မေတ္တာတရား မခေါင်းပါးပါစေနဲ့
“မတရားမှုတွေ များသည်ထက် များလာတဲ့အတွက် လူအတော်များများဟာ မေတ္တာတရား ခေါင်းပါးလာလိမ့်မယ်။” —မ. ၂၄:၁၂။
၁၊ ၂။ (က) မဿဲ ၂၄:၁၂ မှာပါတဲ့ ယေရှုရဲ့ စကားတွေက ဘယ်သူတွေကို အရင်ဆုံး ရည်ညွှန်းသလဲ။ (ခ) အစောပိုင်း ခရစ်ယာန်အများစုဟာ မေတ္တာ တင်ပြနေကြကြောင်း တမန်တော်ကျမ်းက ဘယ်လို ဖော်ပြသလဲ။ (ဆောင်းပါးအစမှာပါတဲ့ ရုပ်ပုံကို ကြည့်ပါ။)
“လောကစနစ်နိဂုံးပိုင်း” နဲ့ပတ်သက်ပြီး ယေရှု ပြောခဲ့တဲ့ နိမိတ်တစ်ခုကတော့ “လူအတော်များများဟာ မေတ္တာတရား ခေါင်းပါးလာလိမ့်မယ်” ဆိုတဲ့ နိမိတ်ပါပဲ။ (မ. ၂၄:၃၊ ၁၂) ပထမရာစုတုန်းက ဘုရားသခင့်လူမျိုးလို့ ပြောတဲ့ဂျူးတွေဟာ ဘုရားကို ချစ်တဲ့မေတ္တာ ခေါင်းပါးလာကြတယ်။
၂ အဲဒီအချိန်က ခရစ်ယာန်အများစုကတော့ ‘ခရစ်တော်အကြောင်း သတင်းကောင်းကို ဟောပြော’ ခြင်းမှာ အလုပ်များနေကြတယ်။ ဘုရားသခင်၊ ခရစ်ယာန်ချင်း၊ မယုံကြည်သူတွေကို ချစ်ကြောင်း တင်ပြနေကြတယ်။ (တ. ၂:၄၄-၄၇။ ၅:၄၂) ဒါပေမဲ့ ပထမရာစု ယေရှုနောက်လိုက်တချို့ မေတ္တာခေါင်းပါးလာခဲ့ကြတယ်။
၃။ ဘာကြောင့် ခရစ်ယာန်တချို့ မေတ္တာခေါင်းပါးသွားရသလဲ။
၃ ‘ကနဦးမေတ္တာ ပျက်ပြယ်သွားလို့ အပြစ်ဆိုစရာ ရှိတယ်’ ဆိုပြီး ဧဖက်မြို့မှာ နေထိုင်တဲ့ ပထမရာစု ခရစ်ယာန်တွေကို ထမြောက်လာပြီးတဲ့ ယေရှုခရစ် ပြောခဲ့တယ်။ (ဗျာ. ၂:၄) အဲဒီလိုဖြစ်ရတဲ့ အကြောင်းရင်းတစ်ခုက ဘာလဲ။ ခရစ်တော်ရဲ့ အစောပိုင်း တပည့်တွေဟာ လောကစိတ်ဓာတ် လွှမ်းမိုးခံရတာ ဖြစ်နိုင်တယ်။ (ဧ. ၂:၂၊ ၃) အခုခေတ် မြို့ကြီးများစွာလိုပဲ ပထမရာစု ဧဖက်မြို့မှာ မကောင်းမှုတွေ ပြည့်နေတယ်။ ဇိမ်ကျကျ၊ သက်သောင့်သက်သာ၊ အေးအေးဆေးဆေး နေထိုင်တဲ့ ဘဝပုံစံကို အလေးထားတဲ့လူတွေ နေထိုင်ရာ ချမ်းသာကြွယ်ဝတဲ့မြို့ ဖြစ်တယ်။ တစ်ကိုယ်ကောင်းဆန်တဲ့ အပျော်အပါးတွေက ကိုယ်ကျိုးစွန့်မေတ္တာ ပျောက်ဆုံးသွားစေတယ်။ ဒါ့အပြင် မျက်နှာပြောင်တိုက်ခြင်း၊ အကျင့်ပျက်ခြင်းတို့လည်း အပြည့်ပဲ။
၄။ (က) ဒီနေ့ ဘယ်လိုနည်းတွေနဲ့ ချစ်ခြင်းမေတ္တာ ခေါင်းပါးလာသလဲ။ (ခ) ဘယ်ကဏ္ဍသုံးခုမှာ ကျွန်တော်တို့ရဲ့ မေတ္တာ စမ်းသပ်ခံရနိုင်သလဲ။
၄ မေတ္တာ ခေါင်းပါးမယ်ဆိုတဲ့ ယေရှုရဲ့ ပရောဖက်ပြုချက်က ကျွန်တော်တို့ခေတ်နဲ့လည်း သက်ဆိုင်တယ်။ ဒီနေ့ လူတွေ ဘုရားကို ချစ်တဲ့မေတ္တာ ပိုပိုခေါင်းပါးလာနေတယ်။ လူသန်းနဲ့ချီဟာ လူသားတွေရဲ့ ပြဿနာတွေကို ဖြေရှင်းပေးဖို့ ဘုရားသခင်ကို အားမကိုးတော့ဘဲ လူ့အဖွဲ့အစည်းတွေကို အားကိုးကြတယ်။ ဒါကြောင့် ယေဟောဝါဘုရားကို မကိုးကွယ်တဲ့လူတွေမှာ မေတ္တာတရား ဆက်ခေါင်းပါးလာနေတယ်။ ပထမရာစု ဧဖက်အသင်းတော်ရဲ့ အခြေအနေအတိုင်း ဒီနေ့ ခရစ်ယာန်စစ်တွေလည်း ကိုယ့်ကိုယ်ကိုယ် ကျေနပ်လာနိုင်တယ်။ မေတ္တာလည်း ခေါင်းပါးလာနိုင်တယ်။ ကျွန်တော်တို့ရဲ့ မေတ္တာ စမ်းသပ်ခံရနိုင်တဲ့ ကဏ္ဍသုံးခုကို သုံးသပ်ကြည့်ကြစို့– (၁) ယေဟောဝါကို ချစ်တဲ့ မေတ္တာ၊ (၂) ကျမ်းစာအမှန်တရား မြတ်နိုးစိတ်၊ (၃) ညီအစ်ကို/မတွေကို ချစ်တဲ့ မေတ္တာ။
ယေဟောဝါကို ချစ်တဲ့ မေတ္တာ
၅။ ဘုရားသခင်ကို ဘာကြောင့် ချစ်ရမလဲ။
၅ မေတ္တာခေါင်းပါးလာမယ်လို့ ယေရှု သတိပေးခဲ့တဲ့နေ့ အစောပိုင်းမှာပဲ မေတ္တာဟာ အရေးကြီးဆုံးဖြစ်ကြောင်း အလေးပေးခဲ့တယ်။ “‘ယေဟောဝါဘုရားကို စိတ်စွမ်းရှိသမျှ၊ ကိုယ်စွမ်းရှိသမျှ၊ ဉာဏ်စွမ်းရှိသမျှနဲ့ ချစ်ပါ။’ ဒီပညတ်ဟာ ပထမဆုံး၊ အရေးကြီးဆုံး ပညတ်ပဲ” လို့ ပြောခဲ့တယ်။ (မ. ၂၂:၃၇၊ ၃၈) ဘုရားကို နှစ်နှစ်ကာကာ ချစ်တဲ့မေတ္တာက ယေဟောဝါရဲ့ ပညတ်တော်တွေကို လိုက်နာဖို့၊ ခံနိုင်ရည်ရှိဖို့၊ မကောင်းတာကို မုန်းဖို့ ကူညီပေးတယ်။ (ဆာလံ ၉၇:၁၀ ကိုဖတ်ပါ။) စာတန်နဲ့ လောက,ကတော့ ဘုရားကို ချစ်တဲ့ ကျွန်တော်တို့ရဲ့ မေတ္တာ အားနည်းသွားစေဖို့ ကြိုးစားနေတယ်။
၆။ ဘုရားကို ချစ်တဲ့မေတ္တာ ခေါင်းပါးလာရင် ဘာဖြစ်သွားမလဲ။
၆ ကျွန်တော်တို့ ပတ်ဝန်းကျင်လောက,က မေတ္တာကို တလွဲရှုမြင်စေနိုင်တယ်။ လူတွေဟာ ဖန်ဆင်းရှင်ကို မချစ်ဘဲ “ကိုယ့်ကိုယ်ကိုယ်ပဲ ချစ်” ကြတယ်။ (၂ တိ. ၃:၂) စာတန် အုပ်ချုပ်နေတဲ့ ဒီလောက,က “သွေးသားအလိုဆန္ဒ၊ မျက်စိရဲ့ အလိုဆန္ဒ၊ မိမိစည်းစိမ်အကြောင်း ဝါကြွားခြင်း” တို့ကို အားပေးအားမြှောက်လုပ်နေတယ်။ (၁ ယော. ၂:၁၆) တမန်တော် ပေါလုက သွေးသားဆန္ဒကို တိုက်လှန်ဖို့ ခရစ်ယာန်ချင်းတွေကို သတိပေးခဲ့တယ်– “အပြစ်ရှိတဲ့အရာတွေဆီ စိတ်ရောက်နေတာက သေစေနိုင်တယ်။ . . . အပြစ်ရှိတဲ့အရာတွေဆီ စိတ်ရောက်နေသူတွေဟာ ဘုရားသခင်ရဲ့ ရန်သူ ဖြစ်သွားတယ်။” (ရော. ၈:၆၊ ၇) ရုပ်ဝတ္ထုပစ္စည်းတွေကို လိုက်စားဖို့၊ လိင်ဆန္ဒတွေကိုပဲ ဖြည့်ဆည်းဖို့ ကြိုးစားနေသူတွေက စိတ်ပျက်နာကျင်မှုတွေနဲ့ အဆုံးသတ်ကြရတယ်။—၁ ကော. ၆:၁၈။ ၁ တိ. ၆:၉၊ ၁၀။
၇။ ဒီနေ့ ခရစ်တော်ရဲ့ နောက်လိုက်တွေ ဘာအန္တရာယ်တွေ ကြုံတွေ့နေကြသလဲ။
၇ ဘုရားမဲ့ ဝါဒီတွေ၊ ဘုရားရှိမှုကို သံသယဝင်တဲ့သူတွေ၊ ဆင့်ကဲဝါဒီတွေက ဘုရားကို မချစ်ဖို့လောက်သာ မဟုတ်ဘဲ ဘုရားသခင်ကို မယုံကြည်ဖို့လည်း စည်းရုံးသိမ်းသွင်းကြတယ်။ ဖန်ဆင်းရှင်ကို ယုံကြည်သူတွေဟာ လူနုံလူအ၊ အသိဉာဏ်မရှိတဲ့သူတွေလို့ ပြောကြတယ်။ တစ်ချိန်တည်းမှာ ဖန်ဆင်းရှင်အစား သိပ္ပံပညာရှင်တွေကို ပိုကြည်ညိုလေးစားလာကြတယ်။ (ရော. ၁:၂၅) အဲဒီသွန်သင်ချက်တွေကို နားထောင်မယ်ဆိုရင် ယေဟောဝါကို ကျောခိုင်းမိသွားနိုင်တယ်၊ မေတ္တာ ခေါင်းပါးလာနိုင်တယ်။—ဟီ. ၃:၁၂။
၈။ (က) ဘယ်စိတ်ပျက်စရာ အခြေအနေတွေကို ယေဟောဝါရဲ့ လူမျိုး ကြုံတွေ့နေရသလဲ။ (ခ) ဆာလံ ၁၃၆ မှာ ဘယ်အာမခံချက် ပေးထားသလဲ။
၈ စိတ်ပျက်အားလျော့သွားရင် ယုံကြည်ခြင်း အားနည်းလာနိုင်တယ်၊ ဘုရားကို ချစ်တဲ့ မေတ္တာ ခေါင်းပါးလာနိုင်တယ်။ စာတန် ထိန်းချုပ်ထားတဲ့ ဒီစနစ်ဆိုးကြီးမှာ တစ်ချိန်မဟုတ် တစ်ချိန် စိတ်ပျက်စရာ အခြေအနေတွေ ကြုံတွေ့ရနိုင်၁ ယော. ၅:၁၉) အသက်အရွယ် အိုမင်းလို့၊ ကျန်းမာရေး မကောင်းလို့၊ စီးပွားရေး ကျပ်တည်းလို့ လောလောဆယ် ပြဿနာတွေ ရင်ဆိုင်နေကြရတယ်။ အရည်အချင်း မပြည့်မီဘူး၊ မျှော်လင့်တဲ့အတိုင်း ဖြစ်မလာဘူး၊ ချွတ်ယွင်းချက် ရှိနေတယ်ဆိုတဲ့ ခံစားချက်တွေနဲ့ တိုက်လှန်နေရနိုင်တယ်။ ဒီအခြေအနေတွေ၊ ခံစားချက်တွေကြောင့် ကျွန်တော်တို့ကို ယေဟောဝါ စွန့်လိုက်ပြီလို့ ဘယ်တော့မှ မယူဆသင့်ဘူး။ အဲဒီအစား ကျွန်တော်တို့အပေါ်ထားတဲ့ ယေဟောဝါရဲ့ တည်မြဲတဲ့ မေတ္တာအကြောင်း နှစ်သိမ့်မှုဖြစ်စေတဲ့ စကားတွေကို တွေးတောဆင်ခြင်သင့်တယ်။ “ဘုရားက ငါတို့ နိမ့်ကျသွားတဲ့အခါ ငါတို့ကို သတိရတယ်။ ခိုင်မြဲတဲ့မေတ္တာတော် ထာဝစဉ် တည်မြဲတယ်” လို့ ဆာလံ ၁၃၆:၂၃ မှာ ဖော်ပြထားတယ်။ မိမိကျေးကျွန်တွေအပေါ် ထားရှိတဲ့ ယေဟောဝါရဲ့ ခိုင်မြဲတဲ့ မေတ္တာဟာ ဘယ်တော့မှ မပြောင်းလဲဘူး။ ဒါကြောင့် “အသနားခံတာကို ဘုရား နားထောင်ပေး” ကြောင်း၊ ဖြေဆိုပေးကြောင်း စိတ်ချနိုင်တယ်။—ဆာ. ၁၁၆:၁။ ၁၃၆:၂၄-၂၆။
တယ်။ (၉။ ဘုရားကို ချစ်တဲ့မေတ္တာ ထိန်းသိမ်းထားဖို့ ပေါလုကို ဘာက ခွန်အားပေးခဲ့သလဲ။
၉ ဆာလံဆရာလိုပဲ ပေါလုလည်း ယေဟောဝါရဲ့ မပြတ်တမ်း ထောက်မမှုကို ပြန်စဉ်းစားပြီး ခွန်အားရရှိခဲ့တယ်။ “ယေဟောဝါဟာ ကူညီမစရှင်ဖြစ်တဲ့အတွက် ငါ ဘာကိုမှ မကြောက်ဘူး။ လူက ငါ့ကို ဘာလုပ်နိုင်မှာလဲ” လို့ ပေါလု ရေးခဲ့တယ်။ (ဟီ. ၁၃:၆) ယေဟောဝါရဲ့ မေတ္တာပါ စောင့်ရှောက်မှုကို အခိုင်အမာ ယုံကြည်စိတ်ချမှုက ဘဝပြဿနာတွေ ဖြေရှင်းရာမှာ ပေါလုကို ကူညီပေးတယ်။ ခက်ခဲတဲ့ အခြေအနေတွေကြောင့် စိတ်ဓာတ်မကျခဲ့ဘူး။ ထောင်ကျနေတုန်းမှာတောင် အားပေးစာအတော်များများကို ပေါလု ရေးသားခဲ့တယ်။ (ဧ. ၄:၁။ ဖိ. ၁:၇။ ဖိလေ. ၁) အလွန်အမင်း ပင်ပန်းနေတာတောင်မှ ဘုရားကို ချစ်တဲ့မေတ္တာ ထိန်းသိမ်းထားခဲ့တယ်။ အဲဒီလိုထိန်းသိမ်းဖို့ ဘာက ခွန်အားရှိစေသလဲ။ ‘ဆင်းရဲဒုက္ခအမျိုးမျိုး ခံရတဲ့အခါ နှစ်သိမ့်ပေး’ တဲ့ “နှစ်သိမ့်ခြင်းအမျိုးမျိုးရဲ့ အရှင်” ကို ဆက်မှီခိုအားကိုးခြင်းပါပဲ။ (၂ ကော. ၁:၃၊ ၄) ပေါလုရဲ့ ပုံသက်သေကို တုပပြီး ယေဟောဝါကို ချစ်တဲ့မေတ္တာ ဘယ်လို ထိန်းသိမ်းထားနိုင်သလဲ။
၁၀။ ယေဟောဝါကို ချစ်တဲ့မေတ္တာ ဘယ်လို ဆက်ခိုင်မြဲစေနိုင်သလဲ။
၁၀ ယေဟောဝါကို ချစ်တဲ့မေတ္တာ ဆက်ခိုင်မြဲစေနိုင်တဲ့ အဓိကနည်းကို ပေါလု ဖော်ပြခဲ့တယ်။ “အမြဲမပြတ် ဆုတောင်းနေကြပါ” လို့ ယုံကြည်သူချင်းတွေဆီ စာရေးခဲ့တယ်။ နောက်ပိုင်းမှာ “ဇွဲမလျှော့တမ်း ဆုတောင်းပါ” လို့ ထပ်ရေးခဲ့တယ်။ (၁ သက်. ၅:၁၇။ ရော. ၁၂:၁၂) ဆုတောင်းဆက်သွယ်ခြင်းဟာ ဘုရားနဲ့ ရင်းနှီးတဲ့ဆက်ဆံရေး ရှိစေတဲ့ အခြေခံအုတ်မြစ် ဖြစ်တယ်။ (ဆာ. ၈၆:၃) ကျွန်တော်တို့ရဲ့ အတွေးတွေ၊ ခံစားချက်တွေကို ယေဟောဝါဆီ ပြောပြဖို့ အချိန်ယူမယ်ဆိုရင် “ဆုတောင်းသံကို နားထောင်တဲ့အရှင်” ဖခင်နဲ့ ပိုရင်းနှီးလာမယ်။ (ဆာ. ၆၅:၂) ဒီ့အပြင် ဆုတောင်းချက်တွေကို ယေဟောဝါ ဖြေကြားပေးကြောင်း သိလာတဲ့အခါ ဘုရားကို ပိုချစ်လာတယ်။ “ယေဟောဝါဟာ ဆုတောင်းတဲ့သူတိုင်း၊ စိတ်ရင်းမှန်နဲ့ ဆုတောင်းသူတိုင်းရဲ့ အနီးအပါးမှာ ရှိ” ကြောင်း ပိုသဘောပေါက်လာတယ်။ (ဆာ. ၁၄၅:၁၈) ယေဟောဝါရဲ့ မေတ္တာပါ ထောက်မမှုကို ယုံကြည်စိတ်ချခြင်းက ရှေ့မှာ ကြုံတွေ့ရနိုင်တဲ့ ယုံကြည်ခြင်း စမ်းသပ်မှုတွေကို ဖြေရှင်းနိုင်အောင် ကူညီပေးတယ်။
ကျမ်းစာအမှန်တရားကို နှစ်သက်မြတ်နိုးစိတ်
၁၁၊ ၁၂။ ကျမ်းစာ အမှန်တရားကို နက်နက်ရှိုင်းရှိုင်း မြတ်နိုးဖို့ ဘယ်လို လုပ်နိုင်သလဲ။
၁၁ ခရစ်ယာန်တွေအနေနဲ့ အမှန်တရားကို နှစ်သက်မြတ်နိုးကြပါတယ်။ ဘုရားစကားတော်ဟာ အကြွင်းမဲ့ အမှန်တရားပါပဲ။ “အဖရဲ့ တရားစကားဟာ အမှန်တရား ဖြစ်ပါတယ်” လို့ ဘုရားသခင်ဆီ ယေရှု ဆုတောင်းခဲ့တယ်။ (ယော. ၁၇:၁၇) ဒါကြောင့် အမှန်တရားကို မြတ်နိုးခြင်းက ဘုရားစကားတော်ပါ တိကျမှန်ကန်တဲ့ အသိပညာ ဆည်းပူးခြင်းနဲ့ အစပြုတယ်။ (ကော. ၁:၁၀) ဒါပေမဲ့ အသိပညာ ဆည်းပူးခြင်းထက်မက လိုအပ်တယ်။ ကျမ်းစာအမှန်တရား မြတ်နိုးခြင်းရဲ့ အဓိပ္ပာယ်ကို နားလည်ဖို့ ဆာလံ ၁၁၉ ရေးသူက ဘယ်လို ကူညီပေးတယ်ဆိုတာ သတိပြုပါ။ (ဆာလံ ၁၁၉:၉၇-၁၀၀ ကိုဖတ်ပါ။) တစ်နေ့တာလုံး ကျမ်းပိုဒ်တွေကို တွေးတောဆင်ခြင်နေဖို့ အချိန်ပေး သလား။ ဘဝမှာ ကျမ်းစာအမှန်တရား ကျင့်သုံးနိုင်တဲ့နည်းတွေကို တွေးတောနေမယ်ဆိုရင် ကျမ်းစာအမှန်တရားကို ပိုမြတ်နိုးလာပါလိမ့်မယ်။
၁၂ “နှုတ်တော်ထွက်စကားဟာ ကျွန်တော့်ခံတွင်းထဲမှာ ချိုမြိန်လိုက်တာ။ ပါးစပ်ထဲမှာ ပျားရည်ထက်တောင် ချိုမြပါတယ်” လို့ ဆာလံဆရာ ဆက်ပြောတယ်။ (ဆာ. ၁၁၉:၁၀၃) အလားတူပဲ ဘုရားသခင့် အဖွဲ့အစည်းထုတ် ကျမ်းစာအခြေပြု အကြောင်းအရာတွေကို အရသာခံတတ်လာနိုင်တယ်။ တစ်စိမ့်စိမ့် အရသာခံ စဉ်းစားမယ်ဆိုရင် အမှန်တရားရဲ့ “နှစ်သက်ဖွယ် စကားတွေ” ကို မှတ်မိလာနိုင်မယ်၊ ဒါတွေနဲ့ တခြားသူတွေကို ကူညီပေးနိုင်တယ်။—ဒေ. ၁၂:၁၀။
၁၃။ ကျမ်းစာ အမှန်တရားကို နှစ်သက်မြတ်နိုးဖို့ ယေရမိကို ဘာက ကူညီပေးခဲ့သလဲ။ ဘယ်လို အကျိုးသက်ရောက်ခဲ့သလဲ။
၁၃ ကျမ်းစာအမှန်တရားကို ပရောဖက် ယေရမိ နှစ်သက်မြတ်နိုးခဲ့တယ်။ သူ့ရဲ့စိတ်နှလုံးမှာ ဘုရားစကားတော် အကျိုးသက်ရောက်ခဲ့ပုံကို သတိပြုကြည့်ပါ။ “ဗိုလ်ခြေတို့ရဲ့ဘုရား ယေဟောဝါ၊ နှုတ်တော်ထွက်စကားတွေကို တွေ့တာနဲ့ ကျွန်တော် စားလိုက်တယ်။ နာမတော်ကို ခံယူထားတဲ့အတွက် နှုတ်တော်ထွက်စကားတွေက ကျွန်တော့်ကို ရွှင်လန်းစေတယ်။ ရင်ကို ကြည်နူးစေပါတယ်။” (ယေ. ၁၅:၁၆) ယေရမိဟာ ဘုရားသခင့် အဖိုးတန်စကားတွေကို လေးလေးနက်နက် ဖတ်ရှုလေ့လာပြီး တစိမ့်စိမ့် တွေးတောဆင်ခြင်ခဲ့တယ်။ ဒီနည်းအားဖြင့် ဘုရားနာမည် ကိုယ်စားပြုခွင့်ရတာကို အလွန်လေးမြတ်ခဲ့တယ်။ ကျမ်းစာအမှန်တရားကို မြတ်နိုးစိတ်က ဘုရားသခင့်နာမည် ခံယူရတာ၊ နောက်ဆုံးကာလမှာ ဘုရားနိုင်ငံတော်အကြောင်း ဟောပြောရတာကို အခွင့်ထူးအဖြစ် ယူမှတ်စေတယ်။
၁၄။ ကျမ်းစာ အမှန်တရားကို ဘယ်လို ပိုနှစ်သက်မြတ်နိုးလာနိုင်သလဲ။
၁၄ ကျမ်းစာနဲ့ ကျမ်းစာအခြေပြု စာပေတွေ ဖတ်ရှုခြင်းအပြင် ဘယ်အရာကလည်း ကျမ်းစာအမှန်တရားကို နက်နက်ရှိုင်းရှိုင်း နှစ်သက်မြတ်နိုးစေနိုင်သလဲ။ အသင်းတော် အစည်းအဝေးတွေကို မှန်မှန် တက်ရောက်ခြင်းက ကျမ်းစာအမှန်တရားကို ပိုနှစ်သက်မြတ်နိုးစေနိုင်ပါတယ်။ ကင်းမျှော်စင် အကူအညီနဲ့ ပတ်စဉ် ကျမ်းစာလေ့လာခြင်းကလည်း ကျွန်တော်တို့ကို သွန်သင်ပေးတဲ့ နည်းတစ်နည်းပါပဲ။ လေ့လာတဲ့ ဆောင်းပါးကို နားလည်ဖို့ ကင်းမျှော်စင် သင်တန်းတိုင်းအတွက် ကောင်းကောင်း ကြိုတင်ပြင်ဆင်ရမယ်။ ပြင်ဆင်နိုင်တဲ့ နည်းတစ်နည်းကတော့ ရည်ညွှန်းထားတဲ့ ကျမ်းချက်တိုင်းကို ဖွင့်ဖတ်ခြင်းပါပဲ။ အခုချိန်မှာ ကင်းမျှော်စင်ကို jw.org ဝက်ဘ်ဆိုက်မှာ ကူးယူနိုင်တယ်။ JW Library မှာ ဘာသာစကားများစွာနဲ့ ဖတ်ရှုနိုင်တယ်။ လေ့လာရန် ဆောင်းပါးတိုင်းမှာပါတဲ့ ရည်ညွှန်း ကျမ်းချက်တွေကို အီလက်ထရောနစ်ပုံစံနဲ့ အလွယ်တကူ ဖတ်နိုင်တယ်။ ဘယ်နည်းပဲသုံးသုံး ကျမ်းချက်တွေကို သေသေချာချာ ဖတ်ခြင်း၊ တွေးတောဆင်ခြင်ခြင်းက ကျမ်းစာအမှန်တရားကို နက်နက်ရှိုင်းရှိုင်း နှစ်သက်မြတ်နိုးစေပါလိမ့်မယ်။—ဆာလံ ၁:၂ ကိုဖတ်ပါ။
ညီအစ်ကို/မတွေကို ချစ်ပါ
၁၅၊ ၁၆။ (က) ယောဟန် ၁၃:၃၄၊ ၃၅ အရ ကျွန်တော်တို့မှာ ဘာတာဝန် ရှိသလဲ။ (ခ) ညီအစ်ကို/မတွေကို ချစ်တဲ့မေတ္တာက ဘုရားသခင်နဲ့ ကျမ်းစာကို ချစ်မြတ်နိုးစိတ်နဲ့ ဘယ်လို ဆက်စပ်နေသလဲ။
၁၅ ယေရှုရဲ့ မြေကြီးအသက်တာ နောက်ဆုံးညမှာ တပည့်တွေကို ဒီလိုပြောခဲ့တယ်– “အချင်းချင်း ချစ်ကြပါဆိုတဲ့ ပညတ်အသစ်တစ်ခု ကျွန်တော် ပေးမယ်။ ခင်ဗျားတို့ကို ကျွန်တော် ချစ်သလို အချင်းချင်း ချစ်ကြပါ။ အချင်းချင်း ချစ်မယ်ဆိုရင် ခင်ဗျားတို့ဟာ ကျွန်တော့်တပည့်တွေပဲဆိုတာ လူတွေ သိလိမ့်မယ်။”—ယော. ၁၃:၃၄၊ ၃၅။
၁၆ ညီအစ်ကို/မတွေကို ချစ်တဲ့မေတ္တာနဲ့ ယေဟောဝါကို ချစ်တဲ့မေတ္တာက ဆက်စပ်နေတယ်။ ဘုရားကို မချစ်ရင် ညီအစ်ကို/မတွေကို မချစ်နိုင်ဘူး။ “မြင်နေရတဲ့ ညီအစ်ကိုကို မချစ်ရင် မမြင်ရတဲ့ ဘုရားသခင်ကို မချစ်နိုင်ဘူး” လို့ တမန်တော် ယောဟန် ရေးခဲ့တယ်။ (၁ ယော. ၄:၂၀) ဒါ့အပြင် ယေဟောဝါနဲ့ ညီအစ်ကို/မတွေကို ချစ်တဲ့မေတ္တာက ကျမ်းစာကို နှစ်သက်မြတ်နိုးစိတ်နဲ့ ဆက်စပ်နေပြန်တယ်။ ဘာကြောင့်လဲ။ ကျမ်းစာအမှန်တရားကို နှစ်သက်မြတ်နိုးစိတ်က ဘုရားကို ချစ်ပါ၊ ညီအစ်ကိုတွေကို ချစ်ပါဆိုတဲ့ ကျမ်းစာပညတ်တွေကို လှိုက်လှိုက်လှဲလှဲ နာခံစေတယ်။—၁ ပေ. ၁:၂၂။ ၁ ယော. ၄:၂၁။
၁၇။ မေတ္တာပြနိုင်တဲ့ နည်းလမ်းတချို့က ဘာတွေလဲ။
၁၇ ၁ သက်သာလောနိတ် ၄:၉၊ ၁၀ ကိုဖတ်ပါ။ အသင်းတော်မှာ မေတ္တာပြနိုင်တဲ့ လက်တွေ့ကျ နည်းလမ်းတချို့က ဘာတွေလဲ။ အသက်ကြီး ညီအစ်ကို/မတစ်ယောက်ယောက် အစည်းအဝေး ကြိုပို့ပေးဖို့ လိုအပ်နိုင်တယ်။ မုဆိုးမရဲ့အိမ်ကို ပြင်ပေးဖို့ လိုနိုင်တယ်။ (ယာ. ၁:၂၇) စိတ်အားငယ်နေတဲ့၊ စိတ်ဓာတ်ကျနေတဲ့၊ တခြားအခက်အခဲတွေ ကြုံနေတဲ့ လူကြီးလူငယ် ညီအစ်ကို/မတွေဟာ ကျွန်တော်တို့ရဲ့ အာရုံစိုက်မှု၊ အားပေးမှု၊ နှစ်သိမ့်မှုတွေ လိုအပ်ကြတယ်။ (ပညာ. ၁၂:၂၅။ ကော. ၄:၁၁) “ယုံကြည်ခြင်းတူတဲ့သူတွေကို” အလွန်အလေးထားကြောင်း အပြောအလုပ်နဲ့ ဖော်ပြတဲ့အခါ ကျွန်တော်တို့ရဲ့ ညီအစ်ကိုတွေကို တကယ် ချစ်မြတ်နိုးကြောင်း သက်သေပြနေတာပါပဲ။—ဂလ. ၆:၁၀။
၁၈။ ခရစ်ယာန်ချင်းတွေကြားမှာရှိတဲ့ အသေးအဖွဲ သဘောထားကွဲလွဲမှုတွေကို ဖြေရှင်းဖို့ ဘာက ကူညီပေးမလဲ။
၁၈ ဒီစနစ်ဆိုးရဲ့ “နောက်ဆုံးကာလ” မှာ လူတွေဟာ တစ်ကိုယ်ကောင်းဆန်ကြမယ်၊ လောဘကြီးကြမယ်လို့ ကျမ်းစာမှာ ကြိုဟောထားတယ်။ (၂ တိ. ၃:၁၊ ၂) ဒါကြောင့် ကျွန်တော်တို့ ခရစ်ယာန်တွေဟာ ဘုရားကို ချစ်တဲ့မေတ္တာ၊ ကျမ်းစာအမှန်တရားကို နှစ်သက်မြတ်နိုးစိတ်၊ အချင်းချင်း ချစ်တဲ့မေတ္တာ တိုးပွားအောင် ကြိုးစားရမယ်။ ယုံကြည်သူချင်းတွေကြားမှာ အသေးအဖွဲ သဘောထားကွဲလွဲမှုတွေ တစ်ခါတလေ ပေါ်လာနိုင်တယ်။ ဒါပေမဲ့ သဘောထားကွဲလွဲမှုတွေကို ချစ်ခြင်းမေတ္တာနဲ့ ဖြေရှင်းတဲ့အခါ အသင်းတော်တစ်ခုလုံး ကောင်းချီးခံစားရပါတယ်။ (ဧ. ၄:၃၂။ ကော. ၃:၁၄) ဒါကြောင့် ကျွန်တော်တို့ရဲ့ မေတ္တာ ဘယ်တော့မှ မခေါင်းပါးပါစေနဲ့။ အဲဒီအစား ယေဟောဝါ၊ ကျမ်းစာ၊ ညီအစ်ကို/မတွေကို အားကြီးတဲ့မေတ္တာနဲ့ ဆက်ချစ်မြတ်နိုးသွားကြပါစို့။