1, 2. (a) Idau tano ai e nohomu natu be dahaka hekwakwanai e davarimu? (b) Ina stadi ai ededia henanadai baita herevalaimu?

JOSHUA na eto: “Maraḡigu negana amo, lau na ruma ai bona kongrigeisen ai tamagu sinagu edia gado ai na herevava. To na sikuli matama neganai, a nohova tanona ai e ḡaukaralaiava gadona na ḡaukaralaiava. Laḡani haida muridiai, una gado na manadalaia. Una dainai, tamagu sinagu edia gado ai e karava heboudia na asina lalopararalaiva, bona edia kastom haida danu na lalodia boio.” Joshua enai e vara ḡauna na momo ediai danu e varamu.

² Hari ina negai, taunimanima 240,000,000 mai kahana na idau tanodia ai e nohomu. Bema oi na tama o sina ta, bona emu tano amo ola idau tano ai o nohomu, edena dalai natumu ba durua diba ‘hereva momokani dalanai baine raka’? (3 Ioa. 4) Bona ma haida be ede bae heduru toma?

3, 4. (a) Edena dalai tama sina na haheitalai namona bae hahedinaraia? (b) Tama sina ese edena lalohadai bae dadaraia na namo?

³ Tama sina e, emui haheitalai na mai anina bada bema o uramu natumui na mauri hanaihanai dalanai bae raka. Bema idia na be itaiamu umui na “Basileia” o tahua gunamu, una ese be durudiamu edia dabu ḡaudia iabidia totona Iehova enai bae tabekau. (Mat. 6:​33, 34) Una dainai, emui mauri ai moni o kohu momo na basio tahu, to lauma ḡaudia bavato guna. Abitorehai karana ba dadaraia. “Guba kohudia”​—Iehova ena lalo namo​—ba tahu, dia taḡa eiava “taunimanima edia heimodai.”​—Mareko 10:​21, 22 ba duahi; Ioa. 12:43.

⁴ Namona na nega bavato natumui ba durudia. Ba hadibadia oi na o moalemu badina idia ese Iehova ena ura e atoa gunamu bona lada bada eiava taḡa itahuna karana e dadaraiamu. Dia namo ba lalo mauri namona bavabia totona natumui baine ḡaukara na namo. Ba helalotao, natu ese “kohu basie habou tamadia sinadia edia, a tamadia sinadia ese kohu bae habou natudia edia.”​—2 Kor. 12:14.

5. Dahaka dainai tama sina ese natudia ediai Iehova bae herevalaia na namo?

⁵ Peroveta herevana heḡereḡerena, “gado idau-idau iboudiai besedia amo” taunimanima na Iehova ena orea ai e vareaimu. (Sek. 8:23) To nega haida natumui na gado idauna ta ai hereva momokanina ba hadibalaidia na mai hekwarahina. Natumui ba stadi henidia na mai anina bada, bona Iehova bae dibaia karana amo mauri hanaihanai bae abia diba. (Ioa. 17:3) Natumui ese Iehova ena hahediba herevadia bae diba totona, namona na “ba hadibalaidia” hanaihanai.​—Deuteronomi 6:6, 7 ba duahi.

6. Edena dalai natumui na emui gado idibana karana ese be duruamu? (Rau 8 ai laulau ba itaia.)

⁶ Natumui ese idau tano gadona na sikuli ai o haida edia amo be dibamu, to emu gado korikori ai bo hereva henidia hanaihanaimu neganai emu gado be dibaiamu. Danu emu gado korikori idibana karana ese be durudiamu, edia lalohadai na emu ai bae gwaurai hedinarai diba. To dia una mo, gado rua idibana karana ese natumui edia diba be habadaiamu bona edia herevahereva dalana be hanamoamu. Unu amo danu edia haroro ḡaukara bae habadaia diba. Carolina na tamana sinana ida idau tano ai e nohomu, bona ia na ini e gwau toma: “Idau gado kongrigeisen ai a nohomu bona pablisa dia momo gabudia ai a hedurumu na mai moalena.”

7. Dahaka ba kara diba bema emu ruma bese ai ta na gado ma ta e lalopararalaiamu?

⁷ To, natu na idau tano ena gado bona kastom e dibamu neganai, asie uramu tamadia sinadia edia gado ai bae hereva. Tama sina e, bema natumui ediai una e varamu, una tano ena gado ba dibaia na namo, ani? Bema natumui edia herevahereva karana, moale karadia, bona sikuli ḡaukaradia bo lalopararalaimu bona bema edia tisa bo hereva henidiamu, natumui na bo durudia dibamu Kristen taudia ai baela totona. To, gado matamatana ta ba dibaia totona emu nega bona goada bo ḡaukaralaiamu, bona ba manau na namo. To bema natumu na mu, sign language ba dibaia na namo, unu amo ia ida saini gado ai ba herevahereva diba. Bema natumu na gado ma ta e lalopararalaiamu, ia ida ba herevahereva totona una gado ba dibaia na namo, ani? *

8. Edena dalai natumu ba durua diba bema e lalopararalaiamu gadona na asi dibamu?

⁸ Momokani, idau tano ai e ha nohomu tama sina haida ese natudia e dibamu gadona matamatana be herevalaiamu na auka. Una dainai be hekwarahimu  “revareva helaḡadia” ena dobu ḡaudia na natudia bae hadibalaidia. (2 Tim. 3:15) Bema emu ai una na e varamu, natumui na dounu ba durua diba Iehova baine dibaia bona baine lalokau henia totona. Elda ta ladana Shan na eto: “Sinagu na lau bona taihugu ese a lalopararalaiava gadona na asi dibana namonamo, bona ai danu iena gado na asia herevalaia momova. To a itaiava, ia na ena stadi e karava, e ḡuriḡuriva, bona e hekwarahiva wiki ta ta ai ruma bese ena tomadiho baine karaia neganai, a laloparara Iehova idibana karana na mai anina bada.”

9. Edena dala ai tama sina ese gado rua e ḡaukaralaimu natu bae durudia diba?

⁹ Natu haida na gado rua​—sikuli ai e dibaiamu gadona bona ruma ai e herevalaiamu gadona​—amo Iehova bae dibaia na namo. Una dainai, tama sina haida ese pablikeisen, rekodi ḡaudia, bona vidio na gado rua ai e ḡaukaralaimu. Idau tano ai e ha nohomu tama sina na nega bada bae ato, unu amo natudia bae durudia Iehova ihetura henina karana bae hagoadaia.

10. Daika ese abi hidi baine karaia diba gado ta kongrigeisen baela totona? (b) Abi hidi do se karaia neganai, dahaka baine kara na namo?

¹⁰ Bema “noho-hedoa taudia” e nohomu gabuna na edia gado e herevalaiamu Witnes taudia edia amo daudau, namona na e nohomu gabuna ena kongrigeisen bae bamoa. (Sal. 146:9) To, bema kongrigeisen kahikahina ta na emu gado korikorina e herevalaiamu, henanadai binai: Emu ruma bese be edena gado kongrigeisen ba laohaidia na namo? Ruma bese kwarana ese una baine haeroa namonamo, baine ḡuriḡurilaia, bena adavana bona natuna ida baine herevalaia murinai, abi hidi baine karaia na namo. (1 Kor. 11:3) Ruma bese kwarana ese dahaka ḡau haida baine lalodia na namo? Ededia hahekau herevadia baine badina? Mani unu ḡau haida aita herevalai.

11, 12. (a) Edena dalai gado idibana karana ese hebou ai natu ta baine durua? (b) Dahaka dainai natu haida na asie uramu tamadia sinadia edia gado bae diba?

¹¹ Tama sina ese natudia e lalo badamu ḡaudia bae lalodia na namo. Herevana natu na edena gado mai dibana, to hereva momokani baine lalopararalaia namonamo totona, pura ta ta heboudia ai hora haida lalodiai e hahedibalaimu Baibul herevadia na basine dibamu. To mani ina a laloa: Natu na e lalopararalaia namonamomu gadona ai be heboumu neganai, ḡau momo be dibamu. To, natu ese gado basie lalopararalaia namonamomu neganai, diba na basie abimu. (1 Korinto 14:​9, 11 ba duahi.) Natu ese ena gado korikori na basine laloatao hanaihanaimu. To, natu haida na tamadia sinadia edia gado ai haere be henimu, haheitalai be karamu, bona tok be heni dibamu, to unu na dia kudoudia amo be karamu.

¹² Danu, natu na dia gado idibana karana ese mo be duruamu. Una na paragraf matamanai e herevalaia merona, Joshua, enai e vara. Ia taihuna Esther na eto: “Natu na tamadia sinadia edia gado e dibamu neganai, edia kastom bona tomadiho danu e dibadiamu.” Bema natu na tamadia sinadia edia kastom basie lalopararalaiamu, reana basie uramu tamadia sinadia edia gado bona edia tomadiho bae dibaia. Idau tano ai e ha nohomu tama sina be dahaka bae kara diba?

13, 14. (a) Dahaka dainai ruma bese ta na idau gado kongrigeisen ta ela? (b) Edena dala ai tama sina na lauma dalanai e goada?

¹³ Kristen tama sina na sibodia edia namo asie lalomu to natudia edia lauma dalana e laloa badamu. (1 Kor. 10:24) Joshua bona Esther tamadia, Samuel, na ini e gwau toma: “Lau bona adavagu na a urava baia itaia natumai be  edena gado ai lauma dalanai e goadamu bona Dirava a noia aonega baine henimai. Dia emai namo dainai to a urava natumai baia durudia. To emai gado ai a hebouva neganai, a itaiava natumai na heduru na asie abi namonamova, una dainai lalomai a hadai a nohova tanona ena gado kongrigeisen baiala. Hanaihanai hebou a laova bona a haroro hebouva. Danu unuseniai e nohova tadikaka taihu a boiridiava baia aniani hebou eiava baia loaloa hebou. Una ese natumai e durudia tadikaka taihu bae dibadia bona Iehova bae dibaia, ia na dia edia Dirava mo, to Tamadia bona Turadia ai danu bae halaoa. Ai emai ai una na mai anina bada, to emai gado korikori bae dibaia namonamo na dia ḡau badana.”

¹⁴ Samuel na ma ini e gwau toma: “Lauma dalanai baia goada totona, lau bona adavagu na emai gado korikori ai danu a hebouva. Ena be ḡaukara idauidau a karava dainai a hesikuva. To Iehova a tenkiu heniamu badina ia ese emai hekwarahi na e hanamoa. Hari natumai tatoiosi na fultaim hesiai ḡaukara e karamu.”

15. Dahaka dainai Kristina na e lalo idau tano kongrigeisen ai heduru na be abi namonamomu?

¹⁵ Natu badadia na mai dibadia idia na e lalopararalaiamu gadona ena kongrigeisen ai Iehova bae hesiai henia namonamo diba. Bema unu bamona, dia namo tama sina na bae lalo natudia ese idia na asie ura henidiamu. Kristina na eto: “Tamagu sinagu edia gado na asi dibagu namonamo, una dainai hebou ai e herevalaiva ḡaudia na asina lalopararalaiva. Laḡanigu 12 neganai, sikuli ai na diba gadona ai e heabi hebouhebouna ta nala. Una na egu nega ginigunana na laloparara na kamonaiva ḡaudia na hereva momokani! Danu sikuli ai na diba gadona ai na ḡuriḡuri matama neganai, una ese lau na e durugu. Na diba lau na mai kudougu idoinai ida Iehova baina hereva henia diba!” (Kara 2:​11, 41) Kristina na laḡanina 18 neganai, tamana sinana ediai una e herevalaia bona lalona e hadaia e nohova tanona ena gado kongrigeisen bainela. Ia na eto: “Egu sikuli ai na diba gadona ai Iehova na dibaia karana ese lau na e durugu kara ta baina karaia.” Gabeai, Kristina na mai moalena ida regula painia ḡaukara e karaia.

16. Dahaka dainai Nadia na idau gado kongrigeisen ai e noho dainai e moale?

¹⁶ Memero kekeni e, o uramu o nohomu tanona ena gado kongrigeisen ai ba hebou, a? Bema oibe, sibomu ba henanadai, ‘Una kongrigeisen ba laomu karana ese lau be durugumu Iehova baina raka henia kahi totona, a? (Iak. 4:8) Eiava na uramu bainala badina asina uramu tamagu sinagu ese na karamu ḡaudia iboudiai bae ita o asina uramu baina hekwarahi, a?’ Betele ai e ḡaukaramu taihuna ta, Nadia, na ini e gwau toma: “Lau bona tadigu na eregabemai ai, a ura emai kongrigeisen baia haidaua bona a nohomu tanona ena gado kongrigeisen baiala.” To tamana sinana na e diba una abi hidi ese natudia edia lauma dalana na basine duruamu. Nadia na ma eto: “Hari ai na a moalemu badina tamamai sinamai na e hekwarahiva edia gado e hadibamaiva bona idau gado kongrigeisen a laova. Una ese ai na e durumai bada bona dala e kehoa ma haida baia durudia Iehova bae dibaia totona.”

17. (a) Iehova ese natu inaridia madunana be daidia e henidia? (b) Tama sina ese natudia na hereva momokani bae hadibadia totona, edena dalai heduru bae abi diba?

¹⁷ Iehova ese natu inaridia maduna na tama sina e henidia, dia tubudia eiava ma haida. (Hereva Lada-isidia 1:8; 31:​10, 27, 28 ba duahi.) To, idau gado asi dibadia tama sina ese heduru bae abi na namo natudia kudoudia bae hamarere totona. Una heduru iabina karana  ese na se hahedinaraiamu tama sina ese edia maduna na e dadaraiamu. To una na tama sina ese Iehova ena “hahediba herevadia bona ena sisiba herevadia” amo natudia bae hadibadia dalana ta. (Efe. 6:4) Heḡereḡere, tama sina ese elda taudia bae noidia ruma bese ena tomadiho bae hakaua dalana bae hadibadia, bona bae durudia natudia ese tura namodia bae abi hidi daladia bae diba totona.

18, 19. (a) Edena dalai lo tadikaka taihu ese memero kekeni bae durudia diba? (b) Tama sina na hanaihanai dahaka bae kara na namo?

¹⁸ Nega haida tama sina ese ruma bese ta bae boiria diba edia ruma bese ena tomadiho ai bae vareai. Danu, memero kekeni momo na goada bae abi diba bema haroro ḡaukara ai bona moale karadia namodia ai lo tadikaka taihu bae bamodia. (Her. 27:17) Matamanai e herevalaia tauna Shan na eto: “Tadikaka ese e durugu karana na asina laloa boiomu. Hebou ai egu stiuden tok iheḡaeḡaelaina ai e duruguva neganai, ḡau momo na diba. Bona idia ida a kara hebouva moale karadia na moalelaiva.”

¹⁹ Oibe, tama sina ese natudia idurudia totona e abidia hidimu taudia ese natu bae hagoadadia tamadia sinadia bae matauraidia bona edia kara namodia bae herevalai, to idia ese tama sina edia maduna na basie abi. Danu, natu e durudiamu taudia na bae henahua toho, dia namo edia kara ese kongrigeisen lalonai bona murimurina ai e nohomu taudia baine hahekwakwanaidia. (1 Pet. 2:12) Dia namo tama sina na bae lalo idia natudia na haida ese hereva momokani bae hadibadia. Namona na haida ese idia natudia e durudiamu karana na bae haeroa namonamo, bona idia sibodia ese natudia na dounu bae hadibadia.

20. Edena dala ai tama sina ese natudia bae durudia Iehova ena hesiai taudia namodia ai baela?

²⁰ Tama sina e, namona na Iehova ena heduru ba noia, bona ba ḡaukara goadagoada natumui ba hadibadia. (2 Sisiga 15:7 ba duahia.) Natumui ena hetura karana Iehova ida bavatoa guna, emu ura ḡaudia be gabeai. Ba ḡaukara goada natumui kudouna ai Dirava ena Hereva bavatoa. Namona na bavabia dae natumui na Iehova ena hesiai tauna namona ai bainela diba. Natumui ese Dirava ena Hereva bona emu haheitalai namona be badinaiamu neganai, emu hemami na aposetolo Ioane ena heḡereḡerena, eto: “Moale bada-herea egu ai badina binai: natugu haridia na kamonaimu, idia be hereva momokani dalanai e rakamu.”​—3 Ioa. 4.