1, 2. (a) Yini bo-Elifazi naBildadi labayisho ngendlela lesikhonta ngayo Nkulunkulu? (b) Jehova wayiveta njani indlela labetiva ngayo?

“UMUNTFU angaba ngilo yini lusito kuNkulunkulu? Umuntfu lohlakaniphile yena angaba lusito yini kuye? Njabulo yini lebeyingatfolwa nguSomandla kube bewulungile? Abetawubuyelwa yini kube tindlela takho betimsulwa?” (Jobe 22:1-3) Uke waticabanga yini timphendvulo talemibuto? Ngalesikhatsi Elifazi, umThemani abuta Jobe lemibuto, bekati kahle kutsi imphendvulo ngu-cha. Ngisho nemngani wakhe Bildadi umShuhi, watsi ngeke kwenteke kutsi umuntfu ahlale etsembekile kuNkulunkulu.—Fundza Jobe 25:4.

² Labadvudvuti bemanga bebatsi imetamo yetfu yekukhonta Jehova ngekwetsembeka ayisho lutfo kuye, futsi kuNkulunkulu asitendluli ngalutfo tilwanyana letinjengemiyiyane, timphetfu noma tibungu. (Jobe 4:19; 25) Ngekusho kwabo kanjalo, kungenteka siphetse ngekutsi bo-Elifazi naBildadi bebatfobekile. (Jobe 22:29) Ngetulu kwaloko, nangabe usetulu esicongweni sentsaba noma ubuka ngelifasitelo usendizeni, loko lokwentiwa bantfu labaphasi  emhlabeni kungahle kungasho lutfo kuwe. Nome kunjalo, kungenteka yini Jehova uyibona kanjalo indlela lesisekela ngayo uMbuso wakhe njengoba asendzaweni yakhe lephakeme? Jehova wayiveta indlela lativa ngayo ngalesikhatsi asola bo-Elifazi, Bildadi naSofari ngekutsi bakhulume emanga, kodvwa wajabula ngaJobe, waze wambita ngekutsi, ‘yinceku yakhe.’ (Jobe 42:7, 8) Ngako ke, umuntfu angaba “lusito kuNkulunkulu.”

3. Yini Elihu layisho ngemetamo yetfu yekukhonta Jehova, futsi bekasho kutsini?

³ Jehova akamlungisanga Elihu ngalesikhatsi abuta atsi: “Nangabe ulungile, uletsani kuye, nome-ke utfolani yena esandleni sakho?” (Jobe 35:7) Kungenteka yini kutsi Elihu ngalombuto abeveta kutsi imetamo yetfu lesiyentela Nkulunkulu ayisho lutfo? Cha. Bekaveta kutsi Jehova akalahlekelwa lutfo nangabe singamkhonti. Jehova uPhelele. Ngeke size simente anjinge noma abenemandla. Ngakulokunye, nome yini lenhle lesiyentako, likhono lesinalo noma sibindzi lesinaso, konkhe kuvela kuNkulunkulu, futsi uyayinaka indlela lesikusebentisa ngayo.

4. Jehova utifananisa nani tento temusa lesitentela labanye?

⁴ Jehova uyatinaka tento telutsandvo letentelwa tinceku takhe, kuba shengatsi tentelwa yena. Taga 19:17 titsi: “Lowo lopha lomphofu uboleka Simakadze; Simakadze uyakumvuza ngaloko lakwentile.” Ngabe lombhalo uveta kutsi Jehova utinaka tonkhe yini tento temusa lesitentela labamphofu? Singaphetsa yini ngekutsi uMdali wendzawo yonkhe ubheka tento temusa letentelwa bantfu labaphuyile njengesikwelete kuye nekutsi utawutibhadala ngekutsi asinikekete tibusiso? Yebo kunjalo, futsi loku kwafakazelwa ngisho nayiNdvodzana yaNkulunkulu.—Fundza Lukha 14:13, 14.

5. Ngumiphi imibuto lesitawucoca ngayo?

⁵ Jehova watfuma umphrofethi Isaya kutsi ayomkhulumela, ngekutsi avete indlela lajabula ngayo ngebakhulekeli bakhe labetsembekile ngekufeza tinjongo takhe. (Isa. 6:8-10) Isaya wakwenta ngekutitsandzela loko. Ngisho nalamuhla, tinkhulungwane tebantfu tilingisa Isaya ngekutsi titsi “Nangu mine, tfuma mine!” natenta tabelo letiphatselene nekukhonta Jehova. Nome kunjalo, lomunye angase atibute kutsi: ‘Ibalulekile yini imetamo yami lengiyentako? Nanobe kungumusa waJehova kutsi angivumele ngimkhonte, ngeke yini ente nome yini ledzingekako kute kwenteke loko lokushiwo liVi lakhe kungakhatsaliseki kutsi yini lengikhetsa kuyenta enkonzweni yakhe?’ Kute siphendvule lemibuto, cabanga ngaloko lokwenteka ngesikhatsi saboDebhora naBharaki.

6. Ngumuphi umehluko lobewukhona emkhatsini wetakhamuti taka-Israyeli kanye nelibutfo laJabini?

⁶ Kwaphela iminyaka lengemashumi lamabili ema-Israyeli acindzetelwe “ngelulaka nangesihluku” yiNkhosi Jabini yaseKhenani. Ema-Israyeli bekesaba ngisho nekuhamba aye etindzaweni tawonkhe wonkhe. Libutfo lemphi lema-Israyeli, belingakahlomi kahle, ngoba belite tikhali tekulwa, lite netivikelo, kantsi titsa tabo tona betinetincola temphi letingu-900 letinemasikela ensimbi.—Khu. 4:1-3, 13; 5:6-8. *

7, 8. (a) Ngumiphi imininingwane lebalulekile Jehova layininiketa Bharaki? (b) Ema-Israyeli alincoba njani libutfo lemphi laJabini? (Buka sitfombe lesisekucaleni kwalesihloko.)

⁷ Nome kunjalo, Jehova wanika Bharaki umyalo locacile asebentisa umphrofethikati Debhora, watsi: “Hamba uyewutsatsa emadvodza  lati-10 000 akaNaftali newakaZebuloni uwahole uye eNtsabeni iThabori. Ngitamuhunga Sisera, indvuna yemphi yaJabini, kanye netincola nemabutfo akhe emphi kutsi aye emfuleni iKhishoni, ngimniketele esandleni sakho.”—Khu. 4:4-7.

⁸ Bantfu batjelwa ngalomlayeto. Emadvodza latinikela ngekutitsandzela ahlangana eNtsabeni iThabori. Bharaki akaphotisanga maseko, wavele wenta loko Jehova lebekakushilo. (Fundza Tikhulu 4:14-16.) Ngesikhatsi semphi lenkhulu lebeyiseThanaki, kwana imvula lenkhulu leyabangela kutsi yonkhe indzawo ibe neludzaka. Bharaki wacosha libutfo lemphi laseSisera waze wayewufika eHaroshethi, lokulibanga lelingemakhilomitha langu-24. Sisera washiya lencola yakhe lebeyesabeka futsi wabalekela eSananimu, lokungenteka beyisedvute neKhedeshi. Wakhosela ethendeni laJayeli umfati waHebere umKheni futsi Jayeli wamemukela. Ngesizatfu sekutsi bekadziniwe, wavele wahhodla butfongo. Leli kwaba litfuba lelihle ngaJayeli lekutsi acunge sibindzi sekumbulala. (Tikhulu 4:17-21) Sitsa sema-Israyeli besesincotjiwe! *

9. Tikhulu 5:20, 21 tisiniketa miphi imininingwane mayelana nekuncotjwa kwaSisera?

⁹ Tehluko 4 na-5 tencwadzi yeTikhulu kufanele tifundvwe kanye kanye, ngoba lesinye sehluko sinemininingwane lengekho kulelesinye. Nasi sibonelo, Tikhulu 5:20, 21 titsi: “Esibhakabhakeni tinkhanyeti talwa, yebo, tisagijima ngemivila yato, talwa naSisera. Umfudlana iKhishoni wabakhukhula.” Ngabe loku kuveta kutsi ema-Israyeli asitwa tingilosi yini, noma kwawa imvula yetinkhanyenti esibhakabhakeni? Lokulandzisa akusitjeli. Kodvwa kungaba yini lenye lebeyingasita ema-Israyeli ngaphandle kwekutsi Nkulunkulu angenele ngekunisa imvula lenkhulu endzaweni lekahle nangesikhatsi lesifanele, ikhukhule tincola temphi letingu-900? Tikhatsi letintsatfu kuTikhulu 4:14, 15, tiveta kutsi nguJehova lowancoba lemphi. Kute ngisho namunye kulamasotja aka-Israyeli lebekangatsi nguye loncobile.

10, 11. Bekayini “emaMerozi” futsi kungani acalekiswa?

¹⁰ Lokumangalisako kutsi ingoma yekuncoba yaDebhora naBharaki, inemavi ladvumisa Jehova ngekuncoba kwakhe lokusimangaliso. Ingilosi yaJehova yatsi: “‘Calekisa Merozi. Calekisa bantfu bayo kabuhlungu, ngobe abazange bete kutawusita Simakadze, yebo, kutawusita Simakadze, nakalwa nalabanemandla.’”—Khu. 5:23.

¹¹ Merozi wacalekiswa ngendlela lengachazeki. Kungenteka yini kutsi bekulidolobha lebelinebantfu labehluleka kutinikela kutsi baye emphini? Nangabe Sisera endlula khona nakabaleka, bantfu balelidolobha balitfola yini litfuba lekumbulala kodvwa behluleka kulisebentisa? Kungenteka yini kutsi abasitfolanga lesimemo saJehova sebantfu lebebangaya emphini? Tinkhulungwane letilishumi lebetivela esifundzeni sabo tabutsana ndzawonye kute titokwenta lomsebenti. Cabanga nje ngebantfu baseMerozi babona lelisotja lelinelunya ligijima etitaladini tabo lilodvwana futsi limajokololo njengenkhukhu inetsiwe. Leli bekulitfuba lelihle lekufeza injongo yaJehova kanye nelekutfola tibusiso takhe. Noko, kuleso sikhatsi lesimatima behluleka kubona kutsi lesi bekusikhatsi sekwenta lokutsite, kodvwa abalisebentisanga lelotfuba. Loku kwehluke kakhulu kulesibindzi lesakhonjiswa nguJayeli lesichazwa kulamavesi lalandzelako!—Khu. 5:24-27.

12. Ngumuphi umehluko lobewukhona emkhatsini webantfu lokukhulunywa ngabo kuTikhulu 5:9, 10, futsi loku kusishukumisela kutsi senteni lamuhla?

¹² KuTikhulu 5:9, 10, sifundza ngembono  lowehlukile lobowukhona kulabo lebebanaBharaki nakulabo labangazange bahambe nabo. BoDebhora naBharaki bancoma ‘baholi baka-Israyeli, labatinikela bahamba nesive.’ Bebahluke kakhulu kulabo ‘lebebagibele timbongolo letimhlophe,’ lebebatitjela kutsi bancono kunalabanye, kanye nakulabo lebebatsandza imphilo lentofontofo futsi ‘bahlala etihlalweni tetingubo’! Ngekungafani nalabo ‘labahamba ngendlela,’ futsi bakhetsa indlela lelula, labo labahamba naBharaki bebatimisele kuya emphini bahamba ematjeni lashelelako aseThabori nasetihosheni taseKhishoni letigcwele ematete! Bonkhe labo lebebafuna injabulo bacelwa kutsi bacabange ngaloku! Bekufanele bazindle ngalelitfuba labangazange balisebentise lekufeza injongo yaJehova. Ngendlela lefanako, nalamuhla labo labatigodlako ekukhonteni Nkulunkulu enkonzweni yasikhatsi sonkhe kufanele bazindle ngaloku.

13. Besinjani simo sengcondvo sesive sakaRubeni, kaDani kanye nesaka-Asheri nasicatsaniswa nesive sakaZebuloni nesakaNaftali?

¹³ Labo labatinikela kulomsebenti basibona sandla saJehova kutsi sabulwela njani bukhosi bakhe. Bebanalokutsite lebebangakhuluma ngako njengekutsi babonge “ngetento letilungile [taJehova].” (Khu. 5:11) Ngakulolunye luhlangotsi, bendlu yaRubeni, yaDani kanye neya-Asheri akukhulunywa ngabo kuTikhulu 5:15-17 ngoba bebanake kakhulu tintfo tabo letifaka ekhatsi imihlambi yabo, imikhumbi kanye netikhumulo temikhumbi yabo kunekutsi bente umsebenti Jehova lebekatse awentiwe. Ngalokwehlukile kulaba, boZebuloni naNaftali ‘banikela ngemphilo yabo’ kute basekele Debhora naBharaki. (Khu. 5:18) Kunesifundvo lesihle lesingasitfola kulesimo sengcondvo lesihle sekutinikela emsebentini.

14. Sibusekela njani bukhosi baJehova lamuhla?

¹⁴ Lamuhla asicelwa kutsi siye emphini kodvwa sinelilungelo lekukhombisa kutsi sinesibindzi ngekutsi siwukhutsalele umsebenti wekushumayela. Kunesidzingo lesikhulu setisebenti tekutitsandzela enhlanganweni yaJehova. Tigidzi tebazalwane nabodzadze  kanye netebantfu labasebasha tiyatinikela emisebentini leyehlukene yasikhatsi sonkhe lefaka ekhatsi kuba ngemahlahlandlela, tikhonti taseBethel, ekwakhiweni kwemaHholo eMbuso, kanye nekuba tisebenti emihlangweni yetigodzi neyetifundza. Cabanga nangemadvodza lamadzala lanemitfwalo leminyenti emaKomidini eTibhedlela newekulungiselela imihlangano yetifundza. Ciniseka kutsi Jehova uyajabula ngemoya wakho wekutinikela futsi ngeke awukhohlwe.—Heb. 6:10.

15. Singaciniseka njani kutsi asicindzetelwa yimibono lengasiyo ngemsebenti waJehova?

¹⁵ Ngamunye wetfu utabe wenta kahle nangabe atibuta kutsi: ‘Kuyangijabulisa yini kubona labanye betfwele kamatima emsebentini weNkhosi? Ngabe ngivumela tintfo letingakabaluleki kutsi tingente ngingakhoni kutinikela ekwenteni imisebenti yaJehova? NjengaBharaki, Debhora kanye nalamadvodza langu-10 000 latinikela ngekutitsandzela, nginako yini kukholwa nesibindzi lokungangenta ngisebentise nobe yini lenginayo kute ngilalele umyalo waJehova? Nangabe ngicabangela kutfutsela kulelinye lidolobha noma lelinye live kute ngiyofuna emadlelo laluhlata, ngiyathantaza yini ngicele sicondziso saJehova futsi ngicabange nangemphumela longabakhona emndenini wami kanye nasebandleni?’ *

16. Yini Jehova lafuna simentele yona?

¹⁶ Jehova usente bantfu sibili ngekutsi asivumele sisekele bukhosi bakhe. Njengobe Sathane enta kutsi bantfu bekucala bamsekele nakavukela bukhosi baNkulunkulu, ngako nawusekela bukhosi baJehova usuke ukhombisa kutsi awuhambisani naye. Kukholwa nekwetsembeka lokukwenta utinikele emsebentini wembuso kuyamjabulisa Jehova. (Taga. 23:15, 16) Nasisekela bukhosi baJehova, kuba lula ngaye kutsi aphendvule Sathane lomedzelelako. (Taga. 27:11) Ngako ke, kulalela kwakho kuyasifaka sandla ekuniketeni Jehova loko lokuligugu futsi uyajabula kakhulu ngaloku.

17. Tikhulu 5:31 tisitjelani ngelikusasa?

¹⁷ Madvutane umhlaba wonkhe utawugcwala bantfu labasekela bukhosi baJehova. Sisilangatelela kakhulu leso sikhatsi! Sihlabela njengaDebhora naBharaki, sitsi: “Yebo, Simakadze, shangatsi tonkhe titsa takho tingabhubha. Kodvwa labo labatsandza wena bangakhanya njengelilanga naliphumako ngemandla alo.” (Khu. 5:31) Lesicelo setfu sitawuphendvulwa ngalesikhatsi Jehova sekacedza lelive lelibi laSathane! Nakucala imphi ye-Amagedoni, kutawuba bete sidzingo sebantfu labatawulwa nalesitsa. Leso kuyawuba sikhatsi sekutsi ‘sime sicine sitewubona kusindzisa [kwaJehova].’ (2 Khr. 20:17) Njengobe sisegadze leso sikhatsi, sinematfuba lamanyenti ekusekela injongo yaJehova ngesibindzi nangekutimisela.

18. Utawuba yini umphumela wekutinikela kwakho kulabo labazuzako emsebentini lowentela Jehova?

¹⁸ LiBhayibheli litsi: “Bantfu batinikela bona ngenhlitiyo lemhlophe. Dvumisani Simakadze!” Ngako, boDebhora naBharaki bacalisa ingoma yabo yekuncoba ngekudvumisa uMdali Lophakeme, hhayi nje letinye tidalwa. (Khu. 5:1, 2) Nalamuhla, shengatsi bonkhe labo lababona indlela lotinikela ngayo ‘bangadvumisa [Jehova]!’