1, 2. (a) Kukalanyi kunakumonawu amanakwetu niahela? (b) Malwihwinyi itunateli kudihula?

MANAKWETU Lije wahosheli nindi, “chatachikili njita muBurundi, ami nichisaka chetu twadiña hakupompa kwanyanya. Twamweneña antu anakutemoka amakwawu anakudilisha mata. Anvwali ninetu anyana 11 twatemukili nawa twasendeli yuma yantesha. Amakwawu hakachi ketu atemukilili kuchilombu chamatunduka kuMalawi hadiña makilomita 1,600. Ilaña etu amakwawu twapalañenenimu.”

² Mukaayi kejima, matunduka anatemuki kushiya matalawu muloña wanjita hela makabisha anabadika ha 65,000,000 nawa kanda avuleñahu dehi chamuchidiwu. * Hakachi kanawa matunduka hadi niaYinsahu jaYehova. Amavulu ajimbesha antaña niyuma yawu yayivulu. Kukalanyi kunakumonawu amakwawu? Tunateli kuyikwasha ñahi awa amanakwetu niahela kulonda  ‘amukalakeli Yehova namuzañalu’ hela chakwila anakumona kukala? (Mas. 100:2) Nawa tunateli kushimwina ñahi nsañu yayiwahi kudi matunduka abula kumwiluka Yehova?

3. Yesu niatumbanji twindi amavulu ekalili ñahi matunduka?

³ Chelili kañelu kaYehova yamusoñamishi Yosefu nindi Yesu anakukeña kumujaha kudi Mwanta Herodi, Yesu hadiñayi mwana wanyanya amutemwishili kudi anvwali jindi kuEjipitu. Ekalili matunduka kwenakuna sampu nimpinji yafwiliyi Herodi. (Mat. 2:13, 14, 19-21) Chimwahitili yaaka yayivulu, atumbanji twaYesu akusambila “apalañeneni mumaluña amuYudeya nimuSamariya” muloña wakuyikabisha. (Yil. 8:1) Yesu wahosheleñahu dehi nindi atumbanji twindi amavulu akatemuka hamatalawu. Wahosheli nindi: “Neyi ayikabisha mumusumba wumu, temukilenu muwukwawu.” (Mat. 10:23) Kutemuka hetala kwapela wanyi.

4, 5. Wubanjinyi wunateli kumonawu matunduka neyi (a) anakutemuka? (b) adi muchilombu?

⁴ Matunduka anateli kwikala muwubanji neyi anakutemuka hela anakushakama muchilombu. Gad, mwanyika Lije wahosheli nindi: “Twendeli hadi nyilungu yayivulu iku tunakuwana yibimbi yayivulu munjila. Nadiña nayaaka 12. Nyendu yami yananini nankashi, dichi nayilejeli akwetu nami ashiyi hohu kwami. Atata akeñeleña wanyi kushiya mumakasa awayilumbu dichi añelekeli. Twamulombeleña Yehova nikumukuhwelela, mpinji yikwawu twadiileña hohu mbuma jitwakumwineña kunyitondu yamunjila hakwila tuhandi.”—Fwi. 4:12, 13.

⁵ Antaña jaLije amavulu ashakamini yaaka yayivulu muyilombu yawaUnited Nations mwashakamineña matunduka. Hela chochu, mwadiña yilwilu yatama. Lije, nkoñi wañinza chayinu mpinji, wahosheli nindi: “Antu amavulu azatileña wanyi. Andiña akwamatuñu, asheteleña, ahemeneña yisela yalwisu, adiña amakombi nawa elileña yuma yatama.” Hakwila abuleña kudiñija muyuma yatama, aYinsahu adiña muchilombu ateleleli kuzata nyidimu yamuchipompelu. (Heb. 6:11, 12; 10:24, 25) Hakwila nawu ekali akola kuspiritu, azatishileña mpinji yawu chiwahi, amakwawu atachikili wupayiniya. Chuma chikwawu chayikwashili atoñojokeleña hachendeliwu aIsarela muchinkalampata, niwena elukili nawu akutwalekahu wanyi kushakama muchina chilombu.—2 Kor. 4:18.

6, 7. (a) “Kukeña kwaNzambi” kwayisañumunaña ñahi akwaKristu kukwasha amanakwawu anakankili? (b) Shimunenu chakutalilahu.

⁶ “Kukeña kwaNzambi” kwatusañumunaña kudikeña wumu namukwawu, sweje-e mumpinji yakala. (Tañenu 1 Yowanu 3:17, 18.) Chelili nzala yakapwelendedi yiholokeli akwaKristu aYudeya amumafuku awapostolu, chipompelu chayikwashili. (Yil. 11:28, 29) Kapostolu Pawulu naPetulu niwena akolesheli akwaKristu kwikala nachisambu. (Rom. 12:13; 1 Pet. 4:9) Neyi akwaKristu akamenaña chiwahi amanakwawu ayendelaña, atela kukwasha amanakwawu adi mukukala hela anakabishiwu muloña wachikuhwelelu chawu!—Tañenu Yishimu 3:27. *

⁷ Katataka, aYinsahu jaYehova amavulu awamayala, ambanda nianyana atemuka ndombu nimakabisha muUkraine. Chawushona, amakwawu ayijahili. Ilaña amavulu ayisendeli kudi amanakwawu akuspiritu momuUkraine  nawa amakwawu ayisendeli kudi akwawu aYinsahu muRussia. Mumatuña ejima ayedi, atwalekelihu kubula kudiñija munsañu jamatuña nachiyuulu dikwila nawu kubula kwikala “ampata yamunu mwishina” nikutwalekahu “kushimwina mazu ansañu yayiwahi.”—Yow. 15:19; Yil. 8:4.

8, 9. (a) Kukalanyi kwamonañawu matunduka neyi anayi kwituña dacheñi? (b) Muloñadi chitwatela kuyikwashila?

⁸ Antu amakwawu apalañenaña mwituña dawu, ilaña amakwawu atemukilaña mwituña mwabula kwilukawu. Nfulumendi yinateli kuloñesha yakuda, yakuvwala, hakukama, ilaña yakuda yenjililawu yinateli kwikalaku wanyi. Matunduka afumaña kumaluña atata chinateli kuyikalila kushakama mumaluña atuuta katachi. Neyi afuma munyikala chinateli kuyikalila kwiluka chakuzatisha yozelu yamwitala yazatikaña namalayiti.

⁹ Nfulumendi jikwawu jenkaku maprogilamu akukwashilamu matunduka kulonda enjilili. Hela chochu, chimwahita tukweji twantesha matunduka atachikaña kudihemba awenawu. Chakalaña nankashi hakwila atachiki kudihemba awenawu. Fwikijenu hampinji yoyimu munakudiza idimi, kulondela nshimbi jajiha nichakudikunda nawantu, kuzata yuma mumpinji, kufweta nyinsoku, kufweta mali, kuya kushikola nikufumba anyana. Kwila muyikwasha munjila yakalemesha amanakwetu niahela anakumona kukala kwamuchidiwu nehi?—Fwi. 2:3, 4.

10. Tunateli kukolesha ñahi chikuhwelelu chawamatunduka anenzi? (Talenu mwevulu wakutachikilahu.)

¹⁰ Kubombelahu, mpinji yikwawu akulumpi janfulumendi akañeshaña amanakwetu matunduka kuya nakupompa. Nyitayi yikwawu yakaanaña kukwasha amanakwetu hela kuyihaña neyi akaana kwiñila mudimu wukukojeja abuleña kuya nakupompa. Amanakwetu amakwawu etejaña muloña wakutiya woma. Dichi, neyi amanakwetu matunduka anenzi mwiluña detu, twatela kudimona nawu swayi. Atela kwiluka nawu twayikeña. Neyi tuyitiyila luwi nikuyikwasha, chikuhwelelu chawu chikukola.—Yish. 12:25; 17:17.

11. (a) Matunduka akeñekaña yumanyi neyi dihu hanenziwu? (b) Matunduka anateli kumwekesha ñahi kusakilila?

¹¹ Chuma chatachi chitwatela kuyilila awa amanakwetu hikuyinka yakuda, yakuvwala hela yuma yikwawu yakeñekaña. * Hela neyi tuyinka hohu tuyuma twanyanya, chidi neyi taayi, chikuyikwasha. Nawa neyi matunduka asakilila nikubula kulomba yuma, chikuletesha ana anayitambwili kutiya kuwaha. Ilaña neyi matunduka ashindamena hayuma yanakuyinkawu hohu akuyilemesha wanyi nawa wubwambu wawu nawamanakwawu wukumana. (2 Tesa. 3:7-10) Ilaña akeñekaña kuyidizisha chakwila yuma.

12, 13. (a) Tunateli kukwasha ñahi matunduka? (b) Shimunenu chakutalilahu.

¹² Kukwasha matunduka bayi neyi kwakeñekaña kuyinka mali amavuluku, ilaña twatela kwikala nampinji yakuhanjeka nawu. Tunateli kuyileja chakukandama nyotoka, chakulanda yakuda yayiwahi ilaña yapela wuseya hela chakulanda yozelu yidi neyi ikina dakuchimisha yakuvwala hela dakukupa nachu kulonda awani mali akudikwashamu. Ilaña  chuma chasweja kulema, munateli kuyikwasha kuzata chikupu nyidimu yakuchipompelu. Neyi chinatwesheki, yisendenuku hakuya nakupompa. Cheñi, yilejenu chimwashimwinaña antu nsañu yaWanta mwiluña denu. Yisendenu amanakwetu niahela matunduka mumudimu wakushimwina.

¹³ Matunduka atumpululu awana chashikiliwu muchipompelu chimu, aeluda ayidizishili chakwendesha nyotoka, chakutayipa, chakusoneka nyikanda nichakwikala nampinji yakumukalakela Yehova chikupu. (Ñal. 6:10) Hashimbwili wanyi, wejima wawu ekalili apayiniya. Chayikwashiliwu kushilahu nikuzata kwawu nañovu hakutwamijaku yuma yakuspiritu kwayikwashili kukolelaku nikubula kukumpuka nakaayi kaSatana.

14. (a) Kwesekanyi kwatela kushindawu matunduka? (b) Shimunenu chakulilahu.

¹⁴ Kufwana akwaKristu ejima, matunduka hiyatela kudiñija muyuma yejima yinateli kujimbeja wubwambu wawu naYehova kukoola mahetaku. * Lije, itwatena hakusambila nianakwindi anukaña mazu akolesheli chikuhwelelu chawu ayilejeliwu kudi tata yawu hampinji yadiñawu nakutemuka. Wahosheli nindi, “atachikili kunata yuma chimu-chimu hayuma yitwasendili yamukunkulwayi. Kuhiñahu, anyamwini chola mwabulili yuma nakuhosha iku anakuseha nawu: ‘Wunamoni? Kwosi chuma chitwatela kusenda!’”—Tañenu 1 Timotewu 6:8.

15, 16. Tunateli kuyikwasha ñahi matunduka (a) kuspiritu? (b) muyitoñojoka?

¹⁵ Matunduka akeñekaña kuyikwasha kuspiritu nimuyitoñojoka kubadika kuyikwasha hohu kumujimba. (Mat. 4:4) Aeluda anateli kuyikwasha kuhitila mukuyitambwila matunduka nyikanda yamwidimi dawu hela kutambika amanakwetu ahoshaña idimi dawu. Matunduka amavulu anayambuli nawantaña jawu, antu amuchituñilu chawu ninayipompelu yawu yakeñeliwu nankashi. Dichi atela kumona chikupu nawu Yehova wayikeña nawa wayakamenaña kuhitila mudi akwawu akwaKristu. Neyi nehi, anateli kudikunda nawantaña jawu abula kwitiya hela nawakwawu mwenjililiwu eluka chisemwa chawu.  (1 Kor. 15:33) Neyi tuyikwasha kumona nawu twayikeña muchipompelu, dikwila nawu tunakuzatila hamu naYehova “wahembaña enyi.”—Mas. 146:9.

¹⁶ Kufwana Yesu nawanvwali jindi, chinateli kuyikalila matunduka kufunta kumukala wawu neyi chakwila ana ayiletesheli atemukiku achidi kwoku. Cheñi, neyi chashimwiniyi Lije, “anvwali amavulu amweni antaña jawu anakuyikama chakukanjikija nikuyijaha kwila afuntisha anyanawu kumaluña amuchidiwu nehi.” Hakwila nawu akwashi awa antu, amanakwetu atambwilaña matunduka atela kwikala ‘nakukeña, wushona nikudizoza.’ (1 Pet. 3:8) Makabi analeteshi matunduka kuneña nikutiya nsonyi kuhosha hakukala kwamweneñawu, sweje-e neyi hadi anyana. Dihulenu enu aweni nenu, ‘Neyi yami nadiña itunduka, nadi kutiya ñahi?’—Mat. 7:12.

17. Kushimwina matunduka kwayikwashaña ñahi?

¹⁷ Matunduka amavulu makonu afuma mumatuña mwakanishawu mudimu wetu wakushimwina. Tunakuyisakilila enu aYinsahu munakudikita mumatuña munakuya matunduka, muloña matunduka amavulu anakutiya “mazu aWanta” katachi. (Mat. 13:19, 23) Antu amavulu ‘anasendi yiteli yalema’ anakuyikwasha kuspiritu kukupompa kwetu nawa anakushikena kuhosha nawu: “Chalala Nzambi wudi mukachi kenu.”—Mat. 11:28-30; 1 Kor. 14:25.

18, 19. Tunateli kubabala ñahi neyi tunakushimwina matunduka?

¹⁸ Antu ashimwinaña matunduka atela kwikala “ababala” nawa ‘amaana.’ (Mat. 10:16; Yish. 22:3) Tiyililenu yuma yinakuhoshawu, ilaña bayi muhanjeka hansañu jamapolitikiku. Londelenu yuma yinayilejiwu kudi kasanji kamutayi ninfulumendi, bayi mudisha hela kushisha akwenu mukukalaku. Lemeshenu nsakililu nichisemwa chamatunduka. Chakutalilahu, antu amakwawu mumatuña acheñi ambanda avwalaña yakuvwala yakuluka. Dichi, neyi munakushimwina matunduka, vwalenu chachiwahi nawa nakalemesha.

¹⁹ Neyi chochashimwiniyi Yesu muchishimu chindi chakaSamariya, twatela kukwasha antu anakukabakana kushilahu niabula kwila aYinsahu. (Luka 10:33-37) Njila yimu yayiwahi hikuyishimwina nsañu yayiwahi. Eluda wumu wunakwashi matunduka amavulu wahosheli nindi, “Chikuwaha neyi tukudimwekesha netu tudi aYinsahu jaYehova nawa tufwilaña kukwasha antu kuspiritu bayi muyitoñojokaku. Neyi nehi, tukudikeña nawu muloña wayuma yitunayinki.”

20, 21. (a) Yumanyi yayiwahi yafumaña mukumwekeshela kukeña akwaKristu matunduka? (b) Tukahanjekadi muchibaaba chinalondelihu?

²⁰ AkwaKristu neyi amwekeshaña kukeña kudi “enyi” mwafumaña yuma yayiwahi. Muhela wejina daAlganesh chafwishiliyi nfumwindi, watemukili makabisha muEritrea nawanyanindi 6. Endeli mafuku 8 muchinkalampata hakwila ashiki kuSudan. Wahosheli nindi: “Amanakwetu atwitambwilili neyi kwiji tudi antaña, atwinkeli yakuda, yakuvwala, hakukama nimali akwendela. Kwekalahu antu amakwawu atambwilaña enyi mumatalawu muloña wakwila adifukulaña kudi Nzambi yowumu? A Yinsahu jaYehova hohu!”—Tañenu Yowanu 13:35.

²¹ Indi anyana atemukaña nawa nvwali jawu nakwikala matunduka hela añiinza? Muchibaaba chinalondelihu, tukahanjeka hachitunateli kukwasha awa antu kulonda amukalakeli Yehova namuzañalu.