1, 2. Human sa tibuok gabiing pagpangisda, unsay nasinatian ni Pedro?

PITO sa mga tinun-an ni Jesus ang tibuok gabiing nangisda sa Dagat sa Galilea apan walay kuha. Ang nabanhawng si Jesus didto sa baybayon, nga nagtan-aw nila. Dayon, siya miingon kanila: “‘Itaktak ang pukot sa tuo nga bahin sa sakayan ug may pipilang makaplagan ninyo.’ Busa gitaktak nila kini, apan dili na sila makabira niini tungod sa duot sa mga isda.”—Juan 21:1-6.

² Human sila daliti ug pamahaw, si Jesus miingon kang Simon Pedro: “Simon anak ni Juan, gihigugma mo ba ako labaw pa niini?” Unsay gitumong ni Jesus? Si Pedro ganahan kaayong mangisda. Busa, lagmit gipangutana siya ni Jesus kon unsay labaw niyang gihigugma. Mas gihigugma ba niya ang pagpangisda kay kang Jesus ug ang mga butang nga gitudlo Niya? Si Pedro mitubag: “Oo, Ginoo, nahibalo ka nga gimahal ko ikaw.” (Juan 21:15) Gipamatud-an gayod ni Pedro ang iyang giingon. Sukad niadto, gipamatud-an niya ang iyang gugma kang Kristo pinaagi sa pagkugi diha sa buluhatong paghimog mga tinun-an, ug nahimo siyang pundasyon sa unang siglong kongregasyon.

3. Unsang mga kapeligrohan ang angayng bantayan sa mga Kristohanon?

 ³ Unsay atong makat-onan sa gisulti ni Jesus kang Pedro? Kinahanglang mag-amping ta nga dili maluya ang atong gugma kang Jesus ug mapasagdan ang buluhaton sa Gingharian. Nahibalo gayod si Jesus sa mga presyur gumikan sa mga kabalaka niining sistemaha sa mga butang. Sa iyang ilustrasyon bahin sa magpupugas, si Jesus miingon nga ang pipila modawat sa “pulong sa gingharian” ug mouswag sa sinugdan apan “ang kabalaka niining sistema sa mga butang ug ang malimbongong gahom sa mga bahandi motuok sa pulong.” (Mat. 13:19-22; Mar. 4:19) Sa pagkatinuod, kon dili ta magbantay, ang adlaw-adlawng mga kabalaka sa kinabuhi makahaylo sa atong kasingkasing ug makapaluya nato sa espirituwal. Busa, gipasidan-an ni Jesus ang iyang mga tinun-an: “Bantayi ang inyong kaugalingon nga ang inyong mga kasingkasing dili mabug-atan sa pagpalabig kaon ug sa pagpalabig inom ug sa mga kabalaka sa kinabuhi.”—Luc. 21:34.

4. Unsay makatabang nato sa pagkahibalo kon unsa ka lalom ang atong gugma kang Kristo? (Tan-awa ang hulagway sa sinugdan sa artikulo.)

⁴ Sama sa gibuhat ni Pedro human sa iyang pagpakig-estorya sa nabanhawng si Jesus, atong mapamatud-an ang kalalom sa atong gugma kang Kristo pinaagi sa pag-una sa buluhaton nga iyang gisugo kanato. Unsaon nato pagseguro nga padayon natong mahimo kana? Matag karon ug unya, angay natong pangutan-on ang kaugalingon: ‘Unsa man gyoy labaw nakong gihigugma? Unsa may makahatag nakog dakong kalipay, ang espirituwal nga kalihokan o ang adlaw-adlawng kalihokan?’ Maylabot niini, hisgotan nato ang tulo ka bahin sa kinabuhi nga kon dili ta balanse, mahimong makapaluya sa atong gugma kang Kristo ug sa espirituwal nga mga butang—ang sekular nga trabaho, kalingawan, ug materyal nga mga butang.

5. Unsay Kasulatanhong responsibilidad sa mga ulo sa pamilya?

⁵ Para kang Pedro, ang pagpangisda dili kay lingawlingaw lang—iya gyod tong panginabuhian. Karon, giila sa mga ulo sa pamilya nga duna silay Kasulatanhong responsibilidad sa pagtagana sa materyal nga panginahanglan sa ilang pamilya. (1 Tim. 5:8) Kinahanglang magkugi sila aron matuman kini nga obligasyon. Apan, niining kataposang mga adlaw, ang sekular nga trabaho sagad magpahinabog kabalaka.

6. Unsay mga presyur sa sekular nga trabaho?

⁶ Tungod kay daghan ang nangitag trabaho ug diyutay lang ang trabahong masudlan, daghang trabahante ang napugos sa pag-obertaym, usahay bisag gamay rag suweldo. Dugang pa, tungod sa kanunayng presyur sa paggamag dugang mga produkto, ang mga trabahante nabug-atan sa pisikal, mental, ug emosyonal. Ang mga trabahante nga dili andam mosakripisyo alang sa ilang kompaniya mameligrong mapotbol sa trabaho.

7, 8. (a) Kang kinsa kita unang magmaunongon? (b) Unsang importanteng leksiyon ang nakat-onan sa usa ka brader sa Thailand bahin sa iyang trabaho?

⁷ Ingong mga Kristohanon, angay nga mas maunongon ta kang Jehova, imbes sa atong amo. (Luc. 10:27) Ang sekular nga trabaho maoy usa ka paagi nga matagan-an ang atong pangunang panginahanglan ug masuportahan ang atong ministeryo. Pero, kon dili ta magbantay ang trabaho mahimong makabalda sa atong pagsimba. Pananglitan, usa ka brader sa Thailand miingon: “Makalingaw kaayo ang akong trabaho nga pagpangreper ug computer, pero dakong panahon ang akong magugol niini. Mao nga halos wala na koy panahon para sa espirituwal nga mga butang. Sa ulahi, akong naamgohan nga aron mauna ang buluhaton sa Gingharian, kinahanglang mangita kog laing trabaho.” Unsay iyang gihimo?

 ⁸ Siya miingon: “Human sa mga usa ka tuig nga pagplano, nakadesisyon kong manuroy ug ice cream. Sa sinugdan, ako nagkalisodlisod ug nahigawad. Dihang masugatan nako ang kanhi nakong mga kauban sa trabaho, ila kong kataw-an ug pangutan-on kon nganong nagtuo ko nga mas maayo ang pagpanuroy ug ice cream kay sa pagreper ug mga computer diha sa may aircon nga trabahoan. Nag-ampo ko kang Jehova, nga nangayog tabang kaniya aron makalahutay ug makab-ot ang akong tumong nga makagahin ug dugang panahon sa espirituwal nga kalihokan. Wala madugay, miarang-arang ang akong kahimtang. Mas nasinati ko sa gusto sa akong mga kustomer ug nahimo kong hanas sa paghimog ice cream. Wala madugay, mahurot ug ka halin ang akong ice cream kada adlaw. Sa tinuoray lang, mas maayo ang akong kita kay sa dihang nangreper pa kog computer. Mas malipayon ko kay wala na ang stress ug kabalaka nga akong gibati sa una nakong trabaho. Ug labawng hinungdanon, mas nasuod ko karon kang Jehova.”—Basaha ang Mateo 5:3, 6.

9. Sa unsang paagi mahuptan nato ang timbang nga panglantaw maylabot sa atong trabaho?

⁹ Ang pagkakugihan usa ka maayong hiyas, ug duna kiniy mga ganti. (Prov. 12:14) Bisan pa niana, sama sa nakat-onan sa brader nga gihisgotan ganina, kinahanglang magmabalanse maylabot sa sekular nga trabaho. Si Jesus miingon: “Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang [pangunang materyal nga mga panginahanglan] igadugang ra kaninyo.” (Mat. 6:33) Aron masusi kon timbang ba ang atong panglantaw sa sekular nga mga butang ug sa espirituwal nga mga responsibilidad, maayong pangutan-on ang kaugalingon: ‘Giisip ba nako ang akong sekular nga trabaho ingong makalingaw ug makapalipay pero ang espirituwal nga kalihokan ingong ordinaryo o rutina lang?’ Ang pagpamalandong kon unsay atong pagbati sa atong sekular ug espirituwal nga mga kalihokan makatabang nato sa pagsusi kon unsa gyoy atong gimahal.

10. Unsang importanteng leksiyon ang gitudlo ni Jesus maylabot sa pagtakdag mga prayoridad?

¹⁰ Gihatag ni Jesus ang sukdanan sa pagbalanse sa sekular ug espirituwal nga mga butang. Usa niana ka higayon, si Jesus miduaw sa balay ni Maria ug sa igsoon niini, si Marta. Samtang nagkapuliki si Marta sa pagpreparar ug pagkaon, si Maria milingkod sa tiilan ni Jesus ug namati kaniya. Dihang mireklamo si Marta nga wala motabang si Maria, giingnan ni Jesus si Marta: “Gipili ni Maria ang maayong bahin, ug dili kini pagakuhaon gikan kaniya.” (Luc. 10:38-42) Gitudloan ni Jesus si Marta ug importanteng leksiyon. Aron dili malinga sa sekular nga mga butang ug mapamatud-an ang atong gugma kang Kristo, kinahanglan nga padayon natong pilion “ang maayong bahin,” nga hatagag prayoridad ang espirituwal nga mga butang.

11. Unsay gitudlo sa Kasulatan bahin sa pagpahulay ug pagrelaks?

¹¹ Nagkinahanglan tag panahon sa pagpahulay ug pagrelaks gikan sa atong trabaho ug puliki nga eskedyul. Ang Pulong sa Diyos nag-ingon: “Wala nay laing mas maayo alang sa tawo kay sa mokaon siya ug moinom ug himoon niya ang iyang kalag nga makapahimulos ug maayo sa iyang kahago.” (Eccl. 2:24) Gipakita ni Jesus nga gikinahanglan usahay ang pagpahulay. Human sa usa ka makugihong pagsangyaw, giingnan niya ang iyang mga tinun-an: “Pangadto kamo nga kamokamo ra sa usa ka mingaw nga dapit ug pahulay makadiyot.”—Mar. 6:31, 32.

12. Nganong angay tang mag-amping maylabot sa paglingawlingaw ug kalingawan? Paghatag ug pananglitan.

¹² Sa pagkatinuod, ang paglingawlingaw ug kalingawan makatabang nato nga makapahulay  ug makarelaks. Pero, anaa ang kapeligrohan nga ang paglingawlingaw mahimong panguna sa atong kinabuhi. Sa unang siglo, daghan ang may panglantaw nga “mangaon kita ug manginom, kay ugma kita mangamatay.” (1 Cor. 15:32) Karon, komon usab kana nga panglantaw sa daghang bahin sa kalibotan. Pananglitan, katuigan kanhi, usa ka batan-ong lalaki sa Western Europe ang misugod pagtambong sa tigom. Apan tungod sa iyang hilig sa paglingawlingaw, mihunong siya pagpakig-uban sa katawhan ni Jehova. Hinunoa, nasabtan niya sa ulahi nga ang pag-una niya sa kalingawan miresulta lamang sa mga problema ug kahigawad. Busa siya mibalik pagtuon sa Bibliya ug sa ngadtongadto mikuwalipikar ingong magmamantala sa maayong balita. Human sa iyang bawtismo, siya miingon: “Nagmahay ko nga daghan kaayong panahon ang nausik una nako maamgohi nga ang pag-alagad kang Jehova mao ang makahatag ug labaw nga kalipay kay sa pagpangagpas sa kalingawan nga gitanyag niining kalibotana.”

13. (a) Iilustrar ang mga kapeligrohan may kalabotan sa paglingawlingaw ug kalingawan. (b) Unsay makatabang nato sa paghupot ug balanseng panglantaw sa paglingawlingaw ug kalingawan?

¹³ Ang katuyoan sa paglingawlingaw mao ang pagrepresko ug pagpalagsik kanato. Aron mahimo kana, unsa ka tas-ang panahon ang atong igahin niana? Hunahunaa kining ilustrasyona: Daghan kanato ang ganahang mokaog keyk ug kendi matag karon ug unya, apan nahibalo ta nga ang pagsigeg kaon niana makadaot sa atong panglawas. Busa, ang kanunay natong kan-on mao ang sustansiyadong mga pagkaon. Sa susama, ang pirmeng paglingawlingaw ug kalingawan makapaluya sa atong espirituwalidad. Aron malikayan kana, regular tang makigbahin sa mga buluhaton sa Gingharian. Unsay makatabang nato sa pagkahibalo kon timbang ba ang atong panglantaw maylabot sa paglingawlingaw? Sulod sa usa ka semana, puwede natong ilista kon pila ka oras ang atong gigugol sa espirituwal nga kalihokan, sama sa pagtambong sa tigom, pagsangyaw, ug sa personal ug pamilyahanong pagtuon sa Bibliya. Dayon, itandi nato kana sa gidaghanon sa oras nga atong gigugol nianang semanaha sa kalingawan, sama sa esport, mga hilig, pagtan-awg TV, o pagdulag mga video game. Unsay gipadayag sa maong pagtandi? Kinahanglan bang mohimog kausaban?—Basaha ang Efeso 5:15, 16.

14. Unsay angayng maggiya nato sa pagpilig kalingawan?

¹⁴ Ang mga indibiduwal ug mga ulo sa pamilya makapili sa kalingawan nga ilang gusto, basta nahiuyon kini sa mga prinsipyo sa Bibliya. * Ang maayong kalingawan maoy “gasa sa Diyos.” (Eccl. 3:12, 13) Siyempre, nahibalo ta nga lainlain ug gustong kalingawan ang matag usa. (Gal. 6:4, 5) Bisan unsa mang kalingawan ang pilion, angay nato kining ibutang sa lugar. Si Jesus miingon: “Kon hain gani ang imong bahandi, atua usab didto ang imong kasingkasing.” (Mat. 6:21) Busa, ang atong lalom nga gugma kang Jesus magpalihok nato sa pagsentro sa atong hunahuna, sinultian, ug mga buhat diha sa mga buluhaton sa Gingharian imbes sa adlaw-adlawng kalihokan.—Filip. 1:9, 10.

15, 16. (a) Sa unsang paagi mahimong lit-ag sa usa ka Kristohanon ang materyalismo? (b) Unsang maalamong tambag ang gihatag ni Jesus maylabot sa materyal nga mga butang?

¹⁵ Daghan karon ang naningkamot nga mosunod sa uso, makabatog kinabag-ohang gadyet, ug uban pa. Busa, angayng susihon kanunay sa matag Kristohanon ang iyang tinguha pinaagi sa pagpangutana sa kaugalingon: ‘Nahimo bang importante kaayo nako ang materyal nga mga butang maong mogahin kog mas  daghang panahon sa pagsusi ug paghunahuna bahin sa kinabag-ohang modelo sa sakyanan o mga uso kay sa pagpangandam sa tigom? Nahimo ba kong puliki sa adlaw-adlawng kalihokan maong diyutay na lang kog panahon sa pag-ampo o pagbasa sa Bibliya?’ Kon atong maamgohan nga ang atong gugma sa materyal nga mga butang misapaw na sa atong gugma kang Kristo, angay natong palandongon ang giingon ni Jesus: “Pagbantay batok sa tanang matang sa hakog nga pangibog.” (Luc. 12:15) Nganong gihatag ni Jesus kanang bug-at nga pasidaan?

¹⁶ Si Jesus miingon nga “walay usa nga mahimong ulipon sa duha ka agalon.” Siya midugang: “Dili kamo mahimong ulipon sa Diyos ug sa Bahandi.” Tungod kana kay ang maong ‘mga agalon’ mangayog bug-os nga debosyon. “Mahimong dumtan [nato] ang usa ug higugmaon ang lain” o “unongan . . . ang usa ug tamayon ang lain,” miingon si Jesus. (Mat. 6:24) Kay dili man ta hingpit, kinahanglan natong suklan ang “mga tinguha sa atong unod,” lakip na ang materyalismo.—Efe. 2:3.

17. (a) Nganong nalisdan ang pipila sa paghupot ug balanseng panglantaw sa materyal nga mga butang? (b) Unsay makatabang nato sa pagsukol sa materyalistikong tinguha?

¹⁷ Ang mga tawo nga naghunahuna lang sa ilang tinguha ug katagbawan malisdan sa paghupot ug balanseng panglantaw sa materyal nga mga butang. Ngano? Tungod kay mihuyang na ang ilang espirituwalidad. (Basaha ang 1 Corinto 2:14.) Dihang ang ilang gahom sa pagsabot nahabol na, mas malisdan na sila sa pag-ila kon unsay husto ug sayop. (Heb. 5:11-14) Ingong resulta, dili na makontrolar sa pipila ang ilang pangandoy sa materyal nga mga butang ug wala na silay katagbawan. (Eccl. 5:10) Maayo na lang kay dunay tabang aron dili ta maimpluwensiyahan sa materyalistikong panghunahuna: Ang regular nga pagbasa sa Bibliya. (1 Ped. 2:2) Maingon nga ang pagpamalandong sa kamatuoran gikan kang Jehova nakatabang kang Jesus sa pagsukol sa tentasyon, ang pagpadapat sa mga prinsipyo sa Bibliya makatabang sab nato sa pagsukol sa materyalistikong tinguha. (Mat. 4:8-10) Sa paghimo niana, atong gipakita kang Jesus nga mas gihigugma nato siya kay sa materyal nga mga butang.

18. Unsay determinado nimong buhaton?

¹⁸ Dihang gipangutana ni Jesus si Pedro: “Gihigugma mo ba ako labaw pa niini?” iyang gipahinumdoman si Pedro nga kinahanglang unahon ang espirituwal nga mga butang. Si Pedro, kansang ngalan nagkahulogang “Usa ka Pirasong Bato,” nagkinabuhi gayod sumala sa iyang ngalan, kay nagpakita siyag mga hiyas nga sama sa bato. (Buh. 4:5-20) Karon, determinado usab kita nga palig-onon kanunay ang atong gugma kang Kristo, nga ibutang sa lugar ang sekular nga trabaho, paglingawlingaw, ug materyal nga mga butang. Hinaot ang atong mga desisyon magpakita nga gisundog nato si Pedro, kinsa miingon kang Jesus: “Ginoo, nahibalo ka nga gimahal ko ikaw.”