1, 2. Antoy naeksperiensya nen Pedro kayari na sanlabin impansigay da?

SANLABIN nansigay ed Dayat na Galilea so pitora ed saray disipulo nen Jesus, balet anggapoy narel da. Walad gilig na dayat so pinaolin si Jesus tan oobserbaan to ra. Insan “inkuan tod sikara: ‘Ipelag yoy iket ed bandad kawanan na baloto tan walay naala yo.’ Kanian impelag da itan, balet agda la naguyor lapud karakel na sira.”—Juan 21:1-6.

² Kayarin namparaan si Jesus na almusal da, oniay imbaga tod si Pedro: “Simon ya anak nen Juan, kasin mas inarom ak nen saraya?” Antoy tutukoyen nen Jesus? Labalabay nen Pedro so mansigay. Kanian nayarin tetepeten nen Jesus no anto so talagan papablien to. Kasin mas papablien to ray sira tan say negosyo ton panagsigay nen say si Jesus tan saray imbangat to? Oniay ebat nen Pedro: “On, Katawan, amtam a papablien ta ka.” (Juan 21:15) Tinoor nen Pedro so imbaga to. Manlapud saman, pinaneknekan ton inaro toy Kristo, ya makulikuli ed kimey ya panaggaway babangatan tan sikatoy nagmaliw ya importantin kabiangan  na Kristianon kongregasyon nen inmunan siglo.

3. Anto ran peligro so nepeg ya panalwaran na saray Kristiano?

³ Antoy naaralan tayo ed imbaga nen Jesus ed si Pedro? Kaukolan tayoy manalwar ya ag-ombetel so panangaro tayod Kristo tan agtayo la makapampokus ed kimey parad Panarian. Amta nen Jesus ya nayarin nadesdes itayo lapud saray kapagaan ed sayan sistema na mundo. Diad ilustrasyon to nipaakar ed tomatanem, imbaga to ya wala ray mangawat ed “salita na Panarian” tan onaligwas ed gapo, balet “saray kapagaan ed sayan sistema na mundo tan say mapalikdon pakayari na kaykayamanan” so ‘manakbong ed salita.’ (Mat. 13:19-22; Mar. 4:19) Kanian no agtayo manalwar, nayarin napalingo so puso tayo tan onkapuy so espiritualidad tayo lapud inagew-agew ya kapagaan ed bilay. Pinasakbayan nen Jesus iray disipulo to: “Manalwar kayo pian agbalot nabelatan so puso yo ed sobran panangan tan alabas a panag-inum tan saray kapagaan ed bilay.”—Luc. 21:34.

4. Antoy makatulong ed sikatayo pian nausisa tayoy kaaralem na panangaro tayod Kristo? (Nengnengen so litratod gapo na artikulo.)

⁴ Singa ginawa nen Pedro kayarin kinatongtong na pinaolin si Jesus, napruebaan tayo ya aralem so panangaro tayod Kristo no iyuuna tayo so kimey ya ipapagawa tod sikatayo. Panon tayon naseguro ya tuloytuloy tayon nagawaan itan? Kaukolan tayon itepet ed sarili tayo: ‘Anto so talagan papablien ko? Kasin say mas panliliketan ko et saray agmasyadon importantin aktibidad, odino saray espiritual a kimey?’ Pian naebatan iya, aralen tayoy taloran aspekto ya no agtayo magmaliw ya balanse et nayarin ombetel so panangaro tayo ed Kristo tan ed saray espiritual a bengatla—trabaho, panagligliwaan, tan materyal iran bengatla.

5. Antoy Makasulatan ya responsabilidad na saray ulo na pamilya?

⁵ Parad si Pedro, agto labat hilig so mansigay—anapan to itan. Amta na saray ulo na pamilya natan so Makasulatan ya responsabilidad dan taryaan na materyal so pamilya da. (1 Tim. 5:8) Nepeg iran mankuli pian nagawaan da iyan obligasyon da. Balet diad sayan kaunoran iran agew, mabetbet a say trabaho so panlalapuan na kapagaan.

6. Anto ray makapa-stress ya situasyon ed trabaho natan?

⁶ Lapud amayamay so manaanap na trabaho balet daiset so naromog ya trabaho, grabe so kompetisyon. Dakel natan so napipilitan ya mantrabaho na mas dakel ya oras, ya melag labat so sueldo. Ontan met, maslak ya kompanya et labay dan ondakel so produksion da, kanian saray empleyado et nakekesawan ya maong ed pisikal, mental, tan emosyonal. Iisipen da ya no ag-ira mansakripisyo parad kompanya, ompan naekal irad trabaho.

7, 8. (a) Siopay nepeg ya manunan panmatooran tayo? (b) Anton importantin leksion so naaralan na sakey ya brother ed Thailand nipaakar ed trabaho to?

⁷ Bilang Kristiano, say nepeg ya manunan panmatooran tayo et si Jehova a Dios, aliwan say amo tayo. (Luc. 10:27) Kailangan tayoy trabaho pian nitarya iray manunan pankaukolan tayo tan nasuportaan so ministeryo tayo. Balet no ag-itayo manalwar, ompan napaulyanan tayoy panagdayew tayo lapud trabaho. Singa bilang, imbaga na sakey ya brother ed Thailand: “Balibali trabahok ya manag-repair na computer, balet dakel so oras ya uusaren ko. Kanian ngalngali anggapo lay panaon kod espiritual. Naisip ko ya pian niyunak so Panarian, kaukolan koy mananap na arum ya trabaho.” Antoy ginawa na sayan brother?

 ⁸ “Kayari manga sakey taon ya impanplano,” kuan to, “nandesisyon ak ya manlako lay ice cream diad karsada. Diad gapo, nairapan ak ed pinansyal tan adismaya ak. Nen anengneng ko ray datin katrabahok, elekan da ak tan tinepet da no akin ya mas labay koy manlakoy ice cream nen say man-repair na computer ya aka-aircon. Nampikasi ak ed si Jehova tan kinerew kon tulongan to ak ya nasarag iya tan nagawaan koy planok ya naaruman so panaon ko ed espiritual. Ag-abayag, mas maabig lay situasyon ko. Akabisadok no antoy labay na saray customer ko tan nagmaliw ak ya mas marunong ed panaggaway ice cream. Inagew-agew lan nauupot so lakok ya ice cream. Diad tua, mas maong so anap ko nen say sanen manre-repair ak ni na computer. Kanian mas maliket ak ta anggapo la may stress tan kapagaan ya naliliknak nen wala ak nid datin trabahok. Tan say sankaimportantian et mas inmapit ak natan ed si Jehova.”—Basaen so Mateo 5:3, 6.

9. Panon tayon magmaliw ya balanse ed pangipapasen tayod trabaho?

⁹ Say inkakuli et kualidad ya labalabay na Dios, tan nagunggonaan itayo no makuli tayon mantrabaho. (Pro. 12:14) Balet, singa naaralan na samay brother ya abitla niman, kaukolan tayoy magmaliw ya balanse ed trabaho. Imbaga nen Jesus: “Itultuloy yo sirin ya anapen nin unona so Panarian tan say inkatunong To, tan sarayan amin a bengatla [manunan materyal ya pankaukolan] et niarum ed sikayo.” (Mat. 6:33) Pian naamtaan no kasin balanse so pangipapasen tayo ed trabaho tan ed espiritual ya responsabilidad tayo, maabig no tepetan tayoy sarili tayo: ‘Kasin labalabay tan nai-enjoy koy trabahok balet ipapasen kon ordinaryo o rotina labat iray espiritual ya kimey?’ No nonoten tan dalepdepen tayo no antoy nalilikna tayo ed trabaho tan espiritual iran kimey tayo, naamtaan tayo no anto so talagan papablien tayo.

10. Anton importantin leksion so imbangat nen Jesus ed no antoy nepeg tayon iyuna ed bilay tayo?

¹⁰ Imbangat nen Jesus no antoy nepeg tayon iyuna ed bilay tayo. Aminsan, binmisitay Jesus ed abung di Maria tan atsi ton Marta. Tampol ya namparaan si Marta na naakan, balet si Maria et yinmurong ed salian nen Jesus pian ondengel. Nen nanreklamoy Marta ya ag-ontutulong si Maria, imbaga nen Jesus ed si Marta: “Pinili nen Maria so maabig a parte, tan ag-itan naandi ed sikato.” (Luc. 10:38-42) Sakey ya importantin leksion so imbangat nen Jesus ed si Marta. Pian agtayo masyadon akapokus ed materyal iran bengatla tan napaneknekan tayon inaro tayoy Kristo, itultuloy tayon pilien so “maabig a parte,” tan iyuna iray espiritual ya bengatla.

11. Antoy ibabangat na Biblia nipaakar ed panagrelaks tan pampainawa?

¹¹ Kaukolan tayo met so manrelaks tan manpainawa ed trabaho tan ed busy ya eskedyul tayo. Ibabaga na Salita na Dios: “Anggapo lay mas maabig ed sakey a too nen say mangan tan oninum tan manliket ed pansasagpot to.” (Ecl. 2:24) Amta nen Jesus ya kaukolan met so painawa. Aminsan, oniay imbaga nen Jesus ed saray disipulo to nen naksawan ira kayari dan nampulong: “Ti’la, ta onla itayo ed sakey a nisulinek a pasen pian makapanpainawa itayon magano.”—Mar. 6:31, 32.

12. Akin et kaukolan tayoy manalwar nipaakar ed panagrelaks tan panagligliwaan? Mangiter na alimbawa.

¹² Tua, makatulong ed sikatayo so panagrelaks tan panagligliwaan. Balet mapeligro no satan lay akapokusan na bilay tayo. Nen  inmunan siglo, say panagnonot na dakel et “Mangan tan oninum tayo, ta nabuas et ompatey tayo.” (1 Cor. 15:32) Ontan so dakel ya totoo natan ed mundo. Singa bilang, pigaran taon lay apalabas, walay kabataan a laki diad Western Europe ya onaatendi lad saray aral. Balet lapud sobran hilig tod panagligliwaan, tinundaan toy miulop ed saray lingkor nen Jehova. Pero sinmabi panaon, naisip to ya puro problema tan ermen labat so resulta na impangiyuna to ed panagligliwaan. Kanian nanaral lamet na Biblia tan ag-abayag et nagmaliw ya kualipikadon manangipalapag na maong a balita. Kayari bautismo to, imbaga to: “Say pagbabawian ko labat et dakel so asayang kon panaon antis kon naamtaan ya say panlingkor ed si Jehova et mas makapaliket nen say pangiyuna ed panagligliwaan ed sayan mundo.”

13. (a) Iyilustra no anto ray peligro ed sobran panagrelaks tan panagligliwaan. (b) Antoy makatulong pian magmaliw tayon balanse ed panagrelaks tan panagligliwaan?

¹³ Say gagala na panagligliwaan et pian narelaks tan nainawaan tayo. Pian nagawa itan, panon karakel so panaon ya usaren tayo ed satan? Isipen iyan ilustrasyon: Labay na dakel ed sikatayo so mangan na palamis paminsan-minsan, balet amta tayon makapuy ed laman no lanang tayon mangan na cake tan kendi. Kanian kaukolan ya masustansian lanang iray kanen tayo. Mipadpara, no naynay so panagrelaks tan panagligliwaan tayo, onkapuy so espiritualidad tayo. Pian naiwasan itan, kaukolan ya regular tayon mibiang ed saray kimey parad Panarian. Panon tayon naamtaan no kasin balanse so pangipapasen tayo ed panagligliwaan? Diad loob na sakey simba, nayari tayon isulat no pigaran oras so uusaren tayo ed espiritual iran aktibidad, singa say piaral, pampulong, tan personal ya panagaral ed Biblia tan panagdayew na pamilya. Insan ikompara tayo itan ed karakel na oras ya uusaren tayo ed satan ya simba diad panagligliwaan, singa diad isport, saray hilig tayon gawaen, pambantay na TV, o diad panggalaw na video games. Antoy nanengneng tayo no pankomparaen tayo iratan? Kasin kaukolan tayon bawasan so “palamis”?—Basaen so Efeso 5:15, 16.

14. Antoy makatulong ed sikatayon manpili na panagligliwaan?

¹⁴ Kada indibidual tan ulo na pamilya so akauley ya manpili no antoy labay dan panagligliwaan, basta ag-iratan sumlang ed prinsipyo nen Jehova ya walad Biblia. * Say maabig ya panagligliwaan et “regalo na Dios.” (Ecl. 3:12, 13) Siempre, aliwan parepareho so labay na totoo ya panagligliwaan. (Gal. 6:4, 5) Antokaman so pilien tayo, labay tayoy magmaliw ya balanse. Imbaga nen Jesus: “No iner so kawalaay kayamanan mo, diman met so kawalaan na pusom.” (Mat. 6:21) Kanian pakiwasen itayo na impapuson panangaro ed si Jesus pian ipanengneng ya say panagnonot, panagsalita, tan gagawaen tayo et akapokus ed saray kimey parad Panarian tan aliwan diad arum nin bengatla.—Fil. 1:9, 10.

15, 16. (a) Panon a magmaliw a patit so materyalismo ed sakey a Kristiano? (b) Antoy maong ya insimbawa nen Jesus nipaakar ed materyal iran bengatla?

¹⁵ Labalabay na dakel ya totoo natan so nawalaan na sankabaloan iran kawes, gadyet, tan arum ni. Kanian nepeg ya regular ya usisaen na kada Kristiano no anto ray pipirawaten to tan tepetan toy sarili to: ‘Kasin importante lan maong ed siak iray materyal a bengatla kanian mas dakel so oras ko ya man-research tan mannonot no anto ray sankabaloan ya luganan odino kawes nen say  pamparaan parad aral? Kasin masyado ak lan busy ed inagew-agew ya kimey ko kanian daiset lay panaon kon manpikasi o manbasa na Biblia?’ No nanengneng tayo ya naaandi lay panangaro tayo ed si Kristo lapud panangaro tayo ed materyal iran bengatla, kaukolan tayon nodnonoten iyan imbaga nen Jesus: “Manalwar kayo ed amin a klase na inkaagum.” (Luc. 12:15) Akin ya impasakbay itan nen Jesus?

¹⁶ Imbaga nen Jesus ya “anggapoy toon nayarian toy manpaaripen ed duaran katawan.” Imbaga to ni: “Agyo nayarian so manpaaripen ed Dios tan ed Kayamanan.” Say rason et labay na sayan duaran “katawan” ya sikara labat so panlingkoran. Balanglan ‘busolen tayo imay sakey tan aroen imay sananey, odino mansiansia tayo ed sakey tan balawen imay sananey,’ kuan nen Jesus. (Mat. 6:24) Lapud aliwa itayon perpekto, kaukolan tayon itultuloy ya labanan iray “pilalek na laman tayo,” kaiba lay materyalismo.—Efe. 2:3.

17. (a) Akin a saray totoon akapokus ed pilalek na laman et naiirapan ya magmaliw a balanse ed pangipapasen dad materyal iran bengatla? (b) Antoy ontulong ed sikatayon nalabanan so pampilalek ed materyal iran bengatla?

¹⁷ Saray totoon akapokus ed pilalek na laman da et naiirapan ya magmaliw ya balanse ed pangipapasen dad materyal iran bengatla. Akin? Lapud kinmapuy so espiritual ya pakatalos da. (Basaen so 1 Corinto 2:14.) No naepel lay pakayari ran manebek, mas nairapan la ran ibiig no antoy duga tan aliwa. (Heb. 5:11-14) Bilang resulta, agla nakontrol na arum so pampilalek dad materyal iran bengatla—pilalek ya agbalot napenek. (Ecl. 5:10) Maong labat ta no nasasamalan lay nonot tayo na materyalismo, walay pangontra: say regular ya pambasa na Salita na Dios, say Biblia. (1 Ped. 2:2) No panon ya say impandalepdep nen Jesus ed katuaan ya nanlapud Dios et amabiskeg ed sikaton labanan so tukso, say pangiyaplika ed saray prinsipyo na Biblia so ontulong ed sikatayon nalabanan so pampilalek tayod materyal iran bengatla. (Mat. 4:8-10) No gawaen tayo itan, ipapanengneng tayo ya mas inaro tayoy Jesus nen say antokaman ya materyal a bengatla.

18. Antoy determinadon gawaen mo?

¹⁸ Nen tinepetan nen Jesus si Pedro: “Kasin mas inarom ak nen saraya?” ipapanonot tod si Pedro ya kaukolan ton iyuna ed bilay to iray espiritual a bengatla. Say kabaliksan na ngaran nen Pedro et “Sakey a Bato,” tan dugaruga itan ed sikato, ta impanengneng to ray kualidad a singa bato. (Gawa 4:5-20) Natan, determinado tayo met ya mansiansian malet ed panangaro tayod Kristo, tan mansiansian balanse ed trabaho, panagligliwaan, tan materyal iran bengatla. Komon ta napatnagan ed saray desisyon tayo ya miparay liknaan tayo ed si Pedro nen imbaga tod si Jesus: “Katawan, amtam a papablien ta ka.”