1, 2. Kalpasan ti agpatnag a panagkalap dagiti adalan, ania ti nasursuro ni Pedro?

NAGPATNAG a nagkalap ti pito nga adalan ni Jesus iti Baybay ti Galilea ngem awan naalada. Kabigatanna, iti igid ti baybay, palpaliiwen ida ni Jesus. Kalpasanna, kinunana kadakuada: “‘Isaruagyo ti iket iti makannawan a sikigan ti barangay ket makasarakkayto iti sumagmamano.’ Ngarud insaruagda dayta, ngem saandan a nabalinan a guyoden gapu iti kaadu dagiti ikan.”—Juan 21:1-6.

² Kalpasan a namigatda, kinuna ni Jesus ken Simon Pedro: “Simon nga anak ni Juan, ay-ayatennak kadi nga ad-adda ngem dagitoy?” Ania ti tuktukoyen ni Jesus? Ipatpateg ni Pedro ti panagkalap, isu a mabalin a damdamagen ni Jesus no ania a talaga ti napatpateg kenkuana. Napatpateg kadi kenkuana dagiti ikan ken ti panagkalap ngem ni Jesus ken dagiti insurona kenkuana? Insungbat ni Pedro: “Wen, Apo, ammom nga adda panagayatko kenka.” (Juan 21:15) Pudpudno ti imbaga ni Pedro. Manipud idin, pinaneknekanna nga ay-ayatenna ni Kristo babaen ti sireregta  a panagaramidna iti adalan ket nagbalin a pundasion ti kongregasion Kristiano idi umuna a siglo.

3. Ania ti masapul a pagannadan dagiti Kristiano?

³ Ania ti masursurotayo iti pannakisarita ni Jesus ken Pedro? Masapul a ditay ipalubos a bumaaw ti panagayattayo ken Kristo ken masinga ti panangyun-unatayo iti Pagarian. Ammo ni Jesus dagiti rigat a mapasarantayo iti daytoy a sistema ti bambanag. Iti ilustrasion ni Jesus maipapan iti agmulmula, kinunana a dadduma ti mangawat iti “sao ti pagarian” ken rumang-ayda iti damo ngem “ti pakaringgoran daytoy a sistema ti bambanag ken ti makaallilaw a pannakabalin ti kinabaknang leppesenda ti sao.” (Mat. 13:19-22; Mar. 4:19) Ngarud, no saantayo nga agannad, kumapuy ti espiritualidadtayo no iyun-unatayo dagiti inaldaw a pakaseknan iti biag. Gapuna, pinakdaaran ni Jesus dagiti adalanna: “Asikasuenyo ti bagbagiyo tapno dagiti pusoyo saanda a pulos madagsenan iti nalabes a pampannangan ken nakaro a panagin-inum ken kadagiti pakaringgoran iti biag.”—Luc. 21:34.

4. Ania ti makatulong kadatayo a mangammo iti kinauneg ti panagayattayo ken Kristo? (Kitaen ti ladawan iti rugi ti artikulo.)

⁴ Kas ken Pedro, mapaneknekantayo ti kinauneg ti panagayattayo ken Kristo no iyun-unatayo ti trabaho nga intalekna kadatayo. Kasano a masiguradotayo nga agtultuloy nga ar-aramidentayo dayta? Kanayon koma nga isaludsodtayo iti bagitayo: ‘Ania ti kapatgan kaniak? Dagiti kadi naespirituan a banag ti ad-adda a mangparagsak kaniak wenno ti dadduma nga aktibidad?’ Usigentayo ita ti tallo a banag a mabalin a mangpabaaw iti ayattayo ken Kristo ken kadagiti naespirituan a banag no saantayo a mapagtalinaed dagitoy iti umiso a lugarda—sekular a trabaho, panaglinglingay, ken material a banag.

5. Ania ti naibatay-Biblia a responsabilidad dagiti ulo ti pamilia?

⁵ Saan la a basta magusgustuan ni Pedro ti panagkalap—dayta ti pagbiaganna. Ammo dagiti ulo ti pamilia ita a naibatay iti Biblia ti responsabilidadda a mangipaay iti kasapulan ti pamiliada. (1 Tim. 5:8) Masapul nga ikagumaanda nga itungpal dayta nga obligasion. Ngem kadagitoy maudi nga al-aldaw, masansan a maipapan iti trabaho ti pakaigapuan ti pakadanagan dagiti tattao.

6. Ania dagiti pakarigatan dagiti empleado ita?

⁶ Gapu ta limitado ti bilang ti mabalin a pagtrabahuan, adu nga empleado ti mapilitan nga agtrabaho iti ad-adu nga oras, uray basbassit ti sueldoda no dadduma. Kasta met, gapu ta masapul nga ad-adu ti malpasda, maibus ti pigsada, mabannogda, ken agsakitda. Mabalin a maikkat dagiti empleado a saan nga agporsegi para iti kompaniada.

7, 8. (a) Asino ti kangrunaan a pangipaayantayo iti kinasungdotayo? (b) Ania ti nagpateg a nasursuro ti kabsat a taga-Thailand maipapan iti trabahona?

⁷ Kas Kristiano, ni Jehova a Dios ti kangrunaan a pangipaayantayo iti kinasungdotayo, saan a ti amotayo. (Luc. 10:27) Agtrabtrabahotayo laeng tapno maipaay dagiti kangrunaan a kasapulantayo ken tapno adda usarentayo iti ministeriotayo. Ngem no saantayo a naannad, mabalin a maapektaran ti panagserbitayo iti Dios gapu iti trabaho. Kas pagarigan, kinuna ti maysa a kabsat idiay Thailand: “Magusgustuak ti trabahok nga agtarimaan iti kompiuter, ngem adu nga oras ti kanen dayta, isu a dandani awan oraskon kadagiti naespirituan a banag. Idi agangay, napampanunotko a tapno mayun-unak ti Pagarian, masapul a baliwak ti trabahok.” Ania ti inaramid daytoy a kabsat?

 ⁸ Kinunana: “Kalpasan ti dandani makatawen a panagplanok, pinilik ti aglako iti ice cream. Idi damo, bassit ti masapsapulak ket nadismayaak. No makitadak dagiti dati a katrabahuak, katkatawaandak ken damdamagenda no apay a kinaykayatko ti aglako iti ice cream ngem ti agtarimaan iti kompiuter iti de-aircon a pagtrabahuan. Inkararagko ken Jehova a tulongannak ken ad-adu koma ti panawenko kadagiti naespirituan nga aktibidad kas iti implanok. In-inut a simmayaat ti kasasaad. Naalak ti templa a kayat dagiti kostumerko ken naim-imasen ti ice cream a maar-aramidko. Idi agangay, maibus aminen a lakok iti agmalem. Kinaagpaysuanna, dakdakkel payen ti masapsapulak ngem idi agtartarimaanak iti kompiuter. Naragragsakak ta saanakon a mais-stress ken madandanagan a kas iti marikriknak idi iti dati a trabahok. Ken kangrunaanna, mariknak a nadekdekketakon ken Apo Jehova.”—Basaen ti Mateo 5:3, 6.

9. Kasano a mapagtalinaedtayo ti sekular a trabaho iti umiso a lugarna?

⁹ Ti kinagaget ti maysa a galad a makaay-ayo iti Dios; makagunggona met ti napasnek a panagtrabaho. (Prov. 12:14) Ngem kas iti nasursuro ti nadakamat a kabsat, masapul nga agtalinaed ti trabaho iti umiso a lugarna. Imbaga ni Jesus: “Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a bambanag [dagiti napateg a material a kasapulan] mainayonto kadakayo.” (Mat. 6:33) Tapno maammuantayo no balansetayo iti trabaho ken kadagiti naespirituan nga aktibidad, nagsayaat nga isaludsodtayo: ‘Magusgustuak ken maragragsakanak kadi iti trabahok ngem ibilangko a gagangay wenno rutina laeng dagiti naespirituan nga aktibidad?’ Makatulong ti panangpanunot iti dayta a saludsod tapno maammuantayo no ania a talaga ti napatpateg kadatayo.

10. Ania a nagpateg a leksion ti insuro ni Jesus?

¹⁰ Nagsayaat ti inyulidan ni Jesus no maipapan iti panagbalin a balanse iti material ken iti naespirituan a banag. Naminsan, napan ni Jesus iti balay dagiti agkabsat a da Maria ken Marta. Bayat a pakadanagan idi ni Marta ti agsagana iti kanenda, napan ni Maria iti sango ni Jesus ket dimngeg kenkuana. Idi nagreklamo ni Marta ta saan a tumultulong ni Maria, kinuna ni Jesus ken Marta: “Pinili ni Maria ti naimbag a bingay, ket saanto a maikkat kenkuana dayta.” (Luc. 10:38-42) Adda insuro ni Jesus a nagpateg a leksion ken Marta. Tapno saantayo a masinga kadagiti banag a kasapulantayo ken tapno mapaneknekantayo nga ay-ayatentayo ni Kristo, masapul nga itultuloytayo a pilien ti “naimbag a bingay,” ti panangyun-una kadagiti naespirituan a banag.

11. Ania ti isuro ti Biblia maipapan iti panaginana ken panagrelaks?

¹¹ Kasapulantayo no dadduma ti agrelaks tapno makainanatayo manipud iti makabannog ken adu a trabahotayo. Kuna ti Biblia: “Iti maysa a tao awanen ti nasaysayaat ngem iti pannanganna ket pudno nga uminum ken ipakitana iti kararuana ti naimbag gapu iti napinget a panagtrabahona.” (Ecl. 2:24) Ammo ni Jesus a kasapulantayo ti aginana no dadduma. Kalpasan ti napasnek a panangasabada, imbagana kadagiti adalanna: “Umaykayo a pribado, dakayo, iti langalang a lugar ket aginanakayo iti apagbiit.”—Mar. 6:31, 32.

12. Ania ti pagannadantayo maipapan iti panaglinglingay ken panagrelaks? Mangted iti pagarigan.

¹² Napateg ngarud ti panaglinglingay ken panagrelaks. Ngem agannadtayo ta posible nga agbalin a daytan ti ipangpangrunatayo.  Idi umuna a siglo, kastoy ti kapanunotan ti adu: “Mangan ken uminumtayo, ta inton bigat mataytayo.” (1 Cor. 15:32) Adu met ti kasta ti kapanunotanna ita. Kas pagarigan, makigimgimong idin kadagiti Saksi ni Jehova ti maysa nga agtutubo a lalaki idiay Western Europe. Ngem simmardeng gapu ta magustuanna ti agrelaks ken aglinglingay. Ngem idi agangay, nakitana nga immadu laeng ti problemana ken ad-adda a naupay idi inyun-unana ti agaliwaksay. Nakipagadal ngarud manen ket nakualipikar idi agangay a mangasaba. Kalpasan ti panagbautisarna, kinunana: “Pagbabbabawyak laeng ti adu a tiempo a sinayangko sakbay a naamirisko a naragragsak gayam ti agserbi ken Jehova ngem ti panagragragsak iti daytoy a lubong.”

13. (a) Iyilustrarmo no kaano a pagdaksan ti panaglinglingay ken panagrelaks. (b) Ania ti makatulong tapno balansetayo iti panaglinglingay ken panagrelaks?

¹³ Agrelakstayo tapno mabang-aran ken maisubli ti pigsatayo. Ngem kasano koma kaadu ti tiempo a busbosentayo? Panunotem daytoy: Magusgustuantayo no dadduma ti mangan iti sinam-it (dessert), ngem ammotayo a saan a nasayaat iti salun-at ti kanayon a pannangan iti keyk ken kendi. Isu a dagiti nasustansia a makan ti nangnangruna a kanentayo. Kasta met, ti kanayon a panaglinglingay ken panagrelaks pakapuyenna ti naespirituan a salun-attayo. Tapno maliklikantayo dayta, masapul a kanayon a makiramantayo kadagiti aktibidad para iti Pagarian. Kasano a maammuantayo no balansetayo maipapan iti panaglinglingay? Iti makalawas, mabalin nga ilistatayo no mano nga oras ti busbusbosentayo kadagiti naespirituan nga aktibidad, kas iti pannakigimong, panangasaba, ken iti personal a panagadal wenno iti panagadal ti pamilia iti Biblia. Kalpasanna, mabalin nga ikomparatayo no mano nga oras ti inusartayo nga agrelaks iti dayta met laeng a lawas, kas iti pannakiraman iti isport, panangaramid iti paggugustotayo, panagbuya, wenno panagay-ayam iti video game. Ania ti makunam iti resulta ti panangikomparam? Masapul ngata a kissayam ti pannanganmo iti “sinam-it”?—Basaen ti Efeso 5:15, 16.

14. Ania koma ti mangiwanwan kadatayo nga agpili iti paglinglingayan?

¹⁴ Nawayatayo ken uray dagiti ulo ti pamilia nga agpili iti paglinglingayan maitunos la ketdi dagita kadagiti prinsipio ni Jehova a mabasa iti Biblia. * “Sagut ti Dios” ti nasayaat a paglinglingayan. (Ecl. 3:12, 13) Siempre, mabalin nga agduduma ti pilientayo. (Gal. 6:4, 5) Aniaman ti pilientayo, kayattayo nga agtalinaed dayta iti umiso a lugarna. Kinuna ni Jesus: “No sadino ti ayan ti gamengmo, addanto met sadiay ti pusom.” (Mat. 6:21) Ti koma ngarud panagayattayo ken Jesus ti mangtignay kadatayo a mangipamaysa ti panunot, panagsasao, ken ar-aramidtayo kadagiti aktibidad para iti Pagarian imbes a kadagiti inaldaw nga aktibidad.—Fil. 1:9, 10.

15, 16. (a) Kasano a posible nga agbalin a silo ti kinamaterialistiko iti maysa a Kristiano? (b) Ania ti nagsayaat a balakad ni Jesus maipapan kadagiti material a bambanag?

¹⁵ Sangkapanunot ti adu ita no kasano a maaddaanda kadagiti kabaruan nga uso, gadyet, ken dadduma pay. Ngarud, masapul a kanayon a sukimatentayo no ania ti ipangpangrunatayo babaen kadagitoy a saludsod: ‘Dagiti kadi material ti kapatgan kaniak, nga uray la ad-adun ti orasko nga agkita ken mangpanunot kadagiti uso wenno kabaruan a lugan ngem iti panagsaganak  kadagiti gimong? Okupadoak kadi unayen iti inaldaw, ket nakabasbassiten ti orasko nga agkararag wenno agbasa iti Biblia?’ No makitatayo a mas ay-ayatentayon dagiti material a bambanag ngem ti Kristo, utobentayo koma ti imbaga ni Jesus: “Agaluadkayo iti tunggal kita ti kinaagum.” (Luc. 12:15) Apay nga imbaga ni Jesus dayta a serioso a pakdaar?

¹⁶ Kuna ni Jesus nga “awan ti makabalin nga agpaadipen iti dua nga appo.” Innayonna pay: “Saanyo a mabalin ti agpaadipen iti Dios ken iti Kinabaknang.” Ngamin, agpada a namnamaen dagita nga “appo” ti naipamaysa a debosion. Mabalin a ‘guraentayo ti maysa ket ayatentayo ti sabali’ wenno ‘agtalinaedtayo iti maysa ket umsien [wenno, guraentayo] ti sabali,’ kuna ni Jesus. (Mat. 6:24) Kas imperpekto a tattao, masapul nga itultuloytayo a labanan dagiti “derrep ti lasagtayo,” agraman ti kinamaterialistiko.—Efe. 2:3.

17. (a) Apay a marigatan ti pisikal a tao nga agbalin a balanse iti material a bambanag? (b) Ania ti makatulong kadatayo a manglaban iti kinamaterialistiko?

¹⁷ Marigatan nga agbalin a balanse dagiti tattao a dagiti laeng material a bambanag ti pampanunotenda. Apay? Gapu ta namudel ti panagpampanunotda no maipapan iti naespirituan. (Basaen ti 1 Corinto 2:14.) Gapu ta nalibeg ti pannakaawatda, ad-adda a marigatanda a mangilasin iti naimbag ken dakes. (Heb. 5:11-14) Kas resultana, saan a makontrol ti dadduma ti bagida a mangayat kadagiti material a bambanag, ket saan a pulos nga agpatingga dayta a tarigagayda. (Ecl. 5:10) Imbag laengen ta adda agas dayta a makasabidong a panagpampanunot: ti inaldaw nga arigna panagtomar manipud iti Sao ti Dios, ti Biblia. (1 Ped. 2:2) No kasano a nakatulong ken Jesus ti panangutob iti sao ti Dios a manglaban iti sulisog, malabanantayo met ti kinamaterialistiko no iyaplikartayo dagiti prinsipio ti Biblia. (Mat. 4:8-10) Iti kasta, maipakitatayo a mas ay-ayatentayo ni Jesus ngem iti aniaman a material a banag.

18. Ania ti ikagumaam nga aramiden?

¹⁸ Idi insaludsod ni Jesus ken Pedro: “Ay-ayatennak kadi nga ad-adda ngem dagitoy?” ipalpalagipna ken Pedro a masapul nga iyun-unana iti biagna dagiti naespirituan a banag. Nagbiag ni Pedro maitunos iti naganna, a kaipapananna “Maysa a Bato,” ta impakitana dagiti arig bato a kualidad. (Ara. 4:5-20) Ikagumaantayo met koma ngarud a pagtalinaeden a natibker ti ayattayo ken Kristo babaen iti panagbalin a balanse iti sekular a trabaho, panaglinglingay, ken iti material a bambanag. Ipakita koma dagiti desisiontayo nga ibagbagatayo ti kas iti imbaga ni Pedro ken Jesus: “Apo, ammom nga adda panagayatko kenka.”