1, 2. (a) Eda tadikaka bona taihu haida be dahaka hahetoho e davari? (b) Ededia henanadai baita herevalaimu?

TADIKAKA ta ladana Lije na ini e gwau toma: “Burundi ai tuari e vara matama neganai, egu ruma bese na hebouhebou gabuna ta ai nonoho. Taunimanima na e heauva bona e hepidi heheniva. Tamagu, sinagu, bona ai natu 11 na emai dabua mo a abidia bena mauri helaoreana a heau. Egu ruma bese taudia haida na Malawi ai refiuji kamepana ta ela, idia na kilomita 1,600 mai kahana e raka. Ai haida be gabu ma haida a heau lao.”

² Tanobada heḡeḡemadai, tuari eiava daḡedaḡe karadia dainai edia hanua e heautani taudia na 65,000,000 mai kahana​—una ese laḡani gunadia edia namba e hereaia. * Idia momo na Iehova ena Witnes taudia. Momo na edia lalokau taudia bona kohu e haboiodia. Ma haida be dahaka hekwakwanai haida e davari? Edena dalai unu tadikaka bona taihu baita durudia, unu amo ‘Iehova isiaina bae lao heni mai moaledia ida,’ ena be hahetoho e davarimu? (Sal. 100:2) Bona edena  dalai sivarai namona na Iehova do asie dibaia refiuji taudia ediai baita harorolaia?

3. Edena dalai Iesu bona ena hahediba momo na refiuji taudia heḡereḡerediai ela?

³ Iehova ena aneru ese Iosef e hadibaia King Herod na e urava Iesu baine alaia, una dainai Iesu bona tamana sinana na Aigupto ela bona refiuji taudia heḡereḡeredia e nohova. Unuseniai e noho ela bona Herod e mase. (Mat. 2:​13, 14, 19-21) Laḡani momo muridiai, Iesu ena hahediba ginigunadia na daḡedaḡe karadia ese “e hakarohodia rohoroho, Iudea bona Samaria tanodia idoidiai.” (Kara 8:⁠1) Iesu na mai dibana ena hahediba momo na daḡedaḡe karadia dainai edia hanua bae heautani. Ia na eto: “Hanua ta ai bae daḡedaḡe henimui negana ai na idau hanuana ta ba heau lao.” (Mat. 10:23) Badi haida dainai hanua iheautanina na auka.

⁴Refiuji taudia na edia hanua e heautanimu eiava refiuji kamepa ai e nohomu neganai hekwakwanai e davarimu. Lije tadina merona Gad na ini e gwau toma: “Ai na wiki momo lalodiai a raka bona mase taudia momo badidia amo a hanaiva. Una negai lau laḡanigu na 12. Aegu na e gudu dainai egu ruma bese na hamaorodia bae raka lau na basie lalogu. To tamagu na se ura baine rakatanigu dainai e huagu.Dina ta ta ai, ai na mai emai aniani, Iehova a ḡuriḡuri heniava bona enai a tabekauva, nega haida na dala ai e tubu vaivaidia a aniva.”​—Fili. 4:​12, 13.

4, 5. Refiuji taudia be dahaka hekwakwanai e davarimu bema (a) edia tano e heautanimu? (b) kamepa ai e nohomu?

⁵ Lije ena ruma bese momo na laḡani momo lalodiai United Nations edia refiuji kamepadia ai e nohova. To unuseniai mauri na auka. Lije, hari ia na seket tauna, na ini e gwau toma: “Momo na moni ḡaukara asie karava. E maumauva, e kekerova, laki gadaradia e karava, e henaohenaova, bona matabodaḡa karadia e karava.” Unu kamepa ai e nohova Witnes taudia ese unu kara dikadia bae dadarai totona, hanaihanai kongrigeisen ena ḡaukara idauidau bae kara na namo. (Heb. 6:​11, 12; 10:​24, 25) Lauma dalanai dounu bae goada totona, idia ese edia nega e ḡaukaralaia namonamova, bona momo na e painia. Nega iboudiai lalohadai maorona e abiava, badina dibadia kamepa ai na basie noho daudaumu, Israel taudia edia laolao tano ḡaḡaena ai heḡereḡerena.​—2 Kor. 4:18.

6, 7. (a) Edena dalai “Dirava iura-henina” ese Kristen taudia e hagoadadia tadikakadia bae durudia? (b) Haheitalai ta a gwauraia.

⁶ “Dirava iura-henina” karana ese e hagoadadamu, nega aukadia ai lalokau baita hahedinaraia totona. (1 Ioane 3:​17, 18 ba duahi.) Aposetolo edia negai, Iudea Kristen taudia ediai doe e vara neganai, kongrigeisen taudia na dala e kara bae durudia totona. (Kara 11:​28, 29) Aposetolo Paulo bona Petro ese danu Kristen taudia e hagoadadia heabidae karadia bae hahedinarai. (Roma 12:13; 1 Pet. 4:⁠9) Bema Kristen taudia ese e vadivadimu tadikaka taihu na e abidia daemu, namona na daḡedaḡe o edia abidadama dainai hisihisi e davarimu tadikaka taihu danu bae abidia dae!​—Hereva Lada-isidia 3:​27 ba duahia. *

⁷ Vanegai, Iehova ena Witnes taudia momo​—tatau, hahine, bona natu—na Ukraine ena ist tanona ai e vara tuarina bona daḡedaḡe karana dainai edia hanua e heautani. Idia haida na madi e hamasedia. To, idia momo na Ukraine ena gabu ma haida ai e nohomu tadikaka taihu ese e abidia dae, bona ma haida be Russia ai e nohomu tadikaka taihu ese e abidia dae. Unu tano ai, tadikaka na politikol karadia o tuari lalodiai asie vareai, badina idia na “dia tanobada ena,” bona “sivarai namo e harorolaia” goadagoadamu.​—⁠Ioa. 15:19; Kara 8:4.

8, 9. (a) Tano ma ta e laomu refiuji taudia be dahaka hekwakwanai e davarimu? (b) Dahaka dainai baita durudia na namo?

⁸ Refiuji taudia haida na edia hanua amo e heaumu hanua ma ta, to momo na asi dibadia tanona ta e laomu. Gavamani ese aniani, dabua, bona noho gabudia be henidiamu, to idia e manadalai anianidia na reana basie davarimu. Siahu tanodia amo ela refiuji taudia na reana edia nega ginigunana keru mamidia e abimu bona asi dibadia ededia dabua bae hahedokilai. Bona gunika gabudia amo ela taudia na reana taoni rumadia ai e ḡaukaralaimu kohudia iḡaukaralaidia daladia na asi dibadia.

⁹ Gavamani haida na dala haida e heḡaeḡaelaimu, refiuji taudia bae durudia e nohomu gabuna matamatana bae manadalaia totona. To, hua haida muridiai, refiuji taudia na sibodia bae henari diba. Una na mai hekwarahina. Mani a laloa, idia na gado matamatana bae dibaia, taravatu matamatana bae badinaia, kara namodia bae hahedinarai, nega korikori ai ḡau bae kara, tax bona bill davadia bae heni, sikuli baela, bona natudia bae matahakani henidia​—unu iboudiai na bae karadia hebou! Hekwakwanai unu bamodia e davarimu tadikaka taihu be mai haheaukamu bona hematauraimu ida ba durudia diba, a?​—Fili. 2:​3, 4.

10. Edena dalai refiuji tadikaka taihu edia abidadama baita hagoadaia diba? (Rau 3 ai laulau ba itaia.)

¹⁰ Nega haida gavamani taudia ese eda refiuji tadikaka taihu na e koudiamu kongrigeisen taudia basie hedavari henidia. Gavamani oreadia haida na hahegari herevadia amo eda tadikaka taihu e doridiamu moni ḡaukara bae kara, reana una ḡaukara dainai edia hebou bae reaia diba, e gwaumu bema unu basie kara tomamu basie durudiamu o una tano ai na basie nohomu. Tadikaka haida na gari dainai hahetoho unu bamodia ai e moru. Una dainai, refiuji tadikaka taihu na eda tano ai e kaumu neganai, maoromaoro baita hedavari henidia na namo. Namona na bae diba idia na ta lalodia badamu. Eda hebogahisi bona heduru ihenina karana ese edia abidadama na baine hagoadaia diba.​—Her. 12:25; 17:17.

¹¹Matamanai, eda tadikaka taihu na aniani, dabua, bona heduru ḡaudia ma haida amo baita durudia. * Reana harihari ḡaudia maraḡidia, heḡereḡere tadikaka ta nektai ta ba henia neganai, una kara na basine laloa boiomu. Danu, bema refiuji taudia na edia tenkiu karana be hahedinaraiamu, bona ḡau ma haida daidiai basie noinoimu, una ese heduru e heni taudia na be hamoalediamu. To, bema refiuji taudia na haida edia heduru karana ai be tabekau hanaihanaimu, ma haida ese basie matauraidiamu bona edia hetura karana tadikaka ida be hadikaia dibamu. (2 Tes. 3:​7-10) To, idia na heduru bae abi na namo.

12, 13. (a) Ededia dala haida amo refiuji taudia baita durudia diba? (b) Haheitalai ta a gwauraia.

¹² Refiuji taudia baita durudia dalana na, dia moni momo baita henidia, to eda nega baita heni bona baita lalodia bada. Reana basi abi daladia, o dava maraḡi aniani namodia ihoidia daladia baita hadibadia, eiava tulu haida, heḡereḡere turituri misinidia eiava ava utu misinidia iḡaukaralaidia daladia baita hadibadia, unu amo moni dalana ai heduru bae abi diba. Mai anina bada ḡauna na, ba durudia edia kongrigeisen matamatana bae dibaia namonamo. Bema heḡereḡere, emu motuka amo hebou gabuna ba laohaidia. Danu, emu teritori ai taunimanima ediai Basileia sivaraina bae harorolaia daladia ba hadibalaidia. Bona haroro ḡaukara ai  idia ida ba ḡaukara hebou na namo.

¹³ Refiuji tadikaka eregabedia hani na kongrigeisen ta ela neganai, elda idauidau ese motuka tari daladia, kompiuta iḡaukaralaidia daladia, ḡaukara ta totona revareva bae tore daladia, bona Iehova bae hesiai henia namonamo totona nega bae ḡaukaralaia daladia e hadibadia. (Gal. 6:10) Gabeai, idia haniosi na painia taudia ai ela. Unu elda edia heduru bona idia sibodia edia ḡaukara goada karana ese e durudia dainai, idia na lauma dalanai e goada bona Satana ena nega oromana dikana ese na se hamorudia.

14. (a) Refiuji taudia ese dahaka hahetoho bae dadarai na namo? (b) Haheitalai ta a gwauraia.

¹⁴ Kristen taudia iboudiai heḡereḡeredia, namona na refiuji taudia ese kohu bona moni momo itahuna karana bae dadaraia unu amo edia hetura karana Iehova ida basie hadikaia. * Matamanai ta herevalaia tadikakana, Lije bona vara hebouna na edia tano e heautania neganai, tamadia ese e hadibadia abidadama karana na e laloatao. Lije na eto: “Tamagu ese emai baege ai basia ḡaukaralai kohudia ta ta e kokiva bona e negediava. Gabeai, baege asi anina e abia isi bena mai kirina ida e gwa: ‘O itaiamu, ina mo na heḡereḡere!’”​—1 Timoteo 6:8 ba duahia.

15, 16. Refiuji taudia be ede baita durudia toma (a) lauma dalana ai? (b) bae lalomanoka neganai?

¹⁵ Refiuji taudia na dia kohu ai mo ba durudia, to lauma dalanai ba durudia bona ba hagoadadia na namo. (Mat. 4:4) Elda ese refiuji tadikaka taihu bae durudia dalana na, edia gado ai e hahanai pablikeisen bae henidia, bona bae durudia edia gado mai dibadia tadikakadia bae hedavari henidia. Refiuji taudia momo ese varavaradia, edia gabu taudia, bona edia kongrigeisen e rakatani. Una dainai Kristen taudia bogaraḡidiai Iehova ena lalokau bona hebogahisi bae mamia na namo. Badina bema una na lasi, idia na varavaradia dia Witnes taudia be bamodiamu, eiava edia kastom be badina dibamu. (1 Kor. 15:33) Kongrigeisen lalonai refiuji taudia baita abidia daemu neganai, ita na “noho-hedoa taudia” igimadia karana ai Iehova ida ta ḡaukara heboumu.​—Sal. 146:9.

¹⁶ Iesu bona ena ruma bese heḡereḡeredia, refiuji taudia na basie  lou dibamu edia tano, bema e hahisidia taudia na dounu e lohiamu. Danu, Lije na e gwa, “tama sina momo matadia ai e ita ruma bese haida na e hadikadia bona e aladia mase dainai asie uramu natudia na bae laohaidia unu hekwakwanai e vara gabudia.” Hekwakwanai unu bamodia e davari taudia idurudia totona, tano ma haida ai refiuji taudia e abidia daemu tadikakadia na ‘bae hekaha heheni, bae heura heheni, bae hebogahisi heheni,’ bona bae manau na namo. (1 Pet. 3:⁠8) Daḡedaḡe karana dainai refiuji taudia haida na asie uramu tadikaka taihu bae bamodia, eiava e hemaraimu ediai e vara hisihisidia na natudia ediai bae herevalai. Sibomu ba henanadai, ‘Bema lauegu ai una bema vara, lau be na uramu haida ese ede bema kara henigu toma?’​—Mat. 7:12.

17. Refiuji taudia ta haroro henidiamu karana ese idia be ede e durudia tomamu?

¹⁷ Hari ina negai, refiuji taudia momo na eda haroro ḡaukara e taravatu tanodia amo e maimu. Ta moalemu badina refiuji taudia e abidia daemu tanodia ai, Witnes taudia na e haroro goadagoadamu dainai refiuji taudia momo na nega ginigunana “basileia herevana” e kamonaimu. (Mat. 13:​19, 23) “Metau” bada e davarimu refiuji taudia momo na eda hebou e laomu neganai, goada e abimu bona e gwaumu: “Momokani, Dirava na umui bogaraḡimui ai.”​—Mat. 11:​28-30; 1 Kor. 14:25.

18, 19. Refiuji taudia ta haroro henidiamu neganai edena dalai baita aonega?

¹⁸ Refiuji taudia e haroro henidiamu taudia na bae “heaonega” bona bae “lalo-parara” na namo. (Mat. 10:16; Her. 22:3) Refiuji taudia edia lalohekwarahi herevadia ba kamonai namonamo, to politik ḡaudia na basio herevalai. Brens ofesi bona gavamani edia hahekau daladia ba badinadia, unu amo oi eiava ma haida na basio hekwakwanai. Refiuji taudia edia tomadiho bona kastom ba diba bona ba matauraidia na namo. Heḡereḡere, tano haida ai taunimanima na e laloamu hahine na dabua maorodia bae hahedokilai na namo. Una dainai refiuji taudia o haroro henidiamu neganai, hemataurai dabuadia ba hahedokilai, unu amo basio hahekwakwanaidia.

¹⁹ Iesu ena parabole ai e herevalaia Samaria tauna heḡereḡerena, ita na ta uramu e hisihisimu taudia bona dia Witnes taudia baita durudia. (Luka 10:​33-37) Una baita karaia dalana namona na, idia ediai sivarai namona baita harorolaia. Refiuji taudia momo e durudia elda tauna ta na ini e gwau toma: “Ḡau badana na ta davaridia matamamu neganai, baita hadibadia ita na Iehova ena Witnes tauda, bona eda ḡaukara badana na Baibul amo baita durudia, dia kohu o moni ai. Bema basita hadibadiamu, idia na moni o kohu daidiai ita be bamodamu.”

20, 21. (a) Refiuji taudia ediai Kristen lalokauna baita hahedinaraia karana ese dahaka namo baine havaraia diba? (b) Stadi gabena ai dahaka baita herevalaiamu?

²⁰“Noho-hedoa taudia” ediai Kristen lalokauna baita hahedinaraia karana ese anina namona be havaraiamu. Taihu ta ladana Alganesh na adavana e mase neganai, Eritrea ai e vara daḡedaḡe karana dainai natuna siks ida edia tano e heautania. Idia na dina eit tano ḡaḡaena amo e raka murinai Sudan ai e kau. Una taihu na eto: “Unuseniai tadikaka taihu ese ai na varavaradia korikori heḡereḡeredia e kara henimaiva, idia ese aniani, dabua, noho gabuna bona basi davadia e henimaiva. Daidia be edia ruma ai idau tauna ta bae abia dae diba badina Dirava tamona e tomadiho heniamu? Iehova ena Witnes taudia sibodia mo!”​—Ioane 13:35 ba duahia.

²¹ To, refiuji o tano ma ta ela tama sina natudia be ede baita durudia toma? Stadi gabena ai, baita itaiamu edena dala ai idia baita durudia diba mai moaledia ida Iehova bae hesiai henia.