1, 2. 1) ¿Imaspitaj wakin hermanos rikukunku? 2) ¿Ima tapuykunamantaj kutichisun?

UJ HERMANO Lije sutiyoj nin: “Jatun tantakuypi familiaywan kasharqayku, Burundi suyupi wañuchinakuy qallarishajtin. Runasta rikorqayku correshajta, baleashajta ima. Tatasniy, 10 hermanosniy ima ayqekorqayku, nitaj ni imatapis apakorqaykuchu. Familiaymanta wakenqa, Malauipi uj jarkʼakuna lugarman chayarqanku. Chayqa 1.600 kilometrospi kasharqa. Wakinkunataj mana kikin lugarmanchu chayarqayku”, nispa.

² Waj lugarman ayqekojkunaqa 65 millonesmanta astawan kanku. Chay runasqa guerras kasqanrayku chayri qhatiykachasqa kasqankurayku ajinata ayqekunku. Chaytaj yachakusqanman jina ni jaykʼaj jina rikukushan. * Ayqekojkunamanta ashkhasqa Jehovaj testigosnin kanku. Paykunamanta wakinpa familiaresninku wañupunku, ni imayojtaj qhepakunku. ¿Imaspí chay hermanos rikukullankutaj? ¿Imaynatá chay hermanosta yanapasunman ajinapi rikukojtinkupis  “kusiywan” Jehovata sirvinankupaj? (Sal. 100:2). Chantá, ¿imaynatá ayqekojkunaman predicasunman?

3. ¿Imaraykú Jesús, yachachisqasnin ima ayqekunanku karqa?

³ Jesús wawita kashajtin, Jehovaj angelnenqa Joseman willarqa rey Herodes, Jesusta wañuchiyta munasqanta. Chayrayku Joseqa familianwan Egiptoman ayqekorqa. Paykunaqa Herodes wañunankama Egiptopi qhepakorqanku (Mat. 2:13, 14, 19-21). Watasninmantaj Jesuspa yachachisqasnin qhatiykachasqa kasqankurayku, ‘chʼeqerasqa karqanku Judeaman, Samariamanpis’ (Hech. 8:1). Jesusqa yacharqa, ashkha yachachisqasnin wasisninkuta saqepunankuta. Pay nerqa: “Uj llajtapi qhatiykachasunkichej chayqa, waj llajtamanñataj ayqeychej”, nispa (Mat. 10:23). Uj lugarmanta ayqekoyqa mana atikullanchu.

4, 5. 1) ¿Ima llakiykunapitaj ayqekojkuna rikukunku ayqekushaspa? 2) ¿Ima llakiykunataj tiyan jarkʼakuna lugarespi?

⁴ Ayqekojkunaqa ñanpi chayri jarkʼakuna lugarespi, ashkha llakiykunapi rikukunku. Lijej sullkʼa hermanon Gad nerqa: “Chunka iskayniyoj karqani. Semanasta chakipi rerqayku, ashkha wañusqastataj rikorqayku. Chakisniy may punkisqa kashasqanrayku, familiayman nerqani paykunallaña ayqenankuta. Tataytaj mana saqerpayta munawarqachu sajra runaspa makinpi, chayrayku ichuriykukuwarqa. Wakin kutisqa ñanpi tarisqayku mangosllata mikhoj kayku. Diosmanta mañakusqayku, paypitaj atienekusqayku mana wañunaykupaj yanapawarqayku”, nispa (Fili. 4:12, 13).

⁵ Hermano Lijej familianqa, Naciones Unidaspa jarkʼakuna lugarespi unayta kausakorqanku. Chay lugarespi llakiykuna karqapuni. Lije nin: “Casi ni pí trabajoyojchu karqanku. Chayrayku cuento qʼepis karqanku, machaj kanku, suwaj kanku, qolqerayku pujllaj kanku, khuchichakojtaj kanku”, nispa. Kunantaj payqa congregacionesta waturispa llankʼashan. Chay sajra imasmanta hermanos jarkʼakunankupajqa congregacionpi ruwanasninkuta ruwanankupaj astawan tiemponkuta churananku karqa (Heb. 6:11, 12; 10:24, 25). Dioswan amigosllapuni kanankupaj tiemponkuta mana usucherqankuchu, chayrayku wakin hermanosqa precursores karqanku. Yuyarqankutaj maykʼajllapis paykuna chay jarkʼakuna lugarmanta llojsinankuta, israelitas chʼin pampamanta llojserqanku, ajinata. Ajinata yuyasqankoqa, mana llakikunankupaj yanaparqa (2 Cor. 4:18).

6, 7. 1) Jehovata munakusqanchejrayku, ¿imatá ruwanchej wakin hermanos llakiypi rikukojtinku? 2) ¿Imatá ruwarqanku Ucraniamanta, Rusiamanta hermanos?

⁶ ‘Diosta munakoyqa’ hermanosta munakunapaj yanapawanchej, astawanraj llakiypi rikukojtinku (1 Juan 3:17, 18 leey). Ñaupa tiempopi Judeamanta cristianos yarqhaypi kashajtinku, paykunaman congregacionqa yanapata apacherqa (Hech. 11:28, 29). Chantá Pablowan Pedrowan hermanosta nerqanku wajyarikoj kanankuta (Rom. 12:13; 1 Ped. 4:9). Hermanosta munakuywan wajyarikunchej chay, ¿manachu wañuy patapi kajkunata, creeyninkurayku qhatiykachasqa kajkunata astawanraj wajyarikunanchej kanman? (Proverbios 3:27 leey). *

⁷ Ucrania suyoj inti llojsimuynin ladomanta may chhika hermanos, wawas ima, ayqekorqanku guerra kasqanrayku, qhatiykachasqa kasqankurayku ima. Wakenqa wañuchisqa karqanku. Jinapis ashkha hermanostaqa Ucraniamanta, Rusiamanta hermanos wajyarikorqanku. Iskaynin suyuspitaj hermanosqa, ‘mana kay mundomanta’ kasqankurayku mana politicaman chhapukorqankuchu. Astawanqa “Diospa palabranmanta  sumaj willaykunata” willashallankupuni (Juan 15:19; Hech. 8:4).

8, 9. 1) ¿Imaspi ayqekojkuna rikukunkuman ayqekusqanku suyupi? 2) ¿Imaraykú pacienciawan paykunata yanapana?

⁸ Wakin runasqa suyunku ukhullapi ayqekunku, wakintaj waj suyuman ayqekunku. Ichapis gobiernoqa mikhunata, ropata, wasita ima qonman. Jinapis ayqekojkunaqa llakiykunapi rikukullankumanpuni. Ichapis waj jina mikhunasman yachakunanku kanqa. Wakenqa qʼoñi lugaresmanta kanku nitaj yachankuchu chiri lugarespi ima ropatachus churakuyta. Wakintaj ichapis yachakunanku kanqa, imaynatachus mosoj aparatosta apaykachayta.

⁹ Wakin gobiernosqa ayqekojkunata yanapanku, suyunkuman yachaykukunankupaj. Jinapis ichá pisi killasninman niña yanapankuchu, sapallankumantaña imatapis ruwayta atisqankuta yuyasqankurayku. Ichá ayqekojkunaqa chayman mana yachaykukuyta atillankumanchu. Imajtinchus ujllapi yachakunanku kanqa waj parlayta, waj costumbresta, chantá mosoj leyesta, imaynatachus impuestosta pagaymanta, facturasmanta, escuelaman wawasta churanamanta, imaynatachus wawasta uywanamanta ima. Chayrayku, ajinapi rikukoj hermanosta pacienciawan, kʼachamantataj yanapana (Fili. 2:3, 4).

10. ¿Imaynamantá ayqekamoj hermanospa creeyninkuta kallpachasunman? (3 paginapi kaj dibujota qhawariy).

¹⁰ Wakin kuti autoridadesqa ayqekoj hermanosta mana saqenkuchu suyunkupi kaj hermanoswan tinkukunankuta. Wakin organizacionesqa ayqekoj hermanosta ninku niña yanapanankuta chayri suyunkumanta wijchʼunankuta. Imajtinchus llankʼayta qoyta munasqankuta mana japʼikunkuchu tantakuykunaman mana rejta saqesqanrayku. Wakin hermanosqa ni pí yanapananta yuyaspa, chay llankʼayta japʼikorqanku. Chayrayku usqhayllata yanapananchej tiyan suyunchejman chamoj hermanosta. Paykunata khuyakusunchej, yanapasunchejtaj chayqa creeyninkuta kallpachasun (Pro. 12:25; 17:17).

11. 1) ¿Imatá ayqekamojkuna necesitanku? 2) ¿Imaynatá ayqekamojkuna agradecekusqankuta rikuchinkuman?

¹¹ Ichapis qallariypeqa hermanosman ropata, mikhunata chayri imatachus necesitasqankuta qona kanqa. * Uj corbatallatapis regalayqa may sumaj. Ayqekamojkunaqa agradecekunku, nitaj imatapis mañakunkuchu. Chayrayku hermanos kusiywan yanaparinku. Chantapis wajkunaj yanapaynillanwan kausayqa hermanospaj, noqanchejpajpis mana allinchu kanman (2 Tes. 3:7-10). Jinapis yanapata necesitankupuni.

12, 13. 1) ¿Imaynasmanta ayqekamojkunata yanapasunman? 2) ¿Imaynatá tawa jovencitosta ancianos yanaparqanku?

¹² Ayqekamojkunata yanapanapajqa mana ashkha qolqeyojpunichu kana tiyan. Paykunaqa necesitanku paykunapaj tiempochakunanchejta, munakunanchejtapis. Paykunata yachachisunman maymanpis rinankupaj ima microtachus japʼinankuta, mana valesqa mikhunasta maymantachus rantikunankuta. Chantá yanapallasunmantaj rantikunankupaj siranapaj uj maquinata chayri pastota kʼutunapaj uj maquinata, ajinamanta qolqeta ganakunankupaj. Astawanqa yanapananchej tiyan congregacionmanta mana karunchakunankupaj. Atispaqa tantakuykunaman pusasunman. Paykunawan predicaj llojsisunman, chantá maypichus predicanchej chaypi imaynatachus predicanata yachachisunman.

 ¹³ Uj congregacionman tawa ayqekamoj jovencitos chayarqanku. Paykunamantaj wakin ancianos yachacherqanku autota manejayta, computadorapi cartata qhelqayta, uj trabajota tarinankupajtaj imatachus ruwanankutapis. Yachachillarqankutaj imaynatachus tiempochakunankuta Diosta sirviyta ñaupajman churanankupaj (Gál. 6:10). Tiemponmantaj chay jovencitosqa precursores karqanku. Ajinata ancianos yanapasqankurayku, chay jovencitos kallpachakusqankurayku ima, mana kay mundoj imasninpi urmarqankuchu. Astawanqa Diospa llajtanpi ñauparerqanku.

14. 1) ¿Imamantaj ayqekamojkuna mana qokunankuchu tiyan? 2) ¿Imaynatá Lijej tatan creeyninta rikucherqa?

¹⁴ Waj llajtamanta ayqekamoj hermanosqa, mayta kallpachakunanku tiyan mana qolqeta maskʼayman qokunankupaj. Imajtinchus chayqa Jehovawan amigos kayta mana saqenmanchu. * Lije, hermanosnin ima yuyarikunku Jehovapi atienekuymanta imastachus tatanku ayqekushajtinku yachachisqanta. Lije nin: “Tatayqa imatachus mana necesitasqaykuta ujmanta uj choqarqa. Chantá chʼusaj bolsata rikuchiwarqayku, asirispataj niwarqayku: ‘¿Rikunkichejchu? Kayllata necesitanchej’”, nispa (1 Timoteo 6:8 leey).

15, 16. 1) ¿Imaynatá hermanosta yanapasunman creeyninkuta kallpachanankupaj? 2) ¿Imaynatá ayqekamojkunata sonqochasunman?

¹⁵ Ayqekamojkunaqa mikhunata, ropata ima necesitanku. Jinapis astawan necesitanku sonqochanata, Diosta yupaychanallankupajpuni yanapanata ima (Mat. 4:4). Ancianosqa parlayninkupi publicacionesta qonkuman, parlayninkuta parlaj hermanostapis rejsichinkuman. Chayta ruwaytaj may sumajpuni, imaraykuchus paykunaqa imastachus rejserqanku chay imasta saqeporqanku. Chayrayku familiankuta, llajtankuta, congregacionta ima faltachanku. Chay hermanosqa Jehová jina hermanosninku munakunankuta, khuyakunankuta ima necesitanku. Chayta mana rikojtinkutaj ichapis yanapata maskʼanqanku llajta masisninkupi, pikunachus mana Diosta sirvinkuchu (1 Cor. 15:33). Diosqa “forasterosta waqaychan” (Sal. 146:9). Chayrayku congregacionpi kusisqa kanankupaj yanapaspaqa, Jehovata yanapashanchej.

¹⁶ Jesús, tatasnin ima mana suyunkuman kutipuyta aterqankuchu. Imajtinchus paykunata qhatiykachaj kamachishallarqapuni. Kay tiempopi  ichá kikillanpitaj rikukunku wakin ayqekamojkuna, chayrayku mana lugarninkuman kutipuyta atinkuchu. Wakenqa lugarninkuman ni kutipullaytapis munankuchu. Lije nin: “Ashkha tatasqa familiankumanta wakinta imaynatachus abusasqankuta, wañuchisqankuta ima rikorqanku. Chayrayku wawasninkuta suyunkuman mana kutichiyta munankuchu”, nispa. Chay hermanosta yanapasunman llakiyninkumanta llakikuspa, tukuy sonqo munakuspa, khuyakuspa, llampʼu sonqo kaspa ima (1 Ped. 3:8). Wakin ayqekamojkunaqa mana runa masinkuwan masichakuyta atillankuchu. Ichapis pʼenqakunku ñakʼarisqankumanta parlayta, astawanraj wawasninkoj ñaupaqenpi. Ajinapi rikukusunman chay, ¿imaynatá yanapanawanchejta munasunman? (Mat. 7:12).

17. ¿Imaynatá ayqekamojkunata predicasqanchej yanapan?

¹⁷ Ashkha ayqekamojkunaqa maypichus predicajta mana saqewanchejchu chay suyusmanta jamunku. Sonqo kʼajaywan hermanos predicasqankurayku, ashkha ayqekamojkuna ñaupaj kutirayku “Diospa Gobiernonmanta” uyarinku (Mat. 13:19, 23). Ashkha ayqekamojkuna llasa qʼepiyoj jina kashanku, tantakuykunapitaj samarikuyta tarinku. Chay ratotaj reparanku ‘Dios noqanchejwan kashasqanta’ (Mat. 11:28-30; 1 Cor. 14:25).

18, 19. ¿Imaynatá rikuchinchej sumaj yuyayniyoj kasqanchejta ayqekamojkunaman predicaspa?

¹⁸ Ayqekamojkunaman predicaspaqa “sumaj yuyayniyoj” kananchej tiyan (Mat. 10:16; Pro. 22:3). Paykunawan parlashaspaqa pacienciawan uyarina. Jinapis mana politicamanta parlanachu. Imatachus sucursal, autoridadespis kamachisqankuta kasukuna. Ajinamanta kausayninchejta mana wañuypataman churasunchu, nitaj wajkunaj kausayninkutapis. Ayqekamojkuna waj religionniyoj kasqankurayku, waj costumbresniyoj kasqankurayku ima, imatachus yuyasqankuta, imatachus munasqankuta ima yachananchej tiyan respetanataj. Sutʼincharinapaj, wakin suyuspeqa mana kikintachu yuyanku imaynatachus warmis pʼachallikunankumanta. Chayrayku chay runasman predicashaspa, maychus kajta pʼachallikuna.

¹⁹ Cristianosqa ñakʼarejkunata yanapayta munanchej Jehovaj testigosnin kajtinkupis chayri manapis. Yanapajtinchejqa chay kʼacha samaritano jina ruwashanchej, mayqenmantachus Jesús parlarqa (Luc. 10:33-37). Runasta yanapasunman Diospa Gobiernonmanta predicaspa. Ashkha ayqekamojkunata yanapaj uj anciano, nin: “Qallariymantapacha Jehovaj testigon kasqanchejta ninanchej tiyan. Chantá ninallataj tiyan Dios imatachus aswan qhepaman ruwananmanta parlarej risqanchejta, nitaj qolqewan chayri waj imaswan yanapajchu. Chayta mana ruwajtinchejqa, ichá wakin ayqekamojkunaqa interesraykulla uyariwasunman”, nispa.

20, 21. 1) ¿Imaraykú may sumaj ayqekamojkunata munakuy? 2) ¿Imatá qhepan yachaqanapi yachakusunchej?

²⁰ “Forasterosta” munakusqanchejqa may sumajpuni. Eritrea suyupi qhatiykachakusqanrayku, uj hermanaqa tawa wawasninwan ayqekorqa. Chʼin pampanejta 8 diasta riytawan Sudán suyuman chayarqanku. Pay nin: “Hermanosqa familiankumantapis kaykuman jina qhawawarqayku. Mikhunata, ropata, qowarqayku, wasiwan, autowanpis yanapawarqayku. Jehovaj testigosnillan ajina munakuyta rikuchinakunchej, waj lugarmanta kajtinchejpis”, nispa (Juan 13:35 leey).

²¹ Ashkha wawas tatasninkuwan waj lugarman ayqekunku chayri ripunku. ¿Imaynatá chay wawasta Jehovata kusiywan sirvinankupaj yanapasunman? Qhepan yachaqanapi chayta yachakusunchej.