1, 2. (a) Kahpwal dah kan me ekei riatail Kristian kan kin ahneki? (b) Peidek dah kan me pwarada?

 BROTHER men me ede Lije nda: “Ni ahnsou me mahwen nanpwungen keinek kan tepida wiawi nan Burundi, ngehi oh ei peneineio mi nan mihting tohrohr ehu. Se kak kilang aramas akan ar tangatangseli oh mie me kesikesikseli. Ei pahpa oh nohno oh kiht, neira seri 11 ko, tengen mour wahdahte dahme mi reht ahnsowo. Ekei nan at peneineio lella Malawi, ni ehu wasahn kousoan ong irail kan me anahne tangasang arail wasa (refugee camp), me dohki mwail daulih 1,000. Kiht luhwe ko tangpeseng.”

² Nan sampah pwon, irail kan me anahne tangasang arail wasa pwehki mahwen de kalokolok tohtohsang meh wenedep limerar (65,000,000). Nempe wet me keieu laud me kileldi nan ripoht. * Me kid kid kei en irail pwukat iei Sounkadehdehn Siohwa kan. Tohtohn irail pwukat ahneki peneinei de mie me re poakohng me iang mehla, oh kereniong soahng koaros me re ahneki pil sohla mie. Soangen kahpwal dah teikan me re pil ahneki? Ia duwen atail kak sewese riatail Kristian kan ren papah Siohwa oh kolokol arail peren ni arail lelohng kahpwal pwukat? (Mel. 100:2) Oh ia ahl me  keieu mwahu en kalohk ong irail kan me anahne tangasang arail wasa me saikinte esehla Siohwa?

3. Dahme kahrehda Sises oh sapwellime tohnpadahk tohto anahne tangasang imwarail kan?

³ Sises oh semeo oh ineo anahne tangalahng Isip mwurin sapwellimen Siohwa tohnlengo padahkihong Sosep me Nanmwarki Erod men kemehla Sises. Re kousoanla nan Isip lao Erod mehla. (Mad. 2:13, 14, 19-21) Sounpar tohto mwuri, sapwellimen Sises tohnpadahk ko “tangpeseng nan sapwen Sudia oh Sameria” pwehki kalokolok. (Wiewia 8:1) Sises mwahngih me sapwellime tohnpadahk tohto pahn anahne tangasang imwarail kan. E mahsanih: “Ma kumwail kamakam nan ehu kahnimw, a kumwail tangalahng nan ehu kahnimw tohrohr.” (Mad. 10:23) En tangasang imwatail ong kahrepe sohte lipilipil wia mehkot apwal.

4, 5. Soangen keper dah kei me irail kan me anahne tangasang arail wasa kin lelohng ni arail (a) wie tangatang? (b) kousoan nan camp kan?

⁴ Ni aramas pwukat ar tangasang imwarail kan de kousoan nan camp kan me wiawihda ong irail, re kin lelohng soangen keper kei. Gad, rien Lije pwutak tikitiko, nda: “Se alialuhki wihk kei, daudaulih aramas mehla epwiki kei. I sounpar 12 ahnsowo. Patehn nehi ka uhdahn mpwosada, eri I ndaiong ei peneineio en douluhlla a I pahn mihmi. Ei pahpao pwekiehda oh wa, pwehki e sohte men mweidohng pwihn mwersuwedo en koliehdi. Ehuehu rahn se kin wonlahte, kapakap oh likih Siohwa, ekei pak kangkangte kehngid kan me mi ni keilen ahlo.”​—Pil. 4:12, 13.

⁵ Erein sounpar tohto, pali laud en ahn Lije peneineio kin kousoan nan camp kan me United Nations wiahda. Ahpw pil mie soahng keper kei wasao. Lije, me met wia emen sounapwalih me kin seiloak, nda: “Pali laud en aramas ako sohte mie arail doadoahk en mwohni. Re kin lipilipahned, sakasakau, pilein mwohni, pirap, oh wia tiahk samin.” Pwehn pere pein irail sang wiewia suwed pwukat, Sounkadehde ko anahne soupisengki arail kalohk oh doadoahk teikan nan mwomwohdiso. (Ipru 6:11, 12; 10:24, 25) Re doadoahngki arail ahnsou ni elen loalokong pwe ren kak kehkehlailte nan padahk mehlel, oh me tohto tepida pioneer. Re kin katamankihong pein irail me ehu rahn, arail kousoan wasao pahn imwisekla, duwehte ahnsou me mehn Israel ko mi nan sapwtehno eh imwisekla. Met sewese irail en kolokol madamadau pwung.​—2 Kor. 4:18.

6, 7. (a) Ia duwen atail “poakohng Koht” eh kamwakid atail wiewia ong riatail Kristian kan? (b) Menlau kihda ehu karasaras.

⁶ Atail “poakohng Koht” kin kamwakid kitail en kasalehda limpoak ong riatail Kristian kan, ahpw mehlel ni arail kin lelohng kahpwal. (Wadek 1 Sohn 3:17, 18.) Karasepe, ni tepin Kristian ko nan Sudia ar anahne mwenge pwehki duhpek laud ehu, mwomwohdiso wiahda koasoandi kan pwehn sewese irail. (Wiewia 11:28, 29) Wahnpoaron Pohl oh Piter pil kangoange Kristian ko ren kasalehda limpoak ong emenemen. (Rom 12:13; 1 Pit. 4:9) Pwehki kangoang kin kohwong Kristian kan ren kasalehda kadek ong riarail kan me kin mwemweitla rehrail sang ehu wasa tohrohr, kitail uhdahn anahne kasalehda kadek ong riatail kan me mi nan keper de kin ale kalokolok pwehki arail pwoson!​—Wadek Lepin Padahk 3:27. *

⁷ Me keren, Sounkadehdehn Siohwa me kid kid kei anahne tangasang imwarail kan pwehki mahwen oh kalokolok me wiawi nan palimese en Ukraine. E kansensuwed me ekei irail kamakamala. Ahpw riatail Kristian kan nan ekei wasa nan Ukraine oh Russia kasamwolong nan imwarail ko pali laud en riatail ko me tangasang arail wasa. Nan sahpw riau pwukat, riatail ko kin kolokol arail soupoupali, sohte wia “kisehn sampah,” oh pousehlahte “lohlohkiseli mahseno” ni ngoang.​—Sohn 15:19; Wiewia 8:4.

8, 9. (a) Soangen kahpwal dah me irail kan me anahne tangasang arail wasa ele kin lelohng nan ehu sahpw tohrohr? (b) Dahme kahrehda irail anahne kitail en kanengamah oh sewese irail?

⁸ Ekei anahne tangasang imwarailo oh tangala ehu wasa nan sapwarailohte pwe ren kousoanla ie. Ahpw, me tohto teikan anahne tangala nan ehu sahpw tohrohr  me re sahn. E mehlel me koperment kan kak apwalihki kenerail mwenge, arail likou oh wasa ren kousoan ie, ahpw pil miehte kahpwal kan. Karasepe, mwein mwenge ko me re ale uhdahn weksang dahme irail kin ahn. Ekei irail me kohsang sahpw kan me karakar ele sehse ia duwen arail pahn likawih likou ong wasa me kopou. Ekei ele anahne sukuhlki ia duwen arail pahn doadoahngki dipwisou kan en nan ihmw.

⁹ Ekei koperment kin kihda prokram kan pwehn sewese irail kan me anahne tangasang arail wasa pwe ren ahnla mour en sahpw kapw me irail kousoanla ie. Ahpw koperment ko kasik me mwurin sounpwong kei, aramas ako pahn pein apwalih irail. Met kak uhdahn apwal. Medewehla soahng kan me irail anahne esehla ahnsoutehkis: ehu lokaia tohrohr, tiahk me weksang arail, kosonned kan duwehte pwainla pihl, lioal oh daksis, iang sukuhl, oh pil kaiahne seri! Ia duwe, ke kak kasalehda kanengamah oh wahu ni omw sewese riatail Kristian kan me anahne tangasang arail wasa oh kin lelohng soangen kahpwal pwukat?​—Pil. 2:3, 4.

10. Ia duwen atail kak kakehlakahda pwoson en irail kan me leledo nan sapwatail? (Menlau kilang tepin kilel.)

¹⁰ Ekei pak, kaun en koperment kan kin kahrehda en apwal ong riatail Kristian kan me anahne tangasang arail wasa ren koasoiong de ntinglahng mwomwohdiso en wasao. Ekei pwihn en koperment kan kin kamasakih riatail ko me re sohla pahn sewese irail. Ele re pahn nda me re sohte pahn mweidohng riatail ko en kousoan nan sahpwo ma riatail ko sohte ale doadoahk me pahn kahrehiong irail en katihasang mihting kan. Pwehki re kin masepwehkada oh pehm me sohte sawasparail, ekei kin alehda doadoahk pwukat. Eri e inenen kesempwal kitail en mwadang kohla tuhwong riatail pwukat mwurinte arail leledo nan sapwatail. Re anahne kilang me kitail nsenohkin irail. Atail nsenoh oh sawas kak kakehlakahda arail pwoson.​—Lep. Pad. 12:25; 17:17.

11. (a) Dahme irail kan me anahne tangasang arail wasa kin anahne nin tapio? (b) Ia duwen arail kak kasalehda arail kalahngan?

¹¹ Ele nin tapio, kitail anahne kihong kanarail mwenge, arail likou, de soahng teikan me uhdahn anahn. * Pil kisin kisakis kan, duwehte nektait ong brother men, kak wia mehkot laud. Ei mehlel, irail kan me anahne tangasang arail wasa sohte pahn ngihtehtehki ale soahng tohto, ahpw re pahn men kasalehda me re kalahnganki dahme meteikan kin wia. Met pahn imwikihla peren ong irail kan me kihda kisakis. Ahpw mwuhr, e kesempwal me irail kan me anahne tangasang arail wasa en song apwalihala pein arail anahn kan. Arail wia met pahn sewese irail en kolokol arail wahu oh ahneki nanpwungmwahu rehn riarail Kristian kan. (2 Des. 3:7-10) Ahpw, riatail pwukat me anahne tangasang arail wasa anahnehte atail sawas.

12, 13. (a) Ia duwen atail kak sewesehki irail kan me anahne tangasang arail wasa dahme re anahne ong arail irairo? (b) Menlau kihda ehu karasaras.

¹² Kitail sohte anahne mwohni laud pwehn sewese irail kan me anahne tangasang arail wasa. Dahme irail keieu anahne iei atail ahnsou oh atail limpoak. Karasepe, ke kak kasalehiong irail ia duwen arail en doadoahngki mehn peidaid kan en wehipokon de ia duwen arail en pwainda soangen mwenge me mwahu ong arail roson oh pil pweitikitik. Ke pil kak kasalehiong irail ia duwen arail pahn alehda soahng kan duwehte misihn en deidei de misihn en mwet pwe irail en kak doadoahngki ong wiahda pein neirail mwohni. Keieu kesempwal, ke kak sewese irail en wiahla kisehn mwomwohdiso. Ma kak, sewesehki irail mehn peidaid ong mihting kan. Ke pil kak kawehwehiong irail ahl me keieu mwahu en kalohk ong aramas akan nan wasahn kalohk, oh ke kak iang irail kalohk.

¹³ Ni meh pwulopwul pahmen me anahne tangasang arail wasao lella ni ehu mwomwohdiso, elder ko sewesehki irail dahme re anahne ong arail  irairo. Re padahkihong me pwulopwul ko ia duwen arail en tangahki sidohsa, ia duwen arail en doadoahngki computer pwehn daipihada kisinlikou, oh ia duwen arail en audehda doaropwehn rapahki doadoahk. Re pil kasalehiong irail ia duwen arail en koasoanehdi arail ahnsou kan pwe irail en kak mwohneki mahs arail papah Siohwa. (Kal. 6:10) Kedekedeo, meh pwulopwul pahmen ko koaros wiahla pioneer kei. Pwehki sawas sang elder ko oh pil pein arail nannanti en wiahda mehn akadei kan nan arail papah Siohwa, re kekeirda nin duwen Kristian kei oh soikala wiahla kisehn ahn Sehdan sampah.

14. (a) Kasongosong dahieu me irail kan me anahne tangasang arail wasa anahne pelianda? (b) Menlau kihda ehu karasaras.

¹⁴ Duwehte Kristian teikan koaros, irail kan me anahne tangasang arail wasa anahne pelianda kasongosong en kesempwalki kepwe kan laudsang arail nanpwungmwahu rehn Siohwa. * Lije, me kitail koasoiapene mwoweo, oh pil rie pwutak oh serepein ko tamanda arail pahpao eh kin padahkihong irail iren mehn kasukuhl kesempwal kan duwen pwoson erein arail tangatangasang arail wasao. Re nda: “Ekisekis, e kesehla kepwe malaulau ko me se weuwa me sohte kesempwal. Mwuhr, e kolada ehd me nekla kanengeo oh sirei nda: ‘Kumwail kilang? Ihte met me kumwail anahne!’”​—Wadek 1 Timoty 6:8.

15, 16. (a) Ia duwen atail kak kakehlakahda pwoson en riatail Kristian kan? (b) Ia duwen atail kak sewese kangoange irail?

¹⁵ Irail kan me anahne tangasang arail wasa kin anahne laudsang ihte mwenge oh likou. Re anahne kangoang sang kitail oh pil Paipel. (Mad. 4:4) Elder kan kak sewese irail ni arail oahte sawaspen Paipel kan ni arail lokaia oh pil sewese irail en tuhwong riarail Kristian kan me kin lokaiahki arail lokaiao. Met inenen kesempwal pwehki me tohto me anahne tangasang arail wasa kin anahne pwilikihdi soahng koaros me re ahnlahr. Irail kin loaleidkihda arail peneinei, arail kousapw, oh arail mwomwohdiso. Re anahne kehn sapwellimen Siohwa limpoak nanpwungen riarail Kristian kan. Ma re sohte kehn limpoak wet, re kakete rapahki sawas sang meteikan sang sahpwohte me irail kohsang me sohte kin papah Siohwa. (1 Kor. 15:33) Ni atail kin sewese irail en pehm me irail kisehn mwomwohdiso, kitail kin iang Siohwa ketin doadoahk pwehn pere “mehn liki kan me kin kousoan nan sapwatail.”​—Mel. 146:9.

 ¹⁶ Sises oh eh peneineio sohte kak pwurala uhdahn arail wasao erein irail kan me uhwong irail wie kakaun. Ni soangen kahrepeohte, irail kan me anahne tangasang arail wasa ele sohte kak pwurala arail wasao. Ahpw ekei ele sohte men pwurala. Lije nda me pahpa nohno tohto me kilang ekei arail peneinei lelohng angkehlail oh kamakamla sohte men kapwurehla neirail seri ko nan uhdahn arail wasao. Pwehn sewese riatail Kristian kan, kitail anahne kasalehda “kupwurteieu; . . . limpoakpene . . . kadekpene oh aktikitikpene.” (1 Pit. 3:8) Kalokolok kahrehiongehr ekei me anahne tangasang arail wasa en soikala werekiong meteikan, oh ele re namenek en koasoia duwen arail lokolok, ahpw mehlel ma neirail seri ko mi limwahrail. Pein idek rehmw, ‘Ma I lelohng soangen lokolok wet, dahme I men meteikan en wiahiong ie?’​—Mad. 7:12.

17. Ia duwen atail kalohk kin kamweitala irail kan me anahne tangasang arail wasa?

¹⁷ Me tohto en irail kan me anahne tangasang arail wasao kohsang sahpw kan me atail doadoahk en kalohk keinapwidi. Ahpw pwehki Sounkadehde ngoang kan, meh kidkid kei en irail pwukat ahpwtehn rong “mahsen duwen Wehin Koht.” (Mad. 13:19, 23) Me tohto me ‘toutoukilahr arail mehn wisik kan’ kin diar nsenamwahu oh kamweit nan atail mihting kan oh mwadang en nda: “Mehlelete pwe Koht ketiket rehmwail met.”​—Mad. 11:28-30; 1 Kor. 14:25.

18, 19. Ia duwen atail kak kasalehda erpit ni atail kalohk ong irail kan me anahne tangasang arail wasa?

¹⁸ Kitail en ahneki erpit oh “kanahieng” ni atail kalohk ong irail kan me anahne tangasang arail wasa. (Mad. 10:16; Lep. Pad. 22:3) Kasalehda kanengamah ni omw rong irail koasoi, ahpw dehr koasoia soahng kan me pid politik. Kitail anahne idawehn kaweid kan me kitail alehdihsang ohpis en Sounkadehdehn Siohwa kan oh pil ohpis en kopermento pwe kitail en dehr kahrehiong pein kitail de meteikan nan kahpwal. Pwehki irail pwukat kohsang soangsoangen pelien lamalam oh tiahk kan, kitail anahne esehla oh wauneki arail pepehm oh madamadau. Karasepe, aramas sang ekei sahpw kin ahneki madamadau me inenen kehlail me pid mwomwen ahn lih akan arail likou. Eri ni atail kalohk ong irail, e mwahu en likouda ni ahl ehu me sohte pahn kadipikelekelih irail.

¹⁹ Kitail men sewese irail kan me kin lokolok, pil irail kan me sohte kin kaudokiong Siohwa. Ni atail wia met, kitail kin alasang mehn kahlemeng mwahu en ohlen Sameriao nan sapwellimen Sises karasaraso. (Luk 10:33-37) Ahl me keieu mwahu en sewese aramas akan iei en padahkihong irail rongamwahwo. Emen elder me sewesehier tohtohn irail kan me anahne tangasang arail wasa, koasoia me e kesempwal en mwadang padahkihong irail me kitail Sounkadehdehn Siohwa kei. Kitail anahne padahkihong irail me kitail pahn sewese irail wehwehkihla koapworopwor kaselel me Paipel ketikihda ahpw kaidehn en sewesehkin irail dipwisou kan me re anahne.

20, 21. (a) Soahng mwahu dah kan me kin kohsang atail kasalehda limpoak mehlel ong irail kan me anahne tangasang arail wasa? (b) Dahme kitail pahn sukuhlki nan iren onop en mwuhr?

²⁰ Ni atail kasalehda limpoak mehlel ong “mehn liki kan,” met kin imwila mwahu. Sister men koasoia me eh peneineio anahne tangasang kalokolok nan Eritrea. Mwurin nah seri pahmeno seiloak laud erein rahn waluh kotehla sahpwtehn, re lella Sudan. E nda: “Riat Kristian ko wasao wiahkin irail arail peneinei me keren, sewesehkin irail ­kanarail mwenge, ar likou, wasahn kousoan, oh mehn peidaid. Ihs likin irail kan me kin ­kasamwolong nan imwarail mehn liki kan ihte pwehki re kin kaudokiong Koht tehmen? Sounkadehdehn Siohwa kan kelehpw!”​—Wadek Sohn 13:35.

²¹ Ahpw ia duwen seri tohto kan me kin iangodo arail pahpa nohno kan? Nan iren onop en mwuhr, kitail pahn sukuhlki ia duwen kitail koaros kak sewese peneinei pwukat en papah Siohwa ni peren.