1, 2. Pagkatapos nin magdamlag na paninira, ano an itinukdo ni Jesus ki Pedro?

PITO sa mga disipulo ni Jesus an magdamlag na nanira sa Dagat nin Galilea pero mayo lamang sindang nadakop. Kan mag-aagahon na, nakatindog sa baybayon an binuhay liwat na si Jesus na pinagmamasdan sinda. Dangan, sinabi niya sa sainda: “‘Iitsa nindo an hikot sa tuong parte kan sakayan asin makakadakop kamo.’ Kaya initsa ninda iyan, alagad dai ninda iyan mabutong huli sa kadakulan nin sira.”—Juan 21:1-6.

² Pagkatapos sindang serbihan ni Jesus nin pamahawan, hinapot niya si Simon Pedro: “Simon na aki ni Juan, mas namumutan mo ako kisa sa mga ini?” Arin daw an pinanunungdan ni Jesus? Gustong-gusto ni Pedro an paninira. Kaya minalataw na hinahapot siya ni Jesus kun arin talaga an mas mahalaga para sa saiya. Mas mahalaga daw para sa saiya an mga sira asin an negosyong paninira kisa ki Jesus asin sa mga itinukdo kaini? Nagsimbag si Pedro: “Iyo Kagurangnan, aram mong may pagkamuot ako sa saimo.” (Juan 21:15) Inutob nanggad iyan ni Pedro. Puon kaidto, talagang pinatunayan niya an saiyang pagkamuot ki Cristo paagi sa pagigin sibot sa paggibo nin mga disipulo  asin sa pagigin sarong harigi kan Kristiyanong kongregasyon kan inot na siglo.

3. Sa anong mga peligro kaipuhan na mag-ingat an mga Kristiyano?

³ Ano an manunudan ta sa mga sinabi ni Jesus ki Pedro? Kaipuhan na magin maingat kita na dai lumuya an satong pagkamuot ki Cristo asin mawara an satong pokus sa Kahadian. Aram na marhay ni Jesus na magigin masakiton an buhay huli sa mga kahaditan sa sistemang ini nin mga bagay. Sa ilustrasyon ni Jesus dapit sa parasabwag, sinabi niya na may mga mag-aako “kan tataramon manungod sa Kahadian” asin magigin mauswag sa primero alagad huli sa ‘kahaditan kan sistemang ini nin mga bagay saka sa mapandayang kapangyarihan nin kayamanan, mapupuot an tataramon.’ (Mat. 13:19-22; Mar. 4:19) Iyo, kun dai kita mag-iingat, an ordinaryong mga kahaditan sa buhay puwedeng makaulang sa paglilingkod niyato ki Jehova. Kaya, pinatanidan ni Jesus an saiyang mga disipulo: “Mag-ingat kamo na an saindong puso dai nuarin man mapagabatan nin sobrang pagkakan asin sobrang pag-inom saka mga kahaditan sa buhay.”—Luc. 21:34.

4. Ano an makakatabang sa sato na maaraman kun gurano kararom an pagkamuot niyato ki Cristo? (Hilingon an ritrato sa kapinunan kan artikulo.)

⁴ Arog kan ginibo ni Pedro, mapapatunayan ta man kun gurano kararom an pagkamuot niyato ki Cristo paagi sa pag-inot niyato sa satong buhay kan gibuhon na itinao niya sa sato. Paano niyato maaaraman kun baga padagos niyatong iniinot iyan? Sa pana-panahon, kaipuhan niyatong haputon an sadiri: ‘Ano talaga an pinakamahalaga sa buhay ko? Sain ako mas nauugma, sa pang-aroaldaw na mga gibuhon o sa espirituwal na mga aktibidad?’ Mapadapit digdi, pag-ulayan niyato an tulong bagay na puwedeng makapaluya sa satong pagkamuot ki Cristo asin pagpapahalaga sa espirituwal na mga bagay kun dai kita magigin balanse—an sekular na trabaho, paglilibang, asin materyal na mga bagay.

5. Anong responsabilidad an itinao ni Jehova sa mga payo nin pamilya?

⁵ Bako lang basta hilig ni Pedro an paninira—iyan an hanapbuhay niya. Sa ngunyan, tinawan man ni Jehova an mga payo nin pamilya nin responsabilidad na sustentuhan an pamilya ninda. (1 Tim. 5:8) Dapat sindang magin mahigos tanganing magibo iyan. Pero sa huring mga aldaw na ini, parating nagigin kawsa nin kahaditan an sekular na trabaho.

6. Taano ta nagigin kawsa nin kahaditan an sekular na trabaho?

⁶ Huli sa grabeng kompetisyon sa paghanap nin trabaho, dakul an napipiritan na magtrabaho nin mas dakul na oras, dawa kun minsan hababa an suweldo. Huli man sa pag-obligar kan mga negosyante sa mga empleyado ninda na padakulon an produksiyon, grabe an nagigin epekto kaiyan sa hawak, isip, asin emosyon ninda. Kun dai man iyan gigibuhon kan mga empleyado, posibleng marhay na mahali sinda sa trabaho.

7, 8. (a) Kiisay niyato panginot na itinatao an satong kaimbudan? (b) Anong mahalagang leksiyon an nanudan nin sarong brother sa Thailand dapit sa saiyang trabaho?

⁷ Bilang mga Kristiyano, an dapat na panginot niyatong tinatawan nin kaimbudan iyo si Jehova, bako an amo ta. (Luc. 10:27) An katuyuhan kan sekular na trabaho iyo na makasustento. Nagtatrabaho kita para sa satong panginot na mga pangangaipo asin tanganing masuportaran an satong ministeryo. Pero kun dai kita mag-iingat, puwedeng maapektaran kan satong trabaho an satong pagsamba. Halimbawa, sarong brother sa Thailand an nagsabi: “Gustong-gusto ko an trabaho ko na maghirahay nin mga kompyuter, pero makipanahon iyan. Kaya, haros mayo na talaga akong oras para sa espirituwal na mga bagay. Pag-abot nin panahon, napag-isip-isip ko na tanganing mainot ko an intereses kan Kahadian, kaipuhan kong maghanap nin ibang trabaho.” Ano an ginibo niya?

⁸ Sinabi niya: “Pagkatapos nin sarong taon na  pagplano, nagdesisyon akong magtinda nin ice cream sa tinampo. Sa primero, nasakitan ako sa pinansiyal kaya nadisganar ako. Pag nahihiling ako kan mga dati kong katrabaho, pigngingirisihan ninda ako tapos naghahapot kun ta’no man ta mas pinili kong magtinda nin ice cream kisa maghirahay nin mga kompyuter tapos naka-aircon pa. Namibi ako ki Jehova na tabangan akong makatagal saka maabot an pasuhan kong makatao nin mas dakul na panahon sa espirituwal na mga aktibidad. Paghaloy-haloy, nagrahay na an sitwasyon. Nakukua ko na an timplang gusto kan mga kostumer saka nagin mas matibay na ako sa paggibo nin ice cream. Dai nahaloy, nauubos na aroaldaw an pigtitinda kong ice cream. An totoo, mas nagdakul an income ko kisa kaidtong naghihirahay ako nin mga kompyuter. Mas maugma ako dahil mayo na an stress saka an mga kahaditan na dara kan dati kong trabaho. Saka an pinakamahalaga, mas harani na ako ngunyan ki Jehova.”—Basahon an Mateo 5:3, 6.

9. Paano kita magdadanay na balanse kun dapit sa satong sekular na trabaho?

⁹ An kahigusan sarong diyosnon na kuwalidad, asin kapaki-pakinabang nanggad kun mahigos kita. (Tal. 12:14) Pero, arog kan nanudan kan brother na sinambit sa inutan, kaipuhan na magin balanse kita kun dapit sa sekular na trabaho. Sinabi ni Jesus: “Kun siring, padagos na hanapon nguna an Kahadian saka an saiyang katanusan, asin an gabos na iba pang bagay na ini [an panginot na materyal na mga pangangaipo] idadagdag sa saindo.” (Mat. 6:33) Para maaraman kun baga balanse kita kun dapit sa sekular asin sa espirituwal na mga paninimbagan, marahay na ihapot ta sa sadiri: ‘Maugma daw ako saka gustong-gusto ko daw pag nasa trabaho ako, pero garo ordinaryo saka rutina sana sako an espirituwal na mga aktibidad?’ Makakatabang an paghurop-hurop sa bagay na iyan tanganing maaraman kun ano talaga an pinakamahalaga para sa sato.

10. Anong mahalagang leksiyon an itinukdo ni Jesus dapit sa kun ano an dapat na magin priyoridad niyato?

¹⁰ Ipinahiling sa sato ni Jesus kun paano magigin balanse sa sekular asin espirituwal na mga bagay. Nagbisita kaidto si Jesus sa harong kan magtugang na Maria asin Marta. Mantang sibot-sibot si Marta sa pagpreparar nin kakanon, si Maria man nakatukaw sa pamitisan ni Jesus asin nagdadangog sa mga sinasabi kaini. Kan magreklamo si Marta huling dai siya tinatabangan ni Maria, sinabi ni Jesus ki Marta: “Si Maria, pinili niya an mas marahay, asin dai iyan kukuanon sa saiya.” (Luc. 10:38-42) Tinukduan ni Jesus si Marta nin sarong mahalagang leksiyon. Tanganing dai kita maulang kan sekular na mga bagay asin mapatunayan na namumutan niyato si Cristo, dapat na padagos niyatong pilion “an mas marahay”—na magin priyoridad an espirituwal na mga bagay.

11. Ano an sinasabi kan Bibliya mapadapit sa pagpahingalo asin pagrelaks?

¹¹ Sa kadakulan kan ginigibo ta aroaldaw, kaipuhan man niyatong magpahingalo asin magrelaks paminsan-minsan. Sinasabi kan Bibliya: ‘Mayong bagay na urog karahay sa tawo kundi an magkakan asin mag-inom asin an saiyang kalag makahiling kan karahayan kan saiyang hinigusan.’ (Par. 2:24) Aram ni Jesus na kaipuhan man an pagpahingalo. Halimbawa, pagkatapos na makobrehan an sarong mahiwas na teritoryo, sinabi ni Jesus sa saiyang mga disipulo: “Madya kamo, magduman kita sa sarong tagong lugar na kita-kita sana asin magpurupahingalo.”—Mar. 6:31, 32.

12. Sa ano kita dapat mag-ingat kun dapit sa paglilibang? Magtao nin halimbawa.

¹² Iyo, kapaki-pakinabang an paglilibang para makapahingalo asin makapagrelaks kita. Pero dapat kitang mag-ingat na dai iyan magin panginot sa satong buhay. Kan inot na siglo, dakul an may kaisipan na, “Magkarakan kita asin mag-irinom, ta sa aga magagadan na kita.” (1 Cor.  15:32) Lakop man an kaisipan na iyan sa kinaban ngunyan. Halimbawa, pirang taon na an nakalihis, sarong hoben na lalaki sa Europa an nagpuon na mag-atender sa mga pagtiripon. Kaso, huli sa pagkabangkag sa paglilibang, nagpundo siya sa pakikiasosyar sa mga lingkod ni Jehova. Pero pag-abot nin panahon, narealisar niya na mga problema asin pagkadisganar sana an nakua niya kan magin panginot sa saiya an paglilibang. Kaya, ipinagpadagos niya giraray an pag-adal sa Bibliya asin kan huri nagin parahayag kan maugmang bareta. Pagkatapos niyang mabawtismuhan, sinabi niya: “An solamenteng pinagbabasulan ko iyo na dakulon na panahon an nasayang bago ko napag-isip-isip na mas nagtatao nin urog na kaugmahan an paglilingkod ki Jehova kisa sa paghihinguwang manamitan an iinaalok na mga libangan kan kinaban na ini.”

13. (a) Magtao nin ilustrasyon dapit sa peligro nin pagigin bakong balanse sa paglilibang. (b) Ano an makakatabang sa sato na mapagdanay na balanse an satong pagmansay dapit sa paglilibang?

¹³ Naglilibang kita tanganing maginhawahan asin maibalik an satong kusog. Pero guranong panahon an dapat niyatong gamiton para diyan? Pag-isipan an pagkumparar na ini: Dakul sa sato an gustong magkakan nin pandulse o dessert paminsan-minsan, pero aram niyato na maraot an magigin epekto sa hawak ta kun sige-sige an pagkakan ta kaiyan. Sa kaparehong paagi, kun sige-sige man an paglilibang ta, mapapaluya kaiyan an satong espirituwalidad. Tanganing malikayan iyan, dapat na regular kitang nakikikabtang sa mga gibuhon na pang-Kahadian. Paano niyato maaaraman kun baga balanse kita pag-abot sa libangan? Puwede kitang pumili nin sarong semana, tapos ilista niyato kun gurano kadakul na oras an ginagamit ta para sa espirituwal na mga aktibidad, arog kan pag-atender sa mga pagtiripon, paghuhulit, asin personal na pag-adal saka pampamilyang pagsamba. Dangan sa semana man sanang iyan, ilista ta man an oras na ginagamit niyato para sa paglilibang, arog nin isport, mga kinahihiligan, paghiling nin telebisyon, o pag-video game. Ano kaya an madidiskubre ta pag ikinumparar ta iyan? Kaipuhan daw niyatong bawasan an panahon na ginagamit ta sa paglilibang?—Basahon an Efeso 5:15, 16.

14. Ano an dapat na gumiya sa sato sa pagpili nin libangan?

¹⁴ Libreng pumili an kada saro asin an mga payo nin pamilya kun anong libangan an gusto ninda, basta kauyon iyan kan mga prinsipyo sa Bibliya na itinao ni Jehova. * An kapaki-pakinabang na libangan regalo o ‘balaog nin Diyos.’ (Par. 3:12, 13) Siyempre, aram niyato na magkakalain an libangan na gusto kan kada saro. (Gal. 6:4, 5) Pero, ano man na libangan an pilion ta, kaipuhan pa man giraray niyatong mag-ingat. Sinabi ni Jesus: “Kun hain an saimong kayamanan, yaon man duman an saimong puso.” (Mat. 6:21) Kaya, kun talagang udok sa puso an satong pagkamuot ki Jesus, papahiruon kita kaiyan na ipokus an satong mga iniisip, sinasabi, asin mga ginigibo panginot na sa mga gibuhon na pang-Kahadian imbes na sa pang-aroaldaw na mga aktibidad sa buhay.—Fil. 1:9, 10.

15, 16. (a) Paano puwedeng magin silo sa sarong Kristiyano an materyalismo? (b) Anong madunong na sadol an itinao ni Jesus dapit sa materyal na mga bagay?

¹⁵ Sa ngunyan, dakul na tawo an pirmi na sanang iniisip an pinakausong mga istilo nin pagbado, pinakabagong gadyet, asin kun ano-ano pa. Kaya bilang Kristiyano, kaipuhan na regular mong siyasaton kun ano na an pinakamahalaga para sa saimo. Haputon an sadiri: ‘Mas dakul daw na panahon an ginagamit ko sa pag-research asin pagparaisip dapit sa pinakabagong mga modelo nin kotse o disenyo nin bado kisa sa pag-andam ko para sa mga pagtiripon? Sibot-sibot daw ako sa pang-aroaldaw na mga aktibidad sa buhay  kaya dai na ako gayong nakakapamibi o nakakabasa nin Bibliya?’ Kun naririsa tang natatahuban na kan pagkamuot niyato sa materyal na mga bagay an satong pagkamuot ki Cristo, dapat niyatong hurop-hurupon an sinabi ni Jesus: “Mag-ingat sa gabos na klase nin kahanaban.” (Luc. 12:15) Taano ta itinao ni Jesus an seryosong patanid na iyan?

¹⁶ Sinabi ni Jesus na “dai nin siisay man na makakapaglingkod bilang uripon nin duwang kagurangnan.” Sinabi pa niya: “Dai kamo makakapaglingkod bilang uripon nin Diyos asin nin Kayamanan.” Taano? Huling parehong hinahagad kan duwang “kagurangnan” na iyan an satong eksklusibong debosyon. “Magsalang ikakaungis [niyato] an saro asin mamumutan an saro, o magigin maimbod [kita] sa saro asin hahabuan an saro,” an sabi ni Jesus. (Mat. 6:24) Kita gabos bakong perpekto, kaya kaipuhan niyatong padagos na labanan an “mga pagmawot kan satuyang laman,” kaiba na an materyalismo.—Efe. 2:3.

17. (a) Taano ta nasasakitan an mga tawong may makalaman na kaisipan na magin balanse pag-abot sa materyal na mga bagay? (b) Ano an makakatabang sa sato na malabanan an materyalistikong mga pagmawot?

¹⁷ An mga tawong makalaman an kaisipan nasasakitan na magin balanse pag-abot sa materyal na mga bagay. Taano? Huling nagluya na an saindang espirituwal na pakamati. (Basahon an 1 Corinto 2:14.) Huling maluya na an kakayahan sa pagsabot asin dai na nakakapag-isip nin malinaw, nasasakitan sindang mahiling an pagkakaiba kan tama asin sala. (Heb. 5:11-14) Iyan an dahilan kaya may mga tawong dai na makontrol an pagmawot sa materyal na mga bagay—sarong pagmawot na nungkang mapapaniguan. (Par. 5:10) Marahay na sana ta may pangontra sa materyalismo: an regular na pagbasa kan Tataramon nin Diyos, an Bibliya. (1 Ped. 2:2) Kun paanong napakusog si Jesus kan katotoohan hali sa Diyos na isikwal an sugot, matatabangan man kita kan pag-aplikar kan mga prinsipyo sa Bibliya na malabanan an materyalistikong mga pagmawot. (Mat. 4:8-10) Kun gigibuhon ta iyan, maipapahiling tang mas namumutan ta si Jesus nin urog kisa sa ano man na materyal na bagay.

18. Ano an determinado mong gibuhon?

¹⁸ Kan haputon ni Jesus si Pedro: “Mas namumutan mo ako kisa sa mga ini?” ipinapagirumdom niya ki Pedro na dapat na magin panginot sa saiyang buhay an espirituwal na mga bagay. Si Pedro, na an pangaran nangangahulugan na “Sarong Pidaso nin Gapo,” talagang namuhay kauyon kan saiyang pangaran, huling nagpahiling siya nin arog sa gapong mga kuwalidad. (Gibo 4:5-20) Sa ngunyan, determinado man kitang papagdanayon na makusog an satong pagkamuot ki Cristo kaya hinihinguwa niyato na magin balanse kita kun dapit sa sekular na trabaho, paglilibang, asin materyal na mga bagay. Lugod na an satong mga desisyon sa buhay magpahiling kan sabuot na kapareho kan ki Pedro, na nagsabi ki Jesus: “Kagurangnan, aram mong may pagkamuot ako sa saimo.”