1, 2. Nsili ôvé Yésus a nga sili Pierre?

BEYÉ’É be Yésus zangbwal be ndôme lôte ngumba alu mañe ya Galilée, be yobe kos, ve teke bi jôm. Yésus a wômôya, a fombô be a bete éfunga. Kalate Zambe a jô na: “Ane a nga jô be na, yaan avot mfa’ éfunga ya mbo nnôm, wôna mi aye wôé. Be nga ya de nalé, ane be nga bo te ngule ya dutu de amu kos abui.”—Jn. 21:1-6.

² Éyoñ a maneya ve be bidi, ane Yésus a nga sili Pierre na: ‘A Simon mone [Jean], ye wo nye’e ma a dañe biôm bi?’Jé Yésus a mbe a jô je? Pierre a mbe a nyeke’e a yobô kos. Ajô te, Yésus a mbe a yiane sili nye jé nje a dañe nye’e. Ye kos a ésaé ya yobe kos, ye Yésus a mam a nga ye’ele be? Pierre a nga yalane nye na: “Ôwé, a [Tat], wo yeme na ma nye’e wo.” (Jn. 21:15, Mfefé Nkôñelan.) Ôwé, Pierre a nga liti na a nye’e Yésus. Ataté éyoñ éte, Pierre a nga ve émien ngumba ngumba ésaé ya bo beyé’é, a nga suk akônda Bekristen ya ntete mimbu ôsu nya nsu’ane.

3. Bekristen ba yiane tabe ntyel a jé?

 ³ Jé nsili Yésus a nga sili Pierre ô ne ye’ele bia? Bia yiane tabe ntyele ya jô’é na, nye’ane bia nye’e Krist ô voé, a na, bi telé mame ya Éjôé Zambe mvus. Yésus a mbe a kôme yeme na, minjuk a mame ya émo ji, bi ne te’e bia nsisim. Éyoñ a nga nyoñ éve’ela ya mvoñ, Yésus a nga jô na bôt béziñ ba ye kañese “mejô y’Éjôé” a tyendé, ve a nga jô fe na, “mame ya si nyô me atyelé môt nleme yôp, a medu’ane ya akum” ma ye “yametane mejô” mete. (Mt. 13:19-22; Mc. 4:19, Mfefé Nkôñelan.) Ajô te, nge bi nji tabe ntyel, minju’u ya ényiñ mi ne jaé bia minlem, a te’e bia nsisim. Ve Yésus a nga ve beyé’é bé abendé di: “Miabebien, taba’an ntye, a za bo na minlem mienan mi aye bo atek amu mbia ndian, a nyuane bilam, a nju’u ya si nyô.”—Lc. 21:34.

4. Jé ja ye volô bia na bi yem nge bia nye’e Yésus nya nye’ane? (Fombô’ô fôtô ya atata’a ya ayé’é di.)

⁴ Minlañe Yésus a nga laan a Pierre éyoñ a wômôya mia ye’ele bia na, éyoñe bia telé ésaé Yésus a nga ve bia ôsu ényiñe jangan, bia liti na bia nye’e nye nya nye’ane. Aval avé bi ne tabe ndi na, bia ke ôsu a bo de? Ane éyoñe ja lôt, bia yiane sili biabebiene na: ‘Jé ma dañe nye’e? Jé ja dañe ve ma mevak, ye mam ya émo, ye ma ya nsisim?’ Ajô te, bi tame zu fase mam mela ya ényiñ bia yiane telé été ja yiane me. Nge nalé momo, nye’ane bia nye’e Krist, a mame ya nsisim wo ye voé. Bia zu kobô ajô asu ésaé dangan, mimvôman, a biôm bi mo.

5. Mbe’e ôvé Kalate Zambe a ve minlô ya menda me bôt?

⁵ Pierre a nji be a yobô kos asu ya na a jañele éyoñ. Ésaé éte é mbe é volô’ô nye na, a toñe nda bôte jé. Minlô ya menda me bôt mia yeme na, Kalate Zambe a ve be mbe’e ya toñe menda me bôte map mimfa’a mise. (1 Tim. 5:8) Ba saé a ngule jap ése asu ya na be bo de. Ve, melu ya asu’ulane ma, minju’u bôt ba tôbane mie, mia so fe be mesu m’ésaé map.

6. Den, minju’u mivé bôte ba tôbane mie mesu m’ésaé map?

⁶ Mbôle bôte be ne abui, bisaé ke tyôtyoé, abui bebo bisaé da yiane saé tañ abui mewolo, ja’a be nji ya’ane be avale da yian. Nde fe na, mbôle bemasa ba yi nsenge, ba tindi bebo bisaé na be saé a lôte nné, nalé a te’e be mimfa’a mise. Bebo bisaé ba bene bo nalé, be ne jañele ésaé jap.

7, 8. (a) Za nnye bia yiane dañe nye’e? (b) Jé mojañ éziñe ya Thaïlande a nga yé’é a lat a ésaé Jé?

⁷ Mbôle bi ne Bekristen, Yéhôva Zambe nnye bia yiane dañe nye’e, sa ke masa wongan. (Lc. 10:27) Asu ésaé dangan da volô bia na, bi telé Éjôé Zambe ôsu. Bia saé mfa’a ya toñe biabebien, a su’u ésaé nkañete jangan. Nge bi teke tabe ntyel, asu ésaé dangan e ne zu nyoñ éyoñe bia ve Yéhôva. Bi tame nyoñ éve’an: Mojañ éziñe ya Thaïlande a kañete na: “Me mbe me kôme b’ordinateur, me mbe me nye’e ésaé jam nya abui, ve me mbe me saé tañ abui mewolo. Nalé a nga bo na, me bo teke bi éyoñ asu mame ya nsisim. Me nga su’ulane yene na, nge ma kômbô telé Éjôé Zambe ôsu, ma  yiane tyendé ésaé éte.” Jé mojañ nyi a nga bo?

⁸ A jô na: “Éyoñe me ta’aya mam tañe ngumba mbu, ane me nga tyi’i na, ma zu kuane bizezek minjoñe minjoñ. Atata’a, bôte be mbe be kuse be mbe tyôtyoé, nde me nga bili atek. Éyoñe me mbe me tôba’ane bôte bia be be bi mbe bi taté’é saé, be mbe be kpwe’ele ma, be sili’i ma na, amu jé ma simesane na, e kuane bizezek a ne mfi a dañ ésaé me mbe me taté’é bi. Me nga ye’elane Yéhôva, me nga sili nye na a volô ma na, me jibi nju’u ôte, ndemben me tôé nsôñane ya bi abui éyoñ asu mame ya nsisim. Mam me nga tyendé ane éyoñ é nga lôt. Bôt be nga mane yembane bizeze’e biam, me mbe fe me nga yeme tu’a bo bie. Mvuse mon éyoñ, a mbe na, abime bizeze’e ese ma kui de, ma mane kuan. Éyoñe ji, moné ma bi a dañe nyi be mbe be ya’ane ma nnôm asu ésaé dam. Me ne mevak, amu nlem ô nji dañe beta tyebe ma yôp ane éyoñ me mbe me kôme b’ordinateur. Jam da dañe mfi e ne na, amvôé bia Yéhôva e ntoo ngul.”—Lañe Matthieu 5:3, 6.

9. Aval avé bi ne bi mbamba ôsimesan a lat a asu ésaé dangan?

⁹ Môt a yeme belane fe’e jé, a nye’e fe ésaé, a ye yene mfi ya été. (Min. 12:14) Avale mojañe bia te jôô nye yôp a nga yé’é, asu ésaé dangan, da yiane tebe été ja yiane je. Yésus a nga jô na: “Tata’a jeñan Éjôé a zôsôô Zambe, a biôm bite bise [biôm bi mo bia dañe mfi] bia ye vebane mia abet.” (Mt. 6:33, Mfefé Nkôñelan.) Asu ya na bi yem nge bi bili mbamba ôsimesan a lat a asu ésaé dangan, a mimbe’e miangane ya nsisim, bia yiane sili biabebiene na: ‘E mise mam, ye asu ésaé dam da soo ma mevak a dañe mame ya nsisim?’ Bi ne yeme jam bia dañe nye’e, éyoñe bia fase jam da dañe soo bia mevak, ye asu ésaé dangan, ye mame ya nsisim?

10. Beta ñye’elane mbé Yésus a nga ve a lat a mam bia yiane telé ôsu ényiñe jangan?

¹⁰ Yésus a nga ve mbamba éve’ela ya tôñ mfa’a ya telé mame ya ényiñ été ja yiane me. Môs éziñ, a nga ke jome Marie, ba monyañe wé Marthe. Nté Marthe a mbe a wo’o nju’u ya yame bidi, Marie ki a nga tobe na a ke tabe fefele Yésus, a vô’ôlô nye. Mbôle Marthe a nga wô’ô ôlun amu Marie a nji zu volô nye, nde Yésus a nga jô nye na: “Marie a tobeya e ngap é ne mvaé ba ye bo te vaa nye je.” (Lc. 10:38-42, Mfefé Nkôñelan.) Yésus a nga ve Marthe beta ñye’elan. Bia yiane ke ôsu a tobe “ngap é ne mvaé.” Nalé aye volô bia na, bi bo teke telé mame ya ényiñ ôsu, a liti na bia nye’e Krist.

11. Jé Kalate Zambe a jô a lat a awo’on?

¹¹ E ne mfi ya wo’one biyoñe biziñ, éyoñe bi saéya abui. Kalate Zambe a jô na: “Jam afe e nji bo môt mvaé ve na, a ja’ak a nyu, a tindi nleme wé ô wô’ô mvaé ésaé jé.” (Ec. 2:24) Yésus émien a nga yene na, e ne mfi ya wo’on. Éyoñe be nga man ésaé nkañete be nga bo ngumba môs, a nga jô beyé’é bé na: ‘Miabebien, nkeane vôm bôt be ne momo, bi wo’an ôbe nté.’—Mc. 6:31, 32.

12. Jé bia yiane tabe je ntyel éyoñ bia wo’on a éyoñe bia vôman? Va’ak éve’an.

 ¹² Ôwé, awo’on, a mimvôman bi ne fo’o nya mfi. Ve mbia jam a ne na, mam mete me ne taté na ma nyoñe bia abui éyoñ. Ntete mimbu ôsu, abui bôt e mbe e jô’ô na: “Nja’akan a nyuan, amu akiti [bia ye wu].” (1 Bec. 15:32) Bôt abui ya melu ma, ba jô fe avale da. Éve’an é ne na, ésoé éziñe ya Ouest ya Europe é nga taté na ja tabe bisulan. Ve mbôle nye’an a mbe a nye’e mimvôman ô mbe ngul, nde a nga telé na a yeñ a Bengaa be Yéhôva. Ve a nga su’ulane yene na, mimvôman mia soo nye ve minjuk, a na mvaé a wô’ô éyoñ a vôman é ne ve étun éyoñ. Ane a nga beta taté na a yé’é Kalate Zambe, a su’ulane fe bo nkañete mbamba foé. Éyoñ a dubaneya, a nga jô na: “Jam ma jôban e ne éyoñ ése me nga jañele, ôsusua na ma zu yeme na, e kañe Yéhôva a soo abui mevak a lôte meva’a mimvômane ya émo ji mia soo me.”

13. (a) Éve’an évé ja liti na, bia yiane fas abim éyoñ bia nyoñ éyoñe bia vôman? (b) Jé é ne volô bia na, bi ba’ale mbamba ôsimesan a lat a awo’on a mimvôman?

¹³ Awo’on da ve bia ngule nyul. Ve abim éyoñ avé bia yiane wo’on? Tame fas éve’ane ji: Abui bôt da nye’e da di bizezek biyoñe biziñ, ve bia yeme na, e dañe di bizezek a ne soo bia akon. Ajô ete nde, bia yiane di benya bidi. Avale da fe, bi ne te’e nsisim, nge bia dañe vôman, a wo’on. Jôm éte nje bia yiane bo mbane ya bo mame ya nsisim. Jé é ne volô bia na, bi yem nge bi bili mbamba ôsimesan a lat a awo’on? Tame ve’ele bo jame di: Tobe sondô, lañek abime mewolo wo lôt éyoñe wo bo mame ya nsisim, aval ane e tabe bisulan, e kañete, e bo ayé’é étam, nge ayé’é ya nda bôt. Mvuse ya valé, ve’e éyoñ éte a éyoñe wo lôte na, wo bo mimvôman aval ane, e bo bivôé, e yene telé, nge vôé a minsini bivôé. Mewolo mevé ma dañ abui? Ye da ye sili na, ô sé’é abime “bizezek éziñ”?—Lañe Beéphésien 5:15, 16.

14. Avale mimvôman avé bia yiane top?

¹⁴ Bôte ba nyiñ étam, a minlô ya menda me bôt, be ne fili ya top mimvôman ba nye’e. Ve ba yiane fas nge mimvôman ba top, mi ne avale mimvôman e nji tyame metiñe me Yéhôva. * Mimvôman mi ne “mveane Zambe.” (Ec. 3:12, 13, Mfefé Nkôñelan.) E ne été na, bôte bese be nji nye’e avale mimvômane da. (Beg. 6:4, 5) Éyoñe bi tobeya avale mimvôman éziñ, bia yiane jeñe na, bi telé mie été ja yiane mie. Yésus a nga jô na: “Vôm a ne wo akum, vôm ate fe nleme wôé ô né.” (Mt. 6:21) Nde ñhe nye’an bia nye’e Yésus, wo ye tindi bia na, bi taté futi ényiñe jangan ése, asimesane dangan ase, a mimboone miangan mise asu mam ya Éjôé, a lôte na bi dañe fase mam ya ényiñe ji.—Beph. 1:9, 10.

15, 16. (a) Aval avé ôzañ akum ô ne bo abé asu Kristen? (b) Abendé avé Yésus a nga ve a lat a biôm bi mo?

¹⁵ Abui bôte ya melu ma da kômbô biyé, b’appareil, a biôm bise bi ndôme kui. Ve Kristen ése ja yiane bo mban ya fas miñyiane mié a zene ya avale minsili di: ‘Ye biôm bi mo bi ne mfi mise mam aval e ne na, ma lôt abui éyoñ na  me jeñ, a fas avale me ne bi mfefé metua, nge mfefé éyé, a lôt éyoñe ma kômesane bisulan? Ye ma tyelé nleme wom yôp mfa’a ya mam ya ényiñ, aval e ne na, me nji beta bi éyoñe ya ye’elan, nge lañe Kalate Zambe?’ Nge bia yene na bia nye’e biôm bi mo a dañe Krist, bia yiane tôñe mejô me Yésus ma: “Tuka’a tabane ntyel a aval ôzañ akum ese.” (Lc. 12:15, Mfefé Nkôñelan.) Amu jé Yésus a nga ve beta abendé ate?

¹⁶ Yésus a nga jô na, “te ke môt a ne saane bemasa bebaé.” A nga beta jô na: “Mi se nguleya saane Zambe ba [akum].” A nga jô nalé amu “bemasa” bete bebaé be ne aban. Yésus a nga jô na, bia ye “vini wua a nye’e nyô mbok,” nge ke na, bia ye “kabetane wua a biasé nyô mbok.” (Mt. 6:24, Mfefé Nkôñelan.) Mbôle bi ne bebo mam abé, bia bese bia yiane wosan ôzañ akum, amu ô ne jame da ya “mbia minkômbane ya minsôn.”—Beép. 2:3.

17. (a) Amu jé e ne ayaé asu môt a fas mame ya minsône na, a bi mbamba ôsimesan a lat a biôm bi mo? (b) Biañ fé é ne volô bia na, bi wosane fulu ôzañ akum?

¹⁷ E ne ayaé asu môt a fas mame ya minsône na, a bi mbamba ôsimesan a lat a biôm bi mo. Amu jé? Amu a nji nyoñ éyoñe ya fas mame ya nsisim. (Lañe 1 Becorinthien 2:14.) Mbôl a fase mame ya minsôn, a nji fe bi mefe’e ya yemelane mvaé a abé. (Beh. 5:11-14) Jam ete da bo na, bôt béziñ be kate jôé nkômbane ya bi biôm bi mo, a too ke na, ba vo’o ke jalé nkômban ôte môs éziñ. (Ec. 5:10) Mbamba jam a ne na, biañ ja saé ôkon ôte é ne: e bo mban ya yé’é Kalate Zambe. (1 P. 2:2) Aval ane Yésus a nga kui na a dañe meve’ele, amu a mbe a bindi’i Mejô me Zambe, bia fe bia ye kui na bi wosane fulu ôzañ akum, éyoñe bia tôñe miñye’elane ya Kalate Zambe. (Mt. 4:8-10) Éyoñe bia bo nalé, bia liti na bia nye’e Yésus a lôte biôm bi mo.

18. Ntyi’an ôvé wo nyoñ?

¹⁸ Éyoñe Yésus a nga sili Pierre na, ‘Ye wo nye’e ma a dañe biôm bi,’ a mbe a kômbô’ô jô Pierre na, a yiane telé mame ya nsisim ôsu ényiñe jé. Pierre, nnye éyôlé ja tinane na, “Éfus akok,” a nga bo fo’o aval éyôlé jé ja liti, a mbe a bili mefulu ma wô’é a éyôlé jé. (Mam. 4:5-20) Melu ma, bia fe bia nyoñe ntyi’ane ya ba’ale nye’ane bia nye’e Krist, a telé asu ésaé dangan, awo’on, a biôm bi mo, été ja yiane bie. Ngo’o nge mintyi’ane mise bia nyoñe mia liti na, bi ne tyiñe jia a Pierre, nnye a nga yalane Yésus na: “Ôwé, a [Tat], wo yeme na ma nye’e wo.”