1, 2. Petero be hanuaboi ibounai lalonai ia haoda murinai, dahaka ia vara?

IESU ena hahediba taudia 7 be hanuaboi ibounai lalonai Galilea Gohuna ai idia haoda, to gwarume ta idia abia lasi. Ia toreisi lou tauna, Iesu, be kone ai ia gini bona idia ia itaia noho. Bena idia dekenai ia gwau: “‘Bouti ena idibana kahanai reke umui atoa diho bona gwarume haida do umui abia.’ Bena idia atoa diho, to idia hegeregere lasi idia veria daekau totona, badina gwarume be momo herea.”​—Ioa. 21:1-6.

² Iesu be idia dekenai aniani ia henia murinai, Simona Petero dekenai ia gwau: “Simona, Ioane ena natuna e, lau eiava inai gwarume oi lalokau henia bada?” Iesu ena hereva ena anina be dahaka? Petero be haoda gaukarana ia ura henia bada. Unai dainai reana Iesu ena henanadai amo ia ura diba ia be edena gaukara ia ura henia bada. Ia be gwarume bona haoda gaukarana ia laloa bada eiava Iesu bona ia hadibaia herevadia ia laloa bada? Petero ia haere, ia gwau: “Oibe Lohiabada, oi diba oi lau ura henia bada.” (Ioa. 21:15) Petero be unai hegeregerena ia kara. Unai nega amo, ia be hahediba gaukarana  dekenai ia bisi bada, unai amo ia hahedinaraia ia be Keriso ia lalokau henia, bona aposetolo edia negai ia noho Keristani kongrigeisen ena du ai ia lao.

3. Dahaka dainai Keristani taudia idia naria namonamo be namo?

³ Iesu ese Petero dekenai ia gwauraia herevana amo dahaka ita dibaia? Namona be ita naria namonamo, dika iseda lalokau Keriso dekenai ia keru bona Basileia do ita tahua guna lasi. Iesu ia diba inai nega oromana ena lalohekwarahi gaudia ese ita idia hametaua diba. Iesu ese uhe hadoa tauna ena haheitalai ia gwauraia neganai, ia gwau haida ese “Basileia ena hereva” idia abia dae, to “inai nega oromana ena lalohekwarahi gaudia bona taga ena koikoi siahuna” ese “Basileia ena hereva ia koua.” (Mat. 13:19-22; Mar. 4:19) Momokani, bema ita naria namonamo lasi, iseda mauri durua gaudia laloa bada karana ese ita ia koua diba bona iseda abidadama idia hagoadaia gaudia do ita karaia lasi. Iesu ese ena hahediba taudia ia hadibaia, ia gwau: “Do umui naria namonamo, aniani momo, inuinu momo, bona mauri ena lalohekwarahi amo emui lalohadai maorona umui hadikaia garina.”​—Luka 21:34.

4. Edena bamona do ita diba iseda lalokau Keriso dekenai be ia bada eiava lasi? (Laulau ginigunana itaia.)

⁴ Ita ura Petero ena kara ita tohotohoa, bona Keriso ese ita dekenai ia henia gaukarana ita atoa guna, unai amo ita hahedinaraia ia ita lalokau henia. Edena bamona do ita hahedinaraia ita be unai ita karaia noho? Nega ta ta ai, sibona ita nanadaia: ‘Lau be dahaka lau ura henia bada? Dahaka ese lau ia hamoalea bada, dina ta ta ai lau karaia gaudia eiava egu hesiai gaukara?’ Mani inai gaudia toi ita laloa, bema unai gaudia be edia gabu maorona dekenai ita atoa lasi, iseda lalokau Keriso bona iseda hesiai gaukara dekenai be do ia keru​—moni gaukara, moale karadia, bona kohu.

5. Baibel ese ruma bese kwaradia dekenai dahaka maduna ia henia?

⁵ Petero ese haoda gaukarana ia ura henia sibona lasi​—unai gaukara amo ena mauri ia durua. Ruma bese kwaradia idia diba Baibel ese idia ta ta dekenai maduna ia henia tauanina dalanai edia ruma bese idia naria totona. (1 Tim. 5:8) Namona be idia gaukara goada unai maduna idia hagugurua totona. To inai dina gabedia ai, moni gaukara dainai momo idia lalohekwarahi.

6. Moni gaukara gabudiai, dahaka ia vara?

⁶ Taunimanima momo be moni gaukara idia tahua, to gaukara be momo lasi, unai dainai gaukara taudia momo be hora momo idia gaukara, bona nega haida idia abia pei be bada lasi. Danu, nega momo gaukara biagudia idia ura gaukara taudia ese edia gaukara do idia haorea haraga dainai, gaukara taudia idia lalohekwarahi, hesiku bada, bona gorere danu. Unai bamona idia karaia lasi taudia momo be edia moni gaukara amo idia hadokodia.

7, 8. (a) Daika ita badinaia be mai anina bada? (b) Thailand ai ia noho tadikaka be dahaka ia karaia?

⁷ Ita be Keristani taudia dainai, ita ura Iehova Dirava sibona ita badinaia, to iseda gaukara biaguna lasi. (Luka 10:27) Momokani, moni gaukara ita karaia sibona ita durua totona. Hegeregere, ita abia moni amo iseda mauri durua gaudia ita hoia, bona iseda hesiai gaukara ita durua. To, bema ita naria namonamo lasi, iseda moni gaukara ese iseda tomadiho karana ia hadikaia diba. Hegeregere, Thailand ai ia noho tadikaka ta ia gwau: “Lau be kompiuta hanamoa gaukarana lau karaia, bona unai gaukara lau moalelaia. To, egu moni gaukara ai hora momo lau haorea dainai, tomadiho gaudia dekenai lau be nega lasi. Gabeai lau laloparara, Basileia lau atoa guna totona, egu moni gaukara lau haidaua be namo.” Inai tadikaka be dahaka ia karaia?

 ⁸ Ia gwau: “Lagani tamona lalonai palani lau karaia murinai, egu lalona lau hadaia dala dekenai ice cream do lau hoihoilaia. Matamanai, moni dalanai lau hekwarahi sisina bona lau lalomanoka. Egu gaukara turadia lau hedavari henia neganai, idia be lau idia kirikirilaia bona idia ura diba edena dala ai ice cream hoihoilaia karana ese air-condition ofesi ai gaukara karana ia hereaia. Iehova dekenai lau guriguri, ia lau noia lau do ia durua unai amo egu tomadiho gaukaradia dekenai nega bada do lau atoa. Daudau lasi, gau idia heau namonamo matamaia. Ice cream idia hoia taudia edia ura lau diba dainai, ice cream lau karaia namonamo diba. Gabeai, dina tamona lalonai egu ice cream ibounai lau hoihoilaia diba. Momokani, hari ice cream hoihoilaia karana amo lau abia moni ese kompiuta hanamoa gaukarana amo lau abia monina ia hereaia. Lau moale badina lau moni gaukara neganai, lau lalohekwarahilaia gaudia be momo, to hari unai lau mamia lasi. Bona lau moalelaia bada gauna be egu hetura karana Iehova ida be ia goada.”​—Mataio 5:3, 6 duahia.

9. Iseda moni gaukara be edena dala ai ita laloa maoromaoro diba?

⁹ Gaukara goadagoada karana be mai ena ahuna. (Aon. 12:14) To, unai tadikaka ena hereva bamona, moni gaukara be ena gabu korikorina ai ita atoa be namo. Iesu ia gwau: “Nega ibounai Dirava ena Basileia bona ena kara maoromaoro do umui tahua guna, bona unai gaudia ibounai [tauanina durua gaudia] be umui dekenai do ia henia.” (Mat. 6:33) Iseda moni gaukara bona tomadiho karadia ita laloa maoromaoro totona, namona be sibona ita nanadaia: ‘Lau be egu moni gaukara lau moalelaia bada, to egu tomadiho karadia lau laloa maragi, a?’ Iseda moni gaukara bona tomadiho karadia ita laloa dobu neganai, do ita diba ita be edena ita ura henia bada.

10. Mai anina bada gaudia atoa guna karana dekenai Iesu amo dahaka ita dibaia?

¹⁰ Iesu be haheitalai namona, ia ese tauanina gaudia bona Dirava ena Hereva ia laloa maoromaoro. Nega ta, Iesu be Maria bona ena taihuna, Mareta, edia ruma dekenai ia lao. Mareta be ia bisi bada aniani ia hegaegaelaia totona, to Maria be Iesu ena aena badinai ia helai bona ena hereva ia kamonai noho. Bena Mareta ia maumau badina Maria ese ia durua lasi, to Iesu be Mareta dekenai ia gwau: “Maria ese gau namona ia abia hidi, bona ia amo do idia kokia lasi.” (Luka 10:38-42) Iesu be Maria dekenai mai anina bada gauna ta ia hadibaia. Gauna be inai, namo lasi tauanina gaudia dekenai ita bisi bada, to namona be hanaihanai “gau namona” ita abia hidi, anina be iseda tomadiho karadia ita atoa guna, unai amo ita hahedinaraia ita be Keriso ita lalokau henia bada.

11. Baibel ese laga-ani karana be edena bamona ia gwauraia?

¹¹ Ita be nega momo ita bisi dainai, nega ita atoa diba ita laga-ani totona. Baibel ia gwau: “Tau ta ena dala namo herea be inai: Do ia aniani, do ia inuinu, bona iena hekwarahi dekena amo ia abia gaudia do ia moalelaia.” (Had. 2:24) Iesu danu be nega ia atoa ia laga-ani totona. Edia haroro gaukara lalonai, Iesu be ena hahediba taudia dekenai ia gwau: “Umui mai bona taunimanima lasi gabuna dekenai do ita lao bona laga-ani sisina.”​—Mar. 6:31, 32.

12. Moale karadia dekenai dahaka ita laloatao be namo? Haheitalai gwauraia.

¹² Moale karadia be mai anina bada. To, bema hanaihanai moale karadia  ita karaia, iseda mauri lalonai unai sibona do ita laloa bada. Aposetolo edia negai, momo idia laloa, “namona be ita aniani bona ita inuinu badina kerukeru do ita mase.” (1 Kor. 15:32) Hari inai negai, tanobada ena kahana haida ai taunimanima edia lalohadai danu be unai bamona. Hegeregere, lagani haida gunanai, Western Europe ai tau matamata ta be hebou ia lao henia matamaia. To iena ura moale karadia dekenai be ia goada momokani dainai, Iehova ena taunimanima ia bamoa lou lasi. To gabeai ia laloparara, ia ese moale karadia ia laloa bada dainai, hekwakwanai idauidau ia davaria bona ia lalohisihisi. Unai dainai Baibel ia stadilaia matamaia lou bona gabeai ia be sivarai namona harorolaia tauna ai ia lao. Ia bapatiso murinai, ia gwau: “Lau lalohekwarahilaia gauna tamona be lau ese nega bada lau halusia kava murinai, lau laloparara Iehova hesiai henia karaia ese moale korikorina ia havaraia, bona unai ese tanobada ena moale karadia amo ita abia moalena ia hereaia.”

13. (a) Mani moale karadia ena dika oi haheitalaia. (b) Dahaka ese ita ia durua diba moale karadia ita laloa maoromaoro totona?

¹³ Moale karadia ita karaia, badina ita ura sibona ita hamoalea bona goada matamata ita abia. Unai ia vara totona, moale karadia dekenai hora hida do ita atoa? Mani inai oi laloa: Ita momo ita ura nega ta ta ai keke ita ania, to ita diba bema nega momo keke bona loli ita ania, ita gorere diba. Unai dainai aniani namodia ita ania be namo. Unai hegeregerena, bema nega momo moale karadia ita karaia, do ita manoka bona iseda tomadiho karadia do ita laloa bada lasi. Unai ia vara lasi totona, namona be hanaihanai Basileia ena gaukara ita karaia. Edena bamona do ita diba bema ita be moale karadia ita laloa maoromaoro? Wiki ta ita abia hidi bona unai wiki ai ita karaia tomadiho karadia, hegeregere kongrigeisen heboudia, haroro, sibona eda stadi, bona ruma bese Baibel stadi dekenai ita haorea hora ita rekodia. Bena unai hora be unai wiki ai ita karaia moale karadia, hegeregere spot gadara, iseda ura gaudia, televisen, o vidio gadara dekenai ita haorea hora ida ita hahegeregerea. Dahaka oi davaria? Moale karadia haida do oi hadokoa, a?​—Efeso 5:15, 16 duahia.

14. Iseda moale karadia ita abia hidi neganai, dahaka ita laloa be namo?

¹⁴ Ita ta ta bona ruma bese kwaradia be mai iseda maoro moale karadia ita abia hidi totona, to namona be ita abia hidi moale karana be Baibel ena hakaua herevadia ida ia hegeregere. * Moale karadia namodia be “Dirava ena harihari gauna.” (Had. 3:12, 13) Momokani, ita ta ta ese moale karadia idauidau ita abia hidi diba. (Gal. 6:4, 5) Herevana edena moale karana ita abia hidi, namona be unai moale karana be ena gabu maorona ai ita atoa. Iesu ia gwau: “Emu dava bada kohu ia noho gabuna dekenai, emu kudouna danu be unuseniai do ia noho.” (Mat. 6:21) Bema mai kudouna ibounai ida Iesu ita lalokau henia, iseda lalohadai, hereva, bona kara amo do ita hahedinaraia ita be Basileia ena gaukara idauidau sibona ita laloa, to dina ta ta ai ita karaia gaukaradia lasi.​—Fili. 1:9, 10.

15, 16. (a) Kohu momo tahua karana ese edena dala ai Keristani tauna ia tarapua diba? (b) Tauanina gaudia tahua karana dekenai Iesu ese dahaka sisiba namona ia henia?

¹⁵ Hari taunimanima momo idia ura dabua bona fon matamata, bona unai bamona gaudia ma haida idia abia. Unai dainai namona be nega ibounai Keristani tauna be sibona dekenai inai  henanadai ia henia: ‘Lau be tauanina gaudia lau laloa bada dainai, nega bada lau haorea motuka o dabua matamata lau tahua o laloa totona, to kongrigeisen heboudia hegaegaelaia karana dekenai nega bada lau atoa lasi, a? Dina ta ta ai idia vara gaudia dekenai lau bisi bada dainai, lau be nega lasi guriguri o Baibel lau duahia totona, a?’ Bema ita itaia ita be tauanina gaudia ita ura henia bada, to iseda lalokau Keriso dekenai be bada lasi, namona be Iesu ena hereva ita laloatao, ia gwau: “Mataganigani karadia idauidau ibounai dainai do umui gima noho.” (Luka 12:15) Dahaka dainai Iesu be unai sisiba ia henia?

¹⁶ Iesu ia gwau, “tau ta be biaguna rua edia igui hesiai gaukara ia karaia diba lasi.” Ma ia gwau: “Dirava bona Taga edia hesiai gaukara umui karaia diba lasi.” Badina unai “biaguna” rua be nega tamona ita hesiai henia diba lasi. To, Iesu ia gwau, ita ese ‘ta do ita inai henia bona ta do ita lalokau henia, eiava ta do ita durua bona ta do ita dadaraia.’ (Mat. 6:24) Ita be goevadae lasi dainai, namona be ita hekwarahi “tauanina ena ura” gaudia, hegeregere kohu momo tahua karana, ita dadaraia totona.​—Efe. 2:3.

17. (a) Dahaka dainai tauanina gaudia idia laloa bada taudia be idia laloa maoromaoro lasi? (b) Dahaka ese ita do ia durua kohu momo tahua karana ita dadaraia totona?

¹⁷ Haida be tauanina gaudia sibona idia laloa bada dainai, kohu momo tahua karana idia laloa maoromaoro lasi. Dahaka dainai? Badina edia hetura karana Iehova ida be ia manoka. (1 Korinto 2:14 duahia.) Edia darana be tauanina gaudia tahua karana ese ia koua neganai, maoro bona kerere edia idau idia gwauraia diba lasi. (Heb. 5:11-14) Unai dainai, haida be idia ura bada kohu matamatadia sibona idia hoia, bona unai ura idia dadaraia diba lasi. (Had. 5:10) To gau ta ita karaia diba unai ura ita koua totona. Oibe, nega ibounai Baibel duahia karana ese ita do ia durua kohu momo tahua karana ena ura ita dadaraia totona. (1 Pet. 2:2) Iesu be Toretore Helagadia ia laloa dobu dainai, hahetoho ia dadaraidia diba, ita danu bema Baibel ena hakaua herevadia ita badinaia, kohu momo tahua urana do ita dadaraia. (Mat. 4:8-10) Bema unai ita karaia, ita hahedinaraia ita be Iesu ita lalokau henia bada, to tauanina ena ura gaudia ita laloa maragi.

18. Oi ura dahaka do oi karaia?

¹⁸ Iesu ese Petero ia nanadaia, ia gwau: “Lau eiava inai gwarume oi lalokau henia bada?” Unai hereva amo Iesu ese Petero ia hagoadaia iena mauri ai Iehova ena hesiai gaukara ia atoa guna totona. Petero ena ladana ena anina be “Nadi Ta.” Bona ia be iena ladana ena anina hegeregerena ia kara. (Kara 4:5-20) Unai hegeregerena, ita danu ita ura iseda lalokau Keriso dekenai ita hagoadaia, bona moni gaukara, moale karadia, bona kohu tahua karana be edia gabu maorodia ai ita atoa. Oibe, namona be iseda mauri ai ita karaia abia hidi ese idia hahedinaraia iseda lalohadai be Petero ena bamona, Iesu dekenai ia gwau: “Lohiabada, oi diba oi lau ura henia bada.”