1, 2. (a) Mataio 24:12 ai, Iesu be daidia ia herevalaia? (b) Kara bukana ese Keristani taudia ginigunadia be edena bamona ia herevalaia? (Laulau ginigunana herevalaia.)

IESU ese “inai nega oromana ena dokona ena toana” ta ia gwauraia, unai be “taunimanima momo edia lalokau be do ia keru.” (Mat. 24:3, 12) Aposetolo edia negai, Iuda taudia idia gwau idia be Dirava ena taunimanima, to edia lalokau Dirava dekenai ia keru.

² To unai nega ai, Keristani taudia momo be idia gaukara goada “Keriso, Iesu unai, ena sivarai namona idia hadibaia bona harorolaia” totona, bona Dirava, edia Keristani tadikaka taihu, bona abidadama lasi taudia dekenai lalokau idia hahedinaraia.(Kara 2:44-47; 5:42) To Iesu murinai idia raka taudia haida edia lalokau ia keru danu.

3. Dahaka dainai Keristani taudia haida edia lalokau ia keru?

³ Iesu Keriso ese Efeso ai idia noho Keristani taudia ia hereva henia, ia gwau: “Oi dekenai, lau be mai egu hereva inai gauna dekenai, oi ese guna oi abia lalokauna oi rakatania vadaeni.” (Apok. 2:4) Dahaka dainai unai ia vara? Unai hahediba taudia ginigunadia edia nega ai, taunimanima be tauanina gaudia sibona idia laloa, bona  reana unai ese edia lalona ia veria. (Efe. 2:2, 3) Hari idia noho siti momo bamona, Efeso taoni be kara dika idauidau amo ia honu. Ia be taga bada taoni dainai, taunimanima be kohu momo idia tahua, moale kara idauidau idia karaia, bona mauri namona idia noholaia. Idia be sibodia edia ura idia laloa bada dainai, lalokau idia hahedinaraia lasi. Ma danu, gwau-edeede hemarai karadia bona matabodaga karadia be bada herea.

4. (a) Iseda nega ai, edena dala ai lalokau be ia keru? (b) Inai stadi ai dahaka do ita herevalaia?

⁴ Iesu ena peroveta herevana lalokau do ia keru karana dekenai be iseda nega ai ia vara diba danu. Hari inai negai, taunimanima edia lalokau Dirava dekenai be ia keru ia lao. Taunimanima milioni momo be ia idia laloa lasi bona taunimanima edia orea amo heduru idia tahua, edia hekwakwanai idia haorea totona. Momokani, Iehova Dirava idia tomadiho henia lasi taudia momo edia lalokau be ia keru ia lao noho.Aposetolo edia negai ia noho Efeso kongrigeisen bamona, hari idia noho Keristani taudia edia lalokau ia keru ia lao diba, bema idia naria namonamo lasi. Inai stadi ai, inai kahana toi dekenai iseda lalokau do idia tohoa gaudia do ita herevalaia: (1) Iehova lalokau henia karana, (2) Baibel ena hereva momokani ura henia karana, (3) bona iseda tadikaka taihu lalokau henia karana.

5. Dahaka dainai Dirava ita lalokau henia be namo?

⁵ Iesu ese lalokau do ia keru karana ia herevalaia murinai, inai mai anina bada lalokauna ia gwauraia. Ia gwau: “‘Namona be Iehova emu Dirava oi lalokau henia mai emu kudouna ibounai, mai emu mauri ibounai, bona mai emu darana ibounai ida.’ Unai taravatu be hereadae bona ia be ginigunana.”(Mat. 22:37, 38) Momokani, Dirava lalokau henia karana ese ita do ia durua, iena hahegani ita badinaia, ita haheauka, bona kara dika ita inai henia totona. (Salamo 97:10 duahia.) To, Satani bona ena tanobada idia ura bada iseda lalokau Dirava dekenai idia hakerua.

6. Dirava lalokau henia karana ia keru dainai, dahaka ia vara?

⁶ Tanobada taudia edia lalohadai lalokau dekenai be idau. Idia ese edia Havaraia Tauna idia lalokau henia lasi, to “sibodia . . . idia laloa bada.” (2 Tim. 3:2) Inai tanobada be Satani ese ia lohiaia dainai, “tauanina ena ura, matana ese idia ura henia gaudia bona ta ese ena kohu ia heagilaia karana” be bada. (1 Ioa. 2:16) Aposetolo Paulo ese Keristani taudia ia hadibaia tauanina ena ura gaudia do idia laloa bada lasi, ia gwau: “Tauanina ena ura gaudia laloa karana ese mase ia mailaia, . . . badina tauanina ena ura gaudia laloa noho karana ese ta be Dirava ena inai tauna ai ia halaoa.” (Roma 8:6, 7) Oibe, edia mauri lalonai tauanina gaudia sibona idia tahua o mahuta hebou urana idia ura hagugurua taudia be gabeai idia lalohisihisi bada.​—1 Kor. 6:18; 1 Tim. 6:9, 10.

7. Keriso murinai idia raka taudia dekenai dahaka ia vara diba?

⁷ Tano haida ai, Dirava be lasi lalohadaina bona evolusen idia abia dae taudia ese edia hahediba herevadia amo taunimanima edia lalokau bona abidadama Dirava dekenai idia hadikaia.Idia gwau bema ta ia abia dae Havaraia Tauna ia noho, ia be kavakava.Ma danu, taunimanima idia hagoadaia saiens taudia edia hereva idia abia dae totona, unai amo idia hahedinaraia idia be iseda Havaraia Tauna idia laloa bada lasi. (Roma 1:25) Bema unai bamona hahediba herevadia ita abia dae, Iehova amo ita hure oho diba, bona iseda lalokau ia dekenai be do ia keru.​—Heb. 3:12.

8. (a) Iehova ena taunimanima momo be dahaka hekwakwanai idia davaria? (b) Salamo 136 ese edena dala ai ita ia hagoadaia?

⁸ Lalomanoka ese iseda abidadama ia hamanokaia diba bona iseda lalokau Dirava dekenai be do ia keru. Inai tanobada dikana be Satani ese ia  biagua dainai, ita ibounai be nega ta ta ai ita lalomanoka. (1 Ioa. 5:19) Reana hekwakwanai haida ita davaria, badina ita buruka, tauanina be ia goada lasi, eiava moni be bada lasi. Eiava ita mamia ita be hegeregere lasi gau haida ita karaia totona, iseda ura gaudia haida idia guguru lasi, eiava kerere ta dainai ita lalomanoka. To, namo lasi unai bamona hemami ita abia dainai, ita laloa Iehova be ita ia rakatania vadaeni. To, gau badana be Iehova ese ita dekenai ia hahedinaraia noho hanaihanai lalokauna ita laloa dobu. Hegeregere, Salamo 136:23 ia gwau: “Lohiabada ese ita ia laloaboio lasi. Iena lalokau bona bogahisihisi do idia noho hanaihanai.” Oibe, Iehova ese ena noho hanaihanai lalokauna be nega ibounai iena hesiai taudia dekenai ia hahedinaraia. Unai dainai ita abia dae momokani, heduru totona ia ita noia neganai, do ia kamonai bona haere.​—Sal. 116:1; 136:24-26.

9. Dahaka ese Paulo ia durua dainai, iena lalokau Dirava dekenai be ia goada?

⁹ Salamo torea tauna hegeregerena, Paulo be Iehova ena heduru ia laloa dainai goada ia abia. Paulo ia gwau: “Iehova be egu durua tauna, lau be do lau gari lasi. Taunimanima be lau dekenai dahaka idia karaia diba?” (Heb. 13:6) Paulo ia abia dae momokani Iehova ese ia do ia durua ena mauri ai ia davaria hekwakwanai ia haheaukalaidia totona. Ia davaria hekwakwanai dainai ia lalomanoka lasi. Bona dibura ruma ai ia noho neganai, hagoadaia revareva momo ia torea. (Efe. 4:1; Fili. 1:7; File. 1) Oibe, ia hesiku momokani negadiai danu, Dirava ia lalokau henia noho. Ia ese goada be edeseni amo ia abia? Ia be hanaihanai, “iseda hisihisi ibounai lalonai ia ese ita dekenai lalogoada ia henia noho” Diravana dekenai ia tabekau. (2 Kor. 1:3, 4) Edena dala ai Paulo ena haheitalai do ita tohotohoa bona iseda lalokau Iehova dekenai be do ia goada noho?

10. Edena dala ai iseda lalokau Iehova dekenai do ita hagoadaia?

¹⁰ Iseda lalokau Iehova dekenai ita hagoadaia dalana ta be Paulo ese ia hahedinaraia, ia gwau: “Nega ibounai do umui guriguri.” Ma ia gwau: “Guriguri umui hadokoa lasi.” (1 Tes. 5:17; Roma 12:12) Iseda hetura karana Dirava ida ia goada totona, namona be hanaihanai guriguri amo ia ida ita herevahereva. (Sal. 86:3) Iehova dekenai iseda lalohadai korikoridia ita herevalaia neganai, ita be iseda guba Tamana, guriguri ia kamonai henia Diravana, kahirakahira do ita lao. (Sal. 65:2) Ma danu, bema ita abia dae momokani Iehova be iseda guriguri do ia haere henia, iseda lalokau ia dekenai be do ia goada. Do ita abia dae Iehova “be ia dekenai idia boiboi taudia dekenai ia noho.” (Sal. 145:18) Momokani, bema ita abia dae Iehova be ita do ia durua, iseda abidadama idia tohoa gaudia do ita haheaukalaia diba.

11, 12. Edena dala ai Baibel ena hereva momokani ita ura henia diba?

¹¹ Ita be Keristani taudia dainai, hereva momokani ita laloa bada. Oibe, Dirava ena Hereva be hereva momokani ena badina. Iesu ese ena Tamana ia guriguri henia, ia gwau: “Oiemu hereva be momokani.” (Ioa. 17:17) Unai dainai, hereva momokani ita ura henia totona, namona be Dirava ena Hereva dekenai diba maoromaoro ita abia guna. (Kol. 1:10) To, diba maoromaoro sibona ita abia be hegeregere lasi. Baibel ena hereva momokani ita ura henia ena badina be Salamo 119 ia torea tauna ese ia hahedinaraia. (Salamo 119:97-100 duahia.) Dina ibounai lalonai, nega ita atoa Baibel siri ta ita laloa dobu totona, a? Iseda mauri lalonai unai siri ita badinaia dalana ita laloa dobu neganai, iseda ura Baibel ena hereva momokani dekenai be do ia bada.

 ¹² Salamo torea tauna ma ia gwau: “Lauegu uduna dekenai hani ena mamina be namo momokani, to Dirava e, oiemu hereva ena mamina ese hani ena mamina ia hereaia noho.” (Sal. 119:103) Unai hegeregerena, Dirava ena orea amo ita abia hagoadaia hereva namodia ita moalelaia diba. Laulau dalanai ia be iseda uduna dekenai do ia noho, unai amo Baibel ena “hagoadaia herevadia” do ita laloatao, bona ita gaukaralaia diba ma haida ita durua totona.​—Had. 12:10.

13. Dahaka ese Ieremia ia durua Toretore Helagadia ia ura henia bada totona, bona dahaka hahenamo ia abia?

¹³ Peroveta tauna Ieremia be Toretore Helagadia ia ura henia bada. Dirava ena hereva ese iena kudouna ia hamarerea dalana mani ita laloa. Ia gwau: “Oi ese oiemu hereva lau dekenai oi henia, bona lau abia dae, aniani lau abia dae bamona. Bona inai oiemu hereva ese lau ia hamoalea momokani, badina be, Lohiabada, Siahu Ibounai Diravana, lau be oiemu.” (Ier. 15:16) Ieremia ese Dirava ena hereva ia laloa dobu, ia ese aniani ia ania hegeregerena. Bona ia moale, badina ia be Dirava ena ladana ia gaukaralaia.Ita be Baibel ena hereva momokani ita ura henia bada dainai, ita danu ita moale, badina Dirava ena ladana ita abia bona inai nega dokona ai iena Basileia ita harorolaia diba.

14. Iseda ura Baibel ena hereva momokani dekenai be edena bamona do ita habadaia?

¹⁴ Baibel bona Baibel pablikeisen ita duahia sibona be hegeregere lasi, to edena dala ma haida ai Baibel ena hereva momokani ita ura henia diba? Iseda ura Baibel ena hereva momokani dekenai ita habadaia diba, bema kongrigeisen ena hebou ibounai dekenai ita lao. Wiki ta ta ai, ita be Gima Kohorona stadi amo Baibel ita stadilaia. Iehova ese unai mai anina bada dalana amo ita ia hadibaia. Unai dainai do ita stadilaia kahana ita lalopararalaia namonamo totona, namona be Gima Kohorona Stadi ta ta totona ita hegaegae namonamo. Unai ita karaia diba dalana ta be idia gwauraia siri ibounai ita duahia. Hari inai negai,Gima Kohorona be jw.org websait amo ita daonloud eiava JW Laiberi amo ita duahia diba. Unai dala amo stadi ta ta ai idia gwauraia siridia do ita duahia haraga. To herevana edena dala ita gaukaralaia, idia gwauraia siridia ita duahia  namonamo bona laloa dobu neganai, iseda ura Baibel ena hereva momokani dekenai do ia bada.​—Salamo 1:2 duahia.

15, 16. (a) Ioane 13:34, 35 hegeregerena, iseda maduna be dahaka? (b) Dahaka dainai iseda tadikaka taihu bona Dirava ita lalokau henia bona danu Baibel ita ura henia be namo?

¹⁵ Iesu ena hanuaboi ginigabena ai, iena hahediba taudia ia hamaoroa, ia gwau: “Umui dekenai taravatu matamata lau henia inai, do umui lalokau heheni, lau ese umui lau lalokau henia hegeregerena, umui danu do umui lalokau heheni. Unai amo taunimanima ibounai do idia diba umui be egu hahediba taudia, bema umui huanai lalokau ia noho.”​—Ioa. 13:34, 35.

¹⁶ Iseda tadikaka taihu ita lalokau henia neganai, ita hahedinaraia ita be Iehova ita lalokau henia. Oibe, Dirava bona iseda tadikaka taihu ita lalokau henia be namo. Badina aposetolo Ioane ia gwau: “Bema ta ese ena tadikaka, ia itaia diba tauna unai, ia lalokau henia lasi, vadaeni ia itaia lasi Diravana ia lalokau henia diba lasi.” (1 Ioa. 4:20) Ma danu, Iehova bona iseda tadikaka taihu ita lalokau henia, badina ita be Baibel ita ura henia bada. Dahaka dainai? Ita ese Baibel ena hereva momokani ita ura henia bada dainai, mai kudouna ibounai ida Baibel ena hahegani ita badinaia, bona Dirava bona iseda tadikaka taihu ita lalokau henia.​—1 Pet. 1:22; 1 Ioa. 4:21.

17. Edena dala ma haida ai lalokau ita hahedinaraia diba?

¹⁷ Tesalonika Ginigunana 4:9, 10 duahia. Edena dala ma haida ai iseda kongrigeisen lalonai lalokau ita hahedinaraia diba? Reana tadikaka o taihu buruka ta be Keristani heboudia dekenai ia ura lao bona heduru ia noia. Eiava vabu ta be ena ruma ena guhi ia ura hanamoa bona heduru ia noia. (Iam. 1:27) Herevana matamata o buruka, tadikaka taihu haida be idia lalomanoka eiava hahetoho haida idia mamia, unai bamona taudia ita hagoadaia bona durua be namo. (Aon. 12:25; Kol. 4:11) Bema iseda kara bona hereva amo ita hahedinaraia “iseda abidadama tamona tadikaka bona taihu” ita lalodia bada, ita hamomokania ita be idia ita lalokau henia.​—Gal. 6:10.

18. Dahaka ese ita do ia durua hekwakwanai ita hamaoromaoroa totona?

¹⁸ Baibel ia peroveta inai nega oromana ena “dina gabediai,” taunimanima be sibodia do idia laloa bada bona do idia mataganigani. (2 Tim. 3:1, 2) Ita be Keristani taudia dainai, do ita gaukara goada Dirava ita lalokau henia, Baibel ena hereva momokani ita ura henia, bona ta ta ita lalokau henia totona. Momokani, nega haida iseda tadikaka taihu huanai hekwakwanai idia vara. To, mai lalokau ida unai hekwakwanai ita hamaoromaoroa neganai, kongrigeisen taudia ibounai be do idia moale! (Efe. 4:32; Kol. 3:14) Unai dainai namo lasi gau ta ese iseda lalokau ia hakerua! To, namona be Iehova ita lalokau henia, iena Hereva ita ura henia, bona iseda tadikaka taihu ita lalokau henia.