1, 2. (a) Uzye amazwi yakwe Yesu aaya pali Mateo 24:12 yalandanga pali yaweni? (b) Uzye ibuku lya Milimo likalanga uli ukuti Aina Klistu yakutandikilako aingi yatwalilile ukulanga ukutemwa? (Lolini cikope cakutandikilako.)

ICINTU conga cino Yesu walanzile icakumanyilako “mpelelekezyo ya nsi” i cakuti ‘kutemwa mu antu aingi kwali nu kucepa.’ (Mate. 24:3, 12) Umu nsita ya atumwa, Ayuda ayuvwanga ukuti yaali antu yakwe Leza, yatiile ukutemwa sana Leza.

² Lelo, Aina Klistu aingi pa nsita iiya yatwalilile ukuombesya umu mulimo wa “kukosola ilandwe lisuma ilyakuti Yesu ali Katuula” nupya yatwalilile ukutemwa Leza, Aina Klistu yauze, alino na antu ataali ya kapepa. (Mili. 2:44-47; 5:42) Nanti cali vivyo, yamwi pa yalondezi yakwe Yesu umu nsita ya atumwa yalesile ukuti ukutemwa kwao kucepe.

3. I vyani limwi ivyalenzile ukuti ukutemwa kwa Aina Klistu yamwi kucepe?

³ Yesu Klistu uwatutulwike, wanenyile Aina Klistu akutandikilako aikalanga umu Efeso ukuti: “Lelo nkuilizyanya pali cii, cakuti utantemwa ndi vino wantemilwe inkolelo.” (Umbw. 2:4) U mulandu ci onga uwalenzile ciye vivyo? Aina  Klistu kwene yaa akutandikilako yakonkelezyanga vino antu aali na mano amu nsi yacitanga. (Efes. 2:2, 3) Wakwe vino caya uku misumba iingi ndakai, umu Efeso namo mwali ivintu ivipe ivyacitikanga. Umu musumba uu mwali sana antu acuma atemilwe ukwizya nu umi wa kuilyokezya. Ukutemwa ivintu vya kuizanzya kwalenzile antu yataya sana nu kutemwa. Nupya mwali sana imiyele ipisye.

4. (a) U munzila ci muno ukutemwa kwacepa ndakai? (b) Uzye ukutemwa kwitu kungeziwa umu nzila ci zitatu?

⁴ Usoowelo wakwe Yesu uwakuti ukutemwa kwali nu kucepa ukalozya nu ku nsita itu. Antu ndakai yata ukutemwa Leza. Aingi yamusenuka nupya yakalenga uwazwilizyo uku tuungwe utwapangwa na antu. Fwandi antu aingi asipepa Yeova, yatamutemwa sana. Nomba, wakwe vino cali umu cilongano ca Ina Klistu aikalanga umu Efeso, Aina Klistu ya cumi ndakai nayo yangatandika ukuilekelezya nu kuleka ukutemwa kwao ukucepa. Lyene tumasambilila pa vintu vitatu muno ukutemwa kwitu kungeziwa: (1) Ukutemwa Yeova, (2) ukutemwa icumi icaya muli Baibo, (3) nu kutemwa ina itu.

5. U mulandu ci uno tulinzile ukutemelwa Leza?

⁵ Pa wanda uli umwi kwene lino Yesu atatala walanda pa kuta ukulanga ukutemwa, walanzile pa kutemwa ukwacindama sana. Watiile: “‘Uwatemwa Mwene Leza wako nu mwenzo wako onsi, nu umi wako onsi, na mano yako yonsi.’ Lii lili sunde likulu nupya ilyacindama kuluta Masunde onsi.” (Mate. 22:37, 38) I cumicumi ukutemwa sana Yeova kukatwazwa ukuvwila amasunde yakwe, ukuzizimizya, alino nu kupata ivipe. (Welengini Masamu 97:10.) Lelo, Satana na antu aaya muno nsi yakaezya na maka ukuti yatulenge tute ukutemwa Leza.

6. I vyani ivyacitika pa mulandu wakuti antu yata ukutemwa sana Leza?

⁶ Antu aaya muno nsi yakaelenganya ivipusaneko pali vino ukutemwa kwaya. Ukucila ukutemwa Kaumba, antu ‘yaitemwa.’ (2 Tim. 3:2) Antu aaya umu nsi ii ikateekwa na Ciwa yatemwa “vilondwa viipe vino mili ikalonda, ni vintu vya lunkumbwa lwa manso nu kuitumika ku vyamu nsi.” (1 Yoa. 2:16) Mutumwa Paulo wacelwile Aina Klistu yauze pa vintu ivikazanzya umwili ati: “Kutungululwa ni vilondwa vya mwili u kuiletela imfwa . . . pano umuntu akaya umwanisi wakwe Leza ndi akutungululwa ni vilondwa vya mwili wakwe.” (Loma 8:6, 7) I cumicumi, yaayo akasumba sana amano uku kulonda ivyuma nanti ukucita upulumusi yakailetelela sile aineco.—1 Kol. 6:18; 1 Tim. 6:9, 10.

7. Uzye intazi ci zino alondezi yakwe Klistu yakwata ndakai?

⁷ Umu mpanga zimwi, antu aakati kutaya Leza, aakatwisika ndi cakuti Leza akuno waya, na yaayo aazumila ukuti ivintu vyasangwike sile, yakalanda amazwi aangalenga umuntu ukuta ukutemwa Leza nu kuta ukumutaila. Yakalenga caloleka kwati umuntu ndi wazumila ukuti kwaya Kaumba ala atakwata amano nanti atasambilila. Pa nsita iliyonga kwene, antu yakacindika sana antu asambilila vyakwe sayansi, cii naco cikalenga antu yate ukusumba amano kuli Kaumba. (Loma 1:25) Ndi cakuti tukusumba amano uku visambilizyo vya musango uu, tungataluka kuli Yeova, nupya tungata ukumutemwa sana.—Ayeb. 3:12.

8. (a) I vyani vimwi ivikacitikila aomvi yakwe Yeova ivingayatoovola? (b) A mazwi ci akuteekezya yano tukawelenga muli Masamu 136?

⁸ Ndi cakuti twaleka ukuti yamwi yatutoovole, utailo witu ungatonta nupya tungata ukutemwa sana Leza. Umu nsi ii ino ikatungululwa  na Satana, swensi kwene insita zimwi kungaya ivingalenga tutoovoke. (1 Yoa. 5:19) Limwi tungaya ni ntazi izikaiza umu ukote, ukulwalilila, nanti ukuulizya impiya. Nanti limwi tungaacula na melenganyo pa mulandu wakwelenganya ukuti tutafikapo ukuomba imilimo imwi, limwi ivintu vingacitika ukupusanako na vino twenekelanga, nanti limwi tungafilwa ukutwalilila ukuya acumi. Nomba, tutalinzile ukuleka ivintu vya musango uu ukutulenga ukwelenganya ukuti Yeova watatutazyela. Lelo, tulinzile ukwelenganya sana pa mazwi ya kututeekezya akalanda pali vino Yeova watutemwa. Tukazana mazwi yaayo pali Masamu 136:23, apakati: “Watwiwisye lino twazanzilwe, pano luse lwakwe ulwa pe na pe.” I cumicumi Yeova watemwa sana aomvi yakwe. Fwandi, tutalinzile ukutwisika ukuti akauvwa ‘ukupapata’ kwitu nu kutwasuka.—Masa. 116:1; 136:24-26.

9. I vyani ivyazwilizye sana Paulo ukutwalilila ukutemwa sana Leza?

⁹ Wakwe kalemba wa Masamu, Paulo wakomelekanga ndi welenganya pali vino Yeova wamwazwanga. Paulo walemvile ukuti: “Mwene [Yeova] ali kazwa wane, ntaloopa cimwi. Uzye i cani cino umuntu angancita?” (Ayeb. 13:6) Ukutaila sana ukuti Yeova akasakamala kwazwilizye Paulo ukwezya na maka ukulwisya intazi. Ataalesile ukuti ivipe ivya mucitikilanga vimutoovole. Nupya lino Paulo wali umu cifungo, walemvile amakalata aingi akukomelezya. (Efes. 4:1; Filipi 1:7; Filim. 1) Nanti lino Paulo watonta sana, watwalililanga ukutemwa Leza. I vyani ivyamwazwilizye ukutwalilila ukucita vivyo? Watwalilile ukutaila sana ‘Leza intulo ya kutekeziwa konsi.’ (2 Kol. 1:3, 4) Tungakolanya uli Paulo nu kutwalilila ukutemwa sana Yeova?

10. Uzye tungacita uli pakuti tutwalilile ukutemwa sana Yeova?

¹⁰ Paulo walumbwile inzila yonga icindame sana ingatwazwa ukutwalilila ukutemwa sana Yeova. Walembiile ya kapepa yauze ukuti: “Pepini nsita zyonsi.” Lino papisile insita, nupya kwene wizile alemba ukuti: ‘Mwapepa nsita zyonsi.’ (1 Tesa. 5:17; Loma 12:12) Ukupepa kuli Yeova u kukalenga ukuti aye sana cuza witu. (Masa. 86:3) Ndi cakuti tukupepa sana kuli Yeova nu kumunena ivili uku mwenzo na vino tukuyuvwa, tukapalama sana kuli Tata witu, wino “Akauvwa amapepo.” (Masa. 65:2) Nupya ndi twailolela ukuti Yeova akaasuka mapepo itu, tukamutemelwako sana. Cikalenga itwiluka ukuti Yeova “waya umupipi na yonsi akakuuta kunoli.” (Masa. 145:18) Ndi cakuti tukutaila sana ukuti Yeova akatwazwa, tulaazizimizya amezyo na yauze yano tungakwata uku nkoleelo.

11, 12. Uzye tungacita uli pakuti tutemwe sana icumi icaya muli Baibo?

¹¹ Swe Ina Klistu, twatemwa sana icumi. Umwi Zwi Lyakwe Leza u mwaya icumi. Lino Yesu wapepanga kuli Isi, walanzile ati: “Mazwi yako lyonsi acumi.” (Yoa. 17:17) Fwandi, pakuti tutemwe icumi, tulinzile ukutandikilapo ukusambilila Izwi Lyakwe Leza. (Kolo. 1:10) Lelo, i vingi ivikalondekwa ukuluta sile pa kumanya sana ivyeo. Lolini vino kalemba wa Masamu 119 akatwazwa ukumanya upiliulo wa kutemwa icumi icaya muli Baibo. (Welengini Masamu 119:97-100.) Uzye tukapaatula insita umu wanda iyakwelenganyapo sana, nanti ukusumba mano kuli vino Malembelo yakalanda? Tulatemwa sana icumi icaya muli Baibo ndi cakuti tukwelenganya sana pali vino Amalembelo yakatwazwa cila wanda.

 ¹² Kalemba wa Masamu watwalilile ukulanda ati: “Iye mwe vino amasambilizyo yako yalyompa, yene yalyompa ukuluta uci mu mulomo wane!” (Masa. 119:103) Umu nzila iliyonga kwene, vikwene avino tungaipakizya ivya kulya vya unkolanya ivyaya muli Baibo vino iuvi lyakwe Leza likatupekanyizizya. Tungaleka ukuti Izwi Lyakwe Leza likale umu milomo itu iya unkolanya pakuti tungaiusya “amazwi akutekezya” a cumi nu kuyaomvya lino tukwazwa yauze.—Kasa. 12:10.

13. I vyani ivyalenzile Yelemiya ukutemwa icumi icaya umu Malembelo, nupya cii camwazwilizye uli?

¹³ Kasema Yelemiya watemilwe sana icumi icaya umu Malembelo. Lolini vino amazwi yakwe Leza yamwazwilizye. Walanzile ukuti: “Wemo wavwanzile kunondi nga nani intezya amazwi yako yonsi. Nene wakwako, we [Yeova] Leza Wamaka yonsi, na mazwi yako ali luzango ni nsansa zyane.” (Yele. 15:16) Cali kwati Yelemiya waliile amazwi yakwe Leza lino welenganyangapo sana pa mazwi yaayo. Cii calenzile ukuti ataizya sana api syuko lino wapeezilwe ilya kwamilwa api zina lyakwe Leza. Uzye ukutemwa icumi icaya umwi Zwi Lyakwe Leza, kwatuleenga ukumanya isyuko lino twapeelwa ilya kwamilwa api zina lyakwe Leza nu kusimikila apa Wene wakwe umu manda yaa akusyalikizya?

14. Uzye tungacita uli pakuti tutemwe sana icumi icaya muli Baibo?

¹⁴ I cani cuze cino tungacita pakuti tutemwe sana icumi icaya muli Baibo ukuluta pa kuwelenga Baibo ni mpapulo izikalanda pali Baibo? Tungatemwa sana icumi icaya muli Baibo ndi cakuti tukuzanwa lyonsi uku kulongana. Ukusambilila Baibo cila mulungu ukupitila umu kusambilila Lupungu Lwa Mulinzi ali nzila icindame sana ino yakatusambilizizyamo. Pakuti tuvwikisye ivikulandwa, tulinzile ukupekanya ningo isambililo lyonga na lyonga ilya Lupungu. Inzila yonga ino tungacitilamo vivyo u kuwelenga Malembelo yonsi atiyalangililwa umwi sambililo. Ndakai, mungakopa Lupungu Lwa Mulinzi pali webusaiti ya jw.org nanti ukuwelenga sile pa JW Laibulale umu ndi zingi. Inzila zimwi izyakuomvya pa kuwelenga pa JW Laibulale  zikalenga kuti cangupale sana ukuwelenga malembelo aali umu cipande. Nomba asi mulandu ni nzila ino tungaomvya, ukusumbako sana amano lino tukuwelenga malembelo nu kwelenganyapo sana kulalenga tutemwe icumi icaya muli Baibo.—Welengini Masamu 1:2.

15, 16. (a) Ukulingana na Yoane 13:34, 35, i sunde ci lino twapeelwa? (b) Uzye ukutemwa aina kwalemenkana uli nu kutemwa Leza alino na Baibo?

¹⁵ Uwanda wa kusyalikizyako uwakuya pano nsi usiku, Yesu wanenyile alondezi yakwe ukuti: “Ndakai namupeela isunde lipya lyakuti mwatemwana. Ndi vino nani namutemwa, avino namwe mulinzile kutemwana. Ndi mukutemwana lyene antu yonsi yalamanya vino mwemwe alondezi yane.”—Yoa. 13:34, 35.

¹⁶ Ukutemwa aina na ya nkazi kwalemana nu kutemwa Yeova. Nupya tutange tutemwe Yeova ukwaula ukutemwa ina. Umutumwa Yoane watiile: “Pano wene asyatemwa umwina wakwe wino akalola, uzye angatemwa Leza uli wino asilola?” (1 Yoa. 4:20) Nupya ukutemwa Yeova na ina itu kwalemana nu kutemwa Baibo. U mulandu ci uno twalandila vivyo? Pano ndi cakuti twatemwa icumi cino Baibo ikatusambilizya cilalenga ukuti twauvwila masunde aya umu Malembelo akuti mwatemwa Leza na ina nu mwenzo onsi.—1 Pet. 1:22; 1 Yoa. 4:21.

17. A muli vyani vimwi vimwi muno tungalanga ukutemwa?

¹⁷ Welengini 1 Tesalonika 4:9, 10. I vilangililo ci ivingatwazwa ukumanya inzila zino tungaomvya pa kulanga ukutemwa ku yantu ya mu cilongano citu? Mwina nanti nkazi uwa cikalamba angalondekwa uwazwilizyo wa mipitile pa kuya uku kulongana. Limwi mukamfwilwa angalondekwa uwazwilizyo wa kuzifya ing’anda. (Yako. 1:27) Aina na ya nkazi, ance nanti aikolo aati yatoovoka nanti aali nu ulanda nanti yano yali ni ntazi yakalondekwa ukuti tuyazwe, tuyakomelezye nu kuyatekezya. (Mapi. 12:25; Kolo. 4:11) Tukalanga ukuti twatemwa ina muli vino tukalanda na vino tukacita lino twikako sana amano “kuli yao ali alondezi yakwe Klistu.”—Gala. 6:10.

18. I cani icingatwazwa ukuvwana na ina ndi twapusana umu tuntu sile utunono?

¹⁸ Baibo yasoowile ukuti mu “manda akusyalikizya” umu nsi ii ipe antu aingi yalaya na ukaitemwe. (2 Tim. 3:1, 2) Lelo swe Ina Klistu, tulinzile ukuombesya pakuti tutemwe Leza, icumi ca muli Baibo, alino na ina itu. I cacumi insita zimwi tungapusana na ina umu tuntu sile utunono. Lelo ndi cakuti tukwezya na maka ukuwikizyanya na ina na ya nkazi nu kutandika ukuvwana, amu cilongano yonsi yalapaalwa cuze! (Efes. 4:32; Kolo. 3:14) Fwandi tutalinzile ukuleka ukutemwa kwitu ukucepa! Lelo, lekini tutwalilile ukutemwa sana Yeova, Izwi lyakwe, alino na ina itu.