1, 2. 1) Yaqha markat jutiri awk taykanakan wawanakaparojja, ¿kunas pasi? 2) ¿Kuna jisktʼanakatsa aka yatichäwin yatjjataskañäni?

JOSHUA kullakajj akham siwa: “Yaqha markat jutiri awk taykajajj parlapki uka arwa jiskʼatpach utansa, tamansa parlayäta. Escuelar sarjjta ukhatwa yaqha aru jukʼamp parljjta. Mä qawqha maranakatjja, uka arukwa parljjayäta. Tantachäwinakan yatichaskäna uksa janiw amuyirïkti, yaqha kasta jaqëkiristsa ukham amuyasirïta” sasa. Waljaniw uka kullakjam amuyasipjjaraki.

² Jichhürunakanjja, 240.000.000 jila jaqenakaw markapat yaqha markar sarjjapjje. Jumatï wawanakamamp yaqha markat jutstajja, ¿kunjamsa wawanakamarojj Jehová Diosar munasipjjañapatakisa cheqa yatichäwirjam sarnaqasipkakiñapatakis yanaptʼasma? (3 Juan 4). ¿Kunjamsa tamankirinakajj yanaptʼapjjarakispa?

3, 4. 1) ¿Kunjamsa awk taykanakajj wawanakapatak yateqaskay sarnaqapjjaspa? 2) ¿Kun lurañsa awk taykanakajj wawanakapar jan mayipjjañapäki?

³ Awk taykanaka, wawanakaman Jehová Diosampi sum apasipjjañapa, wiñay jakapjjañapa munapjjstajja, jumanakaw yateqaskay sum sarnaqapjjañama. Wawanakamajj “Diosan Reinop” nayraqat  thaqapjjatam uñjasajja, Diosaw wakiski ukanakampi yanaptʼistani sasaw confiyapjjarakini (Mat. 6:33, 34). Awk taykanaka, cosasanak thaqañataki chʼamachasiñat sipansa, Jehová Diosar serviñatak chʼamachasipjjma, kunatï wakiski ukampik jakasipjjma, janirak maytʼasisas sarnaqapjjamti. Qamiriptaña jan ukajj ‘jaqenakampi jachʼañchayasiñ munañat’ sipansa, ‘alajjpacharu imasipjjam’, mä arunjja, Jehová Diosamp suma uñjatäñ thaqapjjma (Marcos 10:21, 22 liytʼañataki; Juan 12:43).

⁴ Wawanakamar yanaptʼañatakejj tiempo apstʼasipjjañamawa. Wawanakamar akham sapjjañamawa: ‘Nanakataki jan ukajj jumataki qollqe thaqañata, wali uñtʼatäña munañat sipansa, Jehová Diosar nayraqat thaqatam uñjasajj wal kusisipjjta’ sasa. Wawanakamas sum jakasipjjañamataki wal trabajipjjañapäkaspa ukham janiw amuyapjjañamäkiti. Amtapjjapuniñäni, “wawanakapatakejj awkiw qollqjja imañapajja, janiw wawati awkitakejja” (2 Cor. 12:14).

5. ¿Kunatsa awk taykanakajj taqe horasan wawanakapar Jehová Diosat parlapjjañapa?

⁵ Mä profeciarjamajja, ‘yaqha markankiri’ jaqenakaw Diosan markapar mantanisipki (Zac. 8:23). Wawanakamatï parlkta uka aru jan amuyapkchi ukhajja, Diosat yatichañajj chʼamakïspawa. Ukampis wawanakamaru Bibliat yatichañaw jukʼamp wakiskirejja, Jehová Diosar uñtʼasakiw wiñay jakañ katoqapjjani (Juan 17:3). Wawanakaman Jehová Diosat yateqapjjañapatakejja, jumanakaw taqe horasan parlapjjañama (Deuteronomio 6:6, 7 liytʼañataki).

6. ¿Kunjamsa awk taykapan arup parlañajj wawanakar yanaptʼaspa? (8 paginankir foto uñjjattʼäta).

⁶ Sarjjta uka markan parlaski uka arjja, wawanakamajj escuelana jan ukajj yaqha jaqenakatwa yateqapjjaspa. Ukampis parlkta uka arut sapa kuti parläta ukhajja, wawanakamajj uka arwa yateqapjjarakini. Wawanakamatï juman arum yatipjjanejja, jumanakamp parltʼasipjjaniwa, kunjamäsipkisa uksa jan ajjsarasaw yatiyapjjätam. Maysa toqetjja, wawanakamatï yaqha aru parlañ yateqapjjani ukhajja, jukʼamp amuytʼasirïpjjaniwa, yaqhanakajj kunjamäpjjesa uksa amuyapjjarakiniwa. Ukatsti yaqha aru parlirinakarus yatiyapjjarakiniwa. Carolina kullakajj awk taykapampiw yaqha markar sarjjapjjäna, jupajj akham siwa: “Yaqha aru parlañ yateqañajj wali sumänwa, yanaptʼa munaski ukan yanaptʼasajj wal kusista” sasa.

7. ¿Yaqha aru parliri wawamar yanaptʼañatakejj kunsa lurasma?

⁷ Yaqha markar sarjjerinakan wawanakapajj yaqha aru, yaqha costumbrenak yateqkasajja, inas awk taykapampejj arupat jan parlañ munjjapjjchispati, jan ukajj inas armjjapjjchispa. Awk taykanaka, wawanakamatï ukhamäni ukhajja, ¿wawanakamajj yateqapki uk aru janit mä jukʼa yateqapkasma? Ukham lurapjjasma ukhajja, kuna toqetsa wawanakamajj parlapjje, kunampis kʼuchirtʼasipjje, kunjamsa escuelan tareanakapamp phoqasipki ukwa amuyapjjäta, cristianjam sarnaqapjjañapatakis yanaptʼapjjarakïtawa, profesoranakapampis parltʼarakismawa. Cheqansa mä aru yateqañatakejj tiempow munasi, ukatsti chʼamachasiña, altʼat chuymanïñaw wakisiraki, ukham chʼamachasitamajj janiw inamayäkaniti. Amuytʼañataki, mä wawamatï oqaraptaspa ukhajja, ¿jupampi parltʼasiñatakejj janit amparamp parlañ yateqkasma? Ukhamarakwa yaqha aru parliri wawarojj uñjañasa. *

8. Wawanakapajj parlapki uka aru jan sum amuykasasa, ¿kunjamsa awk taykanakajj yanaptʼasipkakispa?

 ⁸ Yaqha markar sarjjapki uka awk taykanakatakejja, wawanakapajj yateqapki uka aru parlañajj chʼamakïspawa. ‘Tatitun arunakapa’ wawanakar amuytʼayañajj chʼamarakïspawa (2 Tim. 3:15). Wawanakamajj parlapki uka aru jan sum amuykasasa, Jehová Diosar uñtʼañapatakisa, munasiñapatakisa yanaptʼasipkakismawa. Jilïri irpiri Shan jilatajj akham siwa: “Parlkayäta uka arjja, soltera mamajajj jukʼak amuyäna. Kullakajampejj janirakiw jupan arup sum parlapkayätti. Ukampis Bibliat yatjjatiri, orasiri, ukhamarak sapa semana familian Bibliat yatjjatañataki chʼamachasitap uñjasajja, Jehová Diosar uñtʼañajj wali wakiskirïtap amuyapjjayäta” sasa.

9. ¿Kunjamsa awk taykanakajj wakiski ukhajj wawanakapar paypach arut yatichapjjaspa?

⁹ Yaqhep wawanakatakejja, inas pä arut Jehová Diosat yateqapjjañapajj wakischispa. ¿Kunatsa? Escuelanjja mä aru parlapjje, utansti yaqha aru parlapjjaraki. Ukatwa yaqhep awk taykajj Bibliat apstʼat qellqatsa, grabacionanaksa, videonaksa paypach arut uñtayapjje jan ukajj liytʼapjje. Yaqha markat jutiri awk taykajja, wawanakapan Jehová Diosar jakʼachasipjjañapataki yanaptʼañatakejj jukʼampiw chʼamachasipjjañapa.

10. 1) ¿Kawkïr tamarus sarapjjani uk khitis amtañapa? 2) ¿Kawkïr tamarus sarapjjani uk janïr amtkasajj kunsa familia pʼeqtʼirejj lurañapa?

¹⁰ Jakapki uka jakʼanakan arup parliri mä tamajj jan utjkanejja, utjki uka tamaruw ‘yaqha markat’ jutirinakajj sarapjjañapa (Sal. 146:9). Ukampis jakapki ukjantï parlapki uka arut tamajj utjchejja, kawkïr tamar sarañas wakisispa uk familia pʼeqtʼiriw amtañapa. Janïr mä amtar purkasajja, sum amuytʼasiñapa, Diosat mayisiñapa, wawanakapampisa, esposapampis parltʼañaparakiwa (1 Cor. 11:3). ¿Kunsa amuytʼañapa? Mä amtar puriñatakejja, ¿Biblian kawkïr ewjjtʼanakapas yanaptʼaspa?

11, 12. 1) Mä aru sum amuyañajja, ¿kunjamsa wawanakarojj tantachäwinakan yanaptʼaspa? 2) ¿Kunatsa yaqhep wawanakajj awk taykapan arup yateqañ jan munapki?

¹¹ Awk taykanaka, wawanakarojj kunas jukʼamp yanaptʼaspa ukwa amuytʼapjjañama. Biblian cheqa yatichäwinakapa sum amuytʼapjjañapatakejj janiw sapa semana tantachäwinakar sarañakejj wakiskiti. Amtapuniñäni wawanakajj amuyapki uka arut tantachäwinakan istʼasajj jukʼampiw yateqapjjaspa. Ukampis jan sum amuyapki uka arun istʼasajj janiw ukhamäkaspati (1 Corintios 14:9, 11 liytʼañataki). Inas jiskʼatpach mä aru parlañ yateqchi, ukampis uka arut yatichaski ukajj janiw chuymapar purtʼkaspati. Wawanakajja, awk taykapajj parlapki uka arun arstʼañsa, yatiyañsa, discursonak churañsa yateqapjjaspawa, ukampis janiw chuymatpach arsupkaspati.

¹² Mä wawarojja, janiw awk taykapan arup yateqañakejj yanaptʼkiti. Ukaw Joshua jilatar pasäna, Esther kullakapajj akham siwa: “Wawanakajja, awk taykapatwa religionapsa, costumbrepsa, arupsa yateqapjje” sasa. Wawanakatï awk taykapat mayjäpkaspas ukham amuyasipjjanejja, awk taykapan arupatsa, religionapatsa janiw yatiñ munapkaspati. Yaqha markat jutiri awk taykanakajja, ¿kunsa ukhaman uñjasisajj lurapjjaspa?

13, 14. 1) ¿Kunatsa yaqha markat jutir mä familiajj yaqha aru parlir tamar sarjjäna? 2) ¿Kunas Jehová Diosamp sum apasiskakiñatakejj awk taykar yanaptʼäna?

¹³ Cristiano awk taykanakajja, jupanakan askip thaqañat sipansa, wawanakan askipwa thaqapjje (1 Cor. 10:24). Joshua jilatana  ukhamarak Esther kullakan Samuel tatapajja, akham siwa: “Kuna arunsa cheqa yatichäwinakajj wawanakajan chuymapar purtʼäna ukwa esposajampejj uñjapjjayäta, sum amuytʼañatakis orasipjjarakirïtwa. Janiw nanakan askinakajak thaqapkayätti. Parlapkayäta uka arunjja, tantachäwinakan janiw sum yateqapkänti, ukatwa amuyapki uka aru parlir tamar sarjjapjjayäta. Ukanjja, taqeniw tantachäwirusa, yatiyirisa sarapjjerïta. Jilat kullakanakarojj manqʼasiñataki, pasiytʼir sarañatakiw invittʼapjjerïta. Ukaw wawanakajarojj jilat kullakanakaru, Jehová Diosaru uñtʼañatak yanaptʼawayi, Diosarojj Awkiparjama, Amigoparjamaw uñjapjje. Parlapkta uka aru yatichañat sipansa ukaw jukʼamp wakiskirïnjja” sasa.

¹⁴ Samuel jilatajj akham saskakiwa: “Diosar serviñan jan aynachtʼañatakejja, parlapkta uka tantachäwinakarus esposajampejj sarapjjarakirïtwa. Jan tiemponi qarita ukhamäpjjayätwa. Ukampis chʼamachasipkta uk Jehová Diosajj bendicïnwa, ukatwa Jupar wal yuspärapjjta. Kimsa wawanïtwa, jupanakajj sapürunjamaw Diosar servisipki” sasa.

15. ¿Kunatsa Kristina kullakajj escuelan yateqki uka arut tantachäwinakar sarañ munäna?

¹⁵ Wawanakajja, escuelan yateqapki uka arut taman jukʼamp yateqapjjatapwa jilsusajj amuyapjjaspa. Ukham uñjasajja, janis munasjjapjjeristam ukham janiw amuyapjjañamäkiti. Kristina kullakajj akham siwa: “Awk taykajan arupjja, mä jukʼak yatiyäta, tantachäwinakan yatichaskäna uksa janiw amuykayätti. 12 maranïkayäta ukhaw escuelan parlaski uka arun mä jachʼa tantachäwir sarayäta. ¡Ukanwa cheqa yatichäwinak sum amuytʼayäta! Maysa toqetjja, escuelan yateqkta uka arut mayisiñaw jukʼamp yanaptʼawayitu. ¡Jehová Diosar taqe chuymaw mayisiyäta!” sasa (Hech. 2:11, 41). Kristina kullakajja, 18 mara phoqjjasaw uka toqet awk taykapamp parltʼasajj yaqha tamar sarjjäna. Jupajj akham siwa: “Escuelan yateqkta uka arut Jehová Diosat yateqañaw jupatakjam sarnaqañatak jukʼamp yanaptʼawayitu” sasa. Kristina kullakajj kusisitaw precursor regularat Diosar serviski.

16. ¿Kunatsa Nadia kullakarojj awk taykapan tamapat jan sarjjatapajj wal kusisiyi?

¹⁶ Wayn tawaqo, ¿sum yatkta uka aru parlir tamar sarjjañti munta? Ukhamächi ukhajja, ¿uka tamankañajj Jehová Diosar jakʼachasiñatakit jukʼamp yanaptʼätam? (Sant. 4:8). Jan ukajja, ¿awk taykamajj kunsa lurasipkta uk jan yatipjjañap munasati, jan ukajj chʼamachasiñ jan munasach yaqha tamar sarañ munta? Betelan serviri Nadia kullakajj akham siwa: “Qʼajjo wayn tawaqöjjapjjayäta ukhajja, jakapkta ukan parlaski uka tamaruw jilajampisa, kullakanakajampis sarañ munapjjayäta” sasa. Ukampisa, awk taykapajja yaqha tamar sarjjañajj Jehová Diosamp sum apasiñatak janiw yanaptʼkaniti sasaw amuyapjjäna. Kullakajj akham saskakiwa: “Awk taykajarojja, arup yatichapjjatapatsa, yaqha aru parli tamar jan khitapjjatapatsa wal yuspärapjjta. Ukaw wal yanaptʼawäpjjetu, yaqha aru parlir jaqenakaru Jehová Diosar uñtʼapjjañapataki yatiyañatakis yanaptʼawäpjjetuwa” sasa.

17. 1) ¿Khitis mä wawar yatichañapa? 2) ¿Kunas awk taykanakarojj wawanakaparu cheqa yatichäwinak yatichañatakejj yanaptʼaspa?

¹⁷ Jehová Diosajja, wawanakapar awk taykanak Bibliat yatichapjjañapwa muni. Bibliat yatichañajj janiw achachilanakarusa, ni yaqhanakarus waktʼkiti (Proverbios 1:8; 31: 10, 27, 28 liytʼañataki). Ukampis wawanakan chuymaparu purtʼañatakejja, inas yanaptʼa mayipjjchispa, ukatakejj uka aru parliri  jilataru jan ukajj kullakaruw yanaptʼa mayipjjaspa. Ukham lurasajja, janis wawanakapar uywañ munapkaspa ukham janiw amuyañasäkiti. Jan ukasti, Jehová Diosatakjam ‘cheqapar yatichasina sum uywañ’ munapjje (Efe. 6:4). Amuytʼañataki, familiana Diosar yupaychañataki arum kunjamsa sarayapjjaspa, jan ukajj wawanakapan suma amigonak thaqapjjañapatak kunsa lurapjjaspa ukwa awk taykanakajj jilïr irpirinakar jisktʼasipjjaspa.

18, 19. 1) ¿Kunjamsa jilat kullakanakajj wayn tawaqonakar yanaptʼapjjaspa? 2) ¿Kunsa awk taykanakajj lurasipkakiñapa?

¹⁸ Wawanakapar yanaptʼañatakejja, familjam Bibliat yatjjatañatakejj yaqha familianakaruw awisajj invittʼapjjaspa. Wayn tawaqonakat waljanejja, jilat kullakanakampi yatiyir sarasa, jan ukajj jupanakamp chika kuns lurapki ukhaw yateqapjjaraki (Pro. 27:17). Shan jilatajj akham saskakiwa: “Kunjamsa jilat kullakanakajj yanaptʼapjjetäna uk amtasipuntwa. Tantachäwinakan plataformat arstʼañataki yanaptʼapkitäna ukhajj wal yateqayäta. Jupanakamp chikäsas wal kusisirakiyäta” sasa.

¹⁹ Awk taykanakar yanaptʼapki uka jilat kullakanakajja, wawanakarojj awk taykapar respetañwa yatichapjjañapa. Ukatakejj awk taykapatwa sum parlapjjañapa, janirakiw jupanakas wawanakar uywapjjañapäkaspa ukham tukupjjañapäkiti. Ukatsti, kunanakatï jaqenakatakisa jilat kullakanakatakis jan walïki, jan wal amuyaykaspa ukanak janipuniw lurapjjañapäkiti (1 Ped. 2:12). Yaqhep awk taykanakajj wawanakapar yatichañatak yaqhanakarus yanaptʼa mayipkchejja, jupanakaw Bibliat yatichasipkakiñapa. Jilat kullakanakajj kunjamsa wawanakapar yanaptʼasipki uksa uñjapjjañapawa.

20. ¿Kunjamsa wawanakapar Jehová Diosar taqe chuyma servipjjañapatak awk taykanakajj yanaptʼapjjaspa?

²⁰ Awk taykanaka, Jehová Diosar yanaptʼa mayisipjjam, wawanakar yatichañatak chʼamachasisipkakim (2 Crónicas 15:7 liytʼañataki). Wawanakaman Jehová Diosampi sum apasipjjañapaw jukʼamp wakiskirejja. Biblian yatichäwinakapampi wawanakaman chuymapar purtʼañatak chʼamachasisipkakim. Wawanakamajj Jehová Diosaruw servipjjaspa, uk janipun armapjjamti. Wawanakamatï Biblian yatichäwinakaparjama, ukhamarak jumanakat yateqasis sarnaqapjjani ukhajja, apóstol Juanjamaw akham sapjjäta: “Wawanakajjan Tatitumpi jakaskatap istʼasinjja wal kusista” sasa (3 Juan 4).