1. (a) Saida mak halo Jefte no Ana hanesan? (Haree dezeñu iha leten.) (b) Iha lisaun neʼe, ita sei koʼalia kona-ba saida?

JEFTE mak ulun-naʼin no asuwaʼin neʼebé aten-brani. Ana mak feto haraik-an ida neʼebé tau matan didiʼak ba ninia umakain. Sira rua adora Jeová, maibé iha mós buat seluk neʼebé halo sira naʼin-rua hanesan. Neʼe mak saida? Jefte no Ana halo juramentu ida ba Jeová, no ho laran-metin sira rua kumpre sira ida-idak nia juramentu. Ohin loron, mane no feto kristaun neʼebé hakarak halo juramentu ba Jeová bele aprende husi Jefte no Ana nia ezemplu diʼak. Agora mai ita koʼalia kona-ba pergunta tolu: Juramentu katak sá? Tenkesér kumpre juramentu neʼebé ita halo ba Jeová ka lae? Saida mak ita bele aprende husi Jefte no Ana?

2, 3. (a) Juramentu katak sá? (b) Saida mak Bíblia hatete kona-ba halo juramentu ba Maromak?

² Bainhira Bíblia koʼalia kona-ba liafuan juramentu, baibain neʼe koʼalia kona-ba promesa espesiál neʼebé ema halo ba Maromak. Porezemplu, ema neʼe promete ba Jeová katak nia sei halo buat ruma, fó prezente ruma, halo knaar ruma, ka sees husi buat ruma. Ema halo juramentu ho ninia hakarak rasik, ema seluk la obriga nia. Maski nuneʼe, juramentu neʼebé ema halo, Jeová haree ida-neʼe nuʼudar buat neʼebé sériu no nia hakarak ema neʼe atu kumpre ninia promesa neʼe.  (Gênesis [Kejadian] 14:22, 23; Ebreu 6:16, 17) Bíblia hatete saida kona-ba kumpre ita-nia juramentu?

³ Moisés nia Ukun-Fuan hatete katak, se ema ida promete ka jura buat ruma ba Jeová, “nia labele kontra ninia liafuan neʼe. Nia tenke kumpre buat hotu neʼebé nia jura ona atu halo”. (Números [Bilangan] 30:2) Maromak mós leno Salomão atu hakerek: “Kuandu ó jura ba Maromak, keta demora atu kumpre ida-neʼe, tanba nia la gosta ema beik sira. Buat neʼebé ó jura, ó tenke kumpre ida-neʼe.” (Eclesiastes [Pengkhotbah] 5:4) Jesus mós hatudu katak juramentu mak buat neʼebé sériu. Nia hatete: “Ema iha tempu uluk dehan: ‘Ó labele jura se ó la halo tuir, maibé ó tenke kumpre ó-nia promete ba Jeová.’”—Mateus 5:33.

4. (a) Tanbasá halo juramentu ba Maromak mak buat neʼebé sériu? (b) Saida mak ita sei aprende kona-ba Jefte no Ana?

⁴ Husi eskritura sira-neʼe ita bele haree katak halo juramentu ba Jeová mak buat neʼebé sériu tebes. Tanba neʼe envolve ita rasik nia relasaun ho Jeová. David hatete: “Sé mak bele saʼe ba Jeová nia foho? No sé mak bele hamriik iha ninia fatin santu? Neʼe mak ema neʼebé . . . la jura falsu hodi Haʼu-nia [Jeová nia] moris, no la jura hodi bosok.” (Salmo [Mazmur] 24:3, 4) Jefte no Ana halo juramentu saida? Fasil ba sira atu kumpre sira-nia juramentu ka lae?

5. Juramentu saida mak Jefte halo ba Jeová? Saida mak akontese?

⁵ Jefte halo promesa ida ba Maromak iha tempu neʼebé nia atu funu hasoru Maromak nia povu nia inimigu, ema Amon sira. (Juízes [Hakim-Hakim] 10:7-9) Jefte husu Jeová atu ajuda nia manán. Nia jura hodi dehan: “Se Ita-Boot entrega ema Amon ba haʼu-nia liman, entaun ema naran deʼit neʼebé sai husi haʼu-nia uma nia odamatan atu hasoru haʼu bainhira haʼu fila ho dame husi funu hasoru ema Amon, nia sei sai Jeová nian.” Maromak hatán Jefte nia orasaun hodi ajuda nia manán funu. Bainhira Jefte fila husi funu, sé mak ema primeiru neʼebé sai husi ninia uma? Neʼe mak ninia oan-feto neʼebé nia hadomi. Sin, ninia oan-feto neʼe mak sei sai “Jeová nian”. (Juízes [Hakim-Hakim] 11:30-34) Jefte nia promesa sei lori rezultadu saida ba ninia oan-feto nia moris?

6. (a) Tanbasá la fasil ba Jefte no ninia oan-feto atu kumpre ninia juramentu ba Maromak? (b) Ita aprende saida husi Deuteronômio 23:21, 23 no Salmo 15:4 kona-ba juramentu?

⁶ Atu kumpre ninia aman nia promesa, Jefte nia oan-feto presiza bá tabernákulu atu serbí Jeová tempu-tomak. Jefte la hanoin didiʼak uluk antes nia halo promesa neʼe ka lae? Lae, karik Jefte hatene katak ninia oan-feto bele sai husi uma atu hasoru nia. Maski nia hatene ka la hatene, ita bele fiar katak la fasil duni ba Jefte no ninia oan atu kumpre juramentu neʼe. Bainhira Jefte haree ninia oan, nia sente laran-triste. Ninia oan-feto “tanis tanba nia sei nunka kaben”. Jefte nia jerasaun la bele hatutan ona, tanba nia la iha oan-mane, no agora ninia oan-feto mesak mós sei nunka kaben no atu iha oan. Maibé Jefte no ninia oan hatene katak sira-nia sentimentu rasik laʼós buat neʼebé importante liu. Jefte hatete: “Haʼu loke ona haʼu-nia ibun ba Jeová, no haʼu la bele dada fali.” Ninia oan-feto hatete: “Halo ba haʼu tuir buat neʼebé Ita promete ona.” (Juízes [Hakim-Hakim] 11:35-39) Jefte no ninia oan-feto mak ema neʼebé laran-metin tebes ba Jeová. Sira nunka hanoin atu la kumpre promesa ida ba Jeová, maski susar ba sira atu halo ida-neʼe.—Lee Deuteronômio (Ulangan) 23:21, 23; * Salmo (Mazmur) 15:4. *

7. (a) Promesa saida mak Ana halo, no tanbasá? Ikusmai, saida mak akontese? (b) Tanba Ana nia promesa, saida mak Samuel tenke halo? (Haree nota.)

 ⁷ Ana mós ema ida neʼebé kumpre ninia juramentu ba Jeová. Nia halo juramentu ida iha tempu neʼebé nia sente laran-susar tebes tanba nia la bele iha oan, no tanba ninia laʼen nia feen seluk sempre goza nia kona-ba ida-neʼe. (1 Samuel 1:4-7, 10, 16) Nia fakar ninia sentimentu ba Jeová iha orasaun no halo promesa neʼe: “Oh Jeová, ukun-naʼin ba tropa lalehan nian, se Ita-Boot haree ba Ita-nia atan nia terus no hanoin-hetan Ita-nia atan, no Ita la haluha Ita-nia atan hodi fó oan-mane ida, Ita-nia atan sei entrega oan neʼe ba Ita, oh Jeová, atu nuneʼe nia bele serbí Ita iha ninia moris tomak, no lámina ida sei la kona nia ulun.” * (Haree nota iha kraik.) (1 Samuel 1:11) Jeová rona duni Ana nia orasaun. Nia tuur-ahi oan-mane ida no hanaran nia Samuel. Ana kontente tebes! Maibé nia la haluha ninia promesa ba Maromak. Bainhira nia oan-mane moris, nia dehan: “Haʼu husu oan neʼe husi Jeová.”—1 Samuel 1:20.

8. (a) Tanbasá la fasil ba Ana atu kumpre ninia juramentu? (b) Oinsá mak Salmo 61 fó-hanoin Ita kona-ba Ana nia ezemplu diʼak?

⁸ Bainhira labarik Samuel maizumenus tinan tolu, Ana halo tuir ninia promesa neʼe. Nia lori Samuel ba Amlulik Boot Eli iha tabernákulu iha Silo hodi hatete: “Uluk haʼu halo orasaun kona-ba labarik-mane neʼe, no Jeová fó mai haʼu buat neʼebé haʼu husu ona ba nia. Entaun agora, haʼu entrega nia ba Jeová. Haʼu entrega ona labarik-mane neʼe ba Jeová durante ninia moris tomak.” (1 Samuel 1:24-28) Husi loron neʼe ba oin, Samuel hela iha tabernákulu. Bíblia hatete katak “labarik Samuel kontinua sai boot iha Jeová nia oin”. (1 Samuel 2:21) Ita bele fiar katak la fasil ba Ana atu kumpre ninia promesa. Nia hadomi tebes Samuel maibé agora nia la bele hamutuk ho nia oan loroloron. Nia la bele ona halimar ho nia, hakoʼak nia no haree nia sai boot. Maibé ba Ana, juramentu neʼebé nia halo mak buat neʼebé sériu duni. Atu kumpre ninia promesa ba Maromak, nia prontu atu halo sakrifísiu boot neʼe.—1 Samuel 2:1, 2; lee Salmo (Mazmur) 61:1, 5, 8. *

9. Ita sei koʼalia kona-ba saida?

⁹ Tanba ita komprende ona katak importante tebes atu kumpre ita-nia juramentu sira ba Jeová, mai ita hanoin kona-ba pergunta sira-neʼe: Juramentu hanesan saida mak ema kristaun halo ohin loron? Tanbasá importante atu halo tuir ita-nia juramentu sira?

10. Saida mak juramentu importante liu neʼebé ema kristaun ida halo? Neʼe envolve saida deʼit?

¹⁰ Juramentu importante liu hotu ba ema kristaun ida mak ninia dedikasaun ba Jeová. Tanbasá? Tanba liuhusi orasaun entre nia ho Jeová deʼit, ema neʼe promete atu fó ninia moris tomak atu serbí Jeová, maski saida deʼit bele akontese. Jesus hatete ita “nega” ita-nia an. Neʼe katak ita tau Jeová uluk iha ita-nia moris, laʼós ita-nia an rasik. (Mateus 16:24) Husi loron neʼebé ita dedika ita-nia an ba Jeová, ita sai ona “Jeová nian”. (Roma 14:8) Ba ita, dedikasaun mak buat neʼebé sériu tebes. Ita sente hanesan ema neʼebé hakerek salmu neʼebé hatete: “Saida mak haʼu sei fó hodi selu fali Jeová tanba buat diʼak hotu neʼebé nia halo ona ba haʼu? Haʼu sei kumpre haʼu-nia juramentu ba Jeová iha ninia povu hotu nia oin.”—Salmo (Mazmur) 116:12, 14.

11. Saida mak Ita hatudu iha Ita-nia loron batizmu nian?

 ¹¹ Ita dedika ona Ita-nia moris ba Jeová no hetan ona batizmu ka seidauk? Se Ita halo ona nuneʼe, neʼe mak buat neʼebé kapás tebes! Hanoin-hetan ka lae, bainhira irmaun neʼebé hatoʼo diskursu kona-ba batizmu husu se Ita dedika an ona ba Jeová no komprende katak “Ita-nia dedikasaun no batizmu hatudu katak Ita mak Testemuña ba Jeová ida”? Iha tempu neʼebé Ita hatán “sin” ba pergunta neʼe, ema hotu hatene katak Ita dedika an ona no kumpre kritériu atu hetan batizmu no sai nuʼudar Jeová nia atan ida. Iha tempu neʼe, Ita halo Jeová kontente tebes!

12. (a) Pergunta saida deʼit mak ita tenke husu ba ita-nia an? (b) Apóstolu Pedro fó laran-manas ba ita atu haburas hahalok saida deʼit?

¹² Bainhira Ita hetan batizmu, Ita promete ba Jeová katak Ita sei uza Ita-nia moris tomak atu serbí nia no halo tuir ninia matadalan sira. Maibé iha tempu neʼebé Ita hetan batizmu, tuir loloos, Ita foin hahú Ita-nia moris hodi serbí Jeová. Nuʼudar tempu liu ba daudauk, ita hotu presiza husu ba ita-nia an: ‘Haʼu-nia relasaun ho Jeová sai metin liután husi tempu neʼebé haʼu hetan batizmu ka lae? Haʼu nafatin serbí nia ho haʼu-nia laran tomak ka lae? (Koloso 3:23) Haʼu halo orasaun beibeik ka lae? Haʼu lee Bíblia loroloron ka lae? Haʼu tuir reuniaun sira no bá haklaken  beibeik ka lae? Ka haʼu ladún laran-manas ona kona-ba atividade sira-neʼe?’ Apóstolu Pedro dehan katak se ita hakaʼas an atu haburas ita-nia fiar, matenek, hahalok tahan no laran-metin ba Maromak, ita sei la sai baruk iha ita-nia adorasaun ba Jeová.—Lee 2 Pedro 1:5-8.

13. Ema kristaun neʼebé dedika an no hetan ona batizmu tenkesér rekoñese saida?

¹³ Bainhira ita halo juramentu dedikasaun nian ba Jeová, ita la bele dada fali. Ema neʼebé baruk ona atu serbí Jeová ka baruk ona atu moris nuʼudar ema kristaun la bele dehan katak tuir loloos, nia la dedika an ba Jeová no katak ninia batizmu la vale. * (Haree nota iha kraik.) Se ema neʼebé dedika an ona ba Jeová halo sala boot ruma, nia tenkesér hatán ba Jeová no ba kongregasaun. (Roma 14:12) Ita lakohi sai hanesan ema neʼebé Jesus dehan: “Ó husik ona ó-nia domin uluk nian.” Maibé ita hakarak Jesus koʼalia hanesan neʼe ba ita: “Haʼu hatene ó-nia hahalok sira, ó-nia domin, ó-nia fiar, ó-nia serbisu ba Maromak no ó tahan ona susar oioin, no haʼu hatene katak ó-nia hahalok ikus nian diʼak liu fali uluk nian.” (Apokalipse 2:4, 19) Ita hakarak halo Jeová kontente hodi moris tuir ita-nia juramentu dedikasaun nian.

14. Saida mak juramentu importante segundu neʼebé ema ida halo, no tanbasá mak juramentu neʼe sériu?

¹⁴ Juramentu importante segundu neʼebé ema ida halo mak juramentu kaben nian. Tanbasá? Tanba moris kaben mak buat neʼebé sagradu. Jeová haree juramentu neʼe nuʼudar buat neʼebé sériu tebes. Bainhira noivu no noiva halo juramentu ba malu iha Jeová nia oin, no mós iha ema seluk nia oin, baibain sira promete atu hadomi, hafolin no respeitu malu durante sira naʼin-rua moris hela iha mundu hodi tuir Maromak nia arranju kaben nian. No karik ema balu uza liafuan seluk, maibé sira mós halo juramentu ida iha Maromak nia oin. Bainhira sira halo tiha juramentu sira-neʼe, sira naʼin-rua sai feen no laʼen no sira-nia relasaun neʼe tenkesér toʼo mate. (Gênesis [Kejadian] 2:24; 1 Korinto 7:39) Jesus hatete: “Buat neʼebé Maromak tau hamutuk, ema keta haketak.” Tan neʼe mak ema neʼebé hanoin hela atu kaben, la bele hanoin katak sira bele soe malu se problema ruma mosu iha sira-nia moris kaben nian.—Marcos 10:9.

15. Tanbasá mak ema kristaun sira la bele hanoin hanesan ema mundu kona-ba moris kaben nian?

¹⁵ Ema hotu sala-naʼin no la iha ema naʼin-rua neʼebé halaʼo moris kaben nian neʼebé perfeitu. Tan neʼe mak Bíblia dehan katak ema hotu neʼebé kaben sei “hetan susar iha sira-nia isin”. (1 Korinto 7:28) Iha mundu ohin loron, ema barak la haree moris kaben nian nuʼudar buat neʼebé sagradu. Sira hanoin la sala atu soe malu bainhira sira-nia moris kaben nian mosu problema ruma. Maibé ema kristaun sira la hanoin hanesan neʼe. Sira hatene katak sira halo ona juramentu iha Maromak nia oin. Tan neʼe, se sira hakotu sira-nia juramentu, neʼe hanesan sira koʼalia bosok ba Maromak, no ita hatene katak Maromak odi bosok-teen sira. (Levítico [Imamat] 19:12; Provérbios [Amsal] 6:16-19) Ema neʼebé kaben ona tenke hanoin-hetan apóstolu Paulo nia liafuan neʼe: “Ó kesi metin ba feen ida ka? Para atu buka hodi sai livre.” (1 Korinto 7:27) Paulo hatete nuneʼe tanba nia hatene katak Maromak mós odi soe-malu neʼebé halo ho laran-makerek.—Malaquias (Maleakhi) 2:13-16.

16. Bíblia hatete saida kona-ba soe-malu no haketak-malu?

¹⁶ Jesus hanorin katak, tuir Bíblia, iha razaun ida deʼit atu kaben-naʼin bele soe malu. Neʼe mak se sira ida halo sala-foʼer, no ida neʼebé la halo sala lakohi fó perdua ba ninia kaben. (Mateus 19:9; Ebreu 13:4) Se nuneʼe, oinsá ho haketak-malu?  Bíblia mós fó matadalan neʼebé klaru kona-ba ida-neʼe. (Lee 1 Korinto 7:10, 11.) La iha razaun husi Bíblia atu feen-laʼen haketak malu. Maibé dala ruma iha situasaun balu neʼebé ema kristaun ida sente katak nia tenkesér haketak malu ho ninia kaben. Porezemplu, karik nia sente katak se nia hela nafatin ho ninia kaben neʼebé halo violénsia makaʼas ba nia, ka ninia kaben neʼebé kontra makaʼas lia-loos, neʼe sei lori perigu boot ba ninia moris ka ninia relasaun ho Jeová. * (Haree nota iha kraik.)

17. Feen-laʼen kristaun bele halo saida atu sira-nia moris kaben nian metin ba nafatin?

¹⁷ Se feen-laʼen husu katuas kongregasaun sira kona-ba sujestaun oinsá atu hadiʼa sira-nia moris kaben, katuas sira bele husu se feen-laʼen neʼe haree ona ka seidauk filme Apa Itu Cinta Sejati? no husu se sira estuda hamutuk ona broxura Ita-nia Moris Família nian Bele Sai Kontente. Filme no broxura neʼe hatudu Bíblia nia prinsípiu sira neʼebé bele ajuda moris kaben nian atu sai metin liután. Feen-laʼen ida hatete: “Husi tempu neʼebé ami estuda broxura neʼe, ami-nia moris kaben nian kontente liu fali uluk.” Feen ida neʼebé kaben ona ba tinan 22, hanoin fali ninia moris kaben nian neʼebé besik atu naksobu. Nia hatete: “Ami rua batizmu ona, maibé ami-nia sentimentu la hanesan duni.” Depois, nia haree filme neʼe no dehan: “Filme neʼe mai iha tempu neʼebé loos! Agora, ami-nia moris nuʼudar kaben-naʼin mak diʼak liu.” Loos duni, se feen-laʼen halo tuir Jeová nia prinsípiu sira iha sira-nia moris kaben nian, sira-nia moris kaben nian sei sai metin liu no kontente liu.

18, 19. (a) Inan-aman kristaun barak halo ona saida? (b) Oinsá mak sira neʼebé halo serbisu espesiál ba tempu-tomak kumpre sira-nia juramentu?

¹⁸ Ita hatene saida tan mak hanesan kona-ba Jefte no Ana? Tanba juramentu neʼebé sira halo, Jefte nia oan-feto no Ana nia oan-mane uza sira-nia moris tomak atu serbí Jeová iha dalan neʼebé espesiál. Ohin loron, inan-aman kristaun barak fó laran-manas ba sira-nia oan atu serbí Jeová tempu-tomak no tau nia uluk iha sira-nia moris. Ita hotu bele fó laran-manas ba joven sira-neʼe atu kontinua iha sira-nia serbisu.—Juízes (Hakim-Hakim) 11:40; Salmo (Mazmur) 110:3.

¹⁹ Agora iha irmaun-irmán maizumenus naʼin–67.000 neʼebé serbí nuʼudar membru iha Ordem Mundial dos Servos Especiais de Tempu Integral das Testemunhas de Jeová. Balu serbí iha Betel, serbisu konstrusaun, ka nuʼudar katuas área. Seluk serbí nuʼudar mestre ba eskola Bíblia sira, pioneiru tempu-tomak, misionáriu, no balu tau matan salaun ba reuniaun boot ka fatin neʼebé halaʼo eskola Bíblia sira. Sira hotu halo ona “Juramentu kona-ba halo tuir no moris simples.” Sira promete atu kaer didiʼak knaar naran deʼit neʼebé sira simu, halaʼo moris simples, no mós, se sira la hetan lisensa husi Jeová nia organizasaun, sira sei la buka serbisu iha liʼur atu manán osan. Maski serbisu neʼebé sira halo mak espesiál duni, maibé sira neʼebé halo knaar neʼe laʼós ema espesiál liu fali ema seluk. Tan neʼe sira hakaʼas an hatudu haraik-an hodi kumpre sira-nia juramentu durante tempu neʼebé sira halaʼo sira-nia serbisu espesiál tempu-tomak.

20. Saida mak ita presiza halo “loron ba loron”, no tanbasá?

²⁰ Husi juramentu tolu neʼebé ita koʼalia ona iha lisaun neʼe, karik Ita mós halo ona juramentu ida. Ita hatene katak juramentu sira-neʼe sériu tebes, no ita presiza hakaʼas an atu kumpre buat neʼebé ita promete ba Jeová. (Provérbios [Amsal] 20:25) Se ita la kumpre ita-nia juramentu sira, neʼe bele lori konsekuénsia neʼebé ladiʼak. (Eclesiastes [Pengkhotbah] 5:6) Tan neʼe, mai ita ‘kanta knananuk hahiʼi nian ba Jeová ba nafatin nuʼudar ita kumpre ita-nia juramentu sira loron ba loron’.—Salmo (Mazmur) 61:8.