1. (a) Dahme Sepda oh Ana wia me duwehpene? (Menlau kilang tepin kilel.) (b) Peidek dah kan me kitail pahn sapengala nan iren onop wet?

 SEPDA wia kaun oh sounpei eimah men. Ana wia lih aktikitik men me kin apwalih eh pwoudo oh imwarao. Sepda oh Ana kin kaudokiong Siohwa. Ahpw pil mie mehkot me ira wia me duwehpene. Ira koaros wiahda inou ong Siohwa, oh ni lelepek ira kapwaiada ara inou ko. Ira wia mehn kahlemeng mwahu ong irail kan rahnwet me pilada en wiahda inou ong Siohwa. Kitail pahn koasoiapene pasapengpen peidek pwukat: Ia uwen kesempwal en wiahda inou ong Koht? Iren kasukuhl dah kan me kitail kak sukuhlkihsang Sepda oh Ana?

2, 3. Dahme Paipel mahsanih duwen en wiahda inou ong Koht?

² Nan Paipel, emen ele inoukihong Siohwa me e pahn wia mehkot, kihda kisakis ehu, wia soangen doadoahk en papah, de soikala soahng kei. Aramaso kin doadoahngki pein eh saledek en wiahda pilipil pwehn wiahda inou pwukat. Sohte me pahn idingkihong en wiahda inowo. Ahpw ni aramaso eh pein pilada en wia met, Siohwa pahn ketin kilangwohng inowo nin duwen mehkot kesempwal, oh aramaso anahne wauneki oh kapwaiada. Nan Paipel, soangen inou wet kin kesempwal duwehte emen eh kahukihla mehkot. En kahula kin wia mehn kadehde kehlail ehu me ke pahn wia de sohte wia mehkot. (Sen. 14:22, 23;  Ipru 6:16, 17) Dahme Paipel mahsanih duwen kesempwalpen en wiahda inou ong Koht?

³ Nan Kosonned en Moseso, kitail wadek me ma aramas emen wiahda inou ehu ong Siohwa, “e sohte pahn kauwehla eh inowo, ahpw e pahn kapwaiada mehkot me e inoukidahr.” (Nemp. 30:2) Mwuhr, Solomon ntingihedi: “Ni omw pahn wia inou ong Koht, kapwaiada mwadang uwen omw kak. E sohte kin ketin kupwure me pweipwei kan. Kapwaiada dahme ke inoukihda me ke pahn wia.” (Ekl. 5:4) Sises ketin padahngki me en wiahda inou ong Koht kin uhdahn kesempwal ni eh mahsanih: “Padahk wet me kohiengehr mehn mahs ako: ‘Ke dehr kauwehla omw inou ong Koht, a kapwaiada dahme ke kahukihla me ke pahn wiahda mwohn silangin Koht.’”​—Mad. 5:33.

4. (a) Ia uwen kesempwal en wiahda inou ong Koht? (b) Dahme kitail men sukuhlki duwen Sepda oh Ana?

⁴ Eri, e sansal me kitail anahne uhdahn kesempwalki inou koaros me kitail wiahda ong Siohwa. Mwomwen atail wiewia ong atail inou kan kin kamwakid atail nanpwungmwahu reh. Depit kasalehda ni sansal duwen met ni eh ntingihedi: “Ihs me warohng kohdalahng pohn dohlen KAUN-O? Ihs me pahn kak pedolong nan Tehnpese sarawio?” Ih eri sapengala ni eh nda me Siohwa pahn ketin kupwurki koaros “me sohte kin wia inou likamw.” (Mel. 24:3, 4) Dahme Sepda oh Ana inoukihda? Ia duwe, e mengei ong ira en kapwaiada ara inou ko?

5. Dahme Sepda inoukihda? Ia imwilahn met?

⁵ Sepda wiahda inou ehu ong Siohwa ni eh pahn kohlahng mahweniong mehn Ammon ko. Wehi wet wia imwintihti en sapwellimen Koht aramas akan. Sepda patohwan peki rehn Siohwa pwe ren kana. (Sounkopwung 10:7-9) E inoukihda: “Ma komw pahn kupwureiehla pwe I en powehdi mehn Ammon, . . . emen me pahn tepin pedoisang nan imweio pwehn tuhwong ie, ni ei pahn powehdi oh pwurodohsang nan mahwen. I pahn wiahkihla aramaso mehn meirong ong komwi.” Koht ketin sapengala ahn Sepda kapakapo oh sewese ih en kana nan mahweno. Ni ahnsou me Sepda pwurala imweo, nah serepeino me pedoido pwehn kasamwo ih. Serepeino iei me pahn wiahla sapwellimen Siohwa. (Sounkopwung 11:30-34) Ia wehwehn met ong ih?

6. (a) E mengei ong Sepda oh nah serepeino en kapwaiada ahn Sepda inowo ong Koht? (b) Dahme kitail sukuhlki duwen inou kan nan Deuderonomi 23:21, 23 oh Melkahka 15:4?

⁶ Pwehn kapwaiada ahn eh pahpao inowo, nein Sepda serepeino anahne doadoahngki pali laud en eh ahnsou ong papah Siohwa ni impwal sarawio. Ia duwe, Sepda sohte medewe mwahu mwohn eh wiahda eh inowo? Soh. Sepda ele ese me nah serepeino me pahn kakete tepin pedoido pwehn kasamwo ih. Ahpw sohte lipilipil ma e ese de soh, en kapwaiada eh inou ong Siohwa sohte mengei ong ih de nah serepeino. Ni Sepda eh kilangada nah serepeino, e nda me eh mohngiongo ohla. Nah serepeino kohkohla pwehn ‘mwahieiki eh pahn mehla sohte pwopwoud oh sohte neitik.’ Dahme kahrehda? Pwehki sohte nein Sepda pwutak, oh met ihte nah serepeino pahn sohte pwopwoudida oh naineki seri. Sepda sohte pahn kak kolokol eden eh peneineio ong dih en mwuhr kan. Ahpw Sepda oh nah serepeino pohnese me dahme pidada met inenen kesempwal sang pein ara pepehm. Sepda nda: “I wiadahr inou ehu ong KAUN-O, eri I sohte kak pwurehng kasohrehla!” Nah serepeino nda: “Kapwaiada audepen inou en.” (Sounkopwung 11:35-39) Sepda oh nah serepeino wia aramas loalopwoat kei me sohte pahn medewehda en kauwehla ara inou ong Koht, mehnda ma e uhdahn apwal ong ira.​—Wadek Deuderonomi 23:21, 23; Melkahka 15:4.

7. (a) Dahme Ana inoukihda, oh dahme kahrehda? Ia imwilahn met ong ih? (b) Dahme ahn Ana inowo wiahiong Samuel? (Menlau kilang nting tikitik kan me kileldi.)

⁷ Ana pil wiahda inou ong Siohwa erein ahnsou  apwal ehu nan eh mour. E kin nsensuwed pwehki e sohte kak naineki seri, oh mie me kin kalapw kanamenekih pwehki met. (1 Sam. 1:4-7, 10, 16) E patohwanohng Siohwa eh pepehm kan, oh e wiahda inou wet: “Maing KAUN, Wasa Lapalap, komw ketin mahsanih sapwellimomwi lidu menet! Komw ketin mwahngih ei apwal oh ketin kupwurei ie! Komw dehr ketin likidmelieiehla! Ma komw pahn ketin kupwurehiong ie emen pwutaken, I pahn inoukihda met me I pahn kasarawihong komwi erein eh mour unsek, oh e sohte pahn sehkasang pitenmoange.” * (1 Sam. 1:11) Siohwa ketin karonge ahn Ana kapakapo, oh pahro mwuri Ana naitikihada pwutak men, me iei Samuel. Met uhdahn kaperenda Ana! Ahpw e sohte manokehla eh inowo ong Koht. Ni ahnsou me nah pwutako ipwidi, e nda: “I patohwan pekidahr rehn KAUN-O.”​—1 Sam. 1:20.

8. (a) E mengei ong Ana en kapwaiada eh inowo? (b) Ia duwen Melkahka 61 eh katamankihong uhk duwen mehn kahlemeng mwahu en Ana?

⁸ Ni ahnsou me Samuel mpen sounpar siluh, Ana kapwaiada dahme e inoukihong Siohwa. E wahla Samuel rehn Samworo Lapalapo Ilai ni impwal sarawio nan Sailo oh nda: “I peki rehn KAUN-O en ketikihong ie seriet. Eri, iet e ketin kapwaiadahr ei pekipeko. Eri, I pahn patohwan kasarawihong KAUN-O seriet. KAUN-O me pahn ketin sapwellimanki seri menet erein eh mour.” (1 Sam. 1:24-28) Sangete ahnsowo, Samuel kin kousoan nan impwal sarawio. Paipel mahsanih me “Samuel eri kekeirda ni eh papah KAUN-O.” (1 Sam. 2:21) Ele e sohte mengei ong Ana en kapwaiada eh inowo. Met wehwehki me e sohte pahn kak mihmi rahn koaros rehn nah pwutako me e inenen poakepoake. E sohte pahn kak kilang nah pwutako kekeirda. Ahpw Ana inenen kesempwalki eh inowo ong Siohwa. E inengieng tounmeteikihla soahng kan me e kesempwalki pwehn kapwaiada eh inowo ong Koht.​—1 Sam. 2:1, 2; wadek Melkahka 61:1, 5, 8.

9. Dahme kitail pahn koasoiapene?

⁹ Met kitail wehwehkier ia uwen kesempwal en wiahda inou ong Siohwa, kitail pahn koasoiapene peidek pwukat: Soangen inou dah kei me kitail kak wiahda rahnwet? Ia uwen atail anahne nanti laud pwehn kapwaiada inou pwukat?

10. Inou keieu kesempwal dahieu me Kristian men kak wiahda? Dahme met kin pidada?

¹⁰ Inou me keieu kesempwal me Kristian men kak wiahda iei en inoukihong Siohwa eh mour. Ni eh kapakap, e kin inoukihda me e pahn doadoahngki eh mour pwehn papah Koht kohkohlahte, sohte lipilipil dahme pahn wiawi. Sises mahsanih me kitail en “tounmeteikihla” pein kitail, me iei en inoukihda me kitail en wia dahme Siohwa kupwurki mwohn mehkoaros nan atail mour. (Mad. 16:24) Sangete ahnsowo, kitail wiahla sapwellimen Siohwa. (Rom 14:8) Kitail kin uhdahn kesempwalki inou wet. Kitail kin ahneki soangen pepehmohte me sounmelkahkao ahneki ni eh nda: “Dahme I kak meirongkihong KAUN-O dupuk en sapwellime kalahngan ong ie? Nan pokon en sapwellime aramas akan koaros I pahn patohwanohng dahme I inoukidahr.”​—Mel. 116:12, 14.

11. Dahme wiawi rahn me ke papidaislao?

¹¹ Ke inoukihongehr Siohwa omw mour oh kasalehda kadehdepen omw inou wet sang ni omw papidaisla nan pihl? Ma ei, met inenen kaselel! Ke tamatamante ahnsou me brothero me wie padahko eh idek rehmw ma ke inoukihongehr Siohwa omw mour oh wehwehki me “omw inoukihong Siohwa omw mour oh papidais pahn kasalehda me ke wialahr emen Sounkadehdehn Siohwa”? Ni omw sapengala ei, irail koaros me mi wasao esehier me ke inoukihongehr Siohwa omw mour oh ke kakehr papidaisla nin duwen  sapwellimen Siohwa sounkalohk. Ke uhdahn kaperenda Siohwa!

12. (a) Peidek dah kan me kitail en pein idek rehtail? (b) Irair dah kei me Piter kangoange kitail en kakairada?

¹² Ni omw papidaislao, ke inoukihong Siohwa me ke pahn doadoahngki omw mour en papah ih oh wia uwen omw kak en idawehn sapwellime koasoandi kan. Ahpw papidais wiahte tepin kahk. Sangete ahnsowo, kitail koaros anahne pousehlahte kasawih pein kitail. Kitail kak pein idek rehtail: ‘Ia duwen ei nanpwungmwahu rehn Siohwa eh kekeirda sangete ei papidaislao? I kin papahte ih sang ni mohngiongi unsek? (Kol. 3:23) I kin kalapw kapakap? I kin wadek Paipel rahn koaros? I kin kaukaule towehda mihting kan? I kin iang kalohk ahnsou koaros me I kak? De I solahr kin nohn perenki wia mepwukat?’ Wahnpoaron Piter katamankihong kitail me mie keperpen atail kakete sohla papah Siohwa. Kitail kak soikala met ma kitail doadoahk laud en kakairada atail pwoson, loalokong, dadaurete, oh poadidiong Koht.​—Wadek 2 Piter 1:5-8.

13. Dahme Kristian men me inoukihong Siohwa eh mour oh papidaisla anahne pohnese?

¹³ Ni ahnsou me kitail inoukihda me kitail pahn papah Siohwa, kitail sohte kak kauwehla. Emen me pwangahkihda papah Siohwa de wia  Kristian men sohte kak nda me e sohte uhdahn inoukihong Koht eh mour oh me eh papidaislao sohte uhdahn manaman. * Ma emen me inoukihong Siohwa eh mour wiahda dihp laud, e pwukoahki wehkohng Siohwa oh mwomwohdiso pein ih. (Rom 14:12) Kitail sohte men duwehte irail kan me Sises mahsanihong: “Omw limpoakohng ie tikitiklahr, e sohte duwehte omw limpoak en mahso.” Ahpw kitail men en mahsanihki kitail: “I ese omw wiewia kan. I ese omw limpoak, omw loalopwoat, omw kohwa doadoahk, oh omw kanengamah. I ese omw doadoahk en ahnsou wet me laudsang mehlel omw doadoahk en mahso.” (Kaud. 2:4, 19) Kitail men kaperenda Siohwa sang ni atail kin doadoahk laud pwehn kapwaiada atail inou ong ih.

14. Ia keriau en inou me keieu kesempwal me emen kak wiahda? Dahme kahrehda?

¹⁴ Keriau en inou me keieu kesempwal me emen kak wiahda iei inou en pwopwoud. Pwopwoud wia mehkot sarawi. Siohwa kin ketin kilangwohng inou en pwopwoud nin duwen mehkot me inenen kesempwal. Ni ahnsou me liho oh ohlo wiahda ara inou, ira wiahda inou ehu mwohn Siohwa oh koaros me mi mwo. Ira kin kalapw inoukihda ren poakohng, kesempwalki, oh wauneki emenemen “erein ara momour nin sampah nin duwen me Koht ketin koasoanehdi ong pwopwoud kan.” Ekei ele sohte pahn nda lepin lokaia pwukat, ahpw re kin wiahdahte inou mwohn Koht. Ni ara wiahda inou pwukat, re kin kapwopwoudla. Pwopwoud ehu en kin mihpene erein ara mour. (Sen. 2:24; 1 Kor. 7:39) Sises mahsanih: “Mehkot me Koht ketin kapatapene, aramas dehpa kamweidpeseng.” Irail kan me pahn pwopwoudida en dehr medewe me ma arail mouren pwopwoud sohte pweida mwahu, a re kak uhdahte mweipeseng.​—Mark 10:9.

15. Dahme kahrehda Kristian kan en dehr ahneki soangen madamadauohte me sampah wet ahneki ong mouren pwopwoud?

¹⁵ Ei mehlel, duwehte eh sohte mie aramas unsek, pil sohte mouren pwopwoud ehu me unsek. Ihme kahrehda Paipel mahsanihong kitail me ekei pak pwopwoud koaros “pahn kin diar apwal tohto.” (1 Kor. 7:28) Nan sampah rahnwet, me tohto sohte kin nohn kesempwalki mouren pwopwoud. Re medewe me ma arail mouren pwopwoud sohte pweida mwahu, re pahn kak uhdahte mweipeseng. Ahpw kaidehn ih met me Kristian kan en medewehkihong pwopwoud. Re pohnese me re wiahdahier arail inou en pwopwoud mwohn silangin Koht. Ma irail kauwehla inou wet, e pahn duwehte arail likamw ong ih, oh Koht kin ketin kalahdeki sounlikamw kan. (Lip. 19:12; Lep. Pad. 6:16-19) Kristian pwopwoud kan anahne tamataman dahme wahnpoaron Pohl nda: “Ma aramas emen pwopwoudier, a en nantihong pwe en dehr mweisang eh pwoud.” (1 Kor. 7:27) Pohl kak nda met pwehki e wehwehki me Siohwa pil kin ketin kalahdeki mweipeseng me sohte kin poahsoankihda kahrepe pwung.​—Mal. 2:13-16.

16. Dahme Paipel mahsanih duwen mweipeseng oh tohrohrpeseng?

¹⁶ Sises ketin padahngki me nan Paipel ihte kahrepe me pwopwoud ehu en mweipeseng iei ma emen rehra wiahda dipen kamwahl oh me sohte wiahda dihpo sohte mahkohng. (Mad. 19:9; Ipru 13:4) Ahpw ia duwen ma pwopwoud ehu tohrohrpeseng? Paipel pil kasalehda ni sansal duwen met. (Wadek 1 Korint 7:10, 11.) Sohte kahrepe ieu nan Paipel ong pwopwoud ehu en tohrohrpeseng. Ahpw, ekei pak ele mie irair ehu me Kristian men pahn pehm me e uhdahn konehng en tohrohrasang eh pwoudo. Karasepe, ele ekei kin medewe me arail mour de arail nanpwungmwahu rehn Siohwa pahn mi nan keper  laud ma re mihmihte rehn arail pwoud me kin keme irail de uhwong oh kesehla padahk mehlel. *

17. Dahme pwopwoud Kristian ehu kak wia pwe ara mouren pwopwoud en kehkehlailte?

¹⁷ Ma pwopwoud ehu kohla rehn elder kan nan mwomwohdiso pwehn ale kaweid ong ia duwen ara kak kamwahwihala ara mouren pwopwoud, elder ko kak idek rehra ma ira kilangehr kasdohn What Is True Love? (lokaiahn wai) oh onopkiher kisin pwuhko Omw Peneinei Kak Nsenamwahu. Sawaspen Paipel pwukat kasalehda kaweid oh ire mehlel kan sang Paipel me kak sewese mouren pwopwoud en kehlailla. Ehu pwopwoud nda: “Sangete at tepida onopki kisin pwuhk wet, at mouren pwopwoud uhdahn nsenamwahu sang mwoweo.” Emen sister me pwopwoudkier sounpar 22 medewe me eh mouren pwopwoud pahn ohlahr. Ahpw e kilang kasdou. E nda: “Ngehi oh ei pwoudo papidaislahr, ahpw at madamadau ong soahng kan wekpeseng. Kasdou kohda ni ahnsou me uhdahn konehng! At mouren pwopwoud inenen mwahula ahnsou wet.” E sansal me ma pwopwoud ehu kin doadoahngki sapwellimen Siohwa kaweid kan nan ara mouren pwopwoud, ara nanpwungmwahu pahn kehlailla oh nsenamwahu.

18, 19. (a) Dahme pahpa nohno Kristian tohto wiahier? (b) Dahme kitail kak ndahki irail kan me kin doadoahngki pali laud en arail ahnsou ong papah Siohwa ni ahl tohrohr?

¹⁸ Mwoweo kitail koasoiapene duwen inou kan me Sepda oh Ana wiahda. Pwehki ara inou ko, nein Sepda serepeino oh nein Ana pwutako kin doadoahngki ara mour pwehn papah Siohwa ni ahl tohrohr. Pahpa nohno Kristian tohto rahnwet kin kangoange neirail seri kan en doadoahngki pali laud en arail ahnsou ong kalohk oh en doadoahngki arail mour en papah Koht. Oh kitail koaros pil kak kangoange me pwulopwul pwukat en pousehlahte nan arail kin papah Koht.—Sounkopwung 11:40; Mel. 110:3.

¹⁹ Rahnwet, ele mie Sounkadehdehn Siohwa 67,000 nan sampah pwon me kin doadoahngki pali laud en arail ahnsou ong papah Siohwa ni ahl tohrohr (Worldwide Order of Special Full-Time Servants of Jehovah’s Witnesses). Ekei kin papah nan Pedel de wia doadoahk en kauwada ihmw de wia sounapwalih me kin seiloak. Ekei kin doadoahk laud nin duwen sounpadahk kan ong sukuhl en kalohk, pioneer tohrohr, misineri, sounsawas en wasahn Mihting Tohrohr, de sounsawas nan wasahn kasukuhl en Paipel kan. Irail koaros wiahdahr inou me adaneki “Vow of Obedience and Poverty.” Nan inou wet, re kin inoukihda ren doadoahk laud nan pwukoa koaros me kohwong irail nan sapwellimen Siohwa doadoahk. Irail pil inoukihda en mourki mour ehu me sohte kedirepwki soahng kan me sohte nohn kesempwal, oh en dehr doadoahk en mwohni ihte ma re ale mweimwei en wia met. Pwukoa kan me irail alehdi iei me kesempwal, a kaidehn irail. Re kin koasoanehdi teng en aktikitik oh kapwaiada arail inowo erein arail wia sapwellimen Koht doadoahk tohrohr wet.

20. Ia pahn atail madamadau ong atail inou kan ong Koht?

²⁰ Nan iren onop wet, kitail koasoiapene duwen inou siluh me kitail kak wiahda rehn Koht. Mwein ke wiahdahier ekei inou pwukat. Kitail ese me kitail anahne kesempwalki inou pwukat oh wia uwen atail kak koaros en kapwaiada. (Lep. Pad. 20:25) Ma kitail sohte kapwaiada atail inou kan ong Siohwa, e kakete imwila suwed ong kitail. (Ekl. 5:6) Eri kitail en duwehte sounmelkahkao me patohwanohng Siohwa: “I pahn patohwan koulkihong komwi koulen kaping ahnsou koaros, ni ei pahn kin patohwan meirongkihong komwi rahn koaros dahme I inoukidahr.”​—Mel. 61:8.