1, 2. ა) მუ პრობლემეფს შეხვადნა შხვა ქიანაშა ულირ ბაღანეფი? ბ) მუ კითხვეფს გუვარჩიენთ?

„ჭიჭენობაშე ჩქიმ მშობლეფიშ ნინაშა იფჩიებუდ, მუჭოთ ჸუდესინ თეშ კრებას ხოლო. მუჟამსით სკოლაშა გილულა დიბჭყინ, თექიან ნინაშა რაგად იფსხუნე დო მუსხირენ წანაშ უკულ თე ნინას გვალო ქიმუვარჩქვან. ვა ბგებულენდ, მუდგას კრებაშ შეხვალამეფს იჩიებდეს დო მშობლეფიშ კულტურა ხოლო უცხო მაფუდ“ — იჩიებ ჯოშუა. თეცალ სიტუაციას შხვეფ ხოლო რენა.

² ამდღა 240 000 000-შე უმოს კოჩ რე გინულირ შხვადო ოცხოვრებშა. შხვა ქიანაშა გინულირ მშობელ ქორეთ-და, მუჭო შეილებნა მეხვარათ თქვან სქუალეფს, ნამდა ჭეშმარიტებას გილართან? (3 იოან. 4). მუჭო შეულებნა შხვეფს თინეფიშ მოხვარა?

3, 4. ა) მუჭო შეულებნა მშობლეფს სქუალეფშა ჯგირ მაგალითიშ მეჩამა? ბ) მუ ოკო ვემითხუან მშობლეფქ სქუალეფშე?

³ მშობლეფი, თქვან ჯგირ მაგალითით შეილებნა სქუალეფ მარადიულ სიცოცხლეშ შარას გიორინუათ. მუჟამსით ბაღანეფ ორწყენა, ნამდა სამეფოს პირველ ადგილს გიორინუანთინ, თინეფ გურაფლენა იეჰოვაშა მენდებას (მათ. 6:33, 34). თაშ ნამდა, იცხოვრით მოკრძალებულო დო მატერიალურიშ წოხოლე ირო სულიერ  ქიგიორნეთ. ქეცადით ვეგიდვათ ვალეფი. გორით „განძი ზეცას“ — იეჰოვაშ მოწონება დო ვართ ხოლო „კოჩშე დიდება“ ვარდა სიმდიდრე (წეკითხით მარკოზი 10:21, 22; იოან. 12:43).

⁴ დღას ვა რდათ თიშნერ დაკავებულ, ნამდა თქვან ბაღანეფშო დროქ ვადგოსკიდან. ქოუწით სქუალეფს, ნამდა გოამაყუნა თინეფიშ საქციელი, მუჟამსით პირველ ადგილს იეჰოვას გიორინუანა დო ვა გორუნა სიმდიდრეს, მუჭოთ მუნეფშონ, თეშ თქვანო ხოლო. თეშ ვეფიქრათ, ნამდა სქუალეფქ ოკო იხანდან მშობლეფიშ კომფორტულ ცხოვრებაშო. თენა ვა რე ქრისტიანულ აზროვნება დო ირო რშუდან: „მშობლეფ ოკო შაყარანდან სქუალეფშო დო ვართ ხოლო სქუალეფ — მშობლეფშო“ (2 კორ. 12:14).

5. მუშენ ოკო ეჩუან მშობლეფქ სქუალეფს იეჰოვაშ გურშენ?

⁵ წინასწარ რდუ რაგადებულ, ნამდა იეჰოვაშ ორგანიზაციაშა ქიმიშ „ხალხი არძა ნინაშე“ (ზაქ. 8:23). ნინაშ ბარიერიშ გურშენ შილებე მშობლეფშო ეფი ვა რდას სქუალეფშა ჭეშმარიტებაშ გურაფა. არძაშ უმოს მნიშვნელოვან პიროვნებეფ, მიდგას შეილებნა ბიბლია დაგურუათინ, თქვან სქუალეფ რენა. იეჰოვაშ გაჩინებაფა თინეფშო მარადიულ სიცოცხლეს ნიშნენს (იოან. 17:3). იეჰოვაშ გურაფეფ გეჩინებაფუანინ, თქვან სქუალეფს ირიათო „ოკო ეჩუათ“ (წეკითხით კანონი 6:6, 7).

6. მუ ჯგირობუა შილებე მუღას სქუალეფს თქვან ნინაშ დოგურაფაქ? (ქოძირით სურათი მა-8 გვერდის).

⁶ თქვან სქუალეფ თექიან ნინას ხეთეშე დიგურუანა სკოლას დო სოდეთ რენან თი გარემოს. მარა თქვან ნინა, პირველ რიგის, თქვანწკუმა ხშირ ურთიერთობათ დაგურენა. თენა თქვან შქას გურგონწყუმილ ჩიებას შეუნწყუნს ხეს. თეს გეძინელ, ჟირ ნინაშ რჩქინა თინეფს შხვა სარგებელს ხოლო მუღანს. ბაღანეფს შეიალებენა გეუჯგუშან ფიქრიშ უნარ დო უჯგუშო გაუგან შხვეფს. თე ირფელ თინეფს მსახურებაშ გაფართოებას ხოლო მეხვარებ. კაროლინა, ნამუთ მშობლეფწკუმა ართო შხვა ქიანაშა რე ულირინ, იჩიებ: „შხვა ნინაშა კრებაშ შეხვალამეფიშ დასწრებას ხიოლ მოუღ დო მანგარ რე, მუჟამსით თექ ოხვარუქ, სოდეთ მეტ საჭიროება რე“.

7. მუჭო შეილებნა მიქცუათ, მუჟამსით ბაღანას შხვა ნინა უჯგუშო არჩქილე?

⁷ შხვა ქიანაშა ულირ ბაღანეფ ხეთეშე მიარჩქვანუნა თექიან ნინას დო კულტურას. ათეშგურშენ ნამთინე ბაღანას შილებე იშენდოიშენ ვაკოდას დო ვართ შეულებდას მშობლეფიშ ნინაშა ჩიება. მშობლეფი, თქვან ბაღანეფ ხოლო თაშ ქორენან-და, შეილებნანო ჭიჭეთ ვარა ქიდიგურუათ თექიან ნინა? თქვა უჯგუშო შეგალებენა თქვან ბაღანაშ ქრისტიანულო რდუალა, მუჟამსით გიჩქნა მუჭო ატარენა დროს, გებულენთ თინეფიშ ჩიებას, სკოლაშ დავალებეფს დო მასწავლებელწკუმა რაგად ხოლო შეილებნა. ახალ ნინაშ გურაფა ითხინს დროს, მონდომას დო თანდაბლობას. მაგალთო, თქვან ბაღანა ჸუც ვერჩქილედასინ, ხომ ქიდიგურუანდით ჟესტეფიშ ნინას თიწკუმა ჩიებაქ ქეშქალებესკონ? თაშ ოკო მიფქცუათ თი დროს ხოლო, მუჟამსით ბაღანა შხვა ნინაშა უჯგუშო იჩიებ. *

8. მუჭო შეილებნა მეხვარათ ბაღანეფს, მუჟამსით ჯგირო ვა გარჩქილენა თინეფიშ ნინა?

⁸ შილებე ნამთინე მშობელს ბაღანეფიშ ნინაქ ჯგირო ვადაგურუას დო ათეშგურშენ გაუჭირდას სქუალეფშა ღორონთიშ სიტყვაშ სიტომბეეფიშ გინოჩამაქ (2 ტიმ. 3:15). თქვა ხოლო თეცალ სიტუაციას ქორეთ-და, იშენით შეილებნა მეხვარათ ბაღანეფს, გეჩინებაფუან დო ქიჸოროფუან იეჰოვა. ჯიმა შანი, ნამუთ უხუცესო მსახურენსინ, იშინანს: „ჩქინ ხვალახე დიდას ჯგირო ვარჩქილედ ჩქინ ნინა. მა დო ჩქიმ დალეფს ხოლო  ვამარაგადედეს თიშ ნინაშა. მარა ჩქი ვორწყედით, მუჭო გურაფლნდ, ლოცულენდ დო ოცადუდ ოჯახურ თაყვანიშცემა ირ მარას ჩატარუკო. თავრეშე ჩქი ვორწყედით, ნამდა იეჰოვაშ გაჩინებაფა მნიშვნელოვან რდუ“.

9. მუჭო შეულებნა მშობლეფს, მეხვარან ბაღანეფს, მიდგას ოსაჭირ ჟირ ნინაშ გურაფა?

⁹ ნამთინე ბაღანას შილებე იეჰოვაშ გურშენ მეტიშ გაგებელო ჟირ ნინაქ დესაჭირას თიშენ, ნამდა თინეფ სკოლას ართ ნინაშა იჩიებნა დო ჸუდეს მაჟია ნინაშა. ათეშგურშენ ნამთინე მშობელქ შილებე ჟირხოლო ნინაშა გიმირინუას ბეშტელ ლიტერატურა, ვიდეოეფ დო შხვა საშვალებეფი. არგამა რე, მშობლეფქ მეტ დრო ოკო გიმურთან დო მეტ მონდომა ოკო გიმირჩქინან, ნამდა მეხვარან სქუალეფს ხოლოშიან ურთიერთობა უღუდან იეჰოვაწკუმა.

10. ა) მიქ ოკო გინოჭყვიდას, მუ ნინაშა დესწრას ოჯახიქ კრებას? ბ) მუ ოკო აკეთას თიქ თე საკითხიშ გინოჭყვიდუაშახ?

¹⁰ მუჟამსით „ხიზნეფი“ შორს ცხოვრენა თი მოწმეეფშე, ნამუთ მუნეფიშ ნინაშა იჩიებნან, სოდეთ რენან თი ნინაშა იტარებუნ ფერ კრებას ოკო დესწრან (ფსალმ. 146:9). მარა მუჟამსით თქვან ნინაშა კრებაშ შეხვალამეფ ხოლოს იტარებუნ, კითხვა წიმიჭკირუ: ნამ კრებაშ დასწრება იჸუაფ უჯგუშ თქვან ოჯახშო? ჯგირო დაფიქრებაშ, ლოცვაშ დო ოჯახწკუმა ჩიებაშ უკულ თენა ოჯახიშ უნჩაშიქ ოკო გინოჭყვიდას (1 კორ. 11:3). მორთ, გუვარჩუათ, მუ ოკო გეთვალისწინას ოჯახიშ უნჩაშიქ დო ნამ პრინციპეფ გიმირინუას.

11, 12. ა) მუ სარგებელ მოუღ ბაღანაშო ჯგირო არჩქილენ ფერ ნინაშა კრებაშ შეხვალამეფიშ დასწრებას? ბ) მუშენ შილებე ბაღანაქ ვარია თქუას მშობლეფიშ ნინაშ გურაფაშენ?

¹¹ მშობლეფქ რეალურო ოკო უჯინან მუნეფიშ ბაღანეფიშ საჭიროებეფს. ბიბლიურ ჭეშმარიტებას ჯგირო ქინანჭანინ თიშ გურშენ, ბაღანეფს უმოს ოსაჭირნა, ვინემ ხვალე კრებაშ შეხვალამეფიშ დასწრება. დეფიქრით: მუჟამსით ბაღანა მუს ჯგირო არჩქილენ ფერ ნინაშა კრებაშ შეხვალამეფს ოსწრუნ, შილებე მშობლეფიშ უმოს ხოლო ქიგეგას დო ხვალე თექიან დასწრებათ ხოლო მიღას მეტ სარგებელი. თენა ვამოხვადუ, მუჟამსით ჯგირო ვარჩქილენ ფერ ნინაშა ოსწრუ კრებაშ შეხვალამეფს (წეკითხით 1 კორინთელები 14:9, 11). მშობლეფიშ ნინაქ შილებე ირო ვეშეხუას ბაღანაშ გურს დო გონებას. თაშ ნამდა, ბაღანეფ შილებე ორთუდან კომენტარეფს, შეთავაზებეფს დო დავალებეფს მშობლეფიშ ნინაშა, მარა თენა გურშე ვემიშას.

¹² ბაღანეფწკუმა ნინაშ გარდა რელიგიას დო კულტურას ხოლო უღუ გავლენა. თეცალ სიტუაციას რდუ ჯოშუა, ნამუთ ჟიშე მიფშინეთ. თიშ უნჩაშ და ესთერ იჩიებ: „ახალგაზრდეფშო მშობლეფიშ ნინა, კულტურა დო რელიგია ართიანს რე მეზელი“. სქუალეფი დუც ვათვალნა მშობლეფიშ კულტურაშ ნაწილო-და, შილებე ვარია ქოთქუან თინეფიშ რწმენაშე დო ნინაშ გურაფაშე. მუშ კეთება შეულებნა მშობლეფს?

13, 14. ა) მუშენ გინორთ ართ ოჯახიქ ადგილობრივ ნინაშა იტარებუდუნ ფერ კრებაშა? ბ) მუქ მეხვარ მშობლეფს, სულიერო მანგარო ქუდოსქიდესკო?

¹³ ქრისტიან მშობლეფქ მუნეფიშ მოთხოვნეფიშ წოხოლე სქუალეფიშ სულიერ ჯგირობუა ოკო გიორინუან (1 კორ. 10:24). ჯოშუა დო ესთერიშ მუმა, სამუელ იჩიებ: „მა დო ჩქიმ მეუღლე ვოკვირუდით სქუალეფს, ნამდა ქომძირდესკო, ნამ ნინაშა აჸიდეს ეფი სულიერ წარმატებაშ მეჭირნაფა დო ათეშგურშენ ღორონც სიბრძნეს ფთხულენდით. ლოცვაშ პასუხი ვარდ მოხუჯურ ჩქინო, მუჭოთ მშობლეფშო. ქობძირით, ნამდა ბაღანეფ ჩქინ ნინაშა კრებაშ შეხვალამეფშე ჭიჭე სირგებელს ღებულენდეს.  ათეშგურშენ გეგნოპჭყვიდით, სოდეთ ვორდითინ თი ნინაშა იტარებუდუნ ფერ კრებაშა გინულა. ჩქინ ოჯახი კრებაშ შეხვალამეფშა ირო ართო გილეშ დო მონაწილებას ხოლო ბღებულენდით მსახურებას. ჩქი თაქიან და დო ჯიმალეფს ჸუდეშა ვაპეჯენდით დო დროს ართო ვატარენდით. თე ირფელ ოხვარუდ ბაღანეფს დეახლოვესკო ჯიმალეფს დო იეჰოვა თინეფშო ხვალე ღორონთ ვარინ, მუმა დო მეგობარ ხოლო ჸოფედკო. ფიფქრენდით, ნამდა თე ირფელ უმოს მნიშვნელოვან რდუ, ვინემ თინეფშა ჩქინ ნინაშ ჯგირო დოგურაფა“.

¹⁴ სამუელ აგრძელენს: „სულიერო მანგარო ქუდოფსკიდითკონ თიშენ, მა დო ჩქიმ მეუღლე კრებაშ შეხვალამეფს ჩქინ ნინაშა ხოლო ვოსწრუდით. ბრელ საქმე მიღდეს დო ფშურდუდით, მარა მარდულ ვორეთ იეჰოვაშ, ნამდა აკურთხ ჩქინ მონდომა დო ხანდა. ამდღა სუმხოლო სქუა იეჰოვას სრულ დროთ ომსახურ“.

15. მუშენ გინოჭყვიდ ართ დაქ, სახელო კრისტინაქ, ნამდა თი კრებაშა გეგნურთუმუდკო, ნამუთ თექიან ნინაშა იტარებუდ?

¹⁵ ახალგაზრდეფქ შილებე უჯგუშო ემსახურან იეჰოვას თი კრებას, ნამუთ მუნეფს ჯგირო არჩქილენან ფერ ნინაშა იტარებ. თაშ ქორენ-და, მშობლეფქ ვეფიქრან ოკო, ნამდა სქუალეფს ვა უჸორა თინეფი. კრისტინა იშინანს: „მშობლეფიშ ნინა ჭიჭეთ მარჩქილედ, მარა კრებაშ შეხვალამეფს ვოსწრუდინ მუთუნს ვა ბგებულენდ. 12 წანერ ვორდინ თეშ დევესწრ კონგრესის, ნამუთ სკოლას ბგურაფლენდინ თი ნინაშა იტარებუდ. ცხოვრებას პირველო ქიმეფხვად, ნამდა მუდგას იფრჩქილედინ თინა ჭეშმარიტება რდუ! შხვა მნიშვნელოვან მომენტიქ თიმწკუმა დოდირთ, მუჟამსით თე ნინაშა დიბჭყ ლოცვა. ასე უკვე იეჰოვას, მუთ გურს მიღუდუნ თის ვურაგადუდი!“ (საქ. 2:11, 41). მუჟამსით სრულწლოვანო გინირთუნ, კრისტინაქ თეშ გურშენ მშობლეფს ქუდურაგადუ დო გეგნოჭყვიდ, ნამდა თექიან ნინაშა იტარებუდუნ ფერ კრებაშა გეგნორთკონ. თინა იშინანს: „მუჟამსით იეჰოვაშ გურშენ სკოლას ნაგურეფ ნინაშა ბგებულენდინ, თექ ჩქიმწკუმა მანგარო იმოქმედ“. თეშ უკულ, კრისტინაქ ხეთეშე პიონერო ქიდიჭყ მსახურება.

16. მუშენ გიმოხანტუნს ართ და, სახელო ნადია, მშობლეფიშ მარდულობას?

¹⁶ ახალგაზრდეფ, თქვა ხოლო გისხუნუნანო, ნამდა თი კრებაშა გეგნორთათ, ნამუთ სოდეთ ცხოვრენთინ თი ნინაშა იტარებ? თაშ ქორენ-და, ქოკითხით თქვან დუც, მუშენ გოკონა გინულა. დუგაახლოვენანო იეჰოვაწკუმა შხვა კრებაშა გინულა? (იაკ. 4:8). თიშენ ხომ ვაისხუნუნა თაშ, ნამდა მშობლეფ ვა გაკონტროლენდან ვარდა ნაკლებ საქმე აკეთათ? ნადია, ნამუთ ასე ბეთელს მსახურენსინ, იჩიებ: „მუჟამსით მა დო ჩქიმ და დო ჯიმალეფქ ჭიჭე გემწიბრდითინ, თი კრებაშა მოკოდეს გინულა, ნამუთ სოდეთ ფცხოვრენდითინ თი ნინაშა იტარებუდ“. მარა თიშ მშობლეფს უჩქუდეს, მუჭო თენა ბაღანეფიშ სულიერ წიმი ულაშო ჯგირ ვეჸიდ. ნადია აგრძელენს: „ასე მარდულეფ ვორეთ მშობლეფიშ, მუნეფიშ ნინა დუმოგურეს დო თინეფიშ ნინაშა ვოსწრუდით კრებაშ შეხვალამეფსინ თიშენ. თექ გასქვამ ჩქინ ცხოვრება დო უმოს მეტ საშვალება ქომჩეს, შხვეფს ხოლო ქიმვეხვარითკო იეჰოვაშ გაჩინებაფას“.

17. ა) მის დავალ იეჰოვაქ ბაღანეფიშ რდუალა? ბ) მუჭო შეულებნა მშობლეფს ბაღანეფიშ რდუალას შხვეფ ქიმიხვარუან?

¹⁷ იეჰოვაქ სქუალეფიშ ჭეშმარიტებას რდუალა მშობლეფს დავალ, დო ვართ ხოლო ბაბუ დო ბების ვარდა შხვა მითინს (წეკითხით იგავები 1:8; 31:10, 27, 28). თი მშობლეფს, მიდგას თექიან ნინა ვა უჩქუნ ბაღანეფიშ გურს ქინანჭანინ თიშ გურშენ შილებე მოხვარაქ დესაჭირან. თენა შუროთ ვა ნიშნენს, ნამდა მშობლეფ მუნეფიშ პასუხიშმგებლობაშე  ვარიას იჩიებნა. თეშნერ საქციელ ართ-ართ საშვალება რე, მშობლეფქ „იეჰოვაშ მოსაწონო მორდან დო გიოწურუან“ სქუალეფი (ეფეს. 6:4). მაგალთო, თინეფქ შილებე ქელაკითხუან კრებაშ უხუცესეფს, მუჭო ჩატარან ოჯახურ თაყვანიშცემა დო ქიმეხვარან სქუალეფშო ჯგირ მეგობრეფიშ გორუას.

18, 19. ა) მუჭო შეულებნა სულიერო მოწიფულ და დო ჯიმალეფს ახალგაზრდეფიშ მოხვარა? ბ) მუჭო ოკო მიქცუან მშობლეფქ?

¹⁸ კანკალეშა მშობლეფქ შილებე ოჯახურ თაყვანიშცემაშა შხვა ოჯახეფ დაპეჯან. თეს გეძინელ, ახალგაზრდეფქ სულიერო მოწიფულ ქრისტიანეფშე ბრელ მუთუნ დიგურეს, მუჟამსით თინეფწკუმა ართო მსახურენდეს ვარდა შხვა საქმეეფს ორთუდეს (იგავ. 27:17). შანი, ნამუთ ადრე მიფშინეთ, იჩიებ: „ჯგირო ფშუ თი ჯიმალეფ, ნამუთ მუმაცალო მოქცუდეს. ირო ბრელს ბგურაფლენდ, მუჟამსით თინეფ კრებაშ დავალებეფიშ მომზადებას მოხვარდეს დო თინეფწკუმა ართო დროშ ტარება მოხიოლუდ“.

¹⁹ მუშო ოკო რაგად, თი და დო ჯიმალეფ, მით ბაღანეფს ოხვარნან, თინეფს ირიათო მუნეფიშ მშობლეფიშ პატიცემას ოკო ოგურუანდან. თეწკუმა ართო მუნეფ ხოლო მშობლეფიშ გურშენ ირო ჯგირს ოკო ურაგადუდან დო მუნეფიშ დუც ბრელიშ უფლება ვემეჩან. თეს გეძინელ, თინეფქ დუდ ოკო ეუჩილითუან თიშნერ მუდგარენს, ნამუთ შილებე მითინქ სწორაშე ვე გეგას კრებაშ დინახლე ვარდა გალე დო მორალურო გლახა საქციელო მირჩქინას (1 პეტ. 2:12). მართალ რე, მშობლეფქ შილებე შხვეფს ქოთხუან მოხვარა, მარა საბოლათ ბაღანეფიშ რდუალა იშენით თინეფიშ მოვალეობა რე. მშობლეფქ მუნეფიშ ბაღანეფს ოკო ოგურუან დო დეკვირან, მუჭო ელურენა თინეფიშ ბაღანეფს შხვა და დო ჯიმალეფი.

20. მუჭო შეულებნა მშობლეფს მეხვარან მუნეფიშ ბაღანეფს, ემსახურან იეჰოვას?

²⁰ მშობლეფი, ლოცვას ქოთხით იეჰოვას მოხვარა დო მუთ შეილებნა ირფელ გაკეთით (წეკითხით 2 მატიანე 15:7). სქუალეფიშ იეჰოვაწკუმა ურთიერთობა თქვან ინტერესეფიშ წოხოლე ქიგიორინეთ. ჯგირო დერწმუნით თიშა, ნამდა ღორონთიშ სიტყვა თქვან სქუაშ გურს ოხუ. ირიათო რჯერდან, ნამდა დრო ქუმურს დო შილებე თქვან სქუაქ იეჰოვაშ მსახურქ ქიჸუას. მუჟამსით თქვან ბაღანეფ ღორონთიშ სიტყვას დო თქვან ჯგირ მაგალითის მეჸუნან, მოციქულ იოანეცალო, ნამუსით სულიერ სქუალეფ ჸუნდუნ, თქვა ხოლო შილებე ქოთქუათ: „მარდულობაშ დიდ მიზეზ მიღუ თიშენ, ნამდა ჩქიმ სქუალეფ ჭეშმარიტებას გილულა“ (3 იოან. 4).