1, 2. (a) Edia hanua idia rakatania natudia momo dekenai dahaka ia vara? (b) Inai stadi ai edena henanadai do ita herevalaia?

JOSHUA ia gwau: “Lau maragi negana amo, ruma bona kongrigeisen ai egu gado lau gaukaralaia. To sikuli lau matamaia murinai, ai noholaia tano matamata ena gado lau gaukaralaia matamaia. Lagani haida murinai, egu gado lau laloaboio. Hebou dekenai lau kamonai herevadia lau lalopararalaia lasi, bona egu tama sina edia kastom lau laloaboio danu.” Unai be natudia momo dekenai ia vara danu.

² Hari, taunimanima 240,000,000 mai kahana be edia tano idia rakatania bona tano ma ta dekenai idia noho. Bema oi be tama o sina ta bona moni gaukara totona tano ma ta dekenai oi lao, edena dala ai emu natudia do oi durua, unai amo idia be “hereva momokani ai idia raka noho” diba? (3 Ioa. 4) Bona ma haida ese edena dala ai heduru idia henia diba?

3, 4. (a) Edena dala ai tama sina ese haheitalai namona idia hahedinaraia diba? (b) Tama sina be edia natudia dekenai dahaka lalohadai idia abia lasi be namo?

³ Tama sina e, emu haheitalai namona ese emu natudia do ia durua  mauri ena dala idia badinaia totona. Bema emu natudia idia itaia umui be “Dirava ena Basileia . . . umui tahua guna,” dina ta ta ai idia be Iehova dekenai do idia tabekau, edia dabu gaudia ia henia totona. (Mat. 6:33, 34) Unai dainai kohu momo umui tahua lasi, to Iehova ena hesiai gaukara umui atoa guna. Danu, abitorehai karana umui dadaraia. Bona guba dekenai ia noho dava bada kohu umui tahua, to “taunimanima edia hanamoa karana” lasi. Bema unai umui karaia, Iehova ena lalonamo do umui abia.​—Mareko 10:21, 22 duahia; Ioa. 12:43.

⁴ Namo lasi gaukara idauidau dekenai oi bisi bada bona oi be nega lasi emu natudia hadibaia totona. Bema oi itaia emu natudia be Iehova idia atoa guna bona ladana bada eiava moni gaukara namona tahua karana idia dadaraia, namona be idia oi hanamoa. Namo lasi umui laloa emu mauri ia namo totona, emu natudia be moni gaukara namona idia abia be namo. Laloatao, “natudia ese kohu do idia haboua lasi edia tama sina totona, to tama sina ese natudia totona kohu do idia haboua.”​—2 Kor. 12:14.

5. Dahaka dainai tama sina ese edia natudia dekenai Iehova idia herevalaia be namo?

⁵ Baibel ena peroveta hereva hegeregerena, “gado idauidau ibounai besedia” amo taunimanima be Iehova ena orea dekenai idia vareai noho. (Sek. 8:23) To bema emu natudia be emu gado idia diba lasi, do ia auka idia dekenai hereva momokani umui hadibaia totona. Baibel amo emu natudia umui hadibaia be mai anina bada, badina bema Iehova dekenai ‘diba idia abia,’ mauri hanaihanai do idia abia. (Ioa. 17:3) Emu natudia be Iehova ena hahediba herevadia idia dibaia totona, namona be nega ibounai idia umui “hadibaia.”​—Deuteronomi 6:6, 7 duahia.

6. Natudia be emu gado idia diba neganai, dahaka ia vara diba? (Laulau ginigunana herevalaia.)

⁶ Reana emu natudia be sikuli ai o ma haida amo gado matamata do idia dibaia, to bema nega ibounai emu gado ai idia oi hereva henia, idia be emu gado do idia diba. Unai amo edia lalohekwarahilaia be umui dekenai idia herevalaia diba. To unai sibona lasi, idia be gado ma haida idia diba dainai, do idia laloa maoromaoro bona ma haida edia laloa dalana do idia lalopararalaia. Bona edia haroro gaukara idia habadaia diba. Carolina ia gwau: “Lau moale badina idau gado kongrigeisen lau bamoa, bona pablisa momo lasi kongrigeisen lau durua diba.”

7. Bema emu natudia be gado ma ta idia gaukaralaia, dahaka do oi karaia?

⁷ Idau bese taudia edia natudia be tano matamata ena gado bona kastom idia dibaia neganai, reana do idia ura lasi edia gado ai idia herevahereva. Tama sina e, bema emu natudia dekenai unai ia vara, tano matamata ena gado do oi dibaia, a? Bema emu natudia ese idia gaukaralaia gado, idia ura henia moale karadia, bona edia sikuli gaukara oi lalopararalaia, bona edia tisa ida oi herevahereva diba, do ia auka lasi emu natudia be Keristani dalana ai oi hakaua totona. Gado matamata dibaia totona, namona be emu nega bona goada oi henia, bona oi manau. To, bema emu natuna be taia kudima, ia ida oi herevahereva totona saini gado do oi dibaia, ani? Unai hegeregerena, gado ma ta ai ia herevahereva natuna ita durua danu be namo, ani? *

8. Bema emu natudia ese idia gaukaralaia gado oi lalopararalaia lasi, edena dala ai emu natudia oi durua diba?

⁸ To, nega haida natudia ese idia dibaia gado  matamatana be ia auka tama sina ese idia dibaia totona. Bema unai ia vara, do ia auka tama sina ese edia natudia dekenai “Toretore Helagadia” idia hadibaia totona. (2 Tim. 3:15) To, emu natudia oi durua diba Iehova idia dibaia bona lalokau henia totona. Elda tauna ta ladana Shan, ia gwau: “Emai sinana ese ai gaukaralaia gado matamatana ia lalopararalaia be auka, bona lau bona egu taihudia be ena gado ai diba namonamo lasi. To ai itaia ia be sibona ena stadi ia karaia, ia guriguri, bona ia hekwarahi wiki ta ta ai famili stadi ia karaia totona, unai amo ai laloparara, Iehova dibaia karana be mai anina bada.”

9. Edena dala ai tama sina ese gado rua ai idia ura stadi natudia idia durua diba?

⁹ Reana natudia haida be gado rua amo Iehova idia dibaia​—unai be sikuli ai bona ruma ai idia gaukaralaia gado. Unai dainai, tama sina haida be unai gado rua ai idia printaia buka bona magasin, idia rekodia gaudia, bona vidio idia gaukaralaia. Momokani, namona be idau bese tama sina ese nega bada idia atoa edia natudia idia durua totona, unai amo edia hetura karana Iehova ida be do ia goada.

10. (a) Daika ese abia hidi do ia karaia edena gado kongrigeisen dekenai idia lao totona? (b) Abia hidi ta ia do karaia lasi neganai, dahaka ia karaia be namo?

¹⁰ Bema “idau bese” tauna ta be ena gado tamona Witnes taudia kahirakahira ia noho lasi, namona be unai tano ena kongrigeisen ta ia bamoa. (Sal. 146:9) To bema kongrigeisen ta be emu gado ia gaukaralaia, henanadai be inai: Edena gado kongrigeisen dekenai emu famili do oi hakaua lao? Ruma bese ena kwarana ese unai ia lalohadailaia namonamo bona ia guriguri murinai, abia hidi ia karaia diba. (1 Kor. 11:3) Ruma bese ena kwarana be dahaka gaudia do ia laloa? Edena hakaua herevadia do ia badinaia? Mani unai ita herevalaia.

11, 12. (a) Gado ta dibaia karana ese edena dala ai hebou dekenai natu ia durua diba? (b) Dahaka dainai natu haida be idia ura lasi edia tama sina edia gado idia dibaia?

¹¹ Namona be tama sina ese edia natudia edia namo idia laloa. Momokani, herevana natu ta be edena gado ia lalopararalaia, to hereva momokani ia dogoatao auka totona, wiki ta ta ena kongrigeisen heboudia dekenai ia lao sibona be hegeregere lasi. Mani oi laloa: Natudia be idia lalopararalaia gado ai idia karaia heboudia dekenai idia lao neganai, gau momo do idia dibaia. To bema idia lalopararalaia lasi gado ena heboudia dekenai idia lao, unai do ia vara lasi. (1 Korinto 14:9, 11 duahia.) Momokani, natudia be edia tama sina edia gado do idia gaukaralaia hanaihanai lasi. Idia haida be edia tama sina edia gado ai haere, haheitalai, bona tok idia henia diba, to idia gwauraia herevadia be edia kudouna amo idia mai lasi.

¹² Ma danu, natu ta ena kudouna be gado ta dibaia karana sibona ese ia hagoadaia diba lasi. Matamanai ita herevalaia tauna, Joshua dekenai unai ia vara. Iena taihuna, Esther, ia gwau, “bema natudia be edia tama sina edia gado idia ura henia, idia ese edia kastom bona tomadiho do idia abia dae danu.” To bema natudia be edia tama sina edia kastom idia diba lasi, reana do idia ura lasi edia tama sina edia gado bona tomadiho idia dibaia. Idau tano amo idia mai tama sina be dahaka idia karaia diba?

13, 14. (a) Dahaka dainai ruma bese ta be edia kongrigeisen idia haidaua? (b) Edena dala ai tama sina ese edia hetura karana Dirava ida idia hagoadaia?

¹³ Keristani tama sina be edia natudia edia namo idia atoa guna, to edia namo be gabeai. (1 Kor. 10:24) Joshua bona Esther edia tamana, Samuel, ia gwau: “Lau bona egu adavana ese emai natudia ai itaia,  unai amo do ai diba idia be edena gado ai Iehova do idia tomadiho henia, bona aonega totona Dirava ai guriguri henia. To ai davaria gauna be idau. Ai itaia idia be emai gado ai idia karaia kongrigeisen heboudia idia lalopararalaia lasi, unai dainai unai tano ena gado ai idia karaia kongrigeisen heboudia dekenai ai lao. Ai ibounai be hanaihanai hebou dekenai ai lao bona ai haroro hebou. Danu, emai kongrigeisen turadia ai boiria ai ida idia aniani bona loaloa totona. Unai dala amo emai natudia ai durua edia tadikaka taihu idia diba totona, bona do idia diba Iehova be edia Dirava sibona lasi, to edia Tamana bona Turana danu. Ai dekenai unai be mai anina bada, to emai gado idia dibaia namonamo karana be gau badana lasi.”

¹⁴ Ma ia gwau: “Emai hetura karana Dirava ida ia goada noho totona, lau bona egu adavana be emai gado ai idia karaia kongrigeisen heboudia dekenai ai lao. Ena be ai bisi bada bona hesiku, to Iehova ai tanikiu henia, badina ia ese emai hekwarahi ia hanamoa. Bona hari emai natudia toi be ful-taim hesiai gaukara idia karaia.”

15. Dahaka dainai taihu Kristina ese ena kongrigeisen ia haidaua?

¹⁵ Natudia idia bada neganai, reana do idia laloparara idia diba gado ena kongrigeisen ai Iehova idia hesiai henia be namo. Bema unai idia karaia, namo lasi edia tama sina idia laloa edia natudia ese idia lalokau henia lasi. Kristina ia gwau: “Egu tama sina edia gado lau diba sisina, to kongrigeisen heboudia ai idia gaukaralaia gado lau lalopararalaia lasi. Egu mauri lagani be 12 neganai, sikuli ai lau gaukaralaia gado ena hebouhebou ta dekenai lau lao. Unai nega sibona ai lau laloparara lau kamonai herevadia be hereva momokani! Sikuli ai lau gaukaralaia gado dekenai lau guriguri neganai, lau mamia mai kudouna ibounai ida Iehova lau hereva henia!” (Kara 2:11, 41) Kristina ia bada neganai, iena tama sina ida unai idia herevalaia bona abia hidi ia karaia ia diba gado ena kongrigeisen dekenai do ia lao. Kristina ia gwau: “Sikuli ai lau gaukaralaia gado amo Iehova lau dibaia karana ese lau ia doria kara ta lau karaia totona.” Daudau lasi murinai, Kristina be regula painia gaukara ia matamaia.

16. Dahaka dainai taihu Nadia be ena kongrigeisen ia haidaua lasi dainai, ia moale?

¹⁶ Matamata taudia e, umui ura umui lalopararalaia gado ena kongrigeisen dekenai umui lao, a? Bema oibe, vadaeni namona be sibona oi nanadaia: Bema unai kongrigeisen ena hebou dekenai lau lao, unai ese egu hetura karana Iehova ida do ia hagoadaia, a? (Iam. 4:8) Eiava, oi ura unai kongrigeisen dekenai oi lao, badina oi ura lasi emu tama sina ese oi idia biagua eiava oi ura lasi maduna ma haida oi huaia? Betele ai ia gaukara taihu ladana Nadia, ia gwau: “Lau, egu taihudia bona tadina mero ai bada neganai, ai ura emai kongrigeisen ai haidaua.” To edia tama sina idia laloa unai abia hidi ese idia do ia durua lasi Dirava idia dibaia totona. Nadia ma ia gwau: “Ai moale, badina emai tama sina idia gaukara goada ai dekenai edia gado idia hadibaia bona unai gado kongrigeisen dekenai ai lao. Unai ese emai mauri ia haidaua bona dala ia kehoa ma haida ai durua Iehova idia dibaia totona.”

17. (a) Iehova ese natudia naria maduna be daidia dekenai ia henia? (b) Natudia hadibaia karana dekenai tama sina be edena dala ai heduru idia abia diba?

¹⁷ Iehova ese tama sina dekenai maduna ia henia edia natudia dekenai hereva momokani idia hadibaia totona, to tubudia dekenai lasi. (Aonega Herevadia 1:8; 31:10, 27, 28 duahia.) To bema tama sina be edia natudia ese idia dibaia gado idia diba lasi, heduru idia abia be namo, unai amo edia natudia edia kudouna idia hamarerea diba. Namo lasi idia  laloa bema heduru idia tahua, idia be edia Keristani maduna idia dadaraia; to bema unai idia karaia edia natudia dekenai “Iehova ena matahakani bona sisiba” idia hadibaia diba. (Efe. 6:4) Hegeregere, tama sina be elda taudia amo ruma bese tomadiho hakaua dalana bona edia natudia idia bamoa karana dekenai heduru idia abia diba.

18, 19. (a) Lo Keristani taudia ese edena dala ai matamata taudia idia durua diba? (b) Tama sina be dahaka idia karaia noho be namo?

¹⁸ Nega ta ta ai tama sina ese ruma bese ma ta idia boiria diba edia ruma bese tomadiho dekenai idia helai vareai totona. Danu, matamata taudia momo be tadikaka taihu ma haida amo diba idia abia, bema idia ida idia haroro o gau ma haida idia karaia hebou. (Aon. 27:17) Matamanai ita herevalaia tadikaka, Shan, ia gwau: “Tadikaka ese lau idia durua daladia lau laloatao diba. Hebou ena kahana ta totona lau idia durua neganai, gau momo lau dibaia. Bona ai karaia moale karadia lau moalelaia bada.”

¹⁹ Oibe, tama sina ese edia natudia durua totona idia abia hidi taudia ese matamata taudia idia hagoadaia be namo, edia tama sina idia matauraia totona, edia kara namo idia herevalaia, to edia tama sina edia maduna idia abia lasi. Danu, namo lasi matamata taudia idia durua tadikaka o taihu edia kara ese kongrigeisen lalonai o murimuri ai idia noho taudia idia hahekwakwanaia. (1 Pet. 2:12) Namo lasi tama sina idia laloa ma haida ese edia natudia idia hadibaia be namo Iehova idia hesiai henia totona. To namona be tama sina be edia natudia ese edia turadia amo idia abia heduru idia itaia bona idia sibona ese edia natudia do idia hadibaia.

20. Edena dala ai tama sina ese edia natudia do idia durua, Iehova idia hesiai henia totona?

²⁰ Tama sina e, heduru totona Iehova umui noia, bona umui hekwarahi emu natudia umui hadibaia totona. (2 Sivarai 15:7 duahia.) Emu natuna ena hetura karana Iehova ida oi atoa guna bona emu ura be gabeai. Bona oi hekwarahi emu natuna ena kudouna dekenai Dirava ena Hereva oi atoa totona. Danu, oi abia dae emu natuna be Iehova ena hesiai tauna namona ai ia lao diba. Emu natudia ese Dirava ena Hereva idia badinaia bona emu haheitalai idia tohotohoa neganai, oi be aposetolo Paulo bamona do oi mamia, ia gwau: “Lau kamonai egu natudia be hereva momokani ai idia raka noho neganai, lau moale bada bona moale ta ese unai moale ia hereaia lasi.”​—3 Ioa. 4.