1, 2. Mwurin arail laid pwohng ehu pwon, mehn kasukuhl dahieu me Piter sukuhlki?

 SAPWELLIMEN Sises tohnpadahk isimen kohla laid pwohng ehu pwon nan Sehd en Kalili. Ahpw re sohte saikedi mwahmw men. Ahnsouwet e lelehr nimenseng, oh Sises me ketin iasadao ketiket pohn oaroahro, mahmahsanih irail. Ih eri mahsanihong irail: “‘Kumwail kadaridi uhken ni palimaun en waramwailen; a kumwail ahpw pahn diarada.’ Irail eri kadaridi uhko. Re ahpw sohla kak apihada, pwehki eh direkihla mwahmw.”​—Sohn 21:1-6.

² Sises ketikihong sapwellime tohnpadahk ko mwahmw oh pilawa ren tungoale nimensengo. Ih eri ketin sohpeilahng Piter oh keinemwe: “Saimon, nein Sohn, ia duwe, ke poakohng ie laudsang mepwukat?” Sises mwahngih me Piter perenki laid. Ele Sises ketin idek rehn Piter ma e poakohng ih oh soahng kan me e ketin padahngki laudsang eh perenki eh pesines en laido. Piter patohwan sapeng Sises: “Ei Maing ei Kaun, komw mwahngiher me I poakohng komwi.” (Sohn 21:15) Sangete rahno, Piter kin kapwaiada dahme e koasoia. E kin kasalehda eh poakohng Krais sang ni eh kin soupisengki doadoahk  en kalohk, oh e wiahla kisehn mwomwohdisohn Kristian kesempwal men.

3. Dahme Kristian kan anahne kanahieng?

³ Dahme kitail kak sukuhlkihsang sapwellimen Sises mahsen ko ong Piter? Kitail anahne kanahieng en dehr mweidohng atail limpoak ong Krais en luwetala. Sises mwahngih me mour nan koasoandi wet pahn kapwunod oh me kitail pahn lelohng kahpwal kan. Nan sapwellime karasaras duwen sounkamwarako, e mahsanih me ekei aramas pahn rong “mahsen duwen Wehin Koht” oh re pahn kasalehda ngoang nin tapio. Ahpw mwuhr, “anahn en sampah kan oh poakepen dipwisou kan” pahn “kasokehla mahseno” rehrail oh re pahn sohla ngoang. (Mad. 13:19-22; Mark 4:19) Ma kitail sohte kanahieng, kapwunod kan en ehuehu rahn kakete kerempwahla atail papah Siohwa. Eri Sises ketin mahsanihong sapwellime tohnpadahk ko: “Kumwail pein mwasamwasahn kumwail. Kumwail dehr kedirepwehkin kumwail mwenge laud oh sakau kehlail, oh pwunod kan en sampah wet.”​—Luk 21:34.

4. Dahme pahn sewese kitail en ese ma atail poakohng Krais kin kehlail? (Menlau kilang tepin kilel.)

⁴ Duwehte Piter, kitail kak kasalehda me kitail poakohng Krais sang ni atail mwohneki mahs doadoahk en kalohk nan atail mour. Ia duwen atail kak tehk mwahu pwe kitail en pousehlahte wia met? Kitail kak pein idek rehtail: ‘Dahme I keieu kesempwalki nan ei mour? Pali laud en ei peren kin kohsang ei papah Siohwa de e kohsang wiewia teikan?’ Pwehn sewese kitail sapengala met, kitail pahn tehk soahng siluh nan atail mour me kak kaluwetehla atail poakohng Krais. Mepwukat iei doadoahk en mwohni, mehn kamweit kan, oh kepwe kan.

5. Pwukoa dahieu me tapwin peneinei kan ahneki?

⁵ Ong Piter, laid kaidehn ihte mehkot me e perenki wia. Ahpw ih eh doadoahk me e kin wia pwehn apwalihki eh peneinei. Pil rahnwet, Siohwa ketikihong tapwin peneinei kan pwukoa en apwalih arail peneinei kan. (1 Tim. 5:8) Re anahne doadoahk laud pwehn wia met. Ahpw ni imwin rahn pwukat, doadoahk en mwohni kak kahrehda pwunod laud.

6. Dahme kahrehda doadoahk en mwohni kin kak kapwunod?

⁶ Aramas tohto kin anahne doadoahk ahpw doadoahk me malaulau. Pwehki met, aramas akan kin siaipene pwehn diar doadoahk. Me tohto medewe me re anahne doadoahk mwurin awahn doadoahk kan, mendahki ma e pweitikitik. Laudsang mahs, pesines kan kin song en kalaudehla arail pesines ahpw aramas malaulaute me iang doadoahk. Eri tohndoadoahk kan ele kin pwunodada, pwangada, oh pil soumwahuda. Me tohto kin pwunodki me re kakete sohla doadoahk ma re sohte wia soahng koaros me arail kauno ndaiong irail en wia.

7, 8. (a) Ihs me kitail en keieu loalopwoatohng? (b) Mehn kasukuhl kesempwal dahieu me emen brother sang Thailand sukuhlki duwen eh doadoahko?

⁷ Nin duwen Kristian kei, kitail kin loalopwoat ong Siohwa ah kaidehn aramas de soahng ehu, de pil atail kaun en doadoahk kan. (Luk 10:27) Atail doadoahk en mwohni iei ahl ehu me kitail en apwalih atail anahn akan oh pil en sewese atail doadoahk en kalohk. Ahpw ma kitail sohte kanahieng, atail pwukoa kan nan wasahn doadoahk kakete kerempwahla atail kaudok. Kitail kak sukuhlkihsang dahme wiawihong emen brother nan Thailand. E nda: “Ei doadoahk nin duwen emen me kin kamwahwihala computer kan uhdahn kaperen, ahpw met kin pidada doadoahngkihla awa tohto ni ahnsoun doadoahk. Met imwikihla kereniong sohte ei ahnsou ong soahng kan me pid ei kaudok. I esehda me I anahne wekidala mwomwen ei kin doadoahk pwe ien kak mwohneki mahs Wehio.” Dahme brother menet wia?

⁸ E nda: “Mwurin ei medemedewe ei koasoandi kan erein sounpar ehu, I pilada en wiahda ei  pesines en netiki aiskurihm limwahn ahl akan. Nin tapio, I ahneki kahpwal en mwohni oh I mworusala. Ni ei kin tuhwong iengei tohndoadoahk en mahs ko, re kin kouruhrkin ie oh idek dahme kahrehda I medewe me netiki aiskurihm mwahusang kamwahwihala computer kan nan wasa me mie aircon. I kapakap ong Siohwa oh peki en ketin sewese ie en dadaur oh en lel ei mehn akadei en kalaudehla ei ahnsou ong papah ih. Sohte pwand, soahng kan tepida mwahula. I esehla dahme nei costumer kan iouki oh ei koahiek en wiahda aiskurihm pil laudla. Mwurinte mwo, rahn koaros I kin netikihla ei aiskurihm kan koaros. Ni mehlel, I wiahda mwohni laudsang ahnsou me I kin kamwahwihala computer kan. Ei peren laudla pwehki I sohte ahneki soangen pwunod me I ahneki nan ei doadoahk en mahso. Oh keieu kesempwal, met I pehm me I karanihala Siohwa.”​—Wadek Madiu 5:3, 6.

9. Ia duwen atail kak pousehlahte ahneki madamadau toupahrek ong atail doadoahk en mwohni?

⁹ Siohwa kin ketin kalahnganki atail doadoahk laud. Doadoahk laud kin wia kamwahupatail. (Lep. Pad. 12:14) Ahpw kitail anahne tehk mwahu me atail doadoahk en mwohni en dehr wiahla mehkot me kesempwalsang atail kin papah Siohwa. Ni eh ketin mahsanih duwen atail anahn akan, Sises mahsanih: “Eri, kumwail rapahki mahs Wehin Koht oh dahme e kin ketin kupwurki, a soahng teikan koaros e ahpw pahn ketikihong kumwail.” (Mad. 6:33) Ahpw ia duwen atail ese ma kitail kin ahneki madamadau toupahrek ong doadoahk en mwohni? Kitail kak idek rehtail, ‘I kin perenki ei doadoahk en mwohni ahpw medewe me ei papah Koht kin wiahte koasoandi ehu me I kin wiewia de e kasangat?’ Atail medemedewe peidek pwukat kak sewese kitail en kilang ni sansal dahme kitail uhdahn perenki.

10. Mehn kasukuhl kesempwal dahieu me Sises ketin padahkihong kitail?

¹⁰ Sises ketin padahkihong kitail dahme kitail en mwohneki mahs nan atail mour. Ehu pak e ketin mwemweitla ni imwen pirien ehu, Mery oh Marda. Marda tepida kaunopada kisin tungoal ong Sises, ahpw Mery mwohd limwahn Sises oh wie rongorong sapwellime padahk. Marda kaulimki Mery eh sohte sewese ih. Sises mahsanihong Marda: “Mery piladahr mehkot mwahwie; eri, sohte me pahn adihasang.” (Luk 10:38-42) Sises ketikihda mehn kasukuhl mwahu ehu wasaht. Pwe kitail en soikala kedirepwki pein atail anahn akan oh kadehdehda duwen atail poakohng Krais, kitail anahne pilada “mehkot mwahwie.” Met wehwehki me atail nanpwungmwahu rehn Siohwa anahne ahnsou koaros wia mehkot me keieu kesempwal nan atail mour.

11. Dahme Paipel mahsanihki duwen kommoal?

¹¹ Kitail kin kalapw kedirepw, eri ekei pak kitail anahne kommoal. Kitail kin wadek nan Paipel: “Me keieu mwahu ong aramas emen en wia iei en mwenge oh nim oh pereperenki wahn eh doadoahk.” (Ekl. 2:24) Sises mwahngih me e kesempwal ong sapwellime tohnpadahk ko ren kommoal. Karasepe, mwurin arail doadoahk laud nan kalohk, Sises mahsanihong irail: “Kitail kohla kalapwukala mahs nan sapwtehno, wasa kumwail kak kommoal ie.”​—Mark 6:31, 32.

12. Dahme kahrehda kitail anahne kanahieng mehn kamweit oh mwadong kan? Menlau kihda ehu karasaras.

¹² Mehn kamweit oh mwadong kak sewese kitail en kommoal. Ahpw kitail anahne kanahieng me nsenohki atail peren en dehr wiahla mehkot me keieu kesempwal nan atail mour. Ni mwehin tepin Kristian ko, me tohto kin ahneki soangen madamadau wet: “Kitail en kin kamakamadipwte, pwe lakapw kitail pahn mehla.” (1 Kor. 15:32) Ih soangen madamadau wet me me tohto kin ahneki rahnwet. Karasepe,  mwahnakapw emen nan pali kapi en Iurop tepida towehda mihting en Kristian kan. Ahpw eh perenki mehn kamweit kan uhdahn laud me kahrehiong en uhdihsang werekiong Sounkadehdehn Siohwa kan. Mwuhr, e esehda me eh kin perenki mehn kamweit kan kin kahrehiong ih nan kahpwal tohto. Ih eri pwurehng tepida onop Paipel oh kedekedeo, e kakehr iang kalohki rongamwahwo. Mwurin eh papidaisla, e nda: “Ihte me I koluhkihla iei ei kauwehla ahnsou laud mwohn ei esehda me en papah Siohwa kin wahdo peren laudsang raparapahki mehn kamweit kan me sampah wet kihda.”

13. (a) Menlau kihda ehu karasaras me kasalehda dahme kahrehda kihong ahnsou laud ong mehn kamweit oh mwadong sohte mwahu? (b) Dahme kak sewese kitail en ahneki madamadau toupahrek ong mehn kamweit kan oh mwadong?

¹³ Mehn kamweit kan kin sewese kitail en kommoal mwahu oh kakehlakaikitailda. Eri ia uwen ahnsou me kitail en kihong mehn kamweit kan? Pwehn sewese kitail en sapengala met, kitail kak medewehla duwen met. Aramas tohto perenki kang keik oh mehkot mem. Ahpw kitail ese me ma kitail kang soahng pwukat ahnsou koaros, e pahn kauwehla atail roson. Ma kitail men ahneki roson mwahu, kitail anahne kang mwenge me mwahu ong kitail. Pil duwehte met, ma kitail kihong pali laud en atail ahnsou ong mwadong oh mehn kamweit kan, e pahn kauwehla atail nanpwungmwahu rehn Siohwa. Dahme kak sewese kitail en ese ma kitail ahneki madamadau toupahrek ong mehn kamweit kan de soh? Ehu me kitail kak wia iei ntingihedi nempehn awa kan nan wihk ehu me kitail kin doadoahngkihla ong soangen wiewia kan me pid atail kaudok ong Siohwa, me duwehte mihting en Kristian kan, doadoahk en kalohk, oh onop Paipel. Mwuhr kitail ntingihedi nempehn awa kan me kitail doadoahngkihla nan wihkohte ong soahng kan me duwehte mwadong, kilang TV, de video game kan. Ni atail kapahrekihpene nempe riau pwukat, dahme kitail sukuhlki? Mie anahnepen atail en wekidala met?​—Wadek Episos 5:15, 16.

14. Dahme kak sewese kitail en pilada soangen mwadong oh mehn kamweit me mwahu?

¹⁴ Siohwa kin ketin mweidohng kitail en pilada atail mehn kamweit kan, oh tapwin peneinei kan kak pil pilada mehn kamweit kan ong arail peneinei. Nan Paipel, Siohwa ketikihong kitail kaweid kan me kin kasalehda sapwellime madamadau. Kaweid pwukat sewese kitail en wiahda pilipil mwahu kan. * Mehn kamweit mwahu kan iei “kalahngan en Koht.” (Ekl. 3:12, 13) Mehlel me dahme aramas akan mwahuki me pid duwen mehn kamweit kan kin wekpeseng. (Kal. 6:4, 5) Eri sohte lipilipil soangen mehn kamweit dah me kitail pilada, kitail pil anahn kanahieng. Sises mahsanih: “Pwe ahnsou koaros kapehdamwail kin uhlahng wasa me amwail dipwisou kesempwal kan kin mi ie.” (Mad. 6:21) Atail poakohng Sises pahn kamwakid kitail en medewe, koasoi, oh mwekid ni ahl ehu me kasalehda me Wehio kin kesempwal ong kitail laudsang soahng teikan koaros.​—Pil. 1:9, 10.

15, 16. (a) Ia duwen noahrok kepwe eh kak wiahla lidip ehu ong kitail? (b) Kaweid mwahu dahieu me Sises ketikihda duwen kepwe kan?

¹⁵ Me tohto rahnwet pehm me re anahne ahneki likou, naineki cellphone, computer, oh soahng kan me keieu kapw. Re kin mweidohng noahrok kepwe en kamwakid arail mour, elen mour ehu me kin kahrehiong irail en kesempwalki soahng kan oh mwohni en laudsang soahng teikan koaros. Nin duwen Kristian men, dahme ke keieu kesempwalki? Pein idek rehmw, ‘I kin kihong ahnsou laud en medemedewe duwen sidohsa de sidail en likou kan me keieu kapw laudsang ei kin kaunopada ong mihting en  mwomwohdiso? I kin nohn kedirepwkihla ei wiewiahn ehuehu rahn me kahrehiong ie en katikala ei ahnsou en kapakap de wadek Paipel?’ Ma kitail sohte kanahieng, noahrok kepwe kak wiahla mehkot me keieu kesempwal laudsang atail poakohng Krais. Kitail anahne medemedewe mahsen en Sises pwukat: “Kumwail kalekeikumwailsang noahrok suwed koaros.” (Luk 12:15) Dahme kahrehda e mahsanihki met?

¹⁶ Sises mahsanih me “sohte aramas emen kak liduwih soumas riemen.” E pil mahsanih: “Kumwail sohte kak papah Koht oh pil Kepwehn Sampah kan.” Kitail sohte kak patohwanohng Siohwa dahme keieu mwahu rehtail oh ni ahnsowohte pil medemedewe kepwe kan. Sises ketin kawehwehda me kitail pahn “kailongki emen, . . . ahpw pahn poakepoake meteio” de “loalopwoatohng emen, . . . ahpw pahn mwamwahliki meteio.” (Mad. 6:24) Pwehki kitail soh unsek, kitail anahne pelianda “ineng en paliwaratail kan,” iangahki noahrok kepwe.​—Ep. 2:3.

17. (a) Dahme kahrehda ekei kin apwalki en ahneki madamadau toupahrek ong kepwe kan? (b) Dahme kak sewese kitail en pelianda noahrok kepwe?

¹⁷ Aramas tohto kin medemedewehte arail ineng oh peren kan me kahrehiong ren apwalki ahneki madamadau toupahrek ong kepwe kan. (Wadek 1 Korint 2:14.) Pwehki re sohla kin medewe mwahu soahng kan, e kin apwal ong irail en ese wekpeseng en dahme pwung oh sapwung. (Ipru 5:11-14) Arail ineng en noahrok kepwe kak wie lalaudla. Eri ni arail kadirehla dahme re kin ale, arail ineng pil laudla. (Ekl. 5:10) Ahpw mie mehkot me kitail kak wia pwehn pelianda elen madamadau wet. Atail kaukaule wadek Mahsen en Koht pahn kakehlakaikitailda pwe kitail en kak pelianda noahrok kepwe. (1 Pit. 2:2) Sises kin ketin doudouloale sapwellimen Siohwa erpit, oh met kin sewese ih en ketin pelianda ahn Tepilo kasongosong. Pil rahnwet, ma kitail men pelianda noahrok kepwe, kitail anahne doadoahngki sapwellimen Siohwa erpit nan atail mour. (Mad. 4:8-10) Met pahn kasalehiong Sises me kitail poakohng ih laudsang kepwe kan.

18. Dahme ke koasoanehdi teng en wia?

¹⁸ Ni Sises eh ketin keinemwe rehn Piter, “Ke poakohng ie laudsang mepwukat?” e kin ketin padahkihong Piter me papah Siohwa anahne keieu kesempwal nan eh mour. Eden Piter kin wehwehki “Paipalap Ehu.” Ahn Piter irair kaselel kan kak pahrekiong paipalap ehu. (Wiewia 4:5-20) Rahnwet, kitail pil men atail poakohng Krais en kehkehlailte. Eri kitail en tehk mwahu me nan atail mour, kitail en ahneki madamadau toupahrek ong doadoahk en mwohni, mehn kamweit kan, oh kepwe kan. Eri duwehte Piter, e pahn mwomwen me kitail ndinda: “Ei Maing ei Kaun, komw mwahngiher me I poakohng komwi.”