1, 2. Despues di a pasa henter anochi ta piska, ki eksperensia Pedro a pasa aden?

SHETE di Hesus su disipelnan a kaba di pasa henter anochi ta piska den Laman di Galilea sin kue nada. Hesus resusitá tabata pará kantu di laman ta opservá nan. Despues e di ku nan: “‘Tira e reda na banda drechi di e boto, i boso lo haña algu.’ Anto nan a tira e reda; pero komo ku tabatin asina tantu piská den dje, nan no por a hal’é aden mas.”—Huan 21:1-6.

² Despues ku Hesus a kaba di sirbi nan desayuno, el a bira puntra Simon Pedro: “Simon, yu di Huan, bo stima mi mas ku esakinan?” Na kiko Hesus tabata referí ku “esakinan”? Pedro tabata gusta piska mashá. Pues, ta parse ku Hesus tabata puntr’é kiko e tabata stima mas. Akaso e tabata stima piská i e negoshi di piskamentu mas ku Hesus i loke Hesus a siñ’é? Pedro a kontestá: “Sí, Señor, bo sa ku mi stima bo.” (Huan 21:15) Pedro sigur a kumpli ku loke el a bisa. For di e dia ei padilanti, el a demostrá kuantu e tabata stima Kristu ya ku el  a keda okupá den e trabou di hasi disipel i a bira un pilá den e kongregashon kristian di promé siglo.

3. Ki peliger kristiannan mester tene kuidou kuné?

³ Kiko nos por siña for di loke Hesus a bisa Pedro? Nos mester tene kuidou pa nos no laga nos amor pa Kristu debilitá i pa nos no desvia for di interesnan di Reino. Hesus tabata bon konsiente di e strès, preshon i ansiedat ku e sistema di kosnan akí por trese kuné. Den Hesus su ilustrashon di e sembradó, el a bisa ku algun hende lo aseptá “e palabra di Reino” i kuminsá hasi progreso ma “e inkietut di e era akí i e poder engañoso di rikesa” lo “stek e palabra.” (Mat. 13:19-22; Mar. 4:19) Pues, si nos no tene kuidou, e preokupashonnan di bida di tur dia por desvia nos kurason i pone nos baha man den kosnan spiritual. P’esei, Hesus a spièrta su disipelnan: “Presta atenshon na boso mes pa boso kurason nunka bira demasiado kargá ku komementu di mas, bebementu di mas i e inkietutnan di bida.”—Luk. 21:34.

4. Kiko lo yuda nos eksaminá kuantu nos ta stima Kristu? (Wak e promé plachi.)

⁴ Meskos ku Pedro a hasi despues di su enkuentro ku Hesus, nos por demostrá kuantu nos ta stima Kristu ora nos pone e trabou ku el a duna nos na promé lugá. Kon nos por hasi sigur ku nos ta sigui hasi esei? Tempu tempu, ta bon pa nos puntra nos mes: ‘Kiko mi ta stima mas? Mi ta haña mas goso den e aktividatnan normal di bida diario òf den aktividatnan spiritual?’ Relashoná ku esaki, laga nos analisá tres área di bida ku si nos no tene nan na nan debido lugá, nan por pone nos amor pa Kristu i pa kosnan spiritual mengua: trabou, dibertishon i kosnan material.

5. Ki responsabilidat bíbliko kabesnan di famia tin?

⁵ Pa Pedro, piskamentu tabata mas ku djis un hòbi; e tabata su fuente di entrada. Awe, kabesnan di famia ta rekonosé ku nan tin e responsabilidat bíbliko di perkurá materialmente pa nan famia. (1 Tim. 5:8) Nan mester traha duru pa kumpli ku e obligashon ei. Pero, den e último dianan akí, trabou hopi biaha ta trese ansiedat.

6. Ki preshon empleadonan tin awe?

⁶ Komo ku tin hopi mas hende ta buska trabou ku tin kupo di trabou disponibel, hopi empleado ta sinti ku nan ta obligá pa traha mas ora, i tin biaha pa ménos pago. Ademas, e preshon konstante pa produsí mas den poko tempu ta trese konsekuensianan físiko, mental i emoshonal. Anto empleadonan ku no ta dispuesto pa hasi e sakrifisionan ei pa nan kompania ta kore e peliger di pèrdè nan trabou.

7, 8. (a) Na ken nos mester ta leal na promé lugá? (b) Ki lès balioso un ruman na Tailandia a siña di su trabou?

⁷ Komo kristian, nos mester ta leal na Yehova Dios na promé lugá, no na nos doño di trabou. (Luk. 10:27) Trabou sekular ta simplemente un medio pa logra algu. Nos ta traha pa kubri nos nesesidatnan material básiko i pa nos obra di prediká. Pero, si nos no tene kuidou, trabou por stroba nos sirbishi na Dios. Por ehèmpel, un ruman hòmber na Tailandia ta konta: “Mi trabou di drecha kòmpiuter tabata hopi interesante, pero mi mester a traha oranan largu. Komo resultado, kasi mi no tabatin tempu pa aktividatnan spiritual. Despues mi a realisá ku pa mi pone interesnan di Reino  promé, mi mester a kambia di trabou.” Kiko e ruman akí a hasi?

⁸ E ta konta: “Despues di a pensa kiko pa hasi i spar pa un aña, mi a disidí di kuminsá bende eiskrim riba kaya. Na prinsipio, no tabata bai masha bon finansieramente, i esei a desanimá mi. Ora mi tabata topa algun eks kolega di trabou, nan tabata hari mi i puntra dikon mi tabata haña ku bendementu di eiskrim tabata mas mihó ku drechamentu di kòmpiuter den èrko. Mi a hasi orashon na Yehova i a pidié p’e yuda mi perseverá i pa logra mi meta di haña mas tempu pa aktividatnan spiritual. No a tarda muchu ku kosnan a kuminsá mehorá. Mi a bin ripará kiko mi klientenan tabata gusta, i mi a kuminsá traha eiskrim mas mihó. Despues di poko tempu, tur dia mi tabata bende tur mi eiskrimnan. Eigenlijk, aworakí mi ta gana mas tantu sèn ku tempu mi tabata drecha kòmpiuter. Mi ta mas kontentu pasobra mi no tin e strès ni e preokupashonnan di e trabou ku mi tabatin. I mas importante ainda, mi ta sinti mi mas serka Yehova.”—Lesa Mateo 5:3, 6.

9. Kon nos por mantené un punto di bista balansá di nos trabou?

⁹ Yehova ta apresiá ora nos ta traha duru, i trabou duru ta trese rekompensa. (Pro. 12:14) Sinembargo, manera e ruman menshoná ariba a siña, trabou mester keda na su debido lugá. Hesus a bisa: “Sigui buska anto promé e Reino i e hustisia di Dios, i lo e duna boso tur e kosnan akí [nesesidatnan material básiko].” (Mat. 6:33) Pa nos por determiná si nos tin un punto di bista balansá di trabou i responsabilidatnan spiritual, ta bon pa nos puntra nos mes: ‘Mi ta haña mi trabou interesante i fasinante pero ta mira mi aktividatnan spiritual komo algu rutinario òf asta laf?’ Pues ora nos meditá riba kiko nos ta pensa di nos trabou i aktividatnan spiritual, nos por haña sa kiko nos ta stima mas.

10. Ki lès balioso Hesus a siña nos tokante ponementu di prioridat?

¹⁰ Hesus a pone e mihó ehèmpel den e manera ku nos tin ku balansá interesnan sekular i spiritual. Na un okashon, el a bishitá e kas di Maria i su ruman, Marta. Miéntras ku Marta tabata ansha pa prepará un kuminda, Maria a skohe pa sinta na pia di Hesus i skuch’é. Ora Marta a reklamá ku Maria no tabata yud’é, Hesus a bisa Marta: “El a skohe e mihó parti, i lo no kita esei for di dje.” (Luk. 10:38-42) Aki Hesus a siña Marta un lès balioso. Pa nos no laga asuntunan sekular distraé nos i pa nos por demostrá nos amor pa Kristu, nos mester sigui skohe “e mihó parti,” esta, duna prioridat na kosnan spiritual.

11. Kiko Beibel ta bisa tokante sosiegu i dibertishon?

¹¹ Nos mester di tempu pa relahá i refreská di nos trabou duru i bida drùk. E Palabra di Dios ta bisa: “No tin nada mihó pa un hende ku kome i bebe i bisa su mes ku su trabou ta bon.” (Ekl. 2:24) Hesus a rekonosé ku hende mester sosegá. Despues di un kampaña intenso di prediká, el a bisa su disipelnan: “Ban ku mi, boso so, na un lugá solitario i sosegá un poko.”—Mar. 6:31, 32.

12. Relashoná ku dibertishon i entretenimentu, kiko nos mester tene kuidou kuné? Duna un ehèmpel.

¹² Sí, dibertishon i entretenimentu ta yena un nesesidat importante di hende. Pero nos por kore e peliger di hasi dibertishon  i entretenimentu e kos di mas importante den nos bida. Den e promé siglo, hopi hende tabatin e aktitut di “laga nos kome i bebe, pasobra mañan nos ta muri.” (1 Kor. 15:32) Awe, na hopi parti di mundu, hende tin e mesun aktitut. Por ehèmpel, algun aña pasá un yònkuman na Wèst Europa a kuminsá asistí na e reunionnan. Pero e tabata gusta dibertí asina tantu ku el a stòp di asosiá ku e pueblo di Yehova. Ma, ku tempu, el a ripará ku su enfoke riba entretenimentu a hiba na problema i desapunto so. Pues el a sigui ku su estudio di Beibel, i ku tempu el a kualifiká pa bira un publikadó di e bon notisia. Despues di su boutismo, el a bisa: “E úniko kos ku mi ta lamentá ta ku mi a pèrdè hopi tempu promé ku mi a realisá ku sirbi Yehova ta trese muchu mas felisidat ku sigui tras di e tipo di entretenimentu ku e mundu akí ta ofresé.”

13. (a) Ki peliger tin relashoná ku rekreo? Ilustrá esaki. (b) Kiko por yuda bo mantené un punto di bista balansá di dibertishon i entretenimentu?

¹³ Rekreo mester refreská nos i renobá nos energia. Pa logra esei, kuantu tempu nos mester pasa ta dibertí? Pensa un ratu riba e komparashon akí: Hopi di nos gusta kome postre, pero nos sa ku un dieta di bolo i mangel so lo daña nos salú. P’esei, nos ta kome prinsipalmente kuminda nutritivo. Di mes manera, un dieta di dibertishon i entretenimentu so lo suak nos den sentido spiritual. Pa evitá esaki, nos ta partisipá regularmente den aktividatnan di Reino. Awor, kon nos por determiná si nos tin un punto di bista balansá di rekreo? Por ehèmpel, durante un siman, skirbi kuantu ora bo ta dediká na aktividatnan spiritual, manera bai reunion, traha den sirbishi, hasi estudio personal i Adorashon Komo Famia. Anto, kompará e oranan ei ku e kantidat di ora ku bo ta dediká na rekreo, manera deporte, hòbi, wakmentu di televishon òf hungamentu di wega di vidio. Kiko e komparashon ei ta revelá? Kisas bo mester ‘kome ménos postre’?—Lesa Efesionan 5:15, 16.

14. Kiko mester guia nos eskoho di dibertishon i entretenimentu?

¹⁴ Kada hende i kabes di famia ta liber pa skohe e dibertishon ku e ta preferá, basta ta aktividatnan ku ta na armonia ku prinsipionan di Beibel. * Rekreo sano ta un “regalo di Dios.” (Ekl. 3:12, 13) Ta klaru ku eskoho di rekreo ta varia di hende pa hende. (Gal. 6:4, 5) Sea kual sea e entretenimentu ku nos skohe, nos mester ten’é na su debido lugá. Hesus a bisa: “Kaminda bo tesoro ta, einan bo kurason tambe lo ta.” (Mat. 6:21) Pues, nos amor di kurason pa Hesus lo motivá nos pa enfoká nos pensamentunan, abla i akshon primordialmente riba aktividatnan di Reino en bes di riba aktividatnan di bida di tur dia.—Flp. 1:9, 10.

15, 16. (a) Kon materialismo por bira un trampa pa un kristian? (b) Ki konseho sabí Hesus a duna relashoná ku kosnan material?

¹⁵ Awe, hopi hende ta opseshoná ku paña di último moda, aparatonan elektróniko i otro kosnan. P’esei, kada un di nos mester saminá nos mes pa wak kiko ta nos deseonan i hasi nos mes preguntanan manera: ‘Mi a laga kosnan material bira asina importante ku mi ta dediká mas tempu na buska i pensa riba outo  òf moda ku mi ta dediká na prepará pa reunionnan di kongregashon? Mi a bira asina preokupá ku aktividatnan di bida di tur dia ku mi ta dediká ménos tempu na hasi orashon òf lesa Beibel?’ Si nos ripará ku nos amor pa kosnan material ta pone nos amor pa Kristu mengua, nos mester meditá riba e palabranan di Hesus: “Warda boso di tur sorto di golosidat.” (Luk. 12:15) Dikon Hesus a duna nos e spièrtamentu serio ei?

¹⁶ Hesus a bisa ku “ningun hende no por ta esklabo di dos doño.” Anto el a agregá: “Boso no por ta esklabo di Dios i di Rikesa.” Esei ta pasobra tur dos “doño” ta eksigí deboshon eksklusivo. Hesus a bisa ku nos lo sea “odia esun i stima e otro” òf “pega na esun i despresiá e otro.” (Mat. 6:24) Komo hende imperfekto, kada un di nos mester sigui lucha kontra “e deseonan di nos karni,” inkluso materialismo.—Efe. 2:3.

17. (a) Dikon ta difísil pa hende ku tin nan mente fihá riba deseonan karnal kultivá un punto di bista balansá di kosnan material? (b) Kiko por yuda nos lucha kontra deseonan materialista?

¹⁷ Hende ku tin nan mente fihá riba deseonan karnal tin difikultat pa kultivá un punto di bista balansá di kos material. Dikon? Pasobra nan a bira suak den sentido spiritual. (Lesa 1 Korintionan 2:14.) I ora nan yega asina leu, ta bira masha difísil pa nan distinguí loke ta bon for di loke ta malu. (Heb. 5:11-14) P’esei, tin hende ta desaroyá un deseo fuerte pa kos material, un set ku nunka nan lo logra satisfasé. (Ekl. 5:10) Pero, nos ta kontentu ku nos tin e Palabra di Dios; si nos les’é regularmente, lo e yuda nos tene pensamentunan materialista bou di kontrol. (1 Ped. 2:2) Meskos ku Hesus a meditá riba e bèrdatnan di Dios, loke a yud’é resistí tentashon, asina tambe, ora nos apliká prinsipionan di Beibel, esei por yuda nos lucha kontra deseonan materialista. (Mat. 4:8-10) Asina nos ta demostrá Hesus ku nos ta stim’é mas ku kualke kos material.

18. Kiko bo ta determiná pa hasi?

¹⁸ Ora Hesus a puntra Pedro, “Bo stima mi mas ku esakinan,” e tabata kòrda Pedro ku e mester a pone kosnan spiritual na promé lugá den su bida. Pedro, kende su nòmber ta nifiká “Pida Piedra,” en bèrdat a kumpli ku e nifikashon di su nòmber pasobra el a desplegá kualidatnan fuerte manera piedra. (Echo. 4:5-20) Awe, di mes manera, laga nos ta determiná pa keda firme den nos amor pa Kristu i sigui mantené trabou, dibertishon i kosnan material na nan debido lugá. Laga e desishonnan ku nos ta tuma den bida demostrá ku nos tin e mesun sintimentunan ku Pedro, kende a bisa Hesus: “Señor, bo sa ku mi stima bo.”