1, 2. Piyɛri ye suu bɛɛ kɛ jɛgɛminɛ na. O kɔ, a ye kalan juman lo sɔrɔ?

YEZU ka kalanden wolonfila ye suu bɛɛ kɛ jɛgɛminɛ na Galile baji kan, nka u ma foyi sɔrɔ. Yezu tun kununa ka bɔ suuw cɛma. K’a to baji daa la, a tora k’a ka kalandenw filɛ. O kɔ, a y’a fɔ u ye ko: “ ‘Aw ka jɔɔ fili kurun kinibolo fɛ, aw bena sɔrɔli kɛ.’ U y’a fili yen, u yɛrɛ tun te se k’u ka jɔɔ sama jigɛ cayakojugu fɛ.”—Zan 21:1-6.

² Yezu ye daraka d’u ma, o kɔ a y’a ɲɛsin Simɔn Piyɛri ma k’a fɔ ko: “Zan dencɛ Simɔn, i be ne kanu ka tɛmɛ nunu kan wa?” Yezu tun kaan be mun lo ma? Yezu tun b’a lɔn ko jɛgɛminɛ ka di Piyɛri ye kosɔbɛ. N’a sɔrɔ a tun b’a fɛ k’a lɔn ni ale n’a ka kalanw koo ka di Piyɛri ye ka tɛmɛ a ka jɛgɛminɛ baara ani a ka jɛgɛw kan. Piyɛri y’a jaabi ko: “Ɔnhɔn Matigi, e yɛrɛ y’a lɔn ko ne b’i kanu.” (Zan 21:15). Siga t’a la, Piyɛri ka kokɛtaw y’o lo yira. Kabi o tuma na, a y’a yira cogo di ko a be Yezu kanu? A y’a jija ka mɔgɔw dɛmɛ u ka kɛ Yezu ka kalandenw ye. Ka fara o kan, a kɛra kerecɛn kɔgɔnin ye kafo kɔnɔ saan kɛmɛkulu fɔlɔ la.

3. Kerecɛnw ka ɲi k’u yɛrɛ kɔrɔsi mun lo ma?

³ Yezu ye min fɔ Piyɛri ye, an be kalan juman lo sɔrɔ o koo la? An be ni kanuya min ye Yezu koo la, an ka ɲi ka banba o kana nagasi. An man ɲi k’a to fana fɛɛn dɔw k’an bali ka Ala ka Masaya kɛ an ɲɛnako fɔlɔ ye. Yezu tun b’a lɔn ko, k’an to duniɲa nin kɔnɔ, an bena gwɛlɛyaw sɔrɔ ani ko haminankow bena an hakili ɲagami. Yezu ye talen min fɔ sumankisɛw koo la, a y’a fɔ ko dɔw tun bena sɔn “Ala ka kuma” ma ani ko a daminɛ na, u bena ɲɛtaga kɛ. Nka, a y’a fɔ fana ko ‘diɲɛ hamiko, ni nafoloko bena o kuma nagasi.’ (Mat. 13:19-22; Mariki 4:19). Tiɲɛn na, n’an m’an yɛrɛ kɔrɔsi, duniɲa nin ka haminankow be se k’an lafili ani k’a to an be sumaya Jehova sago kɛli la. O kama, Yezu y’a ka kalandenw lasɔmi ko: “Aw k’aw yɛrɛw kɔlɔsi, aw kan’a to nugubagatɔya, ni dɔrɔtɔya, ani diɲɛ hamikow k’aw hakili ɲagami.”—Luka 21:34.

4. Mun lo bena an dɛmɛ k’an yɛrɛ sɛgɛsɛgɛ k’a filɛ n’an be Yezu Krista kanu kosɔbɛ? ( Jaa lajɛ, barokun daminɛ na.)

⁴ I n’a fɔ Piyɛri, n’an be waajuli baara kɛ an ɲɛnako fɔlɔ ye, an b’a yira o lo fɛ ko an be Krista kanu kosɔbɛ. Mun lo bena an dɛmɛ ka waajuli baara kɛ an ɲɛnako fɔlɔ ye tuma bɛɛ? Tuma dɔw la, an ka ɲi k’an yɛrɛ ɲininga ko: “Mun lo ka di ne ye ka tɛmɛ fɛɛn bɛɛ kan? Yala ne ka ninsɔndiya be bɔ Jehova sago kɛli lo la wa, wala fɛɛn wɛrɛ lo?” Koo saba nunu be se k’an ka kanuya nagasi Yezu Krista ani Ala koo la: baloɲini baara, ɲɛnagwɛkow ani bololafɛnw. O kama, an ka ɲi k’u jati cogo ɲuman na. An k’o koo saba lajɛ.

5. Jehova ye kunkanbaara juman lo kalifa sotigiw ma?

⁵ Piyɛri fɛ, jɛgɛminɛ tun tɛ ɲɛnagwɛko dɔrɔn ye. A tun b’a ka denbaya balo o lo fɛ. Sotigiw b’a lɔn ko Ala b’a ɲini u fɛ u k’u ka denbaya mako wasa bololafɛnw ta fan fɛ (1 Tim. 5:8). O kama, u ka ɲi k’u jija k’o kunkanbaara dafa. Nka, laban loon nunu na, baloɲini baara ka teli k’a to an be hami.

6. Bi, minw be baloɲini baara la, gwɛlɛya jumanw lo b’u kan?

⁶ Bi, a man nɔgɔ ka baara sɔrɔ. O kama, minw be baara ɲinina, u b’u yɛrɛ suma ni ɲɔgɔn ye. Walisa u kana bɔnɛ u ka baara la, baarakɛla caaman be baara kɛ ka tɛmɛ u jigi lɛri kan ani tuma dɔw la, u yɛrɛ tɛ wari bɛrɛ sɔrɔ. Ka fara o kan, patɔrɔn dɔw b’u ka baarakɛlaw lasun u ka baara caaman kɛ. O be baarakɛlaw hakili ɲagami, k’u sɛgɛn ani k’a to u be bana. Minw be ban ka baara caaman kɛ, u ka teli ka bɔnɛ u ka baara la.

7, 8. a) An ka ɲi ka kantigiya kɛ jɔn lo ye ka tɛmɛ bɛɛ kan? b) Balimacɛ dɔ ye kalan nafaman juman lo sɔrɔ a ka baara koo la?

⁷ An kerecɛnw ka ɲi ka kantigiya kɛ Jehova lo ye ka tɛmɛ bɛɛ kan, hali an ka patɔrɔn yɛrɛ (Luka 10:27). Baloɲini baara b’an dɛmɛ k’an mako gwɛlɛw wasa ani k’a to an be dɛmɛ don waajuli baara la. Nka n’an ma kɔrɔsili kɛ, a ka teli k’an bali ka Jehova bato a ɲɛɛ ma. Balimacɛ dɔ be bɔ Tayilandi. Ale ko: “N’ tun be ɔridinatɛriw lo lalaga ani o baara tun ka di n’ ye kosɔbɛ. Nka, a tun be wagati caaman ta. O kama, n’ tun tɛ wagati bɛrɛ sɔrɔ ka Alakow kɛ. N’ nana a faamu ko ni n’ b’a fɛ ka Ala ka Masaya ka koow kɛ n’ ɲɛnako fɔlɔ ye, fɔɔ n’ ka baara wɛrɛ kɛ.” O balimacɛ ye mun lo kɛ do?

⁸ O balimacɛ ko: “N’ bena min kɛ, n’ kɔnna ka miiri o la ani n’ ye wari mara saan kelen kɔnɔ. O kɔ, n’ y’a latigɛ ka bɔnbɔn galasi feere sirada la. A daminɛ na, n’ tun tɛ wari bɛrɛ sɔrɔ ani n’ fari tun be faga. N’ tun mana n’ ka baarakɛɲɔgɔn kɔrɔw kunbɛn, u tun be n’ lɔgɔbɔ ani u tun be n’ ɲininga mun na ne b’a miiri ko ka bɔnbɔn galasi feere, o ka fisa ni ɔridinatɛri baara ye biro sumanin kɔnɔ. N’ ye Jehova deli a ka n’ dɛmɛ k’o lɔgɔbɔriw muɲu ani ka wagati caaman sɔrɔ ka baara kɛ a ye. A ma mɛɛn, koow y’a daminɛ ka fisaya. N’ tun b’a lɔn bɔnbɔn galasi sifa min ka di n’ ka sannikɛlaw ye ani n’ tun be se k’o dilan koɲuman. Loon o loon, n’ ka bɔnbɔn galasi bɛɛ yɛrɛ tun be ban. N’ tun be wari caaman sɔrɔ ka tɛmɛ tuma min na n’ tun be ɔridinatɛri baara kɛ. N’ dusu tun ka di fana sabu n’ hakili ɲagaminin tɛ ani n’ tɛ hami i n’a fɔ fɔlɔ la. Min yɛrɛ kɔrɔtanin lo kosɔbɛ, o ye ko sisan n’ magwɛrɛnin lo Jehova la.”—Matiyo 5:3, 6 kalan.

9. An be se ka mun lo kɛ walisa an ka baloɲini baara kana kɛ an ɲɛnako fɔlɔ ye?

⁹ N’an b’an jija Jehova ka baara la, o ka di a ye. An be duga caaman sɔrɔ fana n’an be baara kɛ ka ɲɛ (Talenw 12:14). Nka, i ko balimacɛ min kofɔra ka tɛmɛ, an ka baara man ɲi ka kɛ an ɲɛnako fɔlɔ ye. Yezu y’a fɔ ko: “Aw ka Ala ka masaya n’a ka tilenninya ɲini fɔlɔ, n’o kɛra, Ala bena fɛɛn tɔw bɛɛ d’aw ma.” (Mat. 6:33). Walisa k’a lɔn n’an be ni miiriya tilennin ye an ka baara ani Alakow kan, an ka ɲi k’an yɛrɛ ɲininga ko: “Yala n’ ka baloɲini baara ka di n’ ye ka tɛmɛ Alakow kan wa? Yala n’ be Alakow jati i ko baara gwansan wala mɔgɔ sɛgɛn baara wa?” An b’an ka baloɲini baara ani Alakow jati cogo min na, n’an be miiri o la koɲuman, o bena an dɛmɛ k’a lɔn mun lo ka di an ye ka tɛmɛ fɛɛn bɛɛ kan.

10. Yezu y’an kalan koo nafaman juman lo la?

¹⁰ Yezu y’a yira fɛɛn min ka ɲi ka kɛ an ɲɛnako fɔlɔ ye. Loon dɔ, a tagara bɔ Mariyamu n’a balimamuso Marita ye. Marita tun be teliyara ka dumuni tobi, nka Mariyamu sigira Yezu gɛrɛfɛ walisa k’a lamɛn. Tuma min na Marita y’a fɔ Yezu ye ko a k’a fɔ Mariyamu ye a k’ale dɛmɛ, Yezu ye Marita jaabi ko: “Mɔgɔ mako be fɛɛn kelen dama le la. Mariyamu y’o le ta, mɔgɔ si tena se ka min bɔsi a la.” (Luka 10:38-42). Yezu ye Marita kalan koo nafaman dɔ la. Walisa an ka baara kana kɛ an ɲɛnako fɔlɔ ye, ani k’a yira ko an be Krista kanu, “mɔgɔ mako be fɛɛn kelen” min na, an ka ɲi k’o lo sugandi. O kɔrɔ, an ka ɲi ka Alakow kɛ an ɲɛnako fɔlɔ ye tuma bɛɛ.

11. Bibulu be mun lo fɔ lafiɲɛ koo la?

¹¹ An bolo degunnin lo kosɔbɛ. O kama, tuma kelen kelen, an ka ɲi ka lafiɲɛ. Bibulu b’a fɔ ko: “Adamaden ka dumuni kɛ, ka minni kɛ, k’a ka baara diya bɔ, o le y’a ka hɛrɛ ye.” (Waaj. 2:24). Yezu tun b’a lɔn ko a kɔrɔtanin lo an ka lafiɲɛ tuma kelen kelen. Loon dɔ, a ka kalandenw tun ye waajuli kɛ bɛrɛbɛrɛ. O kɔ, Yezu y’a fɔ u ye ko: “Aw ye na an ka taga danna yɔrɔ dɔ la janko aw ka lafiɲɛ dɔɔni.”—Mariki 6:31, 32.

12. Mun na an ka ɲi k’an yɛrɛ kɔrɔsi ɲɛnagwɛkow ma? Ɲɛyirali dɔ fɔ.

¹² Ɲɛnagwɛkow be se ka kɛ sababu ye an be lafiɲɛ. Nka, n’an m’an yɛrɛ kɔrɔsi, ɲɛnagwɛkow ka teli ka kɛ an ɲɛnako fɔlɔ ye. Saan kɛmɛkulu fɔlɔ la, mɔgɔ caaman tun be ni miiriya nin ye: “An ka dumuni kɛ ka minni kɛ, bari sini an bena sa.” (1 Kor. 15:32). Bi, mɔgɔ caaman fana be n’o miiriya ɲɔgɔn ye. Ɲɛyirali fɛ, cɛɛ dɔ tun y’a daminɛ ka taga Jehova Seerew ka lajɛnw na Erɔpu tileben fan fɛ. Nka, ɲɛnagwɛkow tun ka di a ye fɔɔ, a ye lajɛntaga dabila. Kɔfɛ, a y’a faamu k’o ɲɛnagwɛkow tun y’a ɲɛnako fɔlɔ ye minkɛ, o ye gwɛlɛyaw ni dusukasi dɔrɔn lo lase a ma. O kama, a y’a ka bibulukalan daminɛ tugun ani o kɔ, a ye saratiw dafa ka kɛ weleweledala ye. A batizenin kɔ, a y’a fɔ ko: “Fɛɛn min be digi ne la, o ye ko, n’ ye wagati tiɲɛ ka sɔrɔ k’a faamu ko ka baara kɛ Jehova ye, ninsɔndiyaba b’o la ka tɛmɛ duniɲa ka ɲɛnagwɛkow kan.”

13. a) Ɲɛyirali dɔ fɔ walisa k’a yira ko farati b’a la ka ɲɛnagwɛkow kɛ k’a dama tɛmɛ. b) Mun lo be se k’an dɛmɛ ka ɲɛnagwɛkow jati cogo ɲuman na tuma bɛɛ?

¹³ Ɲɛnagwɛkow kuun ye ka lafiɲɛ ani ka fanga kura sɔrɔ. N’o lo, an ka ɲi ka wagati joli lo kɛ ka ɲɛnagwɛ? Miiri k’a filɛ: A ka di an caaman ye ka gato dumu ani ka bɔnbɔn mugan tuma kelen kelen. Nka, n’an be to ka gato dumu ani ka bɔnbɔn mugan tuma o tuma, o be se k’a to an be bana. O kama, tuma caaman na, an be dumuni nafamanw lo dumu. O cogo kelen na, n’an be ɲɛnagwɛkow kɛ tuma o tuma, an be jɛnɲɔgɔnya min kɛ ni Ala ye, o ka teli ka nagasi. Walisa o kana kɛ, an ka ɲi k’an seen don Masaya ka koow la tuma o tuma. Mun lo be se k’an dɛmɛ k’a lɔn n’an be ɲɛnagwɛkow jati cogo ɲuman na? Lɔgɔkun dɔ kɔnɔ, an k’a filɛ an be lɛri joli lo kɛ Alakow la. O be se ka kɛ lajɛnw, waajuli baara, kelenna kalan ani gwa kɔnɔ batoli ye. An k’o lɛri hakɛ sɛbɛ. An k’a filɛ fana an ye lɛri hakɛ min kɛ ɲɛnagwɛkow la i n’a fɔ: Spɔr, telewisɔn wala videwo tulonw. O kɔ, an k’o lɛri hakɛw suma ni ɲɔgɔn ye. O be mun lo yira? Yala an ka ɲi ka yɛlɛmani dɔw kɛ wa?—Efɛzikaw 5:15, 16 kalan.

14. Mun lo be se k’an dɛmɛ k’an ka ɲɛnagwɛkow sugandi?

¹⁴ See dira an kelen kelen bɛɛ ma ani sotigiw ma k’a sugandi ɲɛnagwɛko min ka di an ye. Nka, o ɲɛnagwɛko ka ɲi ka bɛn ni Jehova ka sariyakolow ye. * Ɲɛnagwɛko ɲuman ye “Ala ka nilifɛn ye.” (Waaj. 3:12, 13, ABM). Tiɲɛn lo ko ɲɛnagwɛko dɔ be se ka diya dɔ ye, nka a be se n’a ma diya mɔgɔ wɛrɛ ye (Gal. 6:4, 5). An mana ɲɛnagwɛko fɛɛn o fɛɛn sugandi, an ka ɲi k’o kɛ k’a dama kɛɲɛ. Yezu y’a fɔ ko: “I ka nafolo be yɔrɔ min na, i ka miiriya be o yɔrɔ la fana.” (Mat. 6:21). O kama, an ka ɲi ka Yezu kanu kosɔbɛ. O lo bena an lasun ka Ala ka Masaya lafasa an ka kɛwalew, an ka miiriyaw ani an ka kumaw sababu fɛ. An ka baloɲini baara tɛna kɛ an ɲɛnako fɔlɔ ye.—Filip. 1:9, 10.

15, 16. a) Cogo juman na bololafɛnw be se ka kɛ farati ye kerecɛnw fɛ? b) Yezu ye ladili juman lo di bololafɛnw koo la?

¹⁵ Bi, fɛɛn minw be sanga la, mɔgɔ caaman b’a fɛ k’o lo sɔrɔ, i n’a fɔ: faniw, ɔridinatɛri, telefɔni, tablɛti ani a ɲɔgɔnnaw. O kama, kerecɛn kelen kelen bɛɛ ka ɲi k’a yɛrɛ sɛgɛsɛgɛ k’a filɛ a diyanyeko ye min ye. I be se k’i yɛrɛ ɲininga ko: “Yala bololafɛnw kɔrɔtanin lo ne fɛ kosɔbɛ wa? Mobiliw ani fɛɛn minw be sanga la, ne be wagati min ta ka miiri o la, yala o ka ca ka tɛmɛ n’ be wagati min ta ka lajɛnw labɛn wa? Yala n’ bolo degunnin lo kojugu loon o loon ka koow la, fɔɔ n’ tɛ wagati caaman ta ka delili kɛ ani ka Bibulu kalan wa?” N’an y’a ye ko an be bololafɛnw kanu ka tɛmɛ Yezu Krista kan, a ye min fɔ, an ka miiri o la. A y’a fɔ ko: “Aw k’aw yɛrɛ kɔlɔsi nafoloko hamikojugu ma.” (Luka 12:15). Mun na Yezu y’o fɔ?

¹⁶ A y’a fɔ ko: “Mɔgɔ si te se ka baara kɛ kuntigi fila ye . . . aw te se ka nafolo kanu, ka baara kɛ Ala ye.” Mun na Yezu y’o fɔ do? Sabu o “kuntigi” kelen kelen bɛɛ bena a ɲini an fɛ an k’an masiri ale kelenpe lo la. Yezu ko: ‘An bena kelen kɔniya ka kelen kanu, walima an bena nɔrɔ kelen na k’an mako bɔ kelen na.’ (Mat. 6:24). Komi an ye mɔgɔ dafabaliw ye, an bɛɛ ka ɲi ka to ka “farisogo nigɛlakow” kɛlɛ. An man ɲi ka bololafɛnw kanu fana.—Efɛz. 2:3.

17. a) Farisogo negelakow ka di minw ye, mun na a ka gwɛlɛ olu fɛ ka bololafɛnw jati cogo ɲuman na? b) Mun lo bena an dɛmɛ an kana bololafɛnw kanu?

¹⁷ Farisogo negelakow ka di minw ye, a ka gwɛlɛ olu fɛ ka bololafɛnw jati cogo ɲuman na. Mun na do? Sabu u tɛ Alakow jati cogo ɲuman na fana (1 Korɛntikaw 2:14 kalan). Komi u ka miiriyaw gwɛnnin tɛ, a ka gwɛlɛ u fɛ ka ɲuman ni juguman faranfasi ka bɔ ɲɔgɔn na (Eburuw 5:11-14). O b’a to bololafɛnw nege be dɔw la kojugu. Nka, mɔgɔ do tɛ se ka bololafɛnw nege wasa ka ye (Waaj. 5:9). An be se ka fɛɛn dɔ kɛ walisa an kana miiri kojugu bololafɛnw koo la: An ka Bibulu kalan loon o loon (1 Piyɛri 2:2). Yezu tun be miiri Ala ka hakilitigiya kumaw la. O lo y’a jija a sera ka lɔ kelen kan Sutana ka kɔrɔbɔli ɲɛ. O cogo kelen na, n’an be koow kɛ ka kɛɲɛ ni Ala ka sariyakolow ye, o bena an dɛmɛ an kana bololafɛnw kanu (Mat. 4:8-10). O la, an b’a yira ko an be Yezu kanu ka tɛmɛ fɛɛn bɛɛ kan.

18. I cɛsirinin lo ka mun lo kɛ?

¹⁸ Yezu tun ye Piyɛri ɲininga ko: “I be ne kanu ka tɛmɛ nunu kan wa?” A tun b’a fɛ ka Piyɛri hakili jigi le ko a ka ɲi ka Alakow kɛ a ɲɛnako fɔlɔ ye. Piyɛri tɔgɔ kɔrɔ ko “farakurun.” Tiɲɛn na, Piyɛri ye koow kɛ ka kɛɲɛ n’a tɔgɔ kɔrɔ ye sabu a ka jogo ɲumanw tun be i n’a fɔ farakurun (Kɛw. 4:5-20). Bi, an fana cɛsirinin lo ka Krista kanu kosɔbɛ ani ka baloɲini baara, ɲɛnagwɛkow ani bololafɛnw jati cogo ɲuman na. An k’a yira an ka desizɔnw fɛ ko an ni Piyɛri ka miiriyaw ye kelen ye. Ale y’a fɔ ko: “Matigi, e yɛrɛ y’a lɔn ko ne b’i kanu.”