1, 2. (a) Ki inhustisia Nabot i su yu hòmbernan a pasa aden? (b) Kua dos kualidatnan nos lo analisá den e artíkulo akí?

IMAGINÁ bo e siguiente esena. Un hòmber ta ser akusá falsamente di a kometé un delitu ku ta meresé pena di morto. E hòmber ta ser sentensiá a base di testimonio falsu di testigunan ku ta konosí komo hende pèrvèrso. Su famia- i amigunan ta keda tur turdí i indigná. Esnan ku ta stima hustisia ta sinti nan masha malu i tristu ora nan presensiá e ehekushon di e hòmber inosente akí i di su yu hòmbernan. Esaki no ta un esena imaginario. Esaki ta loke a sosodé ku Nabot, un fiel sirbidó di Yehova kende a biba durante e reinado di Rei Akab di Israel.—1 Rei. 21:11-13; 2 Rei. 9:26.

² Den e artíkulo akí, nos lo analisá e relato di Nabot i tambe esun di un fiel ansiano di e kongregashon kristian di promé siglo, kende a faya den su manera di mira kosnan. Ora nos analisá e ehèmpelnan bíbliko akí, nos lo siña ku si nos ke tin e mesun sentido di hustisia ku Yehova, nos mester ta humilde. Tambe nos lo siña ku si nos ta dispuesto pa pordoná ora nos mira aktonan di inhustisia den e kongregashon, esei  por yuda nos reflehá e punto di bista di hustisia di Yehova.

3, 4. Ki tipo di hòmber Nabot tabata, i dikon el a nenga di bende su kunuku di wendrùif ku Rei Akab?

³ Nabot tabata un fiel sirbidó di Yehova den un époka kaminda mayoria di israelita tabata sigui e mal ehèmpel di Rei Akab i su kasá, e reina malbado, Yézabèl. E adoradónan di Baal akí no tabatin rèspèt pa Yehova ni pa su normanan. Di otro banda, Nabot sí a balorá su relashon ku Yehova mas tantu ku bida mes.

⁴ Lesa 1 Reinan 21:1-3. Ora Akab a ofresé pa kumpra Nabot su kunuku di wendrùif òf pa dun’é un mas mihó, Nabot a nenga. Dikon? Ku rèspèt el a splika: “SEÑOR libra mi di duna bo e herensia di mi tatanan.” Nabot a nenga pasobra Yehova su lei a prohibí e nashon di Israel di bende di forma permanente e herensia di e tribu di nan famia. (Lev. 25:23; Num. 36:7) Klaramente anto, Nabot tabatin e punto di bista di Yehova tokante e asuntu akí.

5. Kiko Yézabèl a hasi pa haña e kunuku di Nabot?

⁵ Lamentablemente, komo ku Nabot a nenga e oferta, esei a pone Rei Akab i su kasá kometé un seri di akto horibel. Pa Yézabèl por a haña e kunuku pa su kasá, el a lanta akusashon falsu kontra Nabot, i komo resultado, e ku su yu hòmbernan a ser ehekutá. Kon Yehova lo a reakshoná pa ku e inhustisia trágiko akí?

6, 7. Kon Yehova a demostrá ku e ta stima hustisia, i dikon esaki por tabata un konsuelo pa e famia i amigunan di Nabot?

⁶ Mesora Yehova a manda Elías bai papia ku Akab. Ku rason Elías a akusá Akab di ta un asesino i un ladron. Kiko tabata Yehova su veredikto den e kaso akí? Akab, su kasá i su yu hòmbernan lo a pèrdè nan bida meskos ku Nabot ku su yu hòmbernan.—1 Rei. 21:17-25.

⁷ Aunke Nabot su famia i amigunan tabata tristu pa motibu di e asesinatonan ku Akab a kometé, sin duda nan lo mester a haña un poko konsuelo den e echo ku Yehova tabata konsiente di e inhustisia ei i ku el a tuma medida mesora. Sinembargo, nan humildat i nan konfiansa den Yehova lo a ser poné na prueba ora e situashon a kambia diripiente.

8. Kon Akab a reakshoná na Yehova su huisio, i ku ki resultado?

⁸ Ora Akab a tende di e huisio desfaborabel di Yehova, Akab “a sker su pañanan, a bisti paña-di-saku i a yuna, i el a drumi abou den paña-di-saku i tabata kana rònt tur deprimí.” Akab a humiá su mes. Ku ki resultado? Yehova a bisa Elías: “Pasobra el a humiá su mes mi dilanti, lo mi no trese e maldat den su dianan, ma lo mi trese e maldat riba su kas den e dianan di su yu hòmber.” (1 Rei. 21:27-29; 2 Rei. 10:10, 11, 17) Yehova, Esun ku ta “sonda [òf, “saminá,” NW] kurason” a mustra un grado di miserikòrdia na Akab.—Pro. 17:3.

9. Dikon humildat lo tabata un protekshon pa Nabot su famia i amigunan?

⁹ Kiko e hendenan ku tabata sa di e krímen teribel akí di Akab a pensa di e desishon ei? A parse ku Yehova a kambia su sentensia, i esei por a pone e fe di Nabot su famia i amigunan na prueba. Si esei tabata e kaso, humildat por a protehá nan i motivá nan pa sigui sirbi Yehova fielmente, ku e konfiansa ku nan Dios sigur no ta kapas di kometé  inhustisia. (Lesa Deuteronomio 32:3, 4.) Nabot, su yu hòmbernan i nan famia lo haña hustisia perfekto ora Yehova resusitá e hustunan. (Yòb 14:14, 15; Huan 5:28, 29) Ademas, un persona humilde ta kòrda ku e “Dios [“berdadero,” NW] lo trese tur echo na huisio, tur kos ku ta skondí, sea bon òf malu.” (Ekl. 12:14) Sí, ora Yehova ta husga, e ta tene kuenta ku detaye ku nos no sa di dje. Pues, humildat ta protehá hende inosente pa no bai hasi nada ku por daña nan relashon ku Dios.

10, 11. (a) Ki sirkunstansianan por pone nos sentido di hustisia na prueba? (b) Den ki maneranan humildat lo protehá nos?

¹⁰ Kon lo bo reakshoná si e ansianonan tuma un desishon ku bo no ta komprondé òf ku kisas bo no ta di akuerdo kuné? Por ehèmpel, kiko lo bo hasi si abo òf un ser kerí di bo pèrdè un privilegio presioso? Òf kiko si bo kasá, bo yu hòmber òf yu muhé òf un bon amigu di bo ser ekspulsá i bo no ta di akuerdo ku e desishon? I kiko si bo ta kere ku tabata un eror pa mustra miserikòrdia na un ruman ku a kometé un piká? Situashonnan asina por pone nos fe den Yehova i den e manera ku el a organisá su pueblo awe na prueba. Kon humildat por protehá bo si bo haña bo ku un prueba asina? Laga nos wak den ki dos manera e por protehá bo.

 ¹¹ Na promé lugá, humildat lo motivá nos pa rekonosé ku nos no tin tur detaye. Sin importá kuantu nos sa di un situashon, ta Yehova so por lesa kurason. (1 Sam. 16:7) Ora nos ta konsiente di e bèrdat innegabel akí, esaki por yuda nos pa ta humilde, rekonosé nos limitashonnan i kambia nos punto di bista di e asuntu. Na di dos lugá, humildat lo yuda nos pa ta sumiso i tene pasenshi segun ku nos ta warda riba Yehova pa korigí kualke inhustisia. Ta manera e hòmber sabí Sálomon a skirbi: “Lo bai bon ku esnan ku ta teme Dios . . . Ma lo no bai bon ku e hòmber malbado i e lo no hasi su dianan largu.” (Ekl. 8:12, 13) Sí, si nos ta humilde, esei lo benefisiá tantu nos komo tur hende enbolbí.—Lesa 1 Pedro 5:5.

12. Ki relato nos lo analisá, i dikon?

¹² Den e promé siglo, e kristiannan na Antiokia di Siria a haña nan ku un situashon ku no solamente a pone nan humildat na prueba sino tambe si nan tabata dispuesto pa pordoná. Ban analisá e relato ei i wak kon e por yuda nos saminá nos aktitut enkuanto pordoná otro hende i komprondé mihó kon pordon ta relashoná ku Yehova su punto di bista di hustisia.

13, 14. Ki privilegio apòstel Pedro tabatin, i kon el a demostrá kurashi?

¹³ Apòstel Pedro tabata un ansiano bon konosí den e kongregashon kristian. E tabata un bon amigu di Hesus i a haña responsabilidatnan importante. (Mat. 16:19) Por ehèmpel, na aña 36, Pedro tabatin e privilegio di kompartí e bon notisia ku Kornelio ku su famia. E okashon ei tabata unu masha spesial pasobra Kornelio tabata un gentil insirkunsidá. Ora Kornelio ku su famia a haña spiritu santu, Pedro a rekonosé: “E hendenan akí a risibí spiritu santu meskos ku nos. P’esei, ken por bisa ku nan no por batisá den awa?”—Echo. 10:47.

¹⁴ Na aña 49, e apòstelnan i e ansianonan na Herúsalèm a reuní huntu pa disidí si e gentilnan ku a kombertí na kristianismo tabatin ku laga sirkunsidá nan mes òf nò. Na e reunion ei, Pedro a papia ku kurashi i a kòrda e rumannan ku algun aña promé, gentilnan insirkunsidá a haña spiritu santu. E echo ku Pedro tabata un testigu okular di e suseso ei a yuda e kuerpo gobernante di promé siglo tuma un desishon. (Echo. 15:6-11, 13, 14, 28, 29) Probablemente, tantu e kristiannan hudiu komo esnan gentil a apresiá Pedro su presentashon di e detayenan akí sin miedu. Lo mester tabata masha fásil pa nan tin konfiansa den un hòmber asina spiritualmente maduro.—Heb. 13:7.

15. Ki fayo Pedro a kometé ora e tabata na Antiokia di Siria? (Wak e promé plachi.)

¹⁵ Poko tempu despues di e reunion na aña 49, Pedro a bishitá Antiokia di Siria. Ora e tabata einan, el a asosiá libremente ku su rumannan gentil. Sin duda, nan a benefisiá di Pedro su konosementu i eksperensia. Nos por imaginá nos mes anto kon babuká i desapuntá e rumannan a keda ora ku diripiente Pedro a stòp di kome ku nan. Esei tabatin su influensia asta riba otro miembronan hudiu di e kongregashon, inkluso Bárnabas, kende a kuminsá hasi meskos. Kiko a pone un ansiano kristian maduro faya den su manera di mira kosnan, algu ku por a  dividí e kongregashon? Mas importante ainda, kiko nos por siña for di e fayo di Pedro ku lo por yuda nos si un ansiano hasi òf bisa algu ku ta hùrt nos?

16. Kon apòstel Pablo a korigí Pedro, i ki preguntanan ta lanta?

¹⁶ Lesa Galationan 2:11-14. Pedro a sukumbí na miedu di hende. (Pro. 29:25) Aunke Pedro tabata sa bon kiko ta Yehova su punto di bista tokante e asuntu akí, Pedro a laga opinion di e hudiunan sirkunsidá di e kongregashon na Herúsalèm hinka miedu den dje. Apòstel Pablo, kende tambe tabata presente na e reunion na Herúsalèm na aña 49, a konfrontá Pedro na Antiokia i a bis’é ku e tabata un hipókrita. (Echo. 15:12; Gal. 2:13) Kon e kristiannan gentil ku a bira víktima di Pedro su fayo lo a reakshoná na e trato inhustu akí? Nan lo a laga esaki pone nan trompeká? Pedro lo a pèrdè su privilegionan presioso pa motibu di su fayo?

17. Kon Pedro a benefisiá di Yehova su pordon?

¹⁷ Pedro tabata humilde i a aseptá e korekshon di Pablo. E Skritura no ta bisa ku el a pèrdè su privilegionan. De echo, despues Dios a inspirá Pedro pa skirbi dos karta ku a bira parti di Beibel. Ta interesante pa nota ku den Pedro su di dos karta, e ta referí na Pablo komo “nos ruman stimá.” (2 Ped. 3:15) Aunke ku e fayo di Pedro lo por a hùrt e miembronan gentil di e kongregashon, Hesus, kende ta e kabes di e kongregashon, a sigui us’é. (Efe. 1:22) Pues, e miembronan di e kongregashon a haña e oportunidat pa imitá Hesus i su Tata i pordoná Pedro. Ta di spera ku niun hende lo no laga fayo di hende imperfekto pone nan trompeká.

18. Den ki situashonnan nos lo mester reflehá Yehova su punto di bista di hustisia?

¹⁸ Manera tabata e kaso den promé siglo, no tin ansiano perfekto den e kongregashon kristian djawendia, pasobra “nos tur ta faya hopi biaha.” (Sant. 3:2, nota.) Kisas ta masha fásil pa nos rekonosé esei, pero kiko nos lo hasi ora e imperfekshon di un ruman afektá nos personalmente? Nos lo tin Yehova su punto di bista di hustisia e ora ei? Por ehèmpel, kon lo bo reakshoná si un ansiano hasi un remarke ku ta indiká ku e tin un poko prehuisio? Si un ansiano bisa algu sin pensa ku ta ofendé bo òf hasi bo doló, lo bo laga esei pone bo trompeká? En bes di kore konkluí ku e ruman ei no ta kualifiká mas pa ta ansiano, lo bo demostrá pasenshi i warda riba Hesus, kabes di e kongregashon? Lo bo hasi esfuerso pa mira mas ayá, kisas reflehando riba tur e añanan ku e ruman a sirbi fielmente? Si un ruman kende a faya kontra bo sigui sirbi komo ansiano òf haña mas privilegio, lo bo ta kontentu p’e? Si bo ta dispuesto pa pordoná, lo bo reflehá Yehova su punto di bista di hustisia.—Lesa Mateo 6:14, 15.

19. Kiko nos mester ta determiná pa hasi?

¹⁹ Hende ku ta stima hustisia ta anhelá e tempu ora Yehova eliminá kompletamente tur inhustisia ku Satanas i su sistema malbado ta kousa. (Isa. 65:17) Mientrastantu, laga kada un di nos ta determiná pa reflehá Yehova su punto di bista di hustisia, rekonosiendo nos limitashonnan personal humildemente i pordonando hende ku faya kontra nos libremente.