1, 2. Yini leyenteka kuPhetro ngemuva kwekucitsa busuku bonkhe advweba?

BAFUNDZI baJesu labasikhombisa bebacitse busuku bonkhe badvweba tinhlanti elwandle lwaseGalile, kodvwa bangabambi lutfo. Jesu lobekavusiwe, bekahleti elugwini lelwandle futsi abuka lelicembu lebadvwebi. Ngako, “yena watsi kubo: ‘Jikani lelinethi ngesekudla salesikebhe, futsi tikhona lenitatibamba.’ Ngako balijika, kodvwa abazange basakhona kulidvonsa ngobe beseligcwele tinhlanti letinyenti.”—Joh. 21:1-6.

² Ngemuva kwekubanika kudla kwasekuseni, Jesu watsi kuSimoni Phetro: “Simoni ndvodzana yaJohane, uyangitsandza yini kwendlula leti?” Abesho kutsini Jesu ngalamavi? Phetro bekakutsandza kakhulu kudvweba. Kubonakala shengatsi Jesu bekambuta kutsi yini lebekayitsandza kakhulu. Bekatsandza kakhulu tinhlanti nelibhizinisi lekudvweba yini ngetulu kwekutsandza Jesu netintfo lebekamfundzise tona? Phetro waphendvula watsi: “Yebo Nkhosi, uyati kutsi ngiyakutsandza.” (Joh. 21:15) Phetro waphila ngekuvumelana nemavi akhe. Kusukela ngalelolanga, wakhombisa lutsandvo lwakhe  ngaKhristu ngekutsi abe matasa emsebentini wekwenta bafundzi, lokwamenta waba yinsika ebandleni lebuKhristu langelikhulu lekucala.

3. Nguyiphi ingoti emaKhristu lokufanele ayicaphele?

³ Yini lesingayifundza kulamavi Jesu lawasho kuPhetro? Kufanele sicaphele kutsi lutsandvo lwetfu ngaKhristu alunciphi futsi asivumeli lutfo kutsi luphatamise lutsadvo lesinalo ngeMbuso waNkulunkulu. Jesu bekatati tintfo leticindzetela bantfu kulelive lesiphila kulo. Emfanekisweni waJesu wemhlanyeli, watsi labanye bebatalemukela “livi lembuso” futsi batfutfuke, kepha “tinkinga talelive kanye nekuyenga kwemcebo” ‘bekutaliminyetela livi.’ (Mat. 13:19-22; Mak. 4:19) Ngako nangabe singakacapheli, kukhatsateka ngekuphila kwamalanga onkhe kungasicindzetela futsi kubangele kutsi lizinga lesinaka ngalo tintfo letiphatselene naNkulunkulu lehle. Jesu wecwayisa bafundzi bakhe watsi: “Ticapheleni kute tinhlitiyo tenu tingasindvwa kumita, kudzakwa kanye netinkhatsato tekuphila.”—Luk. 21:34.

4. Yini letasisita kute sibone kutsi lujule kangakanani lutsandvo lwetfu ngaKhristu? (Buka sitfombe lesisekucaleni kwalesihloko.)

⁴ Njengoba Phetro akwenta loko Jesu latsi akakwente, natsi sikhombisa kutsi siyamtsandza Khristu ngekutsi sente umsebenti lasinike wona ute kucala ekuphileni kwetfu. Singaciniseka njani kutsi siyachubeka nekuwenta lomsebenti? Ngaso sonkhe sikhatsi, kufanele sitibute imibuto letsi: ‘Yini lengiyitsandza kakhulu ekuphileni kwami? Tintfo lengititsandza kakhulu tingenta ngibe matasa emsebentini wekutijabulisa yini noma tingenta ngibe matasa emsebentini weNkhosi?’ Kute siphendvule lemibuto, ake sicoce ngetintfo letintsatfu letinganciphisa lutsandvo lwetfu ngaKhristu nangetintfo letiphatselene naNkulunkulu nangabe singatibeki endzaweni lefanele. Letintfo tifaka ekhatsi umsebenti wekutiphilisa, sikhatsi sekutijabulisa kanye nemcebo.

5. Ngumuphi umtfwalo tinhloko temindeni letiwunikwe nguNkulunkulu?

⁵ Kudvweba bekungetulu nje kwekucitsa situnge kuPhetro. Bekungumsebenti labetiphilisa ngawo. Lamuhla tinhloko temindeni tiyati kutsi tinemtfwalo letiwunikwe nguNkulunkulu wekondla imindeni yato. (1 Thim. 5:8) Kufanele basebente kamatima kute bawente kahle lomsebenti labanikwe wona. Noma kunjalo, kulamalanga ekugcina umsebenti wekutiphilisa uyimbangela lenkhulu yekucindzeteleka.

6. Ngukuphi kucindzeteleka lokukhona etinkapaneni letinyenti lamuhla?

⁶ Ngesizatfu sekutsi imisebenti seyiyindlala, tisebenti letinyenti tiphoceleleka kutsi tisebente ema-awa lamanyenti kodvwa tibe titfola liholo lelincane. Kwandza kwalokufanele kukhicitwe, nako kubangela bantfu kutsi badzinwe baphindze bacindzeteleke. Tisebenti letingafuni kusebenta matima tiba sengotini yekulahlekelwa ngumsebenti.

7, 8. (a) Ngubani lokufanele setsembeke kuye kucala? (b) Ngusiphi sifundvo lesihle umzalwane waseThailand lasifundza ngemsebenti wakhe?

⁷ NjengemaKhristu, kwetsembeka kuNkulunkulu Jehova kufanele kute kucala kunakubacashi betfu. (Luk. 10:27) Umsebenti wekutiphilisa umane uyindlela yekutisekela. Sisebentela kutsi sinake tidzingo tetfu tekuphila kanye nekutisekela emsebentini wekushumayela. Noma kunjalo, nangabe singakacapheli, umsebenti wetfu wekutiphilisa ungaphatamisa kukhonta kwetfu. Nasi sibonelo, lomunye umzalwane eThailand watsi: “Umsebenti wami wekulungisa bongcondvomshini bengiwutsandza, kodvwa bewufuna ngisebente ema-awa lamanyenti. Ngenca yaloko bengitikhandza ngingenaso sikhatsi sekunaka tintfo letiphatselene naNkulunkulu. Ekugcineni ngabona kutsi kute ngibeke uMbuso waNkulunkulu kucala bekufanele ngifune lomunye umsebenti.” Yini lomzalwane layenta?

 ⁸ Nakachaza utsi: “Ngemuva kwemnyaka solo ngihlela kutsi ngitakwentani, ngancuma kutsengisa i-ice cream esitaladini. Ekucaleni bengitfola imali lencane kakhulu futsi ngativa ngiphelelwa ngemandla. Lebengisebenta nabo ekucaleni bebangihleka futsi bangibute kutsi kungani ngacabanga kutsi kutsengisa i-ice cream kuncono kunekusebenta ngangcondvomshini endzaweni lephucukile. Ngathantaza kuJehova, ngamcela kutsi angiphe emandla ekukhutsatela kute ngikhone kufinyelela umgomo wami wekutfola sikhatsi lesinyenti sekwenta umsebenti lophatselene neMbuso wakhe. Ngekushesha nje, timo taba ncono. Ngalwati kancono luhlobo lwe-ice cream lolutsandvwa ngemakhasimende ami futsi ngaba nguchwephesha ekwakheni i-ice cream. Ngekushesha nje, onkhe malanga besengiyitsengisa yonkhe i-ice cream lengiyentile. Ecinisweni, ngase ngiba nemali lenyenti kunangalesikhatsi ngisasebenta ngabongcondvomshini. Ngiyajabula ngoba angisacindzeteleki futsi angisakhatsateki njengoba ngangikhatsateka nangisebenta umsebenti wami wasekucaleni. Ngetulu kwako konkhe, nyalo sengisondzele kakhulu kuJehova.”—Fundza Matewu 5:3, 6.

9. Yini lengasisita kute sibe nembono lofanele ngemsebenti wekutiphilisa?

⁹ Kukhutsala kubuntfu baNkulunkulu futsi kusebenta kamatima kunemvuzo lomuhle. (Taga 12:14) Noma kunjalo, njengoba lomzalwane lokukhulunywe ngaye langenhla enta, umsebenti wekutiphilisa kufanele ubekwe endzaweni yawo. Jesu watsi: “Chubekani nifuna kucala uMbuso waNkulunkulu nekulunga kwakhe, tonkhe leletinye tintfo [tintfo lenitidzingako] nitawengetelwa tona.” (Matewu 6:33) Kute sikhone kubona kutsi sinembono lofanele yini ngemsebenti wekutiphilisa nangemisebenti lephatselene neMbuso, kufanele sitibute nangu umbuto lotsi: ‘Umsebenti wami wekutiphilisa ngiwutsandza kakhulu yini bese kutsi imisebenti lephatseleni neMbuso yona ngiyibheke njengentfo levamile noma intfo lengiyenta nangitfola sikhatsi?’ Nasizindla ngendlela lesitiva ngayo ngemsebenti wetfu wekutiphilisa kanye nangemsebenti lophatselene naNkulunkulu, sitawukhona kubona kutsi ngukuphi lesikutsandza kakhulu.

10. Ngusiphi sifundvo lesibalulekile Jesu lasifundzisa sona mayelana nekubeka tintfo letiphatselene naNkulunkulu kucala ekuphileni kwetfu?

¹⁰ Jesu wasibekela sibonelo lesihle ngemsebenti wekutiphilisa kanye nangemsebenti lophatselene naNkulunkulu. Ngalelinye lilanga Jesu wavakashela ekhaya laboMariya nadzadzewabo longuMata. Ngesikhatsi Mata atatatela alungisa kudla, Mariya wakhetsa kuhlala ngasetinyaweni taJesu, alalele loko bekakhuluma ngako. Ngalesikhatsi Mata akhonona ngaMariya kutsi bekangamsiti ngalutfo, Jesu watsi kuMata: “Mariya yena ukhetse lokuncono kakhulu, futsi ngeke emukwe kona.” (Luk. 10:38-42) Jesu bekafundzisa Mata sifundvo lesibalulekile. Kute singavumeli kutsi umsebenti wekutiphilisa usiphatamise, futsi usivimbele kutsi sikhombise lutsandvo lesinalo ngaKhristu, kufanele sikhetse “lokuncono kakhulu,” lokusho kubeka tintfo letiphatselene naNkulunkulu kucala ekuphileni kwetfu.

11. ImiBhalo isifundzisani mayelana nekuphumula kanye nekutijabulisa?

¹¹ Siyasidzinga sikhatsi sekuphumula nesekutijabulisa nangabe besimatasa futsi senta imisebenti lematima. Livi laNkulunkulu litsi: “Kute lokuncono umuntfu langakwenta ngaphandle kwekutsi adle anatse eneliseke ngemsebenti wakhe.” (Shu. 2:24) Jesu abekhombisa kutsi sikhona sidzingo sekuphumula ngalesinye sikhatsi. Ngemuva kwekushumayela sikhatsi lesidze, Jesu watsi kubafundzi bakhe: “Kotani siye endzaweni lethulile kute siphumule.”—Mak. 6:31, 32.

12. Yini lokufanele siyicaphele mayelana nesikhatsi sekuphumula nesekutijabulisa? Niketa sibonelo.

 ¹² Kuliciniso kutsi kuphumula kanye nekutijabulisa kubalulekile. Noma kunjalo, kunengoti lenkhulu nangabe tikhatsi letimnandzi setita kucala ekuphileni kwetfu. Bantfu labanyenti belikhulu lekucala bebanembono lotsi: “Asidleni sinatse, ngobe kusasa sitawufa.” (1 Khor. 15:32) Nasesikhatsini setfu, bantfu labanyenti banembono lofanako etindzaweni letinyenti emhlabeni wonkhe. Nasi sibonelo, eminyakeni leyendlulile lelinye lijaha leliselincane laseNshonalanga neYurophu lacala kuya emihlanganweni yebuKhristu. Lelijaha belitsandza kakhulu kutijabulisa kangangekutsi laze layekela kutihlanganisa nebantfu baJehova. Noma kunjalo, ngekuhamba kwesikhatsi labona kutsi kutsandza kakhulu injabulo bekulifake etinkingeni nasekudvumatekeni. Ngako laphindze lavuma kufundzelwa liBhayibheli futsi ngekuhamba kwesikhatsi lakufanelekela kuba ngumshumayeli wetindzaba letinhle. Ngemuva kwekubhajatiswa kwalo, latsi: “Ngiyatisola kutsi ngadlala ngesikhatsi lesinyenti ngaphambi kwekube ngibone kutsi kukhonta Jehova kuletsa injabulo lengetulu kwekuphishanekela kutijabulisa lokuletfwa ngulelive lesiphila kulo.”

13. (a) Niketa sibonelo mayelana nengoti lengaba khona nangabe sesinake kakhulu kutijabulisa. (b) Yini lengasisita kute sibe nembono lofanele ngekuphumula nangekutijabulisa?

¹³ Injongo yekutijabulisa kutsi siphumule futsi sicabuleke. Kufanele siphumule sikhatsi lesinganani? Cabanga nganasi sibonelo: Linyenti letfu liyatsandza kudla emakhekhe ngaletinye tikhatsi, kodvwa siyacaphela kutsi kuwadla njalo kungaba yingoti ekuphileni kwetfu. Ngako-ke, sidla kakhulu kudla lokunemphilo. Ngendlela lefanako, kunaka kakhulu tekuphumula netekutijabulisa kungalimata buhlobo betfu naNkulunkulu. Kute sitivikele kuloko kulimala, sihlala simatasa ngemisebenti lephatselene naNkulunkulu. Singati njani kutsi sinembono lokahle ngekutijabulisa? Singakhetsa liviki linye, bese sigcina imininingwane yema-awa lesiwasebentisile kuleloviki nasenta imisebenti lephatselene naNkulunkulu, lefaka ekhatsi kuya emihlanganweni, emsebentini wekushumayela kanye nesifundvo seliBhayibheli lesitichubela sona nekukhonta kwemndeni. Ngemuva kwaloko, singabese sicatsanisa nema-awa lesiwasebentisile kuleloviki emisebentini yekutijabulisa, lenjengemidlalo, kubukela ithelevishini noma imidlalo yema-video. Utfoleni nawucatsanisa? Kukhona yini lapho kufanele unciphise khona endzabeni yekutijabulisa?—Fundza Efesu 5:15, 16.

14. Yini lengasisita kute sikhetse kahle indlela yekuphumula kanye neyekutijabulisa?

¹⁴ Umuntfu ngamunye kanye netinhloko temindeni, tinelilungelo lekukhetsa tindlela tekutijabulisa, uma nje leto tindlela tihambisana netimiso taJehova letiseBhayibhelini. * Kuphumula “kusipho saNkulunkulu.” (Shu. 3:12, 13) Kuliciniso kutsi tindlela tekutijabulisa lesitikhetsako ngeke tifanane. (Gal. 6:4, 5) Kungakhatsaliseki kutsi nguluphi luhlobo lekutijabulisa lesilukhetsako, sifuna kuba nembono lokahle ngalo. Jesu watsi: “Lapho kunemcebo wakho khona, kulapho nenhlitiyo yakho itawuba khona.” (Mat. 6:21) Ngako, lutsandvo lwetfu lolusuka enhlitiyweni ngaJesu, lutasishukumisela kutsi loko lesikucabangako, lesikukhulumako kanye nalesikwentako kugcile emisebentini lephatselene neMbuso kunekutsi sinake kakhulu tinkhatsato tekuphila tamalanga onkhe.—Fil. 1:9, 10.

15, 16. (a) Kutsandza umcebo kungaba lugibe ngayiphi indlela? (b) Ngusiphi seluleko lesibalulekile Jesu lasiniketa sona mayelana nekutsandza tintfo letinyenti?

¹⁵ Bantfu labanyenti lamuhla batsandza kakhulu kuba netimphahla letikufashini, tintfo  tebucwephesha takamuva kanye naletinye tintfo letisezingeni lelisetulu. Ngako, umKhritsu ngamunye kufanele ahlale atibuta nayi imibuto: ‘Ngabe kutsandza kuba netintfo letinyenti kumcoka kakhulu yini kimi kangangekutsi ngisebentisa sikhatsi sami lesinyenti ngicwaninga ngetimoto teluhlobo lolusha noma ngicabanga ngetimphahla letikufashini, kunesikhatsi lengisisebentisela kulungiselela imihlangano yelibandla? Ngiba matasatasa kakhulu yini ngemisebenti yami yekutiphilisa kangangekutsi ngiba nesikhatsi lesincane sekuthantaza noma sekufundza liBhayibheli?’ Nangabe siyabona kutsi kutsandza kuba netintfo letinyenti sekutsatsele sikhundla lutsandvo lwetfu ngaKhristu, kufanele sinake emavi aJesu latsi: “Nitibalekele tonkhe tinhlobo tebukhali.” (Luk. 12:15) Kungani Jesu asiniketa lesecwayiso lesibaluleke kangaka?

¹⁶ Jesu watsi: “Kute umuntfu longasebentela emakhosi lamabili. Ngeke nikhonte Nkulunkulu kanye nemcebo.” Sizatfu saloko kutsi omabili ‘lamakhosi’ afuna sitinikele kuwo ngendlela lekhetsekile. Jesu watsi: “Ngobe uyakutondza lenye, atsandze lenye.” noma “uyakwetsembeka kulenye ayedzelele lenye.” (Mat. 6:24) Njengobe sibantfu labanesono, sonkhe sidzinga kulwa netinkhanuko “tenyama yetfu.”—Ef. 2:3.

17. (a) Kungani bantfu labacabanga tintfo tenyama bakutfola kumatima kuba nembono lokahle ngemcebo? (b) Yini lesisita kutsi sikhone kulwisana netifiso tekutsandza umcebo?

¹⁷ Bantfu labacabanga tintfo tenyama bakutfola kumatima kuba nembono lokahle ngekufuna kuba netintfo letinyenti. Kungani? Sizatfu kutsi, kubo tintfo letiphatselene naNkulunkulu tibulima. (Fundza 1 Khorinte 2:14.) Nangabe likhono labo lekwahlulela seliphatamisekile, kuba matima ngabo kwehlukanisa emkhatsini walokulungile nalokungakalungi. (Heb. 5:11-14) Ngenca yaleso sizatfu, labanye batikhandza sebangasakhoni kulawula sifiso sekuba netintfo letinyenti, lekusifiso lesingayoze senetiswe. (Shu. 5:10) Siyajabula kutsi sinelikhambi, lokuliVi laNkulunkulu liBhayibheli, lelisisita kutsi sibe nembono lokahle ngemcebo nangabe silifundza njalo. (1 Phet. 2:2) Kuzindla ngeliciniso lelivela kuNkulunkulu lelasita Jesu wakhona kumelana nekulingwa, kanye nekusebentisa timiso teliBhayibheli, kungasisita kutsi sikhone kulwa netifiso tekutsandza umcebo. (Mat. 4:8-10) Nangabe senta kanjalo, sisuke sikhombisa Jesu kutsi simtsandza ngetulu kwemcebo.

18. Yini lotimisele kuyenta?

¹⁸ Ngesikhatsi Jesu abuta Phetro umbuto lotsi: “Uyangitsandza yini kwendlula leti?” bekamkhumbuta sidzingo sekubeka tintfo letiphatselene naNkulunkulu kucala ekuphileni kwakhe. Phetro, lokuligama lelisho “Lidvwala,” waphila ngekuvumelana nelibito lakhe, ngoba wakhombisa buntfu lobucine njengelidvwala. (Imis. 4:5-20) Natsi lamuhla, kufanele sitimisele kuba nelutsandvo lolucinile ngaKhristu, sibe nembono lokahle ngemsebenti wekutiphilisa, kutijabulisa kanye nemcebo. Kwangatsi tintfo lesitikhetsako tingakhombisa kutsi natsi silingisa Phetro lowatsi kuJesu: “Nkhosi, uyati kutsi ngiyakutsandza.”