Хуцауи рази дӕр ӕма ӕмбурди рази дӕр (Ром. 14:12). Макӕд бауадзӕ, цӕмӕй дӕмӕ раздӕр ци уарзондзийнадӕ адтӕй, е фесӕфа. Уотӕ архайӕ, цӕмӕй Йесой бон уа дӕуӕй зӕгъун: «Зонун дин дӕ гъуддӕгтӕ, дӕ уарзондзийнадӕ, де ’ууӕндундзийнадӕ, дӕ лӕггадӕ ӕма дӕ федардзийнадӕ, удта, дӕ фӕстаг гъуддӕгтӕ фиццӕгтӕй фулдӕр ке ’нцӕ, уой дӕр» (Рарг. 2:4, 19). Мах фӕндуй Йегови зӕрдӕ рохс кӕнун, ци нивонддзурд равардтан, уомӕ гӕсгӕ ке цӕрӕн ӕма ин зингзӕрдӕй ке лӕггадӕ кӕнӕн, уомӕй.

14. Адӕймаг ма цӕхуӕн ӕхсидзгӕ дзурд раттуй?

¹⁴ Адӕймаг ци ӕхсидзгӕ гъуддӕгти раттуй дзурд, уонӕй дуккаг ӕй, ӕ цардӕмбалӕн ке раттуй, е. Цӕмӕн ес уотӕ зӕгъӕн? Уомӕн ӕма Хуцауи цӕсти бийнонти цард табуйаг ӕй. Дууӕ уоди кӕрӕдземӕн дзурд раттунцӕ Хуцауи ӕма адӕни рази. Дзурд раттунцӕ, кӕрӕдзей ке уарздзӕнцӕ, кӕрӕдземӕн ке кадӕ кӕндзӕнцӕ ӕма кӕрӕдзебӕл ке тухсдзӕнцӕ, «цалинмӕ зӕнхӕбӕл цӕронцӕ, уӕдмӕ, Хуцау ӕнкъайадӕн ци уагӕ исфедар кодта, уомӕ гӕсгӕ». Кадӕртӕ, ӕвӕдзи, аци дзурдтӕ нӕ фӕззӕгъунцӕ, фал уӕддӕр Хуцауи размӕ дзурд раттунцӕ, ӕма уой фӕсте исунцӕ лӕг ӕма уосӕ. Е ба уобӕл дзорӕг ӕй, ӕма нур алкӕддӕр еумӕ уодзӕнцӕ (Райд. 2:24; 1 Кор. 7:39). Киристе дӕр уой туххӕй загъта, «Хуцау ци байеу кодта, уой адӕймаг ма рахецӕн кӕнӕд», зӕгъгӕ, нӕдӕр лӕг, нӕдӕр уосӕ, нӕ ба ӕндӕр еске (Мар. 10:9).

15. Киристӕнттӕ бийнонти цардмӕ цийфӕнди цӕстӕй цӕмӕннӕ кӕсунцӕ?

¹⁵ Ке зӕгъун ӕй гъӕуй, бийнонти цард алкӕд ӕнцон нӕ фӕууй, уомӕн ӕма еумӕ цӕрун райдайунцӕ дууӕ ӕнӕнхӕст адӕймаги. Библи дӕр уомӕ гӕсгӕ зӕгъуй, бийнонтӕ ка искӕна, уонӕн сӕ царди «нӕуӕг зиндзийнӕдтӕ» ке фӕззиндзӕй (1 Кор. 7:28). Гъигагӕн, фулдӕр адӕн бийнонти цардмӕ цийфӕнди цӕстӕй кӕсунцӕ. Лӕг ӕма уоси астӕу ести зиндзийнӕдтӕ ку фӕззиннуй, уӕд кӕрӕдзей балӕдӕруни бӕсти рахецӕн унцӕ. Фал киристӕнттӕн уотӕ гӕнӕн нӕййес. Етӕ ’й лӕдӕрунцӕ, дзурд Хуцауи рази ке равардтонцӕ. Ӕма еци дзурдӕн хецау ку нӕ разиннонцӕ, уӕд уотӕ уайуй, ӕма Хуцауи басайдтонцӕ. Хуцау ба, сайгӕ ка кӕнуй, уонӕй е ’сӕфт уинуй (Лев. 19:12; Ӕмб. 6:16–19). Бийнонтӕ кӕмӕн ес, етӕ гъӕуама сӕ зӕрдӕбӕл даронцӕ апостол Павели дзурдтӕ: «Уосӕ дин ес? Уӕд ма архайӕ, куд си исуӕгъдӕ уай, уобӕл» (1 Кор. 7:27). Павел аци дзурдтӕ цӕмӕн загъта? Уомӕн ӕма ’й зудта, Йеговӕ е ’сӕфт ке уинуй, адӕймаг ӕ цардӕмбалбӕл гадзирахаттӕй ку рацӕуй ӕма си ку рахецӕн уй, уомӕй (Мал. 2:13–16).

16. Библий хецӕн кӕнуни ӕма хецӕнтӕй цӕруни туххӕй ци финст ес?

¹⁶ Йесо куд балӕдӕрун кодта, уотемӕй хецӕн кӕнун ӕрмӕстдӕр еунӕг гъуддаги туххӕй ӕнгъезуй – адӕймагбӕл ӕ цардӕмбал гадзирахаттӕй ку рацӕуа ӕма ин ниххатир кӕнун ӕ бон ку нӕ уа, уӕд (Матф. 19:9; Дзиуит. 13:4). Хецӕнӕй цӕруни туххӕй ба ци ес зӕгъӕн? Библий уой фӕдбӕл дӕр ес бӕлвурд амундтӕ. (Бакӕсӕ 1 Коринфӕгтӕмӕ 7:10, 11.) Библимӕ гӕсгӕ лӕг ӕма уосӕ хецӕнтӕй гъӕуама ма цӕронцӕ. Фал еуӕй-еухатт киристон, гӕнӕн ес, ӕма унаффӕ рахӕсса, ӕ цардӕмбалӕй рандӕ ун. Зӕгъӕн, ӕ цардӕн тӕссаг ку уа, фуднад ӕй ке кӕнуй, уой туххӕй,  кенӕ е ’ууӕндундзийнадӕн тӕссаг ку уа, раст дин ка ниууагъта, уони зундбӕл ӕй ке аразуй, уой туххӕй *.

17. Лӕг ӕма уосӕн ци банхус кӕндзӕй сӕ бийнонти цард багъӕуай кӕнун?

¹⁷ Еуӕй-еухатт лӕг ӕма уосӕ хестӕр нӕлгоймӕгтӕмӕ ӕнхусмӕ бацӕунцӕ. Уӕхӕн уавӕри хестӕр нӕлгоймӕгтӕн сӕ бон ӕй зӕгъун, хуарз ке адтайдӕ бакӕсун киномӕ «Цы у ӕцӕг уарзондзинад?», удта рартасун брошюрӕ «Уӕ бийнонтӕ амондгун уӕнтӕ!». Цӕмӕн? Уомӕн ӕма аци киной ӕма брошюри ес хуарз унаффитӕ Библийӕй, ӕма бийнонти цардӕн устур ӕнхус ӕнцӕ. Еу лӕг ӕма уосӕ загътонцӕ: «Аци брошюрӕ еумӕ ӕртасун ку райдӕдтан, уӕд кӕрӕдземӕ никки хӕстӕгдӕр иссан». Еу хуӕрӕ ӕ лӕги хӕццӕ 22 анзи фӕццардӕй ӕма еу рӕстӕг минкъийтӕбӕл ма нӕ рахецӕн ӕнцӕ. Е загъта: «Нӕ дууӕ дӕр донаргъуд киристӕнттӕ адтан, фал кӕрӕдзей нӕбал лӕдӕрдтан. Еци кино ба ӕ ӕфонӕбӕл рацудӕй! Нур нӕ бийнонти цард дзӕвгарӕ хуӕздӕр фӕцӕй». Ӕцӕгӕйдӕр, лӕг ӕма уосӕ еумӕ цӕргӕй Йегови уагӕвӕрдтӕмӕ гӕсгӕ ку фӕййархайунцӕ, уӕд сӕ цард амондгундӕр фӕууй ӕма кӕрӕдземӕ никки хӕстӕгдӕр исунцӕ!

18, 19. а) Берӕ киристон ниййергутӕ сӕ сувӕллӕнтти цӕмӕ разӕнгард кӕнунцӕ? б) Сӕрмагонд ӕнхӕстрӕстӕг лӕггадгӕнгутӕ ци дзурд раттунцӕ, уомӕ ци хауй?

¹⁸ Райдайӕни дзурдтан, Йеффай ӕма Аннӕ цӕхуӕн дзурд равардтонцӕ, уой туххӕй. Йеффай дзурд равардта, ӕ кизгӕ цӕрӕнбонти Хуцауи цатури ке лӕггадӕ кӕндзӕй. Аннӕ ба уӕхӕн дзурд ӕ биццеуи туххӕй равардта. Абони дӕр берӕ ниййергутӕ сӕ сувӕллӕнтти разӕнгард кӕнунцӕ, цӕмӕй ӕнхӕстрӕстӕг лӕггадӕ кӕнун райдайонцӕ ӕма сӕ хъауритӕ Хуцауи гъуддагӕн раттонцӕ. Уотӕ ка архайуй, еци ӕригон хуӕртӕ ӕма ӕнсувӕртӕ ӕцӕгӕйдӕр растауйнаг ӕнцӕ (Тӕрх. 11:40; Пс. 110:3).

¹⁹ Абони Йегови Ӕвдесӕнти организаций сӕрмагонд ӕнхӕстрӕстӕг лӕггадгӕнгутӕ ӕгас дуйнебӕл ӕнцӕ 67 000 адӕймаги. Кадӕртӕ си лӕггадӕ кӕнунцӕ Вефилти, районон цӕстӕдаргутӕй, сӕрмагонд пионертӕй, миссионертӕй, арӕзтади косгутӕй, удта зелунцӕ Конгрессти залтӕмӕ ӕма, скъолатӕ кӕми фӕццӕунцӕ, еци бунӕттӕмӕ. Иннетӕ ба лӕггадӕ кӕнунцӕ аллихузи скъолати ахургӕнгутӕй, зӕгъӕн, фӕууадзунцӕ Хуцауи Паддзахадӕ игъосунгӕнгути скъола, Хестӕр нӕлгоймӕгти скъола ӕма Скъола цӕуӕг цӕстӕдаргутӕн ӕма сӕ уоститӕн. Алкедӕр си дзурд раттуй, коммӕгӕс ке уодзӕй ӕма хумӕтӕг цард ке кӕндзӕй. Етӕ цӕттӕ фӕуунцӕ Йегови гъуддаги цийфӕнди ихӕстӕ ӕнхӕст кӕнунмӕ дӕр, фӕуунцӕ бонзонгӕ ӕма син барӕ ку нӕ раттонцӕ, уӕд косгӕ некӕми фӕккӕнунцӕ. Сӕрмагонд лӕггадгӕнгутӕ ке хуннунцӕ, е уобӕл дзорӕг нӕй, ӕма иннетӕй хуӕздӕр ӕнцӕ, фал сӕ лӕггадӕ иннети лӕггадӕй хецӕн кӕнуй. Сӕ федар фӕндӕ ӕй, ци дзурд равардтонцӕ, уой ӕнхӕст кӕнун, цалинмӕ сӕрмагонд лӕггадгӕнгутӕ ’нцӕ, уӕдмӕ.

20. «Алли бон дӕр» ци гъӕуама кӕнӕн ӕма цӕмӕн?

²⁰ Аци статьяй ӕркастан, Хуцауӕн дзурд кӕми раттӕн, ӕртӕ уӕхӕн гъуддагемӕ. Ка ’й зонуй, ду дӕр аци гъуддӕгтӕй кӕцидӕри дзурд равардтай. Мах ӕй зонӕн, ци дзурд раттӕн, уомӕ уӕлӕнгай цӕстӕй кӕсӕн ке нӕййес ӕма ’й цӕмӕй исӕнхӕст кӕнӕн, уой туххӕй нӕ ӕгас хъауритӕй архайун ке гъӕуй (Ӕмб. 20:25). Хуцауи рази ци дзурд равардтан, уой ку не ’сӕнхӕст кӕнӕн, уӕд нин е, гӕнӕн ес, ӕма устур зиан ӕрхӕсса (Еккл. 5:6). Мадта мах дӕр уӕн псаломзаргӕнӕги хузӕн. Е Йеговӕн загъта: «Ӕз ӕносмӕ зардзӕн дӕ номӕн, цӕмӕй мӕ сомитӕ алли бон дӕр ӕнхӕст кӕнон» (Пс. 61:8).