1. ა) მუ უღდეს საერთო მსაჯულ იფთახის დო ხანას? (ქოძირით სურათ თე გვერდის) ბ) ნამ კითხვეფს მიაჩამუ პასუხი თე სტატიას?

იფთახი უშკურანჯი ხემძღვანელ დო მეომარ რდუ; ხანა მორჩილ დო თანდაბალ ოსურ რდუ. მუ უღდეს საერთო მსაჯულ იფთახის დო ელკანაშ ოსურს, ხანას, თიშ გარდა, ნამდა ართ ღორონც ომსახურდეს? ჟირხოლოს ღორონთშა აფუდ აღთქმა მეჩამილ დო ართგურო შეასრულეს თინა. იფთახი დო ხანა ჯგირ მაგალითის არზენა თინეფს, მიდგას გინოჭყვიდილ აფუ იეჰოვაშა აღთქმას მეჩამა დო შესრულება. მარა წიმიჭკირუ მნიშვნელოვან კითხვეფი: მუ რე აღთქმა? მუსხით სერიოზულ რე ღორონთშა აღთქმაშ მეჩამა? მუს ბგურაფლენთ იფთახ დო ხანაშაშ მაგალითეფშე?

2, 3. ა) მუს ნიშნენს აღთქმა? ბ) მუს იჩიებ ბიბლია ღორონთშა აღთქმაშ მეჩამაშ გურშენ?

² ბიბლიას მოშინაფილ სიტყვა აღთქმა ნიშნენს ღორონთშა მეჩამილ სერიოზულ დაპირებას, ნამდა პიროვნება შეასრულენს მუდგარენ საქმეს, ძღვენს ქიმეჩანს, ქიდიჭყანს მუდგაინერ სახეშ მსახურებას ვარდა მუდგარენიშ კეთებას დუც აურიდანს. აღთქმეფს მუნეფიშ ნებათ დვანა. მარა ღორონთიშ თოლს აღთქმეფი მნიშვენლოვან რე, მუშენდა პიროვნება პირობას დვანს, ნამდა მუდგარენს გაკეთენს ვარდა ვა გაკეთენს (დაბ. 14:22, 23; ებრ. 6:16, 17). მუს იჩიებ ბიბლია ღორონთშა მეჩამილ აღთქმეფიშ გურშენ?

 ³ მოსეშ კანონს ჭარუდ: „მუჟამსით კოჩი აღთქმას ქიმეჩანს იეჰოვას ვარდა დიფუჩუანსინ . . . ვეგნორთას ოკო მუშ სიტყვას; მუდგას თქუანს თინა, ოკო გაკეთას“ (რიცხ. 30:2). უმოს გვიანო სოლომონქ ღორონთშე შთაგონებათ ჭარ: „მუჟამსით ღორონც აღთქმას დუდვანქინ, ვეგნოდვა თიშ შესრულება, მუშენდა სულელი კოჩ მითინს ვა უჸორს. შეასრულ სქან აღთქმა“ (ეკლ. 5:4). იესოშ სიტყვეფშე იძირე, მუსხით სერიოზულ რე აღთქმეფიშ შესრულება. თიქ თქუ: «ჯვეშ ხალხშა უთქუალნა: „ტყურათ ვედიფუჩუა, შეუსრულ იეჰოვას სქან აღთქმეფი“» (მათ. 5:33).

4. ა) მუსხით სერიოზულ რე ღორონთშა აღთქმაშ მეჩამა? ბ) მუს ბგურაფლენთ იფთახ დო ხანაშ მაგალითშე?

⁴ არგამა რე, ნამდა ღორონთშა პირობაშ მეჩამა სერიოზულ საკითხ რე. მუჭო ვასრულენთ ჩქინ აღთქმეფსინ, თენა იეჰოვაწკუმა ჩქინ ურთიერთობაშა მოქმედენს. დავითქ ჭარ: „მის მიაჭირნე იეჰოვაშ გვალაშა დო მის ეშართე თიშ წმინდა ადგილშა? თის, . . . მიდგას ტყურათ ვადუფუჩუაფ“ (ფსალმ. 24:3, 4) მუ აღთქმა დოდვეს იფთახიქ დო ხანაქ დო ქორდუო ეფი თინეფშო თეშ შესრულება?

5. მუ პირობა მეჩუ იფთახიქ იეჰოვას დო მუ რდუ თეშ შედეგი?

⁵ იფთახიქ ართგურო შეასრულ მუშ პირობა, მუჟამსით ღორონთიშ ხალხიშ ნტერიშ, ამონელეფიშ წინააღმდეგ გიშართ ოჩხუპეფშა (მსაჯ. 10:7—9). თის მანგარო ოკოდ თე ჩხუპიშ მოგება დო ათეშგურშენ იეჰოვას პირობა მეჩუ: „ხეშა ქაშამიოთანქ ამონიშ სქუალეფს-და, მუჟამსით ამონიშ სქუალეფშა მშვიდობათ დიბრთუკინ, მით ჩქიმ ჸუდეშ კარეფშე პირველ შეფხვადუნ, თინა იეჰოვაშ იჸუაფ“. ამონელეფქ წაგეს ჩხუპის. მუჟამსით იფთახიქ ჩხუპშე მოგებულო დირთუნ, თის მუშ ძღაბიქ ქეწაზად (მსაჯ. 11:30—34). მუს ნიშნენდ თენა იფთახიშ ძღაბშო?

6. ა) ქორდუო ეფი იფთახშო დო მუშ ძღაბშო ღორონთშა მეჩამილ აღთქმაშ შესრულება? ბ) მუს გებულენთ კანონიშ 23:21, 23 დო ფსალმუნიშ 15:4-შე ღორონთშა აღთქმაშ მეჩამაშ გურშენ?

⁶ მუამუშიშ დოდვალირ პირობა შეასრულკონ თიშენ, იფთახიშ ძღაბიქ მთელ ცხოვრებას იეჰოვაშ კარავს ოკო იმსახურკო. უდუფიქრებუო ხო ვადუდვალ იფთახის მუშ აღთქმა? ვარ, მუშენდა თის ჯგირო არჩქილედ, ნამდა შილებედ მუშ ოსურსქუაქ ქეწაზადკონ. მარა თენა მანგარ რთულ სიტუაცია დო დიდ მსხვერპლი რდუ მუჭოთ მუმაშონ თეშ სქუაშო ხოლო. მუჟამსით იფთახიქ ქოძირ მუშ ოსურსქუან, „ბარგი ქიგისოფ“ დო თქუ, ნამდა გურქ გუტირხუ. თიშ ოსურსქუაქ ხოლო „გეიშენგარ მუშ ძღაბალობა“, მუშენდა იფთახის ხვალე ართ ძღაბი ჸუნდ, ნამუთ დღას ვეგეთხუაფუდ დო ვართ სქუაელეფ აშიდ. თაშ ნამდა, გვარიშ გუმაგრძელებელ დო მემკვიდრეობაშ მიმაღებელ მითინ ვაჸვენუდ. მარა თენა ვა რდუ არძაშ უმოს მნიშვნელოვანი. იფთახიქ თქუ: „სიტყვა მეფჩ იეჰოვას დო უკახლე ვამაღინე“. თიშ ძღაბიქ უპასუხ: „მუჭო სი თქვინ თეშ ქიმმექცი“ (მსაჯ. 11:35—39). თენეფ ართგურეფ რდეს დო ირნერ მსხვერპლიშ უმკუჯინუო, დღას ვეფიქრენდეს უზენაეს ღორონთშა მეჩამილ სიტყვაშ გოტახუას (წეკითხით კანონიშ 23:21, 23; ფსალმუნიშ 15:4).

7. ა) მუ აღთქმა მეჩუ ხანაქ იეჰოვას, მუშენ დო მუქ მოხვად თეშ უკულ? ბ) მუს ნიშნენდ ხანაშ აღთქმა სამუელშო? (ქოძირით სქოლიო)

 ⁷ ხანა რდუ ხოლო ართ პიროვნება, მიდგაქ შეასრულ იეჰოვაშა მეჩამილ პირობა. თიქ აღთქმა დოდუ გურ აკოჭირებულ აფუდუნ თიმ დროს, მუშენდა სქუა ვა ჸუნდ დო თეშ გურშენ ირიათო აჩაგრენდეს (1 სამ. 1:4—7, 10, 16). ხანაქ ღორონც გურ გეგნუფაჩუ დო აღთქმა მეჩ: „ღორონთ იეჰოვა, სქან მსახურიშ გაჭირებას ქიმკაჯინექ დო ქუგომშინანქ-და, ვეგიჭყოლიდუანქ სქან მსახურს დო ქიმეჩანქ ქომოლსქუას, იეჰოვას მეუძღვინენქ თის ონდო ცოცხალ რენ, სამართებელ ვემკანჭუ თიშ დუც“ * (1 სამ. 1:11). ღორონთქ ქიმირჩქილუ ხანაშ ლოცვა დო თის ქომოლსქუაქ ქაშუ. მუჭო ახიოლედ ხანას თენა! მარა თის ვაგოჭყოლად ღორონთშა მეჩამილ აღთქმა. მუჟამსით ბაღანაქ ქეშეძინუნ ხანაქ თქუ: „იეჰოვას ქოფთხი თიშ დუდი“ (1 სამ. 1:20).

8. ა) ადვილ რდუო ხანაშო ღორონთშა მეჩამილ აღთქმაშ შესრულება? ბ) მუჭო რჩქუ 61-ა ფსალმუნშე ხანაშ სწორ დამოკიდებულება?

⁸ მუჟამსით სამულქ სუმ წანერო გინირთუნ, ხანაქ ზუსტას თეშ ქიმიქცუ, მუჭოთ ღორონთშა აფუდ პირობა მეჩამილ. თის აზრო ხოლო ვამორთუმ, შხვანერო ქიმიქცუკო. თიქ სამუელ მღვდელმთავარ ელის ქიმუჸონ, ნამუთ კარავს მსახურენდ შილოს. ხანაქ თქუ: „თე ბაღანას ფთხულენდ ლოცვას იეჰოვას, ნამდა შეუსრულებუდკო ჩქიმდა ოთხუალ. ასე იეჰოვას ქიმვაბარ თინა მთელ მუშ ცხოვრება იეჰოვაშა იჸუაფ მეძღვინელ“ (1 სამ. 1:24—28). „სამუელ იეჰოვაწკუმა ირდუდ“ (1 სამ. 2:21). მარა მუს ნიშნენდ თენა ხანაშო? თის მანგარაშო უჸორდ მუშ ჭიჭე ბოში, მარა თინა უკვე ირ დღას ვაძირუნდ თის. წერმიდგინით, მუჭო ონატრუდკონ იჸიდ ხანას თიშ მოფერაფა, თიწკუმა ლაჸაფი დო თიშ მიკოლუაფა. შხვა მოჸოროფე დიდალეფიშ გინოწონს, ხანას ვაგაშინედკონ იჸიდ თი სასიმოვნო წუთეფ, ნამუთ ბაღანაშ რდუალას მეჸუნს. მარა თეშ უმკუჯინუო, ხანას ვაუნარღებ ღორონთშა მეჩამილ აღთქმა. თიშ გურ იეჰოვაშ ჭყოლოფუათ ხარენდ (1 სამ. 2:1, 2; წეკითხით ფსალმუნიშ 61:1, 5, 8).

9. მუ კითხვეფს გუვარჩიენთ?

⁹ ჩქი ქიგებგით, მუსხით სერიოზულ საკითხ რე ღორონშა აღთქმაშ მეჩამა. მორთ, გუვარჩუათ თე კითხვეფი: მუშნერ აღთქმეფიშ დოდვალა შეულებ ქრისტიანს? მუშენ ოკო მაფდან გინოჭყვიდილ თინეფიშ შესრულება?

10. ნამ რე არძაშ უმოს მნიშვნელოვან აღთქმა, ნამუსით ქრისტიან დვანს დო მუშენ?

¹⁰ არძაშ უმოს მნიშვნელოვან აღთქმას ქრისტიან თიმწკუმა დვანს, მუჟამსით დუც უძღვინენს იეჰოვას. თენა მნიშვნელოვან აღთქმა რე, მუშენდა პიროვნება ლოცვას პირობას არზენს იეჰოვას, ნამდა მუდგაქ ვამოხვადასინ, მთელ ცხოვრებას თის ემსახურებ. მუჭოთ იესოქ თქუნ, თე დროს პიროვნება ვარიას იჩიებ მუშ დუდშენ დო ღორონც არძენს პირობას, ნამდა ირფელიშ წოხოლე თიშ ნებაშ შესრულებას ქიგიორნუანს (მათ. 16:24). თიმ დღარშე მოჸუნაფილ თინა იეჰოვას ოკუთნუ (რომ. 14:8). არძა, მით მეძღვინუაშ აღთქმას დვანსინ, თეს სერიოზულო ოკო უჯინედას თეშ, მუჭოთ ფსულმუნმაბირექ თქუ ღორონთშა მეჩამილ მუშ აღთქმაშ გურშენ: „მუთ გინუგანქ იეჰოვას თი ირფელ ჯგირშენ, მუთ ჩქიმ გურშენ უკეთებ?“ (ფსალმ. 116:12, 14).

11. მუ ოძირეთ ნათუათ?

 ¹¹ ქუგაფნანო მეძღვინელ დუდი იეჰოვაშა დო ქორეთო ნათილ? თაშ ქორენდა, ჯგირ რე! ალბეთ ქორშუნა, ნამდა ნათუაშ დღას არძა ირჩქილედუნ თეშ შეგეკითხეს: „ქუგაფუნო იეჰოვაშა დუდ მეძღვინელ დო ქუგარჩქილენო, ნამდა მეძღვინუათ დო ნათუათ იეჰოვაშ მოწმეთ დო ღორონთიშ შურით მოქმედ ორგანიზაციაშ წევრო გინირთუქ“. თქვან დადებით პასუხეფშე იძირედ, ნამდა მზათ რდით დინათითკო დო გინირთითკო იეჰოვაშ მსახურო. თეთ მანგარო გახარენდით იეჰოვას!

12. ა) მუ შეკითხვეფ ოკო დუსვათ ჩქინ დუც? ბ) ნამ თვისებეფიშ გავითარება მირჩუეს პეტრექ?

¹² მარა ნათუა ხვალე დაჭყაფ რე. თეშ უკულ ჩქი ოკო გუვაგრძელათ ღორონთიშ ართგურო მსახურება, მუდგაშ პირობა მეძღვინუაშ დროს დობდვით. თაშ ნამდა, ქოპკითხათ ჩქინ დუც: მიბრდიო სულიერო ნათუაშ უკულ? გუვაგრძელენქო მთელ გურით იეჰოვაშ მსახურებას? (კოლ. 3:23). ქობლოცულენქო, ქოპკითხულენქო ღორონთიშ სიტყვას, ქუვოსწრუქო კრებაშ შეხვალამეფს დო ქობქადაქენქო მუთ შემლებუნ ხშირას? ხომ ვა ვორექ მოსუსტებულ ნამთინ თე საქმეს? მოციქულ პეტრექ თქუ, ნამდა აქტიურეფ იპჸით მსახურებას, მუჟამსით რწმენას გუვამანგარენთ რჩქინათ, მოთვინებათ დო ღორონთიშ ართგურობათ (წეკითხით 2 პეტრეშ 1:5—8).

13. მუ ოკო ესმებუდას მეძღვინელ, ნათილ ქრისტიანს?

 ¹³ მუჟამსით იეჰოვაშ წოხოლე ქუდობდვანთ აღთქმას, ნამდა თის ვემსახურებუთინ, თიშ თირუა შეიოლებერ ვა რე. პიროვნებას ვაკო იეჰოვაშ მსახურება დო ქრისტიანულ ნორმეფით ცხოვრება-და, თის დუდ ვაგამართლებე თით, ნამდა სინამდვილეს დღას ვაფუდ მეძღვინელ დუდ ღორონთშა დო თიშ ნათუა ვარდ სწორ. * თიქ მუშ მიზნებით ქაძირუ, ნამდა მთლიანო რდუ მეძღვინელ ღორონთშა. სერიოზულ ცოდა ჩედინ-და, თინა პასუხიშმგებელ იჸი იეჰოვაშ დო კრებაშ წოხოლე (რომ. 14:12). მორთ, დღას ვავოდინუათ „დუდშეიან ჸოროფა“. ჩქი მოკონა იესოქ ჩქინ გურშენ ხოლო თქუას: „მიჩქუ სქან საქმეეფი, სქან ჸოროფა, რწმენა, მსახურება, მოთვინება დო თინა, ნამდა ასეიან საქმეეფი, ადრე ორთუდინ თიშე უმოს რე“ (გამოცხ. 2:4, 19). ჩქი მოკონა ბოლოშა დეფცვათ მეძღვინუაშ აღთქმა დო თეთ გურ გუხარათ იეჰოვას.

14. მუ რე მაჟია მნიშვნელოვან აღთქმა, ნამდგას პიროვნება დვანს დო მუშენ?

¹⁴ მაჟია მნიშვნელოვან აღთქმა, ნამუსით პიროვნება დვანს, რე ქორწინებაშ აღთქმა, მუშენდა ქორწინება წმინდა რე. ღორონთიშ დო შხვა მოწმეეფიშ წოხოლე მოჭყუდ დო სინჯა ქორწინებაშ აღთქმას დვანა. თინეფ პირობას დვანა, ნამდა უჸორდანი იჸი ართიან, დაფასენა დო პატის ქოცენა ართიანს; თინეფ თაშ მიქციებუნა „სოიშა ართო იცხოვრენა დედამიწას მუჭოთ ჩილ დო ქომონჯი“. ნამთინე წყვილქ შილებე ზუსტას თე სიტყვეფი ვათქუას, მარა თინეფ იშენით ღორონთის წოხოლე დვანა აღმთქმას. თეშ უკულ თინეფს აცხადენა ჩილ დო ქომონჯო, ნამუთ თის ნიშნენს, ნამდა თინეფიშ კავშირქ მუდმივქ ოკო იჸუას (დაბ. 2:24; 1 კორ. 7:39). იესოქ თქუ: „მიდგა ღორონთიქ დაოჯახუნ, კოჩიქ ვადაშორას თინეფ ართიანს“ — ვართ ქომონჯიქ, ვართ ოსურქ დო ვართ მითინ შხვაქ. თაშ ნამდა, წყვილეფს, მით იოჯახებუნან, ოკო შუდან, ნამდა ჩათხია ვა რე გამოსავალ (მარ. 10:9).

15. მუშენ ოკო ვა უჯინედან ქრისტიენეფ ქორწინებას არდებულო?

¹⁵ მუშო ოკო რაგად სრულყოფილ ოჯახი ვა არსებენს. ქორწინება ჟირ არასრულყოფილ პიროვნებაშ კავშირ რე. ათეშგურშენ ბიბლია იჩიებ, ნამდა დაქორწინებულეფს მინშა „ხორციელ გასაჭირ აღვენუნა“ (1 კორ. 7:28). სანარღო რე, ნამდა ამდღა ბრელ ქორწინებას არდებულო უჯინე. მუჟამსით პრობლემეფ ურჩქინდუნან, ვაცადუნა თიშ მოგვარებას დო აკმარღვანა ოჯახის. მარა თენა ვა რე ქრისტიანულო სწორ, მუშენდა ქორწინებაშ აღთქაშ დარღვევა ღორონთიშ ღორებაცალ რე დო ღორონთის ჯოგ ტყურა (ლევ. 19:12; იგავ. 6:16—19). მოციქულ პავლექ ჭარ: „ქორჸუნანო ოსურ? თიშ მეტება ვეფიქრათ“ (1 კორ. 7:27). პავლეს შეულებუდ თქუკო თე სიტყვები, მუშენდა უჩქუდ, მუჭო იეჰოვას ჯოგუ ჩათხია (მალ. 2:13—16).

16. მუს იჩიებ ბიბლია დათხია დო ცალკე ცხოვრებაშენ?

¹⁶ იესო ოგურუანდ, ნამდა არსებენდ ჩათხიაშ ხვალე ართ ბიბლიურ საფუძველი, მუჟამსით ბრალ ვაუღუნ ფერ მეუღლე, გინოჭყვიდუნს, ვაპატუას მოღალატე მეუღლეს (მათ. 19:9; ებრ. 13:4). მარა მუ შილებე ითქუას ცალკე ცხოვრებაშ გურშენ? ბიბლია არგამათ იჩიებ თე საკითხიშ გურშენ ხოლო (წეკითხით 1 კორინთელეფიშ 7:10, 11). ცალკე ცხვორებას  ბიბლია ხუჯიშ ვა უკინენს. მარა ნამთინე დაოჯახებულ ქრისტიან კანკალე სიტუაციას გინმოჭყვიდუნს ცალკე ცხოვრებას, მუჟამსით ოშკურანჯ რე, მოძალადე დო განდგომილ მეუღლექ ფიზიკურ ვარდა სულიერ ზიან ქიმიორინუას. *

17. მუჭო შეულებნა ქრისტიან წყვილეფს გამანგარან მუნეფიშ ოჯახი?

¹⁷ მუჟამსით წყვილი ოჯახის პრობლემეფიშ გურშენ რჩევას უხუცესეფს ელაკითხანსინ, თინეფქ ჯგირ იჸუაფ ქოკითხან, ქუჯინესო ვიდეოს „მუ რე ნამდვილ ჸოროფა“ დო წეკითხესო ართო ბროშურა „თქვან ოჯახიშ ბედნერობა თქვან ხეს რე“. თექ მოჩამილ პრინცეპეფქ ბრელ ოჯახის მეხვარ პრობლემეფიშ მოგვარებას. ართ წყვილი იჩიებ: „თე ბროშურაშ კითხირ დიბჭყითინ თიშ უკულ, ჩქი უმოს ბედნერ ოჯახ მიღნა“. 22 წანა რე გათხილ რენ ფერ ართ ოსურკოჩიქ მუშ ოჯახშენ, ნამუთ ეკოცუმაშ კარს გერდუნ, თქუ: „ჟირხოლო ნათილეფ ვორეთ, მარა ხასიათით შორს ვორეთ ართიანშე. თე ვიდეოქ შურს მუმოჭიშეს! ასე უჯგუშო უგენთ ართიანს“. დაოჯახებულ რეთო? ირნერო ქეცადით, გეგმირინუათ იეჰოვაშ პრინციპეფი თქვან ოჯახის. თაშ ქიმიქციებუთ-და, ქორწინებაშ აღთქმაშ შესრულება ბედნერობას ქუმოიღანა!

18, 19. ა) მუ ელუჩეს ბრელ ქრისტიან მშობლეფქ სქუალეფს? ბ) მუშ რაგად შილებე სპეციალურ სრულ დროთ მსახურენან თინეფშენ?

¹⁸ ქოიჩქუნანო ხოლო მუ უღდეს საერთო იფთახის დო ხანას? თინეფიშ დოდვალირ აღთქმეფიშ გურშენ იფთახიშ ძღაბიქ დო ხანაშ ბოშიქ კარავს სპეციალურ მსახურება ქიდიჭყეს. თეცალ ცხოვრებაშ წესი არძაშ უმოს სასიამოვნო რდუ. ამდღა ხოლო ბრელ ქრისტიან მშობელ ელუჩანს მუნეფიშ სქუალეფს სრულ დროთ იმსახურან დო ღორონთიშ მსახურებას მთავარ ადგილ უკინებდას თინეფიშ ცხოვრებას. მიდგაქ თაშ მიქცუნ, მართალო ცქვაფაშ ღირსეფ რენა (მსაჯ. 11:40; ფსალმ. 110:3).

¹⁹ თე დროშო სოდგარენ 67 000 იეჰოვაშ მოწმე მსახურენს სპეციალურ სრულ დროთ მსახურო. ნამთინე ბეთელს მსახურენს, შხვეფ სამშენებლო პროექტეფს მუშენა, გილმალ ზედამხედველეფო მსახურენა, შხვა დო შხვა ბიბლიურ სკოლეფს ატარენა, სპეციალურ პიონერეფო, მისიონერეფო ვარდა საკონგრესო დარბაზეფს დო ბიბლიურ სკოლეფიშ შენობეფს ულუანა. სრულ დროთ მსახურეფს არძას დოდვალირ აფუ „სიღარიბეშ დო მორჩილებაშ აღთქმა“. ათეშგურშენ თინეფ ნებისმიერ დავალებას ასრულენა, ნამუთ ხეს უნწყუნს სამეფოშ ინტერესეფიშ წიმი ულას დო ნებართვაშ უმშო სოთინ ცალკე ვა მუშენა. თინეფ ჩვეულებრივ ხალხ რენა, ნამუსით სპეციალურ დანიშნულება უღუნა დო ჯგირო არჩქილენა, მუსხით სერიოზულ საკითხი რე თე აღთქმაშ თანდაბლურო დაცვება, სპეციალურ სრულ დროთ მსახურებაშ დროს.

20. მუ ოკო ვაკეთათ დო მუშენ?

²⁰ თაქ გარჩიებულ აღთქმეფშე, თქვა ნამ გაფნა დოდვალირ? პირველ, მაჟია დო ვარ სუმხოლო? თქვა ნამდვილო გარჩქილენა, ნამდა თქვან აღთქმეფს სერიოზულო ოკო უჯინათ (იგავ. 20:25). იეჰოვაშა მეჩამილ სიტყვას დო აღთქმეფს ვეშვასრულენთ-და, თეს შილებე გლახა შედეგეფქ ქუმაყუნას (ეკლ. 5:6). მორთ, ირნერო განვადიდათ ღორონთიშ სახელ დო შევასრულათ დოდვალირ აღთქმეფი (ფსალმ. 61:8).