1. (a) Kiko Hues Yefta i Ana tabatin en komun? (Wak e promé plachi.) (b) Ki preguntanan nos lo kontestá den e artíkulo akí?

HUES Yefta tabata un lider i guerero balente; Ana, esposa di Elkana, tabata sumiso i un humilde ama di kas. Nan tabata sirbi e mesun Dios, pero kiko mas nan tabatin en komun? Tur dos a hasi un promesa na Dios, i tur dos a kumpli ku nan promesa fielmente. Nan ta ekselente ehèmpel pa hòmber- i muhénan awe ku ta skohe pa hasi un promesa na Yehova. Sinembargo, ta lanta algun pregunta importante: Kon serio nos mester tuma nos promesanan na Dios? Ki les nos por siña for di Yefta i Ana?

2, 3. Kiko Beibel ta bisa tokante hasimentu di promesa na Dios?

² Segun Beibel, un hende ku hasi un promesa ta un hende ku ta komprometé su mes pa hasi algu, pa ofresé un regalo, pa drenta un tipo di sirbishi òf pa apstené di sierto kosnan. Un promesa ta algu ku ta sali for di nos mes, di nos mes boluntat i no fòrsá. Apesar di esei, nan ta sagrado, i Dios ta ferwagt ku nos ta kumpli ku nan pasobra nan tin e mesun peso ku un huramentu pa hasi òf keda sin hasi algu. (Gén. 14:22, 23; Heb. 6:16, 17) Kiko Beibel ta bisa tokante e seriedat di hasi promesa na Dios?

³ E Lei di Moises ta bisa: “Ora ku un hòmber hasi un promesa na SEÑOR, òf hasi un huramentu . . . , e no mester kibra  su palabra; e mester hasi konforme tur loke sali for di su boka.” (Num. 30:2) Despues, Dios a inspirá Sálomon pa skirbi: “Ora bo hasi un promesa na Dios, no tarda pa kumpli kuné, pasobra e no ta hiba gustu den hende bobo. Kumpli ku loke bo ta primintí!” (Ekl. 5:4) Hesus a konfirmá kon serio hasimentu di promesa ta ora el a bisa: “Boso a tende ku a bisa nos antepasadonan: ‘No hura i keda sin kumpli; mas bien, kumpli ku e promesanan solèm ku bo a hasi na Yehova.’”—Mat. 5:33.

4. (a) Dikon hasimentu di un promesa na Dios ta un asuntu serio? (b) Kiko nos ta bai siña di Yefta i Ana?

⁴ Ta bisto anto ku hasimentu di promesa na Dios ta un asuntu masha serio. Nos aktitut pa ku nos promesanan por tin un efekto riba nos relashon ku Yehova. David a puntra: “Ken por subi bai den e seru di SEÑOR? I ken por para den su lugá santu?” E mes a kontestá ku Yehova ta aseptá esun “ku no a hura ku engaño.” (Sal. 24:3, 4) Ki promesa Yefta i Ana a hasi, i tabata fásil pa nan kumpli ku nan promesa?

5. Ki promesa Yefta a hasi, i kiko tabata e resultado?

⁵ Yefta a kumpli fielmente ku e promesa ku el a hasi na Yehova ora el a bai guera kontra e amonitanan, kendenan tabata terorisá e pueblo di Dios. (Hues. 10:7-9) Yefta tabatin masha gana di haña viktoria, i p’esei el a primintí Dios: “Si di bèrdat bo entregá e yu hòmbernan di Amon den mi man, e ora ei kiko ku sali for di e portanan di mi kas pa kontra mi ora mi bolbe na pas for di e yu hòmbernan di Amon, lo ta di SEÑOR.” Kiko tabata e resultado? Yehova a derotá e amonitanan, i tabata Yefta su yu muhé stimá kende a bin enkontr’é ora el a yega kas. Yefta su yu muhé tabata esun ku lo a bira “di SEÑOR.” (Hues. 11:30-34) Kiko esei a nifiká p’e?

6. (a) Dikon no tabata fásil pa Yefta i su yu kumpli ku Yefta su promesa na Dios? (b) Kiko Deuteronomio 23:21, 23 i Salmo 15:4 ke siña bo tokante hasi promesa na Dios?

⁶ Pa e yu muhé di Yefta kumpli ku e promesa di su tata, e mester a sirbi Yehova fultaim na e santuario. Akaso Yefta a hasi un promesa sin pensa? Nò, pasobra e mester a realisá ku un di e hendenan ku lo por a sali kontra kuné lo por tabata su propio yu muhé. Sea kual sea, esaki tabata un situashon difísil pa tantu tata komo yu pasobra nan tur dos mester a hasi un gran sakrifisio. Ora Yefta a mira su yu muhé, el “a sker su pañanan” i a bisa ku su kurason tabata kibrá. Anto su yu a ‘yora pa motibu di su birginidat.’ Dikon? Pasobra Yefta no tabatin yu hòmber, i su úniko yu muhé lo no por a kasa nunka i dun’é ñetu. No tabatin niun hende ku por a sigui ku e nòmber i herensia di e famia. Pero esei no tabata nan preokupashon di mas grandi. Yefta a bisa: “Mi a duna SEÑOR mi palabra, i mi no por hala esaki atras.” Su yu muhé a kontest’é: “Hasi ku mi manera bo a bisa.” (Hues. 11:35-39) Yefta i su yu tabata fiel, i niun ora so nan no a pensa pa keda sin kumpli ku un promesa hasí na e Dios Haltísimo, sea kual sea e sakrifisio personal ku nan mester a hasi.—Lesa Deuteronomio 23:21, 23; Salmo 15:4.

7. (a) Ki promesa Ana a hasi na Dios, i dikon? (b) Kiko tabata e resultado? (c) Kiko e promesa di Ana a nifiká pa Samuel? (Wak nota.)

⁷ Ana tambe a kumpli fielmente ku e promesa ku el a hasi na Yehova. Ora el a  hasi e promesa, e tabata hopi angustiá pasobra e tabata steril i mester a soportá hopi insulto. (1 Sam. 1:4-7, 10, 16) Ana a deshogá su kurason serka Yehova i a primintié: “O SEÑOR di ehérsitonan, si di bèrdat bo mira e aflikshon di bo sirbiente i kòrda riba mi i no lubidá riba bo sirbiente, ma duna bo sirbiente un yu hòmber, e ora ei lo mi dun’é na SEÑOR tur e dianan di su bida, i nunka nabaha lo no pasa riba su kabes.” * (1 Sam. 1:11) Yehova a skucha Ana su petishon, i el a duna lus na su promé yu hòmber. Ana a keda masha kontentu! Ma e no a lubidá e promesa ku el a hasi na Dios. Ora el a duna lus na su yu hòmber, el a bisa: “Mi a pidié na SEÑOR.”—1 Sam. 1:20.

8. (a) Tabata fásil pa Ana kumpli ku su promesa? (b) Ki palabranan di David na Salmo 61 ta pone bo kòrda riba e bon ehèmpel di Ana?

⁸ Asina ku Samuel a kita for di pechu ku mas o ménos tres aña di edat, Ana a hasi presis loke el a primintí Dios. E no a pensa mes pa hasi otro. El a hiba Samuel serka Sumo Saserdote Elí na e tabernakel na Silo i a bisa: “Pa e mucha akí mi a hasi orashon, i SEÑOR a duna mi mi petishon ku mi a hasi na dje. P’esei tambe mi a dedik’é na SEÑOR; tanten ku e ta na bida e ta dediká na SEÑOR.” (1 Sam. 1:24-28) Na e tabernakel, “e mucha hòmber Samuel a krese dilanti di SEÑOR.” (1 Sam. 2:21) Kiko esei a nifiká pa Ana? E tabata stima su yuchi mashá, pero awor e no por tabata kuné tur dia durante su infansia. Imaginá kuantu gana Ana tabatin di bras’é, hunga kuné, kuid’é i biba e dushi momentonan di wak su yu krese. Tòg, no a duel Ana ku el a kumpli ku su promesa. E tabata masha kontentu pa hasi e boluntat di Yehova.—1 Sam. 2:1, 2; Lesa Salmo 61:1, 5, 8.

9. Ki preguntanan nos mester kontestá?

⁹ Awor ku nos ta komprondé ku hasimentu di promesa na Dios ta un asuntu masha serio, laga nos analisá e siguiente preguntanan: Komo kristian, ki promesanan nos por hasi? I kon determiná nos mester ta pa kumpli ku nos promesanan?

10. Kua ta e promesa di mas importante ku un kristian por hasi, i kiko esaki ta enserá?

¹⁰ E promesa di mas importante ku un kristian por hasi ta esun di dediká su bida na Yehova. Dikon? Pasobra den un orashon personal, e ta hasi un promesa solèm na Yehova ku lo e usa su bida pa sirbié pa semper, pase lo ke pase. Pues, pa usa e palabranan di Hesus, e ta “nenga su mes,” ta entregá tur su derechonan i ta primintí di pone e boluntat di Dios promé ku tur kos den su bida. (Mat. 16:24) For di e dia ei padilanti, ‘e ta pertenesé na Yehova.’ (Rom. 14:8) Ken ku hasi un promesa di dedikashon mester tuma esaki masha na serio, meskos ku e salmista kende a papia di e promesanan ku el a hasi na Dios, bisando: “Kiko lo mi duna SEÑOR pa tur su benefisionan na mi? Lo mi kumpli ku mi promesanan na SEÑOR den presensia di henter su pueblo.”—Sal. 116:12, 14.

11. Kiko a sosodé riba dia di bo boutismo?

¹¹ Bo a dediká bo bida na Yehova i a batisá komo símbolo di bo dedikashon na dje? Si ta asina, esei ta hopi bon! Kòrda ku riba e dia ku bo a batisá, e oradó a puntra bo dilanti di tur presente si bo a dediká bo mes na Yehova i si bo a  komprondé ku “bo dedikashon i boutismo ta identifiká bo komo un Testigu di Yehova asosiá ku Dios su organisashon ku e ta guia pa medio di su spiritu.” Bo kontestanan kla i afirmativo riba e preguntanan ei a indiká ku bo a kualifiká pa batisá komo un sirbidó ordená di Yehova Dios. Yehova lo mester a keda masha kontentu!

12. (a) Ta bon pa nos hasi nos mes ki preguntanan? (b) Ki kualidatnan Pedro a bisa ku nos mester kultivá?

¹² Pero boutismo ta djis e komienso. Despues di esei, nos mester sigui biba di akuerdo ku nos dedikashon na Dios i sirbié fielmente. Pues nos por puntra nos mes: ‘Kuantu progreso spiritual mi a hasi despues di mi boutismo? Mi ta sirbiendo Yehova ainda ku henter mi kurason? (Kol. 3:23) Mi ta hasi orashon, lesa e Palabra di Dios, asistí na e reunionnan i partisipá den sirbishi di vèlt mas tantu posibel? Òf mi a baha man na aktividatnan spiritual?’ Apòstel Pedro a splika ku nos por evitá di bira inaktivo den nos sirbishi na Dios si nos sigui agregá na nos fe konosementu, perseveransia i deboshon na Dios.—Lesa 2 Pedro 1:5-8.

13. Kiko un kristian dediká i batisá mester realisá?

 ¹³ Ta imposibel pa kanselá nos promesa di dedikashon i hala atras for di loke nos a primintí Dios. Si un hende kansa di sirbi Yehova òf di hiba un bida kristian, e no por bisa ku nunka el a ègt dediká su mes na Dios i ku su boutismo no tabata bálido. * En realidat, el a presentá su mes komo un hende kompletamente dediká na Dios. Si e kometé un piká grave, e mester duna kuenta i rason na Yehova i e kongregashon. (Rom. 14:12) Hamas nos lo ke ta manera hende di ken Hesus a bisa ku ‘nan a pèrdè e amor ku nan tabatin na kuminsamentu.’ En bes di esei, nos ke pa e bisa tokante nos: “Mi konosé bo obranan, i bo amor, fe, sirbishi i perseveransia, i mi sa ku bo obranan di awor ta mas ku esnan di ántes.” (Rev. 2:4, 19) Laga nos sigui sirbi Yehova ku zelo i kumpli ku nos promesa di dedikashon i asina hasi su kurason kontentu.

14. Kua ta e di dos promesa di mas importante ku un hende por hasi, i dikon?

¹⁴ E di dos promesa di mas importante ku un hende por hasi ta su voto matrimonial. Dikon? Pasobra matrimonio ta sagrado den bista di Dios. E brùit i e brùidehòm ta deklará nan voto matrimonial dilanti di Dios i dilanti di tur hende presente. Por lo general, nan ta primintí di stima, balorá i respetá otro i ku nan lo hasi esaki ‘tanten ku nan dos ta na bida, segun e areglo matrimonial di Dios.’ Otro pareha kisas lo no a usa e mesun palabranan akí, pero tòg nan a hasi un promesa dilanti di Dios. Despues ta deklará nan esposo i esposa, i nan matrimonio mester ta un union ku tin ku dura pa semper. (Gén. 2:24; 1 Kor. 7:39) Pues, pa usa e palabranan di Hesus: “No laga ningun hende separá loke Dios a uni bou di un yugo”—ni e esposo ni e esposa ni niun otro hende. Pues, un pareha ku ta bai kasa mester tin e punto di bista ku divorsio no ta un opshon.—Mar. 10:9.

15. Dikon kristiannan no mester mira matrimonio manera hende den e mundu akí ta mir’é?

¹⁵ Klaru, nunka no tabatin un matrimonio perfekto. Tur matrimonio ta konsistí di dos hende imperfekto. P’esei Beibel ta bisa ku tin bes hende kasá “lo haña nan ku difikultat.” (1 Kor. 7:28) Ta tristu pa bisa, pero tin hopi hende den e mundu akí ku no ta tuma matrimonio na serio. Ora nan kuminsá haña nan ku frikshon den nan matrimonio, nan ta kla pa entregá i divorsiá di nan kasá. Pero kristiannan no mester hasi esei. Ora un hende no kumpli ku su voto matrimonial, ta komo si fuera ta gaña e ta gaña Dios, i Dios ta odia gañadó. (Lev. 19:12; Pro. 6:16-19) Apòstel Pablo a skirbi: “Bo tin un esposa? Stòp di buska moda di libra bo di dje.” (1 Kor. 7:27) Pablo por a bisa esei komo ku e tabata sa ku Yehova ta odia divorsio tambe pasobra esei ta un traishon.—Mal. 2:13-16.

16. Kiko Beibel ta bisa tokante divorsio i separashon?

¹⁶ Hesus a siña ku e úniko motibu bíbliko pa divorsio ta si un kasá kometé adulterio i e pareha inosente disidí di no pordoná su kasá. (Mat. 19:9; Heb. 13:4) Awor, kiko si un pareha kasá ke separá?  Beibel ta masha kla riba e punto akí tambe. (Lesa 1 Korintionan 7:10, 11.) E no ta duna niun base pa separashon. Sinembargo, algun kristian kasá a haña ku sierto situashon ta hustifiká un separashon, por ehèmpel si un kasá violento òf apóstata ta pone bida i spiritualidat di e ruman den peliger serio. *

17. Kiko un pareha kristian por hasi pa nan matrimonio dura pa semper?

¹⁷ Ora un pareha kasá aserká ansianonan di e kongregashon pa haña konseho pa nan problemanan matrimonial, ta bon pa e ansianonan puntra e pareha si resientemente nan a wak e vidio Kon Bo Por Sa si Ta Amor? i si komo famia nan a studia e foyeto Bo Por Tin un Bida di Famia Felis. Dikon? Pasobra e publikashonnan akí ta enfatisá e prinsipionan bíbliko ku a yuda hopi pareha fortalesé nan matrimonio. Un pareha a bisa: “For di tempu ku nos a kuminsá studia e foyeto akí, nos ta mas felis ku nunka.” Un esposa a bisa tokante su matrimonio di 22 aña ku tabata a punto di kibra: “Nos tur dos ta batisá, pero emoshonalmente nos a distansiá for di otro. E vidio a sali nèt na ora! Komo pareha, awor kosnan ta bai muchu mas mihó ku nos.” Si bo ta kasá, hasi tur bo esfuerso pa apliká e prinsipionan di Yehova den bo matrimonio. Esei lo yuda bo kumpli ku bo voto matrimonial, i lo bo ta felis!

18, 19. (a) Kiko hopi mayor kristian a hasi? (b) Kiko nos por bisa di rumannan ku ta den sirbishi spesial di tempu kompleto?

¹⁸ Bo a ripará kiko mas Yefta i Ana tabatin en komun? E promesa ku nan a hasi a pone ku tantu Yefta su yu komo Ana su yu mester a ser dediká na sirbishi spesial na e tabernakel. Esei a duna nan un bida yen di satisfakshon. Awe, hopi mayor kristian a animá nan yunan pa drenta den e sirbishi di tempu kompleto i pa nan enfoká riba sirbishi na Dios. Hóbennan ku a hasi esei meresé elogio.—Hues. 11:40; Sal. 110:3.

¹⁹ Aktualmente, tin mas o ménos 67.000 miembro den e Órden Mundial di Sirbishi Spesial di Tempu Kompleto di Testigunan di Yehova. Algun di nan ta sirbi na Bètel, otronan ta yuda den trabou di konstrukshon òf sirkuito. Algun ta instruktor di skolnan teokrátiko, pionero spesial, misionero òf sirbidó di Salòn di Asamblea òf di fasilidat di skolnan bíbliko. Nan tur ta mará na e “Voto di Obedensia i Pobresa,” den kua nan ta bai di akuerdo pa kumpli ku kualke asignashon ku nan haña pa promové interesnan di Reino, pa hiba un bida simpel i pa no hasi trabou sekular sin pèrmit. Loke ta spesial ta e asignashon, no e persona ku ta risibié. Nan ta mira e seriedat di kumpli humildemente ku nan promesa solèm miéntras nan ta den sirbishi spesial di tempu kompleto.

20. Kiko nos mester hasi “dia tras dia,” i dikon?

²⁰ Kuantu di e promesanan ku nos a analisá bo a hasi na Dios? Un, dos òf tur tres? Sigur bo ta realisá ku bo mester tuma bo promesanan na serio. (Pro. 20:25) Si nos no kumpli ku nos promesanan na Yehova, nos lo por haña konsekuensianan serio. (Ekl. 5:6) P’esei, laga nos hasi manera e salmista kende a bisa: “Lo mi kanta alabansa na bo nòmber pa semper, pa dia tras dia mi paga mi promesanan.”—Sal. 61:8.