1, 2. (a) Ong ihs me mahsen en Sises ko nan Madiu 24:12 tepin kohwong? (b) Ia duwen pwuhken Wiewia kan eh kasalehda me pali laud en tepin Kristian kan kin kolokolte arail limpoak en kehlail? (Menlau kilang tepin kilel.)

 NI SISES eh ketiket sampah, e ketin kawehwehda ia duwen aramas akan ar pahn kasawihada “imwin sampah.” Nanpwungen mepwukat, e ketin kohpada: “Limpoak en me tohto pahn tikitikla.” (Mad. 24:3, 12) Mehn Suhs ko ni mwehin tepin Kristian kan kose me irail wia sapwellimen Koht aramas ahpw re mweidohng arail limpoak ong Koht en tikitikla.

² Ahpw, pali laud en Kristian kan ahnsowo ahneki madamadau me weksang met. Irail kin ngoangki kalohki “rongamwahu duwen Sises” oh kasalehda limpoak ong Koht, riarail Kristian kan, oh irail kan me saikinte esehla duwen padahk mehlel. Kristian pwukat kolokolte arail limpoak ong Koht en kehlail. (Wiewia 2:44-47; 5:42) Ahpw, e kansensuwed pwe limpoak en ekei Kristian ko tikitikla. Ia duwen atail ese met?

3. Dahme kakete kahrehiong limpoak en ekei Kristian en tikitikla?

³ Sises mahsanihong tepin Kristian ko me kousoan nan Episos:  “Omw limpoakohng ie tikitiklahr, e sohte duwehte omw limpoak en mahso.” (Kaud. 2:4) Wiewiahn aramas ako limwahrail me kin nsenohkihte pein irail kakete kamwakid irail. (Ep. 2:2, 3) Episos wia kahnimw kepwehpwe ehu me aramas akan kin nsenohkihte arail nsenamwahu oh kepwe kan laudsang soahng koaros. Me tohto nan Episos pil kin wia tiahk me inenen samin oh sohte kin kasalehda ar wauneki sapwellimen Koht kosonned kan. Re kin nsenohkihte pein arail peren laudsang arail en kasalehda limpoak me soh roporop ong Koht oh meteikan.

4. (a) Ia duwen limpoak eh tikitikla nan atail ahnsou? (b) Irair siluh dah me kitail en kolokol atail limpoak en kehlail?

⁴ Mahsen en Sises duwen limpoak eh tikitikla pil kin kadoadoahk nan atail ahnsou. Limpoak en aramas akan ong Koht rahnwet kin wie tikitikla. Aramas rar kei sohte kin kilangwohng Koht pwehn ketin kamwahwihala kahpwal kan nin sampah, ahpw re kin kilangwohng koperment de pwihn teikan. Limpoak kin pousehlahte wie tikitikla. Limpoak en sapwellimen Siohwa ladu kan pil kakete tikitikla, duwehte me wiawihong mwomwohdisohn Episos mahso. Eri kitail pahn koasoiapene irair siluh me kitail en kolokol atail limpoak en kehlail: (1) limpoak ong Siohwa, (2) limpoak ong padahk mehlel en Paipel, oh (3) limpoak ong riatail Kristian kan.

5. Dahme kahrehda kitail anahne poakohng Koht?

⁵ Ihs me kitail en keieu poakohng? Sises mahsanih: “‘Ke pahn poakohng Kaun-o omw Koht sang nan kapehdomw unsek, sang ni [“omw mour,” NW] unsek, sang ni omw lamalam koaros unsek.’ Ih met kosonned me keieu lapalap oh kesempwal.” (Mad. 22:37, 38) Atail poakohng Koht kin sewese kitail en peikiong sapwellime kosonned kan, dadaurete, oh kailongki dahme suwed. (Wadek Melkahka 97:10.) Ahpw Sehdan oh eh sampah kin songosong en kaluwetala oh kauwehla atail limpoak ong Koht.

6. Dahme kin wiawi ni aramas akan ar sohla poakohng Koht?

⁶ Sampah wet ahneki madamadau sapwung me pid limpoak. Aramas tohto kin “roporop ong pein irail,” ahpw sohte kin poakohng Koht. (2 Tim. 3:2) Re kin medemedewehte “ineng en uduk, oh mehkan me aramas kin kilang oh ahnehda, oh mehkoaros me mi nin sampah me aramas kin pohnmwahsohkihda.” (1 Sohn 2:16) Wahnpoaron Pohl katamankin kitail dahme kak wiawi ma kitail kin nsenohkihte mahs pein kitail. E nda: “Imwilahn arail nsenohki kapwaiada ahnepen aramas, iei mehla.” Dahme kahrehda? Pwehki irail kan me kin wia met kin wiahla sapwellimen Koht imwintihti. (Rom 8:6, 7) Aramas akan me kin medemedewehte nan arail mour en wiahda mwohni de kaitarala arail ineng en wia tiahk samin kin imwikihla nsensuwed laud.​—1 Kor. 6:18; 1 Tim. 6:9, 10.

7. Madamadau keper dah kan me Kristian men kakete ahneki rahnwet?

⁷ Me tohto me sohte kamehlele me mie Koht oh irail kan me dene kitail sohte kak ese me mie Koht de soh, oh pil irail kan me dene mour pein miehla kin song en kahrehiong meteikan en dehr poakohng Koht de kamehlele me e ketin ieias. Re kahrehda en mwomwen me ihte aramas pweipwei de me sohte sukuhl kan me pahn kamehlele me mie Sounkapikada men. Patehng met, aramas tohto kin wauneki saintis kan laudsang Sounkapikadao. (Rom 1:25) Kristian men pil kakete ahnekihda soangen madamadau pwukat. Atail nanpwungmwahu rehn Siohwa kakete luwetala, oh atail limpoak kakete tikitikla.​—Ipru 3:12.

8. (a) Soangen irair dah me kak kahrehiong sapwellimen Siohwa aramas akan en mworusala? (b) Ia duwen Melkahka 136 eh kak kamweitkitailla?

⁸ Pwehki kitail momour nan ahn Sehdan  koasoandi suwed wet, mie kahrepe tohto me kak kahrehiong kitail en mworusala ekei pak. (1 Sohn 5:19) Ahpw ma kitail mweidohng pein kitail en ekei pak nohn mworusala, atail pwoson kakete luwetala oh atail limpoak ong Koht kakete tikitikla. Karasepe, kitail kakete lellong kahpwal kan pwehki kitail mahmahla, soumwahu, oh ahneki kahpwal en mwohni. De ele kitail nsensuwedla pwehki kitail sohte kak wia dahme kitail men wia. Ele kitail kak nsensuwedla pwehki soahng kan nan atail mour sohte wiawi nin duwen me kitail mwahuki. Mendahki soangen kahpwal dah me kitail lellong, kitail en dehr medewe me Siohwa ketin likidmelieikitailla. Medemedewe mwahu mahsen kansenamwahu pwukat nan Melkahka 136:23: “E sohte ketin melieikitailla ni atail lohdi; sapwellime limpoak me poatopoat.” Kitail kak kamehlele me Siohwa kin ketin karonge atail “kapakap akan.”​—Mel. 116:1; 136:24-26.

9. Dahme sewese Pohl en ahneki kehl pwehn kolokol eh limpoak ong Koht?

⁹ Wahnpoaron Pohl wia sapwellimen Koht ladu men me kin medemedewe laud duwen Siohwa eh kin ketin sewese ih, oh met sewese ih en kehkehlailte. E ntingihedi: “Kaun-o, iei sawasepei, I sohte pahn masak! Dahme aramas kak wiahiong ie?” (Ipru 13:6) Eh likih Siohwa kin sewese ih en powehdi kahpwal kan nan eh mour. Ni Pohl eh kin lellong irair apwal akan, e sohte kesehla eh likih Siohwa. Ni eh pil mi nan imweteng, e kin sewese rie Kristian ko sang ni eh ntinglahng mwomwohdiso kan oh kangoange irail. (Ep. 4:1; Pil. 1:7; Pail. 1) Mendahki soangen kahpwal dah me Pohl lelohng, e kin kolokolete eh limpoak ong Koht en kehlail. E kin likih Koht “me kin ketin sewesei kitail nan atail apwal akan koaros.” (2 Kor. 1:3, 4) Ia duwen atail kak kahlemengih Pohl?

10. Ia duwen atail kak kolokolete atail limpoak ong Siohwa en kehlail?

¹⁰ Pohl kawehwehda ehu ahl me kitail kak kolokolete atail limpoak ong Koht en kehlail ni eh ntingihedi: “Poadidiong kapakap pil ahnsou koaros.” (1 Des. 5:17; Rom 12:12) Dahme kahrehda kapakap kin kahrehiong kitail en karanihala Koht? Ni atail kin kapakap, kitail kin pato ong Siohwa. Met kahrehiong kitail en kak ahneki nanpwungmwahu reh. (Mel. 86:3) Ni atail kin patohwanohng Samatail nanleng duwen atail madamadau oh pepehm loal kan, kitail kin karanihala ih. (Mel. 65:2) Oh pil atail limpoak ong Siohwa kin laudla ni atail kilang duwen eh kin ketin sapengala atail kapakap kan. Kitail kak kamehlele me “E kin ketiket limwahn irail kan me kin likweriong, irail akan me kin likweriong ni mehlel.” (Mel. 145:18) Atail likih sapwellimen Siohwa limpoak oh sawas pahn sewese kitail en apwalihala sohte lipilipil kahpwal me kitail pahn lelohng ahnsouwet oh ahnsou kohkohdo.

11, 12. Ia duwen atail kak kalaudehla atail poakohng padahk mehlel en Paipel?

¹¹ Nin duwen Kristian kan, kitail kin poakohng padahk mehlel. Mahsen en Koht iei wasa me kitail kin diar padahk mehlel. Sises patohwanohng Semeo: “Sapwellimomwi mahsen, iei me mehlel.” (Sohn 17:17) Pwe kitail en poakohng padahk mehlel en Paipel, kitail anahne ese dahme mi nan Paipel. (Kol. 1:10) Ahpw pil mie soahng teikan. Tehk ia duwen sounnting en Melkahka 119 eh sewese kitail en wehwehki dahme kitail anahne wia. (Wadek Melkahka 119:97-100.) Erein rahn ehu, kitail anahne doudouloale, de medemedewe laud, dahme kitail wadek nan Paipel. Ni atail kin doudouloale ia duwen atail kak doadoahngki padahk mehlel en Paipel nan atail mour, met pahn kalaudehla atail poakohng.

 ¹² Sounmelkahkao pil nda: “Ia uwen mem en sapwellimomwi kaweid kan​—e mem sang sukehn loangalap.” (Mel. 119:103) Sawaspen Paipel kan me sapwellimen Koht pwihn kaunopada kin duwehte mwenge iou. Ni atail kin kang mwenge me kitail iouki, ele kitail kin kihong ahnsou pwehn perenki mwengeo. Ni ahlohte, kitail men kihong ahnsou pwehn onop. Eri kitail pahn uhdahn perenki “koasoi kansenamwahu kan” en padahk mehlel, oh e pahn mengei en tamataman dahme kitail wadek oh doadoahngki pwehn sewese meteikan.​—Ekl. 12:10.

13. Dahme sewese Seremaia en poakohng padahk mehlel me kohsang Mahsen en Koht? Ia duwen met eh kamwakid ih?

¹³ Soukohp Seremaia kin poakohng padahk mehlel me kohsang Mahsen en Koht. E nda: “Komwi ketin mahsendohng ie, I ahpw pahn kanahieng rong sapwellimomwi mahsen kan koaros. Komw ketin sapwellimankin ie, Maing KAUN, Koht Wasa Lapalahpie, iei me sapwellimomwi mahsen kan kadirehkilahr nan mohngiongi peren oh nsenamwahu.” (Ser. 15:16) Seremaia kin medemedewe laud duwen sapwellimen Koht mahsen kesempwal kan, oh e kin poakohng met. E kalahnganki eh kak wia wiliepen Siohwa oh kalohki sapwellime mahsen. Ma kitail poakohng padahk mehlel en Paipel, kitail pahn esehda ia uwen eh wia pai kaselel ehu en wia Sounkadehdehn Siohwa kei oh kalohki duwen Wehio ni imwin rahn akan.

14. Dahme kitail pil kak wia pwehn kalaudehla atail poakohng padahk mehlel en Paipel?

¹⁴ Dahme pil pahn sewese kitail en kalaudehla atail poakohng padahk mehlel en Paipel? Kitail anahne kaukaule towehda mihting en mwomwohdiso, wasa me kitail kin ale kasukuhl sang Siohwa. Atail onop en Paipel ni atail doadoahngki Kahn Iroir ehuehu wihk iei ehu ahl me kitail kin keieu ale kasukuhl. Ma kitail men uhdahn paiekihda mihting wet, kitail anahne kaunopada mwowe. Karasepe, kitail kak rapahkihda iren Paipel kan nan iren onopo. Rahnwet, e mengei ong me tohto en wadek de download Kahn Iroir sang internet. Makasihn wet mie ni lokaia tohto nan neitail website jw.org oh pil JW Library app. Ekei prokram kan kin sewese kitail en mwadang diarada iren Paipel kan. Sohte  lipilipil wiepe dah me kitail kin doadoahngki, ni atail kin wadek kanahieng oh medemedewe laud duwen iren Paipel kan, atail poakohng padahk mehlel en Paipel pahn laudla.​—Wadek Melkahka 1:2.

15, 16. (a) Nin duwen Sohn 13:34, 35, kehkehlik dahieu me Sises ketikihong kitail? (b) Ia duwen atail limpoak ong Koht oh Paipel eh kin pidada atail poakohng riatail Kristian kan?

¹⁵ Kaimwiseklahn pwohng me Sises ketiket sampah, e mahsanihong sapwellime tohnpadahk kan: “I pahn kihong kumwail kosonned kapw ehu: kumwail en poakpene nanpwungamwail. Duwen ei poakohng kumwail, iei duwen kumwail en poakpene. Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.”​—Sohn 13:34, 35.

¹⁶ Poakohng riatail Kristian kan kin pidada atail poakohng Siohwa. Ma kitail sohte poakohng Koht, kitail sohte kak poakohng riatail Kristian kan. Oh ma kitail sohte poakohng riatail kan, kitail sohte kak poakohng Koht. Wahnpoaron Sohn ntingihedi: “E sohte kak poakohng Koht me e sohte kilang, ma e sohte poakohng rie me pein ih kilikilang.” (1 Sohn 4:20) Atail limpoak ong Siohwa oh riatail Kristian kan pil kin pidada atail poakohng Paipel. Dahme kahrehda? Pwehki ma kitail poakohng dahme kitail sukuhlkihsang Paipel, kitail pahn men peikihong kosonned kan loale pwehn poakohng Koht oh riatail Kristian kan.​—1 Pit. 1:22; 1 Sohn 4:21.

17. Ia ekei ahl me kitail kak kasalehda limpoak?

¹⁷ Wadek 1 Deselonika 4:9, 10. Ia ekei ahl mwahu me kitail kak kasalehda limpoak ong irail kan nan atail mwomwohdiso? Brother de sister mah men ele anahne sawas ong mehn peidaid pwehn iang kohla mihting kan oh pil pwurala imweo. Liohdi men ele anahne emen en sewese kamwahwihala soahng kan nan imwe. (Seims 1:27) Riatail kan me kin mworusala, pwunod, de lelohng kahpwal teikan kin anahne kitail en tehk irail, kangoange, oh kansenamwahwih irail. (Lep. Pad. 12:25; Kol. 4:11) Kitail kin kasalehda me kitail poakohng “irail kan me kisehn atail pwoson” sang ni dahme kitail kin nda oh wia.​—Kal. 6:10.

18. Dahme pahn sewese kitail en kamwahwihala iren sawehwe kan me kitail ahneki rehn riatail Kristian kan?

¹⁸ Paipel mahsanih me “ni imwin rahn akan” en koasoandi suwed wet, aramas tohto pahn roporop oh noahrok. (2 Tim. 3:1, 2) Nin duwen Kristian kei, kitail anahne doadoahk laud pwehn kalaudehla atail limpoak ong Siohwa, sapwellime Mahsen, oh ong emenemen. Pwehki kitail soh unsek, ele ekei pak kitail kin ahneki sawehwe nanpwungatail. Ahpw pwehki kitail kin poakohng emenemen, kitail pahn nantihong en kamwahwihala iren sawehwe pwukat ni kadek oh ni ahnsou mwadang. (Ep. 4:32; Kol. 3:14) Kitail en dehr mweidohng atail limpoak en tikitikla! Ahpw, kitail en pousehlahte kasalehda limpoak laud ong Siohwa, sapwellime Mahsen, oh ong riatail Kristian kan.